Florim Beqiri me një ilustrim përmes dy fotografive u bën thirrje kandidatëve për kryetar komune të përfshijnë librin në program qeverisës.
Shitësi i librave në qytet, Florim Beqiri, u ka bërë thirrje kandidatëve për kryetar komune në Prishtinë që të përfshijnë në programin e tyre diçka të re për librat, shkruan KultPlus
Përmes një postimi në llogarinë zyrtare në “Facebook”, Beqiri, ka ilustruar përmes dy fotografive se si në ditët me reshje shiu krijohet kaos përbrenda shtëpizës së librit.
“Shoqëria jonë ka nevojë për libra e art. Si mundësi edukimi”, ka thënë ai.
Raundi i dytë i zgjedhjeve komunale për të votuar të parin e Prishtinës do të mbahen më 14 nëntor./KultPlus.com
KultPlus Caffe Gallery, vendi i cili mbledh rreth vetes artistë nga fushat më të ndryshme të artit dhe i shpalos krijimtaritë e tyre artistike, së fundmi ka pritur në takim kandidatin për kryetar të Prishtinës, Arben Vitia dhe kryeministrin e Kosovës, Albin Kurti, për të biseduar rreth synimeve, problemeve, brengave, dëshirave e ideve diversive të cilat vinë nga komuniteti artistik e të cilat ngërthejnë me vete edhe probleme të ndryshme, zgjidhjen e së cilave do ta krijoj qeverisja e re, shkruan KultPlus.
Mbrëmë, një ngjarje e tillë ka mbledhur rreth vetës një numër artistësh ku të gjithë kishin ardhur për të dëgjuar nga afër aspektet e qeverisjes së re të kandidatit për kryetar të Prishtinës, Arben Vitia.
Përmes një diskutimi të përbashkët me komunitetin artistik, ai fillimisht tregoi se relacioni mes komunitetit artistik dhe institucionit duhet të jetë në fokus maksimal duke përfshirë këtu edhe krijimin e disa burimeve të reja në mesin e tyre.
“Është interesant se në Prishtinë sidomos në periudhën e fundit kohore të viteve 80-ta dhe 90-ta, pjesa më e madhe sidomos të nivelit artistik duke përfshirë këtu edhe pikturën, muzikën, leximin, skenën, kanë lindur nga komunitetet dhe fatkeqësisht sipas një pikëpamjeje timen, ka pasur një diskrepancë në këtë relacion komunitet-institucion dhe mendoj se ajo që duhet të fokusohemi është krijimi i disa mekanizmave për burimet e komunitetit artistik dhe institucioneve”, thotë Vitia.
Sipas tij, artistët tek ne nuk e kanë pasur vëmendjen e duhur e në anën tjetër artistët tek ne shpeshherë kanë qenë avangarë në ndryshimin e shumë gjërave të cilat institucionet i kanë ndjekur jo me hapin e duhur.
“Ju përgëzoj për punën por në anën tjetër atë se çfarë e ka bërë Ardianë Pajaziti si drejtoreshë e gazetës KultPlus, si aktivitet i komunitetit artistik, ta realizoj atë dhe ta shtyjë përpara akoma më shumë në aspektin institucional me ide dhe kreativitet nga komuniteti artistik e edhe me ndihmën që vjen nga institucionet. Andaj edhe sot kam dëshirë që të dëgjoj sa më shumë kritika, këshilla e kërkesa të ndryshme”, përfundon Vitia.
Ndërsa, Kryeministri i Kosovës, Albin Kurti shpalosi dy aspekte në të cilat do të fokusohet qeverisja e re e për të cilat besohet se do të kanë rezultat.
