Është lansuar një skeç humoristik i ri nga Taste2 dhe Skirton Pruthi me emrin SkipDays. Ideja e skeçit rrjedh nga seria e ngjarjeve humoristike të cilat më parë janë paraqitur në foto në internet me emrin e njëjtë, po tash materialet e reja të krijuara nga ata do të krijohen në video format, përcjellë KultPlus.

SkipDays është krijuar që të mund të shikohet në pajisje apo ekrane të ndryshme në çfarëdo situate, sepse ato janë të shkurta dhe shumë humoristike. Po ashtu, ekipi i tyre ka punuar gjatë për të krijuar një format i cili mund të pëlqehet edhe nga komuniteti i shurdhmemecëve dhe të verbërve, ku videot e tyre kanë kuptim dhe janë humoristike edhe nëse nuk dëgjohen apo nuk shihen.

Taste2 i njohur si Milot Hoxha është reper dhe skenarist i njohur në Kosovë, dhe Skirton Pruthi një biznesmen i Prishtinës janë shokë të vjetër, të cilët gjithmonë kanë krijuar vepra humoristike, por asnjëherë nuk i kanë shndërruar ato në audio apo video për publikun e gjerë, deri tash.

Video e tyre e parë e cila u publikua nga dyshja ishte “Instervista”, por tashmë ata kanë sjellë videon e dytë të titulluar “Boss”. Skeçet e tyre kanë të bëjnë kryesisht me situatën në vend. / KultPlus.com

https://www.youtube.com/watch?v=zTYvUZ1EiKI