Rrugëtimi i autorëve të huaj anembanë botës drejt edicionit të II i filmit nderkombetar dhe Fotografisë, u përmbyll sonte me plot çmime të dhëna në Amfiteatrin e Tiranës.
Poshtë yjeve dhe rrethuar nga entuziazmi dhe energjia e mirë, plot 22 nga 50 producentë pjesëmarrës u shpërblyen për punën e tyre kreative. 6 fotografë, për syrin e tyre të mprehtë dhe detajist.
Ishte juria me profesionistë të fushave të ndryshme, ata që i mirëpritën këta turistë të etur jo vetëm për art, por edhe për histori e kulturë.
Çmimi për “Fotografinë më të mirë” shkoi për Michael Stoeger me “Wintery Skies”.
“Faleminderit shumë! Kjo nuk ndodh çdo ditë! Jam i lumtur që jam ketu dhe i prekur shumë për këtë çmim. Për këtë foto do thoja është realizuar në Jug të Australisë. Shtëpia jonë e vërtetë, është Universi. E di këtë që fëmijë, ndonëse kur rritesh shpesh e harron këtë gjë”, – u shpreh Michael Stoeger.
Çmimi për “Filmin më të Mirë”, shkoi për Julien Guéraud me “Quest for Silence”; film ky për zhurmat e jetës dhe betejat me to.
“Ky është çmim shumë i rëndësishëm për mua, sepse nuk do e mendoja kurrë përpara pesë vitesh, ndërsa punoja në dhomën time të vogël, se do ta fitoja. Jam shumë i lumtur që ndodhem këtu në këtë vend të bukur si Shqipëria, me njerëz të mrekullueshëm”, – u shpreh Julien.
Çmimi nga vetë organizatorët e Travel Fest Festival, iu dha Mikael Kyster për dokumentarin e shkurtër e komik “The Kyster Family in Albania”.
Në këtë festival, nuk munguan videocall-et nga autorët e mos pranishëm dhe një prej tyre ishte edhe ajo e Mikaelit.
Ai i mëshoi me përshëndetjen e tij, të njëjtës shprehi të veçuar nga produksioni i tij, se “Çmimi i vërtetë nuk është një trofe, por njerëzit që gjithkush takon rrugës”, duke iu referuar kështu eksperiencës së kaluar në Travel Fest Albania.
Ndërsa përshtypjet për bukurinë dhe vlerat e Shqipërisë, veçse artikuloheshin nga një çmim në tjetër, nga një autor në tjetër, pati edhe lëvdata nga pjestarët e jurisë; të gjithë u bënë bashkë jo vetëm për organizimin në përmasa të mëdha, por mbi të gjitha për cilësinë e origjinalitetin e filmave konkurrues.
“Jam befasuar! Kam parë disa dokumentarë shumë interesantë për nga ndërtimi, struktura dhe filozofi shumë të thjeshta. Kam parë shumë pak fryrje, modele tipike…”, – u shpreh Ermal Hasimja, ndërsa shtoi në nota humori: “E sigurt, vitin tjetër do të jem edhe unë konkurrues”.
Çmimi për kategorinë “Mjedisi dhe Ekologjia” shkoi për regjisorin Karsten de Vreugd me “Paved Paradise”.
“Një falenderim i veçantë shkon për vullnetarët e këtij festivali, që kanë punuar fort për realizimin, si dhe njerëzit pas kamerave. Pa ta, nuk jemi asgjë”, – tha de Vreugd.
Prej datës 3 deri më 7 Korrik, 112 filma janë transmetuar në Tiranë, Durrës e Gjirokastër. 112 filma bënë të mundur të zgjonin shqisat e një audience të gjerë.
Edicioni i II ishte padyshim rendës i edicionit të I për nga suksesi./Balkanweb/KultPlus.com
Dyshja e artistëve të amed Gilbert & George, të cilët e përshkruajnë veten si dy burra që janë së bashku një artist, kanë zbuluar një galeri të re në Londër kushtuar punës së tyre.
Dyshja – Gilbert Prousch dhe George Passmore – kanë punuar së bashku për gjashtë dekada, duke krijuar art performancash absurde dhe vepra të bazuara në imazhe të përqendruara në idenë se artistët janë “skulptura të gjalla” – dhe se gjithçka që ata bëjnë është art.
Duke u hapur për publikun më 1 Prill, shfaqja e parë e Qendrës Gilbert & George, “The Paradisical Pictures”, shfaq një seri veprash haluçinuese në shkallë të gjerë të mediave mikse që duken si xham me njolla dhe paraqesin motive fetare dhe natyrore dhe autoportrete.
Duke folur me Christiane Amanpour të CNN përpara nisjes, Prousch tha: “Muzetë e rinj nuk kanë më hapësirë dhe është e kufizuar se çfarë mund të tregojnë. “Ne e filluam me idenë se ne donim të shiheshim dhe e vetmja mënyrë për t’u parë është të ndërtoni muzeun tuaj të vogël… Ata janë shumë të mbushur me artistë të tjerë.
Në vitin 2021, artistët i thanë Financial Times në një intervistë se “të gjithë muzetë tani janë zgjuar”, me Prousch duke thënë se Tate ka 23 nga veprat e tyre që “ato nuk i shfaqin kurrë”. Ai shtoi: “Për momentin është i gjithë arti i zi, i gjithë arti i grave, i gjithë ky art dhe ai art. Thjesht shkoni dhe hidhini një sy Tate Modern, jam i sigurt se ata nuk kanë një (Francis) Bacon lart.”
Vërejtjet e tyre u rishfaqën vitin e kaluar, me kritikët që vunë në dukje se komentet e tyre janë në kundërshtim me etikën e tyre të “artit për të gjithë”.
Të tjerët nuk i thyenin fjalët. Artisti dhe akademiku nigerian Chika Okeke-Agulu postoi në Instagram në tetor 2022: “Këta dy burra të bardhë britanikë po marrin vetë muzeun e tyre sepse [B] njerëzit e mangët dhe gratë kanë marrë përsipër institucionet e artit të të bardhëve”.
Artistët nuk folën për racën apo gjininë gjatë bisedës së fundit me Amanpour, dhe kur CNN Style kontaktoi me Gilbert & George pas intervistës në lidhje me deklaratat e mëparshme të artistëve, një përfaqësues nuk pranoi të komentonte.
Një histori provokimi
Në një intervistë për CNN, artistët u shprehën se janë të jashtëzakonshëm politikë për bindjet e tyre konservatore. “Në Britani, për shumë e shumë vite ishte një gjë e keqe të thuash se je konservator; ishte sikur të ishe i çuditshëm apo diçka e tillë,” i tha Passmore Amanpour. “Ne votojmë gjithmonë konservatorë sepse na pëlqen të votojmë për partinë fituese… Ne mendojmë se konservatori është më normal; pala tjetër është më e huaj, më revolucionare, më komuniste ose më ateiste ose diçka e çuditshme. Konservator do të thotë normal, mesatar.”
Por Prousch dhe Passmore kanë qenë prej kohësh provokues në veprat e tyre, duke krijuar fotograme të rrymave të urinës, feçeve dhe ikonografisë katolike, dhe duke u shfaqur të papërshtatshëm – një gjë e rrallë – dhe të përkulur në autoportretin e vitit 1994 “Bum Holes”. Në një diptik të hershëm së bashku, nga viti 1969, artistët e rinj mbanin shkronja të prera në kostumet e tyre që shkruanin “George the C” dhe “Gilbert the S“.
