Mbrëmjen e 8 tetorit është mbajtur koncerti i dyfishtë i natës përmbyllëse të edicionit të XXIII të festivalit ReMusica, ku me interpretime të shumta e me një koncert autorial, u shënua edhe 75-vjetori i lindjes së themeluesit të këtij festivali, kompozitorit të njohur Rafet Rudi.
“Meloditë e Zemrës” me mezzo-sopranen Flaka Goranci dhe kitaristen Tringa Sadiku, hapën koncertin duke u përcjellë me duartrokitje të shumta. Koncerti nuk kishte se si të fillonte më mirë se sa me tingujt e qetë të kitarës nga Tringa Sadiku, kombinuar me zërin fantastik të sopranos Flaka Goranci. Që të dyja bënë një udhëtim të mrekullueshëm në këngët popullore, duke nxjerrë në pah pjesë të paharruara të Manuel de Falla dhe Heitor Villa-Lobos. Në programin e tyre kishin përfshirë këngë nga Carlo Domeniconi, Manuel de Falla, Antonin Dvorak e Violeta Parra.
Flaka Goranci është mezzo-soprano e dalluar që shquhet për interpretimin e shumë roleve operistike. Teatri i Vjenës, Opera e Magdeburgut, Festivali i Operës Langenthal në Zvicër, Teatri i Operës Ostrava, Salla e Koncerteve në Berlin, Salla e koncerteve në Vjenë, janë vetëm disa nga institucionet ku ajo merr pjesë. Flaka bashkëpunon me dirigjentë të njohur si N. Harnoncourt, U.Windfuhr, L.Suganandarajah, E.Delamboye, D.Spaë, R. Rudi,C.V. Kerssenbrock etj. Poashtu ka performuar nën regjinë e U.E. Laufenberg, S.Lawless etj.
Në një intervistë për KultPlus, Goranci u shpreh se përgatitjet për këtë koncert kanë shkuar shumë mirë dhe se provat kanë zgjatur shumë.
“Përgatitjet kanë shku shumë mirë, ne jemi përgatitur edhe në Graz të Austrisë bashkë me Tringën ku kemi pas dy prova të gjata dhe pastaj këto ditë kemi ardhur në Prishtinë ku kemi bërë prova çdo ditë. Është dashur të përgatitemi shumë pasi shumicen e programit e kemi luajtur për here të pare sonte dhe e kemi sjell premierë një program të posaçëm për këtë festival”.
Ndërsa, kitaristja Tringa Sadiku u shpreh se përgatitjet për këtë festival kanë qenë shumë natyrale dhe se ka qenë një kënaqësi për të që të bashkëpunojë me mezzo-sopranon Flaka Goranci.
Mbrëmja ka vazhduar me pjesën e dytë të koncertit që iu kushtua shënimit të 75-vjetorit të profesorit Rafet Rudi. Në skenë u ngjitën Zana Abazi me flaut dhe Andi Duraku në piano, duke sjellë “Impresione” para publikut që ishin mbledhur në Atelien e Pallatit të Rinisë në këtë mbrëmje të veçantë.
Pas një pauze të shkurtër, radha ishte për dy gra të mrekullueshme, Lirika Pula në piano dhe Sihana Badivuku me violinë, sollën “Fantasia in Si”.
Mbrëmja vazhdoi nën magjinë që sollën kitaristët Petrit Çeku, Diar Aliu dhe Tringa Sadiku, të cilët për pak minuta bënë që e gjithë vëmendja të kthehej tek ata, duke interpretuar “Three albanian songs” apo “Tri këngë shqiptare”.
E pas përgatitjeve të skenës që zgjatën pak minuta, dritat e skenës ranë mbi Korin e Filharmonisë së Kosovës, të cilët nën drejtimin mjeshtëror të dirigjentit Marcio da Silva, dhe nën shoqërimin e tingujve të kitares nga mjeshtri Petrit Çeku, sollën interpretimin e veprës “Deti i varrëve të hapura”, që është vepër e vet kompozitorit Rafet Rudi.
Soliste në interpretimin e kësaj vepre ishte Elona Sadiku, e cila për KultPlus u shpreh se për të ishte nder e kënaqësi që t’i besohej pjesa solistike e veprës.
“Nuk ishte aspak e vështirë të punoj me profesionist të tillë siç është edhe dirigjenti Marcio da Silva, për mua ka qenë kënaqësi të më besohet pjesa solistike e veprës nga vet kompozitori Rafet Rudi, për të cilin edhe jemi mbledhur sot”, u shpreh Sadiku për KultPlus.
Tutje, Sadiku u shpreh se përgatitjet nuk kanë zgjatur sepse i kanë pasur vetëm dy vepra të cilat Filharmonia e Kosovës i ka kënduar edhe herë të tjera pasi janë pjesë e pashkëputur e reportuarit të tyre.
Kurse, në mbyllje të këtij koncerti, është interpretuar vepra “In A”, nga sopranot e njohura Adelina Paloja dhe Kaltrina Miftari. Në piano ishte Andi Duraku dhe Lekë Salihu, kurse në perkusione Patris Berisha, Meriton Zajmi dhe Kenan Bytyqi.
Në një bisedë të shkurtër, Adelina Paloja u shpreh për KultPlus se ndjehet shumë e emocionuar dhe se ka pranuar ftesën me shumë kënaqësi në këtë koncert autorial të Rudit, për dy arsye shumë të veçanta.
“Kam pranuar ftesën me shumë kënaqësi për dy arsye të veçanta. E para sepse gjithmonë kam pasur një bashkëpunim të ngushtë me Filharmoninë e Kosovës dhe e dyta sepse profesori Rafet Rudi ka qenë mbështetje e imja qysh në fillet e mia të para, që nga mosha 6 vjeçare kur veçse kam filluar të merrem me këndim dhe piano”, u shpreh Paloja për KultPlus.
Ajo tha se është shumë e lumtur që të festojmë jetën e tij si një personalitet shumë i rëndësishëm i komunitetit të tyre dhe jetik për rrjedhën e muzikës klasike.
E për fund, natyrisht që një prononcim i shkurtër nuk mund të mungonte nga protagonisti i mbrëmjes, kompozitori dhe profesori Rafet Rudi. Ai tha se është i lumtur me revolucionin që ka pësuar ReMusica.
“Unë edicionin e shiqoj vetëm nga anash pasi nuk jam i përfshirë në organizimin e tij më. Më duket interesat sepse ka ndërru fizionomia e festivalit, Donika si presidente e festivalit dhe Viktori si producent kanë bërë një lloj revolucioni. Një ndryshim të fizionomisë që ka qenë mjaft frytdhënës dhe mbaroi me sukses”, u shpreh Rudi për KultPlus./KultPlus.com
Mbrëmë, sopranoja e njohur Adelina Paloja solli koncertin e saj recital “Eternal Echoes” në hapje të edicionit të shtatë të Prishtina International Vocal Festival, nën shoqërimin e pianistes Lirika Pula- Kasapolli dhe Kuartetit Harkor “AMATI”.
Rreth orës 19:00, koncerti grumbulloi familjarë të solistes Paloja, miq, dhe artdashës në përgjithësi në sallën e Amfiteatrit të Bibliotekës Universitare, të cilët pak para koncertit me kënaqësi shfletonin programin i cili përmbante 12 vepra të kombinuara me kompozitorë shqiptarë dhe botërorë.
Dritat u fikën, dhe për njëfarë kohe në sallë dominonte ngjyra vjollcë. Kjo ngjyrë përshtatej bukur me mbrëmjen “Jehona të Përjetshme” të artistes Adelina Paloja, pasi në botën e ngjyrave vjollca simbolizon shpirtëroren, mendimin e thellë, lluksin, prestigjin dhe elitën.
Kurse shkëlqimi i vërtetë skenës iu dha qysh me paraqitjen e parë të solistjes Adelina Paloja, nga shpirti i saj rrezatues, që shpesh herë paraqet një dashuri të madhe, të pastër me frekuenca engjëllore. Këtë aurë të saj e kompletonte fustani i argjendtë, i mbështjellë me një pelerinë vezulluese.
Koncerti filloi me interpretimin e veprave nga repertori rus, me atë të Sergei Rachmanioff- Polybila ya na pechal svoyu op. 8,no.4 Zdes Khorosho op. 21, no.7 për të vazhduar më pas me Antonín Dvořák- Měsíčku na nebi hlumbokem (Rusalka’A Aria from opera ‘Rusalka’). Interpretimi i këtyre veprave paraqiste kapacitetin artistik të artistes Paloja, dhe vokalin e saj që herë pas here shpërthente në kristale tingujsh.
Kurse, vepra e kompozitorit Léo Delibes Les filles de cadix The maids of cadiz- poésie d’ Alfred de Musset tërhoqi vëmendjen nga një vibrim i bukur i notave muzikore, që përcillej nga lëvizje skenike prej një profesionisteje. Ky koncert nuk do të kishte këtë peshë artistike po qe se do të mungonin perlat e kompozitorëve shqiptarë si Nikolla Zoraqi-Mall’ dashurie, Halit Kasapolli-Bash zemani (arr Hajrullah Syla), Avni Mula-Shqipëri o vendi im (arr.Genc Tukiqi), Agimet shqiptare, Feim Ibrahimi- Rrjedh në këngë e ligjërime (arr. Genc Tukiqi).
Ishte vepra e Johannes Brahms- 16 Waltez op.39, no.3,4 e cila u interpretua vetëm nga pianistja Lirika Pula Kasapolli, e cila sillte në pah përgatitjen e pianistes, që i dha koncertit finesë dhe virtuozitet. Kurse vepra e Astor Piazzolla- S.V.P Tango nga harmonia grupore e Kuartetit Harkor “Amati” i dha koncertit një shije të veçantë.
Veprat tjera të cilat u interpretuan në koncertin e parë të PriVocalFest, i cili këtë vit vjen me një mision të veçantë, duke e përdorur fuqnë e artit në mbështetje të ndërgjegjësimit për Koncerin e gjirit, ishin nga kompozitorët: Giacomo Puccini- Chi il bel sogno di doretta (Magda’s aria from opera ‘La Rondine)’, Francesco Cilea- Ecco: Respiro Appena…Io son l’lumile ancella (Adriana’s Aria from opera Adriana Lecouvreur dhe Augustin Lára-Granada.
Pas përfundimit të këtij koncerti me 12 vepra sfiduese nga kompozitorë vendorë e botëror, në një prononcim për KultPlus sopranoja Adelina Paloja tha se ndihej e plotësuar.
“Jam e përmbushur. Jam një muziktare e cila përherë kërkon më tepër nga vetvetja, jam kërkuese dhe nuk kënaqem lehtë. Kur e kam përpiluar këtë koncert recital kam përzgjedhur këto vepra solistike, që në repertorin për soprano secila prej tyre njihen që janë më të vështirat. Në mesin e tyre janë pesë apo gjashtë gjuhë me të cilat kam interpretuar, rrjedhimisht janë edhe pesë apo gjashtë kultura të ndryshme. Janë histori të ndryshme, ku secila të ngërthen në vete, me të cilat ti duhet të mishërohesh”, ka thënë sopranoja Paloja.
