Flonja Haxhaj

Mbrëmë në Pallatin e Rinisë në Prishtinë, u zhvillua nata e dytë e Festivalit të Këngës në RTK, e cila vazhdoi edhe në këtë mbrëmje të ofronte momente të veçanta për të gjithë të pranishmit dhe shikuesit e ekranit. Në këtë mbrëmje emocionuese u zbuluan edhe emrat e artistëve që do të garojnë në natën finale për çmimin e parë, shkruan KultPlus.

Mbrëmja nisi me performancat e konkurentëve dhe këngëve të tyre garuese. Ndryshe nga nata e parë artistën dukeshin si më të liruar në performancat e tyre, e publiku tashmë kishte mësuar edhe këngët që interpretoheshin.

Pas pjesës së parë, në skenë u ftuan Shkumbin dhe Mjellma Istrefi, të cilët me energjinë që i karakterizon dhuruan për publikun emocione dhe të qeshura me performancën e tyre.

Atmosfera në sallë mori një ngjyrë tjetër me hyrjen në skenë të gazetares Sonila Meço, e cila pasi shpalosi kronologjinë e zhvillimit të muzikës shqiptare ndër vite, prezantoi tetë artistë konkurrues të cilët së bashku risollën në skenë hitet e njohura shqiptare e që lanë gjurmë të pashlyeshme në muzikën shqiptare.

Për të pasuruar akoma më shumë spektaklin, balerinët e Baletit Kombëtar të Kosovës, Murgime Morina dhe Fatmir Smani sollën një moment nostalgjik për publikun me performancën e tyre të ndjeshme në tingujt e këngës “Mesnatë” të Vaçe Zelës. Me lëvizjet dhe komunikimin e tyre gati në perfeksion, ata dhuruan për publikun një moment melankolie, nën kujtimin e perlave shqiptare.

Në vijim, tetë artistë të tjerë konkurrues ngjitën në skenë, duke interpretuar këngë të ndryshme nga epoka të ndryshme të muzikës shqiptare. Këngë të kohërave të ndryshme, por që lanë gjurmë në historinë e muzikës shqiptare, jehuan edhe njëherë përpara publikut, si një dëshmi e pavdekshmërisë së tyre.

Pas këtyrë performancave që u  pritën me duartrokitje të shumta në publik, radha u erdhi edhe pjesës tjetër të këngëve garuese. Pjesa e mbetur e artistëve të cilët edhe njëherë provuan më të mirën e tyre që në fund emri i tyre të shkojë drejt finales.

Një tjetër moment kulmor i mbrëmjes ishte paraqitja e grupit të njohur “Lindja,” që këtë vit shënon 40-vjetorin e karrierës së tyre. Hitet e tyre të pavdekshme u interpretuan edhe njëherë për publikun e Prishtinës, duke krijuar një ndjenjë nostalgjie dhe krenarie për arritjet e muzikës shqiptare.

Prezantuesi i këtij festivali, këngëtari Genc Salihu, tha oër KultPlus, u shpreh se për të ka qenë një kënaqësi që të jetë në këtë rol, megjithatë edhe një përgjegjësi e madhe.

“Të jem prezantues në Festivalin e Këngës në RTK ka qenë një eksperiencë e re, po kënaqem shumë. Po punoj në rrethana shumë profesionale, ka njerëz shumë profesionistë të cilët po kujdesen që krejt kjo të ndodhë, është Florent Boshnjaku, është Adi Krasta, kështu që unë jam shumë rehat, e shijoj shumë.  Është një përgjegjësi shumë e madhe, sidomos nëse je në qendër, pra je prezantues, duhet ta mbash të gjithë natën, bashkë me partneren, por me ndihmen e madhe të stafit, nuk po e shoh shumë barrë të madhe ashtu siç e kam menduar se mund të jetë”, theksoi Salihu.

E krejt në fund, juria e përbërë nga Minire Fetahu, Jane Sugarman, Ardianë Pajaziti, Valbona Selimllari përzgjodhën këngët finaliste.

Juria përzgjodhën për në finale: Arnita Kastrati me “Blla blla,” Besmir Shishko me “Unë Ajo,” Rei Bezhani me “Zonjë tradhti,” Endrit Krasniqi me “Flas me gjethen,” Ardit Stafaj me “Faji,” Greta Azizi me “Veres,” Dea Strica me këngën “N’Shqipni,” Agim Poshka me “Ndarja erdhi,” dhe Blendi Kaso me “Një të vetme ka në jetë.”

Ndërkaq ju kujtojmë se sonte do të mbahet nata finale e festivalit, ku do të shpallet kënga fituese e edicionit të dytë të Festivalit të Këngës në RTK./KultPlus.com