Etiketë: 75-vjetori i Liceut Artistik

Koncert në 75-vjetorin e krijimit të Liceut Artistik ‘Jordan Misja’

Posted on by Kult Plus

75-vjetori i krijimit të Liceut Artistik “Jordan Misja” u përkujtua mbrëmjen e djeshme me një koncert me pjesëmarrjen e artistëve të njohur të skenës shqiptare dhe nxënësve të kësaj shkolle.

Në koncertin e organizuar në sallën “Tonin Harapi” ishte e pranishme edhe sopranoja e njohur shqiptare Inva Mula, e cila me interpretimet e saj përcolli emocione dhe duartrokitje për artdashësit kryeqyetas.

Pjesë e koncertit ishin edhe mësues dhe nxënës të Liceut Artistik, të cilët interpretuan në instrumentet muzikore si dhe pjesë operistike.Liceu Artistik “Jordan Misja” është krijuar në janar të vitit 1946. Ai ka nxjerrë emra të njohur në skenën kombëtare dhe ndërkombëtare. Që në fillim të veprimtarisë së tij, me punën dhe angazhimin tregoi se është një qendër e rëndësishme edukative dhe arsimore për përgatitjen e artistëve të rinj në gjini të ndryshme të artit. Liceu artistik “Jordan Misja” për disa dekada ishte e vetmja shkollë e mesme artistike në Shqipëri. Aktualisht aty mësojnë rreth 900 nxënës të profilizuar në degët e arteve figurative dhe muzikore, si dhe klasat e përgjithshme.Për disa dekada Liceu Artistik ishte e vetmja shkollë e mesme artistike në Shqipëri. Për themelimin dhe ngritjen e këtij liceu kontribuuan pedagogët dhe artistët e mëdhenj shqiptarë, skulptorët: Odhise Paskali, Janaq Paço, Kristina Hoshi, (e para grua skulptore, shqiptare), Andrea Mano, etj; piktorët Foto Stamo, Abdurrahim Buza, Kel Kodheli, Sadik Kaceli, Nexhmedin Zajmi, Guri Madhi, etj. Në dramë Mihal Popi, Zina Andri (Pano), Naim Frashëri, Kadri Roshi, etj. Në muzikë kompozitorët Çesk Zadeja, Tish Daija, Avni Mula, Kozma Laro, Feim Ibrahimi, Simon Gjoni; dirigjentët: Mustafa Krantja, Rifat Teqja, violinisti Ludovik Naraçi, artistë të vokalit Marie Kraja, Nina Mula, Gjoni Thanasi, Jorgjie Truja, Shpresa Nishani, muzikologu Ramadan Sokoli etj.

Në koreografi kontribuan Perkunji (rus), Panajot Kanaçi, Xhemil Simitçiu, Ganimete Vendresha, Zoica Haxho, Agron Aliaj, Petrit Vorpsi, etj. Drejtori i parë ishte kompozitori Konstandin Trako./atsh/KultPlus.com

75-vjetori i Liceut Artistik, Orkestra Simfonike e RTSH-së luan kryeveprat e Morricones

Posted on by Kult Plus

Orkestra Simfonike e Radio Televizionit Shqiptar luajti të mërkurën në mbrëmje në sallën “Tonin Harapi”, me rastin e përvjetorit të 75-të të Liceut Artistik “Jordan Misja”.

Te ftuara ishin mezzo-sopranoja Vikena Kamenica si dhe pianistja Merita Rexha Tershana, dikur liceiste ndërsa sot dy prej emrave të njohur të skenës kulturore të vendit.

Të shoqëruara nga Orkestra Simfonike e RTSH-së, ato i ofruan publikut disa nga kryeveprat e kompozitorit të famshëm italian, Ennio Morricone, babait botëror të muzikës së filmave.

“Si ish-liceiste, kishim një detyrim shpirtëror për t’u bërë pjese e festimeve të 75-vjetorit të krijimit të Liceut Artistik. Një koncert me muzikën magjepsëse të Enio Morricones, që bëri histori në kinematografinë botërore”, tha Kamenica.

Liceu artistik “Jordan Misja” është krijuar në janar të vitit 1946. Që në fillim të veprimtarisë së tij, me punën dhe angazhimin tregoi se është një qendër e rëndësishme edukative dhe arsimore për përgatitjen e artistëve të rinjë në gjini të ndryshme të artit. Liceu artistik “Jordan Misja” për disa dekada ishte e vetmja shkollë e mesme artistike në Shqipëri.

Aktualisht aty mësojnë rreth 900 nxënës të profilizuar në degët e arteve figurative dhe muzikore, si dhe klasat e përgjithshme./atsh/KultPlus.com