Titullohet “Briciole di gioia” (Grimca gëzimi) libri më i ri i poetes shqiptare me banim në Itali, Irma Kurti.

Kjo përmbledhje me 65 poezi është e ndarë në dy pjesë: “Nell’universo dell’amore” (Në universin e dashurisë) dhe “Anime perse” (Shpirtra të humbura). Parathënia është shkruar nga shkrimtarja dhe përkthyesja Vesna Andrejević, e cila ndër të tjera, shkruan: “Poetja dhe shkrimtarja italo-shqiptare, me vargjet e saj të bukura dhe të sinqerta që prekin drejtpërdrejt  zemrën e lexuesit, i përgjigjet gjithashtu edhe pyetjes nëse është e mundur të shkruash e të thurësh poezi në një gjuhë tjetër përveç gjuhës amtare.

Një argument delikat ky, siç është vetë përpjekja poetike, por e arrirë me sukses në rastin e Kurtit. Poezia e saj është e pastër, e thjeshtë dhe e bukur në sinqeritetin e saj, aq bindëse sa prek menjëherë telat e zemrës me një lloj “naiviteti”, pikërisht atë që kanë vetëm fëmijët dhe poetët. Në fakt, në përmbledhjen poetike të Kurtit, që përmban poezi me tematikë të larmishme, gjithçka duket e thjeshtë dhe e lehtë, por të shkruash poezi në një gjuhë tjetër është një përpjekje herkuliane apo një mundim si ai Sizifit. Një punë e vështirë, intensive, asnjëherë e vlerësuar sa duhet nga vetë folësit e gjuhës amtare, por prapëseprapë një mënyrë e çmuar për të pasuruar si shpirtin human ashtu edhe atë ‘kulturor’ që na përket sipas zgjedhjes, rrjedhës së ngjarjeve, jetës e kështu me radhë.”

Irma Kurti ka filluar të shkruajë e të botojë qysh në moshë të vogël. Njihet nga publiku edhe si autore e suksesshme e teksteve të këngëve në festivale të muzikës së lehtë në Shqipëri, Kosovë e Maqedoni.

Ka botuar njëzet e dy libra në gjuhën shqipe dhe pesëmbëdhjetë në italisht. Veprat e saj janë përkthyer në gjuhën angleze, spanjolle, franceze, rumune dhe serbe./ KultPlus.com