Flonja Haxhaj
Kryeveprat e ikonave të muzikës botërore, Ludvig Van Beethoven dhe Ernst von Dohnanyi, zbritën mbrëmë në Prishtinë nën interpretimin e pashoq të Sihana Badivukut në violinë, Blerim Grubit në violë dhe Aristidh Prosit në violonçel, në mbrëmjen e dytë koncertale të festivalit ‘Kosova KamerFest’, përcjell KultPlus
Mbrëmja e dytë koncertale e edicionit të XXI-të të këtij festivali iu kushtua e gjitha pianistit amerikan, Derek Han, i cili ishte mik dhe shtyllë e këtij festivali që nga themelimi i tij në vitin 2001.
Ishin tingujt e instrumenteve harkore ato që lanë pa fjalë për një orë publikun që kishin mbushur plot sallën e Modelariumit në fakultetin e Arkitekturës në Prishtinë, sallë kjo ndonëse e improvizuar, në këtë koncert ishte e përshtatshme në paraqitjen e akustikës së duhur për veshin e dëgjuesve.
Në mbrëmjen kushtuar kolegut dhe mikut të saj, pas performancës foli për KultPlus violinistja dhe drejtoresha artistike e festivalit, Sihana Badivuku e cila mes emocionesh thotë se ky koncert për ‘Trio harkor Kosova’ ka qenë tejet i veçantë dhe me shumë përgjegjësi.
“Kjo mbrëmje për mua si violiniste, artiste dhe si drejtoreshë artistike e festivalit, por edhe e kolegëve të mi, ka qenë shumë e veçantë sepse kemi pasë shumë përgjegjësi sepse ia kemi kushtuar pianistit Derek Han i cili ndërroi jetë vitin e kaluar e ai ka qenë shtyllë e këtij festivali prej vitit 2001”, tha Badivuku e cila shtoi se Han ka qenë një mysafir i përhershëm i festivalit ku kanë luajtur në formacione të ndryshme.
Ndonëse ‘Kosova KamerFest’ u rikthye pas dy viteve mes shumë vështirësive sidomos për shkak të mungesës së sponzorëve, Badivuku thotë se ky edicion ka filluar me këmbë të mbarë për shkak të pjesëmarrjes së artistëve të mirënjohur.
“Koncerti i parë ishte shumë impresiv me violinistin shqiptar me famë botërore Klaidi Sahatçi dhe në piano Merita Rexha Tërshana e cila është zëvendës-dekane në Akademinë e Arteve në Tiranë. Ajo ka qenë edhe më herët në ‘Kosova KamerFest’ kurse Klaidi për herë të parë.Çka është ajo e veçanta prej vitit 2017 është se është zgjeruar ‘Kosova KamerFest’ më degët e festivaleve të ngjajshme në ‘Skupi KamerFest’ dhe ‘Albanian KamerFest’.”, u shpreh ndër të tjerat drejtoresha artistike e festivalit, Sihana Badivuku.
Pas interpretimit të pashoq në mbrëmjen e dytë koncertale, për KultPlus foli edhe violisti Blerim Grubi i cili është njëherësh edhe themelues i këtij festivali.
“Këtë festival e kemi themeluar në vitin 2000, dhe kemi pasur një rrugëtim 21-vjeçar së bashku ku kemi bërë shumë koncerte me shumë artistë botërorë. Shumë ngjarje kulturore kanë kaluar nëpërmjet këtij festival, mundet të shënohet një histori kulutore artistike nëpërmjet këtij festivali sepse nga fillimi kemi pasur emra të njohur botërorë dhe tash në fund pas dy viteve po e rifillojmë, po e rivazhdojmë aty ku kemi mbetur.”, tha Grubi për KultPlus.
Grubi tha se ‘Trio Harkor Kosova’ u kthye sërish në Prishtinë pas shumë performancave në Evropë dhe në festivale të ndryshme evropiane.
“Kishim dëshirë të shprehim një ngushëllim dhe një mirënjohje artistit dhe mikut tonë Derek Han i cili ka pasë një ndjesi shumë të madhe ndaj neve shqiptarëve sidomos artit, kulturës dhe ka bërë gjithçka që të ecë përpara muzika dhe arti duke na përkrahur, ai ka bërë çmos me mënyrat e tij që të bëjmë hapa që ne të shkojmë përpara si shoqëri artistike.”, u shpreh Grubi duke folur për tematikën e këtij koncerti.
I pranishëm në mbrëmjen ku jehoi muzika e dy kompozitorëve që lanë gjurmë në historinë botërore artistike ishte edhe gazetari i kulturës në ‘Rilindje’ i cili e cilëson veçanërisht këtë festival si një bazament të jashtëzakonshëm për muzikën dhe artin në Kosovë.
“Nga i gjithë ai spektër i prezantimeve që deri tashmë janë bërë në Prishtinë, festivali ‘Kosova KamerFest’ ka arritur të sjellë emra më me renome të muzikës kamertale dhe jo vetëm, solistë dhe interpretues të të gjitha fushave artistike dhe ka lënë gjurmë të jashtëzakonshme në jetën muzikore në Kosovë.”, deklaroi Piraj duke shtuar më tutje se përgjatë 22-viteve që nga themelimi ky festival ka lënë gjurmë në jetën artistike muzikore në Kosovë dhe tashmë edhe në Maqedoninë e Veriut dhe më gjerë.
Tutje, Piraj foli edhe për grupin ‘Trio Harkor Kosova’ i cili rikthehet në Prishtinë pas dy viteve pauzë dhe pas një numër të madh të koncerteve në Evropë dhe nëpër festivale të ndryshme.
“Trio Harkor Kosova tashmë ka një kredibilitet të jashtëzakonshëm të prezantimit të vlerave artistike sepse me vite performojnë së bashku, jo vetëm këtu në Prishtinë por edhe më gjerë, krijuar një moment të bukur, një mbrëmje që u pëlqye shumë për faktin sepse, edhe në aspektit stilistik por edhe në aspektin e veprave që prezantuan, krijuan një imazh të bukur dhe vlera që tashmë janë të dëgjuara por që u sollën edhe një herë në skenën e Prishtinës.”, shtoi për fund Piraj.
Ju kujtojmë që publiku do të ketë mundësi të shijojë magjinë e veprave kamertale në ‘Kosova KamerFest’ nga 1 tetor deri më 1 dhjetor 2022 në 11 mbrëmje koncertale.
Përveç koncertit të djeshëm të dedikuar pianistit Han, ky festival e ka emërtimin e çdo koncert me simbol ose të përvjetoreve të kompozitorëve siç janë Cesar Frank dhe Çesk Zadeja, dedikuar fëmijëve me autitëzm etj.
‘Kosova KamerFest’ do të mirpresë edhe artistë të tjerë si: String Trio Kosova, Sihana Badivuku, Blerim Grubi, Aristidh Prosi, ArsKosova Competition 2022 laureats, Vesa Dume, Eda Vlaqo, Elsa Gashi, Dejon Bendaj, Kristina Laqo, Dorina Laro, Galina Koycheva, Duo Lesage, Celine Lesage, Eric Lesage, Jose Manuel Alvarez Losada, Pedro Mateo, Syzana Jakupi, Alba Muçolli, Ensemble XXI, Lygia O’Riordan dhe Pia Sirala./ KultPlus.com
