Kitaristi i ri Rron Pllana, brenda dy javësh i solli Kosovës dy çmime të para nga festivalet garuese ndërkombëtare të kitarës, shkruan KultPlus

Nën patronatin e Ministrisë së Kulturës së Bullgarisë e Bashkisë së qytetit Kyustendil, Bullgari dhe me organizim të Shtëpisë së Kulturës ‘Bratstvo 1869’ më dt. 3-6 Prill u mbajt festivali garues i 23-të me radhë i kitarës klasike. Në këtë festival morën pjesë dhjetëra garues nga vendet e rajonit dhe më gjerë të ndarë në katër kategori grupmoshash.

Në kategorinë e grupmoshave deri në 10 vjet për shkollat profesionale private me vendin e parë u shpërblye kitaristi i ri nga Kosova Rron Pllana, i vlerësuar si një talent premtues nga një juri e përbërë prej 9 anëtarësh, pedagogë dhe kitaristë të njohur nga rajoni dhe vendet evropiane si Italia dhe Hungaria.

Mirëpo ku nuk është çmimi i vetëm i Ronit, madje ai disa ditë më parë u shpërblye me vendin e parë për grupmoshat e tij edhe në festivalin ndërkombëtar të muzikës ‘Polyhymnia’ i mbajtur në Shkup më 28 mars.

Rron Pllana ndjek mësimet për kitarë klasikë në shkollën profesionale private ‘Misbah&Friends’ në Prishtinë, te mësuesi Kreshnik Berisha./ KultPlus.com