Pak javë më parë, grupi ikonik shqiptar, ka publikuar këngën e tyre më të re ‘Natën e mirë’, këngë kjo e cila vjen pas një pauze 2-3 vjeçare të grupit shumë të dashur për publikun.

‘Natën e mirë’, vjen i një këngë hit e grupit ‘Elita 5’, kjo për shkak të një unë të madhe dhe të përfshirjes së një numri të madh të muzikatëve.

Vokalisti i këtij grupi, Arif Ziberi, ka folur për KultPlus dhe është shprehur se kjo pritet të jetë një prej këngëve hit të grupit ‘Elita 5’ dhe menjëherë është mirëpritur nga publiku dhe kritikët e muzikës.

Si pothuajse çdo këngë tjetër të këtij grupi, kompozimin e këngës ‘Natën e mirë’ e ka bërë Nexhat Mujovi – Virusi, ndërkaq tekstin e ka shkruar Fatmir Muja.

Përveç pjesëtarëve të grupit ‘Elita 5’, kjo këngë përfshin edhe rreth 50 instrumentistë të Filharmonisë së Maqedonisë, e kjo sipas Ziberit ia ka shtuar edhe më shumë vlerën kësaj kënge.

“Në këtë këngë ne kemi investuar shumë, në të ka performuar edhe filharmonia e Shkupit, mbi 50 instrumentistë, është një punë e madhë që është bërë dhe ja vlejtur. Ne i kemi bërë ftesë orkestrës së Maqedonisë së Veriut, ata e kanë ditur për cilin grup bëhet fjalë sepse na njohin neve dhe muzikën tonë. Ata e pranuan me kënaqësi bashkëpunimin dhe puna e tyre vërehet edhe në këngë”, tha Ziberi, duke shtuar më tutje se ky bashkëpunim ka qenë një gërshetim fantastik.

E për fund, vokalisti i ‘Elita 5’ u shpreh se planet e këtij grupi janë të shumta edhe pse njëherë do t’i japing hapësirë suksesit të këngës së tyre të fundit.

“Plane ka, ne fillimisht e kemi lënë këngën pak që ta ketë hapësirën e vetë dhe ta dëgjojë publiku. Ndërkohë ne vazhdojmë me koncertet e shumta që kemi me grupin”, theksoi ai./KultPlus.com

Në vijim KultPlus ua sjell këngën e grupit Elita 5 ‘Natën e mirë’: