Kryeministri Edi Rama ka shpërndarë në rrjetet sociale deklaratën e kreut të FIFA-s, Gianni Infantino i cili gjatë konferencës për mediet në nisje të Botërorit të Katarit vlerësoi Shqipërinë që hapi dyert për refugjatët afganë.
Rama e konsideron një moment krenarie për Shqipërinë.
Në deklaratën e tij, Infantino tha se të gjithë vendet evropiane e amerikane, shtete e Amerikës së Veriut, mbyllën dyert duke kërkuar falje se nuk mundeshin.
“I vetmi vend që tha: ‘Mirë sillini këtu se ne e dimë çfarë do të thotë të vuash dhe të ikësh nga vendi yt”, ishte Shqipëria. Dhe miku im, Edi Rama, tha: Ato janë të mirëpritura në Shqipëri ku mund të ndërtojnë një të ardhme”. Kështu Shqipëria hapi dyert. Nga të gjithë vendet, Shqipëria u hapi dyert refugjatëve afganë që duhej të iknin sepse luanin futboll në Afganistan”, tha Infantino. / atsh / KultPlus.com
Zëvendës kryeministri i parë i Qeverisë së Republikës së Maqedonisë së Veriut, Artan Grubi së bashku me Ambasadorin e Republikës së Shqipërisë, Fatos Reka pritën në Aeroportin Ndërkombëtar të Shkupit delegacionin qeveritar të Republikës së Shqipërisë të kryesuar nga Kryeministri Edi Rama, që do të qëndrojë sot në Shkup për të realizuar seancën e përbashkët qeveritare.
Sot do të nënshkruhen disa nga marrëveshjet më të rëndësishme që do të determinojnë kahjen e bashkëpunimit dhe koordinimit ndërinstitucional mes të dyja vendeve për realizimin e projekteve të interesit të përbashkët në çdo sferë.
“Pritje vëllazërore për Kryeministrin Edi Rama në Shkup, për t’i uruar mirëseardhje atij dhe Qeverisë së Republikës së Shqipërisë në mbledhjen e përbashkët historike ndërqeveritare.” – ka shkruar Grubi në faqen e tij në rrjetin social Facebook.
Kryeministri Edi Rama vlerësoi sot rolin e patjetërsueshëm të Kongresit të Drejtshkrimit (1972) në njehsimin e gjuhës shqipe.
Në fjalën e mbajtur në konferencën jubilare me rastin e 50-vjetorit të Kongresit të Drejtshkrimit, Rama shprehu mirënjohjen ndaj intelektualëve e firmëtarëve të Kongresit, të cilët iu futën punës me bindjen se kombi është një, prandaj edhe gjuha duhej kodifikuar në një standard.
“Imagjinoni sot sikur tranzicionit shqiptar t’i shtoheshin dhe dialektet dhe ne mos të kishim një gjuhë të njehsuar. Kongresit nuk mund t’i çlegjitimohet puna vetëm pse u zhvillua nën regjimin komunist. Kundërshtarët e rrezikshëm të Kongresit të Drejtshkrimit që janë edhe injorantët më të mëdhenj, nuk kanë së pari kulturën e gjuhës”, tha ai.
Kryeministri theksoi se nuk mund të hidhet poshtë puna kolosale që Kongresi bëri për gjuhën shqipe, vetëm pse u mbajt nën regjimin komunist.
“Ne sot nuk do të kishim dot një abetare, do t’i kishim si ato tekstet alternative që solli demokracia, ku diku data e Çlirimit është 28 Nëntor, diku tjetër 29 Nëntor”, tha Rama.
Kryeministri tha se “trungu i përbashkët që na lidh të gjithëve është trungu që mbolli Kongresi i Drejtshkrimit”.
“Imagjinoni procesin e integrimit si do të merreshim vesh për të përkthyer në gjuhën e Brukselit, 7 palë gjuhët tona. Se do të kishte dalë gegnishtja e Shkodrës dhe pastaj e Pukës, toskërishtja e Vlorës, por do të dilte edhe e Tepelenës”, shtoi Rama.
Kryeministri vlerësoi se në vitin 1972, kur u mbajt Kongresi i Drejtshkrimit, edhe pse Shqipëria ishte nën regjimin komunist, në fakt ishte një vend me institucione kërkimore-shkencore.
