Etiketë: Edi Rama

Rama: Familjet pa çati do të vendosen në hotelet e Durrësit, Kavajës dhe Vlorës

Posted on by KultPlus

Shumë familje shqiptare kanë mbetë pa kulm mbi kokë si pasojë e tërmeti të madh që ka goditë Shqipërinë, shkruan KultPlus.

Këto familje tashmë janë vendosë në tenda, por kryeministri i Shqipërisë Edi Rama ka paralajmëruar për një zgjidhje për këtë dimër.

Ai ka njoftuar se do të bëjë një marrëveshje me hotelet e Durrësit, Kavajës e Vlorës, ku edhe do të vendosen familjet pa kulm mbi kokë.

Më poshtë po sjellim statusin e plotë të Edi Ramës.

Dimri nuk kalohet dot as nën qiell të hapur e as në tenda, prandaj qeveria do të nënshkruajë një marrëveshje me strukturat hoteliere të Durrësit, Kavajës dhe edhe Vlorës po të jetë nevoja, që të gjitha familjet e mbetura pa çati, të strehohen në kushte optimale, të shërbehen në kushte optimale, t’i kalojnë edhe festat e fundvitit në kushte optimale bashkë me fëmijët e tyre, ndërsa këta të fundit jo vetëm të mos jenë të detyruar të braktisin shkollën asnjë ditë, po edhe të mësojnë në kushte optimal./KultPlus.com

Rama takim me Kurtin dhe aktorët e filmit “Unë dhe Millosheviçi”

Posted on by KultPlus

Kryeministri i Shqipërisë, Edi Rama, është takuar me kryeministrin e ardhshëm të Kosovës, Albin Kurtin, takim ky që ka zgjatur prej disa orësh.

Mirëpo takimit i janë bashkangjitur edhe autorët e aktorët e filmit “Unë dhe Millosheviçi”, film ky që po xhirohet në Shqipëri, shkruan KultPlus.

Takimin e ka bërë publik kryeministri Rama, përmes një statusi në llogarinë e tij personale në Facebook.

Ai shkruan:
“Në mes të një bashkëbisedimi të gjatë prej disa orësh me Albinin, ku hapëm shumë tema të bashkëpunimit dhe mirëkoordinimit të dy qeverive, patëm një moment pushimi të veçantë, me autorët kosovarë dhe aktorin e madh Gerard Depardieu, të cilët po xhirojnë në Shqipëri filmin “Unë dhe Millosheviçi”.

/ KultPlus.com

Vinca mohon të ketë folur për Teatrin Kombëtar, Rama i kërkon ndjesë

Posted on by KultPlus

Në vazhdën e publikimeve të qëndrimit të aktorëve pro ndërtimit të një teatri të ri dhe shembjes së Teatrit Kombëtar ekzistues, kryeministri i Shqipërisë, Edi Rama listoi edhe qëndrimin e Ilire Vincës, aktore dhe regjisore, me një sërë produksionesh të suksesshme dhe anëtare e Këshillit Drejtues të Teatrit Kombëtar të Kosovës.

Në faqen e tij në facebook, Rama publikoi një qëndrim të aktores kosovare, ku shprehej: “Po të kishte mundësi të ndërtohej një teatër i ri në vendin ekzistues do të ishte mrekulli. Teatri është zhvilluar shumë në vendet tjera për nga ana teknike, çka iu mundëson artistëve të sjellin në jetë kreativitetin e tyre, madje edhe i frymëzon për gjetje të reja. Përveç kësaj, një teatër i ri do të krijonte mundësi edhe teknike për punëtorët e teatrit dhe organizimin e shfaqjeve. Nga ana tjetër, edhe për audiencën do të ishte një freski. Uroj të bëhet sa më shpejt!”

Menjëherë pas këtij postimi ka reaguar Vinca përmes një komenti poshtë postimit të Ramës, ku mohon të jetë shprehur ndonjëherë për Teatrin Kombëtar, teksa shton se është hera e dytë që keqkuptohet për këtë çështje.

Pas kësaj ka replikuar Rama, ku teksa përpiqet të bindë aktoren se ky është një citim i shkëputur nga një deklaratë e saj e bërë me 27 qershor nuk nguron edhe ti kërkojë ndjesë për publikimin nëse regjisorja e njohur ka ndryshuar qëndrim për këtë çështje dhe nuk ndan më këtë opinion.

Kjo nuk është hera e parë që aktorët i kundërpërgjigjen Ramës për përdorimin e tyre për një çështje kaq të ndjeshme si teatri. Më herët edhe Mariana Kondi kishte të njëjtën qasje. Rama kishte zgjedhur fjalët e Marjana Kondit, që sipas tij, mendonte te duhet të kemi një Teatër të ri Kombëtar.Në një mesazh në “Facebook”, aktorja theksonte se Rama nuk e ka cituar plotësisht, duke e quajtur këtë një zakon të vjetër të politikës shqiptare që e thotë të vërtetën përgjysmë. Ndër të tjera, ajo shprehte revoltën se shteti shqiptar nuk i ka dhënë asnjë lek për largimin e padrejtë nga puna./oranews / KultPlus.com

Rama, ekspozitë në Norvegji, veprat e kryeministrit shqiptar kërkohen nga muzeu i punimeve me kobalt

Posted on by KultPlus

Muzeu i punimeve me kobalt në Norvegji ka kërkuar të ketë vepra të kryeministrit Edi Rama për një ekspozitë që do të organizojë në vitin 2020. Arti i tij do të vendoset përkrah veprave të tjera të pikturuara nga drejtues shteti si Uinston Çërçill dhe presidenti amerikan, Duajt Ajzenhauer.

Muzeu i punimeve me kobalt ndodhet në një zonë historike të Oslos dhe pret mesatarisht 170 mijë vizitorë në sezon dhe me 50 vite përvojë me kurimet dhe organizimet e ekspozitave të rëndësishme aty janë shfaqur veprat e mjeshtërve nordikë të pikturës. Në vitin 2018 u nderua me çmimin “Muzeu i vitit”.