“Padyshim që jeta e njeriut për nga cilësia, nuk varet vetëm nga aspekti material i gjërave që dhuron dhe merr por edhe nga ai shpirtëror, emocional e intelektual, e kjo lidhet shumë edhe me artin e kulturën ku natyrisht që artistët e njerëzit e kulturës janë vendimtar për mbarë qytetarët. Për të gjithë ata që krijojnë, do të duhej që qeverisja qendrore e lokale e edhe institucionet në përgjithësi të ndihmojnë me sa munden por që në të njëjtën kohë të krijojnë mundësi që në të ardhmen edhe të krijohet dhe prodhohet sa më shumë por aq edhe më mirë. Për këtë qëllim ne besojmë se më së miri është ti ndihmosh ata që tash po punojnë mirë”, thotë Kurti.
Sipas tij, nëse diçka po ecën mbarë mirë atëherë duhet vetëm të ndihmohet në atë drejtim kurse në anën tjetër ndikimi i qeverisjes të tyre si nivel qendror ashtu edhe komunal duhet të jetë njëfarë lloj emancipimi shoqëror për artistët, komunitetin artistik dhe në veçanti lidhjet institucionale që ia mundësojnë qytetarëve ti shijojnë veprat në mënyrë më të rregullt e më sistematike sepse në këtë mënyrë besohet se shndërrohet arti në kulturë.
“Arti ka të bëjë me atë që është e rrallë, e bukura e rrallë. Mirëpo kultura nuk ka të bëjë me rrallësi por me zakonshmëri. Pra si ta bëjmë ne të bukurën e cila është e rrallë në një zakonshmëri të shoqërisë. Andaj besoj se kultura duhet të bëhet më artistike dhe në ndihmë vinë institucionet. Kulturën e kemi por duhet të jetë e bukur në mënyrë që të jetë artistike. Me këto dy aspekte si arti që bëhet kulturë dhe kultura që bëhet artistike, qeverisja qendrore dhe lokale mund të ndihmojnë shumë jo vetëm artistëve por edhe qytetarët që të shijojnë veprat artistike”, shpalos Kurti.
Për Kurtin, është e rëndësishme lidhja e sistemit arsimor me veprat e artistëve tanë për arsye se kur ka një ekspozitë arti, një koncert apo një shfaqje, është e nevojshme që nxënësit e shkollave, studentët e fakulteteve në mënyrë të organizuar e institucionalizuar të bëhen shikues të devotshëm.
“Në momentin kur e sheh produktin final, në të njëjtën kohë fillon dhe vetëdijesimi për përpjekjet dhe mundimet e procesit drejt asaj që e merr në fund vepra. Besoj që Qeveria jonë dhe kryetari i ri do të krijoj një urë qe do të shndërrohet në një urë mes artistëve gjithnjë e më të suksesshëm dhe njësoj shikuesve më të shumtë e më të devotshëm”, përfundon Kurti.
Kështu mes të pranishmëve u diskutua edhe rreth projekteve kulturore në aspektin financiar, mbrojtja e të drejtave autoriale, pronësisë intelektuale të artistëve që krijojnë çdo lloj fushe në art, planin konkret për sallën koncertale, obligimi i fëmijëve për të shkuar në teatër, kinemanë e qytetit, procedurat absurd për projektet kulturore, mundësitë alternative për trajnimin e fëmijëve në aspektin kulturor si p.sh. përdorimi i hapësirave të papërdorura e të braktisura etj.
Kurse krejt në fund, autorja e ekspozitës e cila po qëndron e hapur në KultPlus Caffe Gallery, Qëndresa Krasniqi e dhuroi një pikturë të sajën si shenjë respekti për kandidatin e kryetarit të Prishtinës, Arben Vitia.
Me këtë rast, artistja Alketa Xhafa dhe artisti Burim Kursani dhuruan librat e tyre më të fundit të lansuar në tregun artistik. / KultPlus.com
Ministri i Shëndetësisë, Arben Vitia gjatë raportimit në Komisionin për Shëndetësi, ka bërë të ditur që janë duke punuar në masat e reja që pritet të hyjnë në fuqi nga 27 shtatori.
Vitia ka paralajmëruar masa të reja edhe në sektorin e gastronomisë, transmeton KultPlus.