Më tej, sopranoja Paloja ka thënë se duartrokitjet e publikut të cilat i mori në këtë mbrëmje do t’i shërbejnë si motiv për të dhënë edhe më shumë nga kapaciteti i saj artistik edhe në të ardhmen.
“Ka qenë një punë jo e lehtë, pa modesti. Por jam shumë e lumtur që mendoj se ja dola mbarë, të cilën gjë e konfirmuan ndoshta edhe duartroktitjet e publikut tim. Të them të drejtën më kishte marrë malli që të kthehem me një koncert recital, andaj mora shumë nga kjo dashuri dhe mendoj që do të jetë motivi, refreni i cili do të më mbajë përgjatë muajve të ardhshëm, në përgatitjet e mija për të tjera angazhime”, ka thënë artistja Paloja.
Kurse, pianistja Lirika Pula Kasapolli ka thënë se bashkëprezantimi me sopranon Adelina Paloja për të paraqet gjithmonë kënaqësi.
“Është hera e dytë që ne realizojmë një recital bashkë. Hera e parë ka qenë para katër vitesh gjate pandemisë, kur koncerti është realizuar në formë të mbyllur. Kështu që sot për herën e dytë bashkëprezantimi ishte akoma më i thjeshtë. Është gjithmonë shumë kënaqësi të punosh me muzikantë që janë të formuar, me ide dhe forma muzikore gjithmonë shumë të qarta sa i përketë frazimeve, këndimit dhe shumë të përgatitur. Kështu që është gjithmonë kënaqësi për mua”, ka thënë pianistja Pula- Kasapolli.
Ndërkaq, drejtori i Festivalit Pishtina Internationa Vocal Festival, Hajrullah Syla tha se ndihej i lumtur që programi të cilin e kishte përzgjedhur së bashku me sopranon Paloja u pëlqye nga puliku dhe se gjithçka shkoi mbarë.
“Programi i natës së sotme ishte mjaft mirë i realizuar. Përmes duartrokitjeve u pa që publiku ishte shumë i kënaqur me performancën. Kjo ishte nata e parë po shpresoj që edhe vazhdimi do të jetë ashtu siç edhe e kemi përgatitur” ka thënë drejtori artistik duke bërë të ditur se të gjitha koncertet pasuese janë të veçanta në llojin e vet.
“Këtë vit për herë të parë po mbahet masterclass-i për këngëtarët e rinj, me studentë kryesisht që janë nga Fakulteti i Arteve, të cilët kanë rastin që të punojnë me maestro Raul Gimenez, një vocal koach shumë i rëndësishëm. Po besoj që janë duke u kënaqur shumë sepse po e shoh gjatë masterclassit që janë duke e shijuar shumë. Zakonisht kemi pasur garën për kompozitor dhe këtë vit kemi vendosur që të kemi masterclass. Në vitet në vijim do të kemi një vit garën për kompozitor dhe në vitin tjetër masterclassin me profersorë të ndryshëm të cilët do të arrijmë t’i sjellim këtu”, ka përfunduar drejtori Syla.
Ndërsa, prezantueset e festivalit Dea Xhemaili dhe Lirdina Kukaj kanë njoftuar se këtë edicion PriVocal Fest ka vendosur të përdor zërat, muzikën, dhe fuqinë e artit në mbështetje për të rritur ndërgjegjësimin për Kancerin e Gjirit.
“PRIVOCALFEST tash e shtatë vite me radhë mbetet një ngjarje e veçantë që krijon një platformë të mrekullueshme për artistët e muzikës vokale, duke ndarë zërat e tyre me audiencën dhe për të ndërthurur emocionet me muzikën; duke zgjeruar horizontet, për të arritur nëpër kufijtë e muzikës dhe për të promovuar artistët e rinj dhe kulturën në mënyra të reja dhe inovative. PrIVocalFest është ngjarje që sjell së bashku artistë nga këndvështrimet më të ndryshme të muzikës vokale, duke krijuar një mjedis të pasur kulturor dhe artistik”.
“PriVocalFest” në edicionin e shtatë përmbanë pesë mbrëmje artistike dhe zhillohet në datat 14- 20 tetor, në Amfiteatrin e Bibliotekës Universitare. Koncerti i radhës do të prezantojë një mbrëmje shumë të veçantë, “Opera Night”, më 16 tetor, në ora 19:00./ KultPlus.com
Nesër do të fillojë edicioni i 14-të i “Etno Fest”, festival që do të ofrojë prezantime të ndryshme deri më 18 gusht, shkruan KultPlus.
Organizatorët kanë bërë të ditur se ceremonia hapëse do të shënohet me sopranon e njohur Adelina Paloja, sikurse që do të ketë edhe paraqitje të tjera muzikore përgjatë mbrëmjes.
KultPlus ju sjell njoftimin e plotë të organizatorëve.
Ceremonia e hapjes së Etno Fest këtë vit do të jetë një ngjarje e veçantë dhe e paharrueshme, duke u fokusuar në një koncert të jashtëzakonshëm të muzikës artistike që përqendrohet në interpretimin e veprave të frymëzuara nga melosi dhe traditat e pasura të muzikës shqiptare.
Në skenë do të ngjitet @adelinapaloja , soprano e njohur si në skenën vendore dhe në atë ndërkombëtare. Me zërin e saj unik dhe fuqinë interpretuese, ajo e madhështon çdo ngjarje kulturore
Sihana Badivuku, violinistja e skenave të shquara shqiptare edhe jashtë vendit me virtuozitetin dhe shpirtin e saj artistik, do të ngjallë dashuri për muzikën te çdo dëgjues
Gjithashtu, @oktetiplusofficial me fuqinë e zërave të burrave dhe interpretimet e tyre unike, do të kontribuojnë në pasurimin dhe ruajtjen e muzikës sonë, duke e transmetuar atë te brezat e rinj
Pjesë e koncertit do të jetë edhe @kori_femijeve_okarina , artistë të rinj në moshë, por me zemër të madhe dhe fuqi interpretative, të cilën e kanë dëshmuar në ngjarjet kulturore më të rëndësishme në vend. Me një përkufizim “Kori “Okarina” janë vet trashëgimia jonë kulturore!
Si përfundim instrumentistet e dalluara të skenës vendore, Kuartetit “Amati” me shumë talent e sharm, vizionare dhe te perkushtuara që muziken artistike ne vend ta ngrisin dhe më lartë / KultPlus.com
Teatri Kombëtar i Operas, Baletit dhe Ansamblit Popullor në Tiranë, do të mbajë koncert madhështor të premtën, duke filluar nga ora 19:00, koncert ky që do të jetë përmbyllës i Orkestrës Simfonike të RTSH-së. Në koncert do të prezantohen emra të mëdhenj të muzikës klasike.
Gjatë mbrëmjes do të përformojë edhe violinisti me famë botërore, Tedi Papavrami. Poashtu, ky koncert do të shënojë edhe rikthimin e sopranos së njohur shqiptare në Shqipëri, Adelina Paloja.
Paloja, ka njoftuar se do të merr pjesë nën dirigjimin e Zhani Ciko, ku do të ndajë skenën me mjeshtrit e interpretimit, Tedi Papavrami, Suela Piciri, Fatos Qerimaj dhe Jonela Golemi.
“Në këtë koncert të veçantë kam privilegjin të nterpretoj dy vepra të jashtëzakonshme perla të kompozimeve për vokal nga Nikolla Zoraqi: 1.”Mall Dashurije” Romancë dhe 2. “Monologu i Marës” nga Opera “Fundi i Golemeve”, ka shkruar Paloja.
Skena do të ndriçohet edhe nga performanca e shkëlqyer e Suela Picirit, e cila vjen nga tempulli i artit, La Scala Milano.
Profesor Fatos Qerimaj, një gjeni i klarinetës, do të sjellë interpretimin e tij të pakrahasueshëm, ndërsa flautistja e mrekullueshme Jonela Golemi do të na transportojë në një botë tjetër me tingujt e saj të magjishëm./KultPlus.com
Mbrëmë qytetarët e Prishtinës, mu në sheshin “Skënderbeu”, kanë qenë dëshmitarë të një nate të mbushur me përplot magji. Skena gjigande e vendosur në qendër, ka mikpritur interpretimin e mbi 200 muzikantëve. Orkestra dhe Kori i Filharmonisë së Kosovës, Kori i Operës së Kosovës nën dirigjimin e Hajrullah Sylës, Kori i Universitetit “Haxhi Zeka” nga Peja nën dirigjimin e Hysen Nimanit, sopranoja Adelina Paloja, tenori Liridon Sadriu dhe baritoni Safet Berisha, kanë ngulitur në kokën e të gjithëve një koncert i cili ka dalë përtej unikes. Talenti i tyre u shfaq në një tango me perfeksionin, kësisoj duke e lënë një vulë të pashlyeshme përbrenda secilit pjesëmarrës, shkruan KultPlus.
Koncerti parashihej të fillonte në orën 20:30, mirëpo karriget ishin mbushur nga qoshi në qosh qysh nga ora 20:00, ndërsa instrumentet e vendosura në skenë po pritnin që mjeshtërit e tyre t’i merrnin ato në dorë. Audienca pati rastin ta shijojë zhdukjen e përkohshme të diellit dhe me entuziazëm priste shushurimën e instrumenteve nga muzikantët që dolën në skenën e mbuluar në të zezë, akoma pa shënuar ora 21:00.
Reflektorët në ngjyrë të kaltër të vendosur mbi skenë dukej se e qanin në gjysmë ajrin me drejtimin e tyre, por asisoj ishin edhe muzikantët që dolën duke marshuar në skenë. Hapat e tyre të qëllimshëm, zhurmonin atmosferën këndshëm, duke shënuar fillimin e veprës “Njeriu me armë: Meshë për paqe” e kompozitorit Karl Jenkins, e krijuar në vitin 1999 dhe dedikuar viktimave të Kosovës. Është një vepër anti-luftë bazuar në meshën katolike të cilën kompozitori e gërsheton me burime të tjera, me tekst të përzgjedhur nga historiani Guy Wilson.
Nën dirigjimin e veçantë të Baki Jasharit, koncerti portretizoi një literaturë muzikore, me vepra të fuqishme që u interpretuan për nder të të 25-vjetorit të Çlirimit të Kosovës dhe 248-vjetorit të Pavarësisë së Shteteve të Bashkuara të Amerikës. Koncerti u emërtua “Koncert për Paqe” me të cilin Filharmonia e Kosovës përmbylli sezonin 2023/2024. Bashkë me korin në skenë u ngjit edhe Jeffrey M. Hovenier, ambasador i SHBA-ve në Kosovë.
Anash skenës, dy ekranet mundësuan një vështrim më të detajuar të Orkestrës së Filharmonisë në skenë, si dhe duarve të dirigjentit Jashari, i cili me krahët e tij bënte harqe sa në të djathtë e sa në të majtë. Shkopi i tij në dorën e djathtë, lëvizte me shpejtësi sa poshtë e lartë, njashtu edhe telat e instrumenteve që pushtoheshin pa ndalë nga dhuntia e bukur e shpirtrave të gjallë prapa tyre. Në anën tjetër, të bashkuar në një unitet që çdo herë lë mbresa, Kori i Filharmonisë së Kosovës, Kori i Operës së Kosovës dhe Kori i Universitetit “Haxhi Zeka”, dhuruan spektakle që frymonin nëpërmjet teksteve dedikuar për paqe, dashuri e dhimbje.