Ekspozita e fundit e kryeministrit Edi Rama ka qenë në Berlin, në janar të këtij viti.

Artistë, gazetarë, kritikë arti apo miq i kanë përcaktuar hapësirat e ekspozimit të tij njëlloj sikur të hysh në kokën e artistit, pak a shumë në shqetësimin e tij krijues me tapete murale të mbushura plot me vizatimet e tij shumëngjyrëshe përgjatë rutinës ditore.

Janë vizatime mbi letra të lloj-llojshme si një mënyrë për të prodhuar art duke e shndërruar hapësirën e punës në muzeun e tij. Skulptura qeramike me forma abstrakte, me dritë dhe detaje të shumta ngjyrash në to si një përkthim tredimensional të pikturave të tij, duke dhënë përmes këtyre elementëve autenticitetin dhe stilin e tij unik.

Ekspozitat e tij vetjake janë pasqyruar në mediet e huaja me artikuj dashamirës. Shpesh në këto artikuj, shikimi është kthyer nga e shkuara, tek Edi Rama kryebashkiak, ku me ngjyrosjen e godinave komuniste, qyteti dukej më i ri. Vetë ai është shprehur që ky ka qenë më shumë një akt politik, sesa artistik, një lloj terapie përmes së bukurës, ndërsa po ashtu ka thënë se politika me çmendurinë e saj mund ta bëjë artin edhe më të mirë.

Megjithëse ato janë dy botë krejt të ndryshme, ai ka ditur të bashkëjetojë mes tyre.

Edi Rama ka çelur ekspozita në galeritë më prestigjioze në shumë shtete të botës si dhe në Bienalen e Venecias. /atsh / KultPlus.com

Edi Rama me këtë veshje del dhe voton në zgjedhjet në Shqipëri

Posted on by Kult Plus

Kryeministri i Shqipërisë Edi Rama, ka befasuar prapë me veshjen e tij, shkruan KultPlus.

Kryeministri Rama është parë me pantollona të gjera teksa e hedh votën.

Në fjalimin e tij pas votimit ai ka thënë se me popullin nuk luhet dhe se ai është sovrani vendimtar

“Sot është shumë më e rëndësishme Shqipëria dhe mësimi historik që kjo ditë do t’u japë ”, ka shtuar Rama/KultPlus.com       

Akademiku i dërgon letër presidentit e kryeministrit për të shkarkuar Besa Shahinin

Posted on by Kult Plus

Akademiku Artan Fuga, pas akuzave se po synon ta shkrijë Akademinë e Shkencave të Shqipërisë me atë të Malit të Zi e Maqedonisë, i ka dërguar një letër publike Presidentit Ilir Meta dhe kryeministrit Edi Rama ku kërkon të thirret për sqarime e më pas të shkarkohet ministrja e Arsimit, Besa Sahini. “Duke synuar kthimin e tyre “në një të vetme”, qytetarja Besa Shahini flet edhe për të gjithë rajonin. Ideja e bërë publike sot është një provokacion gjeopolitik”,- thotë ai në letrën e hapur.

STATUSI I ARTAN FUGES

Akademia e Shkencave të Shqipërisë dhe Shqipëria në punë të vet, qytetarja Besa Shahini në punë të vet!

——–

Letër publike:

Presidentit të Republikës zotit Ilir Meta !

Kryetarit të Këshillit të Ministrave, zotit Edi Rama !

Kryetarit të Komisionit të Sigurisë të Kuvendit të Shqipërisë!

Po Ju drejtohem me shqetësim të thellë intelektual dhe qytetar lidhur me një deklaratë të papritur të Ministres të arsimit, rinisë dhe sporteve të Republikës të Shqipërisë, qytetares Besa Shahini, bërë sot, më datë 10 maj 2019, e cila në profilin e një rrjeti social deklaron se : “Do të jem edhe unë pjesë e këtij debati ku do të paraqes idenë time për të vendosur në ligj bazat e fillimit të një përafrimi të akademive shqiptare në rajon me synim integrimin në një të vetme.”

Eshtë e çuditshme sepse në asnjë platformë politike të partive parlamentare, të qeverisë, e së cilës ajo është pjesë, e Kushtetutës të Shqipërisë, nuk ekziston ndonjë platformë që t’a justifikojë qytetaren Besa Shahini si ministre e këtij shteti, të punojë për realizimin e një ideje të tillë!

Madje as në Bashkimin Europian nuk kërkohet shkrirja në një të vetme e agjencive publike të shteteve të veçanta anëtare!

Në këtë mënyrë, në pikën kulmore të punimeve të komisionit kuvendor për reformimin e akademisë të shkencave të Shqipërisë, qytetarja Besa Shahini, në funksionin e ministres, që ka për detyrë ligjore të zhvillojë identitetin e institucioneve të arësimit dhe të shkencës dhe të agjencive publike që funksionojnë ligjërisht në shtetin e Shqipërisë, deklaron se punon kundër kësaj mëvetësie, pra punon në të kundërt të betimit të saj si ministre!

Me megalomani kjo ide nënkupton se është qytetarja Besa Shahini që pa konsultuar komunitetin e akademikëve dhe universitarëve që janë qytetarë të shtetit të Shqipërisë, pa konsultuar as programin e qeverisë e së cilës ajo është pjesë, pa respektuar as Kushtetutën e Shqipërisë së cilës ka pranuar t’i shërbejë, po punoka për zhbërjen e mëvetësive të akademisë të shkencave të Shqipërisë, madje shkon edhe më larg, a thua se varet prej saj, edhe zhbërjen e mëvetësisë të akademisë të shkencave të Kosovës dhe më gjerë.

Duke synuar kthimin e tyre “në një të vetme”, qytetarja Besa Shahini flet edhe për të gjithë rajonin.

Ideja e bërë publike sot është një provokacion gjeopolitik.

Cilat janë akademitë e tjera të shkencave shqiptare në rajon veç asaj të Kosovës?

