Vajzat dhe gratë ende mbesin viktimat më të shpeshta të sulmeve me acid.

Acidi menjëherë shkatërron fytyrën dhe e deformon atë, e në raste fatale mund edhe t`ia marrë jetën viktimës.

Meena Khatoon nga Nju Delhi, është sulmuar me acid nga burri i saj. Ajo thotë se në rrugë, njerëzit e kanë ndërruar rrugën kur e kanë parë atë fytyrë jo të zakonshme.

Khatoon ka qenë një prej grave që ka defiluar në një revy mode së fundmi, ku janë prezantuar koleksionet e dizajnerëve indianë Rohit Bal, Ranna Gill dhe Archana Kochhar.

Reshma Bano Qureshi është një tjetër viktimë e sulmit me acid. Ajo vitin e kaluar ka defiluar në Javën e Modës në Nju Jork. Thotë të jetë ndjerë nervoze me të dalë në pistë, pasi gjithmonë është nervoze edhe kur del në rrugë, shkruan KultPlus.

Çdoherë e më shumë po bëhet e zakonshme të shohim gra dhe vajza që janë sulmuar me acid, të defilojnë në pasarelat e modës. Duket se kjo edhe e rritë vetëbesimin e tyre, duke jetuar në një shoqëri e cila i paragjykon dhe i trajton keq pasi duket sikur ato ‘e kanë merituar’ ndëshkimin me acid.

Shoqëria indiane është ndër më të prekurat nga sulmet me acid dhe rastet po shpeshtohen. / KultPlus.com