Medalistët e Lojërave Mesdhetare Oran 2022, në krye me presidentin e Komitetit Olimpik të Kosovës, Ismet Krasniqi, janë pritur të hënën nga kryeministri i Republikës së Kosovës, Albin Kurti, i cili shoqërohet nga ministri për Kulturë, Rini dhe Sport, Hajrullah Çeku dhe zëvendësministrja e MKRS, Daulina Osmani.
Të pranishëm në takim ishin edhe drejtuesit e Federatave të Xhudos së Kosovës (FXHK) dhe Federatës së Boksit të Kosovës (FBOXK), Agron Kuka dhe Enver Krasniqi, trajneri i xhudos, Driton Kuka, dhe ai i boksit, Besim Brahimi, kampionia olimpike Rio 2016, Majlinda Kelmendi, si dhe sekretari i përgjithshëm i FBOXK, Latif Demolli.
Ekipi ynë fitoi gjashtë medalje në Oran 2022, pesë nga xhudo dhe një nga boksi. Të artat i fituan xhudistet Distria Krasniqi, Loriana Kuka e Laura Fazliu, ndërsa të bronztat xhudistët Akil Gjakova e Flaka Loxha dhe boksieri Shpejtim Bajoku.
Kryeministri Kurti përgëzoi ekipin për suksesin e arritur, duke thënë se sportistët vazhdojnë ta bëjnë krenarë vendin tonë me paraqitjet e tyre në garat ndërkombëtare, derisa vlerësoi lartë rritjen e numrit të medaljeve nga katër vjet më parë, kur numri i medaljeve të fituara në Lojërat Mesdhetare Tarragona 2018 ishte katër.
Presidenti Ismet Krasniqi theksoi se përkundër që Algjeria nuk e njeh pavarësinë e Kosovës, mikpritja e tyre ishte tejet e ngrohtë, ndërsa simbolet tona shtetëtore ishin kudo, duke mos hasur as në më të voglin problem. Tutje, i pari i KOK-ut, shtoi se numri i rritur i medaljeve nga Tarragona 2018, jep shpresë se edhe në Lojërat Olimpike Paris 2024 numri i medalistëve do të rritet nga Tokio 2020.
Për paraqitjen e ekipit tonë dhe suksesin e arritur folën edhe ministri Çeku, kryetarët e federatave, trajnerët, por edhe sportistët, të cilët janë optimistë për suksese të reja në arenën ndërkombëtare. /KultPlus.com
Universiteti i Prishtinës ka shkruar mbrëmë historinë, duke u shpallur kampion i botës në hendbollin universitar.
Ekipi nga Kosova mundi Universitetin Kangwon të Koresë së Jugut 33:30, në finalen e Kupës së Botës, të zhvilluar për një javë në Prishtinë.
Finalen nga afër e ndjekën edhe presidenti i KOK-ut, Ismet Krasniqi, kryeministri Albin Kurti, zëvendësministrja e MKRS, Daulina Osmani dhe personalitete tjera të larta nga FISU dhe organizatori, Federata e Sportit Universitar.
Kësaj fitoreje ju gëzua shumë edhe kryeministri i Republikës së Kosovës, Albin Kurti, i cili bëri një reagim të menjëhershëm në Facebook.
Kurti është shprehur se Kosova po vendoset në hartën e e shteteve që organizojnë ngjarje ndërkombëtare.
Ky është postimi i plotë i kryeministrit:
Një fundjavë me shumë aktivitete sportive ndërkombëtare me nikoqire Republikën e Kosovës.
Sonte ndoqa finalen e meshkujve të Kupës Botërore të Hendbollit Universitar, në të cilën djelmoshat e Kosovës u shpallën kampion. Ndeshja finale u luajt ndërmjet Kosovës dhe Koresë së Jugut. Fituam 33:30! Kënaqësi e veçantë atëherë kur kupën botërore e fiton në shtëpinë tënde. Shumë urime të gjithë sportistëve dhe studentëve të Kosovës!
Pas palestrës 1 tetori në Prishtinë, u ktheva në sheshin “Zahir Pajaziti” në atmosferën fantastike të cilën e ka sjell në kryeqytet aktiviteti ndërkombëtar 3×3 Challenger Prishtina. Në një ndeshje tejet të barabartë, në vazhdime ekipi i Antëerp-it të Belgjikës e mundi 18:17 atë të Friburg-ut të Zvicrës.
Të dyja këto aktivitete janë mbështetur nga Ministria e Kulturës, Rinisë dhe Sportit. Turizmi sportiv është politikë e veçantë e Qeverisë së Republikës së Kosovës, përmes së cilës po e vendosim Kosovën në hartën e shteteve që organizojnë ngjarje ndërkombëtare, gjersa iu ofrojmë të rinjëve tonë mundësinë që të ndjekin këto aktivitete nga afër. / KultPlus.com
Kryeministri i Republikës së Kosovës, Albin Kurti, takoi sot policët, pjesëmarrës në aksionin e mbrëmshëm kundër kontrabandës në Leposaviq, përfshirë ata që u lënduan, dhe Drejtorin e Policisë së Kosovës, Samedin Mehmeti.
Policia jonë çdo ditë demonstron vendosmëri dhe shkathtësi për të siguruar ligjshmërinë në tërë territorin e Republikës. Përderisa puna profesionale e policëve ka arritur të sjell personat e dyshuar para drejtësisë, kjo e fundit, në këtë rast Prokuroria, liron njërin të dyshuar në procedurë të rregullt, sipas pohimeve të policëve.
Kurti shprehu falënderim dhe mirënjohje të thellë për trimërinë dhe profesionalizimin e tyre për të qenë në krye të detyrës, teksa u uroj shërim të plotë sa më të shpejtë.
Ai theksoi që shteti ligjor dëshmohet me punën e zellshme të prokurorisë dhe efikase të gjyqësorit. Në mungesë të këtyre të fundit, aksionet e Policisë e me këto sigurimi i rendit publik, mbeten të papërfunduara. E për të dëshmuar përkushtimin dhe aftësinë në vendosjen e sundimit të ligjit, duhet pritur veprimet e mëtutjeshme të prokurorisë, u shpreh ai.
Kurti shtoi se luftimi i krimit të organizuar dhe vendosja e rendit dhe ligjshmërisë mbeten ndër prioritetet kryesore të Qeverisë dhe se për këtë Policia e Kosovës gjithmonë do ta ketë mbështetjen e plotë. /KultPlus.com
Kryeministri Albin Kurti, përmes një video-mesazhi, ka paraqitur skemën e re për punësim për të gjithë qytetarët e Kosovës, shkruan KultPlus.
I pari i ekzekutivit synon që çdo familje të ketë së paku një anëtar të punësuar.
Kurti ka thënë se çdo familje që nuk ka së paku një të punësuar, shteti do t’ia subvencionojë deri në 70 për qind të pagës bruto, pra deri në 300 euro për periudhën gjashtë mujore.