“Në kohën kur është bërë Kongresi i Drejtshkrimit, ajo botë akademike ishte e standardeve europiane, jo e papërfillshme”, tha ai.
Kryeministri citoi Kadarenë (në një intervistë për Gazetën “Zëri” në Kosovë) dhe tha se “gjuha është më i vështiri pakt që njerëzit kanë lidhur mes tyre”, për të treguar rrugën e gjatë që flamujt e Republikës së Shqipërisë, Kosovës dhe Maqedonisë së Veriut kryen për të ndenjur krah njëri-tjetrit në këtë konferencë, duke përmbushur simbolikisht këtë pakt.
“Nuk duhet të harrojmë sa e pamundur dukej disa vite më parë që gjuha shqipe të flitej, të shkruhej e të pranohej lirisht si e drejta themelore e shqiptarëve në trevat ku ky komb shtrihet”, tha Rama.
Kryeministri lexoi një pjesë të Rezolutës së Kongresit, ku parashikohej nevoja që mund të parashtronte e ardhmja, për ta përshtatur gjuhën letrare me plotësimet e domosdoshme që sjell koha.
Kongresi i Drejtshkrimit të Gjuhës Shqipe u mbajt gjatë datave 20-25 nëntor të vitit 1972 në Tiranë. Në të morën pjesë 87 delegatë nga Shqipëria, Kosova, Maqedonia, Mali i Zi dhe Italia, për të dakordësuar Rezolutën që standardizoi rregullat drejtshkrimore të gjuhës shqipe. /atsh /KultPlus.com
Kryeministri Edi Rama deklaroi sot se qeveria do të vijojë të mbështesë qytetarët edhe në vitin që vjen duke mos u lëshuar atyre barrën e rritjes së çmimit të energjisë elektrike në tregjet ndërkombëtare, si rezultat i luftës së Rusisë në Ukrainë.
Gjatë debatit në Kuvend për projektbuxhetin e vitit 2023, kryeministri Rama tha se fatura për të mbrojtur qytetarët nga kjo rritje e çmimit të energjisë pritet të shkojë afërsisht 50 miliardë lekë, deri në fund të këtij viti.
“Buxheti i vitit 2023 diskutohet në kushtet e një tjetër krize, e treta radhazi, e lidhur me ato paratë që keni marrë ju”, iu drejtua kryeministri Rama opozitës duke nënkuptuar akuzat për financim rus.
Rama tha se qeveria përmes këtij projektbuxheti do të vijojë të mbështesë qytetarët dhe biznesin për të përballuar këtë goditje.
“Ne jemi këtu për të përballuar atë goditje që është arsyeja e luftës. Vladimir Putin nuk e ka filluar luftën për të marrë copa nga Ukraina, por për të gjunjëzuar Perëndimin, bashkësinë euroatlantike, për të ndryshuar ekuilibrat e kësaj bote, ku ju i bëni hije kot”, iu drejtua ai sërish opozitës.
Rama tha se Shqipëria është pjesë e asaj bote të cilës i ka hapur luftë Rusia, jo duke hedhur bomba këtu, por duke goditur përmes energjisë së kthyer në armë dhe përmes inflacionit të luftës, që dihet që është një armë më vete.
“Dhe ajo fatura e energjisë që shkon te familjarët, dhe ajo dora e inflacionit që kap çdo dorë që shtrihet për të blerë diçka, janë pjella të kësaj lufte. Ne jemi këtu për të konfirmuar vazhdimësinë e një përpjekjeje që ka bërë deri sot që asnjë familje shqiptare të mos paguajë asnjë qindarkë më shumë për energjinë se sa e paguante para se të fillonte kriza”, u shpreh kryeministri.
Kreu i qeverisë, vuri në dukje se kriza energjetike të cilën ai e kishte paralajmëruar që në tetor të vitit 2021, ishte preludi i luftës dhe sipas tij, çmimet e energjisë shkuan në stratosferë, ndërkohë që në Shqipëri çdo familje dhe biznes i vogël paguan të njëjtin çmim si para krizës dhe luftës.