Kur u pyetën nëse e konsideronin veten “të çuditshëm”, Passmore u përgjigj “Sigurisht që jo. Ne jemi normal – normalë të çuditshëm”, duke shtuar, “Ne nuk duam të jemi të çuditshëm sepse tradicionalisht të gjithë artistët ishin të çuditshëm, me sandale dhe tuba duhani. Dhe ne nuk duam të jemi normalë, sepse kush dëshiron të jetë si gjithë të tjerët? Por të jesh i çuditshëm dhe normal në të njëjtën kohë është një ekuilibër i mirë, mendojmë.”/cnn/KultPlus.com
Në prag të hapjes së Pavijonit të Kosovës në Bienalen e Venedikut, kryeministri i Republikës së Kosovës, Albin Kurti ka bërë një postim në rrjetet sociale dedikuar artit në Kosovë, përcjellë KultPlus.
Këtë vit, Kurti e ka quajtur vit i artit dhe prodhimit ndërkombëtar të shtetit tonë. Sipas tij, Arti është ura jonë lidhëse me botën.
Ky është postimi i plotë i kryeministrit:
Sot hapet pavijoni i Kosovës në Bienalen e Venedikut, një nga ngjarjet më prestigjioze të artit në botë. Republikën tonë do ta përfaqësojë artisti bashkëkohor Jakup Ferri me veprën “The Monumentality of the Everyday”, që për kuratore ka gjermanen Inke Arns dhe komisionere Alisa Gojani-Berishën.
Sivjet Prishtina do të jetë nikoqire e Bienales Nomade Evropiane, Manifesta (edicioni 14), e cila në edicionin e kaluar u mbajt në Marsej (Francë), ndërsa pas Prishtinës shkon në Barcelonë (Spanjë). Afër 100 artistë nga 32 shtete të botës, gjysma e tyre nga Kosova, nga 22 korriku për 100 ditë rresht do ta shndërrojnë Prishtinën në hapësirë të artit dhe transformimit të hapësirave publike.
Para tri javësh u mbyll Expo Dubai, ndërsa Kosova u paraqit me artistët e saj të dalluar dhe me eksponate muzeale e vepra të artit, si dëshmi e vlerave dhe potencialit të jashtëzakonshëm kulturor e identitar.
Festivalet ndërkombëtare të Kosovës edhe sivjet do të sjellin emra të njohur të artit nga e gjithë bota, nga filmi te muzika, nga arti pamor te romani grafik. Artistë të shumtë nga e gjithë bota zbarkojnë në shtetin tonë gjatë gjithë vitit përmes festivaleve tona që kanë krijuar identitet të fuqishëm ndërkombëtar.
Viti 2022 shënon edhe nisjen e programit tre vjeçar për blerjen e veprave të artit nga artistët vendorë. Përveç kësaj, do të ndahen 20 bursa për studim në arte dhe trashëgimi kulturore në universitete botërore. Kurse gjatë pjesës së dytë të vitit do të vendosen themelet e institucionit më të ri shtetëror të artit, Muzeut të Artit Bashkëkohor, një mundësi shtesë për integrim dhe forcim të pozicionit të Kosovës në skenën botërore të artit pamor.
Këtë vit do të nënshkruajmë marrëveshje të bashkëprodhimit filmik me Francën në festivalin e Kanës, dhe me Izraelin më vonë gjatë vitit. Filmat tanë të suksesshëm edhe sivjet vazhdojnë të udhëtojnë nëpër festivale prestigjioze dhe të shfaqen në kinematë anekënd botës.
Në thirrjen publike për mbështetje të skenës së pavarur kulturore kemi krijuar skemën e veçantë të mobilitetit për prezantimin e produktit tonë artistik në botë. Organizatat kulturore dhe artistët e pavarur do të gëzojnë mbështetje të rritur për paraqitje ndërkombëtare.
Arti është ura jonë lidhëse me botën. / KultPlus.com
Shkodra është një prej qyteteve më të kahershme të Shqipërisë, me një histori banimi mijëvjeçare në qytet dhe krahinë. Po ashtu Shkodra gjatë viteve të tëra, ka qenë një vend ku është zhvilluar kultura dhe jeta artistike, shkruan KultPlus.
Një fotografi e postuar kohë më parë nga Vinceś Mudroū, dëshmon se këtë qytet e kanë vizituar edhe artistë kinezë, në vitin 1955. Derisa ata parakalojnë përmes rrugëve të këtij qyteti, qytetar të shumtë kanë dalë për të pritur ardhjen e tyre. KultPlus, ju sjellë këtë fotografi që tregon një atmosferë të këndshme në këtë qytet, derisa me buzëqeshje, e duartrokitje artistët kinez përshëndeten me banorët e qytetit të Shkodrës./ KultPlus.com
Arti nuk është vetëm një burim frymëzimi, por gjithashtu një mister i madh. Artistët shpesh shtojnë detaje të vogla të çuditshme në pikturat e tyre, ose lënë mesazhe që janë të pamundura të vërehen në shikim të parë.
Bota.al sjell më poshtë një listë të kryeveprave të pikturës, me sekrete të papritshme. Në fund të artikullit, edhe një bonus: një nga hipotezat më të çuditshme në lidhje me Mona Lizën.
10. Veshi i gabuar
Auto-portreti i Vincent Van Gogh me veshin e fashuar paraqet artistin me një vesh të djathtë të plagosur. Në realitet, ai kish prerë veshin e majtë. Mospërputhja shpjegohet me faktin se Van Goghu përdori një pasqyrë për të krijuar portretin e tij.
9. Piktura nën pikturë
Nëse shikoni nga afër Kitaristin e Vjetër nga Pablo Picasso, mund të shihni një siluetë femre të zbehtë prapa kokës së njeriut. Pas marrjes së imazheve me rreze infra të kuqe dhe X të pikturës, studiuesit nga Instituti i Arteve të Çikagos zbuluan disa forma të tjera të fshehura nën të. Me shumë gjasa, artisti nuk kishte para të mjaftueshme për të blerë pëlhura të reja, dhe duhej të pikturonte.
8. Ora e natës është e vendosur gjatë ditës
Gjatë restaurimit të pikturës së Rembrandt The Shooting Company of Frans Banning Cocq and ëillem van Ruytenburch (e njohur më mirë si “Ora e Natës”) në vitin 1947, ajo u pastrua nga një shtresë e trashë bloze. Pas kësaj, u bë e qartë se skena e portretizuar në pikturë nuk ndodh gjatë natës, por gjatë ditës.
7. Kodi anatomik i Kapelës Sistine
Një imazh i trurit njerëzor është i dallueshëm jo vetëm në Krijimin e Adamit nga Michelangelo, por edhe në një tjetër afresk të Kapelës Sistine: Ndarja e Dritës dhe e Errësirës. Shikoni qafën e Perëndisë: nëse e mbivendosni atë në një foto të trurit njerëzor, siç shihet nga poshtë, do të merrni një mbivendosje të përsosur të vijave.
6. Simboli i forcës
Figurat e Davidit dhe Goliathit në një tjetër afresk të Kapelës Sistine, të krijuara nga Michelangelo, formojnë gërmën hebraike gimelin, e cila simbolizon forcën në traditën mistike të Kabalas.
5. Vështrimi i vëngërt i Rembrandit
Margaret Livingstone dhe Bevil Conuay studiuan auto-portrete të Rembrandt dhe provuan se piktori vuante nga stereoverbimi. Kjo veçori bënte që piktori të perceptonte botën pak ndryshe: ai e shihte realitetin në 2D dhe jo në 3D. Megjithatë, është e mundur që stereoverbëria e ndihmoi Rembrandin të krijonte kryeveprat e tij të pavdekshme.
