Ministri Hajrulla Çeku priti sot në takim skitarët Kiana Kryeziu dhe Albin Tahiri të cilët prezantuan Kosovën në Lojërat Olimpike Dimërore, Pekin 2022.
Ata tashmë përfunduan garat dhe u kthyen në vend duke sjell nga atje një përvojë të shkëlqyer dhe rezultate mjaft të suksesshme.
Në takim ishin gjithashtu Kryetari i Komitetit Olimpik të Kosovës, Ismet Krasniqi, Kryetari i Federatës Skitare të Kosovës, Milaim Kelmendi, dhe trajneri i skitarisë, Agim Pupovci.
Bashkë diskutuan për garat dhe paraqitjen e shtetit tonë në këtë ngjarje sportive, gjë që na bënë krenar të gjithëve.
Çeku përgëzoi skitarët për prezantimin dhe suksesin e arritur në gara gjithashtu folën për planet që ka MKRS-ja për zhvillimin e programeve të reja dhe investimet tjera në sport, ku bënë pjesë edhe skijimi. /KultPlus.com
14-vjetori i Pavarësisë së Kosovës, skitarët Kiana Kryeziu dhe Albin Tahiri i gjeti në Pekin ku po garojnë në Lojërat Olimpike Dimërore ‘Pekini 2022’, përcjell KultPlus.
Me flamur në duar, ata përmes një videoje kanë uruar Kosovën në përvjetorin e Pavarësisë.
Më poshtë gjeni postimin e Komitetit Olimpik të Kosovës./ KultPlus.com
Skitari Albin Tahiri, në një intervistë në televizionin shtetëror i ka kërkuar Qeverisë së Kinës ta njohë shtetin e Kosovës.
Tahiri tha se shpreson që mikpritja që i ka bërë Kina ekipit Olimpik të Kosovës të ndikojë edhe në vendimin për njohje.
“Siç e dimë të gjithë, Kosova e shpalli pavarësinë në vitin 2008 dhe deri tani më shumë se 115 vende na kanë njohur neve. Më duhet t’ju falënderoj juve patjetër, sepse gjatë kohës sonë këtu në Kinë, ju na keni trajtuar shumë mirë, megjithëse qeveria e kineze nuk na njeh, por nëse do ta kemi këtë marrëdhënie të mirë, siç na e keni dëshmuar sot, ndihem shumë pozitiv se në të ardhmen ju do të na njihni”./ KultPlus.com
Skiatori nga Kosova, Albin Tahiri, i cili është duke përfaqësuar Kosovën në Lojërat Olimpike Dimërore, ka garuar në dy pjesë për disiplinën e sllallomit, shkruan KultPlus.
Në disiplinën e sllallomit, në lëshimin e parë ai mori rezultat jo edhe aq të mirë, duke zënë vendin e 44-të nga 88 garues në total, kurse garën e përfunduan 52 sosh.
Albini pati kohën 1 minutë e 04.1 sekondë.
Në anën tjetër, Albin Tahiri ka zënë vendin e 37-të në disiplinën e sllallomit në Lojërat Olimpike Dimërore Pekini 2022.
Photo: GEPA pictures/ Harald Steiner
Tahiri përmes një postimi në llogarinë në “Facebook”, tha se duhet të jetë i kënaqur me rezultatin e sotëm.
“Duke qenë se nuk stërvitem fare për sllallomin, duhet të jem i kënaqur me rezultatin e sotëm. Bëra disa kthesa të forta, por përndryshe ishte një ditë tjetër lufte për të qëndruar në kurs”.
Albini garoi në katër disiplina. Në lëshim ishte i 35-ti, në kombinim alpin i 15-ti, në sllallom të madh i 30-ti. Kiana garoi në sllallom të madh dhe doli e 49-ta. /KultPlus.com
Lojërat Olimpike Dimërore janë duke u zhvilluar në Pekin të Kinës këtë vit, derisa shteti i Kosovës është duke u përfaqësuar nga Albin Tahiri dhe Kiana Kryeziu, shkruan KultPlus.
Ndërkaq, sot në një intervistë të dhënë për televizionin e Kinës ‘CGTN’, televizon ky që po i transmeton Lojërat Olimpike Dimërore Pekini 2022, skiatori Albin Tahiri kërkoi nga Kina që ta njeh Kosovën si shtet.