“Kjo vjen nga fakti që kjo qeveri i del për zot familjeve, biznesit të vogël, duke i mbrojtur me një mburojë financiare prej 460 milionë euro. Këto janë nga buxheti, që ato faturat e energjisë të vazhdojnë të shkojnë të njëjta në dyert e çdo familjeje shqiptare. Si po e ndjejmë në shumë vende siç po e ndjejnë shqiptarët që jetojnë jashtë, jo se jemi më të zotët, por ne e kemi marrë këtë vendim të sanksionuar edhe në buxhetin e vitit 2023. Ne do të mbrojmë me çdo çmim, çmimin e energjisë elektrike për familjet dhe bizneset”, tha Rama.
Rama tha se në buxhetin e vitit që vjen janë 50 miliardë lekë që shkojnë për të mbrojtur njerëzit nga goditjet e kësaj lufte, nga goditja në çmimin e energjisë, bizneset e vogla nga goditja marramendëse e inflacionit.
“Nuk është rastësi që Shqipëria ka inflacionin më të ulët në rajon, sepse ka çmimin e energjisë të mbrojtur dhe për familjet dhe për bizneset, sepse nëse do të rrisnim çmimin për bizneset e vogla, detyrimisht do t’ja përcillnim një pjesë të goditjes edhe vet familjeve”, u shpreh ai.
Sipas kryeministrit Rama, buxheti paguan deri në 80 % të çdo fature të energjisë së familjeve shqiptare. /atsh / KultPlus.com
Kryeministri Edi Rama u shpreh sot se shpëtimi i hebrenjve gjatë Luftës së Dytë Botërore nuk është thjesht një faqe e bukur e historisë së Shqipërisë, por është një thesar shumë i rëndësishëm i trashëgimisë sonë kombëtare.
Rama mori pjesë në ceremoninë e organizuar nga Lëvizja Lufto Antisemitizmin në Jeruzalem, ku iu drejtua të pranishmëve me një fjalë.
Rama theksoi se “pranimi i hebrenjve dhe mbrojtja e tyre gjatë Luftës së Dytë Botërore janë vetëm episodi i fundit i bashkëjetesës shembullore të gjatë me shqiptarët në atdheun e tyre, i cili u pa globalisht si një atdhe i dytë për hebrenjtë në vitet ’30 dhe shumë pak njerëz e dinë”.
“Ka një komponent themelor që bashkon ardhjet masive më të mëdha të hebrenjve në Shqipëri. Ata nuk janë drejtuar asnjëherë drejt këtij porti të qetë, por vetëm kur kanë qenë më të rrezikuarit. Siç tregohet nga historiani i parë i krishtërizmit, Flavius Joseph në librin e tij mbi luftërat judaike, vendbanimet më të hershme hebreje u krijuan në jug të Shqipërisë në shekullin e parë. Tre mijë hebrenj që kishin hipur në anije që drejtoheshin për në kryeqytetin e Perandorisë Romake si fuqi punëtore, u rrëmbyen në Adriatik dhe u devijuan në brigjet tona ku toponimia hebraike si Galile, Fionike, Orikum, Paleste, është ende e pranishme. Ata kishin ndërtuar sinagogën e parë në Ballkan, në shekullin e pestë në Sarandë, qytetin në kufi me Greqinë, në të njëjtën ndërtesë me bazilikën e krishterë”, tha Rama.
Ai shtoi se “kur në Spanjë dhe Portugali shpërtheu zemërimi i inkuizicionit kundër hebrenjve, mijëra të tjerë erdhën dhe u vendosën në qytetet shqiptare”.
“Sipas studiuesve të njohur si Alain Ducellier e Bogumil Hrabak, hebrenjtë sefardi ose sefardikë përbënin afër, nëse jo, shumicën e popullsisë në Vlorë gjatë atij shekulli, qyteti në jug ku po ndërtojmë muzeun hebraik. Gjatë shekujve të sundimit osman në Shqipëri, hebrenjtë e të gjitha grupeve si Sefardikë, Romaniote, Marrano u bashkuan në Shqipëri edhe pse dihet se marrëdhëniet mes këtyre grupeve nuk kanë qenë gjithmonë vëllazërore. Më e bukura për hebrenjtë, të paktën sipas dijes sonë që janë trima për luftë por jo për të rënë dakord me njëri-tjetrin”, tha ai.
