Fituesja e “Junior Fest Albania 2024”, Nikol Çabeli, ka nisur përgatitjet për të përfaqësuar Shqipërinë në skenën e Junior Eurovision Song Contest, që do të mbahet më 16 nëntor në Madrid të Spanjës.

Në një prononcim për Radio Televizionin Shqiptar (RTSH), Çabeli ndau emocionet e saj për këtë moment të rëndësishëm. “Jam shumë e gëzuar, sepse kënga ime ka marrë vlerësime pozitive si brenda, ashtu edhe jashtë Shqipërisë. Më pëlqen kur dëgjoj të tjerët që e këndojnë, pasi kënga është bërë shumë e famshme”, u shpreh Çabeli.

Ajo tha se mezi pret të përjetojë emocionet e skenës së Eurovizionit në kryeqytetin spanjoll. “Kam emocione të bukura. Do të jap më të mirën si përfaqësuese e Shqipërisë”, shtoi artistja e re.

Videoklipi i këngës tashmë është realizuar, duke iu përshtatur mesazhit të saj. Festivali i 22-të i Këngës për Junior Eurovision zhvillohet nën sloganin “Ti Lulëzo”, që simbolizon rritjen e artistëve të rinj. Në garën e këtij viti do të marrin pjesë 17 vende./ata/KultPlus.com