Akademikët shqiptarë në rajon kanë fituar të drejtën e të pasurit në mënyrë dinjitoze të vendeve në akademinë e shkencave të Maqedonisë dhe në atë të Malit të Zi. Si parim, edhe në Akademinë e shkencave të Serbisë. Cfarë nënkupton deklarata e qytetares Besa Shahini? Që akademikët shqiptarë të braktisin këto akademi shkencash dhe të krijojnë akademitë e tyre të shkencave në shtetet përkatëse duke u vetëizoluar? Apo nënkupton që në fund të procesit të ideuar prej saj, akademia e shkencave e Shqipërisë, ajo e Kosovës, të integrohen “në një të vetme” me atë të Serbisë, të Maqedonisë dhe të Malit të Zi?! Apo ideja e saj është që shqiptarët në cilindo nga këto shtete të ish Jugosllavisë të krijojnë akademi shkencash mbi baza etnike dhe pastaj të integrohen me akademinë e Shqipërisë?!

Të gjitha mundësitë që mund të nënkuptojë ideja që e “lumturoka” qytetaren ministre Besa Shahini janë absurde, më së paku, por edhe të mbrapshta, dhe çojnë pikërisht në zhbërjen e akademisë të shkencave të Shqipërisë duke e çuar atë drejt shkrirjes të identitetit të vet institucional si bartëse e misionit për të cilën është krijuar.

Parë rrezikshmërinë dhe dëmin e këtyre pohimeve të shkruara të zezë mbi të bardhë, si edhe sabotimin që po i bën prej muajsh procesit të reformimit të akademisë të shkencave të Shqipërisë ministria e arësimit, lind dyshimi i qartë se shkaku më i thellë qenka pikërisht strategjia e zonjës qytetare ministre Besa Shahini.

Nisur nga këtej unë ju ftoj zotërinj të nderuar, si autoritete që keni përgjegjësinë kryesore për ruajtjen e sovranitetit të institucioneve publike të vendit, ta thërrisni për sqarime publike këtë antare të qeverisë, dhe nëse ajo nuk akomodohet me Kushtetutën e Shqipërisë, me platformën ligjore të qeverisë, të realizoni shkarkimin e saj pa humbur kohë!

Bersa Shahini në punë të vet, Shqipëria, kombi shqiptar, Akademia e shkencave e Shqipërisë dhe e Kosovës në punën e tyre!

Me respekt qytetar,

Artan Fuga

Akademik

”Gjepalaj”, një tjetër gur i shtohet kurorës së re të agroturizmit në Shqipëri

Posted on by KultPlus

Agroturizmi ”Gjepalaj” në Shijak është një tjetër gur që i shtohet kurorës së re të agroturizmit në Shqipëri.

Agroturizmi “Gjepalaj” i Fundimit, i një ndër mastershefave më krijues e më të kërkuar në Shqipëri, mori certifikatën e agroturizmit. Kjo certifikatë është e 14-ta që iu dorëzua atij nga vet kryeministri Edi Rama.

”Fundmi është një grande shef i cili ka sjell këtu eksperiencën e jashtëzakonshme të gatimit, por që ka dhe fantazinë e njeriut që krijon kur gatuan. Je numri i 14-të i certifikatës së agroturizmit dhe këtu do krijohet një agroturizëm që do sjelli shumë njerëz në këtë zonë dhe do jetë një pikë për shumëkënd që do vij”, tha Rama.

”Një bravo ty dhe bravo djalit që ka bërë ndërtimin pasi është një ndërtim si në Toskanë, më të njëjtën cilësi dhe shije. Përgëzime dhe paçi vetëm fat”, uroi kryeministri Rama, shef Fundim Gjepalaj gjatë dhënies së certifikatës. /a.a/ KultPlus.com

Pas Berlinit, Rama ekspozitë me piktura në Spanjë

Posted on by KultPlus

Ekspozita “Work” (Puna) e cila vazhdon të qëndrojë e hapur për publikun në Galerinë Carlier Gebauer në Berlin, e kryeministrit Edi Rama, tashmë do të udhëtojë drejt Spanjës.

Ekspozita është pritur mirë nga media dhe kritika në Gjermani, që gjejnë tek kryeministri shqiptar artistin e angazhuar. Kuratori Hans Ulrich Obrist, është shprehur për punët e kryeministrit se, “arti nuk është i ndarë nga politika në punët e tij”. Por kjo ekspozitë së shpejti do të jetë në Cale Salorenco në Madrid, shkruan Gazeta Shqip.

“Rama nuk e sheh artin si një luks, por si një element thelbësor në një shoqëri funksionale, të cilën ai e përmbledh në mënyrë të drejtë në thënien e tij “kultura është infrastrukturë, nuk është sipërfaqe e thjeshtë” , shprehet Obrist.

Gjithë ekspozita ka lindur në momente pune, mbi tryezën e zyrës së tij, ku në fletë të takimeve zyrtare ai ka vizatuar imazhe që ravijëzojnë një realitet tjetër përtej politikës. / KultPlus.com

Rama uron Kadarenë, “Mbetet maja e penës së letërsisë shqipe”

Posted on by KultPlus

Një nga shkrimtarët më të mëdhenj të letërsisë bashkëkohore, Ismail Kadare feston sot 83-vjetorin e lindjes.

I nominuar për çmimin Nobel, fitues i çmimit Princi Asturias e një sërë të tjerësh, Ismail Kadare është padyshim një ndër shkrimtarët më të mëdhenj në botë.

Kryeministri Edi Rama ka ndarë një mesazh në urim me rastin e 83-vjetorit të lindjes së kolosit të letrave shqipe, Ismail Kadare.

Rama shkruan se Kadare është një nga shkrimtarët më të mëdhenj të letërsisë bashkëkohore.

”Kadare mbetet maja e penës së letërsisë shqipe dhe veprat e tij janë përkthyer në 45 gjuhë të ndryshme duke e bërë atë përfaqësuesin kryesore të letërsisë shqipe në botë”, shkruan Rama.

