Poezi nga Flutur Mustafa

Nanë e gjamë!

Nji nanë atje dikund
Përcjell zemren e vet n’askund!
Nanë e gjamë!
I kanë pasë thanë.

Nji nane atje n’katund,
I ka ra hise me duru çka as guri s’mund!
Me rrëketë tue i rrjedh pa fund,
Lakmi sot nuk i merr as Buna, ai lum.

Nji nane atje n’Anë t’Malit
Hise i ka ra
Me ia qitë syve dheun djalit
N’kam se nuses tij me ia qendis duvakun e arit.

Nji nanë sot n’Krythë
Durt kah qielli i ka çu
I ka mbyllë sytë,
E me plagën që i asht hapë n’shpirt
I asht drejtu Zotit t’gjithësisë!

Djalin ferishte ta dorëzova Zot, sot!

(Me pikëllim, dedikuar Familjes Duraku, që humbën dje djalin e tyre, në moshën 15 vjeçare.) / KultPlus.com