Një i ri afro-amerikan është duke i habitur ndjekësit e tij në Instagram për shkak të videove të shumta ku ai shfaqet duke folur dhe kënduar në gjuhën shqipe. Clayvion Winn duket se i pëlqen shumë Shqipëria dhe kultura e saj.

Madje gjatë ditës së djeshme ai është shfaqur i veshur kuq e zi duke kënduar në paradën e shqiptarëve në New York.

Në instagramin e tij ka shumë video ku ai këndon, flet madje edhe shan në gjuhën shqipe. Ai ka foto me këngëtare shqiptare si Enca dhe reperen Baby Gee. Gjithashtu publikon në faqen e tij në Instagram posterat e këngëtarëve shqiptare që japin koncerte në SHBA.

Clayvion Winn pëlqen muzikën me çifteli si dhe kërcen valle shqiptare, madje në një video gazmore e shohim edhe duke i kënduar byrekut.

Përveç emrit të tij të vërtetë ai ka vendosur dhe një emër të shqiptarizuar në Instagram “Klej Zezakaj”. Ai ka shumë miq shqiptarë dhe duket shumë i dhënë pas kulturës shqiptare.