U paralajmërua që katër këngëtare shqiptare do të marrin pjesë në njërin prej festivaleve më moderne të muzikës “Evropa Plus” në Moskë, shkruan KultPlus.

Dua Lipa, Bebe Rexha, Era Istrefi e Arilena Ara, janë emrat e përzgjedhur për të performuar në këtë festival. Këtë lajm e ka bërë të ditur edhe vet posteri zyrtar i festivalit, i cili ka shfaqur listën me emrat e pjesëmarrësve, në të cilën bëjnë pjesë edhe katër këngëtaret në fjalë.

Por, megjithatë në mesin e këngëtareve performuese që është pritur të performojnë sonte live ishte edhe Era Istrefi, në momentin e fundit ajo e ka anuluar këtë performancë.

Meqë shumica e këngëve të Erës janë në gjuhën shqipe, si dhe ajo përfaqëson shtetin e Kosovës, kjo gjë ka nxitur kërcënime ndaj këngëtares. Andaj, Era nuk ka udhëtuar fare për në Rusi pas rekomandimeve të institucioneve të sigurisë.

Bebe Rexha dhe Dua Lipa, tashmë gjinden në Moskë, teksa pritet që të performojë edhe Arilena Ara e cila ende nuk është parë të ketë arritur në shtetin rus. / KultPlus.com