“Sa i përket gastronomisë, është evidente që tash në kohën e ftoftë dëmtimet janë më të mëdha dhe me miratimin edhe të tyre, që me masat që jemi duke punuar, që të aplikohet nga 27 shtatori masa kufizuese e personave që hyjnë në këto lokale, vetëm me certifikatë të vaksinimit ose me test serologjik dhe me test PCR dhe tani një masë e tillë nuk është penguese as për sektorin e gastronomisë”, tha ai.
Ai po ashtu theksoi se po punojnë që fillojë vaksinimi edhe për moshat më të reja. / KultPlus.com
Ministri i Shëndetësisë, Arben Vitia, të premten ka mbajtur takim virtual me kryetarët e komunave, me të cilët ka diskutuar rreth masave të reja që do të hyjnë në fuqi nga nesër, transmeton KultPlus.
Asociacioni i Komunave të Kosovës përmes një postimi në Facebook ka njoftuar se ministri Vitia i ka njoftuar kryetarët për masat e reja që pritet të miratohen më 13 shtator dhe që do të jenë të vlefshme deri më 26 shtator.
Sipas këtij njoftimi, mësimi në të gjitha nivelet e arsimit parauniversitar nuk fillon para datës 26 shtator.
Takimet do të lejohen vetëm deri në 20 persona, me distancë 1.5 metra. Institucionet publike do të jenë të obliguara të punojnë vetëm me staf esencial.
Po ashtu, është bërë e ditur se gastronomia do të vazhdojë të punojë si me masat e deritanishme, deri në orën 21:30, duke u lejuar të shfrytëzohen vetëm hapësirat e jashtme.
Njëjtë do të veprohet edhe në pikat kufitare, ku qytetarët mbi moshën 16-vjeçare janë të obliguar të paraqesin certifikatën e vaksinimit ose testin PCR negativ, atë serologjik dhe atë rapid.
Qendrat kulturore dhe institucionet e kulturës në varësi të Ministrisë së Kulturës, Rinisë dhe Sportit dhe komunave, do të pezullojnë aktivitetet deri më 26 shtator.
Masat tjera do të vazhdojnë ashtu siç kanë qenë deri më tani.
AKK ka bërë të ditur se nga data 27 shtator, do të ketë masa të reja në varësi nga analizat dhe situata që mund të jetë në atë kohë. / KultPlus.com
Ministri i Shëndetësisë, Arben Vitia ka thënë për media se nuk do të ketë lirim të masave Anti-COVID.
Ai ka thënë se nuk do të ketë lirim të masave në një situatë të brishtë epidemiologjike në të cilën ndodhet vendi.
Përndryshe, ai ka treguar se sot do të takohet me Komitetin për Koordinim dhe Vlerësim të situatës me COVID-19 ku do të diskutohet për masat.
“Më 13 shtator është afati i cili e kemi përcaktuar për masa në vendimin e fundit të qeverisë kur janë marrë këto masa, natyrisht në këtë kuadër dje dhe pardje kam pasur takime të shumta edhe me ministritë e linjës duke përfshirë në veçanti, Ministrinë e Arsimit Shkencës dhe Teknologjisë dhe sot kemi edhe takimin e Komitetit për Koordinimin dhe Vlerësimin e situatës me COVID-19 ku do të diskutohen këto çështje në raport me masat. Sipas situatës epidemiologjike momentale, nuk pritet që do të ketë lehtësim të masave, mirëpo natyrisht kjo do të jetë një përfundim pas takimit me Komitetin dhe natyrisht pas këtij takimi me ekspertët e fushës dhe rekomandimet e IKSHPK. Nuk do të ketë lirim të masave në asnjë mënyrë derisa të kemi një situatë të brishtë”, ka theksuar ai.
Përndryshe, Vitia ka thënë se kanë hartuar planin për ngritjen e kapaciteteve shtesë spitalore dhe fushore në rast të emergjencave shëndetësore.
