Etiketë: Chopin Piano Fest

Mjeshtri i madh stilistik i romantizmit, Giovanni Bellucci, përmbyll edicionin e 14-të të ‘Chopin Piano Fest’

Posted on by Kult Plus

Vjollca Duraku

Me një koncert të mrekullueshëm të dhuruar nga pianisti italian me famë botërore, Giovanni Bellucci, të dielën mbrëma, është shënuar përmbyllja e edicionit të 14-të të festivalit “Chopin Piano Fest”, i cili për një muaj radhazi në skenën e Prishtinës solli artistë të shquar vendorë dhe ndërkombëtar, shkruan KultPlus.

Një lojë aq e rrallë si  kjo e artistit Bellucci që përkundër kushteve aspak të përshtatshme në sallën interpretuese nga temperaturat e larta si dhe nga kushtet teknike, do të mbahet në mend gjatë nga publiku që kishte zënë çdo cep të Amfiteatrit të Bibliotekës Universitare.

“Nuk ka dhjetë pianistë si ai në botë; ai na kthen në epokën e artë të pianos”- thuhet në një kritikë të realizuar për artistin pasi ai kishte arritur kulmin nga një seri shumë e gjatë suksesesh në skenat ndërkombëtare. Giovanni Belluci ka interpretuar në auditoret, teatrot tradicionale dhe festivalet më të famshme në tërë botën.

Më i veçanti interpretim i tij konsiderohet paraqitja në “Hollywood Bowl” ku pati debutimin e tij amerikan para 18 mijë spektatorësh. Ai ka interpretuar edhe në “Sallën e Artë të Musikverein- Vjenë”, “Shoqërinë e Arteve Performuese të Uashingtinit”, “Sallën e Koncerteve Svetlanov në Moskë”, “Shtëpinë e Operës në Sidnei”  etj.

Kapaciteti i madh artistik i tij, u pa nga afër edhe nga publiku i Kosovës, i cili në shenjë mirënjohjeje ngritej në këmbë pothuajse pas çdo pike interpretuese të tij. Një pamje shumë e qetë e artistit i rrinte shumë bukur një publiku të qetë po ashtu, i cili me shumë kujdes vërente çdo lëvizje mjeshtërore të tij. Lëvizjet e hatashme të gishtrinjëve, dhuronin tinguj aq të rrallë nga ku edhe shpalosej teknika e tij stilistike.

Ishin veprat “Fantasia e Fuga sul nome B-A-C-H”, “Leggenda n.2: San Francesco di”, “Paola che cammina sulle onde” nga F. Liszt që e hapën koncertin e 16-të të Chopin Piano Fest, dhe të fundit për këtë edicion, vepra këto të cilat konsiderohen më të vështirat në literaturën pianistike nga autori në fjalë.

Koncerti më tej vazhdoi me tinguj magjik me veprat: “On the 100 anniversary of the death of F. Busoni”, “Elegia n.4: Turandots Frauengemach (llgineceo di Turandot)” nga F. Busoni “Apres une lecture de Dante: Fantasia quasi Sonata. Dal ciclo Années de pelerinage, Deuxiéme annèe, Italie” nga F.Liszt, “Ballata n.1 in g- mol op. 23” nga F.Chopin, “Tristano e Isotta: Scena finale (isoldens Liebestod- La morte d’amore di Isotta;  trascrizone di F. Listzt)” nga R. Wagner, “Le mal du pays. Dal ciclo Annèes de pèlerinage- Premiere annèe- Suisse”, “Rapsodia Ungherese n. 12, in cis-mol” nga Liszt dhe “Polonaise in As-dur op.53 “Eroica” nga F. Chopin.

Ky edicion i festivalit, për herë të parë dha edhe çmimin special në garën e artistëve të rinjë, të cilin çmim e rrëmbeu Eleonida Elezaj. Ndërsa në shenjë mirënjohjeje për punën e gazetarëve që për një muaj i ndoqën koncertet e “Chopin Piano Fest” u ndanë mirënjohje për mediumet: KultPlus, KTV, dhe RTK. Në këtë rast nuk u la anash edhe Komuna e Prishtinës.

Krejt në fund të koncertit në një prononcim për KultPlus,pianistja Alberta Troni, koncertin e quajti të jashtëzakonshëm, i cili sipas saj në vete ngërthente filozofi të thellë pianistike.

“Nata e sotme ka qenë një mrekulli në vete duke pasur parasysh që patëm një pianist brilant në skenë, i cili vjen për herë të tretë në Kosovë. Pjesa e parë ishte me veprat më kapitale dhe më të vështira të Franc Liszt që posedon literatura pianistike. Ai tregoi një predispozitë fantastike, imagjinare si pianist shumë i veçantë. Është një dimension tjetër si pianist. Ai komunikon me botën artistike me filozofinë e thellë të muzikës pianistike. Është shumë i veçantë dhe patëm kënaqësi që e dëgjuam. Edhe publiku ishte i qetë dhe ai e kishte atë qetësinë maksimale që të prezeantoj materialin e tij pianistik” është shprehur pianistja Troni.

Ajo më tej foli edhe për festivalin në përgjithësi, nga ku tha se secila mbrëmje kishte veçantinë dhe sharmin e vet.

“Festivali ka pasur laramani të artistëve dhe të repertorëve të ndryshëm, ka pasur muzikë vokale, muzikë pianistike, ansamble me shumë mbrëmje të bukura secila me atë veçantinë e vet, me vulën e vet të secilit shtet. Ishte me të vërtetë kënaqësi” është shprehur Troni.

Ndërsa artisti Giovanni Bellucci i cili në skenën vendore performoi për herë të tretë tha se në këtë koncet të dominuar nga fytyra të reja programi ishte komplet ndryshe në përbërje me vepra të Chopin dhe Liszt.

“Janë pianistë të mëdhenj të historisë muzikore. Chopin e admironte atë, ishin miq të afërt por pas disa ngjarjeve ata u shkëputën. Ndoshta sepse Liszt ishte personalitet shumë më ndryshe dhe Chopin ishte shumë më i ndjeshëm, por edhe karakter më i hapur. Muzika e tyre është krejt ndryshe, ndonëse eksplorojnë virtuozitet në piano. Ishte shumë interesante për mua t’i bëjë bashkë të dy në program”, ka thënë Bellucci.

Ndërsa drejtoresha artistike, Lejla Pula, artistin Bellucci e quajti mjeshtër të madh stilistik të veprave të romantizmit.

“Ishte vërtetë një koncert me vepra bravoroze, teknikisht, muzikalisht, me një imazh krejtësisht të veçantë tingullor të cilin e ka sjellë Giovanni Bellucci. Është shumë i veçantë në interpretimin e Chopin-it, Listz-it, Wagner-it, është mjeshtër stilistik i veprave të romantizmimit. Kërkesat muzikore e teknike ishin të jashtëzakonshme dhe unë jam shumë falënderuese që ky artist na nderoi me ardhjen e tij, ku së bashku patëm rastin të ndjekim këtë performancë të mrekullueshme” është shprehur drejtoresha Lejla Pula.

Ndërsa sa i përketë festivalit “ Chopin…’ ajo tha se është ndarë e kënaqur me artistët, për më tepër edhe nga performaca e atyre artistëve që vijnë nga shtete që ende nuk e kanë njohur shtetin e Kosovës.

“Ne kemi qenë shumë të kënaqur sepse përgjatë 16-të koncerteve kemi pasur audiencë të shumtë dhe interesim shumë të madh. Vet përbërja dhe artistët të cilët kanë ardhur kanë qenë të atij niveli sa që njerëzit mezi kanë pritur që të shijojnë performancën e tyre në skenën tonë. Përveç këtyre artistëve të ardhur nga e gjithë bota si nga Italia, Gjermania, Lituania, Londra, Rumunia, Shqipëria ne si politikë kulturore u kujdesemëm që të vijnë edhe artistë  nga vendet që nuk e njohin shtetin e Kosovës si: Sllovakia, Tajlanda, Rumunia”, ka thënë drejtoresha duke potencuar se një pjesë e madhe e artistëve e kanë vlerësuar lartë kapacitetin e studentëve të Drejtimit të Muzikës.

“Ishte kënaqësi e madhe që ata artistë janë ndarë posaqërisht të kënaqur me audiencën tonë, me një audiencë të re e cila din të shpërblej, e cila duartroket, është shumë e vëmendshme dhe e cila e shijon vërtetë performancën. Ata janë ndarë shumë të befasuar. Gjatë masterklasave që i kemi mbajtur shumica prej tyre e kanë vlerësuar shumë lartë nivelin e studentëve tonë”, ka thënë drejtoresha Lejla Pula.

Ndërsa Kryetari i Prishtinës, Përparim Rama duke parë nga afër kushtet jo të mira të sallës, tha se janë duke e bërë të pamundurën që sa më shpejtë të funksionalizojnë sallën koncertale në ndërtesën e “Gërmisë”.

“Ne po punojmë me hapa të mëdhenj me gjithçka kemi në dorë që ta transformojmë hapësirën e ndërtesës së “Gërmisë” në “Muze të Artit” dhe në sallë koncertale. Ju “lajmëroj sot që do të hapet ish-ndërtesa e Gërmisë në javën e ardhshme, ngase tani është në proces transformimi. Ky objekt do të jetë i hapur për qytetarët tanë për turistët si një “”Galeri e Artit””, shpreh kryetari Rama.

Kryetari Rama po ashtu i falënderoi edhe drejtoreshat e Festivalit “Chopin Piano Fest”, Lejla Pulën dhe Besa Luzhën për vizionin e tyre, i cili Prishtinën tashmë e ka shëndrruar në qendër të shprehjes artistike.

“Si kryetar i Prishtinës, sot ndodhem këtu jo vetëm si zyrtar, por si një bashkëqytetar i mahnitur nga magjia që krijohet edhe nga shpirtrat artistik të qytetit tonë dhe nga të gjithë ata që na vizitojnë nga vende të ndryshme. Ky festival ka qenë edhe mbetet si një simfoni e madhështisë me muzicient virtuoz me famë botërore, duke sjell këtu artistë prej skenave të ndryshme botërore, ku sonte kemi edhe Govanni Bellucci-n. Ne jemi dëshmitarë të përkushtimit të “Chopin Piano Fest” dhe të përpjekjeve të tyre të paluajtshme për të krijuar këtë kryevepër të shkëmbimit kulturor”, u shpreh kryetari Rama.

Edicioni i 14-të i Festivali “Chopin Piano Fest” i cili u realizua në datat 9 maj- 9 qershor, përveç Giovanni Belluccit në skenë solli edhe: Artem Yasynskyy, Saran Suebsantiëongse, Alberta Troni, Kosti Deti, Frabrizio Boso Quartet, Catalina Butccaru, Lucy Hall, Philipp Scheucher, Konstantin Manaev, François Dumont, Iliriana Gjoni, Milica Laloseviq, Petrit Çeku Quartet, Sofya Gulak, Ulpiana Alijaj, Zana Bdivuku-Basha, Nezahate Shala- Zeka, Denita Dedushaj, Nita & Malbora Krajku, Besart Shala, Dardan Gjinolli dhe shumë nxënës të pianos./ KultPlus.com

Mbrëmje operistike në ‘Chopin Piano Fest’, Ulpiana Alijaj dhe Peter Valentovic sjellin madhështinë e veprave monumentale operistike

Posted on by Kult Plus

 Flonja Haxhaj

Në mbrëmjen e 15-të të ‘Chopin Piano Fest’, publiku pati rastin të shijojë magjinë e disa nga kryeveprave të muzikës operistike botërore, interpretuar nga sopranoja Ulpiana Alijaj dhe pianisti italian Peter Valentovic, shkruan KultPlus.

Mbrëmja magjike filloi me “Non si da follia maggiore ‘Il Turco in Talia’ të Rossinit duke vazhduar me LA boheme’ të Puccinit, përformanca këto që morën vëmendjen e audiencës qysh në fillim.

Koncerti më tutje filloi me veprat e Lehar, Jezek, Mozart, Dvorak e Rushiti. Ndërkaq, pjesa kulmore e koncertit ishte performanca solo e Valentovic i cili improvizoi në piano mbi temën e Rachmaninoff.

Për gati dy orë, dyshja Aliaj e Valentovic, i dhuruan publikut një shfaqje të mahnitshme e plot virtuozitet.

Pas koncertit, për KultPlus foli pianisti Peter Valentovic, i cili shprehet i lumtur për prezencën e tij në këtë festival dhe për ngrohtësinë që mori nga publiku.

“Jam shumë i lumtur që mora pjesë në ‘Chopin Piano Fest’, në këtë festival të mrekullueshëm. Njerëzit janë të mrekullueshëm, organizimi po ashtu. Ne patëm një ndihmë nga ambasada e Sllovakisë këtu, për të cilën ne jemi shumë mirënjohës. Jam shumë i lumtur që erdha këtu dhe solla muzikë për publikun e Kosovës.Publiku këtu ishte shumë i ngrohtë, pati shumë duartrokitje dhe kjo më bëri akoma më të lumtur”, tha Valentoviç për KultPlus.

Ndërkaq sopranoja Ulpiana Alijaj vlerësoi paraqitjen që patën në këtë koncert e në veçanti, bashkëpunimin me Valentovic.

“Kam qenë vërtet e emocionuar sepse besoj se u paraqitëm në një program shumë impenjativ dhe pjesa më e madhe ishte premierë për skenën kosovare, kështu që ishte një përgjegjësi shumë e madhe edhe për vetë faktin që ‘Chopin Piano Fest’ tashmë gëzon një vulë të garancisë dhe besnikërisë artistike, kështu që për ne ishte një përgjegjësi e dyfishtë. Bashkëpunimi me maestron Valentovic për mua si eksperiencë vjen si e disata herë për shkak se ne kemi një njohje të hershme profesionale, prandaj ka qenë një kënaqësi shumë e madhe fakti që ai e mirëpriti ftesën në Prishtinë”, u shpreh Alijaj.

Lejla Pula, drejtoreshë artistike e ‘Chopin Piano Fest’, tha se ndjehet e lumtur që kjo dyshe u paraqit në natën që ishte e rezervuar për koncert operistik.

“Sonte ishim prezentë në mbrëmjen e 15-të të ‘Chopin Piano Fest’ dhe vërtet u kënaqëm me mbrëmjen operistike me Ulpiana Aliaj në përcjellje me Petet Valentovic nga Sllovakia, një pianist i cili është edhe dirigjent edhe një shoqërues i kantos fantastik. Unë kam vërtet dëshirë që Opera e Kosovës edhe në të ardhmen ta angazhojë si dirigjent të operas sepse është një rang botëror i dirigjentit. Ndërkaq Ulpiana Aliaj shpalosi për herë të parë gjithë paletën e virtuozitetit edhe tingullit të saj, një timbër fantastik me të cilin mahniti publikun sonte me interpretimin e saj”, theksoi Pula për KultPlus.