Kryeministri Rama hap ekspozitën në Berlin

Posted on by KultPlus

 Kryeministri Edi Rama ka hapur ekspozitën e tij të radhës në Berlin. Në hapje të ekspozitës së titulluar “Puna”,  në galerinë Carlier/ Gebauer në Berlin, Kryeministri Rama është i shoqëruar edhe nga familja e tij.

E njohur si njëra nga galeritë më bashkëkohore, ajo ka zgjedhur artistin, kryeministrin shqiptar, për të hapur siparin e aktiviteteve për këtë vit.

Për kuratorin e njohur Hans Ulrich Obrist Rama nuk e sheh artin si një luks, por si një element thelbësor të jetës. “Arti nuk është i ndarë nga politika, bashkëjeton më të”, shprehet Obrist.

Rama ka ekspozuar letra të pikturuara muri, skica, vizatime, skulptura. Ndërsa në intervistën e dhënë për prestigjiozen gjermane “Die Welt”, Rama  tha se “për herë të parë do të ekspozoj edhe shënime të një dite normale pune në zyrë. Dhe në Berlin natyrisht nuk do të mungojnë edhe punimet që kam krijuar gjatë takimeve të mia këtu në kryeqytetin gjerman”./ata

Edi Rama mbron të folmen ‘kosovarçe’ të Besa Shahinit

Posted on by KultPlus

Kryeministri Edi Rama, i ka kthyer përgjigjën një komentuesit të tij sot në Facebook pasi që ai ka kritikuar ministren e re të arsimit në Shqipëri, Besa Shahinin.

Sipas komentuesit në fjalë ministrja e re e arsimit fillimisht duhet që të mësoj gjuhën shqipe, duke aluduar kështu në mënyrën sesi ajo shprehet.

“Shko e mëso shqipen të flasësh”, ka shkruar komentuesi duke nxitur kështu kryeministrin që të reagoj.

“O zot! 4 fjalë 3 gabime dhe një fjali prej drumepreje, për të përqeshur tingëllimën e të folurës së Kosovës! Po mësohu, mësohu me këtë tingëllimë, ti dhe shumë si puna jote, se do ju duhet të adaptoheni shpejt nën një çati me Kosovën, edhe po nuk deshët ju”, është reagimi i kryeministrit Rama.

Besa Shahini është ministre e re e arsimit në Shqipëri, me vendimin e fundit të Edi Ramës në ndryshimet e fundit në Qeverinë e Shqipërisë.

Besa Shahini është analiste dhe hulumtuese e çështjeve të integrimit evropian dhe politikave arsimore. Deri në verë 2015, ka punuar si analiste me organizatën me bazë në Berlin, Inciativa Europiane për Stabilitet (ESI). Ajo herë pas herë shkruan për gazetat ditore në Kosovë. Shahini ka master nga Hertie School of Governance në Berlin./ KultPlus.com

“Nëse mendoni se shkollimi është i shtrenjtë, shikoni se sa do t’u kushtojë injoranca”

Posted on by KultPlus

RROKULL SHQIPËRISË

Ndërsa prej ditësh vijon të përsërisë kërkesën për dialog me studentët, duke e cilësuar të plotësueshme pikën që lidhet me përgjysmimin e tarifave, Rama provokon me një postim në Instagram.

Kreu i qeverisë ka publikuar një thënie të ish-Presidentit amerikan Barack Obama e cila thotë: “Nëse mendoni se shkollimi është i shtrenjtë, shikoni se sa do t’u kushtojë injoranca”./27.al / KultPlus.com

“Provokacija”, kështu e quajnë mediet serbe fotografinë e Endrit Shalës dhe Edi Ramës (FOTO)

Posted on by KultPlus

“Foto e bukur me Kryeministrin Rama. Foto dhe mbishkrimi 100%, e bërë vetë nga z. Rama”, ky është mbishkrimi i ministrit të Ministrisë së Tregtisë Endrit Shala me kryeministrin e Republikës së Shqipërisë Edi Rama, fotografi kjo që ka nxitë reagimin e medieve serbe, shkruan KultPlus.

Në këtë fotografi shihet fotografia e Endrit Shalës dhe Edi Ramës, me mbishkrimin 100%, mbishkrim që i referohet taksave të Kosovës ndaj Serbisë, dhe pikërisht këtë foto, gazeta Mondo nga Serbia e ka quajtur provokim, duke vendosë titullin: Provokacija, Salja objavio sliku sa Ramom./KultPlus.com

“What the Fuck” për qasjen e Serbisë ndaj Kosovës, thotë Edi Rama

Posted on by Kult Plus

Kryeministri i Republikës Shqipërisë Edi Rama, sot gjatë takimit të dy qeverive asaj të Kosovës dhe Shqipërisë, përgjatë fjalimit të tij, i është drejtuar në gjuhën angleze Serbisë me fjalën “What the fuck”, shkruan KultPlus.

Krejt kjo ka ardhë si rezultat i deklaratave të fundit rreth Kosovës nga Serbia.

Rama ka përmendur momentin kur një ministri kosovar i kërkohej që në një fjalim të tij, të hiqej fjala Republika e Kosovës.
“What the fuck do të thuhej në Bashkimin Evropian”, ka thënë Rama./ KultPlus.com

Edi Rama dhe Ramush Haradinaj ‘betohen’ mbi flamurin kombëtar

Posted on by Kult Plus

Një fotografi e publikuar pak çaste më parë nga kryeministri i Republikës së Kosovës Ramush Haradinaj, tregon një lloj betimi mbi flamurin kombëtar, bashkë me kryeministrin e Republikës së Shqipërisë Edi Rama, shkruan KultPlus.

Në flamur janë hedhur edhe nënshkrimet e dy kryeministrave shqiptarë, dhe shihen duart e tyre njëra mbi tjetrën.