“Punësim dhe drejtësi janë prioritetet tona sepse këto janë kërkesat tuaja. Po e nisim skemën e radhës në mbështetje të qytetarëve: Qeveria për familjet. Në kuadër të masave të punësimit, synojmë të garantojmë që çdo familje e Republikës sonë ka së paku një anëtar të punësuar.
Nëpërmjet kësaj skeme, ne do të subvencionojmë deri në 70 për qind të pagës bruto të punëtorit, maksimumi 300 euro për gjashtë muaj me radhë”, ka thënë Kryeministri.
Ai gjithashtu njoftoi se kushti kryesor për të përfituar nga kjo skemë është që punëkërkuesi nuk ka të punësuar asnjë anëtar të familjes.
“Nga e hëna krejt cka duhet të bëni ju që kërkoni punë e që e plotësoni këtë kusht është të dërgoni dokumentet përkatëse në zyrat e punësimit në komunat tuaja. Ministria e Financave të hënën do të ndajë me ju të gjitha informatat e nevojshme”. /KultPlus.com
Të enjten në Prishtinë, Ambasada e Francës organizoi pritje me rastin e Festës Kombëtare Franceze, ndërsa nuk munguan edhe deklarata për çështjen e liberalizimit të vizave.
Mbajtja e samitit të BE-së në qershor të këtij ndonëse nuk pati lëvizje konkrete, ngjalli shpresa se ka hapa pozitivë drejt liberalizimit të vizave.
Ndonëse Komisioni Evropian ka theksuar dy herë se Kosova ka përmbushur kriteret për liri të lëvizjes, është vendi i vetëm në Evropë qytetarët e së cilës nuk gëzojnë liberalizimin e vizave.
E në pritjen e organizuar nga ambasadorja franceze Marie-Christine Butel nuk u la pa u përmendur kjo çështje.
Diplomatja franceze tha se për Kosovën është bërë përparim i dukshëm në çështjen e liberalizimit të vizave, megjithëse nuk iu dha drita e gjelbër nën presidencën franceze.
“Për Kosovën është bërë përparim i dukshëm në çështjen e liberalizimit të vizave. Në të vërtet diskutimet që u zhvilluan nën presidencën franceze, gjatë takimit të Këshillit Evropian të 23 qershorit kanë vënë themelet për shtyrjen përpara të kësaj teme, gjithmonë duke marrë parasysh shqetësimet tona sa i përket migracionit dhe sigurisë. Në fakt çështja e liberalizimit të vizave është rikthyer qartë në tryezën e diskutimeve evropiane, në kushte më të favorshme se asnjëherë më parë. Është gjithashtu rezultat i punës së bërë nga Kosova për të qenë më proaktive në skenën ndërkombëtare”, tha ajo, transmeton KP.
Pritja me rastin e Festës Kombëtare Franceze
Ambasadorja Butel pati një porosi edhe për dialogun, Kosovë-Serbi, për çka tha se nuk do të ketë integrim të mundshëm për Kosovën dhe Serbinë në BE, derisa ka mosmarrëveshje mes vendeve.
“Lufta në Ukrainë rikujton urgjencën për t’i dhënë fund mosmarrëveshjeve midis dy vendeve. Nuk ka alternativë dialogu. Përderisa kjo mosmarrëveshje vazhdon, nuk do të ketë integrim të mundshëm për Kosovën dhe Serbinë brenda Bashkimit Evropian”, theksoi ajo.
Pjesë e kësaj ceremonie ishte dhe kryeministri i Kosovës, Albin Kurti, i cili tha se Dita e Bastiljes është shpërthim i Deklaratës së Lirisë.
“Dita e Bastiljës është në të njëjtën kohë edhe shpërthimi me çdo kusht i Deklaratës së Lirisë, rënia e burgut të Bastiljës, por edhe shpallja popullore e një kryengritje masive të madhe për liri. Prandaj, Republika do të përbënte një marrëdhënie të përhershme midis lirisë dhe popullit. Demokracia duhet të shtrihet dhe do të shtrihet për të përfshirë një Republikë, që përbën një arsye të mjaftueshme për një 14 korrik të dytë atë të Federatës, një vit më vonë”, tha ai.
Sipas njoftimit për media nga Kryeministria, në fjalën e rastit, kryeministri Kurti shprehu kënaqësinë që ishte pjesë e kremtimit të dy ngjarjeve kryesore në historinë moderne franceze, rënien e Bastiljes dhe bashkimin e popullit francez.
“Pjesa më e madhe që ne e marrim si të mirëqenë në fjalorin e sotëm politik – diskursi i të drejtave të njeriut dhe atyre civile, republikanizmi, sovraniteti popullor, shteti-komb, ndarja e spektrit politik në të djathtë dhe të majtë, është trashëgimi e drejtpërdrejtë e Revolucionit Francez, tha kryeministri”, ka thënë Kurti.
Ai theksoi se shumë artistë dhe studiues shqiptarë janë frymëzuar nga kultura franceze si: shkrimtari dhe intelektuali Faik Konica, shkrimtari Ismail Kadare, kitaristi Ehat Musa e profesori i filozofisë Muhamedin Kullashi.
Kryeministri Kurti u shpreh i lumtur që në nivel politik Republika e Kosovës dhe Republika e Francës gëzojnë marrëdhënie të shkëlqyera dypalëshe.
“Jam i lumtur të them se në nivel politik dy republikat tona gëzojnë marrëdhënie të shkëlqyera dypalëshe. Franca ishte një nga vendet e para që njohu shtetësinë dhe pavarësinë e Kosovës. Që atëherë, ne kemi vazhduar të kultivojmë miqësinë tonë të çmuar, duke u bërë madje degë e të dyjave, Organizatës Ndërkombëtare dhe Asamblesë Parlamentare, të Frankofonisë. Qeveria ime i çmon shumë marrëdhëniet tona dypalëshe dhe është e vendosur t’i promovojë edhe më tej në të ardhmen”, deklaroi Kurti. / Gazeta express / KultPlus.com
Kryeministri i Kosovës, Albin Kurti ka thënë se pas miratimit të Projektligjit për Byronë Shtetërore për Verifikimin dhe Konfiskimin e Pasurisë së Pajustifikueshme, do të ecin bashkë drejt mundësimit të konfiskimit civil të pasurisë që nuk justifikohet dot, përcjell KultPlus.
Përmes një postimi në “Facebook”, Kurti ka thënë se ky projektligj, së pari do t’i marrë edhe rekomandimet bazë të Komisionit të Venecias dhe, sipas tij, do të jetë në përputhje me praktikat ndërkombëtare.
Kurti, mes tjerash, ka falënderuar deputetët e Kuvendit të Kosovës që e kanë votuar Projekt-kodin e Procedurës Penale, që do të kontribuoj në ndëshkimet e rasteve korruptive.