Më poshtë gjeni intervistën e skitarëve Albin Tahiri dhe Kiana Kryeziu.
Albini, duke folur për mikpritjen e mirë të Kinës (1:00′ – 1:43 min) për ekipin olimpik të Kosovës, kërkon nga Kina që ta njeh Kosovën si shtet. / KultPlus.com
Lojërat Olimpike Dimërore janë duke u zhvilluar në Pekin të Kinës këtë vit, derisa shteti i Kosovës është duke u përfaqësuar nga Albin Tahiri dhe Kiana Kryeziu, shkruan KultPlus.
Komiteti Olimpik i Kosovës ka publikuar një video, ku shihet befasia që ata kanë përgatitur për skiatorin Tahiri, i cili feston ditëlindjen e tij të 33-të.
Këto janë Lojërat e dyta Olimpike Dimërore në të cilat Tahiri po përfaqëson Kosovën, derisa Kryeziu shkroi histori duke u bërë vajza e parë që arrin një gjë të tillë.
Në anën tjetër, së bashku me ta janë edhe pjesëtar nga Komiteti Olimpik. /KultPlus.com
Albin Tahiri ka reaguar pasi ka arritur rezultatin më të mirë në histori të Kosovës në Lojërat Olimpike Dimërore, përcjell KultPlus.
Ai në reagimin e tij ka falënderuar të ata që i besuan dhe mbështetën gjatë gjithë këtyre viteve.
Albin Tahiri ka zënë vendin e 15-të nga 27 garues në disiplinën e kombinimit alpin, që përbëhet nga lëshimi dhe sllallomi.
KultPlus iu sjell postimin e plotë të Albin Tahirit:
Më pëlqen shumë kjo tatëpjetë, ndonëse kam mbetur prapa më të mirëve më shumë se sa prisja. Ky kurs përmban gjithçka që dëshironi, pjesë të pjerrëta dhe të sheshta, seksione teknike dhe me shpejtësi të lartë, kërcime, kanion etj. Merreni me mend, më pëlqeu edhe pjesa e sotme e sllallomit të kombinatit alpin. Dhe nëse dikush do të më thoshte se do të jem top 15 në Lojërat Olimpike disa muaj më parë, do të firmosja menjëherë.
Faleminderit të gjithëve që më besuan dhe më mbështetën gjatë gjithë atyre viteve./ KultPlus.com
Albin Tahiri ka arritur rezultatin më të mirë në histori të Kosovës në Lojërat Olimpike Dimërore, duke u renditur i 15-ti, njofton Komiteti Olimpik i Kosovës.
Albin Tahiri ka zënë vendin e 15-të nga 27 garues në disiplinën e kombinimit alpin, që përbëhet nga lëshimi dhe sllallomi. Në lëshim ishte i 22-ti.
Është kjo pozita më e mirë në karrierën e tij në Lojërat Olimpike Dimërore dhe po ashtu rezultati më i mirë për Kosovën.
Ai garoi edhe në disiplinën e lëshimit, ku përfundoi i 22-ti nga 27 garues.
Albini do të garojë edhe më 13 dhe 16 shkurt, në sllallom të madh dhe sllallom. /KultPlus.com
Albin Tahiri do të garojë nesër (e enjte) në kombinim alpin, disiplinë kjo që përbëhet nga lëshimi dhe sllallomi.
Ai ka gjasa shumë të mira të realizojë synimet e tij, të cilat tashmë janë rritur më shumë se sa përfshirja në top 30-she, që ishte qëllimi i tij.
Meqenëse, numri i garuesve është vetëm 27 sosh, shkaku i mungesës së normave olimpike të skitarëve në të dyja këto disiplina, Albinit i janë shtuar ambiciet për të përfunduar në mesin e 15 më të mirëve në Lojërat Olimpike Dimërore Pekini 2022.
Ai ka numrin rendor 25, derisa gara e tij me kohën tonë lokale do të nis në ora 3:30 në lëshim, ndërsa sllallomi fillon në ora 7:15.
Albini ka zhvilluar sot përgatitjen e fundit, ndërsa fokusi i tij kryesor ka qenë tek lëshimi. /KultPlus.com
Ministri i Kulturës, Rinisë dhe Sportit, Hajrullah Çeku, sot nëpërmjet një postimi në rrjetin social Facebook, ka përgëzuar punën e skitarëve tonë, Kiana Kryeziut dhe Albin Tahirit, të cilët me paraqitjen e tyre kanë bërë krenarë një popull të tërë, përcjell KultPlus.