Fotografi është shkrepur sot gjatë takimit të dy qeverive shqiptare në Pejë./ KultPlus.com

Këto janë nëntë marrëveshjet të firmosura nga Kosova dhe Shqipëria

Posted on by KultPlus

Kosova dhe Shqipëria kanë firmosur nëntë marrëveshje pas mbledhjes së përbashkët të dy Qeverive.

Në Pejë, u nënshkrua Marrëveshja për heqjen e çmimeve të shërbimeve Roaming për rrjetet publike të komunikimeve të lëvizshme ndërmjet ministrive përgjegjëse për fushën e komunikimeve elektronike.

Atje u firmos edhe protokolli për kryerjen e veprimtarive të përbashkëta të kontrollit doganor në pikën e përbashkët të kalimit kufitar Morinë-Vërmicë në mes të Ministrisë së Financave të Kosovës dhe Ministrisë së Financave dhe Ekonomisë të Shqipërisë.

Marrëveshje bashkëpunimi do të ketë edhe në fushën e borxhit publik, financimeve të huaja, dhe marrëdhëniet me institucionet financiare ndërkombëtare.

Ujdi u nënshkrua edhe ndërmjet Agjencisë për Pronësinë Industriale të Kosovës dhe Drejtorisë së Përgjithshme të pronësisë industriale të Shqipërisë.

Dy qeveritë kanë nënshkruar edhe Protokollin për ndërmjet Ministrisë së Bujqësisë dhe Zhvillimit Rural të Shqipërisë dhe Ministrisë së Bujqësisë, Pylltarisë dhe Zhvillimit Rural të Kosovës për njohjen bilaterale dhe unifikimin e modeleve të certifikatave shëndetësore, veterinare dhe fitosanitare që do të shoqërojnë ngarkesat e kafshëve të gjalla, produkteve me origjinë shtazore dhe produktet bimore gjatë importit, eksportit dhe transitit midis Shqipërisë dhe Kosovës.

Marrëveshje për bashkëpunim do të ketë edhe në fushën e rinisë si dhe për bashkëpunimin, nxitjen e biznesit dhe informimin e diasporës.

Ministria e Shëndetësisë së Kosovës dhe ajo e Shqipërisë po ashtu kanë nënshkruar Marrëveshjen e bashkëpunimit në fushën e shëndetësisë.

Fotot e papërsëritshme të Marubit në Milano (VIDEO)

Posted on by Kult Plus

170 fotografi të përzgjedhura prej autorëve më të njohur të trashëgimisë fotografike të Muzeut Marubi në Shkodër, do të ekspozohen në ekspozitën “Rituali fotografik”, në Trienalen e Milanos.

Kryeministri Edi Rama shprehet se ky kolazh fotosh do të ekspozohet në Milano, në kuadrin e Vitit të Skënderbeut.

“Mirëmëngjes dhe me këtë kolazh fotosh të papërsëritshme nga Ekspozita ‘Rituali Fotografik i Marubit’ që çelet nesër në Trienalen e Milanos, në kuadrin e Vitit të Skënderbeut, ju uroj një ditë të mbarë”, thotë Rama.

E iniciuar nga Ambasada e Shqipërisë në Romë, ekspozita organizohet nga Muzeu Marubi në kuadër të kalendarit të “Vitit Mbarëkombëtar Gjergj Kastrioti-Skënderbeu” në ambientet e La Triennale di Milano, me mbështetjen e Ministrisë së Kulturës së Shqipërisë, në bashkëpunim me MuFoCo, Museo di Fotografia Contemporanea.

Mes të përditshmes dhe ritualit, imazhet e ekspozitës “Arkiva Marubi. Rituali fotografik e kuruar nga Zef Paci, ruajnë kujtesën e mbi një shekulli jetë. Bëhet fjalë për trashëgiminë fotografike të Muzeut Marubi në Shkodër, i pari muze fotografie, i cili në datat 16 nëntor deri më 9 dhjetor 2018, paraqet në Triennale di Milano, ekspozitën e tij të parë në bashkëpunim me Museo di Fotografia Contemporanea dhe La Triennale.

Për këtë ekspozitë janë përzgjedhur rreth 170 fotografi prej autorëve më të njohur të koleksionit. Imazhet e shfaqura janë shkëputur prej vazhdës së formuar nga fotografët, të yjëzuar prej shkrepjeve të tyre e të shkëputura prej vetë vazhdës së jetës.

Bashkësia e këtyre gjurmëve dhe fragmenteve të jetës të shkëputura nga fluksi i përditshmërisë, ndërton një narracion përmes fotografisë, një rrugëtim përmes vendeve, fytyrave, marrëdhënieve njerëzore që hetojnë ritet e kalimit që në shekuj u fiksuan nga rituali fotografik.

Fotografia si ritual na ka lejuar të gjurmojmë komunitetin e historitë e tij të shumta me dëshirat për t’i dhënë publikut shijen e një realiteti shumëformësh e eklektik./ KultPlus.com

Mid’hat Frashëri, i pa të dytë në historinë e elitave shqiptare

Posted on by Kult Plus

Mid’hat Frashëri është një personalitet i pa të dytë në historinë e elitave shqiptare, që i dha vendit gjithçka kishte dhe gjithçka mundi.

Kështu deklaroi sot, Kryeministri Edi Rama gjatë ceremonisë shtetërore të përmortshme të kthimit të atdhe të eshtrave të personalitetit të shquar të letrave shqipe dhe kulturës kombëtare, Mid’hat Abdyl Frashëri.

Duke bërë një zbërthim të figurës së Mid’hat Frashërit në të gjitha dimensionet e tij, Kryeministri Edi Rama vlerëson publicistin por dhe njeriun politik, si dhe kontributin e tij në Kongresin e Manastirit, për një alfabet të njehsuar.

Rama vlerëson figurën e Lumo Skëndos në tempullin e letrave dhe të Mid’hat Frashërit për staturën e shtetarit.

