Rreth 30 mijë qytetarë kanë dalë në Sheshin kryesor në Tel-Aviv për ta përcjellë koncertin e fitueses së Eurovizionit këtë vit, Netta Barzilai.

Mbrëmë ajo në Sheshin kryesor ka performuar këngën fituese, me të cilën ia solli Izraelit fitoren e katërt në Eurovizion, të dytën pas 20-të vitesh.

Netta u shndërrua kësisoj në një këngëtare të njohur brenda pak kohësh, pasi të shtunën e 12 majit e fitoi finalen e Eurovizionit këtë vit.

Kënga “Toy” është ritmike dhe tregon fuqinë e femrës, edhe pse ka debate të ndryshme rreth këngës dhe mesazhit të saj feminist.

Shtetet që e kanë fituar më së shumti Eurovizionin janë Irlanda – gjithsej shtatë herë, Suedia gjashtë herë, Anglia dhe Franca e Luksemburgu me nga pesë herë dhe Izraeli e Holanda me nga katër herë secila. / KultPlus.com