“Kiana me paraqitjen e saj na ka bërë krenarë të gjithëve, ndërsa ka hapur dyert që rrugën e saj ta ndjekin edhe shumë vajza të tjera”, ka shkruar ai.
Mëposhtë KultPlus ju sjell postimin e tij të plotë:
Skitarët tanë sot bënë paraqitjet e para në Lojërat Olimpike Dimërore në Pekin. Është kënaqësi dhe ndjenjë e veçantë të shohësh garat e tyre në një prej organizimeve më të mëdha sportive në botë.
Kiana Kryeziu, 17 vjeçare u bë vajza e parë garuese nga vendi ynë dhe zuri vendin e 49-të nga 82 garuese. Kurse Albin Tahiri doli në vendin e 35-të nga 43 garues në garën e parë dhe do të vazhdojë me dy gara të tjera.
Kiana me paraqitjen e saj na ka bërë krenarë të gjithëve, ndërsa ka hapur dyert që rrugën e saj ta ndjekin edhe shumë vajza të tjera.
I përgëzoj për punën që kanë bërë deri tash duke e përfaqësuar denjësisht shtetin e Kosovës dhe u uroj shumë suksese më tutje. / KultPlus.com
Albin Tahiri do të debutojë nesër në Lojërat Olimpike Dimërore ‘Pekini 2022’, përcjell KultPlus.
Skitari kosovar do të garojë nga ora 04:00 me numrin rendor 43.
“Bartja e flamurit në ceremoninë hapëse më ka bërë të ndihem krenar si gjithmonë. Ishte moment i veçantë për mua, isha shumë i emocionuar. Tani jam duke menduar për garën e nesërme në lëshim, për të cilën jam gati” – ka thënë ai pas parakalimit në ceremoninë hapëse të Lojërave Olimpike Dimërore./ KultPlus.com
Ambasadori i Shteteve të Bashkuar në Prishtinë, Jeff Hovenier, i ka uruar fat dhe sukses ekipit olimpik të Kosovës në Lojërat Olimpike Dimërore 2022 në Kinë.
Kosova parakaloi sot në ceremoninë hapëse të lojërave Pekini 2022, me skitarin Albin Tahiri si bartës të flamurit shtetëror.
Lojërat Olimpike Dimërore do të mbahet nga 4 deri më 20 shkurt në Pekin dhe Kosova po merr pjesë për herë të dytë në historinë e vet në lojëra dimërore.
Në një shkrim në Twitter gjatë ceremonisë hapëse të lojërave, Hovenier shkroi: “I uroj ekipit të Kosovës – dyshes dinamike Kiana Kryeziu, gruas së parë që e përfaqëson Kosovën në Lojtarët Olimpike Dimërore dhe Albin Tahirit, garuesit të parë të Kosovës në Lojërat Olimpike Dimërore – shumë fat dhe sukses në garë për medalje të artë.”
Tahiri e barti i vetëm flamurin e Kosovës në ceremoninë hapesë sot pasdite, pasi garuesja tjetër Kiana Kryeziu nuk u lejua të merrte pjesë për shkak të kontaktit me trajnerin Agim Popovci që ka dalë pozitiv në testin për Covid-19.
Kryeziu e siguroi pjesëmarrjen në Pekini 2022 pas garës kualifikuese në Itali në fillim të janarit, duke u bërë gruaja e parë që do ta përfaqësojë Kosovën në Lojërat Dimërore.
Ajo do të garojë në sllallom të madh në garën me ski në Pekin.
Tahiri, i cili bë sportisti i parë që e përfaqësoi Kosovën në Lojëra Olimpike Dimërore duke marrë pjesë në PyeongChang 2018 në Korenë e Jugut, në Pekin 2022 do të garojë në katër disiplina të garës me ski.
32-vjeçari do të garojë nën flamurin e Kosovës në katër disiplina të garës me ski: lëshim, kombinim alpin, sllallom të madh dhe sllallom. / KultPlus.com
Albin Tahiri do ta bartë i vetëm flamurin e Kosovës në ceremoninë hapëse të Lojërave Olimpike Dimërore Pekini 2022.