Rama tha se hebrenjtë mundën të jetonin në mënyrë të shkëlqyer mes tyre dhe me shqiptarët.
“Kjo doli të ishte e vërtetë edhe kur grupi i katërt hebre që rrezikonte çrrënjosjen, hebrenjtë ashkenazi, u vendosën në Shqipëri pas nisjes së doktrinës së zgjidhjes përfundimtare. Në vitin 1931, qeveria e Shqipërisë urdhëroi regjistrimin e plotë të popullsisë. Me këtë rast hebrenjve iu njoh e drejta e tyre për bashkësi, duke përfshirë Sabatin. Ky ishte një akt i rrallë në Europën e asaj kohe, ku dominonte antisemitizmi. Në fakt, ishte i vetmi rast. Ndërsa kudo tjetër po shteroheshin, Shqipëria u dha atyre me ligj barazi etnike dhe fetare njësoj si të gjitha komunitetet e tjera në vend. Konsiderohet të jetë rasti i vetëm i diskriminimit pozitiv për hebrenjtë në ato kohë të errëta”, tha Rama.
“Kjo situatë bindëse inkurajoi ambasadorin amerikan në Tiranë, Herman Bernstein, një figurë qendrore botërore e Sionizmit në vitet 1930, të propozonte një marrëveshje ndërqeveritare midis Shqipërisë dhe Shteteve të Bashkuara për 500 familje hebreje të pranohen në Shqipëri. Misionarët e Kongresit Botëror Hebre negociuan gjithashtu me qeverinë mbretërore dhe mandatuan misionarin Leo Elton që të vizitonte i cili pati bisedime me dy ministra shqiptarë duke rënë dakord me ta që Shqipëria të pranonte masivisht hebrenjtë në rrezik dhe që ata të vendoseshin të lirë në territore për të krijuar vendbanime të ngjashme me kibucin e sotëm. Raporti i misionarit Leo Elton iu dha Rektorit të parë të Universitetit Hebraik, Profesor Judah Leib dhjetë vjet më vonë, ku qëndron edhe sot e kësaj dite. Faktet e pakta që dalin nga ky raport 50 faqesh flasin për të njëjtin model historie nderimi dhe solidariteti reciprok mes shqiptarëve dhe hebrenjve”, vijoi ai.
“Siç shkruante disa vite më parë në të përditshmen Haaretz, publicisti hebre Nir Hasson, Shqipëria konsiderohet në këto dokumente sipas Leo Elton një atdhe i dytë dhe shtesë për hebrenjtë. Ndërkohë një pjesë e opinionit europian ishte në panik nga frika se Shqipëria po asimilohej nga hebrenjtë. E gjithë kjo po ndodhte ndërkohë që qeveria në Shqipëri ishte nën kontrollin e Romës fashiste. Kështu shkruante një tekst i koduar i një informatori italian për Ministrinë e Jashtme në vitin 1936. “Pa dashur të alarmoj, më duhet të them se simpatitë shqiptare për ne do të shuhen së shpejti dhe vendin tonë do ta zënë hebrenjtë””, shtoi Rama.
Kryeministri solli në vëmendje se “në shtator 1943, kur ish-ambasadori nazist në Beogradm Neubacher erdhi në Tiranë për të takuar katër përfaqësuesit e komuniteteve fetare për të pranuar formulën e pavarësisë relative për neutralitetin relativ, ai premtoi gjithçka me kusht që të plotësoheshin tre kushte të panegociueshme: sigurimi i një listë e hebrenjve; dorëzimi i arit monetar që ndodhej në Romë dhe dorëzimi i dy ungjijve të shenjtë të Beratit”.
“Katër negociatorët refuzuan kategorikisht fillimin e negociatave nëse nuk tërhiqej kushti për dorëzimin e listës hebreje. Duhet ta dini që në Kushtetutën e Parë Shqiptare, të shkruajtur në Mesjetë ka një paragraf që ka përkufizuar historinë e shqiptarëve me shekuj me radhë. “Shtëpia e shqiptarit i përket Zotit dhe mikut”. Fjala “mik” nuk ka kuptim njeriun e ftuar, por atij që troket në portë sepse ka nevojë për ndihmë. Tradhtia ndaj këtij miku në Kodin e Nderit së shqiptarit është krim i pafalshëm. Këta negociatorë u shpjeguan nazistëve se nëse do të guxonin të pranonin dorëzimin e hebrenjve do të humbitnin të gjithë besimtarët e tyre. Ndaj pranuan të dorëzonin arin dhe nuk pranuan të dorëzonin hebrenjtë”, tha Rama.