Ndërsa e sjell Mid’hat Frashërin me gjithë potencialin e formimit të tij intelektual, Kryeministri nuk mund të lërë pa përmendur mbrujtjen e këtij personaliteti me atdhedashuri dhe patriotizëm që në fëmijërinë e hershme.

“I prirur qysh në krye të herës të vetëvritet politikisht ai nuk i negocion bindjet e tij”, shprehet Rama, ndërsa e cilëson “mishërim të shërbëtorit ndaj atdheut”.

Të lë pa frymë, vijon Kryeministri, “pozicionimi i tij në mbrojtje të popullsisë së çamërisë. “Raportet e tij nuk e shfaqin vetëm si mbrojtës të elementit shqiptar të keqtrajtuar jashtë kufijve, por edhe si një flamurmbajtës pa dallim etnie dhe feje”, thotë Rama.

Sipas Kryeministrit, Mid’hat Frashëri meriton mirënjohjen tonë sepse është bartës i ndershmërisë intelektuale në pohimin e të vërtetave të veta, pavarësisht çmimit që ato kanë.

Kush gabimisht e sheh këtë arkëmort si provokim ndaj një historie që e shkruajtën fitimtarët, Kryeministri u sjell në kujtesë shprehjen e Mid’hat Frashërit: “…nuk mund të kemi në mesin tonë njerëz që kanë lyer duart me gjak duke bashkëpunuar me pushtuesit”.

“Mjaft kemi arsyetuar dhe gjykuar në mungesë. Këtu janë eshtrat e një burri të gjykuar dhe dënuar në mungesë nga gjyqi i pafundëm raskapitës i historisë së shkruar nga fitimtarët për të poshtëruar të mundurit. Mjaft kemi trilluar dhe shpifur pa arsyetuar dhe gjykuar në ndershmëri dhe ndërgjegje. Mjaft me shpërdorimin e atyre që nuk janë më duke u vënë në gojë ato që nuk kanë thënë dhe menduar kurrë, dhe duke i lëshuar si flakadanë të përçarjes”, tha Rama, ndërsa shtoi se “kthimi i eshtrave të tij në atdhe nuk i merr askujt pjesën e vetë të historisë”.

Mid’hat Frashëri, vlerëson Rama, ishte dhe mbetet sot e gjithë ditën një shembull i gjallë. “Koha pastroftë më tutje baltën që më së pari filluam t’ja pastrojmë sot”, përfundoi Rama. / KultPlus.com

Edi Rama shkon në kinema, lihen jashtë gazetarët e kulturës dhe Ndriçim Xhepa

Posted on by KultPlus

Të dielën në mbrëmje në orën 20:00 në Kinema Millenium u shfaq premiera shqiptare filmit “Delegacioni” të Bujar Alimanit, fitues i “Grand Prix” në kinema Millenium. Filmi shfaqej në kuadër të Festivalit Ndërkombëtar të Filmit në Tiranë TIFF. Të shtunën në drekë, zëdhënësja e festivalit, Genta Ramadani, përmes një grupi në ‘Whatsapp’, ju shkruan gazetarëve: “Me këtë rast po ju njoftoj që nesër në ora 20:00 shfaqet premierë filmi ‘Delegacioni’, nga Bujar Alimani. Pas filmit ka sesion pyetje & përgjigje. Jeni të ftuar me kënaqësi, por do ju lutesha konfirmim pasi vendet në kinema Millenium janë të limituara”. Zëdhënësja merr konfirmimet nga gazetarët e kulturës dhe në vijim njofton për filma të tjerë në festival. Por parapremiera e “Delegacionit” u shndërrua në një skenë fyese për të ftuarit dhe familjarët e ekipit të filmit. Ardhja e kryeministrit në kinema trazoi ujrat. Në fillim me preteksin se protokolli i shefit të qeverisë nuk lë të hyjë asnjë gazetar të paakredituar, më pas me pretekstin se nuk keni bileta, e më pas nuk keni ftesa, gazetarët e ftuar nuk u lanë të hyjnë në sallë. Askush nuk ishte në gjendje të shpjegonte saktësisht se çfarë po ndodhte. Vetë zëdhënësja e festivalit ngrinte duart lart me shpjegimin se edhe ajo sapo ishte vënë në dijeni dhe nuk kishte se çfarë zgjidhje të jepte.

Megjithatë, gazetarëve u tha të presin se do të mund të bëhej diçka. Grupi i reporterëve u mblodh jashtë kur befas, në krah të tyre mbërrin i irrituar aktori Ndriçim Xhepa. As ai nuk ishte lënë të futej nga hostess e kinemasë, sepse nuk kishte biletë. Irritimi i Xhepës solli menjëherë jashtë Agron Domin organizator i festivalit dhe Ilir Butkën kryetar i Qendrës Kombëtare të Kinematografisë. Të dy i kërkonin Xhepës të hynte në sallë, sepse interpreton në filmin që shfaqej, por ai tanimë i fyer refuzon.

“Nuk hyj brenda se nuk kam biletë. E kam parë filmin tre herë, nuk dua ta shoh më. Do rri jashtë të pi një kafe”. Ndërkaq, Ilir Butka dëgjohej të thoshte se ia kish dhënë biletën e tij kryeministrit, e Agron Domi, premton t’i japë Xhepës, biletën e tij. Xhepa refuzon, ata i luten, e tërheqin për krahu, tanimë bashkë me hostess-en e kinemasë që ka dalë nga dera që u përplas të gjithëve. Gazetarët janë përkrah, shohin çdo gjë, dëgjojnë çdo gjë, madje edhe e xhirojnë skenën. Xhepa pranon të hyjë pas lutjeve, i kërkohet ndjesë dhe i thuhet “se nuk e njohën”. Qesharake! Nuk njohën Ndriçim Xhepën. Gazetarët thërrasin Agron Domin për të ditur se çfarë do bëhet me ta, por ai nuk dëgjon. Vrapon brenda. Kryeministri ka hyrë, ministrja e Kulturës po ashtu, shfaqja duhet të nisë. Ç’rëndësi kanë gazetarët?! Pak minuta më vonë, dëgjohen duartroktije. Ne jemi ende jashtë duke pritur që dikush të na sqarojë, se çfarë do bëhet me median. Asgjë. Pas duartroktitjeve, Genta Ramadani del dhe vjen pranë tyre. Kërkon ndjesë dhe ofron keqardhjen e saj me shumë edukatë. Por gazetarët nuk kanë mbërritur në kinema për të gjetur aty keqardhje. Gazetarët thotë ajo, nuk mund të hyjnë gjithësesi. As ato që sigurojnë ftesa nuk lejohen më. Filmi vijon, teksa media ndalohet. Jemi para një situate të turpshme dhe qesharake.