“Projekt-kodi është hartuar në përputhje me praktikat dhe standardet më të avancuara ndërkombëtare i cili përveç përmirësimit të procedurave penale, do t’i kontribuojë tutje ndjekjes dhe ndëshkimit të rasteve korruptive. Një vëmendje të veçantë i është kushtuar të drejtave të palëve në procedurë, në veçanti të drejtave të palëve të dëmtuara apo viktimave”.
Ky projektligj, sipas të parit të ekzekutivit, parasheh reformimin e pakos së ligjeve anti-korrupsion dhe avancimin e këtij segmenti të rëndësishëm për sistemin e drejtësisë.
“Përmes këtij Projektligji do të mundësohet krijimi i një klime ku parandalohet dhe luftohet korrupsioni dhe pasurimi i paligjshëm”.
Ndërkaq, sa i përket pjesës së projektligjit për Vettingun, Kurti thotë se duhet të ketë edhe konsultime me partitë opozitare.
“Me fjalë të tjera, ishte një seancë e suksesshme në të cilën më së paku kishte rëndësi sa kujt i dukesha i rrezitur unë. Ndërkohë, procesi i vettingut në sistemin e drejtësisë është një çështje tjetër, dhe konsultimet me partitë opozitare për të sigurisht që duhet të vazhdojnë”, tha ai. /KultPlus.com
Kryeministri i Kosovës, Albin Kurti, ka uruar gjithë besimtarët myslimanë, me rastin e Kurban Bajramit, shkruan KultPlus.
Përmes një postimi në llogarinë zyrtare në “Facebook”, Kurti ka shkruar se në këtë ditë rikujtojmë mësimet hyjnore për t’u treguar bujarë e zemërgjerë.
Postimi i plotë:
Besimtarët myslimanë sot festojnë Kurban Bajramin, festën e sakrificës.
Me synim tjetrin e jo veten, në këtë ditë rikujtojmë mësimet hyjnore për t’u treguar bujarë e zemërgjerë, sidomos me skamnorët, jetimët, të dobëtit dhe të vetmuarit.
Uroj që kjo festë të sjellë paqe e lumturi në zemrën e secilit e solidariteti të jetë udhërrëfyes i përhershëm.
Kryeministri i Kosovës, Albin Kurti, ka ngushëlluar për vrasjen e ish-kryeministrit japonez Shinzo Abe.
Kurti tha se ai ka qenë një “mik i mrekullueshëm i Kosovës”.
“Jemi të pikëlluar dhe të shokuar nga vrasja e ish-kryeministrit Shinzo Abe. Kryeministri Abe ishte një lider i shquar i Japonisë dhe mik i mrekullueshëm i Kosovës. Qeveria e Republikës së Kosovës dhe populli ynë po luten për familjen e kryeministrit Abe, miqtë e tij dhe popullin e Japonisë”.
Ish-kryeministri japonez Shinzo Abe ka vdekur në spital pasi nuk u përballoi plagëve të marra.
Transmetuesi publik japonez NHK ka raportuar se ish-kryeministri japonez Shinzo Abe është konfirmuar se ka vdekur nga të shtënat e mëngjesit të sotëm, duke cituar zyrtarë të partisë së Abes. / KultPlus.com
Lojërat Mesdhetare tashmë kanë marrë fund përmes një ceremonie mbyllëse.
Në këtë garë mori pjesë edhe Kosova në sporte të ndryshme.
“Dardanët” përfunduan në vendin e 16-të pasi i fituan gjashtë medalje në “Oran 2022”, i cili u mbajt në Algjeri.
Pesë medalje i siguroi sporti i xhudos dhe një ai i boksit, në një total prej tri të artave dhe tri të bronztave.
Distria Krasniqi, Loriana Kuka dhe Laura Fazliu u veshën me ar në këtë garë prestigjioze, kurse Akil Gjakova, Flaka Loxha dhe Shpejtim Bajoku u ngjyrosën me bronz.
Për gjithë këtë sukses, sot ka reaguar edhe kryeministri Albin Kurti, i cili është shprehur se është krenarë me secilin prej tyre:
Kosova kthehet me gjashtë medalje nga kryeqyteti i sportit mesdhetar për vitin 2022, nga Orani i Algjerisë.
Tre medalje të arta dhe tre të bronzta nga pjesëmarrja e dytë e Kosovës në Lojërat Mesdhetare.
Si çdo herë tjetër, xhudistët tonë ishin ata të cilët bënë dallimin e rezultateve të Kosovës karshi shteteve tjera pjesëmarrëse. Distria, Laura, Loriana, Akil, dhe Flaka, së bashku me pjesën tjetër të ekipit, jeni krenaria më e madhe e Kosovës.
Kësaj radhe, arritje të rëndësishme për Kosovën shënoi edhe Shpejtim Bajoku, boksieri i talentuar me grushtin e shtrënguar. Shpejtimi, ashtu edhe si emri i tij, nuk priste grushtin e tjetrit. I shpejtë, i shkathët dhe fitimtar, i siguroi Kosovës medaljen e bronztë të Lojërave Mesdhetare pas 31 vitesh nga Athina 1991, kur Ilir Mustafa fitoi medaljen e argjentë në boks (nën reprezentacionin e ish-Jugosllavisë).
Krenar me secilin prej juve, jo vetëm unë, por e gjithë Kosova.
Kryeministri i Kosovës Albin Kurti, e ka uruar 4 korrikun, datën ku Shtetet e Bashkuara të Amerikës e festojnë përvjetorin e pavarësisë.
Përmes një shkrimi të shtjelluar mirë Kurti, bën një ndërlidhje me situatën në Ukrainë dhe duke u shprehur i bindur që “qeverisja e popullit, nga populli dhe për popullin, nuk do të zhduket nga toka”.
Ky është postimi i plotë i kryeministrit:
4 Korriku
Para njëqind e gjashtëdhjetë e një vjetëve, sytë e botës ishin të fiksuar mbi një komb duke luftuar në mbrojtje të demokracisë. Ai komb ishte Shtetet e Bashkuara të Amerikës dhe ajo luftë ishte Lufta Civile Amerikane.