Kryeministri tha se “nazistët u përpoqën edhe një herë në prill ’44 dhe në qershor ‘44, sipas enciklopedisë Izraelite Pinkas Hakehillot, derisa u arrit në përfundimin se nuk mund të arrihej asnjë marrëveshje me shqiptarët për këtë pikë”.
“Në pranverën e vitit 1942, në përputhje me statusin special të Mitrovicës, i cili lejoi ushtrinë naziste të hynte pa autorizim në të ashtuquajturat “teritori liberi” (territoret e lira) të Kosovës pa autorizim. Këtu po sjell një episod dhe më vjen keq për Spilbergun, që po ta dinte për Shqipërinë, do të ishte më i suksesshëm për rrëfimet e hebrenjve. Por dëgjojeni këtë. Një ekspeditë e forcave speciale të Rajhut me seli në Beograd, u caktua për të arrestuar të gjithë burrat hebrenj që jetonin në Prishtinë, kryeqytetin e Kosovës. Drejtori i spitalit të qytetit ishte një shqiptar nga Shqipëria, doktor Spiro Lito, i cili në dijeninë time është gjithashtu një i drejtë midis kombeve në Yad Vashem, ai u kërkoi pacientëve shqiptarë të dilnin nga spitali, edhe pse me plagë të rënda që të ktheheshin në shtëpi dhe të lironin shtretërit dhe strehoi në spital gjithë burrat hebrenj të qytetit”, theksoi ai.
Rama u shpreh se “për të penguar hyrjen në spital për kontrolle, drejtori e rrethoi gjithë territorin e spitalit me tabela ku shkruhej: ‘Virus vdekjeprurës. Mos u afro’”.
“Pjesa interesante e historisë është se asnjë nga pacientët që u kthyen në shtëpi, disa prej tyre në gjendje të rëndë shëndetësore dhe asnjë nga të afërmit e tyre nuk shkuan te nazistët për të thënë, dikush i çmendur më ka flakur babanë, gjyshin ose vëllanë për të zbrazur shtretërit për këta njerëz që po kërkoni. Kështu nazistët u kthyen pa asnjë hebre në duart e tyre. Pjesa tjetër e historisë është kontributi i pabesueshëm i Kishës Katolike. Jeni të vetëdijshëm se Kisha nuk ishte shumë e sjellshme me hebrenjtë gjatë Luftës së Dytë Botërore, por në Shqipëri, Kryepeshkopi u angazhua personalisht për t’u dhënë hebrenjve certifikata false të pagëzimit për t’i shpëtuar ata”, tha ai.
Kryeministri theksoi se “mbrojtja dhe shpëtimi i hebrenjve është një virtyt i natyrshëm shqiptar”.
“Vlen të përmendet rasti i katër hebrenjve dhe ky një tjetër rast unik në Evropë, që u arrestuan. Ka shkëmbim letrash midis komandës naziste dhe qeverisë kolaboracioniste shqiptare, njerëz të caktuar nga nazistët, ku kërkonin lirimin e tyre, duke paguar një garanci prej 1500 napolona ari për secilin prej tyre. Pra, kjo ishte tronditëse për nazistët por ka prova të dokumentuara që qeveria kolaboracioniste këmbënguli dhe më në fund i liroi këta hebrenj duke paguar për ta”, tha Rama.
Por, kryeministri theksoi se do të ishte gabim të pretendohej se asnjë hebre nuk vdiq në Shqipëri gjatë Holokaustit.
“17 prej tyre nuk kanë vdekur duke u internuar apo spiunuar, por kanë vdekur si antifashistë pjesëmarrës në luftën nacionalçlirimtare dhe janë shpallur dëshmorë. Shqipëria është i vetmi vend në Ballkan ku përbërja fetare nuk ka një rol përcaktues apo dallues për sa i përket identitetit. Katër komunitete fetare tashmë jetonin së bashku në atë që Papa Françesku pagëzoi jo si një harmoni fetare, por si një vëllazëri fetare. Dhe një bashkësi e pestë e hebrenjve nuk ishte aspak problem”, u shpreh Kryeministri.