Megjithëse ai ka thënë se bazuar në situatën e krijuar ditëve të fundit besojnë se një gjë e tillë nuk do të jetë e nevojshme.
“Duke i pasur parasysh rrethanat kemi hartuar planin për ngritje të kapaciteteve shtesë spitalore dhe fushore, nëse një gjë e tillë do të jetë e nevojshme në bashkëpunim me shërbimet tjera që të inkuadrohen në rast të emergjencave shëndetësore, pavarësisht se bazuar në ditët e fundit besojmë thellë se kjo nuk do të jetë as e nevojshme”, ka thënë ai./KultPlus.com
Ministri i Shëndetësisë, Arben Vitia, paralajmëron aplikimin e dozës së tretë të vaksinës kundër koronavirusit, në rast se paraqitet nevoja.
Kështu ka bërë të ditur Vitia permes një paraqitje për media, teksa shton se ky virus do të na shoqërojë për një kohë të gjatë, transmeton KultPlus.
“Kemi parë se në disa vende përkundër vaksinimt masiv të qytetarëve, efekti mbrojtës i vaksinave duket se është diku 7-8 muaj, kështu që tashmë si qeveri jemi bërë gati për të negociuar dhe siguruar edhe dozën e tretë që ta kemi me kohë të gatshme nëse paraqitet nevoja”, është shprehur ai ndër të tjera.
Situata në vendin tonë me koronavirusin është shumë e rëndë, në 24 orët e fundit si pasojë e COVID-19 kanë vdekur 18 persona, ndërsa rreth 2 mijë qytetarë kanë rezultuar pozitiv. Siptalet janë stërmbushur me pacientë që po trajtohen nga ky virus, ndërsa bëhet fjalë për mbi 25 mijë raste aktive në vend. / KultPlus.com
Ministri i Shëndetësisë, Arben Vitia, ka takuar krerët e institucioneve shëndetësore dhe personat e angazhuar në mbikëqyrjen dhe zbatimin e masave anti-COVID, me të cilët ka diskutuar rreth masave të reja anti-COVID.
Në takimin e ministrit Vita me hisedarët në zbatimin e masave kundër COVID-19, është diskutuar që të ketë ndryshim të masave anti-COVID, për shkak të rritjes së rasteve pozitive.
Kryetari i Odës së Hotelerisë dhe Turizmit, Hysen Sogojeva, ka deklaruar për Express se nga data 20 gusht, deri më 1 shtator, orari i gastronomisë do të jetë deri në orën 22:30 apo eventualisht deri në orën 23:00, transmeton KultPlus.
“Nga data 20 deri më 1 shtator orari i gastronomisë do të jetë deri në 22:30 ose deri në orën 23:00. Sallat e dasmave, hotelet, restorantet, qendrat tregtare dhe restorantet brenda tyre po ashtu. Maksimumi i personave të lejuar në dasma do të jetë 150”, ka deklaruar Sogojeva.
Sogojeva tha se nga data 20 gusht, klubet e natës do të mbyllen, derisa tha se nuk është ëprmendur kufizimi i lëvizjes së qytetarëve.
“Klubet e natës mbyllen nga data 20. Kufizim të lëvizjes nuk është përmendur. Ne si Odë duke e parë gjendjen, u pajtuam me këto masa deri më 1 shtator”, ka deklaruar Sogojeva. /gazetaexpress/ KultPlus.com
Ministri i Shëndetësisë, Arben Vitia ka paralajmëruar se do të ketë masa për ata që nuk janë vaksinuar.
Vitia para deputetëve të Kuvendit të Kosovës tha se tashmë ka vaksina të mjaftueshme, termine dhe vaksinat janë të sigurta dhe sipas tij nuk ka asnjë arsye për tu mos u vaksinuar.
“Nuk mund të lejojmë që qytetarët të pa vaksinuar, për shkak të neglizhencës të kenë liritë e njëjta me ata që janë vaksinuar”, tha Vitia,. raporton Telegrafi.