Ndërkohë, publiku ishte i shoqëruar nga një fllad i lehtë i cili zgjonte kohë pas kohe disa rrëqethë, por kjo nuk ndodhte vetëm për atë arsye. Ishte energjia, paraqitja dhe ekselenca e sopranos Adelina Paloja, tenorit Liridon Sadriu dhe baritonit Safet Berisha, të cilët i dhanë jetë të dyfishtë këtij koncerti të jashtëzakonshëm. Si yje në skenë, qëndronin solistët, që kapluan atmosferën nga çasti në çast. Serioziteti i notave që buronin nga thellësia e tyre, portretizoheshin dukshëm dhe në shprehjet e fytyrave të tyre. Për të kënduar për tema te caktuara, do të thotë të bëhesh një me tekstin, mesazhin dhe esecnës e veprës, dhe këtë më së miri, arrinin ta bënin solistët, të cilët kanë shkrirë telat e zërit drejt të pranishmëve nëpërmjet një madhështie modeste.
Veprat e interpretuara si: “The call to prayers”, “Kyrie”, “Save me from Bloody Men”, “Sanctus”, “Hymn before action”, “Charge!”, “Angry flames”, “Agnus Dei”, “Now the guns have stopped”, “Benedictus” si dhe “Better is peace”, transmetuan një performancë që doli përtej pritshmërive. Puna e palodhshme, përkushtimi, dhe dashuria për atë se çfarë përfaqëson muzika, ishte e vulosur në sytë e 200 muzikantëve, të cilët mbrëmë dëshmuan një pasion të zjarrtë i cili zor se do shuhej ndonjëherë, edhe nëse bota do të digjej ngadalë.
Prapavija në skenë pati të vendosur një ekran që ndërronte disa imazhe, por më e fuqishmja apo konstantja, qe ajo e një zogu, që shërbente si një thirrje për paqe dhe liri. Reflektorët ndërronin ngjyrat nga të kaltër, në të bardhë, në të kuqe e herë në të portokalltë, që përkonin me stilin e njëmbëdhjetë veprave dhe intensitetin e tyre që shpesh kapte publikun në befasi, duke i shtyrë ata për të lëvizur papritmas. Po ashtu, ajo që këta muzikantë dinë të bëjnë më së miri, është përkëdhelja e lehtë e shpirtit të pranishëm, nëpërmjet prekjeve ledhatuese të instrumenteve përpara tyre, duke krijuar një harmoni bukur të qetë, porsi ninullë.
Pas përfundimit të gjithë këtij koncerti mbresëlënës, për një fjalë rasti, në skenë doli Jeffrey M. Hovenier, ambasador i SHBA-ve në Kosovë, i cili falënderoi Filharmoninë e Kosovës, që e lejoi të jetë pjesë e tyre për këtë mbrëmje.
“Nëpërmjet veprave, ne ecëm nga lutja për mëshirë, në përgatitjen për luftë dhe përjetimin e tmerreve të luftës, dhe më pas përfunduam me një mirëkuptim dhe marrëveshje se gjithmonë ka paqe. Unë nuk mund të mendoj për ndonjë vepër tjetër që është më e përshtatshme për një diplomat për të kënduar, sesa “Njeriu me armë: Meshë për paqe”. Vepra qe shumë e ndjeshme për ta kënduar së bashku. Këta prapa meje, janë njerëzit e mi, dhe unë dua t’i falënderoj shumë që më lejuan të jem pjesë e tyre sonte. Muzikantët e Filharmonisë, janë shumë të talentuar dhe ju të gjithë duhet të jeni krenarë për ta”, ka thënë ai.
Ai tutje tregoi se koncerti ishte paraparë të epej më 4 korrik, por për shkak te motit dhe vdekjes së shkrimtarit Ismail Kadare, koncerti u shty për mbrëmjen e djeshme.
Pjesa përmbyllëse e koncertit solli interpretimin e dy marsheve amerikane “The Washington Post” dhe “The Stars and Stripes Forever” nga John Philip Sousa, të shoqëruar në fund me fishekzjarrë, pjesë e traditës amerikane për shënimin e Ditës së Pavarësisë që nga viti 1777. Fishekzjarrët e shumtë shumëngjyrësh shënuan fundin e një nate të paharrueshme, me kujtime që do vërshojnë përherë në rrjedhën e të bukurave, siç ishte edhe portretizimi nga “Koncert për paqe” për dy orë të plota.
Ndërsa, për të treguar rreth pjesëmarrjes si soliste në këtë koncert, për KultPlus foli sopranoja Adelina Paloja.
“Përjetova një nga momentet më emocionale të karrierës sime solistike. Atmosfera ishte magjike që nga momenti i parë. Qielli i hapur i Prishtinës dhe yjet e ndritshëm krijuan një skenë të përsosur që po e ndjeja teksa po përgatitesha prapa skenës me emocionet dhe përgjegjësinë e madhe që më priste për të interpretuar veprën madhështore të Karl Jenkins, “The Armed Man: A Mass for Peace”, dedikuar viktimave të luftës në Kosovë. Përmes zërit tim reflektoja figurën e femrës shqiptare vetëflijuese e heroinë historikisht, e ne së bashku si një trup artistësh me mbi 200 muzikantë e mijëra pjesëmarrës në audiencë, ngaqë kemi përjetuar edhe vetë luftën, bëmë dedikimin e thirrjen për paqe edhe si një kujtesë e fuqishme e kostos së luftës që përjetuam”, thotë Paloja.
Sipas saj, teksa këndonte pjesët e ndryshme të veprës në gjuhen latine, frënge dhe angleze, ndjente peshën e historisë dhe dhimbjen e luftërave të kaluara. Por gjithashtu, ndjente shpresën dhe dëshirën për një të ardhme më të mirë. Pra, çdo frazë muzikore ishte një lutje për paqe, një thirrje për bashkim dhe mirëkuptim.
“Atmosfera në shesh ishte elektrizuese, me interpretim brilant të Orkestrës dhe Korit të Filharmonisë, të Operas si dhe të Fakultetit të Arteve të Universitetit Haxhi Zeka, udhëhequr shkëlqyeshëm nga dirigjenti prof.Baki Jashari, me dy dirigjentët e korit Hysen Nimani dhe Hajrullah Syla, që së bashku krijuam një përjetim artistik fisnik e krenar. Mbrëmja përfundoi me një ndjenjë të thellë mirënjohjeje dhe shprese për të ardhmen, me angazhimin e drejtorit Dardan Selimaj për vizionin e kësaj mbrëmjeje dhe çdo detaj të mirë menduar, në bashkëpunim me aleatin tonë ShBA, ku në pjesë artistike pjesëmarrës në Kor ishte edhe vetë ambasadori Jeffrey M. Hovenier. U ndava me emocionin që kurorëzuam së bashku një koncert që do të mbahet mend gjatë si një nga ngjarjet më të paharrueshme në historinë kulturore të Prishtinës”, përfundon ajo.
Kurse, për të treguar përshtypjet e tij rreth gjithë këtij koncerti, për KultPlus foli dirigjenti i Korit të Universitetit “Haxhi Zeka” nga Peja, Hysen Nimani.
“Fakulteti i Arteve i Universitetit ‘Haxhi Zeka’ ka pasur një periudhë të jashtëzakonshme, duke u shquar për një sërë arritjesh të rëndësishme. Kohët e fundit, Kori i Fakultetit të Arteve prezantoi krahas Filharmonisë së Kosovës para një audience gjigande në sheshin “Skenderbeu” në Prishtinë, një ngjarje që përmbush krenari të madhe për të gjithë ne. Ky bashkëpunim me Filharmoninë e Kosovës, i dyti deri tani, ishte një sukses falë përkushtimit dhe punës së përbashkët me të gjitha instancat menaxheriale, duke përfshirë Dardan Selimaj, dirigjentin Baki Jashari, Hajrullah Syla dhe solistët e talentuar: sopranon Adelina Paloja, tenorin Liridon Sadriu dhe baritonin Safet Berisha”, ka thënë ai.
Dekani i Fakultetit të Arteve dhe dirigjent i Korit, Nimani, theksoi se kori ka marr pjesë vazhdimisht në koncerte dhe festivale të ndryshme ndërkombëtare, si në Gjermani, Kroaci, Greqi dhe shumë koncerte ne vend dhe jashtë vendit si dhe në konkurse të ndryshme. Këto arritje, sipas tij, pasqyrojnë përkushtimin dhe talentin e jashtëzakonshëm të studentëve dhe stafit, duke shërbyer si një shembull për të gjithë.
Gjithashtu, dirigjenti i Korit të Operës së Kosovës, Hajrullah Syla, për KultPlus foli rreth përpjekjeve për të sjellë këtë koncert.
“Vepra ‘The Armed Man a Mess for Peace’ është njëra ndër veprat më madhore që i është dedikuar viktimave të luftës së fundit në Kosovë. Çdo herë që ne e interpretojmë këtë vepër, kemi një emocion të veçantë pasi që kemi qenë edhe dëshmitarë të luftës së fundit dhe përjetimeve që kemi pasur ne si popull nga paramilitarët serbë. Interpretimi i mbrëmshëm ishte një emocion sikurse për herën e parë kur e kemi realizuar këtë vepër”, thotë ai.
Sipas tij, sa i përket procesit të provave, ka qenë jo edhe aq i vështirë pasi që Orkestra dhe Kori i Filharmonisë, e kanë pasur të përgatitur, por sigurisht bashkimi i dy koreve siç ishin: Kori i Operës së Kosovës dhe Kori i Fakulteti të Arteve “Haxhi Zeka” nga Peja, ka qenë pak sfidues pasi që ishte një numër tejet i madh i interpretëve të kësaj vepre.
“Gjithashtu, për ne ka qenë nder dhe kënaqësi që ta kemi edhe ambasadorin amerikan Jeffrey Hovenier, i cili është një zë shumë i mirë dhe që me shumë dëshirë iu bashkua koreve që ishin pjesë e koncertit. Ky rrugëtim për të arritur deri në koncert ka qenë mjaft i këndshëm dhe me një peshë të madhe duke e ditur që ne do të dalim në skenë para një audience të madhe në sheshin ‘Skënderbeu’. Aq sa u pa, publiku e priti mjaft mirë paraqitjen tonë”, përfundon Syla.
Ky koncert është mundësuar nga Ministria e Kulturës, Rinisë dhe Sportit, Ambasada Amerikane, Komuna e Prishtinës dhe RTK.
Sopranoja e njohur Adelina Paloja ka mbajtur mbrëmë koncert recital në Zagreb të Kroacisë, në nder të 25-vjetorit të Çlirimit të Kosovës.
Sopranoja ka mbajtur koncertin e saj në sallën “Novinarski Dom”, duke filluar nga ora 18:00.
Ky koncert është organizuar nga Bashkësia Shqiptare e Qytetit të Zagrebit, mbështetur nga Këshilli i Pakicave Kombëtare, nën udhëheqjen artistike të kitaristit të shkëlqyer dhe pedagogut Xhevdet Sahatxhija.