4. Hakmarrja për të dashuruarit
Një nga pikturat më të famshme të Gustav Klimt portretizon Adele Bloch-Bauer. Ajo u pagua nga burri i saj, baroni i sheqerit Ferdinand Bloch-Bauer. Ai zbuloi se Adele dhe Klimt kishin një lidhje dhe besonte se pas qindra skicave, piktori në fund do ta urrente dashnoren e tij. Puna rutinore me të vërtetë bëri që ndjenjat midis gruas dhe artistit të ftoheshin.
3. Parashikimi i fundit të botës
Studiuesja italiane Sabrina Sforza Galitzia propozoi një interpretim të pazakontë të Darkës së Fundit të Leonardo da Vinçit. Ajo është e sigurtë se në pikturën e tij, artisti la një parashikim për fundin e botës, i cili do të ndodhë më 21 mars 4006. Për të arritur në këtë përfundim, studiuesja deshifroi kodin matematikor dhe astrologjik të pikturës. Ky nuk është mister vetëm i Darkës së Fundit. Duart e Krishtit dhe apostujt, së bashku me bukët në tryezë, formojnë diçka që mund të lexohet si disa nota muzikore. Pas testimit, kjo tingëllon si një melodi e shkurtër.
2. Bota në të verdhë
Pothuajse të gjitha pikturat e Vincent van Goghut shfaqin një të verdhë dominante. Profesor Paul Uolf shpjegon se është një efekt anësor i një ilaçi epilepsie që ndryshon perceptimin e ngjyrës. Bota e artistit mund të dukej vërtetë ashtu si e shohim ne, në pikturat e tij.
1. Mozarti dhe masonët
Ka dëshmi të forta se Volfgang Amadeus Mozart ishte një Mason. Edhe në portretin e tij të fëmijës nga Pietro Antonio Lorenzoni, mund të shohim një simbol masonik: një dorë e fshehur që tregon një gradë hierarkike në shoqërinë sekrete.
Bonus: Mona Liza
Stomatologu dhe eksperti i artit Joseph Borkovski studioi me kujdes pikturën e Leonardo da Vinçit dhe pretendon se ka zbuluar sekretin pas buzëqeshjes së La Giocondas. Ai beson se ajo kishte humbur dhëmbët e saj të parë dhe kjo ndikoi në shprehjen e saj të fytyrës. / KultPlus.com
Ministrja e Kulturës, Rinisë dhe Sportit Vlora Dumoshi priti sot në takim një grup artistësh të pavarur.
Në takim ministrja i njoftoi që MKRS nga fondi prej 5 milionë, i shpërndarë për rimëkëmbje ekonomike nga Qeveria e Kosovës, në fazën e parë i ka vënë në dispozicion fondet përmes tri masave që kanë pasur për qëllim; fuqizimin e të rinjve dhe përgatitjen e tyre për tregun e punës përmes mundësimit të angazhimit me punë praktike në kompani private, OJQ dhe institucione publike; mbështetjen e drejtpërdrejtë të klubeve të sportit në Kosovë të regjistruara sipas legjislacionit në fuqi; dhe subvencionimin e projekteve nga fusha të ndryshme të sektorit të kulturës dhe trashëgimisë kulturore.
Ministrja theksoi: “Si MKRS kemi propozuar që fondi i mbetur prej 2.5 milionë euro për rimëkëmbjen ekonomike të dikastereve që mbulon MKRS t’i dedikohet mbështetjes së artistëve dhe krijuesve të pavarur.
Rrjedhimisht takimi i sotëm shërbeu për të diskutuar këtë propozim në mënyrë që të identifikohen mënyrat se si mund të përkrahen krijuesit e pavarur. U diskutua për vendosjen e kritereve dhe mënyrën e zbatimit, gjithmonë konform nevojave dhe kërkesave që ata mund të kenë.
Ministrja shtoi që për MKRS-në dhe për të si ministre është kruciale që në këtë fazë të ketë bashkëpunim të ngushtë me gjithsecilin dhe që secili propozim do të trajtohet me kujdesin e duhur institucional. / KultPlus.com
Rigjetja e një pune që nga mbyllja e teatrove, lokaleve muzikore dhe klubeve të natës në Mbretërinë e Bashkuar ka qenë e vështirë për artistët. Madje ata u detyruan të gjejnë punë të tjera për të qëndruar stabil financiarisht, punë këto të cilat janë jo-artistike, shkruan The Guardian, përcjell KultPlus.
Paris Rivers: Tekniku i efekteve speciale të filmave sot punon me morgje
Paris Rivers më parë ishte një teknik i efekteve speciale në film dhe TV, si dhe një interpretues kabareje, tashmë ai është operator i shërbimeve funerale. Javën e kaluar, atij iu desh të ndihmonte në veshjen e trupit të një burri që kishte vdekur nga plagët e thikës. Edhe më tronditëse ishte të shihje trurin e një fëmije. “Unë jam duke bërë një punë që shumica e njerëzve nuk do ta prekin me një shtyllë 10 metërshe”, thotë ai. “Por shumë prej nesh nuk kishin ndonjë alternativë.” Përveç kësaj, ai shton, “kur njerëzit pyesin: ‘Çfarë bëtë gjatë vitit 2020?’ Unë mund të them se isha atje në vijat e frontit.”
Rivers, 31 vjeç, ishte “me të vërtetë i frikësuar dhe i dëshpëruar për punë” kur Covid-19 goditi dhe rastësisht, kishte një mik që po punonte në një nga morgjet e përkohshme të ngritur në fillim të pandemisë. Pasi punoi atje për dy muaj, ai kontaktoi shtëpitë e varrimit për të parë nëse dikush do ta merrte atë si një operator të shërbimit funeral. Që nga ajo kohë ai po transporton hi, kufoma dhe arkivole. Krahasuar me të qenit në një set filmik, thotë ai, puna është relativisht “pa stres”.
“Është çuditërisht relaksuese”, shpjegon Rivers. “Ju duhet të shkoni në varreza të bukura, të vishni një kostum të bukur, të vozisni makina luksoze. Disa njerëz frikësohen me këtë punë, por unë fillova në filma horror, prandaj më duket interesante. Dhe sa njerëz që punojnë në filma horror kanë punuar në të vërtetë rreth vdekjes? Ndjej që kjo do të jetë e dobishme për mua në planin afatgjatë. ”
Edhe kur industria e filmit fillon si duhet, thotë Rivers, ai do të vazhdojë me këtë punë në kohë të pjesshme.
Tumi Williams: Muzikant i hip-hopit, tani kuzhinier
Për më shumë se 10 vjet, Tumi williams ka programuar koncerte në Cardiff, si dhe turne nëpër festivale me grupin e tij hip-hop “Afro Cluster”. Ndërsa kultura u ndikua nga pandemia, grupit iu desh të anulonte datat e tyre të koncerteve të drejtpërdrejta dhe të vononte publikimin e albumit të tyre. Por ishte muzika live ajo që i dha Williams idenë për të hapur biznesin e tij të pandemisë. “Banda ime ishte duke performuar në një skenë në Womad dy vjet më parë, dhe festivali më pyeti nëse mund të gatuaj diçka, kështu që unë bëra oriz jollof ndërsa luanim. Ne do të bënim një këngë dhe pastaj unë do të vazhdoja të gatuaja. Ishte çmenduri! ”
Në kryeqytetin Uells të Afrikës Perëndimore nuk ka shumë oferta ushqimi dhe pjata e tij i ka dhënë atij shpejt statusin e “heroit lokal”. Por orizi jollof i tij ka një kthesë: është vegan. Filloi si shujta për shokë, por shpejt evoluoi në një shërbim të plotë, të dorëzuar personalisht çdo të enjte, të premte dhe të shtunë, duke u rritur përmes komunikimit me njerëz dhe përmes Instagramit.