Ai bëri të ditur se nga e hëna janë në takime intensive për rishikimin e masave të reja, e të cilat të gjitha do të jenë konform motivimit të qytetarëve për tu vaksinuar.
“Virusi Delta nuk po kursen tash as fëmijët. Janë shumë fëmijë të infektuar me valën e fundit dhe ky është një alarm për qytetarët që të jenë të ndërgjegjshëm”.
Sipas tij, me paraqitjen e variantit Delta është e qartë se çdo masë konvencionale nuk do të ketë suksesin që kanë pasur para variantit Delta dhe në këtë drejtim ka rritur në 290 ekipe të vaksinimit në mbarë Kosovën.
“Procesi i vaksinimit do të vazhdojë me rritje të ekipeve të vaksinimit në qytete, si në Prishtinë ku interesimi për tu vaksinuar është më i madh se ekipet që mund të përballojnë për momentin”, tha ndër të tjera ministri Vitia./ KultPlus.com
Qeveria e Kosovës sot ka prezantuar masat e reja lehtësuese kundër COVID-19.
Me vendimin e ri është lejuar mbajtja e dasmave, fejesave, ahengjeve familjare dhe mbrëmjeve të maturës, shkruan gazeta express.
Të gjitha këto do të mbahen deri në orën 23:00.
“Organizimi i dasmave, fejesave, ahengjeve familjare dhe mbrëmjeve të maturës, është i lejuar me kusht që të shfrytëzohet 30 për qind e kapacitetit të hapësirës(30 persona për 100m2), por jo më shumë se 200 të ftuar në rastet kur 30 për qind e kapacitetit të hapësirës tejkalon këtë numër”, thuhet në njoftim. Distanca në mes të tavolinave duhet të jetë 3 metra.
Për mbajtjen e dasmave, fejesave, ahengjeve familjare dhe mbrëmjeve të matures, obligohet respektimi i udhëzuesit të veçantë për ahengje./ KultPlus.com
Ministri i Shëndetësisë, Arben Vitia ka bërë të ditur se deri në fund të vitit në Kosovë dotë arrijnë 1.2 milion dozë vaksina Pfizer.
“Duhet të kuptoni një gjë, për shkak të shumë termave të konfidencialitetit që i kemi me kompaninë Pfizer, nuk mund të ju japim më shumë informata, por deri në fund të vitit pritet të arrijnë mbi 1,2 milion vaksina Pfizer.”, ka thënë ai në konferencë për media, përcjell KultPlus.
Marrëveshjen me Pfizer e ka bërë të ditur edhe vet kryeministri Kurti në mbledhjen e qeverisë.
“Posa janë përmbyllur në mënyrë të suksesshme negociatat për ardhjen e vaksinave në Kosovë me ç’rast kemi blerë vaksina nga prodhuesi ‘Pfizer’ dhe tash duke iu falënderuar kësaj ne do të mund të bëjmë vaksinimin edhe përtej grupeve me prioritet dhe të shkojmë në mënyrë të sigurt drejt zotimit që të përmbyllim imunizimin e popullsisë sivjet, përkatësisht 60 për qind të qytetarëve”, ka thënë Kurti.
Qeveria e Kosovës, në mbledhjen që pati para konferencës së Vitisë, ka miratuar me shumicë votash masat e reja antiCOVID.
Në kuadër të masave të reja do të heqet ora policore dhe do të zgjatet orari i punës për gastronominë deri në ora 23:00.
Shefi i dikasterit të Shëndetësisë ka thënë në mbledhjen e qeverisë se do të lejohet edhe lëvizja e qytetarëve pa maska kur janë vetëm dhe në ambiente të jashtme. /gazetaexpress/ KultPlus.com
Ministri i Shëndetësisë, Arben Vitia ka thënë se të vaksinuarit në Kosovë nuk kanë pasur asnjë efekt anësor deri më tani.