Poashtu, Paloja është shoqëruar në piani nga pianistja Alba Muçolli – Dehiri dhe me mysafire solokëngëtaren e re Rea Veseli./KultPlus.com
Pafika e Gocës së Kaçanikut nuk e ka komoditetin e artisteve të operave të shteteve të zhvilluara, të cilat shijojnë edhe shumë repriza të një shfaqje operistike dhe kalojnë prej njërës në tjetrën shfaqje. Pafika jonë hoqi gërshetat menjëherë pas reprizës së dytë të shfaqjes “Goca e Kaçanikut”, ‘armët’ e shfaqjes dhe u nis për në Pejë, për të vazhduar rutinën e mëhershme, për të mbajte mësim me studentët e muzikës. Sepse, një soprano në Kosovë nuk është vetëm një soprano, për faktin se nuk mund të mbijetojë si e tillë. Një soprano në Kosovë mund të jetë një soprano, mund të jetë edhe një profesoreshë, mund të jetë pjesë e korit shtetëror, mund të jetë pjesë edhe e një projekti tjetër të jashtëm, por asesi nuk mund të jetë vetëm një soprano që mund ta shijojë magjinë e një shfaqjeje edhe për një kohë, edhe përkundër sakrificës e mundit të madh, që në fund audienca me shumë dashuri t’ia shtojë epitetin e dashur “Pafika jonë”.
Pafika jonë nuk i ka mbajt provat në sallën ku edhe është dhënë premiera, sepse Pafikës sonë ende nuk i është ndërtuar shtëpia e saj. Pafikës sonë dhe krejt trupës përcjellëse të shfaqjes “Goca e Kaçanikut” i është dashur të ushtrojnë në Sallën e Kuqe të Prishtinës, e më pas të barten për premierë dhe reprizën e parë në një sallë private, ku vetëm me provën gjenerale, shpejt e shpejt u është dashur të përshtaten me formatin e skenës së re.
Pafika jonë nuk ka pas një dhomë personale në prapaskenë, edhe përkundër peshës së madhe si artistja kryesore e shfaqjes, po prapa perdeve me gjithë trupën e shfaqjes, ata disi struken në qoshe të prapaskenës, e brenda pak minutave duhet të shndërrohen në shkëlqim të saj.
Kjo është Pafika jonë, që shpërfaqë në të njëjtën kohë edhe suksesin edhe sakrificën, edhe buzëqeshjen edhe trishtimin, edhe shkëlqimin në skenë edhe vuajtjet prapa skenës, por e lumtur, shumë e lumtur, për faktin se pikërisht asaj i është besuar ky rol historik për Operën e Kosovës, e cila vazhdimisht do të kujtohet si sopranoja që hapi perdet për këtë institucion me një shfaqje operistike kombëtare, institucion që mëton që në vitet në vijim ta ketë shtëpinë e saj operistike.
E lodhur nga rruga, pas kthimit prej Pejës ku kishte mbajt mësim me studentët e saj, sopranoja Adelina Paloja përderisa fliste me mua, më thoshte se ende po e ka ndjesinë e gërshetave, e besa edhe shumë shpesh po prek brezin e saj, në kërkim të armëve (rekuizita të shfaqjes) .
“Më mungon Pafika”, thotë duke qesh Adelina Paloja, e cila nuk e fsheh kënaqësinë e suksesit të dy mbrëmjeve kur edhe e shfaqën shfaqjen “Goca e Kaçanikut”, shfaqje kjo me muzikë të Rauf Dhomit, regji të Nikolin Gurakuqit, libret të Jusuf Buxhovit e Ajmone Dhomit.
Adelina Paloja nuk ishte fare në këtë botë kur kompozitori Rauf Dhomi para 53 viteve e kishte rrumbullakuar këtë shfaqje operistike, por as kur para 45 viteve ishte shfaqë për herë të parë në Tiranë. Dhe se një rol i tillë do ti besohej pikërisht vajzës nga qyteti me ajrin më të ndotur të Kosovës, Obiliqit, por që po ky qytet çuditërisht ka nxjerr një artiste me zë kaq të kristaltë. Dhe se do ti shkonte roli i Pafikës, jo të gjithë e kishin perceptuar, vetëm për një fakt, se disa menduan se Adelina Paloja ka një fytyrë shumë të butë për karakterin e Pafikës, sepse Pafika në këtë shfaqje paraqitet si një vajzë lozonjare e deri te heroina, dhe kësaj të fundit i druheshin. Por Adelina Paloja përgjatë intervistës kujtoi fjalët e kompozitorit e regjisorit të shfaqjes: Edhe kompozitori Rauf Dhomi, edhe regjisori Nikolin Gurakuqi, të dy të nesërmen më thanë ‘Kjo është Pafika jonë’.
Po jo vetëm shtëpia operistike u mungon këtyre artistëve. Edhe shkollimi i tyre, literatura lë shumë për të dëshiruar. Adelina Paloja tregon për KultPlus se për herë të parë për shfaqjen operistike “Goca e Kaçanikut” kishte dëgjuar përgjatë shkollimit, por vetëm si literaturë, nuk kishin pas rast si studentë që të dëgjonin ndonjë notë nga kjo shfaqje operistike.
“Në momentin kur është vendosë që të punohet për këtë shfaqje, atëherë edhe është filluar të punohet në përpunimin e shfaqjes, sepse ishte një botim i vjetër dhe mezi shiheshin notat”, ka thënë Plaoja.
Ajo vazhdon ta konsiderojë rolin e Pafikës si rol të një shfaqje historike për Kosovën, dhe se ndihet me fat që pikërisht ky rol i është besuar asaj. “Ndonjëherë e ke përshtypjen që karriera e juaj nuk përcillet sa duhet nga të tjerët, sidomos nga profesionistët. Po pikërisht rrugëtimi i artistit nëpër shfaqje të tilla, si brenda dhe jashtë vendit, rrumbullakojnë mozaikun e suksesit dhe të ofrohen edhe role të tilla. Mendoj se mu për këtë arsye mu ofrua roli kryesor i kësaj shfaqje, sepse kanë parë performancat e mia të shumta”, ka thënë Paloja, e cila e vetëdijshme për peshën e shfaqjes, tregon për hezitimet që kishte në fillim, por dëshira dhe dashuria për këtë shfaqje, sipas saj kanë triumfuar në pranimin e rolit, dhe që sipas Palojës mbetet vendimi më i mirë që ka marr në karrierën e saj artistike.
“Ne si artistë kemi pas mundësi që të performojmë me vepra botërore, por asnjëherë më nuk do të përsëritet shfaqja e parë operistike kombëtare e Kosovës. Kjo shfaqje për jetë do të mbetet në histori, dhe për mua nuk do të kishte një moment më briliant. Rolit të Pafikës ia dhash hakun, e po besoj që edhe muzikës operistike kosovare”, ka thënë Paloja.
Sopranoja Paloja është e lumtur për këtë prurje operistike, shfaqje kjo që ka përfshirë solistë të rinj e energji të re.
“Po uroj që Opera e Kosovës të shihet me shumë prioritet, në mënyrë që solistët të angazhohen sa më shumë. Edhe pse arritëm ta realizonim këtë shfaqje, për shkak të kostove të larta që ka një shfaqje, ne e mbyllëm këtë sezon me vetëm dy repriza, në mënyrë që të kthehemi prapë edhe me disa repriza në vjeshtë. E uroj që këto repriza të jenë më të shpeshta, me qëllim që tu jepet shansë të rinjve”, ka thënë Paloja, e cila ka shpjeguar se kjo shfaqje operistike, si e para kombëtare për Operën e Kosovës do të shfaqet edhe në Shqipëri e Maqedoni të Veriut, me qëllim që të prezantohet trupa e Operës së Kosovës edhe përtej Kosovës.
Paloja, e cila qysh e vogël është marr me muzikë, një vajzë që e para në familjen e saj ka qarë rrugën e karrierës artistike, pa pas atë bagazhin e privilegjeve familjare, tashmë është prezantuar edhe në skena të ndryshme të Evropës, e përgjatë këtij viti ka projekte edhe në Austri e Itali. Ajo vazhdon të punojë brenda Kosovës e herë pas herë të lëvizë edhe jashtë shtetit, por asnjëherë se ka parë si opsion që karrierën ta realizojë vetëm jashtë Kosovës.
“Nuk është zgjidhje që secili të synojë për të performuar vetëm jashtë vendit. Ne të gjithë jemi të vetëdijshëm se në vendet e jashtme ka shumë shtëpi operistike e shumë produksione, që shumë më lehtë se këtu mund të marrim edhe oferta. Por unë nuk e shoh atë zgjidhje, unë po besoj që institucionet e tona dita ditës po forcohen, dhe me patjetër bashkërisht duhet ti rrisim edhe profesionalisht. Unë do të vazhdoj të kem performanca jashtë vendit, por vetëm me lëvizje, asesi të shkëputem prej Kosovës”, ka thënë Paloja.
Duke kujtuar sfidat e shumta nëpër vite, qysh prej moshës së vogël ku i është dashur ti ndërrojë dy autobus për të ndjekur shkollën e muzikës, e deri të mosha e rritur, ku sipas saj shpesh herë i është bërë e padrejtë, ajo thotë se vetëm këmbëngulja të sjell role të mëdha, sikurse rolin e Pafikës, pasi që, sipas saj padrejtësitë e shumta përgjatë rrugëtimit, sidomos në fushën e artit, pothuajse janë shumë të shpeshta.
Duke bart mbi supe rolin kryesor që shënjon rrugëtimin e Operës Kombëtare të Kosovës, ajo tashmë ëndërron diçka tjetër. Skenat e mëdha prestigjioze sikurse “La skala” apo skena të ngjashme të mëdha, por sipas saj, jo me sforcim, se kërkesat e sforcuara sipas saj asnjëherë nuk e reflektojnë magjinë e skenës, por do të punojë shumë deri në një ngjitje të tillë skenike.
“Sikurse deri më tash që kam punuar pa sforcime, punë e angazhim që më solli rolin më të dashur që do ta ëndërronte çdo artiste, sepse si grua, unë me këtë rol përfaqësova heroinën tonë Pafikën, duke personifikuar shumë vajza e gra heroina shqiptare, e sukses më të madh nuk di që mund të ëndërrojë një artiste, sidomos kur kemi të bëjmë me sukës kombëtar. Pafika më ka plotësuar rrugëtimin në karrierën time artistike, dhe si të tillë do ta ruaj me shumë xhelozi”, ka thënë Paloja, e cila këtë sukses, thellë thellë ia dedikon prindërve e bashkëshortit të saj, që sipas Palojës, vetëm artistët e kuptojnë më së miri sakrificën e familjes, të cilët ndihmojnë aq shumë për një grimcë shkëlqimi skenik./ KultPlus.com
Një ngjarje e jashtëzakonshme po përgatitet në skenën kulturore të Kosovës. Pas 53 vitesh ekzistence si vepër kombëtare, opera “Goca e Kaçanikut” e kompozitorit Rauf Dhomi do të shfaqet për herë të parë e inskenuar në tërësi në Kosovë, shkruan KultPlus.
Nën regjinë e Nikolin Gurakuqit, provat e para regjisoriale kanë filluar sot, duke përfshirë solistët dhe korin në përgatitjet e shfaqjes. Puna ka filluar me shumë profesionalizëm dhe vullnet, ndërsa regjisori po drejton me pasion këtë projekt.