“Ne e quajtëm atë Jollof House Party”, thotë Williams. “Nuk kisha ndonjë ide që do të isha kaq i zënë gjatë 10 javëve të fundit. Të Premten e kaluar bëra 15 shujta brenda një nate.”
Ai tani planifikon ta kthejë atë nga gatimi në shtëpi në një biznes të duhur, i inkurajuar nga festivali në vitin e ardhshëm.
Christopher Nairne: Projektues ndriçimi për hekurudhën
Një kalim në karrierë nga dizajnimi i ndriçimit të teatrit në sinjalizimin hekurudhor ka qenë i dobët për Christopher Nairne. “Cilado qoftë e ardhmja e industrisë së teatrit që rezulton të jetë, askush nuk do të ndalojë së kërkuari sinjalizimin hekurudhor”, thotë ai.
Për këtë punë që po bën, Nairne thekson se “është shumë e qëndrueshme dhe paguhet mirë, ndërkaq teatri paguhet tmerrësisht keq”.
Nairne kishte një përvojë të mëparshme në pista. “Unë kam punuar në një hekurudhë të trashëgimisë në Uells për 22 vitet e fundit, kështu që nuk ishte krejtësisht e re për mua”, thotë ai. Por ai gjithashtu sheh ngjashmëritë midis sinjalizimit dhe punës së tij teatrore. “Të dyja përfshijnë orë antisociale dhe ju duhet të jeni në gjendje të përballoni presionin në një mjedis potencialisht të rrezikshëm.”
Ai është i shqetësuar, sidoqoftë, për mënyrën se si media promovon një qëndrim të detyrimit të artistëve për të ndërruar punën, pa e kuptuar publiku se “ata kanë kaluar pandeminë duke parë seritë e Netflix që janë bërë të gjithë nga artistë”.
“Është një punë serioze dhe është një punë e respektuar”, thotë ai – po aq sa sinjalizimi hekurudhor./KultPlus.com
Shumë artistë të njohur të Kosovës, mbrëmë në mënyrë të organizuar kanë postuar mesazhe për drejtësinë ndërkombëtare. Ata nëpërmjet mesazheve të drejtpërdrejta dhe sensibilizimit me viktimat e luftës, kanë kërkuar nga ndërkombëtarët që të gjykojnë dhe të dënojnë kriminelët serbë, shkruan KultPlus.
Kësaj nisme i janë bashkuar artistët si: Shëngjyl Ismaili, Agan Asllani, Jeton Zogiani, Ylber Bardhi, Kushtrim Sheremeti, Kushtrim Qerimi e shumë të tjerë.
Më poshtë janë disa nga mesazhet që janë postuar nga artistët e njohur të kinos dhe teatrit të Kosovës:
“Pse nuk po i gjykoni kriminelët serbë që i kryen mbi 400 masakra mizore mbi popullsinë shqiptare? #duamdrejtësi”.
“Askush nuk mund ta rishkruajë Historinë e Kosovës! #meçlirimtarët”.
“Pse po i amnistoni kriminelët serbë që i dhunuan mbi 20 mijë gra shqiptare? #duamdrejtësi”.
“Serbia e spastroi etnikisht Kosovën dhe dëboi mbi 1 milion shqiptarë nga shtëpitë e tyre. #duamdrejtësi”.
“Kriminelët serbë i dogjën mbi 120 mijë shtëpi të shqiptarëve. #duamdrejtësi”.
“Shteti i Serbisë vrau rreth 11 mijë shqiptarë të pafajshëm. #kuështëdrejtësiandërkombëtare”.
“Mbi 1300 fëmijë shqiptarë u vranë nga kriminelët serbë, të cilët lëvizin lirshëm kudo nëpër botë. #kjonukështëdrejtësi”.
“Zbardhni fatin e 1653 personave të pagjetur! #namungojnë”. “Ku janë varrezat masive? I duam eshtrat e familjarëve tanë. #duamdrejtësi”.
“Kosova është turpi i drejtësisë ndërkombëtare! #drejtësieturpit”. / KultPlus.com
Protesta e artistëve shqiptarë ka vazhduar edhe sot nën sloganin “Muzika nuk vret”, kundër vendimit të Qeverisë shqiptare për mbylljen e clubeve pas orës 20, shkruan KultPlus.
Në mesin e shumë artistëve, protestës i janë bashkuar edhe tre artistët e njohur Aleksandër Gjoka, Redon Makashi dhe Elton Deda.
Ky i fundit ka shkruar në rrjetin social facebook “Nuk na mundni dot. Mos e krruni me muzikantet! Do behet mullar gjeja!”
“Tre musketjerët” njihen për shumë këngë të bukura që i kanë sjellë skenës muzikore shqiptare.
Kujtojmë që gjatë protestës së sotme, ka pas dhe përplasje mes artistëve dhe policisë. Policia ka shoqëruar disa protestues. /KultPlus.com
Vendimi i fundit i Qeverisë për rimbylljen e klubeve të natës, lounge-ve apo diskove, në kuandër të masave anti-covid, nuk është pritur mirë nga publiku. Ky vendim dëmton rëndë ekonominë e personave që punojnë në këto biznese, që nga stafet e punonjësve e deri tek këngëtarët e muzikantët, duke qenë se këto aktivitete i kanë si burim kryesor të ardhurash. Madje një pjesë e vendimit, ku thuhet se nuk do të lejohet muzika në asnjë vend pas orës 20:00, është bërë objekt ironiedhe talljeje në rrjetet sociale.
Ndërkohë, sot është parashikuar edhe një protestë para kryeministrisë në lidhje me aktin normativ të miratuar nga qeveria. Në orën 20:00, që duket si një simbolikë e përdorur nga artistët sërish për të ironizuar vendimin, muzikantët dhe të gjithë personat që i preket puna dhe të ardhurat nga bllokimi i lokaleve, do të mblidhen nën moton “Muzika nuk vret”. Nga posteri i publikuar, ata kërkojnë që të mos ndalet muzika, të përmirësohet kontrolli për masat ndaj Covid-19 dhe dalin kundër informalitetit, një temë e diskutuar shpesh herë dhe e përdorur kundër këngëtarëve.
Thirrja për protestë po shpërndahet në rrjetet sociale, ku deri më tani e kanë nxjerrë artistë si Eneda Tarifa, Eugent Bushpepa Dj Sardi apo Capital T, por edhe figura si Olti Curri, i cili u shpreh kundër vendimit të qeverisë më herët sot.
Sot në orën 20:00 përballë kryeministrisë. /News31.al /KultPlus.com
Qeveria gjermane e ka miratuar një paketë ndihme për kulturën në vlerë 1 miliard euro, me qëllim përmirësimin e mundësive të punësimit për artistët, pas kufizimeve të vendosura kundër COVID-19.
“Duhet të mirëmbajmë atraksionet kulturore dhe vendet e performances”, njoftoi ministrja e Kulturës, Monika Gruetters, në një deklaratë pas një takimi të kabinetit në Berlin.
Një e katërta e financimit do të shkojë për vendet e asistencës për zbatimin e masave higjienike, biletave në internet dhe sistemeve të ventilimit.
Deri në 480 milionë euro kanë për qëllim të ndihmojnë artistët të kthehen në punë me kohë të plotë.
Pjesa tjetër, 150 milionë euro janë siguruar për dixhitalizimin dhe 100 milionë euro do të kompensojnë humbjen e të ardhurave nga pandemia. / KultPlus.com
Komuna e Gjilanit, përkatësisht, kryetari Haziri, vlerësoi dhe nderoi si “Personalitete të vitit” dy prej artistëve më të mirë gjilanas të cilët me kontributin, angazhimin dhe sukseset e tyre, arritën të marrin vëmendje e çmime ndërkombëtare në fushen e artit, kulturës e kinematografisë, shkruan KultPlus.