Gjatë konferencën për medie në Qendrën e Vaksinimit, në sallën “1 Tetori”, Vitia tha se deri më tani ekipa emergjente nuk kanë pasur raste të ankesave nga personat të cilët janë vaksinuar, përcjell KultPlus.
“Te të gjithë qytetarët dhe personeli shëndetësor, vaksina nuk ka pasur asnjë efekt anësor apo efekt të padëshirueshëm që do të mobilizonte epiken mjekësore emergjente. Ata kanë pasur më së paku punë, që është lajm i mirë pasi vaksina deri më tani te askush nuk ka pasur efekte anësore”, theksoi Vitia.
Vitia tha se vaksina është e sigurt dhe ftoi të gjithë qytetarët mbi moshën 80-vjeçare që të lajmërohen dhe të vaksinohen. / KultPlus.com
Ministri i Shëndetësisë, Arben Vitia, ka bërë të ditur se procesi i vaksinimit të mësimdhënësve kosovarë në Shqipëri është shtyrë, pasi nuk ka më sasi të vaksinave “AstraZeneca” dhe ”Pfizer” atje.
Vitia ka thënë se ka pasur kontakte të vazhdueshme me homologen e tij, Orgeta Manastirliu, e cila i ka premtuar që sapo të vijnë doza të tjera të këtyre dy llojeve të vaksinave, atëherë një sasi e caktuar do t’i ruhet Kosovës për vaksinimin e mësimdhënësve.
“Dozat e vaksinave “AstraZeneca” dhe ”Pfizer” janë harxhuar, siç më ka njoftuar ministrja Manastirliu. Në Shqipëri po vazhdon vaksinimi me “Sinovax“, e cila është prodhuar nga Kina dhe për arsye se në Kosovë na ndalojnë ligjet që të importojmë produkte që nuk janë të regjistruar në EMA (Rregullatori Evropian i Barnave), ne nuk e kemi parë të arsyeshme që mësimdhënësit të vaksinohen. Kjo është arsyeja pse është shtyrë procesi. Manastirliu më ka thënë se sapo të vijnë doza të tjera të dy llojeve të vaksinës, atëherë do ta ndihmojnë Kosovën”, ka thënë Vitia.
Ministri i Shëndetësisë shtoi se janë duke pritur ardhjen e 76 mijë vaksinave nga programi COVAX, gjithashtu edhe ndihmat nga Komisioni Evropian, si dhe zbuloi se kanë marrë konfirmim edhe nga disa kompani të tjera për sjelljen e vaksinave në Kosovës, por derisa të nënshkruhet kontrata nuk mund të bëhet e ditur.
Vitia theksoi se janë ndarë 50 milionë euro nga Qeveria për blerjen e vaksinave./ KultPlus.com
Ministri i Administrimit të Pushtetit Lokal, Elbert Krasniqi dhe Ministri i Shëndetësisë Arben Vitia, mbajtën takimin virtual koordinues me kryetarët e komunave të Republikës së Kosovës, për të diskutuar lidhur me situatën e pandemisë COVID – 19 dhe masat e reja që pritet të merren.
Sipas një njoftimi në Facebook, nga ministria e Pushtetit Lokal, thuhet se ministri Vitia, diskutoi së bashku me kryetarët e komunave nevojën e disa masave të reja të cilat në bashkëpunim me të gjitha intitucionet relevante duhet të ndërmerren për të ruajtur shëndetin publik.
“Ministri Vitia, duke falënderuar kryetarët e komunave për angazhimin e tyre gjithashtu potencoi se tanimë ndodhemi në një situatë të rënduar. Ai theksoi se duhet mobilizim, koordinim dhe qasje më proaktive në raport me pandeminë për shkak të situatës së krijuar. Ai gjithashtu diskutoi së bashku me kryetarët e komunave nevojën e disa masave të reja të cilat në bashkëpunim me të gjitha institucionet relevante duhet të ndërmerren për të ruajtur shëndetin publik”, thuhet në një njoftim të ministrisë së Pushtetit Lokal.