Dy artistët kryesorë në këtë shfaqje janë sopranoja Adelina Paloja në rolin e Pafikës dhe tenori Ismet Vejseli në rolin e Trimorit.
Adelina Paloja ka ndarë një pamje nga provat duke shkruar: “Për këtë muaj do të jem Goca e Kaçanikut – Pafika. Sot, në provat e regjisë së operës. Premierë absolute pas 53 vitesh”.
Ndërsa tenori Ismet Vejseli shprehet shumë i lumtur që po debuton në Operën e Kosovës me rolin e Trimorit.
“Te dashur miq, Jam shumë i lumtur që në fund të shkurtit do të debutoj në Operën e Kosovës me rolin e Trimorit të operës “Goca e Kaçanikut” nga Rauf Dhomi. Kjo operë është premierë absolute në Kosove pas 53 viteve, të cilën do e vendosi në skenë regjisori Nikolin Gurakuqi, i cili ka punuar më shumë se 80 opera në jetën e tij… Falënderoj drejtorin Meriton Ferizi dhe dirigjentin Edon Ramadani për mundësinë! Të gjithë kolegëve për këtë muaj toi toi toi!”, shkruan tenori Vejseli.
“Goca e Kaçanikut”, opera e parë kosovare, bënë fjalë për luftën kundër pushtuesve osmanë në anën e Kaçanikut dhe dashurinë e dy të rinjve: Trimorit dhe Pafikës. Këta dy ëndërrojnë për një jetë të lirë dhe të lumtur. Mirëpo tradhtari Rus Bashi i pengon, duke e akuzuar Trimorin për tradhti. Trimori burgoset, kurse Rus Bashi tenton ta rrëmbejë Pafikën. Në ndërkohë shokët e lirojnë Trimorin. Në momentin kur Rus Bashi e sulmon Pafikën, paraqitet Trimori, ndërsa Pafika arrin ta vrasë tradhtarin. Të gëzuar, të gjithë i këndojnë lirisë e dashurisë.
Premiera e kësaj shfaqje ishte planifikuar të jepej më 28 nëntor të vitit që e lamë pas, por për shkaqe teknike ajo u shty për muajin shkurt dhe me këtë rast po vjen si aktivitet kryesor për nderë të pavarësisë së Kosovës.
Premiera pritet të vijë më 23 shkurt, ndërkaq repriza do të jepet me 25 shkurt, në Sallën e Sportit “1 Tetori” në Prishtinë. / KultPlus.com
Në skenën e muzikës klasike, një emër që po shkëlqen çdo ditë e më shumë është ai i sopranos Adelina Paloja. Kjo artiste e mrekullueshme ka arritur të krijojë një ndikim të vërtetë në audiencë me zërin e saj të butë, të pastër dhe emocionues. Talenti i saj kësaj radhe po e dërgon për interpretim në dy vende të shquara – në Vatikan dhe Pantheon, në monumentin antik kult të Romës, shkruan KultPlus.
Si një soprano e njohur në skenën shqiptare, Adelina Paloja është një shembull i rrallë i pasionit, talentit dhe përkushtimit për muzikën. Zëri i saj që ngjall magji është i pajtueshëm me zërin e engjëjve, dhe ajo ka arritur të përcjellë emocionet më të thella nëpërmjet interpretimit të saj të mrekullueshëm.
Tashmë, një sukses i ri po shënohet në karrierën e artistes. Si rrjedhojë e interpretimit të saj në celebrimin e 15-të vjetorit të Pavarësisë së Kosovës me meshën “JOSEPH VELLA, MESSA PER LA PACE KOSOVA HYLAND PEACE MASS” erdhi edhe bashkëpunimi në Romë – Itali me ftesë të vet Hyland pasi dëgjoi interpretimin e Meshës nga sopranoja kosovare.
Përveç interpretimit në Vatikan, Paloja do të performojë edhe në monumentin antik kult të Romës, duke u vendosur mes thellësive të historisë dhe mrekullive të artit të lashtë. Në këtë ambient të veçantë, zëri i saj do të përjetësohet në një bashkëpunim të pazakontë mes kohës së sotme dhe të kaluarës së largët.
“Është absolutisht një ëndërr që të jetësohet interpretimi në vendin më prestigjioz në Itali dhe botë, më saktë në Vatikan dhe në Pantheon – Romë, dy vendet me histori të jashtëzakonshme dhe të një rëndësie të veçantë për botën! Mund të them që nuk kishte si të kurorëzohej më mirë kalendari artistik”, shprehet Paloja për KultPlus.
Sopranoja gjithashtu ka thënë se ky interpretim do i dedikohet imazhit të Kosovës në Vatikan, Romë dhe në botë andaj edhe do jetë i mbështetur nga “Albanian Diaspora Business Network”.
Në këtë paraqitje, Adelina do të interpretoj edhe premierën e veprës “Kosova Hope” të Hajrullah Sylës.
Koncerti do dirigjohet nga Michele Manganelli, soliste vokal, në organo Roberto Marini si dhe International Opera Choir shoqëruar nga Orkestra “Orchestra Sinfonica Romana” Direttore Michele Manganelli.
Përtej pjesës artistike, Adelina ka shpalosur për KultPlus edhe peshën që bart ky koncert.
“Përgjegjësia është edhe më me peshë pasi në Pantheon do jem artistja e parë shqiptare në histori që do interpretoj. Pantheon në Romë si një destinacion për çdokënd jo vetëm për turistët dhe regjisorët por edhe për arkitektët, dizajnerët dhe artistët nga e gjithë bota është pasuri dhe i mbrojtur. Legjendat thonë se ishte pikërisht vendi ku themeluesi i Romës, Romulus, u ngjit në parajsë ku edhe sot mbetet akoma i hapur për të gjithë si objekti më i vjetër në botë që është ende i hapur përgjatë ditëve të sotme”, tregon artistja.
Shekuj më vonë, arkitektët neoklasikë do t’i referoheshin kombinimit të portikut dhe kupolës së Panteonit për të mbushur ndërtesat e tyre me të njëjtat vlera, nga Kapitoli i SHBA-së në Uashington, DC., deri te Somerset House në Londër, ku në plan është që edhe ky koncert të shfaqet në USA dhe në Britani të Madhe.
“Jam e bindur që do mirëpritet kjo premierë e veprës në Itali, me prezencë të aktereve kyç nga jeta kulturore, diplomatike, politike dhe religjioze duke përfshirë prezencën e Kardinalit të Romës dhe kardinalëve të tjerë të Italisë, përfaqësuesve nga Shtetet e ndryshme etj.”
Ky vit ka qenë jashtëzakonisht i frytshëm për Palojën e cila tash po i shijon frytet e karrierës mbi 27 vjeçare.
Prezantimet e sopranos kosovare në Itali, Milano me Orkestra Simfonike në Teatro, Koncerti dedikuar 100 Vjetorit jubilar të dives Maria Callas, koncertimet në Zagreb, Kroaci dhe në rajon e Evropë, janë vlerësuar lartë nga kritika dhe të pranishmit. Por puna për të vazhdon me projekte të reja, me angazhim të përditshëm në kontroll rigoroz të teknikës së të kënduarit e me detaje të stërholluara muzikaliteti e studimi të literaturës nga opusi i kompozitorëve për të qenë gjithherë në formë optimale që ti dhurojë audiencës interpretime të nivelit të lartë. / KultPlus.com
Fakulteti i Arteve triumfon ndër tri vendet e para të Koreve fituese në finalen e Garave Internacionale të Koreve Profesionale në Zarë të Kroacisë për vitin 2023, përcjell KultPlus.
Në njoftimin në faqen zyrtare të Universitetit ’Haxhi Zeka’ thuhet se kori i këtij fakulteti është shpërblyer me vendin e tretë.
Në vijim gjeni postimin e plotë:
Fakulteti i Arteve triumfon ndër tre vendet e para të Koreve fituese në finalen e Garave Internacionale të Koreve Profesionale në Zadar, Kroaci, për vitin 2023.
Shpërblimi në finalen e madhe me vend të tretë në garat në Zarë në Kroaci do të mbetet një kapitull i madh në historinë e Fakultetit të Arteve në paraqitjen e tyre të parë në garë internacionale korale dhe triumfin me rezultatin e aspiruar me në krye Dirigjentin Prof.Asoc Hysen Nimani i cili me një punë kolosale vendosi Kosovën ndër shtetet fituese, duke fituar jo vetëm zemrat e publikut por edhe jurisë me përbërje nga emra eminentë të fushës vokale korale.
Kori është një shembull frymëzues për të gjithë ata që besojnë në fuqinë e artit për të ndryshuar botën dhe për të shpërfaqur një pikëpamje të unikë nëpërmjet imazheve dhe ekspresionit artistik.
(Në video direkte nga Kroacia e Prof. Ass.Adelina Paloja)/KultPlus.com
Nganjëherë në jetë jo gjithmonë të mjafton vetëm talenti, sepse përveç tij nevojitet edhe një shtysë që me ngulm të çon përpara në zhvillimin dhe kultivimin e atij talenti. Sopranoja kosovare, Adelina Paloja pati fatin e mirë që duke lindur me një talent të vyer siç është ai i zërit dhe duke e pasur babanë një muzikant autodidakt i cili edhe e vuri në pah talentin e saj, lidhjen e saj me muzikën filloi qysh në moshë të vogël.
Si një fillestare 6-vjeçare, ndonëse e re në moshë por jo edhe e pavendosur për qëllimet e saj, Paloja nisi rrugëtimin në muzikë e i cili që nga fillet u përcoll me suksese të mëdha, shkruan KultPlus.
Puna që nga atëherë me profesionistët më të mëdhenj të muzikës në ato kohë, i vunë një themel të fortë e që i ndihmoi përgjatë gjithë karrierës së saj e deri më sot ku edhe është një prej solisteve kryesore të institutit të Filarmonisë së Kosovës. Zëri i saj që ndërlidhet ngushtë me të gjitha rolet që interpreton anembanë botës, padyshim që ka vënë vulë në operistiken kosovare, aty ku më së miri e më së afërmi, ndjehet ajo vetë.
Me një qëndrim të rrallë, ndjeshmëri në vokal e fuqi të paparë në interpretim, sopranoja Paloja shpeshherë di të magjepsë të gjithë sallën, varësisht ku ajo interpreton. Duket se fuqinë shpirtërore nga brendësia e saj e nxjerr krejt lehtazi dhe kjo vërehet nëpërmjet butësisë së saj që i vjen natyrshëm përmes këndimit. Opera për të është shtëpia e dytë, dhe këtë nuk e ka aspak frikë ta tregojë.
Ajo, gjithashtu veçohet për një identitet që është formuar qysh nga rrugëtimi i saj muzikor në instrumentin e pianos, për të vazhduar tek investimet e saj si muzikante, përfshirë këtu edhe njohuritë e thella për botën e muzikës, njohjen virtuoze të instrumenteve dhe fushave të tjera muzikore. Por, vokali për të, gjithmonë do të mbetet ajo pika kyçe që si formë e artit, i qëndron besnike më afër zemrës së saj, asisoj që shprehja e saj lirike del më e ngrohtë sesa format e tjera të të shprehurit muzikor. Dhe këtë e shohim më së miri nëpërmjet roleve të saja, që e nxjerrin në pah një intensitet të pakrahasueshëm, një mishërim me personazhet që ajo i luan si dhe një pasion të vërtetë për artin që Opera në të vërtetë e ka. Një pasion ky që me ngulm patjetër që do të ngulitet në kujtesën e gjithsecilit që e dëgjon nga afër, timbrin e saj aq të ngrohtë.
