Poezi e shkruar nga Albina Rushiti. Poezia është pjesë e konkursit ‘Poezi për Paqe’ organizuar nga KultPlus dhe UNWomen, duke qenë një prej poezive finaliste.

Bardhësia ndryshkur është,
mendja larë e shpërlarë
vrerë mbushur janë qelizat.
Kësaj nate të errët korb
besë nuk i zihet kurrë,
edhe në këtë shekull
bota e përgjysmuar
digjet si në një furrë.
Fishekzjarre e fishekarmësh
krisma që pa ndalë ngulfasin fytin,
shtjerrin shpresat, ëndrrat, rrugëve.
Marrëzi vrasëse që quhet Luftë,
luftë në emër Paqe thonë!
Turmë servilësh
u buzëqeshin urdhërave,
zbarkojnë helmin në port.
Qenie prej mishi e pa pikë gjaku,
mëshira e panjohur për ta.
Klithmat si melodi vdekje,
dergjen lutjet plotë dhimbje.
Janë rrokullisur dhe shpirtërat,
hijet ndjekin pas yjet e qiellit.
Të ashtuquajturit njerëz
errësirës po ia shohin dritën,e ne të paktët që mbetëm
gërmojm si thesarin Paqen.