Sipas ministrisë, kryetarët e komunave diskutuan rreth sfidave të ndryshme me të cilat janë duke u ballafaquar dhe dhanë mendimet dhe sugjerimet e tyre për vendimet që duhen të merren nga institucionet përkatëse.
Si përfundim të pranishmit u pajtuan që bashkërisht duke i koordinuar të gjitha veprimet rreth masave të reja, mund t’ia dalin për të minimizuar dhe tejkaluar sfidat me të cilat janë duke u përballur me pandeminë COVID-19./ KultPlus.com
Ministri i Shëndetësisë, Arben Vitia në seancën e sotme plenare të Kuvendit të Kosovës ka thënë se kanë pranuar konfirmim edhe nga kompanitë e tjera për sjelljen e vaksinave në Kosovë.
Ai paralajmëroi se në ditët në vijim do të ketë masa të reja kundër koronavirusit.
“Jemi duke punuar vazhdimisht në këtë drejtim. Masat që do të merren ditët në vijim nga terren është mirë që të respektohen nga të gjithë. Plani për vaksinim është përpiluar. Fillon me punëtorët shëndetësor dhe fillon me personat mbi moshën 80 vjeçare. I kemi listat e tyre. Ata nuk do të kenë nevojë që të aplikojnë online por edhe do t’i ftojmë. Të gjithë ata do t’i marrin vaksinat me këtë kontingjent”, ka thënë ai./IndeksOnline/ KultPlus.com
Ministri në detyrë i Shëndetësisë, Arben Vitia, ka thënë në një konferencë për media, se nga e enjtja qytetarët do të mund të lëvizin pa asnjë kufizim për 16 orë në ditë, nga 5:00 deri më 21:00.
Po ashtu, ai ka thënë se nga e enjtja do të hapen edhe objektet fetare, si xhamitë e kishat.
“Ky është një sukses i përbashkët”, tha ai në konferencë, ku ishin të pranishëm edhe kreu i Bashkësisë Islame të Kosovës, Naim Tërnava, kreu i Ipeshkvisë së Kosovës, Imzot Dodë Gjergji, drejtori i IKSHPK-së, Naser Ramadani dhe drejtoresha e Klinikës Infektive të QKUK-së, Lindita Ajazaj Berisha.
Ndërkohë deri në fund të majit do të mbyllet karantina në Qendrën e Studentëve në Prishtinë. Këtë e ka bërë të ditur ministri në detyrë i Shëndetësisë, Arben Vitia, të hënën në konferencë për shtyp. Ai ka prezantuar lehtësimin e mëtejmë të masave, ndërsa ka thënë se prej 28 majit do të largohen fashat për kufizim të lëvizjes dhe se lëvizja do të jetë e lirë prej pesë të mëngjesit deri në ora 21:00.
“Deri në fund të këtij muaji do të mbyllet edhe karantina, në përputhje me situatën e re epidemiologjike në vend dhe në bashkërendim me veprimet e shteteve të rajonit, por jo vetëm, edhe më gjerë. Në fazën e tretë parashihen masa të reja lehtësuese që do të çlirojnë edhe më tepër ekonominë”, ka thënë Vitia.
Faza e tretë e lehtësimit të masave fillon më 1 qershor.
Deri më tash, në Kosovë janë shënuar 1032 raste me COVID-19, janë shëruar 789 persona, ndërkohë kanë vdekur 29 persona. /KultPlus.com
Gazeta gjermane “Tageszeitung” e quan Arben Vitinë politikanin më të popullarizuar në Kosovë.
Si ministër i qeverisë së Kosovës mjeku Arben Vitia po përpiqet të ndalë përhapjen e koronavirusit në Kosovë, shkruan “Tageszeitung”. Kjo, sipas gazetës, nuk është punë e lehtë në një vend të varfër, në të cilin si pasojë e luftës gjendja e sistemit shëndetësor është e keqe. Vitia madje po përpiqet që t’i tejkalojë edhe konfliktet etnike mes serbëve dhe shqiptarëve gjatë pandemisë. Në të vërtetë, shkruan “Tageszeitung”, qeveria e kryeministrit Albin Kurti është shkarkuar para disa ditësh pas ikjes së LDK-së nga koalicioni, por Vitia mund të vazhdojë punën ai anëtar i kabinetit të shkarkuar.