Përveç kësaj, Paloja me punë dhe përkushtimi arriti që të shkelë shumë skena jo vetëm në vend por edhe para audiencave evropiane e në shënimin e ngjarjeve të rëndësishme si në Kosovë ashtu edhe përtej kufijve kombëtarë. Së fundmi, ajo është përzgjedhur edhe për Specializim-Perfeksionim Vokal për një vit akademik në Belcanto, nën mentorimin e njërës nga mjeshtret e zërit më të rëndësishme të botës operistike, Maestra Carmen Santoro, e cila ka një përvojë të madhe me emrat më të mëdhenj botërorë si: Luciano Pavarotti, Placido Domingo, Monserrat Caballé, Diana Damrau, Marilyn Horne e Mariella Devia.
Por, për këtë rrugëtim 27-vjeçar të mbështjellë me momente nga më të ndryshmet, sfida, çmime, vështirësi si pasojë e situatave të ndryshme që është përballur Kosova e njëtrajtshëm edhe komuniteti i muzikës, momente siç është ai i paraqitjes në Paris si soliste kryesore në veprën dedikuar viktimave të luftës në Kosovë, e shumë detaje të tjera, sopranoja Adelina Paloja i ka shpalosur përmes një interviste për KultPlus.
KultPlus: Secili njeri e ka një pikë ku nis gjithçka, na përshkruaj fillimet tuaja me muzikën?
Adelina Paloja: Gjithçka nisi qysh në moshë të hershme. Fillimisht u evidentua talenti dhe muzikaliteti në familje nga babai im, si një artdashës por edhe si muzikant autodidakt aso kohe. Andaj, përveç muzikës sonë të përbashkët në ambientet e shtëpisë, ai mori mundin që të më udhëzojë në shkollim dhe edukim të mëtutjeshëm profesional në shkollë të muzikës qysh në moshën 6-vjeçare, kur konsiderohej akoma herët por që ky rrugëtim i nisur në moshë të re ka lënë gjurmë dhe themel të fortë në ndërtimin e mëtejmë e identitetin tim artistik.
KultPlus: Na trego se çfarë ju tërhoqi pas Operës?
Adelina Paloja: Duke qenë se kam filluar rrugëtimin tim muzikor me lojën në piano dhe kam investuar në kompletimin tim si muzikante përfshirë këtu përveç tjerash edhe njohuritë e thella mbi botën e muzikës, njohjen virtuoze të instrumentit dhe fushave tjera muzikore por që në momentin vendimtar për karrierën time, lidhja direkte shprehëse ishte pikërisht me vokalin, si formë e artit të cilën e ndjeja me afër dhe ishte akoma më e afërt se të gjitha format e tjera të të shprehurit muzikor. Opera është përvojë, një kombinim aq i ndjeshëm i narrativit, skenës si dhe muzikës si subjekt, e ndërthurur me emocionin intensiv të qenies njerëzore e mishërimit në personazhe dhe kjo më bënte të shihja botën nga perspektiva të ndryshme. Çdoherë interesante e afër shpirtit, e çdoherë pranë publikut me instrument unik organik.
KultPlus: Jam e interesuar të di për mësuesen/in tuaj të parë në edukimin tuaj në muzikë, për atë që ju shtyu në këtë drejtim, ju dha vetëbesim dhe ju kërkoi të zbuloni më shumë vetën?
Adelina Paloja: Mësuesit dhe profesorët që ishin së bashku në ngritjen time, përmbushën dhe mbollën tek unë vlerat si mision, detyrë e përgjegjësi fisnike. “Një nxënës, një pedagog i mirë, një libër e një laps mund të ndryshojnë botën”, vërtet se kjo thënie e tregon më së miri peshën e arsimimit. Jam me fat që gjatë edukimit dhe rrugës në profesion kam pasur afër pedagogë e udhërrëfyes të shkëlqyeshëm e që janë pjesë e përjetshme e arritjeve të mia dhe e falënderimit tim. Të tillë pa dashtë të harroj dikë janë disa qysh nga fillet e mia si 5-6 vjeçare përfshirë këtu: Drita Rudin, Rafet Rudin, Adelina Ushakun, Agron Shujakun, Ana Gjinin, Jeta Didën, Elife Podvoricën, Merita Junikun, Baki Jasharin, Maria Muratovskan, Mendi Menxhiqin, Selim Ballatën e të tjerë që në një moment tjetër do të doja t’i përmendja veç e veç edhe të tjerët, pa harruar për kontributin e tyre të vlefshëm.
KultPlus: E konsideroni një edukim të vështirë apo të këndshëm atë të muzikës?
Adelina Paloja: Absolutisht sikur në çdo profesion ka vështirësi nëse je në kërkim të ideales, por pasioni të jep përmbushje dhe kënaqësi përherë. Një solo këngëtare lirike të suksesshme përveç talentit që është i padiskutueshëm, ashtu sikurse në çdo profesion tjetër, çelësi kryesor është puna sistematike, këmbëngulja e konsistenca për të qenë çdo ditë një hap para ditës që lamë pas. Vetëkritika në këtë profesion kujtoj që është e shëndetshme dhe shërben për një ngritje e rritje të natyrshme. E kam thënë gjithmonë dhe po e ritheksoj, pavarësisht rrethanave, duhet pasion, besim në kapacitetet e tua, ambicie të shëndoshë të ngritjes drejt perfeksionimit të kualiteteve muzikore por dhe jashtë saj siç është leximi, hapja e një horizonti tjetër të kompletimit intelektual të domosdoshëm. Jam ithtare e punës dhe pa kompromis në faktin që me një angazhim minimal të kemi pritshmëri të larta. Besoj në gjërat që arrihen me meritë dhe mendoj që tek ata të mirët ndoshta suksesi vërtet vonon por është e pamundur që në një moment të mos vijë në shprehje. E tek atëherë vjen vështirësia më e madhe, mbajtja e suksesit me përfshirje edhe më të madhe të të gjithë kapacitetit emocional, profesional, e intelektual sepse zgjerimi i diapazonit të njohurive nuk përfundon me një diplomë a letër tjetër arritjeje. Rritja organike është çdo ditë të jetës sonë.
KultPlus: Të jesh soprano nuk është e lehtë, sidomos në Kosovë, na shpalos pak sfidat e këtij profesioni
Adelina Paloja: Besoj duhet të jemi të vetëdijshëm dhe emocional si shoqëri kur flasim për kushtet që ofrohen në vend. Krahas faktit që kemi këngëtarë lirikë të shkëlqyer, e vështirë po është spikatja e tyre dhe dhënia e hapësirës për të gjithë, e gjithashtu për të dëshmuar talentin e të arriturat e tyre. Institucionet në këtë plan, do duhej ndoshta edhe më shumë angazhim në politika për ndihmë dhe promovim më prezent. Pastaj, ana infrastrukturore lë shumë për të dëshiruar ngaqë asnjë nga institucionet kulturore muzikore në vend nuk kanë objekt – shtëpi të vetën dhe rrjedhimisht edhe artisti nuk ka kushtet elementare për përgatitje para performancës por edhe një skenë të denjë për art cilësor.
KultPlus: Prej vitesh je pjesë e korit të Filarmonisë së Kosovës dhe lirisht mund të themi një ndër solistet kryesore të tij, na përshkruaj pak bashkëpunimin me institucionin më të lartë të muzikës klasike
Adelina Paloja: Unë kam një lidhje të ngushtë dhe emocionale me institucionin e Filarmonisë së Kosovës meqë angazhimi im aty ka qenë aktiv qysh kur isha akoma studente e vitit të dytë në universitet. Andaj, jam rritur me institucionin dhe kam parë nga afër ngritjen time por edhe të institucionit vit pas viti. Përveç si interpretuese e soliste me vite të tëra, kontributi im ka qenë substancial edhe si pjesë e menaxhmentit në bordin drejtues. Sot, Filarmonia e Kosovës është e kompletuar në të gjitha kapacitet e saj e edhe tek resurset njerëzore profesionale që dikur ishin deficitare, prandaj jam e lumtur për këtë fakt. Po ashtu jam e lumtur edhe me prezantimet dinjitoze që pashmangshëm janë kudo që është Filarmonia e Kosovës me Korin dhe Orkestrën Simfonike profesionale të saj.
KultPlus: Ju keni performuar edhe në 40-vjetorin e çmimit Nobel për Paqe të Shën Nënës Terezë në Itali, na i përshkruani emocionet e këtij përjetimi
Adelina Paloja: Kam qenë e lumtur të interpretoj në Milano dhe Lecco në dy raste të rëndësishme që lidhen me figurën e ndritshme të popullit tonë, Shën Nënë Tereza. E para qe në Auditoriumin e Leccos dhe ‘Basilica San Nicolò’ si dhe në ‘Milano alle Terreze’, në inaugurimin e kishës në emër të Nënë Terezës, ku të pranishëm ishin kontribut-dhënës nga Konsullata e Kosovës, komuniteti shqiptar në Itali, Ipeshkvi i Milanos e personalitete të tjera të shquara nga jeta diplomatike, politike e kulturore nga Italia e më gjerë.
KultPlus: Duke qenë se keni performuar në vende të ndryshme evropiane, na trego pak cilën nga këto performanca e vlerëson më shumë
Adelina Paloja: Kënaqësi e jashtëzakonshme është sepse çdo skenë e ka peshën dhe rëndësinë e vetë. Përgjatë 27 viteve karrierë kam interpretuar në shumë vende të botës, përshirë jashtë rajonit edhe në vende evropiane si në: Austri, Gjermani, Francë, Bullgari, Itali, Suedi, Angli e të tjera dhe shpesh e mendoj se çfarë e bën të paharruar një performancë. Përgjigja e sinqertë arrihet kur marr nga energjia e audiencës që kam përballë pavarësisht se ku jam, dashuria që e marr përkthehet në mënyrë automatike me përmbushje emocionale duke i dhënë dozën finale, atë më të bukurën, ngjyrosje emocionale e frymëzuese të interpretimit tim skenik.
KultPlus: Kompozitori Hajrullah Syla, ka kompozuar një vepër të cilën e ka bërë dedikim për ju, vepra u interpretua më pas nga ju dhe Kori i Filharmonisë së Kosovës, na përshkruaj këtë ndjenjë?
Adelina Paloja: Mbetet një nga momentet më të paharruara, ai interpretim i veprës që qe dedikim për mua. Vepra u quajt “Ubi Caritas” nga kompozitori ynë, Hajrullah Syla. Me propozim e tij dhe me kënaqësinë më të madhe nga ana ime u realizua kjo vepër e cila përfshinte teknikë vokale në regjistra të ulët dhe tinguj të lartë ekstern, agjilitet, dhe mishërim emocional duke përfshirë elementet dalluese teknike të kualiteteve të mia vokale. Gjithashtu, kompozitori Syla me këtë vepër u nderua me ‘Çmim për Veprën më të Mirë Vokale’ nga Ministria e Kulturës, andaj kjo ishte edhe kënaqësi e dyfishtë për mua.