Ndërkaq, sonte, më 9 qershor, do të mbahet ceremonia përmbyllëse e ‘Chopin Piano Fest’ ku do të përformojë pianisti i njohur italian Giovanni Bellucci./KultPlus.com

Artistët vendorë sjellin vepra premierë në natën e 12-të të ‘Chopin Piano Fest’

Posted on by Kult Plus

Flonja Haxhaj

Në koncertin e 12-të të ‘Chopin Piano Fest’ publiku pati mundësinë të dëgjojë vepra të stileve të ndryshme dhe nga instrumente të ndryshme në mbrëmjen e dedikuar për solistët e Kosovës, shkruan KultPlus.

Mbrëmja filloi me duo në piano nga Zana Badivuku – Basha dhe Nezahate Shala – Zeka, të cilat sollën atmosferë melankolie nën tingujt e kryeveprave të Chaminde, Piperku dhe Bizet.

Më pas, treshja Denita Dedushaj në Piano, Nita Krajku në flaut dhe Malbora Krajku në Klarinet, sollën madhështinë e veprës ‘Petite Suite’ nga Debussy.

E për fund, në skenë dolën Dardan Gjinolli në saksofon dhe Besart Shala në piano, të  cilët dhuruan momente të paharrueshme teksa interpretuan ‘Scaramouche’ të Milhaud, ‘Valse Vanite’ të Wiedoeft dhe ‘Peuena Czarda’ të Iturralde.

Pas koncertit ku u paraqit në bashkëpunim me pianisten Zana Badivuku – Basha, për KultPlus foli pianistja Nezihate Shala – Zeka, e cila përveç që vlerësoi koncertin, falënderoi edhe organizatoret për ftesën.

“Në koncertin e sotëm u ndjeva mjaft mirë, sidomos kur kemi bashkëpunime me kolegët, pra është një kënaqësi tjetër sepse mund ta ndajmë përvojnë bashkë. Veprat i kemi përzgjedhur vetë paraprakisht. Falënderojmë ‘Chopin Piano Fest’ që na kanë ftuar e sonte kaluam verte t shumë bukur”, tha Shala – Zeka.

Ndërkaq, Dardan Gjinolli i cili së bashku me pianistin Besart Shala, përmbyllën këtë koncert, u shpreh se ishte një mbrëmje ku u luajtën vepra shmë të këndshme dhe të dashura për publikun.

“Falënderoj organizatorët e ‘Chopin Piano Fest’ që na e kanë dhënë mundësinë që të vijmë dhe të luajmë vepra të cilat janë shumë të mira dhe të këndshme për veshin. Publiku ka pasur rastin që të dëgjojë një repertor shumë të mirë ku është vepra e parë ‘Scaramouche’, ‘Valse Vanite’ dhe ‘Pequena Czarda’”, u shpreh Gjinolli për KultPlus.

Për KultPlus foli edhe flautistja Nita Krajku, e cila tha se në këtë koncert po ashtu u dha për herë të parë vepra ‘Suite’ e Debussy, e përshtatur për flaut, klarinet dhe piano.

“Kemi luajtur veprën ‘’Suite’ nga Debussy që është një vepër për dy piano, por që në këtë rast ishte e aranzhuar për flaut, klarinet dhe piano, është një premierë që po luhet në Kosovë, nuk është luajtur më herët”, theksoi Krajku për KultPlus.

Ndërkaq, të dielen, më 9 qershor do  të mbahet ceremonia përmbyllëse e ‘Chopin Piano Fest’ ku do të performojë pianisti italian Giovanni Bellucci./KultPlus.com

Pianistja Sofya Gulyak sjell magjinë e kryeveprave botërore në natën e dhjetë të ‘Chopin Piano Fest’

Posted on by Kult Plus

Flonja Haxhaj

Në mbrëmjen e dhjetë të ‘Chopin Piano Fest Prishtina’, publiku pati mundësinë të mirëpriste pianisten e përmasave të jashtëzakonshme, Sofya Gulyak. Me një program të përzgjedhur që përfshinte kryevepra të literaturës pianistike botërore, Gulyak dha një emocion të jashtëzakonshëm përpara publikut në Prishtinë, shkruan KultPlus.

Me një mjeshtëri që e karakterizon, Sofya Gulyak interpretoi veprat ‘Chaconne’ dhe ‘Nun Komm, der Heiden Heiland BËV659’  nga J.S.Bach – Busoni, ‘Prelude’ nga C.Franck, ‘Prelude’, ‘Rondo a la Mazur Op.5’ dhe ‘Liszt. Meine Freuden, Maiden’s Ëish’ nga F.Chopin.

Sofya Gulyak, me origjinë nga Britania e Madhe dhe Lituania, është një artiste e njohur ndërkombëtarisht. Ajo është laureate e çmimit të parë dhe medaljes së artë të Princeshës Mary në Konkursin Ndërkombëtar të Pianos të Gjashtëmbëdhjetë të Leeds, duke u bërë gruaja e parë në historinë e konkursit që fitoi këtë titull të artë. Kjo arritje madhështore ishte vetëm fillimi i një karriere të shkëlqyer që e ka parë atë të performojë në skena të ndryshme në mbarë botën, duke marrë gjithnjë vlerësime të larta nga kritika.

Pas koncertit që magjepsi audiencën në ‘Chopin Piano Fest’, për KultPlus foli vetë artistja Sofya Gulyak e cila tha se ndjehet mirënjohëse për ftesën që mori dhe mikpritjen që iu bë në Kosovë.

“Audienca është e merekullueshme, shumë e ngrohtë, njerëzit janë shumë të dashur dhe vërtet e kam shijuar prezencën time këtu. Më pëlqejnë të kombinoj vepra dhe të zbuloj pak në programin ti, si për shembull Busonin, kam dashur t’i përfshij disa nga transkriptet e tij”, tha ajo.

Gulyak më tutje foli edhe për bashkëpunimin me ‘Chopin Piano Fest’ duke thënë se ishte surprizuese që në momentin që u kontaktua.

“Bashkëpunimi me ‘Chopin Piano Fest’ filloi si një suprizë, unë u kontaktova  dhe isha e surprizuar që do të vija në Kosovë, në një vend që nuk kisha qenë më herë, prandaj shumë e lumtur që e vizitova dhe performova para publikut këtu”, përfundoi Gulyak.

Lejla Pula, drejtoreshë artistike e ‘Chopin Piano Fest Prishtina’ u shpreh shumë e lumtur që në natën e dhjetë të këtij festivali, publiku pati mundësinë që të dëgjojë një pianist të përmasave të jashtëzkonshme.

“Sonte vërtet kemi pasur një pianiste e artiste te përmasave të jashtëzakonshme. Unë kam qenë shmë e lumtur që kam biseduar me të dhe ajo ka pranuar ftesën të vijë këtu, as nuk ka pyetur çfarë salle e piano është. Thjesht është një artiste e vërtetë dhe njeri i veçantë. Ajo jep në tri anë të botës mësim, është një pianoste e jashtëzakonshme, një pianiste e kulmit të perfeksionizmit të pianizmit botëror. E kemi pasur sot një program që nuk e dëgjojmë shpesh, vepra kapitale, monumentale të literaturës pianistike, siç ishte Bach e Chopin“, u shpreh Pula, e cila mes tjerash tha se ndjehet e lumtur që Sofya Gulyak, me mjeshtërinë e saj, magjepsi audiencën në ‘Chopin Piano Fest’.

Ndërkaq, ‘Chopin Piano Fest Prishtina’ do të zgjasë deri më 9 qershor, e përgjatë kësaj periudhe, publiku do të ketë mundësinë të shijojë perlat e muzikës klasike, të sjella nga artistë vendorë e ndërkombëtarë./KultPlus.com

Me vepra shqiptare e malazeze ‘Chopin Piano Fest’ shënon mbylljen e javës kulturore të Malit të Zi në Prishtinë

Posted on by Kult Plus

Vjollca Duraku

Ilirjana Gjoni dhe Milica Laloseviq ishin protagonistet e koncetit të tetë në “Chopin Piano Fest”, të cilat njëkohësisht janë edhe artistet e para që e prezantuan shtetin e Malit të Zi në historinë e Festivalit më të madh të muzikës klasike në vend, shkruan KultPlus.

Ngjarja si zakonisht u zhvillua në Amfiteatrin e Bibliotekës Universitare. Me këngë popullore malazeze u hap programi i natës së mbrëmshme nga pianistja Ilirjana Gjoni, e cila është fituese e shumëfishtë në garat kombëtare në Mal të Zi, si dhe sopranoja Milica Laloseviq, po ashtu e shpallur fituese në festivale të ndryshme.

Në nderim të vet Festivalit pianistja Gjoni kishte përzgjedhur edhe veprën e F. Chopin “ Nocuturne op.27 nr 2, D- dur”, “Ballade nr.1, op 23, g-mol” duke dhuruar tinguj aq të bukur në sallë, ku ndër personalitete të tjera të pranishëm që me shumë kënaqësi e  ndoqën ngjarjen ishin edhe kryeministri Albin Kurti dhe tenori me famë botërore Ramë Lahaj.

Ngjarjen po ashtu e shijoi shumë edhe publiku që edhe kësaj radhe ishte i shumtë në numër, përderisa pikën kulmore të koncertit e shënoi vepra “Skënderbeu” nga Çesk Zadeja, duke dhuruar tinguj që në veshin e audiencës identifikoheshin si shqip.

Veprat tjera me të cilat u zhvillua programi ishin: “Balada e ullirit” nga S. Gaceviq, Poljem se vija”,  “Bulbul mi poje”, “Duso, Mare”, “Vrani se konji igraju”. “O mio baabbino caro”, “Lauretta- Gianni Schicchi” nga G.Puccini, “Gypsy melodies: Op 55: 4. Andante con moto” nga A. Dvorak, “ Non ti scordar di me” nga E. De Curtis, “ Suite bergamasque- Prelude, Menuet, Claire de Lune, Passepied nga C. Debussy.

Krej në fund të koncertit pianistja Gjoni të jashtëzakonshëm e quajti interpretimin e natës së mbrëmshme, i cili e kishte rikthyer në Kosovë pas 15 vitesh.

“Ishte kënaqësi e jashtëzakonshme të jem në Prishtinë përsëri pas një periudhe 15 vjeçare, që kur jam shkëputur nga studimet në Gjermani dhe Belgjikë. Unë si ulqinake normalisht në Prishtinë ndihem si në shtëpinë time. Ishte kënaqësi e veçantë të luaj si pianiste soliste. Edhe me sopranon Lalosheviq kemi luajtur një program të larmishëm, ku për mua ishte një mundësi interesante që të njihesha me repertorin me motive malazeze sepse nuk e kam luajtur më parë. Shumë faleminderit të gjithë organizatorëve, jemi ndjerë me të vërtetë shumë mirë dhe jemi kënaqur sonte”, ka thënë Gjoni.

Pianistja Gjoni më tej komentoi edhe veprën “ Skënderbeu” nga Çesk Zadeja, të cilën para pak kohe kishte pasur rastin ta luajtur në Bruksel.

“Veprën e “Skënderbeut” nga Çesk Zadeja e kam luajur para pak ditësh në Bruksel, në Ditën e Evropës, më 9 maj. Kam pasur nderin të përfaqësoj kompozitorët e Ballkanit Perëndimor. Dëshira ime ishte që “Skënderbeun” ta vendosja te institucionet Evropiane. Vepra u përcoll vërtetë shumë mirë, mos të them që publiku duke qenë se kam luajtur vepra nga të gjitha shtetet e Ballkanit Perëndimor, e ndiente një lidhje më të veçantë me Çesk Zadenë”, ka thënë më tej pianistja Gjoni.

Kurse sopranoja Milica Laloseviq ka thënë koncertin në “Chopin Piano Fest” do ta kujtoj si një përvojë mjaft të bukur.  

“Kemi kaluar shumë mirë këtu , do ta kujtoj si përvojë të bukur. Kemi prezantuar katër këngë të bukura nga Mali i Zi. Mendoj se këto këngë e prezantojnë kulturën tonë dhe mënyrën tonë të mendimit. Janë shumë të shkurtra por mendoj se audienca i ka shijuar dhe e kanë kuptuar. Pjesa tjetër e koncertit ka përfshirë repertorin e famshëm italian” është shprehur sopranoja duke komentuar edhe bashkëpunimin me pianisten Gjoni.

“Kjo është hera e parë që vij në Prishinë dhe në festival. Iliriana më ka ftuar të jem pjesë e këtij festivali me të. E njoh tash e disa vite. U takuam në një festival në Herceg Novi në Mal të Zi. Vazhduam bashkëpunimin dhe shpresoj se do të interpretojmë prapë së bashku” është shprehur ajo.

Ndërsa organizatorja e Festivalit, Besa Luzha interpretimin e dy artisteve nga Mali i Zi e quajti të jashtëzakonshëm.

“Ilirjana luajti jashtëzakonisht bukur si pianiste, kishte një dinamikë, një mendim muzikor të përmbledhur shumë bukur. Gjithashtu edhe sopranoja kishte një ngjyrë shumë të bukur të zërit, një impostim jashtëzakonisht natyral, një vokal të shtrirë të bukur dhe të butë në veprat që interpretoi, dhe gjithë kjo dha një emocion jashtëzakonisht të bukur në mbrëmjen e tetë të “Chopin””, u shpreh organizatorja Luzha.

Oraganizatorja Luzha u shpreh e kënaqur me bashkëpunimin me ambasadën e Malit të Zi në Kosovë, që në krye pati përfaqësuesin Bernard Çobaj, falë të cilit bashkëpunim u mundësua një paraqitje e tillë.

“Ishte një rastësi që java kulturore malazeze të përkonte me “Chopin…”, kështu përfaqësuesi i Malit të Zi në Kosovë, Bernard Çobaj shprehu dëshirën që ne ta kurorëzojmë këtë javë me një koncert të përbashkët, duke kombinuar një program shumë të bukur nga dy artiste nga Mali i Zi. Kishte një potpuri këngësh malazeze, variacione nga Çesk Zadeja për “Skënderbeun”, një simbolikë me folklorin e dy popujve që jetojnë në Malin e Zi. Koncerti gjithashtu u përcoll edhe me një program mjaft të bukur nga Puccini, Dvorak, Curtis,  Gaceviq. Dhe, krejt në fund Ilirjana na shpërbleu me baladën e Chopen për nder të Festivalit” ka përfunduar organizatorja Besa Luzha.

Koncerti i radhës mbahet nga Kuarteti Kroat i Kitarës, në përbërje me Petrit Çekun, Zoran Dukiq, Maroje Briqiq dhe Tvrtko Sariq, më 29 maj, në ora 20:00 në Ambiteatrin e Bibliotekës Qëndrore Universitare/ KultPlus.com

‘Chopin Piano Fest’ dhe Filharmonia bashkojnë forcat, dhurohet spektër brilant i tingujve

Posted on by Kult Plus

Vjollca Duraku

Tinguj me një spektër të gjerë frekuencash u dhuruan mbrëmë nga Pianisti François Dumont dhe Orkestra e Filharmonisë së Kosovës, nën drejtimin e dirigjentit Antonie Marguier, në koncertin e shtatë me radhë të Festivalit të Muzikës Klasike “Chopin Piano Fest Prishtina” në Atelienë e Pallatit të Rinisë, shkruan KultPlus.