Skitarja tjetër, Kiana Kryeziu, që ishte paraparë të mbante flamurin bashkë me skitarin Tahiri, nuk do të lejohet të marrë pjesë në ceremoni, sikurse trajneri Agim Pupovci.
Pupovci ka rezultuar pozitiv në njërin nga testet e përditshme për Covid 19 dhe përkundër se është asimptomatik dhe gjendja e tij shëndetësore është shumë e mirë, ai është duke ndjekur rregullat e karantinimit, edhe pse testet e fundit jane negative.
Sipas organizatorëve, Kryeziu, është konsideruar si kontakt i mundshëm me persona tjerë, për çka nuk i lejohet të marrë pjesë në ceremoni, edhe pse është duke stërvitur dhe rezultuar negativ në testet per Covid 19.
Krahas ekipit tonë Olimpik, shumë ekipe Olimpike do të jenë të përgjysmuara në ceremoninë hapëse shkaku i kontaktit te personave me personat tjerë./ KultPlus.com
Skitari nga Kosova, Albin Tahiri, do të marrë pjesë edhe një herë tjetër në Lojërat Olimpike Dimërore pas atyre të Pyongyang në vitin 2018, kësaj radhe në Pekin të Kinës së bashku edhe me Kiana Kryeziun, shkruan KultPlus.
Në një intervistë për mediumin slloven “Vecer Koroska“, shpjegohet i gjithë rrugëtimi i Albin Tahirit, sllovenit që nga viti 2009 bën ski për Kosovën, histori e cila është larg normalitetit. Tahiri e filloi udhëtimin e tij të skijimit në Ravne na Koroskem, ndërsa këtë fundjavë do të mbajë flamurin e Kosovës për herë të dytë në hapjen e Lojërave Olimpike në Pekin.
Katër vite më parë në Korenë e Jugut, skitari ishte i vetëm në përfaqësim për Kosovën, derisa sivjet ngjyrat e Kosovës do t’i përfaqësojnë dy, Albin Tahiri së bashku me Kiana Kryeziu 17-vjeçare.
Mirëpo, historia e skitarit Tahiri është shumë interesant për faktin se ai tanimë ka arritur të realizojë ëndrrën e tij, e cila ishte të bëhej një stomatolog, ndërkaq në tetor të vitit të kaluar filloi specializimin për kirurgji orale dhe u punësua në qendrën shëndetësore të Mariborit.
Për të qenë në gjendje të performonte në Pekin, ai mori dy muaj pushim pa pagesë. “Për fatin tim, ata e miratuan, janë mjaft të arsyeshëm dhe inkurajojnë aftësinë sportive”, thotë Tahiri, për të cilin Lojërat e Pekinit do të jenë gara e pestë e madhe. Ai gjithashtu mori pjesë në tre kampionate botërore.
Photo: Michael Kappeler/dpa/Alamy Live News
Ai e kaloi javën e fundit para se të nisej për në Pekin të shtunën, në një nga hotelet e Prishtinës, ku u tërhoq për t’u izoluar nga bota e jashtme. I është dashur t’i kushtojë shumë vëmendje edhe një aplikacioni të veçantë që e ka shkarkuar në celularin e tij më shumë se një muaj më parë. “Çdo ditë më duhet të fus temperaturën e trupit tim, çdo simptomë, certifikatat e testit PCR, duke përfshirë certifikatën e vaksinimit. Vetëm kur futa të gjitha të dhënat, mora një kod QR, pa të cilin nuk do të mund të hyja në terminalin e aeroportit. Kinezët realisht nuk i lënë asgjë rastësisë, protokollet janë jashtëzakonisht të rrepta”, shpjegon Tahiri, i cili do të nisë paraqitjet e tij në Lojërat Olimpike këtë të dielë, kur është caktuar edhe testi i skive.
Më vonë e pret sllallomi, sllallomi gjigand dhe kombinimi, do t’i mungojë vetëm performanca në supersllallomin gjigant. “Unë pres më së shumti nga skijimi, ku përvoja shpesh del në pah. Sllallomi, për shembull, kërkon shumë më tepër stërvitje, duhet të jesh i shpejtë, i ri dhe i gjallë, gjë që nuk më pëlqen shumë”, buzëqesh 32-vjeçari, i cili humbi biletën e supersllallomit me dy pikë FIS.
