Teatri Kombëtar i Kosovës ka publikuar orarin për muajin shkurt, në të cilën shihet se do të ketë repriza të disa shfaqjeve, shkruan KultPlus.
Nëpërmjet një postimi në llogarinë zyrtare, Teatri njoftoi edhe për orarin e ri, ku do të jenë tri shfaqje mysafire.
Më 5 shkurt do të jepet repriza e shfaqjes “Aroma e Hënës”, derisa më datë 25 do të mbyllen shfaqjet me “La Rrem” nga Arian Krasniqi me regji të Kushtrim Koliqit.
KultPlus ua sjellë orarin e plotë për këtë muaj. /KultPlus.com
Festivali i dramës origjinale shqipe “Talia e Flakës” do të vazhdojë me natën e dytë sonte, kur edhe do të jepet shfaqja “Aroma e Hënës”, shfaqje nga Teatri Kombëtar i Kosovës, shkruan KultPlus.
Drama “Aroma e Hënës”, me tre akte dhe epilog, pjesa e fundit e trilogjisë “Hëna prej letre” e autorit Mehmet Kraja.
Dramë provokative e ditëve tona, filozofike dhe surealiste, e cila ngre teza të fuqishme ekzistenciale, social-politike e politiko-mediale.
“Autori Kraja na përballë me pikëpyetje ekzistenciale të së shkuarës, së tashmes dhe së ardhmes (e cila nuk ka ardhur ende por me gjasë do t’i ndryshojë disa gjëra), duke i ballafaquar personazhet në raporte sa sociale aq edhe filozofike. Perceptimi i të shkuarës shpresëmadhe luftës, dhe pas lufte… kush jemi ne…, ku jemi… a ka ardhur liria…, demokracia në këtë vend çfarë është, dhe në fund, a jemi të lumtur?!”, është edhe përshkrimi i shfaqjes së sotme. /KultPlus.com
Festivali i vetëm i Dramës Origjinale Shqipe, “Talia e Flakës”, në kuadër të manifestimit “Flaka e janarit” dërgon në Gjilan disa vlera të dramaturgjisë kombëtare dhe vjen me shfaqje e program të pasur teatral edhe këtë edicion, shkruan KultPlus.
I pari në Gjilan, më 23 janar, prezantohet “Teatri i qytetit të Gjilanit” me shfaqjen “Viganët” nga regjisori Ilir Bokshi, autor Visar Krushan.
Më pas, Teatri Kombëtar i Kosovës do të prezantohet nga shfaqja “Aroma e Hënës” me regjisore Rozi Kostani dhe autor Mehmet Kraja.
Talia e Flakës do të vazhdojë më 25 janar me shfaqjen “5 ditë mbret” nga Stefan Çapaliku, e regjisor Gjergj Prevazi.
“Marksitët e Leninistët e Zvicrës” dhe “Gof kanë datat e rezervuara më 26 dhe 27 janar, derisa “Stiffler” do ta mbyllë këtë edicion.
“Talia e Flakës 2019” sivjet mbahet nga data 23 – 28 janar, në Teatrin e Qytetit të Gjilanit kurse të gjitha shfaqjet fillojnë me fillim në ora 19:30. /KultPlus.com