Rama tha se “kjo nuk është thjesht një faqe e bukur e historisë sonë, por është një thesar shumë i rëndësishëm i trashëgimisë sonë kombëtare”.
“Dhe ne nuk duhet vetëm ta tregojmë, por duhet të sigurohemi që brezat e rinj ta kuptojnë me mendje e shpirt si pjesë e thelbit të të qenit shqiptar dhe të krenarisë që janë shqiptarë. Për ne është absolutisht e rëndësishme të jemi në linjë në luftën kundër antisemitizmit sepse siç e kuptojmë nuk ka të bëjë vetëm me hebrenjtë”, shtoi Rama.
Sipas tij, bëhet fjalë për njerëzimin. “Lufta kundër antisemitizmit nuk është të mbrosh hebrenjtë apo Izraelin, por mbron veten, familjen, fëmijët dhe të drejtën tënde për t’u respektuar në të qenit musliman në Paris, i krishterë në një vend mysliman ose çfarëdo feje në cilindo vend ku nuk jeni pjesë e shumicës dhe ndërsa po e ndaja me themeluesin dhe sponsorin tuaj të hirshëm gjithashtu, unë besoj fuqimisht se rreziku më i madh me të cilin përballemi kur bëhet fjalë për antisemitizmin nuk është nga vandalët që vandalizojnë varrezat apo sinagogat hebreje. Kjo është diçka vërtet e turpshme, por është shumë e turpshme për të qenë vërtet e rrezikshme”.
“Përkundrazi, kjo ekspozon anën barbare të një skaji të caktuar. Rreziku më i madh vjen nga ata që duken të arsyeshëm dhe debatojnë e relativizojnë antisemitizmin. Nuk u ndjeva kurrë aq keq sa kur dëgjova disa anëtarë të Partisë Laburiste Britanike në një moment të caktuar disa vite më parë për antisemitizmin që më bëri shumë më të frikësuar se sa të dëgjosh lajmet për një sinagogë apo varrezë që u vandalizuan. Përsëri sepse relativizmi mund të na kthejë në vende vërtet të këqija. Vandalizmi është aty, i ekspozuar, është i qartë dhe lehtshëm përcaktohet vija ndarëse. Kështu që nuk mund t’ju them më shumë për antisemitizmin, ju e dini gjithçka për të”, tha ai.
“Gjyshja ime ishte katolike. Ajo nuk shkoi kurrë në universitet, por më besoni se kishte një mençuri të pakrahasueshme me të gjithë shkencëtarët që njoh në Shqipëri. Ajo më thoshte kur prindërit e mi ishin të pakënaqur me mua… meqë ra fjala, isha një fëmijë i vështirë. Nuk mund të bëhesh kryeministër i Shqipërisë nëse nuk je fëmijë i vështirë. Unë mërzitesha me ta dhe ajo më thoshte: Mos u shqetëso. Rri qetë. Kështu janë prindërit. Je djalë dhe djemtë bëhen burra dhe burrat nga natyra nuk janë krijesa të përsosura dhe perfekte. Kështu që do të bësh gabime gjithë jetës sepse je burrë. Por ka një gjë që nuk duhet ta harrosh. Një burrë mund të përballojë të bëjë gabime, por nuk mund të përballojë të jetë i mërzitshëm”përfundoi Rama. / atsh / KultPlus.com
Kryeministri Edi Rama priti sot në një takim aktorin e famshëm të Hollivudit, Jim Belushi.
“Blues Brothers. Me legjendën Jim Belushi për dokumentarin amerikan mbi Shqipërinë, në serialin e Discovery Channel”, shkroi Rama në rrjetet sociale, teksa ndau foto nga takimi me aktorin Belushi.
Aktori i madh me origjinë shqiptare, Jim Belushi ndodhet në Tiranë për të realizuar dokumentarin që do të transmetohet së shpejti në median amerikane. Një ditë më parë, ai shpërndau foto nga Tirana duke shkruar: E dua këtë vend./atsh/ KultPlus.com
Muzeu Etnografik i Gjirokastrës është magneti më i ri turistik në qytet, restaurimi i të cilit i riktheu vlerave të qytetit të gurtë, hijeshinë e një kompleksi muzeal autentik, ku tradita e artizanëve gjirokastritë është çmuar dhe respektuar në çdo detaj.