KultPlus: Jeni nderuar dy herë me çmim të parë në “ArsKosova”, si ndjeheni kur ju shpërblehet puna?
Adelina Paloja: Kanë qenë të rëndësishme si motiv në fillet e karrierës sime. E çmimet gjithmonë janë të mirëseardhura posaçërisht tek artistët e rinj, duke e ditur edhe seriozitetin e konkursit me në krye me violinisten tonë virtuoze Sihana Badivukun, natyrisht se ishte shtysë për rezultate të reja. E pas kësaj, edhe të tjera si përfundimi i studimeve post-diplomatike në Universitetin e Shkupit me nderimet më të larta për arritje ” Summa Cum Laude” e që ishte ogur i mirë për të tjera çmime e mirënjohje të shpeshta nga institucionet për kontribut dhe përfaqësim të denjë artistik.
KultPlus: Sigurisht që është përgjigja e audiencës ajo që të bën të dish sa e vlerësuar dhe e përgatitur je në profesionin tënd. Cilat janë përgjigjet më të mira që i ke marrë nga audienca?
Adelina Paloja: Publikun e kam besnik dhe me dashuri pafund. Është dashuri e shkëmbyer nga unë për ta dhe nga ata për mua, në mënyrën më të sinqertë. Ne përmes artit arrijmë që të jetësojmë iluzionet tona, të udhëtojmë në të padukshmen që të prekim hapësira e zemra njerëzish. Në paraqitjet tona takojmë audiencën me titan që lanë gjurmë të përjetshme përmes thesarit artistik dhe shpërblimet më të mira për mua, madje mbi çdo çmim a mirënjohje tjetër, janë pikërisht duartrokitjet e ngrohta, buzëqeshja apo edhe lotët domethënës të audiencës që kanë ndarë kohë për artin tim. Përfshihesh dhe jetëson fjalët e muzikën mbi tema që jo çdoherë janë të dëshiruara ashtu siç edhe jeta di të jetë, por e ndjejmë bashkërisht dramën jetësore dhe e ndajmë në një dimension tjetër.
KultPlus: A mund të identifikoni ndonjë moment në shfaqje që ju ka bërë të ndiheni e veçantë dhe ka zënë vend special në kujtesën tënde?
Adelina Paloja: Po, pashmangshëm ka momente të tilla, por një moment të veçantë që dua ta veçoj nga kujtesa ime është paraqitja si soliste kryesore në Paris në objektin ikonik “Musèe de L’Armèe – La Cathèdrale Saint Louis -Des -Invalides” me veprën e Karl Jenkins “A Mass for peace”, dedikuar viktimave të luftës në Kosovë. Si rrallëherë, unë si soliste dhe të gjithë artistët në skenë të rrëmbyer nga emocioni u tjetërsuam e u zhytëm në një tjetër dimension, në atë botë të tmerreve të luftës. Nuk ishim vetëm performues por personazhe reale që kishim përjetuar luftën e që rikthyem në Paris copëza kujtimesh që ndoshta ndërdija jonë pa dashje hezitonte t’i rikthejë si imazhe. Mbetet vepra që më rrëmbeu me fatin e gruas shqiptare të cilën e personifikoja dhe e cila mbijeton bashkë me dhimbjen në një mishërim krejt organik të muzikës e tekstit aq sa kur mungonin vargjet, lëngonin tingujt…
KultPlus: Kush janë perëndeshat tuaja vokale?
Adelina Paloja: Ka mjaft figura të tilla duke filluar nga zërat e bukur shqiptarë, të artisteve tona, por edhe solo-këngëtarët lirikë nga ‘belcanto’ dhe shkolla e vjetër e mjeshtërve italianë të artit operistik, përfshirë këtu ikonat Maria Callas, Renata Tebaldi, Mirella Freni, Leontyne Price, Montserrat Caballé e shumë të tjerë.
KultPlus: Përveç punës suaj si soprano, ju metodat e këtij profesioni tashmë i përcjellni edhe tek gjeneratat më të reja përmes ligjëratave ku ju jeni profesoreshë. Si e vlerësoni kapacitetin e më të rinjve të këtij profesioni?
Adelina Paloja: E pata dëgjuar një shprehje e cila thoshte: “Udhëzoj studentët se ku të shikojnë por jo edhe se çfarë të shohin” e këtë parim kam dhe sot, që të jem dora ndihmëse e gjithsecilit me informacionet bazike e të thella mbi artin dhe teknikën e mirëfilltë vokale të të kënduarit, por edhe në nxitjen dhe hapjen e horizonteve të reja si dhe në kultivimin e kreativitetit të tyre, si pjesë e pashmangshme e identitetit të tyre unik. Edhe sot, kur vetë jam në cilësinë e pedagoges, mundohem që me gjithë kapacitetin tim intelektual e njerëzor të përcjelli tek artistët e rinj virtytin e shembullin se vetëm me punë, devotshmëri, vetëdisiplinë e pasion për profesionin, arrihet rezultati i aspiruar.
KultPlus: Krejt për fund, na thuaj një mesazh për lexuesit e KultPlus për festat e fundvitit
Adelina Paloja: Në një introspeksion që në fund të ditës bëjmë për vitin që e lamë pas, jam e lumtur të them që në sintezë me pritshmëritë ishin edhe realizimet si në planin personal ashtu edhe profesional. Ju uroj të gjithëve përzemërsisht një vit të ri me shëndet e bekime, si dhe dua ta ndaj mesazhin që t’i gëzohemi jetës me të mirat dhe të papriturat e saj. Jam e lumtur për një familje të shëndoshë dhe faktin që karriera më mundëson të jem afër atyre që dua më shumë, studentëve, muzikës, publikut. Arti si urë-lidhës me njerëzit e tjerë, më inspiron dhe unë frymëzohem e marr motiv nga përditshmëria e gjërat e vogla që shpeshherë janë më me vlerë, asisoj që edhe më pasurojnë e bëjnë më të mirë si njeri, e që njerëzoren mund ta shpalos pastaj përmes artit tim si gjuhë e përbashkët të komunikimit shpirtëror. / KultPlus.com
KultPlus – e para gazetë online shqiptare që i kushtohet raportimit të denjë mbi artin dhe kulturën, edhe këtë fundvit është përkujdesur për lexuesit e saj.
Sukseset e Kosovës ishin të shumta këtë vit nëpër sfera të ndryshme, andaj KultPlus këto suksese do t’i gëzojë edhe njëherë duke sjellur intervista ekskluzive të cilat do të mund t’i lexoni më 31 dhjetor, 1 e 2 janar në ditët e festive të Vitit të Ri 2023.
Albion Rrahmani, Detina Zalli, Kushtrim Koliqi, Tom Kuka (Enkel Demi), Shukrije Ramadani, Albana Krasniqi, Ilaz Bylykbashi, Lea Ypi, Ornela Vorpsi, Besa Llugiqi, Elez Nikçi, Adelina Paloja, Mrika Nikqi, vijnë me rrëfime ekskluzive duke sjellur histori shumë interesante nga sirtarët e veprimtarisë së tyre, të gjitha këto intervista mund t’i lexoni në www.kultplus.com, që do të publikohen gjatë ditës së sotme.
Si çdoherë, ju ftojmë të na lexoni por edhe të na shkruani mbi personazhet, tregimet dhe momentet që ju doni t’i shihni në KultPlusin tonë dhe tuajin.
Gjithsej dhjetë vepra nga kompozitorë të ndryshëm kanë kaluar përtej përsosmërisë me rastin e koncertit të Korit të Filharmonisë së Kosovës, në kuadër të edicionit të pestë të “PriVocalFest”. Ishte një repertor ku dominonte gjuha e huaj, por prej të cilit, pjesët shqiptare kanë thyer kufijtë magjik të interpretimit. Secili anëtar pjesëmarrës ka bërë që me dhuntinë e tyre të shënojnë magjishëm natën e fundit të këtij festivali, i cili tash e pesë net me radhë ka sjellë koncerte që tejkalojnë pritshmëritë e publikut, shkruan KultPlus.
Ky koncert mbrëmë ka portretizuar literaturën muzikore korale duke filluar nga veprat e kompozitorëve të njohur si: Ēriks Ešenvalds, Mendi Mengjiqi, Thomas Simaku dhe Vasil S.Tole, të cilët kanë dëshmuar për një krijimtari sa të pasur aq edhe të ndjeshme, e njashtu edhe të bukur.
Kisha katolike “Shën Ndou” ka mirëpritur një numër të lartë të të pranishmëve, që kanë zënë vendin e tyre të posaçëm, me ç’rast hapësira është mbushur nga caku në cak. Qetësia, tashmë simbolike para nisjes së çdo koncerti të Filharmonisë së Kosovës, u bë pjesë e pandashme e kësaj nate. Hijeshia, eleganca, ndjeshmëria dhe intensiteti që prekte dy caqet e veta, janë krejt ato që kanë rrethuar komplet të pranishmit.
Prezenca e vokalit hyjnor të Korit të Filharmonisë së Kosovës si çdo herë, është ekzistuese nëpër secilin koncert. Kështu ishte edhe rasti mbrëmë, ku nuk kanë munguar as edhe instrumentet diversive që ëmbëlsisht iu kanë bashkëngjitur zërit të tyre. Përfshirja e pianos nën manovrimin e Melos Buzës dhe pjesëmarrja e Zanë Abazit në flaut, ia kanë shtuar një magjepsje shtesë kësaj mbrëmjeje.
Ndërkohë, mbizotërimi i vokaleve madhështore të sopranove si Adelina Paloja, Selvije Marteti, Elona Sadiku, Shkurte Hykaj, Urta Haziraj si dhe altos Dea Hamdiu, baritonit Shaban Behramaj, manovrimi i harpës së gojës nga Patris Berisha, inkuadrimi i elementeve koreografike dhe përfshirja e gotës që lëshoi tingujt në atmosferë, i ka dhënë audiencës një gjendje ndryshe nga e zakonshmja. Lirshmëria e tyre në veprim por harmonia e tyre mes vete, e ka mbështjellë këtë natë në një mënyrë të pakrahasueshme.
Në anën tjetër, dirigjenti i njohur Ēriks Ešenvalds me ritmin e tij të pandalshëm, ka dirigjuar këndshëm secilin anëtar të korit. Veçantia e tij dallohej në mënyrat e ndërveprimit me çdo kë përpara tij. Por, fuqia dhe energjia më e madhe u dëshmua dhe u përjetua më së miri nga luajtja e tri këngëve popullore si “Moj e bukura More”, “Qenke veshur me të bardha” dhe “Trëndelinë”, të cilat kanë arritur deri një nivel që s’është prekur asnjëherë më parë.
Këto surpriza vazhdimisht po bëhen pjesë e pandashme e Korit të Filharmonisë së Kosovës, që gjithmonë dëshmon për një talent të rrallë, unik dhe të papërsëritshëm. Mënyra e tyre e interpretimit, prezenca skenike e vokali i njëzëshëm, janë vetëm disa karaktersitika që gjithmonë kanë ndikuar dhe vazhdojnë të kenë ndikim të madhërishëm në atmosferën e çdo paraqitjeje. Kjo u vërejt edhe atëherë kur duartrokitjet e tej zgjatura e të shumta, kanë zënë vend në fund të këtij koncerti.