Në një mesazh të posaçëm drejtuar Kongresit më 4 korrik 1861, presidenti Abraham Lincoln, një shkrimtar i shkëlqyer me një intuitë të mprehtë për historinë, shpjegoi me fjalë të qarta implikimet e jashtëzakonshme të luftës për të ardhmen e qeverisjes demokratike. Çështja e luftës, shkruante Lincoln, “i parashtron të gjithë njerëzimit pyetjen nëse … një demokraci … mundet, apo nuk mundet, të ruajë integritetin e saj territorial kundër armiqve të saj të brendshëm. Ajo paraqet pyetjen nëse individë të pakënaqur, shumë të paktë në numër për të kontrolluar administratën… , munden gjithmonë … të prishin qeverinë e tyre, dhe kështu praktikisht t’i japin fund qeverisjes së lirë në tokë. Na detyron të pyesim: ‘A ekziston, në të gjitha republikat, kjo mangësi e natyrshme dhe vdekjeprurëse?’ ‘A duhet që një qeveri, medoemos, të jetë ose tepër e ashpër për liritë e popullit të vet, ose tepër e butë për të ruajtur ekzistencën e saj? ‘”
Lufta në Ukrainë, e cila sot po e tërheq vëmendjen e botës, nuk është, sigurisht, një luftë civile: Kërcënimi për qeverinë e lirë, në këtë rast, nuk vjen nga brenda vendit, por nga jashtë tij. Por, njëjtë sikurse përpjekja e pavend e Jugut Amerikan për shkëputje në 1861, pushtimi i pajustifikuar i Federatës Ruse në Ukrainë në 2022, gjithashtu mbart implikime të jashtëzakonshme për të ardhmen e qeverisjes demokratike. Për t’i kuptuar këto implikime, duhet t’i drejtohemi një dijetari të madh, veprën e të cilit Lincoln ka shumë gjasë ta ketë lexuar: filozofit gjerman Immanuel Kant. Është një mrekulli e vogël që Kanti, një njeri i cili nuk u largua kurrë nga afërsia e qytetit të tij të lindjes, Königsberg, i cili sot mban emrin Kaliningrad, Rusi, megjithatë kuptoi thellësisht marrëdhëniet ndërkombëtare. Në esenë e tij të rëndësishme të vitit 1795, Drejt Paqes së Përhershme, Kanti parashtronte tezën e tij të famshme, se demokracitë nuk shkojnë në luftë me njëra-tjetrën. Kjo tezë e ka dëshmuar veten jashtëzakonisht mirë gjatë 227 vjetëve të fundit. Siç ka theksuar filozofi i famshëm amerikan John Raëls, “mungesa e luftës midis demokracive kryesore të vendosura është po aq afër sa çdo gjë që dimë me një rregullsi të thjeshtë empirike në marrëdhëniet midis shoqërive”.
Historia na ka dëshmuar që sundimtarët autokratikë, të cilët nuk i përgjigjen askujt përveç vetvetes, e përdorin shpeshherë luftën si mjet për glorifikimin personal, zgjerimin territorial apo përfitmin financiar. Për dallim nga ata, llogaridhënia ndaj popullit bën që shtetet demokratike në përgjithësi të mos jenë të prirura për luftë. Po të ishte Rusia një demokraci e mirëfilltë, ajo me shumë gjasë nuk do të pushtonte kurrë Ukrainën. Dhe po ashtu, po të ishte Serbia një demokraci e mirëfilltë, ajo nuk do të përbënte një kërcënim kaq serioz për paqen në rajonin tonë. Në këtë kuptim, përpjekjet e rëndësishme të presidentit Biden për të promovuar vlerat demokratike në mbarë botën, mund të kuptohen njëkohësisht si përpjekje për të ruajtur paqen ndërmjet kombeve. Mirëpo, është pikërisht mospëlqimi ndaj konfliktit të armatosur nga ana e shteteve demokratike në përgjithësi, ajo e cila i shtyn autokratët si Putini, dhe Millosheviqi përpara tij, që të mendojnë se sulme ndaj kombeve demokratike më të vogla do të kalojnë pa ndëshkim. Dhe kjo na detyron për të pyetur: A duhet që një qeveri, medoemos, të jetë ose tepër autokratike për të ruajtur paqen me fqinjët e saj, ose tepër demokratike për të mbrojtur vetveten, dhe demokraci të tjera, prej agresionit nga jashtë?
Kjo është sfida e madhe të cilën lufta ilegale e Rusisë ia ka parashtruar botës demokratike. Ukraina, deri tani, ka kaluar bindshëm provën e saj. Me gjithë shpresën e Putinit për të nxitur një kapitullim të shpejtë nga ana e Ukrainës, blitzkrieg-u i Rusisë ka dështuar në mënyrë spektakolare. Megjithatë, sprova më të mëdha po vijnë, jo vetëm për Ukrainën, por edhe për Evropën. Putini është përgatitur për një luftë të gjatë shkatërruese ndaj Ukrainës dhe po llogarit në një dimër të ashpër për t’iu shkaktuar vuajtje maksimale shteteve evropiane të varura prej gazit rus. Për këto arsye, mes të tjerash, rezistenca efikase ndaj agresionit të Putinit do të kërkojë më shumë sakrificë se kurrë nga demokracitë e botës.
Këtë 4 korrik, pra, kur po e festojmë demokracinë, le të kujtojmë, bashkë me Lincoln, se demokracia nuk e mbron vetveten; përkundrazi, ne popujt e botës demokratike duhet ta mbrojmë. Le të zotohemi, pra, se do të vazhdojmë të bëjmë gjithçka që mundemi, me çdo kusht, për të siguruar që demokracia e Ukrainës do të dalë fitimtare ndaj autokracisë së Rusisë. Dhe, duke qëndruar prapa Ukrainës dhe qytetarëve të saj, le t’ia dëshmojmë të gjithë botës, demokratëve dhe autokratëve njëkohësisht, vendosmërinë tonë të palëkundur, që “qeverisja e popullit, nga populli dhe për popullin, nuk do të zhduket nga toka”. / KultPlus.com
Kryeministri i Republikës së Kosovës, Albin Kurti priti në takim drejtoren e Manifesta Biennial, Hedwig Fijen.
U bisedua për mbarëvajtjen rreth organizimit të Manifesta Biennial, si organizim i rrallë që po ndodhë për herë të parë në rajon, që do të jetë edicioni më i madh me artistë dhe me vendngjarje. U diskutua edhe për bashkëpunimin me akterë të ndryshëm në kulturë dhe edukim, dhe potencialin për sinergji të reja në të gjithë sferat socio-kulturore në Republikën e Kosovës.
Në takim u ritheksua rëndësia e impaktit të bienales në hapjen e mundësive të reja të bashkëpunimit me profesionistët ndërkombëtarë, ngritjen e kapaciteteve profesionale të të rinjve kosovarë në art dhe kulturë, krijimin e mundësive të reja të rimendimit të hapësirave kulturore dhe ri-vitalizimin e skenës kulturore në Kosovë.
Kryeministri Kurti ritheksoi mbështetjen e Qeverisë së Republikës së Kosovës për Manifesta Biennial, si një prej ngjarjeve më të rëndësishme të kulturës dhe artit në Evropë, që do të hapet më 22 korrik 2022.
Ai shprehu mirënjohje për angazhimin, punën e palodhshme dhe bashkëpunimin ndërmjet strukturave kulturore në Kosovë dhe Manifesta Biennial, me bazë në Amsterdam, Holandë.
Manifesta, Bienalja Nomade Evropiane do të sjellë në Prishtinë një program artistik 100 ditor me performanca, punëtori e organizime të ndryshme artistike./21Media/ KultPlus.com
Në 32 vjetorin e shpalljes së Deklaratës Kushtetuese, kryeministri Albin Kurti ka thënë se 32 vite më parë triumfoi legjitimiteti popullor i vullnetit qytetar mbi legalitetin shtypës të Serbisë.
