Ministrja e Bujqësisë dhe Zhvillimit Rural, Milva Ekonomi bën të ditur se, “South Outdoor Festival” rikthehet këtë vit në edicionin e tij të katërt në datat 3-6 shtator 2021 në Borsh, Himarë.

“Festivali i sportit, muzikës, kulturës e traditës promovon turizmin e qëndrueshëm rural dhe gjithçka që jugu i Shqipërisë ka për të ofruar”, shprehet Ekonomi.

Festivali “South Outdoor” është konceptuar një festë në natyrë me veprimtari sportive, kulturë, traditë, muzikë dhe ushqime tradicionale.

Gjatë ngjarjes 4-ditore, që zhvillohet çdo vit në fshatin Borsh, në jug të Shqipërisë, festivali fton pjesëmarrësit nga i gjithë vendi dhe Evropa të bashkohen, të konkurrojnë dhe të argëtohen, duke shijuar dhe përjetuar veçantinë që e bën Rivierën e bukur të Shqipërisë të veçantë.

Ky festival unik kombinon sportin, lojërat, kulturën, traditën, ushqimin, muzikën, argëtimin dhe shumë më tepër. Me më shumë se 40 aktivitete të ndryshme në natyrë, të synuara për të gjitha grupmoshat dhe prejardhjet, ka diçka për të ofruar për të gjithë.

“Festivali South Outdoor” synon të përdorë aktivitetet në natyrë, kulturën, traditën, muzikën, artet interpretuese dhe ngjarje të veçanta për të rritur entuziazmin publik dhe për të inkurajuar pjesëmarrjen me synimin për ta bërë Shqipërinë jugore një destinacion turistik ndërkombëtar.

“Përmes aktiviteteve tona të veçanta në natyrë dhe ngjarjeve kulturore, ne përpiqemi të angazhojmë si dashamirët në natyrë, ashtu edhe vizitorët si pjesëmarrës që ndajnë perceptimet specifike kulturore që rrjedhin nga historia dhe tradita, kuzhina dhe pijet, muzika dhe vallëzimi”, thanë organizatorët.

Festivali South Outdoor është një nismë e GIZ Albania si pjesë e programit “Zhvillimi i Qëndrueshëm Rural” i zbatuar nga Citrus Organization në partneritet me kompanitë kryesore shqiptare, përfaqësues të agjencive turistike me vite përvojë, të cilët janë specializuar në turizmin në natyrë dhe kanë marrë çmime për ofertat dhe ngjarjet e reja turistike. Festivali organizohet në bashkëpunim të ngushtë me Ministrinë e Turizmit dhe Mjedisit, Ministrinë e Bujqësisë dhe Zhvillimit Rural, Agjencinë Kombëtare të Turizmit, bashkinë e Himarës dhe mbështetet nga qeveria gjermane.

South Outdoor Festival është realizuar në partneritet të fortë me operatorët turistikë më të mirë shqiptarë të cilët kanë punuar në sektorin e turizmit prej vitesh, duke specializuar turizmin aktiv dhe duke marrë çmime për zhvillimin e produkteve dhe ngjarjeve të reja turistike brenda bizneseve të tyre. /atsh/ KultPlus.com