Koncerti i Violonçelistes franceze Aurélienne Brauner, të mërkurën mbrëma, në atelienë e Pallatit të Rinisë shënoi rikthimin dhe hapjen e edicionit të 19-të të Festivalit Ndërkombëtar të Muzikës “DAM Festival”, në skenën artistike vendore.

Në një ambient të improvizuar, me ulëse në formë harkore, që përballë kishte një skenë me tre ekrane të mëdha që përmbanin numrin romak XIX, ceremoninë hapëse e udhëhoqi Rreze Kryeziu, e cila përveçse falënderoi mysafirët për prezencë, bëri edhe një prezantim të shkurtër të përmbajtjes së programit, i cili për soliste kishte vilonoçelisten franceze.

Pas pak në skenë doli solistja këmbëzbathur Brauner, e cila pjesë të programit interpretues kishte edhe veprën premierë të Dea Ahmës “Lament për violonçel solo”. Pika e parë interpretuese ishte nga autori Johann S. Bach me Suitë për violonçel Nr.1 në G-dur, BWV 1007  me Prelude, Allemande, Courante, Sarabande, Menuetl – Menuet ll dhe Gigue, ku krijoheshin tinguj të qetë, të cilët shkonin e bëheshin më të rrallë e më seriozë, për tu kthyer përsëri në tinguj të qetë e të shpeshtë që ishin të këndshëm për veshin e dëgjuesit.

Pika pasuese ishte Johann S. Bach me Suitë për violonclçel Nr. 2 në d-mol, BWV 1008 (Prelude Allemande, Courante, Sarabande, Menuet l- Menuet ll l dhe Gigue) që dhuroi tinguj me frekuencë më të lartë e më serioze. Një interpretim me dorë zgjatur në telat e çelos nxirrte në pah profesionalzimin e solistes, ndërsa qetësia mes tingujve lejonte shijim dhe integrim të plotë të pikës interpretuese te publiku.

Aurélienne Brauner, e cila është soliste e dalluar e Orkestrës Kombëtare të Francës që nga viti 2021, fituese e çmimit Del Duca nga Académie des Beaux-Arts, krejt në fund para publikut solli veprën e autorit Gaspar Cassado, “Suitë për violonçel solo Preludio- fantasia”. Fundi i koncertit u pasua me duartrokitje frenetike të cilat e rikthyen solisten në skenë disa herë.

Krejt në fund të koncertit, në një prononcim për media, solistja Aurélienne Brauner tha se e kishte shijuar shumë koncertin, i cili pati program të larmishëm interpretues.

“Ishte një performancë solo. Unë e shijova shumë sepse veprat kishin program të larmishëm duke përfshirë Bahun, një pjesë nga kompozitorja Dea Ahma dhe Gaspar Cassado. Ishte kënaqësi të performoj në Prishtinë, në festivalin DAM”, ka thënë solistja duke bërë të ditur se në këtë festival po merrte pjesë pas përshtypjeve pozitive që i kishte lënë Prishtina në vizitën e saj në muajin Mars.

Ndërsa Organizatori i Festivalit, Dardan Selimaj, është shprehur i lumtur që pas shumë sfidave dhe vështirësive, këtë vit është arritur organizimi i edicionit të 19-të të DAM-Festival.

“Nuk e kam paramenduar që edhe pas 19 vitesh do të ballafaqohemi me problemet e njëjta, kryesisht për hapësirat në të cilat organizohet festivali, jo vetëm DAM-i, por edhe “Ta zbardhi ftyrën”, ChopinFest-i, Remuzika ose Kamerfest. Megjithatë, këto 19 vjet kemi qenë insistues që të vazhdojmë tutje, të gjejmë opsione alternative. Ndoshta, më shumë na kanë shtyrë edhe instrumentistët të cilët i kemi ftuar ndër vite, të cilët shëndrrohen në miq të festivalit, ku pastaj natyrshëm rrjedh programi dhe idetë për vitin e ardhshëm. Megjithatë, e rëndësishme është që pavarësisht të gjithë rrugëtimit në fund të organizohet dhe të finalizohet festivali. Jemi të lumtur që edhe këtë herë kemi arritur ta sjellim për publikun dhe ata që kanë dëshirë ta përcjellin këtë program”, ka thënë Selimaj.

Më tej, organizatori Selimaj ka folur edhe për koncertet në ditët pasuese të festivalit, duke paralajmëruar edhe veprën premierë të kompozitorit shqiptar me karrierë në Japoni, Fati Fehmijut.

“Kryesisht janë koncerte me një ose dy instrumentistë, janë koncerte të formatit më të vogël, që në fokus e kanë edhe interpretimin e disa premierave të kompozitorëve shqiptarë. Pjesë e programit është një vepër e Fati Fehmijut, një kompozitor shqiptar i cili jeton në Japoni, krijimtarinë e të cilit nuk e kemi dëgjuar asnjëherë më parë. Ai është një prej personaliteteve më të dalluara të muzikës bashkëkohore në Japoni, është pedagog në njërën prej akademive atje. Një vepër tjetër e cila do të interpretohet është e Liburn Jupollit, dhe disa emra të tjerë që janë lider të muzikës klasike”, ka thënë Selimaj.

Kurse koordinatorja e festivalit, Zana Abazi, tha se rrjedha e koncertit shkoi ashtu siç ishte paraparë, me disa probleme të vogla si shkak i ambientit jo adekuat në të cilin është mbajtur mbrëmja.

“Një koncert me përmasa të tilla  i ka vështirësitë e veta por e ka edhe shpërblimin e vet në fund me paraqitje të festivalit. Gjithçka ka shkuar për mrekulli, me disa prombleme të vogla për shkak të kushteve që tashmë dihen, mirëpo komplet si koncert ka shkuar në mënyrën më të mirë të mundshme”, ka përfunduar Abazi.

DAM Festival do të vazhdojë rrugëtimin e edicionit të 19-të deri më datën 22 shtator, ku adhuruesit e muzikës klasike do të kenë mundësi që të dëgjojnë vepra të kompozitorëve të shquar shqiptarë dhe botërorë./ KultPlus.com