Kurit përmes një postimi në llogarinë zyrtare në “Facebook” ka shkruar se më 2 korrik të vitit 1990, përmes Deklaratës Kushtetuese u shpall Republika e Parë e Kosovës.
“Në kushtet e represionit të pushtetit të Serbisë, delegatët u mblodhën jashtë dyerve të Kuvendit, meqë nuk lejoheshin të hynin brenda. 32 vite më parë triumfoi legjitimiteti popullor i vullnetit qytetar mbi legalitetin shtypës të Serbisë”, ka shkruar Kurti.
“Deklarata Kushtetuese u nënshkrua prej 114 delegatëve nga shumica shqiptare e pakicat boshnjake e turke. Kjo deklaratë ishte akt i vetëvendosjes politike dhe artikulim i qartë i vizionit e vullnetit politik të qytetarëve dhe të institucioneve të Kosovës për liri, demokraci dhe pavarësi. Që ky vullnet të bëhet realitet u bënë shumë sakrifica e flijime, shumë punë e angazhim”.
“Me krenari e respekt kujtojmë delegatët nënshkrues, ata që janë mes nesh dhe ata në përjetësi. I paharrueshëm është kujtimi për ta dhe veprën e tyre”, ka shkruar ai.
Më 2 korrik 1990 u miratua Deklarata Kushtetuese – gurthemel i pavarësisë së Kosovës. Miratimi i kësaj deklarate ishte padyshim një akt me rëndësi vendimtare për historinë më të re të Kosovës e të popullit shqiptar. Ky akt politiko-juridik ishte shprehje e aspiratave të popullit të Kosovës për liri dhe mëvetësi në rrethanat e reja që po krijoheshin asokohe ndër shqiptarët dhe në gjithë rajonin e Ballkanit. /KultPlus.com
Nën kryesimin e Kryeministrit të Republikës së Kosovës, Albin Kurti, u mbajt mbledhja e pestë e Komitetit Ndër-ministror për Kompleksin Memorial “Adem Jashari” në Prekaz.
Në këtë mbledhje, që zgjati tre orë, u prezantua dhe u diskutuan rezultatet e hulumtimit shumë-sektorial për konceptin, vizionin dhe bazat e Master Planit për këtë kompleks, përgatitur nga komisioni i ekspertëve të formuar në fillim të këtij viti. Ky hulumtim paraqet hapin e parë drejt fazës së ardhshme e që është shpallja e konkursit për hartimin e Master Planit për këtë Kompleks.
“Gjatë vitit të kaluar kemi ndërmarrë hapa për t’u siguruar që të konsolidohet gjendja fizike e ndërtesave në Kompleks dhe përmes vlerësimeve profesionale dhe ndërhyrjeve emergjente të realizuara, gjendja e sigurisë së ndërtesave të rrezikuara brenda kompleksit është përmirësuar” u shpreh Kryeministri Kurti.
Historia e Familjes Jashari duhet të rrëfehet ashtu siç e meriton, me dinjitet dhe me krenari, tha kryeministri Kurti.
“Ky rrëfim duhet të bëhet i ditur për të gjithë, për të rinjtë edhe të rejat, për ata që do vijnë pas nesh dhe për çdo të huaj që e viziton vendin tonë. Duhet të tejkalojmë edhe barrierat kohore, dhe kujtimin për veprën heroike të Familjes Jashari ta shndërrojmë në përjetësi, sepse është një ngjarje unike me efekte të cilat do të shtrihet edhe kur ne nuk do të jemi më”, u shpreh më tej Kryeministri Kurti.
Ai shtoi se Kompleksi Memorial “Adem Jashari” është një nga proceset më delikate të Republikës së Kosovës, dhe për atë jemi siguruar të punojmë me një ndjeshmëri dhe përgjegjësi të lartë, me qasje profesionale e multi-diciplinare, nga historia, monumentaliteti, peizazhi kulturor e natyror, deri te vlerësimi profesional teknik dhe kujtesa kolektive. /KultPlus.com
Presidentja e Republikës së Kosovës Vjosa Osmani ka ndarë me ndjekësit e saj momente të festës së Pavarësisë së ShBA-ve, festë kjo që është shënuar nga Ambasada Amerikane në Kosovë. Presidentja Osmani ka theksuar se ‘Më 4 Korrik, festojmë krahas popullit amerikan dhe kujtojmë vlerat e idealet mbi të cilat janë ndërtuar Shtetet e Bashkuara’.
KultPlus ju sjell të plotë mesazhin e presidentes Osmani.
Mbrëmë, në një atmosferë të jashtëzakonshme, mes miqsh të shumtë nga Shtetet e Bashkuara të Amerikës e nga Kosova, festuam festën e pavarësisë së SHBA-ve.
Atë që kanë bërë Shtetet e Bashkuara dhe populli amerikan për vendin tonë, për lirinë tonë, për të drejtën tonë për të ekzistuar dhe për çdo qytetar që e quan Kosovën shtëpi të vet, shkon përtej çdo partneriteti që ka njohur ndonjëherë bota.
Më 4 Korrik, festojmë krahas popullit amerikan dhe kujtojmë vlerat e idealet mbi të cilat janë ndërtuar Shtetet e Bashkuara. Në këtë ditë, kujtojmë edhe të gjithë ata që nëpër dekada kanë dhënë kontribut të jashtëzakonshëm në ndërtimin e miqësisë sonë të përjetshme./ KultPlus.com
Në Teatrin Kombëtar të Kosovës kanë filluar të mbahen homazhet për producenten Vjosa Berisha, shkruan KultPlus.
Shumë fytyra të njohura nga fusha e artit, kulturës, politikës dhe jo vetëm, po vijnë ta nderojnë producenten e cila vdiq pas një sëmundje të rëndë, më datë 23 qershor.
Kryeministri i vendit, Albin Kurti, bashkë me kryeparlamentarin Glauk Konjufca, bënë homazhe në TKK për të nderuar producenten e njohur.
Kryeministri Kurti u shpreh se kujtimet për Vjosën do të mbeten të pashlyeshme dhe se Prishtina ka mbetur pa një grua e cila me optimizmin, pozitivitetin e saj, por edhe me talentin e saj i dha shumë kulturës dhe artit te ne.
“Sot po ja japim lamtumirën e fundit artistes, regjisores, udhëheqëses artistike, organizatores, Vjosa Berisha, kujtimet për të cilën mbeten të pashlyeshme e paharrueshme për të gjithë ne që e njohëm atë. Prishtina si kryeqytet i Republikës, artdashësit dhe mbarë qytetarët e vendit tonë kanë mbetur pa një grua e cila me optimizmin, pozitivitetin e saj por edhe me talentin e saj i dha shumë kulturës dhe artit te ne. Përfshirë kështu filmat në të cilët punoj dhe festivalit PriFest, që u bë një vend ku ne takonim artistë dhe aktorë të famshëm nga bota të cilët edhe vizitonin Kosovën por njëkohësisht kontribuonin për vendin tonë që të futet në hartën botërore. Me dhembje të madhe, me pikëllim, por njëkohësisht edhe me krenari për kontributin që ka dhënë, e kujtojmë me shumë nderim artisten dhe producenten Vjosa Berisha”, u shpreh Kurti.