Adhuruesit e Filharmonisë së Kosovës dhe të Chopin-it kësaj radhe u bashkuan në një koncert të përbashkët, për të përjetuar emocione të thella nga një program i përzgjedhur me shumë shije, me tinguj brilant shumë të fortë dramatik të cilët përmbyseshin nga tinguj të qetë të pianos të cilët dërgonin  në thellësi meditative.

Koncerti i cili zgjati për 90 minuta filloi me interpretimin e veprës “Piano Concerto No.5 in E-flat major, Op.73” me Allegro, Adagioun poco mosso, Rondo: Allegro ma non troppo nga L.V. Bethoven për të vazhduar në pjesën e dytë të koncertit me “ Symphony No. 4 in C minor,  D 417” me Adagio molto, Allegro vivace nga F. Schubert.

Publiku u pasurua artistikisht me tinguj të frekuencave të ndryshme të cilët emeteoheshin qetësisht nga mjeshtria e pianistit Dumont dhe harkorët e Filharmonisë, për t’u bërë më intensivë kur interpretimit i shtoheshin frymorët, për të kaluar në dramacitet kur në lojë hynin të gjitha instrumentet, duke rënë përsëri vetëm në tingujt e qetë, të bukur të pianos.

Nga kjo lojë e mrekullueshme ishte reagimi i publikut që u jepte përgjigje për performancën përgjatë koncertit artistëve që udhëhiqeshin nga dirigjenti plot sharm, elegancë e profesionalitet, Antoine Marguier.

Pas pjesës artistike Pianisti Dumont u shpreh se ndihej i emocionuar nga interpretimi në “Chopin Piano Fest” dhe shumë i lumtur pasi iu dha hapësirë për herë të dytë për të interpretuar në këtë festival.

“Jam shumë i lumtur të kthehem në Prishtinë dhe të kem mundësi ta njoh qytetin dhe kulturën. E ndjej energjinë e mirë dhe dinamike. Isha i emocionuar të kthehem në Chopin dhe të luaj për herë të parë me Orkestrën e Filharmonisë së Kosovës. Dy vite më parë ishte një koncert recital në ‘Chopin Fest’ ndërsa sonte kemi luajtur Koncertin e 5-të të Beethoven. Ky koncert është i fundit i kompozitorit”, ka thënë pianisti Dumont.

Ndërsa organizatorja e festivalit Lejla Pula u shpreh e mrekulluar nga loja e pianistit Dumont dhe interpretimi i  Orkestrës së Filharmonisë së Kosovës.

“E kemi shijuar të gjithë së bashku. Vërtetë një koncert i mrekullueshëm nga François Dumont i cili në bashkëpunim me Ambasadën franceze erdhi për herë të dytë në festivalin tonë ka mbajtur një recital të Chopin-it sepse ai vetë është laureat i garave të Chopinit në Varshavë, do të thotë është një ekspert i madh i muzikës së Chopin-it, por që në këtë koncert rastisi që ai ta luaj në mënyrë të mrekullueshme, me një sensibilitet të jashtëzakonshëm koncertin e pestë të Bethovenit”, ka thënë organizatorja.

Më tej, organizatorja Lejla Pula ka thënë se ndihet e nderuar për pjesëmarrjen e një artistëve të mëdhenj që pavarësisht kushteve jo adekuate për interpretim, ndahen të kënaqur dhe kërkojnë të interpretojnë përsëri nga mikpritja dhe energjia pozitive që e përjetojnë në Festival.

“Ne si organizatorë jemi shumë të lumtur që artistë të mëdhenjë pranojnë të vijnë në Kosovë, për shkak se ende nuk posedojmë sallë të përshtatshme koncertale, pasi ata mund të kenë pak drojë se si mund të tingëlloj pianoja. Mirëpo ata jo vetëm që pranojnë kur i ftojmë përsëri, por ata edhe vet kërkojnë të vijnë përsëri, kështu që në një formë edhe mos me dashtë të vazhdojmë Piano Festin kjo kërkohet nga mysafirët tanë që ndahen aq të kënaqur me mikpritje dhe me të gjitha duke u mrekulluar nga rinia jonë, nga publiku, studentët, audienca e gjerë. Thjesht është një mrekulli”, është shprehur organizatorja.

Kurse ushtruesi i detyrës së Drejtorit të Filharmonisë, Dardan Selimaj, u shpreh i kënaqur nga bashkëpunimi me Festivalin “Chopin Piano Fest”, nga ku edhe potencoi që bashkëpunimi do të vazhdoj edhe në vitet në vijim.

“Bashkëpunimi i Filharmonisë së Kosovës me Chopin Piano Fest është tradicional, ashtu si edhe me festivale të tjera që organizohen në Kosovë. Kjo ka qenë një mundësi e mirë për të bashkuar forcat siç kemi bërë edhe në të kaluarën dhe besoj që do të vazhdojmë edhe në të ardhmen, ndonëse nuk kemi pasur mundësi që këto vitet e fundit që të bashkëpunojmë me secilin festival për shkak të agjendës të Filharmonisë së Kosovës që nganjëherë nuk përputhen me agjendën e festivaleve, por aq sa kemi mundësi do ta  vazhdojmë si traditë edhe  në vitet që vijnë” ka përfunduar Selimaj.

Koncerti i radhës i “ Chopin Piano Fest” do të mbahet me pianisten Iliriana Gjoni dhe sopranon Milica Lalosevic, më 27 maj, në ora 20: 00, në Amfiteatrin e Bibliotekës Universitare/ KultPlus.com

Loja e Philipp Scheucher & Kostantin Manaev sjell art të veçantë në skenën e ‘Chopin Piano Fest’

Posted on by Kult Plus

Vjollca Duraku

Një lojë fantastike me vepra të kompozitorëve të njohur botërorë u dha në koncertin e gjashtë me radhë të Festivalit më të madh të Muzikës Klasike në vend, “Chopin Piano Fest Prishtina”, nga Philip Scheucher- Pianist dhe Konstantin Manaev- Violincelist, shkruan KultPlus.

Si zakonisht koncerti u zhvillua në Amfiteatrin e Bibliotekës Universitare. Edhe këtë herë salla u mbush me plot dashamirë të muzikës klasike për të përcjellë nga afër koncertin duo të dyshes fantastike në përbërje me piansitin austriak Philipp Scheucher, i cili është fitues i çmimit të “Konkursit Nërkombëtar të Muzikës në Koln”  dhe “ fitues i çmimit të dytë të Konkursit Ndërkombëtar Beethoven në Vjenë, si dhe Konstantin Manaev- violonçelist gjerman i cili është i nominuar për çmimin “Ndërkombëtar të Muzikës Klasike”.

Një kombinim perfekt si ky i koncertit “ Break on Throught” publikut i la një shije dhe të paharrueshme. Ishin   lëvizjet strikte të pianistit Scheucher ato që e dëshmonin përvojën dhe talentin e tij për instrumentin që i kishte kushtuar jetën, përderisa interpretimi duke e rrëshqitur dorën poshtë telave të cellos ia që shpërfaqte pasionin e violonçelistit.

Harmonia e tingujve të pianos dhe cellos të emetuar aq bukur në sallë njëkohësisht, por më tepër edhe jehona e tyre e cila qetësisht perceptohej nga shqisat e dëgjuesve, në momentet kur ndalej interpretimi, mundësoi që ky koncert të mbahet në mend gjatë për nga vlera e lartë artistike.

Koncerti i titulluar “Break on Through” solli veprat: Sonata in e Minor, op 38, nga B. Romberg, 7 Variations “Bei Mannern, welche Liebe fuhlen” dhe Sonata in D-dur, op. 102 nr. 2 nga L.V.Bethoven, Break on through nga J. Doderer, dhe Sonata in d-mol,op 40 nga D. Shostakovich.

Përveç reagimeve të publikut, vlerësimin për këtë koncert fantastik e dha edhe profesoresha dhe organizatorja e Festivalit, Lejla Plua, duke e quajtur koncertin si një mbrëmje të veçantë artistike.

“Vërtetë ishte një festë muzikore me dy artistë të jashtëzakonshëm, me dy artistë që frymojnë së bashku. Sonte kanë sjellë një magji të plotë në koncertimin e përbashkët me vepra të interpretuara rrallë dhe jashtëzakonisht vështirë për tu interpretuar me kërkesa stilistike, teknike, muzikore, artistike. Vërtetë ishte një performancë që rrallë dëgjohet në Prishtinë, të cilën me kaq përkushtim dhe kaq dedikim e kanë sjellë dy mysafirët tanë Konstantin Manaev dhe Philipp Scheucher  të cilët bashkëpunojnë me vite, e nga kjo edhe e kanë sjellë një art të veçantë sonte në skenën tonë”,  u shpreh organizatorja Lejla Pula për KultPlus.

Kurse solistin Konstantin Manaev e kishte impresionuar pjesëmarrja e të rinjëve në koncert, për dallim nga vendet tjera të Evropës, ku pjesëmarrësit janë të moshës më madhore.

“Mendoj që Festivali “Chopin Piano Fest” është koncerti më i famshëm dhe më i madh jo vetëm për piano por edhe për muzikën klasike në përgjithësi. Këtu patëm mundësi ekskluzive që të interpretojmë pjesë të mrekullueshme sonte, duke përfshirë edhe pjesë nga kompozitorja austriake Johanna Doderer. Ishte një organizim dhe audiencë fantastike. Kishte shumë njerëz të rinj. Në Evropë dhe Gjermani është e vështirë të ketë audiencë kaq të re, sepse atje janë 80 % të moshuar. Këtu sheh fytyra shumë të reja që të jep një ndjenjë shumë të mahnitshme, sepse marr shumë energji të mirë dhe kjo më ndihmon të performoj”, ka thënë Manaev.

Kurse për Pianistin Scheucher mbrëmja me një audiecë të madhe në numër ishte vërtetë fantastike.

“Mahnitëse! Gjithçka është shumë mirëpritëse, audienca është perfekte, salla ishte shumë akustike, vendi dhe ushqimi gjithashtu fantastik. Është hera e dytë që po vij këtu dhe duket sikur është hera e njëmijtë. Është një vend i mirë për ta vizituar”, ka thënë ai.

Po ashtu, pianisti të mrekullueshëm e quajti edhe bashkëpunimin me kolegun e tij Konstantin Manaev, të cilët si risi të mbrëmjes sollën veprën “Break and throught” nga kompozitorja austriake Johanna Doderer.

“Unë e kam takuar Konstantinin para disa vitesh nëpërmjet një projekti ndërkombëtar të muzikës elektronike i quajtur “Symphoniacs” nga ku menjëherë krijuam rrjedhën bashkëpunuese. Ne ndjekim rrugë të ndryshme në muzikën klasike, por mendoj që këtu është vendi për të provuar gjëra të reja me koncertin “Break and throught” që është edhe vepër nga kompozitorja austriake Johanna Doderer. Kjo ishte pika më e rëndësishme ku ne e fokusuam programin tonë për të filluar koncertin dhe pastaj normalisht duke e kombinuar me disa pjesë klasike me me Bethovenin, pastaj padyshim duke vazhduar me sonatat e të mrekullueshmit Shostakovich”, është shprehur ai krejt në fund.

Koncerti i radhës Piano& Orchestra i “Chopin Piano Fest”  do të mbahet më 25 maj, në sallën e Kuqe të Pallatit të Rinisë në Prishtinë, në ora 20:00/ KultPlus.com

Catalina Butcaru dhe Lucy Hall shkëlqejnë me piano dhe violinë në natën e pestë të “Chopin Piano Fest”

Posted on by Kult Plus

Mbrëmjen e djeshme u shënua nata e pestë e “Chopin Piano Fest Prishtina”, me një program që zgjati rreth 2 orë. Përformanca e paharrueshme Duo Piano & Violinë me Catalina Butcaru dhe Lucia Hall, bëri që e gjithë salla të jehonte nga duartrokitjet e publikut.

Nata filloi me një fjalim të shkurtër nga ambasadori i Austrisë në Kosovë, George Schnetzer, i cili u shpreh falendërues dhe i lumtur për bashkëpunimin e Kosovës me shtetin e Austrisë.

Pas pak minutash, filloi interpretimi i dy artisteve, ku Catalina Butcaru si një mjeshtre e pianos, ka mahnitur të gjithë të pranishmit me interpretimet e saj të ndjeshme në piano, kurse Lucy Hall, tregoi zotësi të papërshkrueshme në violinë. Së bashku ato interpretuan vepra të njohura nga artistë të njohur botërorë si Clara Schumann, Frederic Chopin dhe Robert Schumann.

Butcaru është një pianiste me origjinë rumune dhe mund të krahasohet me më të mirët që kanë hyrë në territor. Ajo ka studiuar në Akademinë e Muzikës në Vjenë dhe Graz.

Ndërsa violinistja Lucy Hall me origjinë kanadeze, ka kryer shkollimin në Vjenë nga professor si T. Gabora, E. Turovsky dhe D. Schëarzberg. Hall ka interpretuar si soliste dhe muzikante kamertale në Evropë, në Amerikën e Veriut dhe në Rusi.

Në një prononcim për KultPlus, një ndër organizatoret e këtij eventi Lejla Pula u shpreh se ishte një natë shumë e veçantë dhe se artistet ishin një Duo perfekte.

“Të dy artistet, njëra nga Kanadaja e tjetra nga Rumania ishin në Duo aq shumë, në frymëmarrje e në gjithçka. Ishte një përjetim i veçantë, një tingëllimë e pastër dhe e ëmbël që shumë rrallë haset, sepse zakonisht tingulli i pianos di të jetë më agresiv dhe më i fuqishëm por ato aq bukur u kompletuan së bashku me një program me kërkesa të jashtëzakonshme. Violinistja ishte një mjeshtre e violinës dhe ajo ka luajtur me artistët më të mëdhenjë botërorë”, tha ajo.

Tutje, Pula shtoi se është shumë e lumtur që të dyja kanë pranuar të vijnë në Prishtinë, ndoshta sepse kanë dëgjuar për mikrpritjen.

“Jam shumë e lumtur që të dy artistet kanë pranuar që të vijnë në Prishtinë, sepse sigurisht kanë dëgjuar se mikpritja është e jashtëzakonshme. Jemi falënderues që po e kultivojmë këtë raport të mirë, por që nga fillimi i edicionit të parë ne kemi pasur një bashkëpunim të mrekullueshëm më Ambasadën e Austrisë, gjithmonë kemi pasur artistë nga Austria që na kanë sjellë në skenën tonë imazhe të paharruara artistike”, shtoi Pula për KultPlus.

Ndërkaq, violinistja Lucy Hall në një intervistë të shkurtër pas përformancës tha se është hera e saj e parë që vjen në Kosovë, duke shtuar se donin të jepnin diçka për Prishtinën.

“Unë kam studiuar me mësues nga Rusia dhe kam udhëtuar shumë, ishte eksperiencë e mirë të luaj këtu sepse njerëzit të dëgjojnë me gjithë zemër. Më pëlqen shumë Kosova, unë kam miq shqiptarë në Vjenë, dhe mendoj se këtu ka ndryshuar shumë. Janë ndërtuar ndërtesa të reja, Katedralja e shumë të tjera”, u shpreh Lucy Hall për KultPlus.

