Etiketë: albin kurti

Sarandë Selimi

Incizime të viteve të 90-ta, koncerte, evente për të rinj, mbledhi vetëm për një kafe… Kafiteri të njohura të atyre viteve, kafiteri të shqiptarëve e të serbeve. Fytyra të njohura publike të cilët kishin lindur e ishin rritur në atë pjesë. Shumë të rinj që asokohe vetë në atë pjesë të qyteti e gjenin veten. Vetëm në atë pjesë ndiheshin se i takonin ‘botës’ në njëfarë forme. Është ‘Kurrizi’ një pjesë e Prishtinës e cila bartë mbi supe shumë histori të të rinjve shqiptarë në atë periudhë, kur regjimi i Millosheviçit, i kishte përjashtuar shqiptarët tërësisht nga jeta institucionale, shkruan KultPlus.

“Në teatër e në kinema nuk kishim ‘guxim’ të shkonim sepse këto institucione udhëhiqeshin nga serbët dhe shumë thjesht e ndjenim vetën të huaj. Kurrizi ishte ajo pjesë që ndiheshim rehat”, thotë në dokumentarë politikani Albin Kurti, i cili në dokumentarin ‘Kurrizi’ që u dha të enjten mbrëma premierë në kryeqytet, dukej krejt ndryshe nga pamja që ka sot. Me flokë të gjatë e kaçurrelë Kurti, në atë kohë ishte student ku pikërisht në vitin 1997 ai u emërua nënkryetar i Unionit Studentor të universitetit të Prishtinës, ku në atë periudhë ishte organizator kryesor i demonstratave të studentëve, të cilat ishin pjesë e këtij dokumentari por me shumë sekuenca të shkurtra.

Nita Luci, Shkumbin Istrefi, Ilir Bajri, Leart Zeqa, dy nga vajzat e grupit muzikor ‘Terror’…ishin pjesë e këtij dokumentari i cili është mbështetur nga CHwB Kosova.
‘Kurrizi’ mblodhi sonte një audiencë goxha të madhe të cilët në fund e duartrokitën fort regjisoren e re Orgesa Arifi.

“Fillimisht dua të iu tregoj që nuk kemi mundur ta përmbledhim krejt Kurrizin sepse të gjithë e dimë që është një dekadë me shumë gjëra. Çka kemi mundur të bëjmë është t’i zgjedhim disa arkiva dhe disa njerëz që më së miri do të munden gjeneratat e reja ta kuptojnë dhe ju ta nxirrni në pah memorien që e keni pas në atë kohë. Dua të ia dedikoj edhe njerëzve që kanë ndejtë në atë kohë, sepse ata më kanë inspiruar mua faktikisht dhe t’i falënderoj që ma kanë besuar këtë ide. I ftoj njerëzit të merren me Kurriz sepse është një pjesë goxha e madhe e identitetit tonë, dhe ne nuk kemi besuar që njerëz që shohim aq shumë në televizion kanë ardhur nga Kurrizi”, u shpreh para të pranishmëve Orgesa Arifi, e cila poashtu tha se mendon që Kurrizi ka qenë një vend që i ka bashkuar shumë njerëzit kështu që, ajo bënë thirrje që mos ta harrojnë këtë pjesë të kryeqytetit kosovar.

Ndërkohë në këtë premierë i pranishëm ishte edhe drejtori i CHwB Kosova Sali Shoshi. Shoshi, tha se ky dokumentar në pamje të parë duket një punë e lehtë por sipas Shoshit, për ta ka qenë një punë goxha e vështirë.

“Ka qenë punë e vështirë për një arsye të thjeshtë, sepse jemi marrë me një fushë problematike dhe është një pjesë që shumë prej jush keni qenë dëshmitar të Kurrizit në vitet e 90-ta dhe nuk ka qenë e lehtë që na ta përjetojmë këtë periudhë, duke pas përsyshë që ka shumë njerëz që e mbajnë mend në mënyra të ndryshme. Përndryshe CHwB, që 15 vite merret me trashëgimi, merret me monumente më të hershme ku e kemi një lloj lirie që të merremi me mesjetë, me kohën osmane dhe atë romake, por jo shumë me këtë periudhën e vonshme të viteve të 90-ta dhe kujtesën kolektive”, tha Shoshi.

Ai ndër të tjera theksoi se të gjithë janë dëshmitarë që në vitet e 90-ta ka qenë një kthesë goxha e vrullshme për Kosovën. “Ishte ai momenti kur shqiptarët u ndanë dhe u izoluan dhe Kurrizi ishte një lloj ‘gheto’ por edhe një vend i ‘lirë’ në ato rrethana”, përfundoi Shoshi.

‘Kurrizi’ ishte një geto hapësirë për shumë të rinj dhe për shumë personalitete që sot janë figura publike te Kosovës. Ky dokumentar ka për qëllim të mbledhë tregimet për ‘Kurrizin’ si një pjesë e rëndësishme për memorien kolektive te viteve të 90-ta në Kosovë./ KultPlus.com