Të gjithë adhuruesit e muzikës jazz patën mundësinë të shijojnë performancën e jashtëzakonshme të bandës finlandeze Pekka Pylkkanen No Unit (Peka Pilkanen Nu Unit) në Tiranë.

Në këtë shfaqje muzikore morën pjesë personalitete nga fusha të ndryshme të artit, kulturës dhe politikës.

I pranishëm në aktivitetin e bandës finlandeze ishte dhe ambasadori I Finlandës në Shqipëri, Jari Gustaffson i cili vlerësoi marrëdhëniet e shkëlqyera Finlandë-Shqipëri, si në diplomaci po ashtu dhe në kulturë.

“Jo vetëm marrëdhëniet politike apo diplomatike janë në një nivel të lartë bashkëpunimi, por edhe në aspektin kulturor gjithashtu. Siç e shihni, pas krahëve të mi është banda e mirënjohur e jazz-it Pekka Pylkkanen No Unit të cilët me artin dhe muzikën e tyre do të kontribuojnë në aktivitetet e “Tirana, Kryeqyteti Europian i Rinisë”. Ju do të keni mundësinë të ndiqni bandën e jazz-it me një performancë këtu, sikurse dhe tek aktiviteti tjetër pranë Resë së Tiranës. Kjo është padyshim një nga shfaqjet e para finlandeze të këtij lloji që mbahet ndonjëherë në Tiranë”.

Shfaqja tjetër e bandës muzikore të jazz-it u zhvendos pranë Resë së Tiranës ku qytetarë të shumtë ndoqën performancat unike të finlandezëve.

Grupi finlandez Pekka Pylkkanen No Unit ndodhet në Tiranë si pjesë e aktiviteteve për “Tirana, Kryeqyteti Europian i Rinisë”. Ky grup është një nga më të sukseshmit në Finlandë./Klan News/ KultPlus.com