“Chopin Piano Fest Prishtina” do të zgjasë deri më 9 qershor, dhe do të përformojnë artistë të njohur nga shtete të ndryshme./KultPlus.com

‘Fabrizio Bosso Quartet’ sjell freski në ‘Chopin Piano Fest’ me koncertin kushtuar Steve Wonder

Posted on by Kult Plus

Flonja Haxhaj

Mbrëmë, në koncertin që shënoi natën e katërt të festivalit ‘Chopin Piano Fest Prishtina’, publiku pati mundësinë të shijojnë performancën e mahnitshme të grupit të njohur italian ‘Fabrizio Bosso Quartet’. Koncerti  ‘We Wonder’ solli një përvojë të re dhe freski për publikun, duke thyer ritmin tradicional të festivalit që në fokus ka muzikën klasike, shkruan KultPlus.

‘Fabrizio Bosso Quartet’, grup ky i cili përbëhet nga trumpetisti Fabrizio Bosso, Julian Oliver Mazzariello në piano, Luca Alemanno në kontrabas dhe Nicola Angelucci, nën ritmin e muzikës xhaz, sollën për publikun koncertin që i dedikohet këngëtarit të muzikës solo Steve Wonder.

Koncerti  ‘We Wonder’, që erdhi një ditë pas koncertit në Tiranë, u mirëprit shumë edhe nga publiku në Amfiteatrin e Ri të Bibliotekës uiversitare në Prishtië, ku për gati një orë e gjysmë e shijoi çdo notë e tingull të transmetuar nga muzkantët.

E se kjo mbrëmje ishte  e veçantë u dëshmua edhe nga duartrokitjet që pas koncertit zgjatën për disa minuta.

Një nga organizatoret e këtij festivali, Besa Luzha, tha për KultPlus se ky kuartet erdhi si një dhuratë për festivalin dhe njëherazi sjelli edhe një freski për festivalin i cili në thelb ka muzikën klasike.

“Ka qenë interesant sepse Ambasada Italiane dhe instituti e ofruan vetë me e sjellë edhe përnjëmend na e morëm kështu si dhuratë, për shkak se ky është një kuartet shumë i njohur i cili ka pasur dje koncert edhe në Tiranë dhe ambasadori na propozoi që ta sjellim edhe në ‘Chopin’. Ndonëse ishte një mbrëmje xhaz, ne kur hulumtuam për grupin vendosëm që vërtet ky kuartet duhet të vijë edhe në festivvlin tonë”, u shpreh Luzha e cila mes tjerash shtoi se përgjatë festivalit i cili zgjat një muaj, duan që një apo dy mbrëmje të jenë të kushtuar edhe për zhanret e tjera.

Pas koncertit që erdhi si një manifestim i trashigimisë muzikore të Steve wonder, sjellë nga ‘Fabrizio Bosso Quartet’, për KultPlus foli edhe Lejla Pula, po ashtu organizatore e këtij këtij festivali e cila u shpreh se kjo mbrëmje solli emocion dhe përjetim të veçantë.

“Ne kemi gjithmonë dëshirë që të kemi edhe një befasi ose një freski, ashtu ne normal në fokus e kemi muzikën klasike sepse është ‘Chopin Piano Fest Prishtina’dhe vlerat kulmore mundohemi t’i sjellim nga bota këtu. Në këtë rast ishim shumë të lumtur sepse institute italian i kulturës në Tiranë që disa vite bashkëpunon me ne dhe në kuadër të një turneje që e kanë organizu për këtë kuartet, që është shumë i njohur në Itali, vetë Fabrizio Bossotrombetisti është shpallë disa herë artisti i vitit në Itali dhe ne sonte i patëm këtu që ta shijojmë vërtet muzikën perfekte që ata e bëjnë në fushën xhazit, këtë herë të inspiruar me muzikën e Steve Wonder”, theksoi Pula për KultPlus, duke u shprehur më tutje se kjo mbrëmje ishte një përjetim i veçantë dhe publiku e ka shijuar jashtëzakonisht shumë.

Ndërkaq, ‘Chopin Piano Fest Prishtina’ do të zgjasë deri më 9 qershor, e përgjatë kësaj periudhe, publiku do të ketë mundësinë të shijojë perlat e muzikës klasike, të sjella nga artistë vendorë e ndërkombëtarë./KultPlus.com

Të enjten mbrëma, nis festivali më i madh i muzikës klasike në vend, ‘Chopin Piano Fest’ 2024

Posted on by Kult Plus

 “Chopin Piano Fest Prishtina”,  festivali më i madh i muzikës klasike në vend  të enjten mbrëma nis edicionin e 14- të festivalit, duke sjellë edhe këtë herë magji të lojës me piano nga artistët vendorë e ndërkombëtar, shkruan KultPlus.

Edicioni i 14-të i “Chopin Piano Fest” do të prezantojë 14 koncerte me program të pasur artistik jo vetëm me veprat e Chopin-it, por edhe kompozitorëve të tjerë të njohur, klasikë dhe bashkëkohorë, në Amfiteatrin e Ri të Bibliotekës Qëndrore Universitare të Prishtinës.

“Për 14 mbrëmjet e festivalit, do të mund të dëgjoni një repertor të zgjedhur me kujdes, për t’i dhënë mbrëmjeve tuaja një përzierje të shkëlqyeshme të muzikës së bukur dhe interpretimit të saj në nivelin më të lartë botëror.

Bashkohuni me ne, për të përjetuar një eksperiencë unike muzikore në edicionin e 14-të të Chopin Piano Fest Prishtina”, thuhet në njoftim.

“Chopin Piano Fest 2024” mbahet nga data 9 maj deri më 9 qershor 2024/ KultPlus.com

Prezantohet programi i edicionit të 14-të të “Chopin Piano Fest”

Posted on by Kult Plus

“Chopin Piano Fest Prishtina” ka prezantuar programin e edicionit të 14-të të Chopin Piano Fest.

Sipas njoftimit, prej datës 9 maj deri më 9 qershor, Amfiteatri i Ri i Bibliotekës Qëndrore Universitare të Prishtinës, do të ketë interpretime të veçanta të artistëve të shquar nga vendi dhe bota.

“Për 14 mbrëmjet e festivalit, do të mund të ndëgjoni një repertor të zgjedhur me kujdes, për t’i dhënë mbrëmjeve tuaja një përzierje të shkëlqyeshme të muzikës së bukur dhe interpretimit të saj në nivelin më të lartë botëror”, thuhet në njoftim. / KultPlus.com

Pianistja Ardita Statovci bashkë me talentet e rinj me koncert në Berlin, u vlerësua lartë nga të pranishmit

Posted on by Kult Plus

Në Berlin, Ambasada e Kosovës organizoi një koncert shumë të veçantë me pianisten e mirënjohur Ardita Statovci, së bashku me talentët e rinj, fitues të çmimeve të ChopinPianoFEST, Fortesa Jusufi, Andi Duraku, Lisa Sahatçiu, Melisa Ibrahimi dhe Rron Bakalli.

Koncerti u mbajt në sallën e bukur të Universitetit të Arteve Joseph-Joachim-Konzertsaal, ku ishin të pranishëm shumë personalitete të jetës publike, diplomatë, përfaqësues të institucioneve, artdashës dhe studentë e pjesëtarë të diasporës tonë në Berlin.

Loja e artistëve dhe i gjithë programi u vlerësua shumë lartë nga të pranishmit. Të mahnitur mbetën edhe dy personalitete të veçanta, Herbert Groeger, sponsor i Çmimit Special të Chopin Piano Fest Prishtina Prishtina dhe Johannes Neukirchen nga bordi i Young Euro Classic, një organizatë e rëndësishme për muzikantët e rinj.

Koncerti është mbështetur nga MKRS dhe MPJ. / KultPlus.com

‘Chopin Fest’ me maratonë pianistike për artistët e rinj, mbrëmja mbyllet me koncertin e Klaudia Gjinit

Posted on by Kult Plus

Flonja Haxhaj

Festivali ‘Chopin Piano Festival’, edhe në këtë edicion vazhdoi traditën e mbajtjes së maratonës pianistike, një maratonë kjo që u jep mundësinë edhe pianistëve të rinj që të performojnë në skenën e këtij festivali, përcjell KultPlus.

Maratona në të cilën u prezantuan nxënësit nga shkollat e muzikës në Prizren, Pejë, Mitrovicë, Vushtrri, Rahovec, Gjakovë, Gjilan, Ferizaj dhe Prishtinë, përveç që luajtën në piano vepra të kompozitorëve të ndryshëm botërorë, vunë në pah edhe potencialin e pianistëve që do ta pasurojnë artin dhe muzikën klasike në Kosovë.

Kjo ngjarje që filloi në ora 12:00 dhe përfundoi në ora 21:00, i dha mundësinë publikut në Amfiteatrin e Bibliotekës Universitare që të shijojë kryeveprat e kompozitorëve si: Chopin, Mozart, Moskowski, Beethoven, Tchaikovsky, Joplin, Gjoni e shumë kompozitorë të njohur botërisht.

Ndërkaq, pjesa përmbyllëse ishte e destinuar për pianisten Klaudia Gjini, e cila është fituese e festivalit ‘Chopin’ në Durrës. Me veprat e Beethoven dhe Moskoëski, Gjini arriti të sjellë emocione të forta në publik, e nga i cili pas koncertit mori duartrokitje disa minutëshe.

Pas përfundimit të maratonës, për KultPlus foli organizatorja e ‘Chopin Piano Fest’, Besa Luzha e cila u shpreh e lumtur për performancën dhe potencialin që treguan pianistët e rinj.

“Kjo na veçon neve si ‘Chopin Piano Festival’, sepse që nga fillimi gjithmonë kemi pasë dëshirë t’u japim hapësirë edhe talentëve të rinj. Duke dashur ta vazhdojmë këtë traditë dhe duke e parë që çdo herë është rritur numri i nxënësve dhe shkollave, nuk kishim si me i zgjedhë për një mbrëmje, atëherë vendosëm këtë maratonë në mënyrë që të gjitha shkollat me u prezantu me disa nga nxënësit e tyre”, tha Luzha.

Ndërkaq, drejtoresha artistike e festivalit ‘Chopin’ tha se kjo ngjarje ëstë e jashtëzakonshme edhe për faktin që u jep mundësi pianistëve të rinj të performojnë në skenën ku kanë performuar artistë me famë botërore.

“Maratona pianistike është një ngjarje në kuadër të ‘Chopin Piano Fest’  dhe ‘Edu Week’. Kjo është një ngjarje e jashtëzakonshme për ne sepse pianistët e rinj ngriten në skenën ku luajnë pianistë me famë botërore dhe të cilët vërtet na nderojnë më ardhjen e tyre”, tha Pula për KultPus.

E krejt në fund, për KultPus foli edhe pianistja Klaudia Gjini e cila dhuroi një emocion të paharruar teksa luajti veprat e Beethovenit dhe Moskowskit.

“Unë këtë performancë e kam pritur me shumë gëzim, që në momentin që më është dhënë lajmi. Unë zgjodha pikërisht këto vepra ngaqë Beethoven është një kompozitor që më pëlqen shumë, më pëlqejnë dinamikat  se si  i ndryshon ngjyrat, mënyra e ndërtimit të pjesës dhe është një kompozitor që e admiroj. Gjithashtu edhe Moszkowski është një kompozitor tjetër i preferuari i imi dhe pikërisht për këtë arsye zgjodha edhe ta performoj sot”, u shpreh mes tjerash Gjini.

Ndërkaq, edicioni i 13-të i festivalit të muzikës klasike, Chopin Piano Fest Prishtina, do të mbahet deri më 9 qershor, në të cilin festival adhuruesit e muzikës klasike mund të shijojnë vepra të autorëve më të mirë botërorë./ KultPlus.com

Imazhe nga koncerti i Filharmonisë së Kosovës në Chopin PianoFEST (FOTO)

Posted on by Kult Plus

Një koncert i radhës i festivalit ‘Chopin PianoFest Prishtina’ është mbajtur të hënën, si bashkëpunim i Chopin PianoFEST dhe institucionit më të lartë muzikor në vend, Filharmonisë së Kosovës, shkruan KultPlus.

Ky koncert i jashtëzakonshëm, ndër të tjera u mundësua nga profesionalizmi i  maestros Peter Donohoe, dirigjentit Robert Guy dhe Orkestrës së Filharmonisë së Kosovës.

KultPlus, ju sjellë disa nga fotografitë e realizuara përgjatë koncertit nga Minstria e Kulturës:

Mjeshtërisht të rrallë, violinisti Hoxha- Ganiyev dhe pianistja Tare emocionuan audiencën e Chopin Piano Fest

Posted on by Kult Plus

Vjollca Duraku

Një publik entuziast i cili u ngrit dhe qëndroi në këmbë tre herë përgjatë koncertit, ishte rezultat i një interpretimi mjeshtërisht të rrallë të realizuar mbrëmë nga violinisti i shquar Elvin Hoxha-Ganiyev dhe pianistja Klejda Tare, në koncertin e dytë të festivalit Chopin Piano Fest Prishtina 2023, shkruan KultPlus.

Violinisti i famshëm me prejardhje shqiptaro-azerbejxhaniane, Elvin Hoxha-Ganiyev dhe pianistja Klejda Tare, me profesionalizmin e tyre mbrëmë dhuruan çaste të paharrueshme për publikun në sallë, duartrokitjet e të cilëve bënë që muzicientët të performonin edhe një pikë tjetër shtesë në nderim të gjithë atij entuziazmi.

Kjo mbrëmje  u hap nga organizatorja e festivalit, Besa Luzha, e cila qysh në hapje të koncertit e paralajmëroi profesionalizmin dhe nivelin e lartë të performancës së muzicentëve të cilët do të perfomonin pas pak. Pas fjalimit të saj, dritat u fikën, dhe tanimë violinisti Elvin Hoxha Ganiyev pushtoi skenën, me veprën e kompozitorit Eugene-Auguste Ysaye, Sonata nr.2, op.27.

Natës së errët me yje dritëshumë, i ngjante edhe paraqitja e violinistit, i cili me një elegancë të theksuar, me kostume të zeza dhe një nur që i shndriste, e tërhiqte publikun si magnet edhe me pamje.

Këtë interpretim, dukej sikur e ndjeu shumë vet mjeshtri i violinës, pasi lëvizjet trupore, mimika dhe forma e kaçurreleve të tij, ndryshonin në bazë të shkallës emocionale në të cilën gjendej muzicienti i shquar përgjatë atyre sekondave.

Nga jashtë dukej sikur violinisti brenda botës së tij ishte në kërkim të diçkaje në dhomat imagjinare të mendjes, e të cilën ndjesi dukej se e gjeti vetëm kur filloi të interpretonte me gishtërinjtë e tij instrumentin për të cilin ai kishte studiuar mijëra orë. Një frymëmarrje e thellë dhe e ngadaltë, një fytyrë që buzëqeshte sikur rrinte e përqafuar me violinën, tani kur tingujt ekzekutoheshin me gishtërinjtë e violinistit, konfirmonin se në ato çaste artisti u përmbush shpirtërisht, dhe kjo njëkohësisht shënoi edhe pikën kulmore të interpretimit.