Ai përgatitej kryesisht për Lojërat Olimpike në pistat e skive austriake dhe italiane, rreth Vitit të Ri edhe në Kope dhe Črna na Koroškem. Edhe pse është një dimër i mrekullueshëm me shumë borë, është ende e vështirë të gjesh një vendpushim skish ku situata nuk është shumë e ashpër.
Për shkak të punës, ai nuk shkon në stërvitje aq i pushuar sa do të donte, por nga ana tjetër ka frikë se do të pësojë një dëmtim që do të ndikonte në karrierën e tij profesionale. “Duhet të shikoj duart e mia. Gjithçka është tashmë e dukshme në trupin tim, kam pasur probleme me shpinën në fund të dhjetorit dhe në fillim të janarit. Trupi im dalëngadalë nuk po arrin të mbajë dot. “Fatmirësisht më kanë dhënë dy muaj pushim pa pagesë në punë, janë të arsyeshme dhe më inkurajojnë të merrem me sport”.
Ai thotë se ende nuk ka bërë ski në Kinë, por ka përvojë nga ajo pjesë e Azisë. Dëbora, e cila është kryesisht artificiale, i përshtatet, pasi skitë kthehen në mënyrë të përsosur për shkak të mbështetjes së tyre të mirë.
“Por mua nuk më pëlqejnë pistat jashtëzakonisht të politizuara, të akullta. Është brutale, duhet të jesh i përgatitur dhe i mësuar me kushte të tilla, përndryshe mund të jetë e bezdisshëm”, tha Tahiri, i cili është i lumtur që nuk do të jetë i vetmi përfaqësues i Kosovës. në Kinë.
“Në fund të fundit, ky ka qenë qëllimi im gjatë gjithë këtyre viteve. Të kem një tjetër skiator pas meje dhe të mos jetë e gjitha mbi supet e mia, dalëngadalë do të ndaloj skijimin në një nivel kaq të lartë, ndaj më përshtatet që pas ka të rinj që janë duke marrë rolin tim”.
Lojërat e dyta olimpike të Tahirit do të jenë veçanërisht emocionuese për babain e tij, i cili u shpërngul në Slloveni më shumë se dyzet vjet më parë.
Në kohën kur djali i tij po fillonte të merrej me ski, ai ishte një tifoz jashtëzakonisht i zhurmshëm dhe entuziazmi i tij nuk po i pakësohet as tani.
“E mahnitshme se nga e merr energjinë e tij, ai është në fakt një nga arsyet që unë ende insistoj. Ai është me të vërtetë një fans thuajse fanatik dhe nuk mendoj se kjo do të ndryshojë ndonjëherë. Nëse nuk do të kisha një mbështetje të tillë, jo vetëm E babait tim, por nga e gjithë familja, pyetja është nëse do të bëja akoma ski”, thotë Tahiri, i cili ende i pëlqen të kthehet në shtëpi në Ravne. “Është e vërtetë që ka gjithnjë e më pak kohë, shihemi rreth një herë në muaj. por nuk kam harruar ku jam në shtëpi. Më pëlqen të vij gjithmonë”.
Photo: GEPA pictures/ Mario Kneisl
Në Kosovë, sportet dimërore janë disi të neglizhuara dhe nuk mund të krahasohen me futbollin, basketbollin apo sportet marciale. “Ka shumë skiatorë rekreativë, qendra e skijimit në Brezovicë është e mbushur, por është rekreacion, ndryshe është me skijimin konkurrues. Që kur konkurroj për Kosovën, kemi bërë progres konkret, sponsorët janë aktivizuar, por na pret një rrugë e gjatë përpara.
“Unë kam qenë në Prishtinë, kam dashur të shikoj një transmetim të skive nga Kitzbuhel, por nuk e kam gjetur në mesin e 200 programeve”, shpjegon Tahiri, i cili gëzon një reputacion të madh në Kosovë.
“Në sytë e popullit të Kosovës, sllovenët janë konsideruar gjithmonë një komb i zotërinjve. Tashmë në Jugosllavi, Sllovenia ishte një tokë e premtuar. Megjithatë, mendoj se bashkëpunimi aktual mes dy vendeve është në një nivel të lartë, gjë që më pëlqen. ”, ka përfunduar Tahiri.