Ditë më parë aktorja Adriana Matoshi u shpërblye me çmim si aktorja më e mirë në Festivalin e Francës “See A Paris”, për rolin e saj në filmin “Nëntori i Ftohtë” me regji të Ismet Sijarinës. /KultPlus.com
Pianisti gjerman është bërë gati për të filluar koncertin maratonik që zgjat 20 orë të shtunën, në të cilin ai do të luajë një vepër të vetme muzikore për të ngritur vetëdijen në lidhje me gjendjen e vështirë të artistëve gjatë pandemisë.
Igor Levit do të luajë “Vexations” nga Erik Satie, një nga veprat më të gjata në historinë e muzikës, që përbëhet vetëm nga disa nota që luhen 840 herë.
“Këto kohë janë brutale për artistë, si në aspektin fizik, atë mental dhe emocional. Prandaj, kjo pjesë funksionon shumë mirë, sipas mendimit tim për të rritur vetëdijen për atë që po kalojmë”, ka thënë Levit për agjencinë telegrafike të Gjermanisë.
Pianisti do të luajë notat e tij të para në ora 02:00 të mëngjesit dhe të fundit në mbrëmjen e së shtunës. Do të transmetohet live nga një studio në Berlin përmes disa kanaleve nëpër rrjete sociale, përfshirë edhe llogaritë e 33-vjeçarit në Instagram dhe Twitter.
Vepra muzikore e vitit 1893 nga Satie (1866-1925) përbëhet nga një temë e shkurtër dhe variacione, dhe të gjitha notat e saj janë të shkruara brenda një faqeje. Sipas pianistit Levit, është diçka që të kujton një “britmë të heshtur” gjatë monotonisë së saj.
“Artistët kanë nevojë për skenë. Situata e tanishme është jashtëzakonisht e vështirë dhe këtu flas edhe për veten time, po ashtu”, ka shtuar ai. “Pamja është e errët, duke vënë në pah këtu rregullat për ngjarje kulturore”.
Më 10 mars, Levit ka luajtur koncertin e tretë dhe të pestë të Beethovenit në “Elbphilharmonie” në Hamburg. Ishte ditëlindja e tij dhe koncerti i tij i parë para një audience virtuale për të ardhmen e paparashikueshme.
Ditën tjetër, kancelarja Angela Merkel njoftoi për të ardhmen e paqartë pasi që vendi filloi të mbërthehet nga novela e koronavirusit. Brenda disa ditëve një mbyllje kombëtare u shpall për të mbajtur nën fre rastet, duke anuluar mbledhjen e një numri të madh të njerëzve. Që atëherë, Levit ka mbajtur më shumë se 50 performanca nga shtëpia. / DW/ KultPlus.com
Arkitekti dhe artisti tashmë i ndjerë Maks Velo akuzonte kolegët e tij artistë, të cilët e kishin raportuar në Sigurimin e Shtetit gjatë kohës së diktaturës. Velo e cilësoi Lidhjen e Shkrimtarëve një qendër të ish-Sigurimit të Shtetit, ku analizoheshin dhe kontrolloheshin të gjitha punimet artistike qoftë në letërsi, ashtu dhe në artet e tjera. Dhe ishin, sipas Velos, po artistët e Lidhjes së Shkrimtarëve, të cilët bënin analiza artistike dhe ideologjike të veprave artistike të kërkuara nga Sigurimi i Shtetit.
Duke cituar një emër të përveçëm, Llambi Blido, Maks Velo thoshte se ai kishte bërë 27 denoncime, të cilat i ka hedhur poshtë dhe Sigurimi i Shtetit si të pavërtetuara. Ai akuzon Edison Gjergon apo Safo Markon, të cilët edhe ishin të goditur nga Sigurimi i Shtetit dhe bashkëpunonin me të. Me trishtim dhe aspak optimist për të ardhmen, Maks Velo shprehet se nuk po i ndahet përndjekja dhe në ditët tona. Velo tregonte se pasi i kanë marrë shtëpinë e gjyshërve në Dardhë të Korçës, e kishin penguar të shkojë në fshatin e të parëve, madje duke e kërcënuar. Duke denoncuar edhe nivelin aktual në arte, Velo kërkonte veting si ai i gjyqtarëve, edhe për artistët. Por dëshpërimin më të madh arkitekti e lidh dhe me Teatrin Kombëtar. Sipas tij, vendimi për të prishur Teatrin Kombëtar dhe për të ndërtuar një Teatër të ri bashkë me një kompleks kullash, Maks Velo e cilësonte korrupsion të pastër. “Të ndërtosh kulla në këtë mënyrë në mes të kryeqytetit, në mes të Europës, është e turpshme”, shprehej Velo.
Maks Velo
Libri është i rëndësishëm për disa arsye. Unë kam vite që e them se Lidhja e Shkrimtarëve dhe Artistëve ka qenë një tmerr. Kur e thosha këtë, të gjithë më dilnin kundër. Tani kur lexon librin, e kupton që kjo është e vërteta. Po ashtu dhe ai dokumenti që doli dje te “Panorama” për Fadil Paçramin, ekspertizën që kishte bërë Dalan Shapllo dhe Llazar Siliqi për dramat e Fadil Paçramit. Po si mund të futësh në burg një dramaturg meqenëse personazhet thonë këto gjëra?! Që kur ka lindur drama e deri më sot, meqenëse personazhet mund të thonë disa gjëra, duhet të futet çdo dramaturg në burg?! Nuk futet piktori në burg pse nuk të pëlqen piktura e tij. Kjo ishte Lidhja e Shkrimtarëve, ky ishte Dritëroi. Duhet ta kemi të qartë. Dritëroi po të ishte i drejtë, duhet të kishte dhënë dorëheqjen, duhet të ishte larguar.
Ai i dinte të gjitha. Ekspertizat e gjyqit për artistët janë bërë nga Lidhja. Lidhja e Shkrimtarëve nuk duhet të ishte qendër e Sigurimit të Shtetit, kur ajo merrte në analizë dhe kontrollonte të gjithë artistët. Si është e mundur që Llambi Blido ka bërë 27 denoncime dhe duke gënjyer madje, sepse vetë Sigurimi i Shtetit thotë: “Këto informacione që na jep Llambi, nuk na vërtetohen nga anë të tjera”. Ose i jep Llambit çantën që të vijë te studioja ime dhe Llambi do jepte informacione dhe njëkohësisht do jepej informacioni dhe nga çanta që të vërtetonin se kush gënjente. Unë nuk arrij ta kuptoj. Thonë në një vend në dosje, se si është e mundur që Maksi i beson akoma. Po si mund të mos i besoj unë një piktori, një artisti?! Çfarë bëja unë? Unë nuk thosha, do vras Enver Hoxhën! Të shohësh një libër për Pikason me vizatime, nuk është krim.
Sigurisht që janë implikuar shumë njerëz. Për Edisonin (Gjergon) më ka ardhur keq, nuk e besoja se Edisoni bënte raporte. Unë Edisonin e njihja që ishte natyrë e dobët, por në fakt e doja. Më erdhi keq kur lëshoi ato deklarata dhe u ndamë keq në Spaç. Megjithatë, kjo është një gjë e trishtuar, por ne duhet ta analizojmë sepse ka rrezik që kjo histori të na rikthehet në forma të tjera. Dëgjova vajzën e Llambit, që thotë se “babai im ka qenë burri i mirë dhe Maksi nuk di çfarë flet…”.