Pikat tjera të koncertit përfshinë veprat e kompozitorëve Claude Debussy  me Sonata për violinë në G minor L. 140 dhe Oliver Messiaen me Theme et variations, ku këtu në skenë u shfaq edhe pianistja Klejda Tare.

Në këto pika të interpretimit, u vë në pah ligji i polaritetit si në tingujt të cilët ofroheshin, e që herë ishin të butë e herë më dinamikë, po ashtu edhe në emocionet e muzicientit, që herë ishin lumturi e gëzim, e herë melankoli, mall e trishtim.

Me një komunikim të hatashëm përmes syve, muzicientët u morën vesh për të filluar edhe pjesën e fundit të interpretimit të kompozitorit Sergei Prokofiev, Sonata nr1, ne F minor, op.80, të cilën e shijuan shumë edhe muzicientët, e po ashtu edhe publiku.

Fundin e performancës e shoqëroi një tërheqje e lehtë e duarve nga piano te lartë, të cilën lëvizje  mjeshtërisht e realizoi pianistja Tare me qëllim që tingujt e fundit të jehonin më gjatë në sallë dhe në veshët e publikut.

Pas performancës me gjithë ata tinguj të bukur dhe asaj kënaqësie estetike e cila u dhurua në sallë, radha ishte që të kthehej mbrapsht kundrejt burimit. Publiku u ngrit në këmbë dhe për disa minuta qëndroi ashtu duke duartrokitur, dhe duke kthyer nderin të cilin e morën përgjatë një orë e gjysmë performance.

Meqë duartrokitjet zgjatën për disa minuta, muzicientët vendosën ta interpretojnë edhe një pjesë tjetër, si shenjë respekti për nderimet që po u bëheshin, për të vënë kështu qërshinë mbi tortë me interpretimin e tyre të fundit në këtë mbrëmje artistike.  

Pas përfundimit të performancës, emocionet dhe vlerësimin e saj i dha për KultPlus, edhe Drejtoresha Artistike e Chopin Piano Fest, Lejla Pula, e cila tha se koncerti ishte i jashtëzakonshëm, pasi muzicientët edhe pse të rijnë në moshë, kishin sjell një program me kërkesa jashtëzakonisht të vështira teknike, muzikore artistike.

Ajo po ashtu duke thënë se artistët dhanë një perfomancë kulmore, u shpreh se ndihej e kënaqur që kishin arritur të sillnin në skenën e Kosovës, muzicientë të nivelit të tillë.

‘Ishte një koncert i jashtëzakonshëm. Kemi qenë dëshmitarë të një muzikimi të rrallë. Rrallë kemi dëgjuar artistë të rijnë, të këtij niveli, me një bashkëpunim artistik të jashtëzakonshëm me mes Elvin Hoxhës-Ganiyev dhe Klejda Tarës. Vërtetë e kanë sjellë një program me kërkesa jashtëzakonisht të vështira teknike, muzikore artistike. Do të thotë program të kërkesave kulmore virtuoze, duke krijuar një atmosferë të mrekullueshme artistike të cilën e ka shijuar publiku jashtë mase dhe ne jemi të lumtur që në skenën tonë sollëm artistë të këtij niveli’, ka thënë drejtoresha Pula.

Ndërsa Pianistja Klejda Tare, në një prononcim për KultPlus tha se ndihet e nderuar që ishte pjesë e festivalit Chopin Piano Fest, pasi që sipas saj është një ndër festivalet me prestigjioze jo vetëm në trojet shqiptare por edhe më gjerë.

Ajo po ashtu tha se bashkëpunimi me violinstin Hoxha-Ganiyev edhe pse nën presionin e kohës, ka qenë i mrekullueshëm, me shpresë që kanë arritur që të përcjellin emocione të cilat do të zgjasin gjatë në mendjen e  publikut.

“Është ftesa e parë të cilën na e kanë bërë organizatorët e festivalit ChopinPiano Fest në Prishtinë, dhe u ndjeva mjaft e nderuar, sepse është një nga festivalet më prestigjioze, jo vetëm të trojeve shqiptare por edhe më gjerë. Për shembull bashkëpunimi me Elvinin ishte diçka e re, sepse unë vij nga Tirana ndërsa Elvini erdhi nga Gjermania, dhe na është dashur vetëm një ditë për të bërë prova. Kështu që ishim pak nën presion, por besoj se ia dolëm me sukses. Këto janë eksperienca të bukura, që brenda një kohe shumë të shkurtër duhej të merreshim vesh me njëri tjetrin dhe të arrijmë të realizojmë veprat më së miri’, ka thënë Tare.

Koncerti i radhës së Chopin Piano Fest do të mbahet më 15 maj në të cilin do të performojnë: Marina Nkolovska-Obo, Orges Malaj-Fagot, Ilir Kokëdhima-Korno, Enkelejda Zajmi-Gorani, Astrit Mustafa-Klarinet dhe Lejla Pula-Piano.

Edicioni i 13-të i festivalit të muzikës klasike, Chopin Piano Fest Prishtina, do të jetë deri më 9 qershor, në të cilin festival adhuruesit e muzikës klasike mund të shijojnë vepra të autorëve më të mirë botërorë./ KultPlus.com

Nesër nis Chopin Piano Fest, sjell në Prishtinë pianistë të shquar

Posted on by Kult Plus

ChopinPianoFEST Prishtina, festivali muzikor i vlerësuar shumë nga kritika, media, fansat dhe audienca në rritje si një prezantim i shkëlqyer i mjeshtërisë së pianos po sjell edicionin e 13-të me radhë, përcjell KultPlus.

Nesër, më datë 9 Maj, do të nis rrugëtimin ky festival, për të sjell para jush koncerte të mrekullueshme nga artistë tejet të veçantë.

Festivali që përgjatë gjithë këtyre viteve ka ofruar interpretime si nga pianistë me famë botërore ashtu edhe nga talentet vendore dhe shërben si platformë shkëmbimi kulturor mes artistëve kosovarë dhe artistëve që vijnë nga vende të ndryshme të botës, njëjtë do të veprojë edhe këtë vit.

Muzika është gjuha e përbashkët e komunikimit dhe bashkëpunimit dhe festivali ka pritur edhe muzikantë nga vende që ende nuk e kanë njohur Kosovën si shtet.

Edicioni i 13-të i Chopin Piano FEST Prishtina 2023 do të mbledhë pianistë të shquar vendas dhe ndërkombëtarë që interpretojnë jo vetëm veprat e Chopin-it, por edhe kompozitorë të tjerë të njohur, klasikë dhe bashkëkohorë që interpretojnë ansamble piano solo dhe piano (trio, duo, sekstet) repertor, duke përfshirë koncerti për piano me Filarmoninë e Kosovës.

Festivali promovohet gjithashtu nga EFA (Asociacioni Evropian i Festivaleve) http://www.efa-aef.eu/en/home/ dhe është pjesë e Federatës Ndërkombëtare të Shoqatave të Chopin (IFC) e lidhur me UNESCO-n. / KultPlus.com

“Chopin Piano Concertos” me Martin Kasik dhe Kuartetin e harqeve ‘Wihan’ në ‘Chopin Piano Fest’

Posted on by Kult Plus

Edicioni i 12-të i festivalit të muzikës klasike ‘Chopin Piano Fest’ tashmë ka filluar rrugëtimin e tij të suksesshëm, përcjell KultPlus.

Festivali më i madh i muzikës klasike i organizuar në Kosovë, këtë vit pritet të ketë 15 koncerte, masterklase, punëtori, gara të ndryshme e aktivitete kulturore. Do të jenë të ftuar kompozitor e pianistë nga vende të ndryshme të Evropës të cilët do të shpalosin para publikut kosovar veprat më të mëdha në piano.

Ndërkaq të mërkurën do të performojnë Martin Kasik dhe Kuarteti i harqeve ‘Wihan’, nën “Chopin Piano Concertos”, koncert ky që vjen në bashkëpunim me Ambasadën e Republikës Çeke në Prishtinë, duke filluar nga ora 19:00.

Edicioni i sivjetshëm do të sjellë muzikantë nga Kosova, Shqipëria, Maqedonia, Franca, Austria, Gjermania, Italia, Hungaria, Holanda, Sllovenia dhe Spanja. / KultPlus.com

Duo në flaut dhe piano me Jana Machalett, Enkelejda Zajmi-Gorani dhe Pauline Post, sonte në Chopin Piano Fest

Posted on by Kult Plus

Edicioni i 12-të i festivalit të muzikës klasike ‘Chopin Piano Fest’ tashmë ka filluar rrugëtimin e tij të suksesshëm, përcjell KultPlus.

Festivali më i madh i muzikës klasike i organizuar në Kosovë, këtë vit pritet të ketë 15 koncerte, masterklase, punëtori, gara të ndryshme e aktivitete kulturore. Do të jenë të ftuar kompozitor e pianistë nga vende të ndryshme të Evropës të cilët do të shpalosin para publikut kosovar veprat më të mëdha në piano.

Ndërkaq sonte do të performojnë Jana Machalett, Enkelejda Zajmi-Gorani, Pauline Post në flautë dhe piano, koncert ky që vjen në bashkëpunim me Ambasadën e Holandës në Kosovë, duke filluar nga ora 20:00.

Edicioni i sivjetshëm do të sjellë muzikantë nga Kosova, Shqipëria, Maqedonia, Franca, Austria, Gjermania, Italia, Hungaria, Holanda, Sllovenia dhe Spanja. / KultPlus.com

Adam Balogh & Ádám Banda, dyshja hungareze që solli një harmoni mbresëlënëse në ‘Chopin Piano Fest’

Posted on by Kult Plus

Era Berisha

Një depërtim i thellë e i mbushur me emocione nga më të ndryshmet ishte vendosur mbrëmë pikërisht përbrenda shpirtit të pranishëm me rastin e interpretimit të pianistit Adam Balogh dhe violinistit Ádám Banda të cilët me prezencën e tyre skenike sollën një program të larmishëm të veprave botërore mbi atmosferën në ‘Chopin Piano Fest’, me ç’rast komplesksiteti i magjishëm i tingujve dhe butësia hyjnore e melodive u ndërlidhën mahnitshëm për të lënë gjurmë në kujtesën e gjithsecilit, shkruan KultPlus.

Tash e shtatë net, Salla e Amfiteatrit të Ri të Bibliotekës Universitare po mbledh rreth vetes një numër të madh të artdashësve të muzikës klasike dhe jo vetëm. Skena e rrethuar me lule shumëngjyrëshe tashmë e njohur për çdokënd po ndriçohej nga gjithsej katër reflektorë në ngjyrë të ngrohtë, teksa në prapavijë dukshëm dallohej logoja e festivalit që vjen e ndriçuar nga po ashtu katër reflektorë në ngjyrë të bardhë. Një hijeshi unike e ambientit në gërshetim me padurimin e të pranishmëve për të dëgjuar sa më parë interpretimin e dy instrumentistëve, veçse po krijonte atë ëmbëlsinë e njohur në ambient.

Hapjen e kësaj mbrëmjeje të festivalit ‘Chopin Piano Fest’ e nisi drejtoresha organizative e festivalit, Besa Luzha e cila tregoi se kjo mbrëmje vjen në bashkëpunim me Ambasadën e Hungarisë në Kosovë.

“Mirëserdhët në mbrëmjen e shtatë me radhë të këtij edicioni. Ne kemi shumë kënaqësi që në këtë mbrëmje kaq të veçantë, të kemi dy muzicientë virtuoz që janë nga Hungaria, si rezultat i një bashkëpunimi të gjatë që kemi me Ambasadën Hungareze në Kosovë. Përmes këtij bashkëpunimi dymbëdhjetë vjeçar, ne kemi vendosur që të kemi edhe një bashkëpunim reciprok me një festival tjetër në Hungari, “Cziffra“ në përkushtim të pianistit legjendar, Christian Georges Cziffra”, thotë Luzha.

Sipas saj, në dy vitet e fundit po shënohet 100 vjetori i lindjes së pianistit, Christian Georges Cziffra.

Ambasadori i Hungarisë në Kosovë, Dr. József Bencze gjithashtu i uroi organizatorët për këtë mbrëmje dhe për gjithë punën e tyre përgjatë tërë edicioneve të këtij festivali.

Pianisti Adam Balogh dhe violinisti Ádám Banda dolën në skenë me një buzëqeshje dhe shumë shpejt u mirëpritën nga publiku me duartrokitje të shumta. Ora shënoi fiks 20:20 kur tingulli i parë u lëshua me veprën “Rhapsody No.1 for violin and piano, sz.86, BB 94” të kompozitorit hungarez Béla Bartók. Ky interpretim nga dy instrumentistët hungarez të cilët sollën një energji aq unike në skenë, bëri që përgjatë gjithsej dhjetë minutave, secili i pranishëm të lëshonte fokusin drejt dyshes. Dy parë duar po dëshmonin vazhdimisht për njohuritë muzikore të tyre, ndjeshmërinë që buron nga brendësia shpirtërore si dhe për ndikimin e posaçëm tek audienca.

Ndërkaq, pjesa e parë e programit të pasur për këtë mbrëmje solli shumë shpejt edhe veprën tjetër “Violin Sonata No.1 in G-dur, Op.78” të kompozitorit gjerman Johannes Brahms, vepër kjo që po ashtu përgjatë njëmbëdhjetë minutave dukej se nuk kishte asnjë fund. Interpretimi i dyshes, vepër pas vepre sillte një emocion krejtësisht ndryshe por njëkohësisht edhe aq të mrekullueshme. Me tinguj që luhatnin herë nëpër shpejtësi të pakapshme nga syri i pranishëm e herë tjera nëpër një ngadalësi të veçantë, po krijonte një përshtypje se performimi në piano e violinë është aq i lehtë. Por kjo dukshëm binte poshtë atëherë kur një kompleks i melodive kaplonte atmosferën vrullshëm nën gjallërimin flakërues që vinte nga interpretimi i dyshes.

Por, pjesa e dytë e mbrëmjes solli diçka krejtësisht ndryshe nga e para. Me vepra diversive nga kompozitorët e njohur si: Richard Georg Strauss, Percy Grainger, Johann Sebastian Bach, Ferruccio Busoni, Igor Stravinsky, Frédéric Chopin dhe Nathan Milstein, mbrëmë violina dhe pianoja ishin shndërruar në dy trupa që krijonin vija melodish krahas dy instrumentistëve në skenë. Njëra në ngjyrë kafe dhe tjetra bardh e zi, ato kapnin emocionin e publikut dhe në secilën herë veçse shkonin duke shpërthyer në tinguj akoma edhe më shumë.

