Me një vëllim prej 440 faqesh, posa ka dalë numri i ri i revistës letrare të traditës “Jeta e re”. Ky numër fillon me Kasëm Trebeshinën, shkrimtarin tonë të mirënjohur, i cili vdiq më 11 dhjetor 2017 në Tiranë. Në shenjë kujtimi e nderimi, ky autor është prezentuar me prozën e gjatë “Kukudhi”.

Në rubrikën Ligjëratë, kemi një ligjëratë të shkrimtarit Salman Ruzhdie me titullin “Ndikimi”, mbajtur në Torino të Italisë.

Rubrika e prozës nis me shkrimtarin shumë të njohur meksikan, Carlos Fuentes-in. Ai vjen në këtë numër me tregimin “Vija e jetës”, kurse shkrimtari gjithashtu i njohur italian Italo Calvino me “Njëri prej treve është ende gjallë”, për të vazhduar me prozat e shkurtra të Khalil Gibran-it “Ti e ke ideologjinë tënde, unë e kam timen”, pastaj me “Arrestimi” të shkrimtarit amerikan Ambrose Bierce dhe “Jo unë” të Samuel Becket-it. Rubrika vazhdon me një numër tregimesh të autorëve tanë. Kështu, Agim Vinca është prezentuar me “Tregime të vërteta”, Xhavit Beqiri me “Dora prej qelqi”, Azem Qazimi me “Vende të padukshme, njerëz të padukshëm” dhe Kismete Hyseni me prozën “Mirja”.
Rubrika e poezisë nis me Këngën XI të “Serafina Topisë me titullin “Fialeve” të Jeronim de Radës, botim i parë i vitit 1839, zbuluar nga Gianni Belluscio dhe prezentuar për herë të parë në Seminarin XXXVI Ndërkombëtar për Gjuhën, Letërsinë dhe Kulturën Shqiptare. Kjo rubrikë vazhdon me autorin Ko Un, poetin veriokorean më të lexuar e më të përkthyer në botë, prej kohësh kandidat për çmimin Nobel, pastaj vazhdon me poetin italian Giovani Giudici dhe me poetët e krijuesit zviceranë Gerhard Meister, Ariane von Graffnried, Marel Kureyshi dhe Guy Krneta, të cilët kohë më parë qëndruan në Kosovë në kuadër të organizimit kulturor Kosovë is Everywhere, i projektuar si një festival dhe turne kulturor.
Me nga një cikël poezish në këtë numër janë paraqitur një numër autorësh tanë, si: Milazim Krasniqi, Jonuz Fetahaj, Dije Demiri-Frangu, Azem Deliu dhe Rrahim M.Sadiku.

Ndërkaq, rubrika Intervista sjell Lorenco Bonol-in, filozofin dhe profesorin e Universitetit të Lozanës, të specializuar për çështjet e gjuhës nga aspekti semiotik dhe estetik.

Në rubrikën Dossier, në një hapësirë prej shtatëdhjetë faqesh, kemi fituesin e sivjetëm të Nobelit, Kazuo Ishigro-n. Rubrika fillon me fjalën që ky autor ka mbajtur me rastin e pranimit të Nobelit, për të vazhduar me intervistën me titullin “Kam dy figura hyjnore: Çehovin dhe Dostojevskin”, pastaj me një fragment të romanit “Mbetjet e ditës” dhe me vështrimin kritik po për këtë roman me titullin “Keqkuptimi i historisë: Bashkëfajësia e zhanreve në romanin “Mbetjet e ditës” të autorit Bo G. Ekelund. Rubrika përfundon edhe me një intervistë tjetër të gjatë të Ishiguro-s me titullin “Fantastika në jetën time”.

Në rubrikën e kritikës janë prezentuar një sërë autorësh tanë dhe të huaj. Rubrika nis me tekstin “Historia dhe poetika” të Gerard Genette dhe vazhon me “Historia, letërsia dhe filozofia, një punë inovative gjuhësore” të Lorenzo Bonol-it, “Unë tumir shumëfishmërinë” të Terry Aegleton-it, “Hymnet kombëtare – fryma e përbashkësisë” të Vehbi Miftarit, “Mbijetesa në kujtesën e lexuesit përtej librit” të Ermira Imerajt, “Skënderbeu me zemërimin e Akilit dhe dilemën hamletiane” të Arian Krasniqit dhe “Averroes: Komentet mbi “Poetikën” e Aristotelit” të Ilir Brecës.

Përkthyesit që kontribuan në këtë numër janë: Bajram Karabolli, Gëzim Aliu, Alket Çani, Avdi Visoka, Arben Idrizi, Belfjore Qose, Alfred Beka, Rexhep Maloku, Ismail Ismaili, Naim Kryeziu, Mirela Shella, Rrahime Gashi, Rrona Jaka dhe Demë Topalli. / KultPlus.com