Festivali Ndërkombëtar i Muzikës së Dhomës, i cili zhvillohet në njërin prej ambienteve më atraktive jo vetëm të Durrësit por të gjithë Shqipërisë, Muzeun Arkeologjik, arrin në edicionin e trembëdhjetë.

Ky festival, tashmë i njohur për nivelin e lartë profesional dhe artistik të koncerteve do të prezantojë përgjatë një periudhe trejavore, prej mbrëmjes së parë në datë 25 qershor, e deri mbrëmjen përmbyllëse të 14 korrikut, ansamble të ndryshme të muzikës së dhomës.

Të hënën, mbrëmjen e datës 25 qershor u zhvillua koncerti me instrumentistët italianë. “Il Quartetto di Cremona”, i vlerësuar si trashëgimtar i denjë i të madhit “Il Quartetto Italiano”, nëpërmjet një programi tepër profesional interpretoi nën tingujt “Stradivari” me instrumentet e tyre.

Mbrëmjen e së premtes datë 29 qershor është prezenca e klarinetistit tepër të njohur grek Spyros Mourikis, në klarinetë dy kuintetet më të spikatura nga Mozart dhe Weber, që do të jetë së bashku me violinistët Emilio Percan e Nevila Kalaja, si dhe violinisten Enkela Kokolani e violonçelisten Dilbag Tokay.

Festivali që nga viti 2006

Festivali zhvillohet nga shoqata Arti dhe Kultura Italo-Shqiptare, që u krijua në vitin 2004 në Durrës me iniciativën e disa artistëve durrsakë, të cilët kanë studiuar e kaluar një pjesë të veprimtarisë së tyre në Itali. Qëllimi i kësaj shoqate ka qenë dhe është bashkëpunimi i artistëve shqiptarë me të huaj, këmbimi i eksperiencave të kulturave të vendeve të ndryshme.

Gjatë aktivitetit të këtyre viteve kjo shoqatë ka organizuar mjaft koncerte në Durrës, Tiranë dhe Itali të cilat kanë përcjellë në publik një nivel të lartë interpretimi artistik. Një rëndësi të veçantë i është dhënë organizimit prej anëtarëve të kësaj shoqate, Festivalit Ndërkombëtar të Muzikës së Dhomës, aktivitet që zhvillohet prej vitit 2006 në qytetin e Durrësit.

Sipas organizatorëve ky festival u krijua pikërisht me qëllimin për të siguruar një vazhdueshmëri jo vetëm në njohjen e kulturave të ndryshme nëpërmjet artistëve të ardhur nga Italia, Austria, Franca, Greqia, Zvicra, Kosova, etj , por edhe me dëshirën e madhe për t`u ballafaquar me këto kultura dhe kjo nëpërmjet shfaqjeve të përbashkëta me instrumentistë shqiptarë.

Një tjetër synim i këtij aktiviteti është pjesëmarrja e artistëve shqiptarë, që jetojnë e punojnë jashtë Shqipërisë, shkruan ata./ KultPlus.com