Si nuk i vjen turp që nxjerr nga goja këto fjalë?! Mua m’u shkatërrua e gjithë familja, babai vdiq i tmerruar, vëllain e hoqën nga kirurg, që ishte kirurg i shkëlqyer në Vlorë, motra shkoi në çmendinë. Çfarë njerëzish janë këta xhanëm?! Çfarë shpirt krimineli kemi?! Nuk arrij ta kuptoj! Si na ka bërë kështu ajo çadra e Urdoglusë?!
Unë mendoja se kisha shokë, kisha artistë rreth vetes, ata ishin përbindësha. Unë vajta të ngushëlloj Safo Markon, se i kishin arrestuar djalin, ajo më raportonte mua te Sigurimi. Nejse, megjithatë mendoj se nuk kemi ndryshuar shumë, po ata artistë janë, vetëm se tani e bëjnë në forma të tjera. Tani nuk të fusin dot në burg, por bllokojnë Galerinë. Tani kemi vetëm një piktor të madh që e cakton dikushi, të tjerë nuk ekzistojnë. Nejse!
Unë mendoj se në jetë kam bërë në mënyrë instiktive detyrën time dhe detyra ime është të krijoj. Sigurisht që jam shumë i trishtuar për këtë ecuri të jetës sime. Në fshatin Dardhë, më kanë marrë shtëpinë e gjyshit e të babait, aty ka lindur babai, ka lindur vëllai, dardharë. Dhe kush e bëri, do thoni ju? Teodor Laço, Koço Çomi, që Maksi të mos vijë në Dardhë. Më dolën me sëpatë në rrugë dhe kur, tani në 2018-n.
Sot është tjetër gjë, nuk të çojnë te Sigurimi i Shtetit, por të dalin me sëpatë. Shko nëpër gjykata po deshe që të gjesh të drejtën tënde. Kam 15 vjet që shkoj gjykatave dhe asgjë. Mesa duket, kështu do ta mbaroj jetën. Kisha gjithë dëshirën për t’i dhënë këtij vendi, por është e pamundur. Sepse problemi është se artistët tanë janë injorantë dhe kur injoranca bashkohet me ligësinë bëhet një eksploziv. Ti nuk i çan dot. Ne po bëjmë vetingun e gjykatës dhe të gjithë po shohim që nuk ka ngjarë në historinë e njerëzimit që një trupë gjyqësore të jetë e tillë. Të dalë gjykatësi të thotë: “Më hodhën 210 mijë euro në dasmë!” Tjetri thotë: “Fitova 50 mijë euro në bixhoz”. Vetingu për gjyqtarët ishte i vonuar, por unë këmbëngul se duhet bërë vetingu dhe për artistët. Sepse vjedhin pa turp dhe nuk bëhet diferenca e atij që vërtet bën një gjë origjinale dhe me atë që vjedh në mënyrë të sofistikuar. Dhe kështu nuk ecet përpara. Do na duhet një kohë shumë e gjatë që gjërat të ndryshojnë. Unë jam shumë pesimist, pesimizëm që ma ka shtuar dhe kjo çështja e Teatrit. Korrupsion më të pastër se me Teatrin nuk ka, të ndërtosh kulla në këtë mënyrë në mes të kryeqytetit, në mes të Europës, është e turpshme. /KultPlus.com
10 artistë të njohur të peizazhit, anëtarë të shoqatës “Plein Air Albania”, kanë organizuar një ekspozitë virtuale kushtuar Italisë në shenjë solidariteti pas goditjes nga pandemia Covid -19.
Ekspozita e titulluar “Itali të dua” do të sjellë online disa nga veprat e piktorëve të realizuara gjatë vizitave të të artistëve shqiptarë në Itali.
“Kushtuar Italisë sonë të dashur që sot është në situate kaq të vështirë … ‘Në këtë kohë pandemie të COVID-19 që ka pushtuar planetin, solidariteti, kultura, kujdesi janë armët më të mira për t’u përballuar’, shprehen artistët.
Ekspozita “Plein air 2020 Italia , tiamo !-Itali të dua! Organizohet me pjesëmarrjen e Agim Kadillarit, Agron Polovinës, Arsen Kurtit, Buron Kacelit, Nikolin Ivanajt, Pashk Pervathit, Sadik Kasës, Sefedin Stafës, Spiro Panaritit, Vangjo Vasilit dhe Xheneta Kadillari. / KultPlus.com
Në banesën e saj në lagjen Kalabria në Prishtinë, është gjetur sot e vdekur regjisorja e njohur Arzana Kraja. Lajmi për vdekjen i shokoi të gjithë, të pikëlluar thellë janë shprehur edhe miqtë e bashkëpunëtorët e saj, shkruan KultPlus.
Një numër i
madh i artistëve kanë reaguar menjëherë në Facebook duke shprehur dhimbjen e tyre
për këtë humbje.
Më poshtë po
i sjellim reagimet e artistëve:
Eliza Hoxha:
Ah bre Arzanë kaq heret? Ma këpute shpirtin. Ngushëllime familjes, kolegëve e
miqëve.
Aktori Kushtrim
Sheremti: Arzana bre!!!! Pse breeee.
Skenaristja
Getoarbë Molliqi Bojaj: Arzane, s’po muj me e besu! Të pastë dritë shpirti.
Aktori Naser
Rafuna: Ndarja jote prej nesh Arzana Kraja,na shokoj. Fort fort fooort u
mërzita per kolegen, shoqen e pashembullt, njeriun qe kemi punu disa projekte
bashke. Nuk shkaterrohet bota ndryshe perpos me largimin e njerezve te mire
prej nesh. Familjes Kraja ngushellime, komunitetit artistik gjithashtu e edhe
tere popullit sepse ne mesin tonë nuk eshtë një artiste e madhe.
Regjisori Besim
Ugzmajli: Nje lajm teper i tmerrshem, i pabesueshem. Prehu ne paqe Arzana! Ngushellime
familjes Kraja dhe gjithe komunitetit.
Ilir Bokshi:
Lamtumirë Arzanë!
Shkumbin
Istrefi: Na shokove Arzane. U prehshe ne paqe. 😪
Alban Muja: Lajm
trishtues ikja e hershme e Arzanes.
Ngushellime familjes Kraja!
Në muajin korrik, filmi i metrazhit të gjatë “Fusha e Mëllenjave”, me regji të Krajës hapi edicionin e 11-të të PriFest. Kujtojmë se Arzana Kraja është vajza e kryetarit të Akademisë së Shkencave të Arteve të Kosovës, Mehmet Kraja. / KultPlus.com
Sot në të gjitha trevat shqiptare shënohet 106 vjetori i Pavarësisë së Shqipërisë.
Ndërkohë urime të shumta po bëjnë qytetarët shqiptarë. Ndër këto urime vjen edhe një mjaft i veçantë nga artistët e Kosovës.
Ata kanë publikuar një fotografi bashkë me regjisoren Zana Hoxha Krasniqi, teksa kanë bërë shqiponjën (simbolin kombëtarë), ashtu siç e bëri zëvendëskryeministri i Republikës së Kosovës Enver Hoxhaj gjatë mbledhjes së dy qeverive, Kosovë – Shqipëri, shkruan KultPlus.
Për shqiponjën e Enver Hoxhajt, është folur mjaft shumë nëpër rrjete sociale ndërsa artistët zgjodhën ta urojnë 28 Nëntorin, ashtu si Hoxhaj./ KultPlus.com
Ministri i Kulturës, Kujtim Gashi dhe disa artistë të institucioneve të kulturës kanë nisur të festojnë rritjen e pagave.
Artistët dhe MKRS-ja kanë organizuar një koktej në një hotel luksoz në periferi të kryeqytetit të Kosovës, transmeton Koha Ditore.
