Çast poetik

Letër Brahim Rugovës

(per datlindje)

Shkruan: Halil Matoshi

N’ ven topuzi e mburoje n’dyluftim
Me shpatë goje prit hovet e anmikut
Ma nuk ndanë gjyq për letrat shqipe
Po për tokat dhe kokat
Pena jote e mprehun nuk qëndis letra po brigje qëp
Indet dhe eshtnat e gjymtyrëve të ni trupi…
Shëjtja M’ri mbuloftë muret e kshtjelles tande me urata
Mos e paftë syni i lig
Zari asht hedhun – paç fat!
Ec nëpër teh t’akullt t’dyluftimit
Fatit kurrë s’i dihet!???

* * *
“Shpërndams thesaresh
Shpërndams i shpatave…”
(Borges)

P.S.
Kjo poezi asht e shkrueme në dhetor 1993 dhe asht përfshi n’librin tem “Udhëtim nëpër andërr t’keqe” (Zëri, 1994).
Ni mik jemi, kritik letrar, m’pati sugjerue qe ket’ poezi me e heq nga libri me arsyetim të qëndrueshëm, (se personazhi ishte ni politikan i gjallë dhe sapo ish nisë në udhë dhe se fatit, vërtet s’i dihej, porse doli të ishte një profeci!???) po nuk e bana për shkak se brenda saj i dojsha fort dy vargjet e para: /në vend të topuzit dhe mburojës në dyluftim/me shpatë goje prit hovet e anmikut/ dhe vargjet e fundit që janë një gjëgjezë poetike e Horhe Luis Borges-it: /shpërndams thesari/ shpërndam i shpatave: Mbreti./