Etiketë: Abu Dabi

Xhudistja Loriana Kuka fiton medaljen e bronztë në Abu Dhabi

Posted on by Kult Plus

Loriana Kuka e ka fituar medaljen e bronztë në kategorinë deri në 78 kilogramë në Grand Slamin e Abu Dhabit.

Xhudistja kosovare fitoi ndaj Audrey Tcheumeo në “Golden Score” për t’u stolisur me medaljen e bronztë.

Loriana Kuka e nisi mirë ditën e sotme me dy fitore radhazi.

Ajo triumfoi ndaj xhudistes nga Kazakistani, Nazerke Tileukhanova, në raundin e parë, kurse në të dytin e eliminoi britaniken Emma Reid.

Por, Kuka u ndal në çerekfinale nga kinezja, Zhenzhao Ma, e cila e mposhti me dy waza-ari.

Por, ëndrra për medalje në këtë Grand Slam nuk u shua totalisht, pasi ajo vazhdoi në repesazh për medaljen e bronztë.

Në fazën e parë e mundi italianen Giorgia Stangherlin, pas një dueli të gjatë dhe të stërlodhur. Kuka arriti të fitonte në “Golden Score”, pasi kundërshtarja bëri tri penalizime.

Kujtojmë se të premten Nora Gjakova e fitoi medaljen e argjendtë në kategorinë deri në 57 kilogramë, kurse të shtunën, Laura Fazliu u eliminua në raundin e dytë në kategorinë deri në 63 kilogramë. / KultPlus.com

Rihapet Muzeu i Luvrit nën masa të reja sigurie

Posted on by KultPlus

Abu Dabi rihapi sot, pas më shumë se tre muajsh, muzeun e tij të Luvrit, i mbyllur nga masat e vendosura nga Emiratet e Bashkuara Arabe për të kufizuar përhapjen e koronavirusit.

Vizitorët në muze duhet të rezervojnë biletën në internet.

Ata do të lejohen të kalojnë tre orë brenda muzeut dhe duhet të përdorin maska për fytyrën dhe doreza.

Gjithashtu ata do të përdorin një aplikacion në telefon për informacion mbi veprat e artit, pasi fletushkat nuk do të jenë në dispozicion.

Autoriteti i Kulturës dhe Turizmit i Abu Dabit njoftoi se numri i vizitorëve nuk duhet të kalojë 40% të kapacitetit të përgjithshëm të një muzeu.

Javët e fundit, kryeqyteti i Emirateve të Bashkuara Arabe ka lehtësuar kufizimet, megjithëse ndalimi për hyrjen ose largimin nga vendi do të mbetet në fuqi deri më 29 qershor./atsh / KultPlus.com