Pra, qeveria nuk jep fonde për festivalin, festivali del në media të ankohet, por kur shefi i qeverisë vendos të shfaqet në festival gazetarëve të ftuar, festivali (apo kush?! Sepse nuk morëm kurrë një përgjigje) u ndalon hyrjen duke ricikluar qasjen negative të vetë kryeministrit ndaj mediave.

Gazetarëve të akredituar, festivali nuk u kishte bërë gati badge. E nëse media është një entitet i madh, që shkon deri te pronarët dhe marrëdhëniet e tyre me qeverinë, festivali u ndaloi hyrjen gazetarëve të kulturës, që nuk janë më pjesë e një entiteti të madh (dhe kësisoj pothuaj anonim) me dy raporte- janë gazetarë që drejtuesit e festivalit i njohin personalisht, emër për emër prej vitesh. Me gjasë, siç ndodh rëndom, faji do hidhet degë më degë, nga ‘protokolli’ i kryeministrit te hostess-et e kinemasë që ndaluan dhe aktorin e filmit që shfaqej, Ndriçim Xhepa, mandej te produksioni i vetë filmit. E vërteta është që filmi shfaqej në një festival, zëdhënësja e të cilit prej së shtunës kishte kërkuar konfirmime për gazetarët që do ishin të pranishëm- për çka faji i mbetet atij që fton e të mbyll derën duke ta përplasur surratit. Por po, ne kemi qeverinë që meritojmë, sepse lëmë jashtë Ndriçim Xhepën për të futur brenda shefin e qeverisë; dhe po ne kemi qeverinë e shtetin që meritojmë, sepse lëmë jashtë gazetarët për të futur kryeministrin pas të cilit vrapojmë.
Me gjasë ditët në vijim media e vetme që do e ndjekë TIFF do jetë “ertv”, drejtuesi i së cilës mirëpret çdo ofertë të pakërkuar, si kjo e një festivali që bëhet shpurë e tij.

Çka përndryshe nuk do të përbënte asnjë problem për t’u pajisur vetë me biletë secili gazetar nëse paraprakisht do i ishte thënë ta bënte. Por kur gazetarët ftohen për një film dhe sesion pyetje&përgjigje dhe konfirmojnë, për të lënë të lirë rradhën e tyre në kinema si besnikët e festivalit e si përcjellësit e lajmeve, ftesa dhe orët e humbura në oborrin e betontë me duart e ngritura lart të zëdhënëses, janë kategoria ZH e një festivali filmi. Sepse kategoria përcaktohet jo veç prej filmave, por edhe prej këtyre raporteve me median dhe vetë imazhin e një festivali. Mendojeni pak që prania e Emanuel Makron në Kanë të lërë gazetarët jashtë. Tingëllon absurde. Po! Po! (E di që) TIFF nuk është Kana, Rama nuk është Makron, unë nuk punoj për ‘Hollywood Reporter’ dhe Shqipëria nuk është Franca- kjo që ndodhi të dielën e bëri më të qartë. Por ai kuartet i ç’harmonizuar më lart tregon qartë pse ne jemi këtu ku jemi e ata atje ku janë.

*Titulli origjinal: “DELEGACIONI”/ Festivali i filmit si shpurë (ofertë) e pakërkuar e kryeministrit
http://www.gsh.al/2018/11/06/delegacioni-festivali-filmit-si-shpure-oferte-e-pakerkuar-e-kryeministrit/?fbclid=IwAR3f72chJI8dD19tq83jevuRx2zliTsO2Cgt15xuYsvIlclyOIz9LVYTY3c

Studentja ia ndalon fjalën Edi Ramës, largohet me dhunë nga takimi

Posted on by KultPlus

Kryeministri Edi Rama ishte në një takim me gjimnazistët ekselentë kur ndodhi një incident.

Ndërsa ishte duke folur për arsimin e lartë dhe reformat, një grup prej aktivistëve të Lëvizjes së Universitetit kanë ndërhyrë duke akuzuar se studentët po zhvaten me tarifat e larta.

Në videon e postuar nga kjo lëvizje, vajza duket që tërhiqet nga truprojet për të dalë nga salla ku mbahet takimi./KultPlus.com

Rona Nishliu merr dhuratë të veçantë nga Edi Rama

Posted on by Kult Plus

Vetëm pak javë më parë në një ceremoni tërësisht të fshehtë këngëtarja Rona Nishliu është lidhur në martesë.

Aktualisht ajo po shijon muajin e mjaltit në Itali me bashkëshortin e saj të cilin ende nuk e ka ekspozuar në rrjete sociale. Por këngëtarja duket se ka marrë një dhuratë speciale nga kryeministri shqiptar Edi Rama.

Ajo ka publikuar në rrjete sociale foton e një shishe vere të ardhur nga Kryeministria dhe krahas fotos shkruan: Faleminderit për kujdesin tuaj dhe të institucionit, dhuratë speciale ditëlindjeje nga Kryeministri,”-shkruan Rona krahas fotos së publikuar në rrjete sociale./ KultPlus.com

Video nga udhëtimi i parë, “Air Albania” fluturon me muzikë tradicionale

Posted on by Kult Plus

Kryeministri Rama ka publikuar videon e udhëtimit të studentëve të ekselencës drejt Stambollit me fluturimin e parë të “Air Albania”.