Në ndërkohë po të shikoje në veçanti tërë prezencën skenike të pianistit Adam Balogh, atëherë do të vëreje një qetësi të pakrahasueshme. Në pamje dukej sikur pianoja gjigande para tij nuk ishte aspak e vështirë për tu zotëruar, teksa në anën tjetër muzika që buronte nën lojën e tij mjeshtërore binte në kontrast të dallueshëm me qëndrimin e tij. Një vijë melodike që çoroditej mes tingujve të rëndë e të lehtë, fundi i së cilës shënohej me një lëvizje të dorës së tij të majtë, po dhuronte një ndjenjë të jashtëzakonshme përgjatë tërë veprave. Pianisti Balogh me një mënyre të habitshme kapte vëmendjen e të pranishmëve dhe e drejtonte tek vetja me një lehtësi të paparë. Kjo dhe jo vetëm e bënte atë që të kishte një vend specifik në zemrën e çdo njeriu.

Në anën tjetër, ishin pikërisht shprehjet e fytyrës së violinistit Ádám Banda ato të cilat tregonin për gjithë mundin e tij artistik. Violina në duart e tij në çdo sekondë të jepte një imazh aq të bukur saqë instrumenti që përballonte pozicione të ndryshme të lëvizjes së harkut të linte një përshtypje se ishte hyjnor. Me një interpretim ndryshe nga e zakonshmja, violinisti Banda solli tinguj që tingëllonin sikurse po fluturonin e po njëlloj ishte edhe harku nën posedimin e tij që shpalosi një shpejtësi të paarritshme. Po ashtu, ishte edhe frymëmarrja e tij që dëgjohej në disa momente ajo që dëshmoi për lënien e shpirtit të tij në skenë.

Edhe pse në të shumtën e rasteve, ishte violinisti Banda ai i cili mori gjithë vëmendjen për shkak të pozicionimit të tij në skenë, ai shpeshherë kthente kokën e tij prapa për të komunikuar me sy me pianistin Balogh i cili qëndronte i ulur në ulësen prapa trupit të violinistit. Ky komunikim që gërshetohej edhe me komunikimin në publik, arriti që të krijonte një lidhje mes tyre. Mbrëmë, pianisti Balogh, violinisti Banda dhe publiku u futën në karuselin e muzikës klasike dhe përjetuan një mbrëmje me rotacione të ndryshme muzikore.

Kështu, krejt në fund ishte improvizimi i veprës “Nocturne in C#-mol” nga kompozitori Frédéric Chopin ajo që kishte ardhur dedikim ndaj “Chopin Piano Fest”, ngase është përshtatur për violinë dhe piano. Kjo vepër që shënoi fundin e kësaj nate e cila mbaroi fiks në orën 22:03, përmbylli një program të tërë veprash që erdhën nëpërmjet dyshes së talentuar.

Pas gjithë asaj performance të pianistit Balogh dhe violinistit Banda, duartrokitjet dhe brohoritjet për dedikimin e tyre ndaj këtij festivali nuk po mbaronin. Qysh nga fillimi i interpretimit të veprave të njohura botërore e deri në fund të tyre, publiku ishte ai që i përcolli ata me një emocion të pashoq. Ndërsa, kur nata shënoi fundin ishin të pranishmit ata që u ngritën në këmbë dhe me buzëqeshje i përcollën të dy instrumentistët deri në prapaskenë me një mori duartrokitjesh si dhe buqeta lulesh.

Për të treguar më shumë rreth programit të përzgjedhur dhe bashkëpunimin me violinistin, për KultPlus foli pianisti Adam Balogh.

“Publiku ishte kaq i mrekullueshëm dhe ishte më mirë se që e kemi pritur ne. Pjesa e parë e programit ishte shumë tradicionale dhe pjesa e dytë kishte shumë transkriptime. Është hera e parë që luaj me violinistin Banda dhe ai është vërtetë i mrekullueshëm dhe i talentuar. Gjithashtu, ky ishte një projekt shumë i shpejtë për t’u bashkuar me të sepse kishim bërë vetëm disa prova, por ishte një përvojë shumë e mirë për të dy ne”, shpalos ai.

Ndërsa, pianisti Agron Shujaku për KultPlus është shprehur se shprehja artistike e të dy instrumentistëve ishte diçka që ai nuk e kishte dëgjuar shumë moti.

“Unë isha në mëdyshje që të vija në këtë koncert por e kuptova shumë shpejt që nuk kam gabuar që kam ardhur. Ishin dy artistë që më prekën me atë interpretimin e tyre shumë suptil. Zakonisht nuk më pëlqejnë dyshet në violinë dhe piano por me të vërtetë ata ishin të mahnitshëm. Ajo se çfarë e bënë të veçantë interpretimin e tyre, është ndjenja e shprehjes artistike shumë suptile, diçka që moti nuk kam dëgjuar dhe mungon shumë tek ne”, thotë Shujaku.

Po ashtu, drejtoresha artistike e festivalit, Lejla Pula për KultPlus tha se programi ishte tejet interesant si dhe instrumentistët dukshëm dëshmuan për virtuozitetin e tyre.

“Jam vërtetë e kënaqur që shpalosen vlerat të interpretimit pianistik nëpërmjet virtuozitetit që erdhi sonte në skenë. Koncerti ishte i jashtëzakonshëm me violinistin dhe pianistin të cilët bashkëpunonin muzikalisht në një nivel shumë të lartë. Edhe programi ishte tejet interesant e sidomos me sonatën e fundit që erdhi shumë bukur”, thotë Pula.

‘Chopin Piano Fest’ gjatë këtij edicioni do të prezantojë edhe 8 koncerte të tjera në vazhdim. Nata e tetë e këtij festivali vjen më datë 25 maj ku do të interpretojë pianisti austriak, Stefan Vladar në një mbrëmje “Piano Recital” në Amfiteatrin e Ri të Bibliotekës Universitare, duke filluar nga ora 20:00. / KultPlus.com

Arben Ramadani & Armend Xhaferi mbrëmë erdhën “Pa kornizë”, sollën një koncert që doli përtej limiteve

Posted on by Kult Plus

Era Berisha

Një mprehtësi e thellë e tingullit jo të zakonshëm që buronte lehtësisht dhe sillte një emocion të pakrahasueshëm që vendosej pikërisht përbrenda qenies së njeriut, erdhi mbrëmë nëpërmjet mbizotërimit të dy instrumentistëve kosovar, pianistit Arben Ramadani dhe kitaristit Armend Xhaferi, të cilët mbrëmë pushtuan skenën me madhështinë e muzikës xhaz e cila për herë të parë shkeli me këmbë në festivalin “Chopin Piano Fest”, shkruan KultPlus.

Në edicionin e dymbëdhjetë të festivalit, kjo është hera e parë që muzika xhaz ka një hapësirë tejet të veçantë në programin e larmishëm të tyre. E kjo ndërhyrje dukshëm solli me vete edhe një publik krejt ndryshe mbrëmë në sallën e Amfiteatrit të Ri të Bibliotekës Universitare. Ndonëse ndriçimi ishte i njëjtë si në katër netët paraprake, përsëri ishin dritat e ngrohta përreth dhe sipër skenës ato të cilat dukshëm iu vinin në ndihmë publikut i cili shikonte me ëndje interpretimin e dy instrumentistëve në skenë. Me reflektorë me ngjyrë të bardhë që vinin në pah logon e dizajnit në prapaskenë dhe dritën natyrale e cila gjithmonë rri e vendosur sipër hapësirës në publik, të pranishmit mirëpritën me duartrokitje e buzëqeshje një mbrëmje e cila vulosi këtë edicion me kujtime të paharrueshme.

Hapjen e kësaj mbrëmjeje të festivalit ‘Chopin Piano Fest’ e nisi drejtoresha organizative e festivalit, Besa Luzha e cila u shpreh se ndjehet mjaft e kënaqur që në mbrëmjen e pestë të këtij edicioni, është një natë krejtësisht ndryshe nga të tjerat, madje për të gjithë festivalin në përgjithësi.

Për të pranishmit të cilët nuk kishin dëgjuar akoma talentin e mirënjohur të dy instrumentistëve, ishte prezent dhe një libërth që përmbante fakte dhe informacione për pjesëmarrësit në edicionin e 12-të të Chopin Piano Fest. Ndërkaq, përpara se koncerti të shënonte fillimin e tij, skena ishte pushtuar nga tela të cilët janë të njohur për skenën e një koncerti xhaz. Të gërshetuar mes vete, ata ndihmonin për një audio më të mirë të kitarës që pas pak do të pushtohej nga kitaristi Armend Xhaferi.

Në skenë, doli kitaristi Armend Xhaferi i cili e nisi koncertin me një interpretim të dy pjesëve të xhazit dhe e përfundoi atë me një pjesë të vetë kompozimit të tij. Ky interpretim që u shoqërua gjithandej me një qetësi absolute nga ana e publikut, solli melodi të cilat i dhanë jetë skenës dhe e gjallëruan atë në një mënyrë tejet të çoroditur. Ishin tingujt ata të cilët këndshëm rrotulloheshin në atmosferë për të kapluar kështu gjithë vëmendjen e të pranishmëve ndaj vijës melodike sa të butë e të lehtë aq edhe intime.

Ndërkaq, kitara e cila ishte shndërruar në një trup të dytë në skenë krahas kitaristit, ishte ajo që mori vështrime ziliqare. E bukur në pamje, por madhështore në ndezjen e saj, ajo kaploi çdo shpirt të pranishëm nën vorbullën e saj magjike. E interpretimi mahnitës nga kitaristi Xhaferi bëri që pjesa e parë e kësaj mbrëmjeje të jehojë në plot katër muret e vendit dhe jo vetëm.

Gishtërinjtë mbi kitarë dukeshin se kishin marrë një elektrizim të tyrin i cili të jepte ndjenjën se nuk do të kishte fund. Që nga fillimi e deri në përfundim, ata nuk pushonin lëvizjet e tyre precize të kontrolluara nga vetë kitaristi. Ndërsa, ishin vetë shprehjet e fytyrës së tij dhe luhatjet e lehta trupore të cilat dëshmonin për një pasion të zjarrtë për muzikën xhaz. Përgjatë gjithë natës, ti nuk mund të definoje se kush kënd e kishte kapluar në një rënkim melodish. Kitara kitaristin apo e kundërta.

Gjithashtu, pjesa e dytë solli pianistin Arben Ramadani për një rikthim të fuqishëm në skenën shqiptare. Pas rreth shtatë vitesh, ai përsëri shkeli skenën shqiptare dhe e pushtoi atë me një interpretim të pashoq në piano. Prezenca e tij skenike dhe ndryshe nga të gjithë interpretuesit e tjerë, po tregonte për një talent që rrallëherë e gjejmë në mesin tonë. Pianoja përballë tij dhe ai përballë pianos, ishte një dyshe e mrekullueshme që qysh në sekondën e parë tërhoqi dëgjuesin e pranishëm pas vijës melodike.

Meloditë e pastra që vinin ëmbëlsisht nga instrumenti gjigand arrinin të hynin lehtazi përbrenda shpirtit të gjithsecilit. Me një kompleks tingullor, pianisti interpretoi vepra të cilat erdhën krejtësisht ndryshe nga që e prisnim. Introverte në thelb, por aq të fuqishme në atmosferë, veprat e performuara sollën një koncert pianistik që asnjëherë nuk është shfaqur më parë. Nata e mbrëmshme dukshëm la përshtypje të jashtëzakonshme tek publiku kosovar dhe kjo vërehej më së miri edhe atëherë kur të gjithë sytë e pranishëm nuk po largoheshin aspak nga skena e cila ishte e dekoruar me lule shumëngjyrëshe të cilat njëlloj portretizonin llojllojshmërinë e tingujve dhe melodive që buronin nga pianoja.

Eleganca e pianistit Arben Ramadani nuk erdhi vetëm nëpërmjet qëndrimit të tij skenik, ajo u shfaq dhe në lojën e tij pianistike. Vija e tij melodike që posedonte një qartësi të paparë po e fuste publikun në një drithërimë sa të lehtë aq edhe frymëzuese. Karakteristik në lëvizjet e tij, pianisti zotëronte një teknikë autentike të vetën, gjë kjo që të gjithë sallën e shndërroi në pronësinë e tij muzikale. Me sy e vesh drejt skenës, të pranishmit u magjepsën pas jo vetëm instrumentit bardh e zi, por edhe pas pianistit që këtë instrument e bënte të dukej i vogël në krahasim me talentin e tij.

“Chopin Piano Fest” po vazhdon që edhe në natën e pestë të tij të dëshmoj një kapacitet të lartë të profesionistëve kosovarë në muzikë, për të cilët publiku dukej se ishte i etur për t’i parë e dëgjuar.

Kështu, krejt në fund, vepra e cila përmbylli natën në mënyrë fenomenale ishte kënga “Martesa jonë”. Kjo këngë e dëgjuar sa e sa herë përmes zërave më të njohur shqiptarë, mbrëmë erdhi nga dueti unik i pianistit Ramadani dhe kitaristit Xhaferi. Interpretimi i tyre aq i afërt me njëri-tjetrin erdhi në një nivel që se kishim dëgjuar e parë më herët. Një emocion i rrallë në skenë u ngjall nga kjo dyshe e cila gërshetoi pianon dhe kitarën në një këngë shqipe që shënoi fundin e kësaj mbrëmje madhështore.

Ky koncert në thelb përmbante disa vepra popullore dhe “Nokturna” të kompozitorit Frédéric Chopin, në fakt nuk kishte një përmbajtje të saktë të programit, për arsye se dyshja me dëshirën e tyre sollën improvizime në vepra të ndryshme të xhazit. Kjo ndodhi me qëllim që gjithçka të ishte spontane jo vetëm në skenë por edhe në muzikë. Kjo padyshim që solli një koncert tejet unik, duke filluar nga vetë programi që ishte i titulluar “The story of Arben” dhe “The story of Armend”. Ndërsa vetë koncerti erdhi në emërtimin “Pa kornizë”, një emërtim ky i saktë për këtë mbrëmje që me të vërtetë doli përtej limitit dhe solli një interpretim shpirtëror dhe tejet personal të vetë instrumentistëve.

Pas këtyre perfomancave të shumta ku secila erdhi në një frymë ndryshe, ishin duartrokitjet dhe brohoritjet e shumta ato të cilat u bënë pjesë kyçe në hapësirën e publikut i cili u ngrit në këmbë dhe vazhdonte të falënderonte të dy instrumentistët.

Për të treguar më shumë rreth natës së mbrëmshme, për KultPlus foli dirigjenti Edon Ramadani i cili e vlerësoi lartë këtë dyshe.

“Kjo është diçka e re përbrenda festivalit. Është diçka shumë e bukur sepse edhe unë shpesh kam eksperimentuar dhe jam adhurues i të dy zhanreve, klasikes dhe xhazit. Arbeni është një pianist shumë i veçantë duke marrë parasysh se në interpretimin e tij ka edhe shumë ngjyrime të impresionizmit dhe klasicizmit. Ai është edhe një njohës shumë i mirë i polifonisë së barokut dhe të gjitha këto ai i shfrytëzon shumë bukur dhe krijon një stil unik të vetes si xhaz pianist”, thotë Ramadani.

Sipas tij, publiku kosovar e mirëpret shumë mirë muzikën xhaz dhe natyrisht është shumë i etur për të dëgjuar këtë zhanër në mungesë të koncerteve dhe festivaleve xhaz.