Ndërsa kryeparlamentari Konjufca, tha se Berisha ka lënë prapa një trashëgimi të çmueshme të kulturës dhe artit.
“Vjosa Berisha ka lënë mbrapa një trashëgimi shumë të çmueshme të kulturës dhe artit. Ajo ka qenë edhe producente e filmit edhe regjisore, por mbi të gjitha ka qenë ambasadore e shquar e kulturës dhe artit tonë në botë. Përveç kësaj nuk duhet të harrojmë që ajo ishte edhe një aktiviste që i ndihmoi shumë shtetit të Kosovës. Veprimtaria e saj nuk ka qenë vetëm artistike dhe kulturore por duke qenë e tillë ajo gjithmonë fliste për Kosovën dhe mundohej të kontribuonte në ndërtimin e imazhit të mirë të vendit tonë. Si e tillë ajo do të kujtohet gjithmonë”, u shpreh Konjufca.
Pas homazheve, në ora 15:00 do të mbahet mbledhja komemorative në Teatrin Kombëtar, organizuar nga Ministria e Kulturës. / KultPlus.com
Kryeministri i Kosovës, Albin Kurti ka uruar ditën e pavarësisë së Sllovenisë përmes postimit të një fotoje me ambasadoren e Sllovenisë në Kosovë, Minca Benedejçiq.
Përmes një postimi në “Twitter”, Kurti është shprehur i bindur që bashkëpunimi dhe thellimi i marrëdhënieve mes dy shteteve, do të jetë i dobishëm për të ardhmen e dy vendeve.
“Rroftë Sllovenia”, ka shkruar Kurti në gjuhën sllovene. /KultPlus.com
Kosova rejoices and find encouragement in the successes of Slovenia and its citizens. I am strongly convinced that our cooperation and deepening of bilateral relations between Kosova and Slovenia will be beneficial for the future of our two countries. Naj živi Slovenija! pic.twitter.com/lmWbcXvMR2
Kryeministri i vendit Albin Kurti këtë të mërkurë ka takuar komuniteti rom, për të cilët ka thënë se në strategjinë e Qeverisë së Kosovës është duke u punuar që të rritet barazia dhe përfaqësimi i këtij komuniteti.
Sipas Kurtit, këtë vit për komunitetin rom do të ndahen 100 bursa për studime dhe praktika.
“Promovimin dhe punësimin e komunitetit rom dhe ashkalinje, do kërkojmë të bëhet mbledhja e të dhënave e secilit….. 100 bursa për nxënësit e komunitetit rom për të studiuar sivjet kemi programin për 100 praktikantë, do ta kemi një konferencë, ku do të diskutojmë për arritshmërit e tyre, gjatë verës do të hapet zyra për komunitete, e cili ka 1.5 milionë euro për grante, për organizatat joqeveritare të komuniteti rom dhe mediave, bashkëpunimi me juve shpresoj që ta kemi edhe më tutje, që të kemi barazi dhe të njëjtë për të gjithë”, ka thënë Kurti./Express/ KultPlus.com
Kryeministri i Republikës së Kosovës, Albin Kurti, mbrëmë mori pjesë në pritjen e organizuar nga Komiteti Olimpik i Kosovës, para nisjes së ekipit përfaqësues të Kosovës në Lojërat Mesdhetare Oran 2022, që do të mbahen në Algjeri.
Fillimisht, duke iu uruar sportistëve suksese në këto gara, Kryeministri Kurti tha se përkushtimi në punë i sportistëve është përulës, prandaj edhe rezultatet nuk janë të rastësishme.
“Ato janë produkt i punës tuaj të pandalshme”, u tha ai dhe i falënderoi të gjithë për përpjekjet që po bëjnë çdo ditë për të përfaqësuar dhe ranguar Kosovën më së larti.
Sporti garues, mbërthen në vete patriotizëm, dashuri dhe qëndrueshmëri ndaj vendit, tha kryeministri Kurti, duke shtuar se përfaqësimi i shtetit në gara sportive ndërkombëtare përveç që reflekton sakrificën e tyre për fitore, mbi të gjitha reflekton dashurinë për Kosovën.
Kryeministri Kurti vlerësoi lart garimin e sportistëve kosovarë, të cilët për herë të dytë po marrin pjesë në Lojërat Mesdhetare, e ku do të garojnë me sportistë të shteteve nga tri kontinentet, që preken nga Deti Mesdhe.
“Aq sa është krenari dhe e bukur, aq është edhe përgjegjësi. Këtë përgjegjësi të madhe, ju jeni ata që dini më së miri ta kanalizoni dhe shndërroni në forcë pozitive në mënyrë që të arrini kulminacionin e karrierave tuaja në sportet që ju prezantoni”, tha kryeministri./ Gazeta Express / KultPlus.com
Kosova herë pas here e ka treguar qëndrimin e saj për ” Ballkanin e Hapur”. Madje edhe sot, kryeministri Albin Kurti i tha kryeministrit shqiptar se nuk ka asnjë të re në qëndrimin e Kosovës për “Ballkanin e Hapur”.
“Duhet të theksojmë që arritën marrëveshje protokolle dhe memorandume 19 sot. Kjo është për tu përshëndetur, Marrëdhëniet tona janë të shkëlqyet dhe vëllazërore. Vëllezërit nuk kanë ndërmjetësues mes njeri tjetrit. Prandaj është kjo mbledhje për të forcuar dy shtetet tona në interes të qytetarëve
Për çështjen e ngritur ajo është e një dimensioni tjetër, jo bilaterale, pra jo mes Kosovës dhe Shqipërisë dhe për atë nuk kam asnjë të re për t’ju thënë”, tha Kurti.
Ndërsa Rama u shpreh: Është e vërtetë që Ballkani i Hapur nuk na bashkon, por është po kaq e vërtetë që Ballkani i Hapur nuk na ndan./ Gazeta Express / KultPlus.com
Kryeministri Albin Kurti ka folur para gazetarëve për 23 qershorin, datë kur Këshilli i BE-së mblidhet për një takim dy ditor në të cilin është përfolur se mund të ketë lëvizje përpara për liberalizimin e vizave.
Kurti u shpreh se Kosova ka plotësuar 95 kriteret për vizat por që për datën se kur liberalizohen s’mund të flasë pasi që ajo varet nga shtetet e BE-së raporton Gazeta Express.