Për të folur më shumë rreth këtij koncerti, dirigjenti Ēriks Ešenvalds është shprehur se qëndrimi në Kosovë, po i ngjason si qëndrimi në shtëpi.
“Është hera ime e parë në Kosovë dhe kam qëndruar vetëm një javë këtu. Për shkak të këtyre njerëzve të mrekullueshëm, çdo minutë këtu, unë e kam ndjerë si në shtëpinë time. Nesër e kam fluturimin tim për tek familja ime dhe fëmijët e mi, dhe do iu rikthehem studentëve të kompozimit në Akademi. Nga toka juaj në tokën time, unë do të marr këtë pasuri të mrekullueshme të folklorit, e po ashtu edhe zërat e juaj të bukur”, ka thënë ai.
Ndërsa, drejtori i “PriVocalFest” Hajrullah Syla për KultPlus ka potencuar se ky edicion ka qenë mjaft përmbushës dhe se është ndarë i kënaqur me arritjet.
“Ky koncert ishte thjesht brilant, duke nisur nga veprat, interpretimi, e deri tek drejtimi i dirigjentit fantastik. Ata e murrën publikun me vete gjatë gjithë natës, andaj qëllimi i këtij koncerti dhe ardhja e dirigjentit në këtë koncert, dëshmon se gjithçka ia ka vlejtur. Secili koncert në këtë edicion ka pasur peshë të madhe, artistë të mëdhenj që kanë sjell vlera të mëdha, andaj që sigurisht që ka qenë shumë e vështirë, por me vullnet e punën me stafin që e kemi bërë, është lehtësuar gjithçka. Mendoj që çdo koncert ka pasur publik mjaftueshëm dhe çdo herë janë ndarë të kënaqur me performancën e gjithsecilit, andaj edhe i kemi arritur prishtmëritë e tyre. Secili koncert ka qenë ndryshe me program, është trajtuar ndryshe dhe ka pasur lidhshmëri me njëra-tjetrën, andaj koncertet kanë qenë të rëndësishme njëtrajtësisht. Jam tejet i kënaqur me atë se çfarë kemi arrirë të bëjmë në këtë edicion”, ka thënë Syla.
Ai tutje ka pohuar se puna për edicionin e radhës po vazhdon. Po ashtu, ka bërë të ditur se kontaktet me artistë të mëdhenj po vazhdojnë si dhe tashmë mbetet vetëm një kohë e shkurtër që të finalizohen kontratat, marrëveshjet dhe përgatitjet për nisjen e edicionit të gjashtë.
Filharmonia e Kosovës mbrëmë mbylli sezonin me një koncert të jashtëzakonshëm që u mbajt në sheshin “Skënderbeu” në Prishtinë.
Kantata e përmasave të mëdha “Carmina Burana” e kompozitorit Carl Orff, e bazuar në 24 poema nga koleksioni mesjetar Carmina Burana, u prezantua për herë të parë për publikun kosovar.
280 persona në skenë dhuruan momente të paharrueshme për publikun. Performuan Kori dhe Orkestra e Filharmonisë së Kosovës, Kori i Universitetit të Prishtinës “Hasan Prishtina”, Kori i Universitetit të Pejës “Haxhi Zeka”, Kori i fëmijëve “Okarina” dhe solistët Adelina Paloja, Arta Jashari – soprano, Safet Berisha – kontratenor dhe Xhemil Rexhepi – bas.
Koncerti u organizua në bashkëpunim me Operën e Kosovës dhe me mbështetjen e Ministrisë së Kulturës dhe Komunës së Prishtinës.
Në këtë ngjarje të veçantë morën pjesë personalitete të shumta nga jeta politike e kulturore e Republikës së Kosovës si dhe nga stafi diplomatik ndërkombëtar i akredituar në Kosovë. Ndër ta, kryeministri i Kosovës, Albin Kurti, ambasadori i ShBA-së, Jeff Hovenier, nënkryetarja e Kuvendit të Kosovës, Saranda Bogujevci, kryetari i Komunës së Prishtinës, Përparim Rama, deputetë të Kuvendit të Kosovës, zëvendësministri i MKRS-së, Sejnur Veshall, dhe shumë personalitete e qytetarë që mbushën hapësirën e sheshit “Skënderbeu”. / KultPlus.com
Dritat e sallës u drejtuan nga ajo, emocionet e skenës filloi t’i ndjente por sytë e saj u përballën me një boshllëk në ulëset e audiencës. Sopranoja me zërin e mrekullueshëm, Adelina Paloja performoi koncertin ‘’Recital’’ në natën finale të Festivalit “Prishtina International Vocal Fest”, shkruan KultPlus.
Ishte bërë kohë e gjatë prej kur Paloja kishte munguar në skenën muzikore si pasojë e situatës pandemike që ka cunguar pothuajse të gjitha aktivitetet kulturore dhe jo vetëm. Sopranoja u rikthye me performancën e saj të jashtëzakonshme në edicionin e tretë të ‘’PriVocalFest’’, nën shoqërimin e pianos së Lirika Pulës dhe të një audienceje virtuale. Natyrisht mos prezenca e publikut është edhe mungesë e energjisë që përçohet në mes tyre dhe artistit, mirëpo Paloja arriti ta menaxhoj këtë duke i jetuar thellësisht veprat me të cilat u prezentua kësaj radhe.
‘’Vetë skena të dhuron magjinë sepse mundëson që përmes artit tënd të jetësosh veprat e kompozitorëve që lanë gjurmë të përjetshme përmes thesarit artistik që trashëguam nga ta. Me interpretimet tona ne prekim të padukshmen, hapësira e zemra njerëzish’’, theksoi për KultPlus sopranoja Adelina Paloja.
Programi u hap me veprën e Prenk Jakovës ‘’Kah mendoj për ditë e reja’’, përderisa veçantia e saj mbetet te fakti se kësaj radhe ishte e shkëputur nga opera dhe për herë të parë interpretoi si Solo. Publiku vazhdoi të dëgjoj një bllok veprash vokale nga kompozitori rus Sergei Rachmaninoff, përderisa pjesa e dytë e koncertit përfshiu ciklin nga Joaquin Turina, e cila erdhi si premierë në Kosovë dhe vepra të tjera spanjolle dhe italiane.
Ndërkaq Paloja për përzgjedhjen e tyre është kujdesur që të jenë pak ose hiç të interpretuara më parë në vendin tonë, në mënyrë që dëgjuesit të përballen me diçka të re. ‘’Kjo ariozë nga opera e parë shqiptare “Mrika” të cilën për herë të parë të shkëputur nga opera e kam interpretuar edhe me Orkestrën Simfonike të RTSh-së me maestro Jetmir Barbullushin, është jashtëzakonisht e bukur dhe me motive të fuqishme andaj uroj që të vazhdoj të interpretohet më shpesh’’, shprehet tutje sopranoja Paloja teksa flet për veprën e Jakovës ‘’Kah mendoj për ditë e reja’’.
Përderisa për Palojën mbetet kënaqësi performimi në ‘’Prishtina International Vocal Fest’’, periudha përgatitore për këtë koncert merrte kohë dhe shumë mund. Poashtu, vend të rëndësishëm kishte zënë edhe konceptimi i programit, i cili sipas saj duhet të kishte një sintezë logjike.
‘’Kam përzgjedhur si bllok veprash të pjesës së parë krijimtarinë vokale nga opusi i kompozitorit rus Sergei Rachmaninoff të cilat përveç që janë me kërkesa gjithashtu është janë jashtëzakonisht të bukura dhe është e pamundur të mos mishërohesh me secilin tingull e fjalë. Pastaj një cikël nga Joaquin Turina i cili intepretohet si premierë kosovare për të vazhduar me vepra tjera të bukura nga literatura spanjolle dhe italiane’’, potencon sopranoja për KultPlus.
Emocionet e Palojes padyshim se do të shtohen edhe më shumë, kur publikun të cilin e ka motiv do ta takoj në interpretimet sy më sy.
‘’Si përherë ndihem e bekuar me pritjen e publikut artdashës që e ka përcjellur koncertin e mezi po pres t’i kem përballë në skenë e ta përjetojmë muzikën së bashku. Janë pjesa më e bukur ku puna ime kurorëzohet andaj jam thellësisht e falënderuese ndaj tyre’’, deklaron Paloja.
Ky interpretim ishte ndër ato interpretime që do të mbetet gjatë në kujtesën e publikut, anipse nuk gëzuan mundësinë e të shijuarit drejtpërdrejt edicionin e sivjetëm të ‘Prishtina International Vocal Fest’. / KultPlus.com
Kompozitori i njohur Hajrullah Syla, ka kompozuar një vepër të cilën e ka bërë dedikim për sopranon Adelina Paloja, vepra do të intepretohet për herë të parë në këtë sezonë të Korit Profesional të Filharmonisë së Kosovës.
Sopranoja, është shprehur tejet entuziaste për koncertin në të cilin
do të intepretohet vepra e dedikuar asaj, shkruan KultPlus.
Lajmin e bëri të ditur vetë sopranoja, përmes një statusi në llogarinë
e saj personale në Facebook.
Statusi i plotë:
”Së shpejti interpretimi i radhës të cilin mezi po e pres!
Vepra premierë për soprano solo dhe kor e kompozitorit tonë Hajrullah Syla ( dedikim për mua) do interpretohet në koncertin e parë për këtë sezonë të Korit Profesional të Filharmonisë së Kosovës, në bashkëpunim me festivalin Pristina International Vocal Festival!”
Sopranoja Paloja ka nisur studimet e para në muzikë në Shkollën “Prenkë Jakova” fillimisht për piano por rruga e saj vijoi me kanton. Ajo u diplomua me rezultate të larta në Fakultetin e Arteve në Prishtinë në klasën e profesores së saj Merita Juniku dhe vijoi më tej studimet pasuniveristare për kanto edhe në Shkup.
Është nderuar dy herë me çmim të parë në “ArsKosova”, pjesëmarrëse në mjaft aktivitete në Prishtinë e jashtë saj dhe prej vitesh është pjesë e korit të mirënjohur të Filarmonisë së Kosovës, me të cilin interpreton edhe si soliste. /KultPlus.com
Në 40 vjetorin e çmimit Nobel për Paqe të Shën Nënës Terezë, në Komunën Lecco të Italisë është mbajtë një koncert nga Adelina Paloja, e përcjellë nga pianistja Lule Elezi.
Dy artistet
kanë njoftuar se ky koncert ishte një përjetim i rrallë, ku u prezantuan arie
nga: F.Schubert, A.Catalani, L.Antoni/G.Tukici, A.Mula, G.Puccini.
Kjo mbrëmje artistike është mbajtur nën patronatin e “Konzulati i Përgjithshëm i Republikës së Kosovës në Milano”, “Shoqata kulturore e humanitare Stublla”, “Konzulati i Përgjithshëm i Republikës së Shqipërisë në Milano”, “Komuna e Lecco-së”…/KultPlus.com