Ndërkaq pianisti Arben Ramadani për KultPlus tregoi emocionet e tij për një rikthim në vendin e tij si dhe bashkëpunimin me kitaristin.

“Është shumë emocionues rikthimi pas shumë viteve në një vend ku unë kam lind dhe kam performuar në prani të audiencës shqiptare. Unë ende e ndjej veten këtu dhe jam i lidhur në njëfarë mënyre mistike me këtë vend. Andaj, ky ka qenë rast shumë i qëlluar. Ne me Armendin kemi ushtruar dje dhe menjëherë kishim një interaksion të paparë me të në muzikë”, thotë ai.

Arbeni tregoi tutje se programi ka qenë jo i planifikuar por një improvizim i hapur, gjithmonë duke u bazuar në disa shtylla.

Po ashtu, kitaristi Armend Xhaferi për KultPlus shpalosi përshtypjet e tij pas një koncerti të tillë.

“Kjo është hera e parë që po marr pjesë në një festival të muzikës klasike. Ishte një kënaqësi e madhe për të performuar me Arbenin sepse kemi pasur dëshirë qysh herët që të performojmë së bashku. Kryesisht ideja ishte që të mos shkojmë me muzikë të përgatitur që në njëfarë mënyre të nxjerrim muzikën që na është mbledhur në shpirt tash e sa vite. Donim që muzika të dilte spontanisht”, thotë Xhaferi i cili tutje tregoi se kjo është hera e parë që ata të dy interpretojnë së bashku në një koncert.

‘Chopin Piano Fest’ gjatë këtij edicioni do të prezantojë edhe 10 koncerte të tjera në vazhdim. Nata e gjashtë e këtij festivali vjen më datë 20 maj ku do të interpretojë pianisti gjerman, Florian Uhlig në një mbrëmje “Piano Recital” në Amfiteatrin e Ri të Bibliotekës Universitare, duke filluar nga ora 20:00. / KultPlus.com

“Recital në piano” me François Dumont solli mbrëmë një lojë madhështore në ‘Chopin Piano Fest’

Posted on by Kult Plus

Era Berisha

I vendosur thellë në brendësinë e pianistit François Dumont, qëndronte besueshmëria e mrekullueshme që ai e posedonte në vetvete. Me një qëndrueshmëri në skenë, prezencë të pakrahasueshme dhe një pasion që i fliste vazhdimisht publikut, ai solli vepra jashtëzakonisht të vështira në realizim por aq të bukura në pamje, me ç’rast zotëroi jo vetëm çelësat bardh e zi para tij por të gjithë vëmendjen e gjithsecilit duke arritur një kulminacion nëpërmjet së cilës dukshëm dallohej fundi i çdo vepre mahnitëse, shkruan KultPlus.

Si në secilin koncert, hapësira në Amfiteatrin e Ri të Bibliotekës Universitare qëndronte e njëjtë. Me katër drita të ngrohta që vinin në pah punën e palodhshme të pianistit në skenë, dy reflektorë në ngjyrë vjollcë që shndrisnin mbi perdet bardh e zi të cilat portretizonin dizajnin e festivalit, dritën natyrale e cila vinte sipër nga dritarja e madhe rrethore mu në mes të vendit si dhe lulet e renditura poshtë në skenë, po krijohej një atmosferë e ngrohtë mes të pranishmëve që po prisnin me padurim shënimin e fillimit të këtij koncerti.

“Mirëserdhët në edicionin e dymbëdhjetë të Chopin Piano Fest. Ne jemi shumë të lumtur që në këtë mbrëmje po bashkëpunojmë me Ambasadën Franceze në Kosovë për të sjell një pianist të vërtetë të skenave botërore siç është pianisti Dumont i cili njëkohësisht është fitues i garave të Chopin”, thotë Luzha.

Ndërkaq, ambasadorja e Republikës së Francës në Kosovë, Marie-Christine Butel po ashtu ka shprehur kënaqësinë e saj rreth këtij bashkëpunimi dhe e uroi festivalin për edicionin e 12-të.

Pas këtyre fjalimeve, në sallë mbizotëroi heshtja për të sjellë në skenë me duartrokitje të shumta pianistin i cili fiks në orën 20:20 lëshoi tingullin e parë të veprës së parë për këtë mbrëmje. Me një program tejet të pasur dhe të larmishme në renditje, pianisti Dumont solli veprat e kompozitorit të njohur Frédéric Chopin si: “Impromtu n.3 op.51”, “Impromptu n1. Op.29”, “Nocturne op.48 n.1”, “Ballade n.1 op.23”, “Nocturne op.9 n.2”, “Ballade n.3 op.47”. Ndërkaq, pjesa e dytë e mbrëmjes përfshiu veprat si: “Ballade n.2 op.38”, “Largo (Variation on Bellini’s Puritani, from Hexameron)”, “Fantaisie-impromptu”, “Impromptu n.2 op.36”, “Scherzo n.3 op.39”, “Mazurka op.63 n.2” dhe “Ballade n.4 op.52”.

Tash e katër net festivali ka sjell mbrëmje të cilat kanë lënë gjurmë në kujtesën e secilit por kësaj here ishte më ndryshe. Lëvizjet e tij precize në secilin moment dëshmuan për talentin e tij i cili shfaqej ëmbëlsisht në notat nga më të lehtat e deri ato më të rëndat. Por veçantia e tij qëndronte tek përzierja e qetësisë dhe ashpërsisë në një ndërlidhje të magjishme e cila solli tinguj dhe melodi që nuk u shqiteshin shpirtit të pranishëm.

Lëvizjet e gishtërinjve të tij herë në një rëndim të rëndomtë e herë vetëm në prekje tejet të lehta të çelësave, pozicionimi i këmbëve të tij varësisht veprës, vështrimet e tij që dukshëm tregonin për një dashuri që i dedikohej vetëm instrumentit të pianos, fuqia e tij pianistike që i portretizohej në mbylljen e syve dhe magjinë e interpretimit, shpalosën një dhunti që vështirë se e shohim shpesh. Përveç kësaj, performimi i tij përgjatë pothuajse dy orëve të veprave të vetëm një kompozitori, nuk solli aspak një monotoni. Përkundrazi, niveli i lartë artistik i tij herë frymonte në një melankoli dhe herë tjera sillte një frymë më të ashpër, por qetësia e interpretimit e tij arriti që këtë mbrëmje ta fuste në një strehë ku fluturonin tingujt në secilin cep. Sytë e të pranishmëve pothuajse po kapnin secilën notë të dhuruar dhe po i mbanin ato në mendje, e kjo vërehej dhe atëherë kur kokat e tyre lëviznin në një vijë me kokën e pianistit.

Në anën e djathtë e në anën e majtë, po kthehej koka e pianistit Dumont i cili vazhdonte interpretimin e tij të mahnitshëm të melodive nga më të butat ndonjëherë. Nuk ishte vetëm vendi ai i cili po hipnotizohej nga këto vepra që në një mënyrë brilante erdhën mbrëmë dhe vallëzuan me publikun i cili tash e sa kohë është i etur për koncerte klasike të këtij niveli. Ndërkaq, kur performanca e tij artistike  arrinte kulmin në fundin e çdo vepre, dora e tij e majtë qëndronte në ajër për ca çaste dhe ajo qetësi hyjnore nuk do të krahasohej me asnjë moment tjetër përgjatë mbrëmjes. Në anën tjetër, me dorën e djathtë të tij ai prekte gjithë çelësat bardh e zi në një rrjedhë të lehtë e që njëkohësisht shpalosi një teknikë tejet të bukur, përshtypjet e së cilës dalloheshin edhe në mesin e të pranishmëve.

Madhështia e lojës pianistike të pianistit mbrëmë po ndikonte tek çdo njeri i pranishëm. Shprehjet e fytyrave në publik tregonin për një entuziazëm të pashoq e kjo vinte pikërisht nga talenti i Dumont që ai e kishte përbrenda vetes. Një inspirim për shumë kë e një shembull për tu ndjekur, pianisti mbrëmë rrëmbeu zemrat e gjithsecilit duke i lënë kështu ata me momente që do të kujtohen për një kohë të gjatë dhe me një ëndje do të fshihen në katër muret e kujtesës sonë.

Tashmë ishte radha e publikut që të interpretojë një numër të madh të duartrokitjeve dhe fishkëllimave të cilat ndërlidheshin në një harmoni që e riktheu pianistin për të dytën herë në skenë. Ndërsa, falënderimet për të nuk munguan as edhe pas përfundimit të koncertit, me ç’rast ishin fotografitë dhe buzëqeshjet e shumta që zunë vend pas mbylljes së notave të fundit për këtë mbrëmje.

Pianisti François Dumont për KultPlus foli rreth emocioneve të tij pas një koncerti të tillë si dhe komunikimit me audiencën.

“Ishte diçka shumë e fortë për mua që isha këtu sonte sepse takova njerëz shumë të ndjeshëm dhe emocionalë që reagojnë ndaj muzikës. Festivali është i mrekullueshëm sepse tregon diversitetin e muzikës së Chopin dhe sigurisht është një festival jashtëzakonisht cilësor. Publiku këtu është shumë spontan dhe bujar në dëgjimin dhe vlerësimin e tyre, kështu që për mua si interpretues ishte shumë e bukur dhe një moment i këndshëm”, thotë Dumont.

Sipas tij, ai ndjeju një lidhje shumë të natyrshme, sepse me disa audienca kur ai luan, ndjehet pak një pengesë e vogël, por që këtu nuk kishte fare një barrierë e tillë.

Pianistja Zana Badivuku-Basha për KultPlus tha se pianisti ka arritur të realizojë vepra të një niveli shumë të lartë.

“Prej biografisë së këtij artisti, e pamë që ai zotëron një numër të madh të veprave të kompozitorëve të njohur. Sonte e patëm rastin të shohim një opus shumë të gjerë, duke përfshirë katër balada, mazurkat, nokturnat e famshme dhe ne ishim me të vërtetë shumë të pasionuar pas tingullit të tij, tingull ky që na ofrojë nuanca të ndryshme që nga më të lehtat e deri në kulminacione”, thotë Badivuku-Basha.

Sipas saj, pianisti me shumë lehtësi realizonte veprat e nivelit shumë të lartë si dhe veprat që ishin mjaft të vështira në teknikë, por që për veshin e dëgjuesit dalin si shumë të thjeshta.

Po ashtu për KultPlus pianistja Valbona Pula-Petrovci tregoi përshtypjet e saj rreth interpretimit të pianistit që sipas saj ishte i mrekullueshëm.

“Ishte një performancë vërtetë e mrekullueshme dhe mua po më vjen mirë që iu është mundësuar publikut ta dëgjojë një mbrëmje të tërë me veprat e Chopenit të cilat edhe dallohen për një sensibilitet të jashtëzakonshëm e mes tjerash më vjen mirë që ky është edicioni i dymbëdhjetë dhe që interesimi i publikut është i jashtëzakonshëm, gjë kjo që tregon se publiku është i etur për ngjarjet të tilla kulturore”, thotë Pula-Petrovci.

‘Chopin Piano Fest’ gjatë këtij edicioni do të prezantojë edhe 11 koncerte të tjera në vazhdim. Nata e pestë e këtij festivali vjen më datë 18 maj ku do të interpretojnë Arben Ramadani në piano dhe Armend Xhaferi në kitarë në një mbrëmje ‘Jazz & Improvisation’ në Amfiteatrin e Ri të Bibliotekës Universitare, duke filluar nga ora 20:00. / KultPlus.com

“Piano Recital” me pianistin François Dumont, sonte në ‘Chopin Piano Fest’

Posted on by Kult Plus

Edicioni i 12-të i festivalit të muzikës klasike ‘Chopin Piano Fest’ tashmë ka filluar rrugëtimin e tij të suksesshëm, përcjell KultPlus.

Festivali më i madh i muzikës klasike i organizuar në Kosovë, këtë vit pritet të ketë 15 koncerte, masterklase, punëtori, gara të ndryshme e aktivitete kulturore. Do të jenë të ftuar kompozitor e pianistë nga vende të ndryshme të Evropës të cilët do të shpalosin para publikut kosovar veprat më të mëdha në piano.

Ndërkaq sonte do të performoj pianisti i shquar François Dumont, nën “Piano Recital”, koncert ky që vjen në bashkëpunim me Ambasadën e Francës në Kosovë, duke filluar nga ora 20:00.

Edicioni i sivjetshëm do të sjellë muzikantë nga Kosova, Shqipëria, Maqedonia, Franca, Austria, Gjermania, Italia, Hungaria, Holanda, Sllovenia dhe Spanja. / KultPlus.com

Pianisti Martín García García hapi ‘Chopin Piano Fest’ me vepra dhe interpretim të nivelit botëror

Posted on by Kult Plus

Era Berisha

Edicionin e tij të 12-të, festivali ‘Chopin Piano Fest’ e nisi mbrëmë me interpretimin e pianistit nga Spanja, Martín García García, i cili nën tingujt romantik solli vepra që lanë gjurmë të dukshme në tërë historinë e rrugëtimit të festivalit. Me vepra të cilat në vete përmbanin vija melodike aq të pasura, gjallëria dhe shpejtësia e pakrahasueshme e pianistit do të ishin ato rrënjët e dalluara të talentit të tij që për tërë natën sollën tinguj të cilat lulëzonin midis dinamikës dhe ndjeshmërisë, me ç’rast emocioni që portretizohej pa shkujdesje në çdo moment, arriti të vulosë edhe kulminacionin e secilës kryevepër, shkruan KultPlus.

Për dallim nga edicioni i kaluar, Amfiteatri i ri i Bibliotekës Universitare ishte i mbushur cak më cak. Fytyra të shumta të të rinjve, atyre në moshë si dhe të fëmijëve po përshkonin tërë sallën e cila dukshëm kishte përdorur tërë hapësirën e mundshme. Me karrige të shtuara në numër, dy reflektorë në ngjyrë vjollcë që kanë qenë dëshmitar për punën e palodhshme të pianistit, dritave të ngrohta të vendosura gjithandej, dritës natyrale që vinte pingul nga qielli mbi kokën e të pranishmëve si dhe perdet në ngjyrë të zezë që portretizonin dizajnin e këtij edicioni të festivalit, kanë krijuar një atmosferë të ngrohtë që po rriste emancipimin e publikut i cili me padurim po priste të përjetonte një natë të mbushur me plot veçanti.

Hapjen e festivalit ‘Chopin Piano Fest’ e nisi drejtoresha artistike Lelja Pula e cila fillimisht tregoi për bashkëpunimin e parë me Zyrën e Bashkimit Evropian, pastaj shpalosi edhe një nga risitë më të veçanta të këtij edicioni.

“Sivjet e fillojmë festivalin me një ditë shumë të veçantë për të gjithë ne, në ditën e Evropës duke shënuar edhe për herën e parë bashkëpunimin tonë me Zyrën e Bashkimit Evropian në Kosovë. Ndihemi të nderuar me ardhjen e pianistit virtuoz nga Spanja, Martín García García i cili është një nga fituesit e çmimit të garave të Chopeni-t në Varshavë në vitin 2021, një nga konkurset më të mëdha e më të rëndësishmet në botë. Njëkohësisht jemi të privilegjuar të jemi pjesë e projektit SYNERGY së bashku me pesë festivalet më të rëndësishme nga rajoni. Qëllimi kryesor i festivalit është prezantimi dhe kultivimi i vlerave të mirëfillta artistike muzikore por edhe vlerave të muzikës së vendit tonë”, thotë Pula.