“Ne moti i kemi plotësuar 95 kriteret që është më shumë sesa dyfishi i kritereve për vendet e rajonit. Gjithmonë është theksuar problemi me imazhin e Kosovës e tash gjatë këtij më shumë se një viti kemi punuar shumë dhe organizatat ndërkombëtare kanë thënë se imazhi i Kosovës s’është i para dy vjetëve. Unë s’mund të flas për data se kur mund të ndodhë liberalizimi ne po i bëjmë detyrat e shtëpisë dhe po e bëjmë më të mirën por s’mund të flasim në emër të shteteve të BE-së”, tha ai.
Kurti tha se tash bëhen katër vjet prej kur Komisioni Evropian ka rekomanduar heqjen e vizave.
“Ajo cka duhet të theksojmë cdo ditë është se moti i kemi plotësuar kriteret dhe se muajin e ardhshëm shënojmë katër vjetorin që kur Komisioni Evropian ka dhënë rekomandimin për herën e dytë se Kosova i ka plotësuar krietere”, tha ai./ KultPlus.com
Më 12 qershor në Kosovë kremtohet Dita e Çlimirit, u vendosën 50 mijë ushtarë të NATO-s dhe bashkë me ta edhe administrata e përkohshme e Kombeve të Bashkuara, shkruan KultPlus.
Gjatë ditës së sotme, kryeministri i Kosovës, Albin Kurti, ka vizituar Prekazin, me ç ‘rast ka kujtuar edhe familjen Jashari.
Fjala e plotë e kryeministrit Kurti:
Lufta çlirimtare nuk mund të kujtohet, nuk mund të mendohet dhe as nuk mund të paramendohet nga askush pa Jasharët.
Tre breza luftuan tri ditë në atë që sot e dimë të gjithë ne dhe jo vetëm ne si epopeja e Ushtrisë Çlirimtare të Kosovës. Prekazi heroik është kryeqyteti i kryengritjes shqiptare andaj sot u themi të gjithë qytetarëve të Republikës, shqiptarëve mbarë, urime 12 Qershori, Dita e Çlirimit edhe e Paqes, e cila i ka rrënjët pikërisht këtu te sakrifica dhe flijimi i familjes së gjerë Jasharaj, me ç’rast nga 59 veta gjithsej, gjysma ishin fëmijë e gra krahë për krahë me komandantin, kryekomandantin Adem Jashari, bacën Shaban, Hamzën dhe të gjithë të tjerët aty.
Lavdia e tyre është e përjetshme ashtu sikurse edhe kujtimi ynë i pashlyeshëm. /KultPlus.com
Fjala e plotë e kryeministrit Albin Kurti në 144 vjetorin e Lidhjes Shqiptare të Prizrenit:
E nderuara Kryetare e Kuvendit të Republikës së Shqipërisë, znj.Lindita Nikolla,
E nderuar Nënkryetare e Kuvendit të Republikës së Kosovës, znj.Saranda Bogujevci
E nderuar profesore e historisë, znj.Albina Drançolli-Ramadani,
Të nderuara ministre e ministra,Të nderuar deputetë të Kuvendit,
Të nderuar kryetarë të komunave,
Të nderuar përfaqësues të Korit Diplomatik,
Të nderuar përfaqësues të komuniteteve fetare,
Të nderuar veprimtarë e shkrimtarë, zyrtarë të lartë e përfaqësues nga Shqipëria, Presheva, Medvegja e Bujanovci, nga Mali i Zi e Maqedonia e Veriut,
Të nderuar pjesëmarrës,
Zonja dhe zotërinj,
Sot, si për çdo 10 Qershor, jemi mbledhur në Prizren për të përkujtuar hapjen e atij Kuvendi të madh, i cili shënoi fillimin e asaj lëvizjeje, që në histori do të njihej me emrin Lidhja Shqiptare e Prizrenit.
10 Qershori 1878 për ne, shqiptarët, është një datë e themelimit, jo më pak e rëndësishme se datat 28 Nëntorit dhe 17 Shkurt. Më 28 Nëntor 1912 një kuvend tjetër i shqiptarëve kurorëzoi programin e bashkimit të shqiptarëve, që u shpall më 10 Qershor, ndërsa më 17 Shkurt 2008, Kuvendi i Kosovës ndreqi një padrejtësi shekullore, duke realizuar një pjesë të rëndësishme të po atij programi, që nuk u plotësua dot më 1912.
Ç’do të thotë të kesh idetë e Lidhjes së Prizrenit si program? Kuvendi në Prizren nisi si mbledhje e përfaqësuesve të krahinave shqiptare, që rrezikoheshin drejtpërdrejt nga pushtimi prej shteteve ballkanike të kohës, të cilat shqiptarët nuk i konsideronin si komb. Shqiptarët po përballeshin me rrezikun e gjenocidit dhe të spastrimit etnik, shumë kohë më përpara se këto terma të shpikeshin. Mirëpo Kuvendi nuk u mjaftua me masat ushtarake mbrojtëse, sepse nën ndikimin e vizionit të delegatëve më përparimtarë, ai u kthye në një besëlidhje shqiptare, që shpalli disa parime themelore për një jetë të organizuar kolektive e politike në epokën moderne.
Së pari, shpalli se ai ishte kuvend përfaqësues i të gjithë shqiptarëve dhe jo vetëm i popullatës së disa krahinave. Për herë të parë në histori, shqiptarët po flisnin me një zë, po përfaqësoheshin në një kuvend, që cilësisht ua kalonte kuvendeve të mëparshëm midis fiseve dhe krahinave. Për nga pesha historike, Lidhja e Prizrenit ekuivalentin e vet e ka në histori te Besëlidhja e Lezhës.
Së dyti, Kuvendi në Prizren shpalli se shqiptarët ishin një komb, që do të thoshte se territori ku jetonin ata u takonte atyre dhe se vetëm ata mund të vendosnin për veten e tyre. Me fjalë të tjera, shqiptarët po kërkonin vetëvendosje, të drejta të njëjta me kombet e tjerë të lirë të Evropës, po kërkonin vetëvendosjen përpara se kjo fjalë të kthehej në të drejtën e parë universale të popujve.
Së treti, Kuvendi në Prizren dhe kuvendet e tjera të Lidhjes që u mbajtën në vijim dhanë mesazhin se shpëtimi nuk vjen nga jashtë: nëse i var shpresat krejtësisht te shtetet e tjera, veten e konsideron objekt dhe nuk të mbetet tjetër veç t’iu përshtatesh interesave të të tjerëve.
Së katërti, delegatët kërkonin, që territoret ku shqiptarët ishin shumicë të organizoheshin në një njësi autonome, që do të mbante marrëdhënie të mirëpërcaktuara me Portën e Lartë, pra si një subjekt politik i veçantë brenda perandorisë. Kjo nënkuptonte se Lidhja e Prizrenit po synonte krijimin e një shteti shqiptar, që do të kishte sovranitet të brendshëm, edhe pse përkohësisht do të kishte sovranitet të kufizuar së jashtmi. Mirëpo, për këdo ishte e qartë, po trasohej rruga drejt sovranitetit të plotë.