Kosova ka shënuar suksese të jashtëzakonshme arenën ndërkombëtare përmes sportit dhe filmit, e gjitha kjo është mundësuar nga sportistët, të cilët konsiderohen medoemos si ambasadorë të vendit. /KultPlus.com
Pas një udhëtimi ‘maratonik’ Prishtinë – Stamboll – Pekin, ekipi olimpik i Kosovës ka arritur në Fshatin Olimpik në Yanqing të Kinës, transmeton KultPlus.
“Ekipi i është nënshtruar procedurave për Covid 19 në aeroportin ndërkombëtar të Pekinit dhe me të mbërritur në Fshatin Olimpik”, njofton Komiteti Olimpik i Kosovës përmes “Instagramit”.
Ekipi përbëhet nga skitarët Kiana Kryeziu e Albin Tahiri, trajneri Agim Pupovci dhe shefi i misionit, Bujar Turjaka.
Lojërat Olimpike Dimërore në Pekin do të fillojnë nga 4 shkurt dhe do të zgjasin deri më 20 shkurt. /KultPlus.com
Ministri i Kulturës, Rinisë dhe Sportit, Hajrulla Çeku, ka pritur në takim zyrtar sportisten, Kiana Kryeziu, e cila së fundmi arriti të sigurojë kualifikimin në Lojërat Olimpike “Pekini 2022”, shkruan KultPlus.
Përmes një postimi në llogarinë zyrtare, Çeku njoftoi se diskutuan për punën, përkushtimin dhe sukseset e sportistëve të Kosovës, në veçanti për zhvillimet në sportin e skijimit.
Postimi i tij i plotë:
“Kiana Kryeziu është 17 vjeçare. Ajo tashmë ka hyrë në historinë e sportit kosovar si vajza e parë që do të përfaqësojë shtetin tonë në Lojërat Olimpike Dimërore. Sot prita në takim skitaren Kiana Kryeziu, sportisten që ka fituar normën olimpike për pjesëmarrje në Lojërat Olimpike Dimërore, kryetarin e Federatës Skitare të Kosovës, Milaim Kelmendi dhe kryetarin e Komitetit Olimpik të Kosovës, Ismet Krasniqi. Në takim diskutuam për punën, përkushtimin dhe sukseset e sportistëve tanë, në veçanti për zhvillimet në sportin e skijimit. Së bashku me Kianën vendin tonë në Olimpiadën dimërore Pekini 2022 do ta përfaqësojë edhe skitari Albin Tahiri. Me qëllim të përgatitjes së sportistëve për këto gara olimpike nënshkruam memorandum me Federatën Skitare të Kosovës për mbështetje financiare të sportistëve tanë”. /KultPlus.com
Sporti në Kosovë ka shënuar një ngritje të madhe në gjithë fushat e saj vitet e fundit, duke korrur suksese të mëdha, përpos në vend, edhe në arenën ndërkombëtare, shkruan KultPlus.
Albin Tahiri, është njëri ndër skitorët që ka shënuar histori dhe ka krijuar një “brend” të vetin për vendin më të ri në kontinentin e vjetër.
Në një intervistë ekskluzive për KultPlus, Tahiri thotë se pjesa e të shkruarit histori për Kosovën është gjithnjë ndjenjë krenarie.
“Po në të vërtet unë kam shkruar histori në disa raste, isha i pari që kam fituar një medalje të artë në gara ndërkombëtare për Kosovën, skiatori i parë që nisi kupën e Evropës, dhe më pas edhe Kupën e Botës, duke marrë pjesë për herë të parë në histori në kampionatin botëror (St. Moritz 2017) dhe gjithashtu në lojërat e para olimpike dimërore. në Pyeong Chang 2018”.
Foto: Michael Kappeler/dpa/Alamy Live News
Tahiri thotë se kjo ishte pikërisht ajo se çfarë po planifikonte ai nga fillimi i karrierës.
“Kur unë vendosa që të përfaqësoj Kosovën në vitin 2008, plani im ishte që të ngriste cilësinë e skijimit në Kosovë, t’i sjell tituj Kosovës dhe gjithashtu të marrë pjesë në Lojërat Olimpike, pak a shumë diçka të cilën e kam bërë tanimë”.
Ai beson se tani është koha që të tjerët të vazhdojnë ta bëjnë këtë rrugëtim të tij.