Në këtë ngjarje do të ndahen edhe mirënjohje për disa punonjës të institucioneve vartëse të MKRS-së të cilët janë pensionuar kohëve të fundit.
Një organizim i tillë ishte planifikuar të bëhej qysh kur Qeveria e Kosovës kishte miratuar Rregulloren nëpërmjet të cilës u janë ngritur pagat krijuesve, performuesve dhe punonjësve të trashëgimisë kulturore. /KultPlus.com
Kryetari i Prizrenit Mytahir Haskuka, ka pritur një delegacion të Shoqatës së Shkrimtarëve dhe Artistëve Shqiptarë “Papa Klementi XI Albani” në Suedi. Takimi u realizua, në kuadër të përgatitjeve që kjo shoqatë po i bën për mbajtjen e Sesionit të gjashtë shkencore në Kompleksin e Lidhjes Shqiptare në Prizren.
Kryetari i Shoqatës, Hysen Ibrahimi e ftoi kryetarin e Prizrenit që të marrë pjesë në punimet e këtij sesioni, që do të mbahet më 25 korrik 2018.
“Deri tani Shoqata e Shkrimtarëve dhe Artistëve Shqiptarë “Papa Klementi Xi Albani” në Suedi ka botuar afër 300 vepra e të autorëve, të cilët jetojnë kryesisht në mërgim, por edhe vepra të autorëve tjerë. Këtë vit Shoqata është përcaktuar të shënojë dy ngjarje të mëdha për kombin shqiptar, që janë edhe ngjarje jubilare: 140 vjet të Lidhjes Shqiptare të Prizrenit dhe 550 vjetorin e vdekjes së Skënderbeut”, tha Hysen Ibrahimi gjatë një prezantimi të punës së shoqatës në takim me kryetarin Haskuka.
Ibrahimi bëri të ditur se përmbajtja e sesionit të gjashtë shkencor do të botohet në numrin e 10-të të Thesarit Kombëtar dhe ajo do të përkthehet edhe në gjuhën suedeze, në mënyrë që edhe suedezet të mësojnë për Lidhjen Shqiptare të Prizrenit dhe formatin e mbajtjes së saj në kohë. Me këtë rast, ai i dhuroi kryetarit të Prizrenit vëllimet e Thesarit Kombëtar të Mërgatës Shqiptare, që përgatitet nga kjo shoqatë.
Ndërkaq, Haskuka premtoi bashkëpunim të drejtpërdrejtë me SHSHASH “Papa Klementi XI Albani”, duke thënë se investimi në njerëzit e kulturës nuk është humbje. “Përkundrazi, nëse investon dhe i përkrah njerëzit e kulturës, ata do të jenë ambasadorë të mirë të këtij vendi kudo në botë, siç kanë bërë shoqata “Papa Klementi XI Albani” dhe shumë shoqata tjera. Investimi në kulturë, kthehet shumëfish”, tha Haskuka. Për këtë arsye, ai bëri të ditur se do të hapë një zyre në komunë që do të bashkëpunojë dhe do të komunikojë drejtpërdrejt me mërgatën. Ndërkohë do të nisë një projekt i ndërmarrësisë për të rinjtë, të cilët do të kenë nevojë për këmbime përvojash edhe nga Suedia.
Pas interesimit të Hysen Ibrahimit rreth investimeve që bën komuna e Prizrenit për fushën e kulturës, kryetari, Mytahir Haskuka, foli për investimet që bëhen por nuk ishte i kënaqur me fondin që ndahet për kulturë dhe sport, e as me mënyrën e financimit të aktiviteteve të kulturës. Me vetëm afër 300 mijë euro financohen projektet e kulturës në Prizren, derisa zhvillohen shumë aktivitete gjatë gjithë vitit. Haskuka tha se do të insistojë që kultura dhe projektet e kësaj fushe të mbështeten përmes subvencioneve, për të shmangur mangësitë në organizime dhe cilësinë e dobët që ofrohen. Ai veçoi festivalin “Zambaku i Prizrenit”, për të cilin tha se i ka rënë cilësia, për shkak të mënyrës së financimit të festivalit.
Haskuka u shpreh i hapur për bashkëpunim me SHSHASH “Papa Klementi XI Albani” dhe mërgimtarët që veprojnë në Suedi. Ai kishte një përvojë të mirë nga një vizitë që kishte më herët në Suedi dhe bëri të ditur se do ta kenë një konsulencë mbështetëse për muzetë e Prizrenit, nga një ekspert suedez i muzeve. Ndërkaq, falenderoi Hysen Ibrahimin, dhe SHSHASH “Papa Klementi XI Albani” për mbajtjen e sesionit shkencor në Prizren. “Prej prillit të këtij viti kemi pasur disa aktivitete që janë mbajtur për Lidhjen e Prizrenit. Ky i shoqatës tuaj do t’iu shtohet atyre ngjarjeve si ndër më të mëdhatë që do të jenë në qytetin tonë”, tha Haskuka.
Më pas, delegacioni i SHSHASH “Papa Klementi XI Albani”, vizitoi edhe Kompleksin e Lidhjes së Prizrenit, për të parë përgatitjen e nevojshme për mbajtjen e sesionit të gjashtë shkencor. Hysen Ibrahimi tha se tashmë është çdo gjë gati për të shënuar 140 vjetorin e Lidhjes Shqiptare të Prizrenit, si një aktivitet qendror i Shoqatës së Shkrimtarëve dhe Artistëve Shqiptarë “Papa Klementi XI Albani” për këtë vit. /KultPlus.com
65 artistë të njohur mes të cilëve shumica aktorë dhe regjisorë të Teatrit Kombëtar kanë mbështetur në një letër të hapur ndërtimin e Teatrit të ri Kombëtar.
Letra thekson nevojën për një ndërtesë dinjitoze të teatrit dhe respektimin e një procesi transparent që ruan pronën e Teatrit Kombëtar në funksion të tij.
Artistët i bëjnë thirrje forcave politike të qëndrojnë larg këtij procesi dhe të mos politizojnë betejat e artistëve. Ministria Mirela Kumbaro ka përshëndetur letrën e tyre përmes një postimi në rrjetin social Facebook.
“Falenderim me përulje per te 65 artistet dhe figurat e nderuara qe nga i madhi Pirro Mani, shume te dashurit Fatos e Drita Haxhiraj, te nderuarit Pellumb Kulla, Viktor Zhusti, Gezim Kame, Josif Papagjoni, Luftar Paja, Bashkim Hoxja dhe te 65 artisteve, deri te me te rinjte po jo me pak te rendesishem per te sotmen e te ardhmen, te cilët sot mendojne e mbeshtesin bashkepunimin per Teatrine se Ardhmes”, ka shkruar ajo./ KultPlus.com
Artistët protestuan mbrëmë në oborrin e Teatrit Kombëtar, kundër projektit të qeverisë që parashikon prishjen e godinës aktuale dhe ndërtimin e një teatri të ri, duke iu bashkangjitur disa kulla shumëkatëshe.
Protesta ishte konceptuar me pjesë recitimesh, muzikë dhe shfaqje teatrale, veç fjalimeve të zakonshme, ku shprehej kundërshtia e artistëve dhe qytetarëve ndaj projektit qeveritar.
Regjisori Robert Budina duke iu drejtuar të pranishmëve tha se në rast se qeveria nuk do ketë tërheqje nga projektligji për ndërtimin në këtë zonë, ata do të intensifikojnë protestat pranë Kuvendit dhe Ministrisë së Kulturës dhe kanë paralajmëruar për protesta shumë më të forta.