Gazeta thekson se që në fillim Vitia ka urdhëruar kufizimin e lëvizjes së qytetarëve dhe kjo për banorët e Prishtinës është pothuaj traumatike sepse mund të lëvizin në qytet vetëm 90 minuta. Çka e shquan ministrin e Shëndetësisë është “politika transparente e informimit”. “Njerëzit nuk janë mësuar kështu, sepse qeveritë e kaluara konfliktet i kanë mbajtur të pazgjidhura duke i fshehur. Duke e ditur gjendjen e sistemit shëndetësor qeveria dëshiron të veprojë me vendosmëri, por në mënyrë transparente”, shkruan “Tageszeitung”. Ndoshta kjo politike, supozon gazeta, ka ndikuar që gjendja me koronavirisun në Kosovë të mos jetë aq dramatike. Çfarë kanë arritur Vitia dhe qeveria e Albin Kurtit është që në strategjinë e përgjithshme të përfshijnë edhe pakicën serbe dhe pakica të tjera, në një vend të banuar me shumicë shqiptare.
Kurti dhe Vitia që nga fillimi kanë deklaruar se do t’i trajtojnë barabartë të gjithë qytetarët. Kurti, i cili është akuzuar se është nacionalist (i majtë), tha se serbët kanë të drejtat e njëjta si qytetarët e tjerë. “Serbia me gjasë ka besuar se qeveria e Vetëvendosjes nuk do t’i testonte serbët e Kosovës. Por Serbia ishte e habitur kur e pa se ne nuk i ndajmë qytetarët sipas përkatësisë etnike”, deklaroi Kurti së fundi. Fakti që qeveria e Kurtit ka arritur të shtendosë raportin mes shqiptarëve të Kosovës dhe serbëve të Kosovës është pothuaj e padurueshme për përfaqësuesit e qeverisë së mëparshme. Serbët e Kosovës lavdërojnë punën e Kurtit dhe ministrit të tij të Shëndetësisë. Edhe një pjesë e madhe e popullit shqiptar të Kosovës e mbështet këtë politikë. Vëzhgues të shoqërisë civile vlerësojnë se Kurti në zgjedhjet e reja mund të marrë edhe më shumë mbështetje.
Ministri i shëndetësisë, Arben Vitia, ka njoftuar se kanë marrë rezultatin e parë NEGATIV të njërit prej pacientëve me COVID 19 pozitiv.
Në Facebook ai mes tjerash shkroi se “në ndërkohë nevojitet edhe testi kontrollues dhe me shpresë që do të kemi pacientin e parë të shëruar me COVID 19 në Kosovë”.
Ministri i Shëndetësisë, Arben Vitia, ka thënë se ka kërkuar nga kryeministri Albin Kurti, që të shpall emergjencë për shëndetin publik për shkak të situatës së koronavirusit.
“Bazuar në situatën e krijuar dhe me qëllim të ruajtjes së shëndetit të popullatës, porsa kërkova nga Kryeministri, Albin Kurti, që t’i propozojë Qeverisë shpalljen e emergjencës për shëndetin publik”.
“Të dashur qytetarë ju ftojmë të bashkëpunojmë në menaxhimin e kësaj situate. Kjo duke ndjekur rekomandimet nga Ministria e Shëndetësisë dhe Instituti Kombëtar i Shëndetit Publik, si dhe duke qëndruar në shtëpitë tuaja, që të kujdesemi për shëndetit njëri-tjetrit. Reduktoni daljet veç në raste emergjente. Ju faleminderit për mirëkuptim”, ka shkruar Vitia në rrjetin social Facebook. Klan Kosova / KultPlus.com