80 studentët e ekselencës, preferuan të inaguronin udhëtimin e parë të avionit të parë shqiptar nën tingujt e muzikës tradicionale shqiptare si, vallja e Tropojës, valle labe, valle tironëse etj.

Për më tepër shihni videon si me poshtë:

Rama: “Lasgushi” u ul në Rinas, “Noli” fluturon në Nju Jork

Posted on by KultPlus

Gjatë fjalës së tij në ceremoni e inaugurimit të kompanisë së parë ajrore shqiptare kryeministri Edi Rama tha se me ‘Air Albania’ është përmbushur një ëndërr që dukej e pamundur. Rama tha se me kompaninë kombëtare tw fluturimit nis një rrugë ndërlidhëse me Evropën, por edhe më tej.

“Përmbushim një ëndërr që dukej e pamundur, por që u realizua. Kompaninë ajrore të flamurit kuqezi ‘Air Albania’. Është një ëndërr që sot merr krahë për të filluar një ëndërr prej shumë kohësh. ‘Air Albania’ është një vepër kombëtare. E vërteta është se shteti shqiptar nuk mund të ndjehet plotësisht i rezultuar nëse neglizhon pozicionin e vet në hartën dhe kullat e vendeve ku udhëtojnë shqiptarët. Me kompaninë kombëtarë te fluturimit ne kemi nisur rrugën ndërlidhëse me Evropën, por edhe më tej. Sot falë ‘Air Albania’ ne mund të fluturojmë. Nuk e di si do përkthehet kjo për miqtë tanë, por duhet të fluturojmë me këmbë në tokë”, tha Rama.

Kreu i qeverisë tha se Air Albania nuk është vetëm një kompani shqiptare por ku shteti shqiptar është drejtpërdrejt aksioner për të garantuar interesat e qytetarëve shqiptarë. “Dëshmitarët mund të tregojnë shumë se nga u nisën kur aplikuan hajt ta provojmë njëherë. Shumica prej tyre nuk e ka imagjinuar se sa shpejt do vinte kjo ditë dhe do visheshin me ngjyrat e flamurit kuq e zi. Ndërkohë për të aplikuar të tërë modelin është dashur punë, është dashur mund dhe orë të tëra dhe sot nuk kemi thjesht një kompani që ka një emër që na përfaqëson të gjithë por një kompani ku shteti shqiptar është drejtpërdrejt aksioner si një garant dhe njëkohësisht si një prani për të përfaqësuar interesat e të gjithë qytetarëve të këtij vendi që kanë pasaportën e këtij vendi por edhe e gjithë shqiptarëve që do ta përdorin Air Albania.

Mjafton t’ju them se rritja e numrit të fluturimeve të shqiptarëve është mbresëlënëse përtej problemeve që kemi me zhvillimin e domosdoshëm ekonomik, shifrat flasin për një numër udhëtimesh dhe udhëtarësh shqiptarë me një rritje eksponenciale por nga ana tjetër tregojnë se 99% e këtyre fluturimeve mbulojnë vetëm distanca të shkurtra që nuk i kalojnë 120 minuta. Ambicia jonë është që me Air Albania të shkojmë përtej kësaj. Ne sot jemi i vetmi vend në Europë që kemi vetëm një aeroport. Pistat e atëhershme ishin vetëm disa rrugë të paasfaltuara por shqiptarët fluturonin me avionë për në Peshkopi, për në Gjirokastër për në Korçë. Nuk po them që ky është synimi i së ardhmes por duam që të mos kemi një aeroport por të kemi të paktën edhe tre aeroporte, atë të Vlorës, Kukësit dhe Sarandës”, tha Rama.

Kryeministri përmendi edhe ankesat e qytetarëve për çmimet e biletave por tha se kjo është kostoja e trashëgimisë dhe se Air Albania është një instrument që kjo situatë të ndryshojë ashtu si edhe ndërtimi i aeroporteve të tjera në vend. Kryeministri shpjegoi edhe emrat e vendosur avionëve të rinj. “Për ne që jemi të këtij vendi dhe që jemi të mësuar me atë çka na kujton menjëherë ai që Klemend Aderi e pagëzoi në 1875 si aparati fluturës që imiton zogun, shqiponja është gjëja e parë që mendojmë kur mendojmë për fluturimin. Ndërkohë që me këtë rast mësuam që aparatet fluturuese që imitojnë zogjtë duhet të kenë edhe emra. Dhe zgjodhëm që shqiponjave tona tu vëmë emrat e poetëve tanë. I pari është Lasgushi dhe tjetri që do vijë menjëherë pas fluturimeve test që do bëhen gjatë një muaji Stamboll-Tiranë do jetë Migjeni. Ambicia jonë është që në muajt në vijim të çojmë direkt nga Tiranë në Nju Jork Imzot Nolin. Po e mbyll me Lasgushin që kemi mbrapa duke nxjerrë 4 vargje nga ‘Vallja e Yjeve’. Falënderoj djemtë dhe vajzat e ‘Air Albania’. Veshjet e tyre nuk kanë të sharë, ose kush i shan është i sharë”- tha Rama./KultPlus.com

“Më mirë të ndezësh një qiri, sesa të mallkosh errësirën”

Posted on by Kult Plus

Sot në 21 vjetorin e vdekjes së Shën Nënë Terezës, kryeministri shqiptar Edi Rama, ka përkujtuar atë nëpërmjet rrjetit social Facebook.

Rama, ka shkruar se e para fjalë që e kujton nga Nënë Tereza, është: Më mirë të ndezësh një qiri, sesa të mallkosh errësirën.

Po sjellim të plotë shkrimin:

MIRËMËNGJES
dhe në këtë ditë të bekuar të Nënë Terezës, e para fjalë që kujtoj prej saj është fjala që më ndihmon shpesh, në të përpjetat e të tatëpjetat e rrugës sime, “Më mirë të ndezësh një qiri, sesa të mallkosh errësirën”.
Ditë të paqme./ KultPlus.com