“Në rast se sot qytetarët po kalojnë një kohë mjaft të bukur këtu tani duke dëgjuar këngë patriotike, qytetare, këngë nga të gjitha trevat e Shqipërisë, edhe nga Kosova, duke dëgjuar recitime, duke parë dhe performanca, ky është mesazhi që ata po marrin, sepse e gjitha kjo po bëhet që kjo hapësirë të mbrohet.
Për të gjitha komentet që janë bërë pas dëgjesës së ka pasur kryetari i Bashkisë me artistët, mesazhi më i fundit është ky: Nuk mund të quhen më dëgjesa publike me qytetarë apo artistë në rast se zhvillohen në kullat e oligarkëve, ashtu sikurse pretendojnë artistët se ishte dëgjesa e fundit.
Një koment tjetër që kanë bërë në këtë skenë ishte se nuk janë të përçarë, nuk kanë përdorur gjuhë raciste ndaj kolegëve që mendojnë ndryshe, por kanë mbajtur një qëndrim të prerë ndaj atyre personave që nuk kanë qenë koherentë gjatë gjithë kësaj periudhe të protestave në Teatrin Kombëtar, duke qenë protestues në fillim dhe duke ndryshuar qëndrimin gjatë rrugës”.
Ndër ata që folën ishte dhe regjisori Robert Budina, i cili theksi se nëse qeveria nuk i dëgjon artistët, ata do gjejnë zgjidhje më të forta për të arritur qëllimin e tyre në mbrojtje të Teatrit Kombëtar. “Ne do të dalim në protesta derisa qeveria të tërhiqet”, vijoi ai./ KultPlus.com
Skena e vogël e Teatrit Kombëtar të Kosovës, mbrëmë, ka qenë e rrethuar me vepra artistike të realizuar nga artistë të ndryshme. Të gjitha këto vepra, të ekspozuara, më pas janë shitur përmes ankandit i cili është realizuar nga vet artistët. Të ardhurat nga shitja e këtyre punimeve i janë dedikuar shërimit të regjisorit Bekim Lumi.
Aktivitet të tilla për të ndihmuar regjisorin Bekim Lumi, janë duke u realizuar ditëve të fundit, në mënyra të ndryshme. Dikush më këngë, disa me poezi, të tjerë me shfaqje dhe disa me dhurimin e punimeve të tyre po ndihmojnë në mbledhjen e parave, për të ndihmuar në shpenzimet e shërimit të regjisorit, shkruan KultPlus.
Aktori Fatmir Spahiu i cili është edhe njëri prej artistëve që ka marrë këtë iniciativë, e që moderoi këtë ankand, u shpreh i lumtur që artistë kanë dhuruar punime e tyre për të ndihmuar regjisorin Bekim Lumi.
“Ky është vetëm njëri prej angazhimeve në vazhdën e aktiviteteve. Synimi jonë është që të mbërrijmë tragetin e paracaktuar. Kjo mbrëmje ishte më ndryshe sepse unë isha vetëm njëri nga ata që dhamë një kontribut të vogël kurse pamë shumë artistë që dhuruan veprën e tyre diçka që është shumë e vështirë, të dhurosh një punë, ide kreacion tëndin, një pjesë të shpirtit për një kauzë të tillë. Prandaj unë jam shumë i lumtur edhe për ata edhe për vetën që po mundemi me provu me i ndihmu një miku tonë i cili ka nevojë, sepse nesër secili nga ne mund të jetë në një pozitë të tillë”, tha ai për KultPlus.
Tutje ai theksoi se ky është një solidarizim i artistëve që nuk është parë më herët. “Kjo më entuziazmon pa masë sepse nuk e kam besuar që mundemi më u sensibilizu kështu. Të ju them sinqerisht, kam menduar që t’i bësh të gjithë këta njerëz bashkë për një kauzë të tillë është e pamundur por më ka dalë ndryshe dhe jam shumë i befasuar për të mirë”, theksoi ai.
Nga ky ankand i pikturave, skulptura, grafika dhe punimeve të tjera artistike e po ashtu nga shitja e librit “Shfaqja e fundit e Marie Gjonit”, u grumbulluan 3 mijë e 600 euro për regjisorin Bekim Lumi. Autori i dramës “Shfaqja e fundit e Marie Gjonit”, Veton Surroi u shpreh sa ai ka dashur që të ndihmojë në këtë aktivitet pasi që regjisori Bekim Lumi është person i cili e meriton një kujdes të tillë.
“Libri sapo ka dalë nga shtypshkronja dhe kam vendosur që 200 kopje të ia dhurojë këtij aktivitetit për Bekim Lumin. Ka pasur simbolikën e vet pasi që është pjesë e një ambienti kulturor artistik i cili kontribuon dhe unë deshta që më këtë të kontribuojë. Kjo ndjenja e solidariteti që po krijohet është e mrekullueshme. Vet Bekimi si person e meriton këtë kujdes por fakti që po zgjohet solidariteti i artistëve ka domethënie shumë të madhe”, u shpreh ai për KultPlus.
Paratë e mbledhura nga kjo natë do të shkojnë në ndihmë për regjisorin dhe profesorin Bekim Lumi, një artist që për vite me radhë ka dhënë kontribut të jashtëzakonshëm për skenën artistike dhe teatrale si dhe edukimin e studentëve dhe artistëve të rinj./KultPlus.com
Aktivitetet për ta ndihmuar regjisorin Bekim Lumi, tashmë përveç Prishtinës po mbahen edhe në qytete të tjera të Kosovës. Një aktivitet i tillë po organizohet gjatë kësaj jave në Ferizaj, shkruan KultPlus.
Shoqata e Artistëve Figurativ “Zef Kolombi” në Ferizaj, këto ditë ka organizuar aktivitetin bamirës “Artistët për Artistin”, me qëllim ofrimin e ndihmës ndaj Regjisorit Bekim Lumi, i cili po përballet më sëmundjen e rëndë të kancerit tash e dy vite.
Të gjithë ata që duan të blejnë piktura, fotografi, libra dhe ëmbëlsira këtë mund ta bëjnë deri në fund të javës në Sheshin e Komunës së Ferizajit. Të ardhurat do të kontribuojnë në shërimin e regjisorit Lumi.
“Pasuroni dhe zbukuroni shtëpitë dhe ambientet tuaja, me çmime të lira dhe me qëllim shumë humanitar”, shkruhet në njoftimin e këtij aktiviteti.
Aktiviteti do të zgjasë deri ditën e Premte të kësaj jave, nga ora 12:00 deri në orën 18:00./ KultPlus.com
Nën moton Për Bekimin, mbrëmë në Hamam Bar Prishtina u mbajt një mbrëmje artistike me muzikë dhe stand up, nga artistët që kanë marrë iniciativën për të ndihmuar me vlerë monetare regjisorin e mirënjohur Bekim Lumi, për shërim nga kanceri, shkruan KultPlus.
Edona Reshitaj, Visar Kuçi, Art Lokaj, Fatmir Spahiu- Bufi, Dardan Islami, Ernest Zymberi, Kushtrim Qerimi e mysafirë të tjerë u ngjitën në skenë për të bërë më atraktive këtë natë ku ishin mbledhur shumë artistë, miq e dashamirë të regjisorit Lumi.
Kjo mbrëmje mblodhi gjithsej 2340 euro për Bekim Lumin ndërsa kjo mbrëmje është në vazhdën e aktiviteteve Për Bekimin.
Ndërkohë javën që vjen do të mbahen edhe disa ngjarje tjera të cilat do të jenë me pagesë të volitshme por që këto shuma të mbledhura do të mund të krjiojnë një vlerë që do t’i dalë në ndihmë Bekimit./ KultPlus.com