Projekti i përfunduar i Muzeut Etnografik, krijim i arkitektit të famshëm Jesus Hernandez, mundësuar nga Fondi Shqiptar i Zhvillimit, Ministria e Kulturës dhe Bashkia e Gjirokastrës, përfshin edhe muzealizimin e Shtëpisë Kadare, itinerarin “Eduart Lir dhe udhëtarët”, që dëshmon të gjithë rrugëtimin që Lear ka bërë në zonën historike, si dhe itinerarin “Kronikë në Gur”.
Kryeministri Edi Rama ishte sot një prej vizitorëve të Muzeut, së bashku me ministren e Kulturës, Elva Margariti dhe ministren e Turizmit dhe Mjedisit, Mirela Kumbaro, të cilët shpjeguan detaje nga rikonceptimi artistik që u është bërë objekteve. / KultPlus.com
Kukësi do të ketë së shpejti “Parkun e Aventurave”.
Në Shishtavec të Kukësit po merr jetë “Parku i Aventurave” një investim që do të krijojë mundësi në rritjen e potencialit ekonomik të zonës.
Kryeministri Edi Rama publikoi në rrjetet sociale foto që tregojnë aspekte nga ky investim i ri, nën emrin “Parku i Aventurave”, që po merr formë në këtë zonë me bukuri natyrore.
“Po merr formë pak nga pak “Parku i Aventurave”, një investim i mençur i Bashkisë Kukës, një zonë magjepsëse të natyrës shqiptare si Shishtaveci, ku kemi një plan ambicioz zhvillimi të turizmit malor”, u shpreh Rama.
“Parku i Aventurave” është një projekt i fituar nga bashkia Kukës në kuadër të Skemës së Granteve të Zhvillimit Rajonal dhe Kohezionit të Programit (PZHRSH).
Nga ky investim do të promovohet zona nëpërmjet krijimit të hapësirave për zhvillimin e turizmit të aventurës dhe sporteve. / atsh / KultPlus.com
Në marrëveshjen mes Kosovës dhe Shqipërisë, është dakorudar që të hapet pika kufitare Krushevë – Shishtavec, shkruan KultPlus.
Tani në këtë pikë kufitare, po zhvillohet edhe ekonomia dhe turizmi malor, në komunat Dragash dhe Kukës.
“Po merr formë pak nga pak “Parku i Aventurave”, një investim i mençur i Bashkisë Kukës, në zonë magjepsëse të natyrës shqiptare si Shishtaveci, ku kemi një plan ambicioz zhvillimi të turizmit malor”, ka shkruar Edi Rama në “Facebook”.
Ndërkaq, zyrtari i Ministrisë së Punëve të Brendshme, Lorik Lipoveci, ka thënë se ndjehet krenar që ishte kryenegociator i delegacionit punues për këtë marrëveshje.
“Disa muaj më parë, u nënshkrua marrëveshja bilaterale mes qeverive të Kosovës dhe Shqipërisë, përkatësisht ministrave të MPB-ve z.Sveçla dhe z.Çuçi, për hapjen e pikës kufitare Krushevë – Shishtavec 🇽🇰🇦🇱 Pika kufitare u hap, tani ka filluar zhvillimi ekonomik, turizmi malor, në këtë zonë kufitare në komunat Dragash dhe Kukës. Ndjehem krenar që kisha nderin të jem kryenegociator i delegacionit punues për këtë marrëveshje”, thuhet në postimin e tij. /KultPlus.com
Kryeministri i Shqipërisë, Edi Rama, ka nisur fjalimin e tij në Asamblenë e Këshillit të Evropës.
Ai ka thënë se nuk është aty për të folur vetëm për Shqipërinë, por edhe për Kosovën, pasi konsideron se janë të lidhura si shpirti me trupin.
“Jam këtu të flas. Kthimi i historisë nga konflikti në bashkëpunim kërkon vullnet dhe besim të ndërsjellë edhe midis institucioneve ndërkombëtare. Nëse ato dështojnë të sjellin drejtësi, atëherë kjo kalon tragjedinë personale”, është shprehur Rama.