“Pa marrë parasysh se sa herë marrë pjesë, unë gjithmonë ndjehem krenar dhe e bëjë këtë punë me pasion”, deklaroi ai kur u pyet për sigurimin në Lojërat Olimpike “Pekini 2022”.
Një moment i vështirë në karrierën e tij ishte pikërisht kualifikimi në këtë vit, në diciplinën e shpjetësisë, e gjitha kjo ndodhi për shkak të vështirësive që paraqiten në pistë.
Foto: GEPA pictures/ Harald Steiner
“Për sllallomin dhe sllallomin gjigant për mua nuk është aq e vështirë. Mund ta bëj më lehtë me përvojën që kam krijuar ndër vite, sepse kriteret nuk janë aq të vështira”, deklaron ai.
Sportisti ndanë edhe një pjesë emocionuese me të gjithë, duke thënë se kishte pritur të kualikohej edhe dikush tjetër përkrahë tij në garat e Pekinit.
“Ndjehem shumë i lumtur që këtë herë nuk do ta përfaqësoj Kosovën i vetëm, por së bashku me Kianën. E kam thënë këtë edhe në konferencën për shtyp me Komitetin Olimpik të Kosovës, dhe kjo në fakt ndodhi me Kianën”.
Sa i përket të ardhmes dhe “trashëgiminë” që do t’ia lë pasardhësve të tij, Tahiri beson se është në duar të sigurta.
“Më vjen keq që nuk mundëm ta dërgojmë edhe Arbi Pupovcin, doja t’i jepja vendin tim në sllallom, sepse ai po fokusohet më shumë në të se sa unë. Por për fat të keq kemi vetëm një djalë dhe një vajzë pjesëmarrëse. Por sido që të jetë, mendoj se kemi njëfarë potenciali të madh pas meje me Kiana Kryziun, Arbi Pupovcin, Drin Kokajn, Dren Spahiun dhe disa skiatorë të rinj nga Prishtina. Ata po bëjnë vërtet punë të madhe, kështu që nuk kam aspak frikë për Olimpiadën e ardhshme”.
Foto: GEPA pictures/ Mario Kneisl
Kosova dhe sukseset e saja historike në botën e sportit
“Sporti është një nga arsyet që Kosova është e njohur në mbarë botën. Shikoni vetëm xhudistët, çfarë kanë bërë me medaljet e arta. E mahnitshme. E njëjta gjë vlen edhe për mua dhe me skijimin tim për në Kosovë. Në fillim, të gjithë po shikonin se kush është ky djalë, nga vjen? Tani çdo organizim që ka të bëjë me skijim më njeh mua/ne dhe i pëlqen kjo gjë “oh, ky është djali nga Kosova”… kështu që mendoj se sporti është mënyra më e mirë për të promovuar Kosovën”.
Politika,pjesë e pandshme e sportit, u bë shkas që ai të mos merrte pjesë në gara të skijimit
“ Pjesa më e vështirë për mua ishte periudha kur nuk ishim anëtarë të plotë të Organizatës Ndërkombëtare të skijimit dhe IOC. Sepse në atë kohë isha shumë mirë, ndoshta edhe më mirë se sot, por nuk më lejuan të merrja pjesë në ngjarjet më të mëdha, për shembull Soçi 2014. Të ulesh në shtëpi dhe të shikoje Olimpiadën në TV, mungesa atje për shkak të politikës, ishte e dhimbshme”.
Mbajtja e Flamurit të Kosovës në Lojërat Olimpike 2018.
“Një pjesë të veçantë në karrierën time që do ta vlerësoja është ceremonia e hapjes së mbrojtjes në Pyeong Chang 2018 dhe mbajtja e flamurit të Kosovës nëpër stadium. Nuk do ta harroj kurrë atë”.
Në fund ai shplaos copëza nga jeta e tij personale, duke treguar se tanimë ka arritur gjithçka që ka ëndërruar.
“Ëndrrat e mia janë bërë tashmë realitet. Unë arrita në Lojërat Olimpike, u diplomova në fakultetin e mjekësisë, aktualisht specializimi i kirurgjisë orale (rezidencë), kështu që kam gjithçka që doja. Shpresoj vetëm që të vazhdojë kështu dhe do të arrij atë që doja në jetën time”.
Lojërat Olimpike Dimërore Pekin 2022, do të mbahen në Pekin të Kinës, prej 4 -20 shkurt. /KultPlus.com