Organizimi i përbashkët në një shtet shihej si imperativ për emancipimin dhe zhvillimin ekonomik të një kombi. Këtë Sami Frashëri do ta shprehte qartë në manifestin Shqipëria ç’ka qenë, ç ‘është dhe ç’do të bëhet, që përbën shprehjen më të lartë të programit të Rilindjes sonë Kombëtare. Prandaj, themi se Lidhja e Prizrenit është një ngjarje themeluese, ngaqë ajo hapi një horizont për shqiptarët.
Lidhja e Prizrenit është ngjarje historike, jo në kuptimin e një etape tashmë të mbyllur të së kaluarës, por në kuptimin e një epoke që zgjatohet deri tek e tashmja, ku ne jemi pjesë e saj dhe që na udhëzon për të ardhmen. Lidhja e Prizrenit është një program, sepse forcimi i shtetit dhe i sovranitetit është garancia më e mirë që ka një komb për sigurinë e tij, aleancat, zhvillimin ekonomik, bashkëpunimin e gjithanshëm ndërkombëtar dhe pjesëmarrjen në procese integruese rajonale, kontinentale dhe globale.
Kontinenti i Evropës po përballet sot me një krizë të rëndë. Jo shumë larg prej nesh, kombi ukrainas po lufton për ekzistencën, lirinë, atdheun dhe shtetin e vet. Ai është sulmuar padrejtësisht dhe barbarisht prej njërit prej pesë shteteve garantuese të rendit botëror të vendosur që nga mbarimi i Luftës së Dytë Botërore. Rusia në vend se të bashkëpunojë për sigurimin e paqes në botë, por ringjall ëndrrat perandorake të fashizmit e komunizmit sovjetik.
Sot nevojitet solidariteti me viktimën dhe dënimi i agresorit. Nevojitet ndihma ndaj luftës çlirimtare dhe izolimi i agresorit, kujtojmë këtu vitet 1998-1999 kur NATO-ja i erdhi në ndihmë popullit shqiptar të Kosovës. Ushtria Çlirimtare e Kosovës po zhvillonte një luftë të drejtë, prandaj edhe NATO shënjestroi makinerinë serbe të luftës që po ndërmerrte gjenocid, njëjtë siç kishte vepruar më parë edhe në Bosnje. Edhe sot në Ukrainë po ndodhin tmerre të njëjta, siç kanë ndodhur edhe në Kosovë dhe në Bosnje. Serbia e sotme është aleati më i ngushtë i Rusisë në Ballkan, sepse udhëheqësit e saj politikë po shohin ëndrra perandorake që sheh Putini, edhe pse në një shkallë më të vogël.
Shqiptarët e Kosovës ndjehen të kërcënuar për sigurinë dhe të ardhmen, prandaj imperativi ynë si republikë demokratike është forcimi i shtetit, bashkëpunimi me Shqipërinë, me vendet e tjera të rajonit ku jetojnë shqiptarët, me aleatët perëndimorë, me NATO-n, me Bashkimin Evropian, me Shtetet e Bashkuara të Amerikës dhe me të gjithë vendet demokratike të botës.
Ne kemi nevojë që programin e Lidhjes së Prizrenit ta aktualizojmë në kushtet e sotme, që përfaqësuesit politikë të shqiptarëve të mblidhen sa më shpesh e të flasin me njëri-tjetrin për gjendjen e kombit, për mbrothësinë e tij në shtetet ku ndodhet sot, për të drejtat e shqiptarëve dhe për bashkëjetesën e tyre me kombet fqinjë, për demokracinë dhe integrimin me Perëndimin. Integrimi pra brenda-shqiptar nuk kërcënon askënd dhe ai duhet të jetë baza nga e cila nis bashkëpunimi e solidariteti rajonal.
Ne kemi interes në zhvillimin, demokratizimin dhe integrimin së bashku të shteteve të Ballkanit Perëndimor në Aleancën Veriatlantike e në Bashkimin Evropian, sepse kjo është, në radhë të parë, e mira e shqiptarëve, sikurse që besojmë se është edhe e mira e kombeve fqinjë me neve. Lidhja e Prizrenit na kujton atë që të tjerët tashmë e kanë pranuar, se shqiptarët janë faktor i rëndësishëm në Ballkan. Për të mirën tonë, për paqen në rajon dhe për pjesëmarrjen tonë në aleanca e integrime evropiane, na duhet të veprojmë si një faktor unik.
Kryeministri i Kosovës, Albin Kurti, ka paralajmëruar se sivjet Kosova do të aplikojë për anëtarësim në BE.
“Ne kemi aplikuar tashmë për anëtarësim në Këshillin e Evropës, sivjet planifikojmë po ashtu të aplikojmë për statusin e vendit kandidat për anëtarësim në Bashkimin Evropian dhe kërkojmë mbështetjen e të gjithëve për këtë”, tha Kurti në konferencën për media me Kancelarin Olaf Schloz.
Duke dënuar agresionin rus në Ukrarinë, ai u shpreh pro anëtarësimit edhe të Ukrainës në BE. / KultPlus.com
Kancelari i Gjermanisë, Olaf Scholz, menjehërë pas takimit me kryeministrin e Kosovës Albin Kurti, ka mbajtur një konferencë për media dhe ka theksuar se Bashkimi Evropian duhet të bëjë punën e saj sa i përket liberalizimit të vizave për kosovarët, shkruan KultPlus.
Scholz deklaroi se është angazhuar dhe po vazhdon ta bëjë një gjë të tillë që liberalizimi i vizave për Kosovën të bëhet sa më shpejt, pasi sipas tij, kushtet janë plotësuar.
“Bashkimi Evropian duhet të bëjë punën e saj për liberalizimin e vizave. Unë me partnerë jemi duke u angazhuar për këtë. Ne angazhohemi që liberalizimi i vizave të bëhet sa më shpejt pasi kushtet janë plotësuar. Ne po flasim me partnerët tanë në mënyrë që t‘i bindim edhe ata siç jemi bindur ne”, ka thënë Scholz.
Ndër të tjera, kancelari gjerman vlerëson se Kosova ka shanse reale për anëtarësim në BE, por që kjo mund të zgjasë
“Ne jemi edhe më tej besim që kjo rrugë e nisur drejt BE ka një shans realist. Për dikë kjo rrugë shkon më shpejt e për dikë më ngadalë”.
Më tej, Scholz thotë se Kosova si partner qëndron në anën e bashkësisë ndërkombëtare.
“Krahas marrëdhënieve tona, ne biseduam për liberalizimin e vizave që po mungon si dhe pozicionimin e Kosovës karshi agresionit rus në Ukrainë. Kosova si partnere e besueshme qëndron në anën e bashkësisë ndërkombëtare. Kemi biseduar për Procesin e Berlinit, dëshiroj që bashkë me partnerët tanë ta rijetësojmë atë këtë vit dhe këtë vjeshtë do të ftojë një konferencë në Berlin”, tha ai. /KultPlus.com
