Pak muaj më parë ai ka fituar çmimin më të lartë që për kategorinë e tij ndahet në Zvicër. Ndërsa para një viti Roni pati marrë çmimin promovues të qytetit të Cyrihut për të rinjtë në muzikën klasike.

Orkestra Simfonike e të rinjve e Cyrihut (JSOZ), është një formacion elit i muzikës klasike në metropolin zviceran. Ajo vepron në kuadër të Konservatorit të Muzikës të Cyrihut (MKZ) dhe prej një viti funksionon si një orkestër që realizon projekte muzikore. Këto projekte nënkuptojnë punë intensive
në formë provash që kurorëzohen me koncerte e turne.

Këtë vit JSOZ shënon 30 vjetorin e themelimit dhe në këtë kuadër, gjatë kësaj vjeshte do të ndërmarrë një turne. Si solist gjatë turneut do të interpretojë kitaristi i ri, tashmë i njohur me prejardhje nga Kosova, Ron Atiqi, shkruan albinfo.ch. Ndryshe, në secilin rast kur përmendet emri i tij në njoftimet për koncertet ku ai merr pjesë, nuk harrohet pa u cilësuar nga organizatorët si “njëri ndër kitaristët më të talentuar të Zvicrës”. Dhe për këtë, Roni ka edhe dëshmitë përkatëse.

Pasi ka kaluar me sukses të gjitha nivelet në garat e kitaristëve të rinj, i riu me talent të rrallë ka fituar pak muaj më parë edhe çmimin më të lartë që për këtë kategori ndahet në Zvicër. Ai ka dalë i pari në finalen e Garës Zvicerane të Muzikës për të Rinj (SJMW) të mbajtur në Le Chaux de Fonds. Ndërsa para një viti pati marrë çmimin promovues të qytetit të Cyrihut për të rinjtë në muzikën klasike, për interpretim me kitarë.

Roni është lindur para 18 vitesh në një familje artdashëse të Mitrovicës që jeton në qytezën Elg afër Winterthurit në Kantonin e Cyrihut, shkruan albinfo.ch. Babai i tij, Ali Atiqi është po ashtu kitarist dhe merret edhe me pikturë.

Në koncertin e 26 tetorit Ron Atiqi do të interpretojë si solist veprën për kitarë, “Fantasia para un Gentilhombre të kompozitorit të njohur Joaquin Rodrigo.

Të ardhurat nga koncerti që mbahet më 26 tetor në Zollikon të Cyrihut në organizim të organizatës “Kiwanis” u dedikohen fëmijëve te varfër të Afrikës.

Koncerti fillon në ora 19:30 në Gemeindesaal Zollikon, Rotfluhstrasse 96 8702 Zollikon.
(Foto: Dominik Reichen). / KultPlus.com