Sipas saj, i gjithë programi koncertal që është përgatitur për publikun, ka për synim të paraqes çaste të paharruara të përjetimit artistik, ku përgjatë një muaji përmes 14 koncerteve shpalosen programet e larmishme të nivelit më të lartë artistik.

Drejtoresha organizative e festivalit, Besa Luzha foli rreth kontributit që ky festival ka sjell përgjatë 12 viteve në një sallë e cila nuk është e duhur për këto koncerte.

“Rrugëtimi i gjatë prej 12 viteve ka qenë i mundur vetëm falë përkrahjes së shumë institucioneve dhe siç e dimë ne ende nuk e kemi një sallë koncertale. Por për këto vitet e fundit, për fat të mirë, kemi gjetur hapësirën që na ka ofruar Universiteti i Prishtinës, në një sallë e cila nuk është për koncerte por ne e kemi shndërruar në një të tillë. Përpos punës tonë akademike, mundohemi që edhe me këtë festival të ofrojmë një kontribut gjithë shoqërisë tonë dhe komunitetit artistik”, thotë Luzha.

Rektori i Universitetit të Prishtinës, Naser Sahiti ka thënë se ky festival është një dritare lidhëse ndërmjet artit kosovar dhe veprave kulmore artistike ndërkombëtare.

“Ky festival këtë vit po organizohet për të dymbëdhjetën herë dhe mbajtja në jetë me sukses për një periudhë kaq të gjatë të kësaj ngjarjeje kulturore në këtë mënyrë dhe shndërrimi në një ngjarje tradicionale, paraqet në vetvete sukses të veçantë. Ky festival tradicionalisht ka sjell në vendin tonë, artistë të mirënjohur ndërkombëtarë nga mbarë bota, duke shërbyer kështu si një dritare ndërlidhëse ndërmjet artit kosovar dhe veprave kulmore artistike ndërkombëtare. Në këtë mënyrë, Chopin Piano Fest ka mundësuar ndër vite që përveç prezantimit të veprave nga artistë ndërkombëtarë, përpara artdashësve të Kosovës, të ofrojë mundësi të përkryer edhe për artistë të rinj nga Kosova në mënyrë që ata të prezantohen me kontributet e tyre artistike para emrave të njohur ndërkombëtarë”, thotë Sahiti.

Sipas tij, për UP-në, ngjarjet si kjo sjellin freski në aktivitete të zakonshme akademike dhe po ashtu ndihmojnë në pasurimin e jetës kulturore për studentët dhe mësimdhënësit.

Tutje, ambasadori Tomáš Szunyog ka uruar ditën e Evropës dhe në të njëjtën kohë ka përgëzuar të pranishmit për këtë aktivitet.

“Është kënaqësi dhe privilegj që jam këtu në këtë mbrëmje për hapjen e këtij edicioni në Prishtinë. Sot ne festojmë Ditën e Evropës dhe jam shumë mirënjohës që ju na leni të shijojmë muzikën tuaj në këtë rast të veçantë. Jam i kënaqur që shoh një kulturë të tillë shkëmbimi. Në fund të fundit, muzika dhe kultura na lidh të gjithëve dhe kjo mbrëmje nuk do të jetë ndryshe nga ajo”, thotë Szunyog.

Ministri i Kulturës, Rinisë dhe Sportit, Hajrulla Çeku e konsideroi këtë festival si njërin ndër më të rëndësishmit si dhe e cilësoi atë si një nga ngjarjet që ka kontribuar në futjen e Kosovës në hartën botërore.

“Besoj që nuk ka mënyrë më të mirë për të shënuar një ditë kaq të rëndësishme për shtetin tonë dhe për të treguar ambiciet tona evropiane sesa me një koncert pianistik, me rastin e hapjes ‘Chopin Piano Fest Prishtina’. Është një nga festivalet më të rëndësishme në vendin tonë dhe një nga ngjarjet që ka ndikuar e kontribuar që Kosova të futet në hartën jo vetëm evropiane por edhe botërore. Unë vetëm dua të shpreh mirënjohjen time të thellë personale dhe institucionale për profesoreshën Lejla, Besa dhe të tjerët. Andaj, do të doja të ju ftoja që me një duartrokitje ta shprehim mirënjohjen tonë për punën kolosale që kanë bërë sepse ky organizim nuk është më vetëm një festival por është një histori”, thotë Çeku.

Pas këtyre fjalimeve, në sallë mbizotëroi heshtja për të sjellë në skenë fillimisht një vepër e cila vuri në shënjim solidarizimin me Ukrainën me një mesazh për paqe, dashuri dhe mirësi në mes njerëzish.

Martín García García, pianisti nga Spanja me veprat e kompozitorit të njohur J.S.Bach të titulluara “Prelude and Fugue g-mol BWW, Book II”, “Prelude and Fugue C-dur BWW, Book I” dhe “Prelude and Fugue D-dur BWW, Book I”, solli një fillim që lehtazi kaploi të pranishmit në befasi me përqendrimin preciz të tij. Skena u shndërrua në trupin e tij të dytë dhe hija e atij trupi krijoi një çati mbi të pranishmit të cilët ishin dëshmitarë për ritmin dinamik, kërcimet trupore të tij si dhe ato të kokës me ç’rast kaçurrelat e tij kërcenin në një hap me meloditë që pa ndalur krijuan një atmosferë magjike.

Lëvizjet e tij të gishtërinjve, pozicionimi i trupit herë afër çelësave bardh e zi e herë sa më larg tyre, fuqia ndëshkuese kundrejt çelësave dhe tasteve, vështrimet e tij drejt instrumentit gjigand para tij si dhe djersët që i rrëshqitnin nga vetullat, shpalosën efikasitetin e këtij pianisti i cili me talentin e tij mbrëmë e strehoi një numër të madh njerëzish, trupat e të cilëve ishin kthyer në statuja muzesh teksa sytë e tyre fluturonin në drejtim të skenës. Ndërsa veshët e të pranishmëve përjetonin melodi e tinguj që jehonin përbrenda shpirtit të njeriut, pianisti vazhdonte të interpretonte me një butësi e cila dallohej në fytyrën e tij.

Pianisti García García përgjatë dy orëve interpretimi të veprave të njohura të kompozitorëve botërorë si: Johann Sebastian Bach, Frédéric Chopin dhe Franz Liszt, shpalosi një program i cili tregoi për nivelin e tij të lartë artistik. Herë në frymë romantike e herë në atë më të ashpër, në çdo moment, ai pushtoi vendin me lojën e tij pianistike. Vetëm një piano mjaftoi që shprehjet e tij të fytyrës të ndërronin nga sekonda në sekondë për të sjell kështu tinguj që hapnin krahët në drejtimin e publikut dhe vallëzonin me dashurinë që shihej në sytë e tyre për interpretimin e momentit. Ndërkaq, lidhja e veçantë e pianistit me pianon e zezë u vërejt edhe në komunikimin e tij artistik me të pranishmit të cilët kishin ngulitur vëmendjen e tyre drejt skenës. Performanca e tij plot fuqi ripushtonte vetveten në secilën herë që meloditë ndërronin kahje, tingujt rëndoheshin dhe zemrat fillonin të rrihnin më shpejt.

Madhështia unike e interpretimit pianistik, mjeshtëria e atij që e zoton skenën, ndërlidhja e një emocioni me tingullin, lëvizjet në kërcim me notën, pasioni i vizatuar në shprehjet e fytyrës, puna e palodhshme pa një partiturë para, lënia e shpirtit përballë botës melodike, ishin këto vetëm disa nga pjesët kyçe që publiku ka arritur të përjetojë. Njeriu i pranishëm tërhiqej vazhdimisht nëpër skutat magjike të lojës interpretuese të pianistit i cili mbrëmë i derdhi ato me një lehtësi të paparë.

Ndërkaq, ishin duartrokitjet e shumta e të panumërueshme, ato të cilat po ashtu u futën nëpër heshtjet e shumta në sallë. Në çdo mesin e një vepre, duartrokitjet pëlcitnin papritmas dhe ishin pikërisht heshtjet precize brenda veprës ato që u mbushën me falënderimet nga ana e publikut që i shpërfaqën në një mënyrë tejet të ëmbël. Si një pjesë e një enigme, edhe publiku u shndërrua në copëzën e fundit, për të kompletuar kështu një natë e cila përherë do të mbetet unike në llojin e vetë.

Pas gjithë kësaj performance të mrekullueshme të tij, brohoritjet mbizotëruan vendin. Ato nuk po pushonin interpretimin e tyre duke vazhduar me minuta të shumtë dhe si një falënderim i mëtejshëm, ishte kthimi i pianistit për të dytën herë në sallë për të sjell edhe copëza tjera artistike.

Misteri i magjisë pianistike do të jetë ai që do e përndjek piansitin Martín García García nëpër çdo vend që ai shkel. Ndërsa, mrekullia që ai solli mbrëmë në festivalin ‘Chopin Piano Fest’ do mbetet për ne një mister i paharrueshëm dhe gjurmët e tij do të mbesin brenda katër mureve të shpirtit artdashës.

Pianisti Martín García García për KultPlus foli rreth emocioneve të tij pas një koncerti të tillë.

“Ndihem shumë mirë sepse nuk e prisja një reagim kaq pozitiv dhe ndjeva një pritje shumë të ngrohtë. Ata iu përgjigjën aq mirë gjithçkaje që i dhashë audiencës, kështu që jam shumë mirënjohës që më patën sonte këtu. Kosova është një vend shumë interesant në botë. Sa herë që vizitoj një vend të ri, më vijnë disa ide dhe këtë herë është shumë interesante, sepse ndihem sikur ky vend meriton shumë më tepër nga koha ime”, thotë García García.

Sipas tij, ai pranoi ofertën e drejtoreshës së festivalit për arsye se ndjeu një intuitë tejet të bukur.

Po ashtu, për të treguar më shumë rreth përzgjedhjes së këtij artisti për këtë natë, për KultPlus foli drejtoresha artistike Lelja Pula.

“Unë këtë pianist e kam dëgjuar në muajin tetor kur isha prezente në një festival dhe ai ishte në raundin e tretë dhe në fund ai e fitoi praktikisht çmimin e dytë të atij festivali por për mua personalisht ai ishte më i miri dhe mua më pëlqej jashtëzakonisht shumë performanca e tij. Isha e mahnitur dhe e kontaktova menjëherë dhe ai pa asnjë hezitim e pa asnjë pyetje, me shumë dëshirë ka ardhur këtu”, thotë Pula.

Sipas saj, kjo sallë ndonëse nuk është më e duhura, së paku ka një akustikë të mirëfilltë që është shumë e rëndësishme për një koncert të tillë.

“Kemi 14 koncerte brenda kornizës një mujore, me programe të ndryshme dhe risinë me një mbrëmje të improvizimit ‘jazz’ me Arben Ramadanin dhe Arben Xhaferin, e kjo do të jetë padyshim shumë interesante. Pastaj do të kemi më shumë duo, trio, instrumente nga më të ndryshmet, pastaj një Kuintet nga Katanja. Besoj që shija e secilit do të ketë vend në këtë edicion”, përfundon ajo.

Gjithashtu, pianistja Alberta Troni për KultPlus tregoi përshtypjet e saj rreth natës së parë në festivalin ‘Chopin Piano Fest’.

“Shpresoj që publiku është ndarë shumë i kënaqur pasi që pianisti është duartrokit shumë gjatë dhe është kthyer shumë gjatë duke u kthyer dy herë për të luajtur përsëri. Jemi shumë të gëzuar që filluam me një vullnet të bukur këtë edicion dhe faktikisht përzgjedhja e këtij pianisti ishte tejet e bukur, i cili ka fituar garën e Chopen-it në Varshavë. Relativisht i ri por ai është një pianist virtuoz që koncerton nëpër të gjitha vendet e botës. Ajo që më pëlqeu ishte që filluam me një pianist shumë të njohur dhe publiku ishte shumë i entuziazmuar”, thotë Troni.

‘Chopin Piano Fest’ gjatë këtij edicioni do të prezantojë edhe 13 koncerte të tjera në vazhdim. Nata e dytë e këtij festivali vjen më datë 12 maj ku do të interpretojë Bernardo Brizani dhe Misbah Kacamaku në Amfiteatrin e Ri të Bibliotekës Universitare. / KultPlus.com

Sonte fillon ‘Chopin PianoFest Prishtina’

Posted on by Kult Plus

Edicioni i 12-të i festivalit të muzikës klasike Chopin Piano Fest do të filloj sonte dhe në ceremoninë hapëse do të jetë i ftuar për të interpretuar, Martin Garcia Garcia, pianist nga Spanja.

Martín García García është pianist i lindur në Gijón, Spanjë, në vitin 1996. Ai filloi studimet e tij muzikore në moshën 5-vjeçare, me Natalia Mazoun dhe Ilyà Goldfarb. I diplomuar në Shkollën e Muzikës Reina Sofía, ai studioi atje për më shumë se një dekadë me Galina Eguiazarova – ku edhe morri çmimin për Studentin më të Mirë të katedrës nga Madhëria e Saj Mbretëresha Sofía. Ai kreu studimet Master në Piano në Mannes School of Music në Nju Jork.

Martín ka fituar çmimet e para në disa konkurse kombëtare dhe ndërkombëtare, duke theksuar fitoren e tij në Konkursin Ndërkombëtar të Pianos në Cleveland 2021 dhe Çmimin e tij të 3-të në Konkursin Ndërkombëtar të XVIII të Chopin të Pianos (dhe çmimin special për Koncertin më të Mirë). Ai mori çmimin e parë në Institutin dhe Festivalin Ndërkombëtar të Tastierës 2018, të mbajtur në Nju Jork ku edhe banoi dy vite, duke përfunduar trajnimin e tij artistik me pianistin e shquar Z. Jerome Rose.

Festivali më i madh i muzikës klasike i organizuar në Kosovë, këtë vit pritet të ketë 15 koncerte, masterklase, punëtori, gara të ndryshme e aktivitete kulturore. Do të jenë të ftuar kompozitor e pianistë nga vende të ndryshme të Evropës të cilët do të shpalosin para publikut kosovar veprat më të mëdha në piano.

Festivali do të filloj sot me 9 maj dhe do të zgjas plot një muaj deri me 9 qershor.

Ceremonia hapëse sot do të filloj nga ora 19:00 në hapësirën e Amfiteatrit të Ri të Bibliotekës Universitare.

Drejtore artistike e këtij festivali është Lejla Haxhiu-Pula.

Edicioni i sivjetshëm do të sjellë muzikantë nga Kosova, Shqipëria, Maqedonia, Franca, Austria, Gjermania, Italia, Hungaria, Holanda, Sllovenia dhe Spanja. / KultPlus.com