“Shqipëria vazhdon ta ndërtojë të ardhmen me trashëgiminë e së kaluarës. Serbia tani është një partner I rëndësishëm brenda Ballkanit të Hapur. Evropa për ne është projekt ekzistencial. Historia nuk ka qenë e kujdesshme me ne, nuk kemi mundur që të zgjedhim se ku përkasim”.
Në fjalën e tij Rama e ka përmendur edhe Kosovën, duke kërkuar që të mos i drejtohen me “Kosovo”
“Është Republika e Kosovës. Nuk është kurrë vonë për të përmirësuar gabimet. Sikur Ukraina sot, Republika e Kosovës është përballur pak dekada më parë. Ka përpjekje që të tërhiqen paralele midis Krimesë dhe Republikës së Kosovës, cka është e paqëndrueshme”. /KultPlus.com
Kryeministri Edi Rama ndau sot në rrjetet sociale pamje nga Bajpasi i Vlorës, ku së fundmi po organizohen edhe aktivitete turistiko-sportive.
Kreu i qeverisë shprehet se, Bajpasi i Vlorës është një prej veprave më spektakolare të infrastrukturës sonë kombëtare.
Rama thekson se, krahas impaktit në lehtësimin e trafikut, Bajpasi i Vlorës , nxori në pah pamjen piktoreske të vijës bregdetare të rivierës shqiptare e ku së fundmi po organizohen edhe aktivitete turistiko-sportive.
Bajpasi i Vlorës jo vetëm që lehtësoi trafikun gjatë sezonit veror, por nxori në pah pamjen piktoreske të vijës bregdetare të rivierës shqiptare.
Autoriteti Rrugor Shqiptar organizoi një aktivitet sportiv “Pedalojmë bajpasin e Vlorës” me çiklistat e Klubit të Tiranës, që përshkuan me biçikleta një nga rrugët më panoramike të Shqipërisë, eksperiencë kjo unike dhe e paharrueshme.
Bajpasi i Vlorës, një vepër shumë komplekse, por dhe e rëndësishme për zhvillimin turistik të vendit, që lehtëson aksesin drejt bregdetit të jugut, është i hapur për qarkullimin e automjeteve.
Bajpasi i Vlorës ka një gjatësi prej 29 kilometrash. Pjesë e projektit janë edhe disa vepra arti./ atsh/ KultPlus.com
Kryeministri Edi Rama përshëndeti sot hapjen e Zyrës Doganore të Kosovës në portin e Durrësit, në të cilën prej 1 tetorit po kryhet zhdoganimi i mallrave.
“Shqipëri-Kosovë, jena 1”, u shpreh Rama. “Ja ku ka nisur edhe zhdoganimi në Portin e Durrësit për mallrat me destinacion Kosovën dhe deti ynë nuk është më edhe i Kosovës veç për turizëm, po është edhe i Kosovës për tregti”, shtoi Kryeministri.
Zyra Doganore e Kosovës në Portin e Durrësit nisi funksionimin më 1 shtator, por zhdoganoheshin vetëm maunet dhe karburantet. Nga 1 tetori në këtë zyrë kryhen procedurat e zhdoganimit për çdo lloj malli.
Nga hapja e kësaj zyre doganore janë 1040 biznese nga Kosova që përfitojnë jo vetëm kohë, por edhe kosto të reduktuar zhdoganimi.
Hapja e Zyrës Doganore në portin e Durrësit, i kursen rreth 2 milionë euro biznesit, ndërsa koha e procedurave shkurtohet ndjeshëm./atsh/ KultPlus.com
Kryeministri i Shqipërisë, Edi Rama, ka shprehur sot qëndrimin e tij për rusët që po largohen nga vendi i tyre pas mobilizimit të pjesshëm ushtarak të Presidentit Vladimir Putin.
Gazetarët e pyetën Ramën për zhvillimet e fundit në Rusi, e ai tha se është pro hapjes së dyerve për rusët dhe se ata mund të largohen nga vendi i tyre në shenjë revolte ndaj Putinit.
Ai u përgjigj shkurt duke thënë: “Janë të mirëpritur në Shqipëri”.
Sipas raportimeve në mediat e huaja, numri i atyre që u larguan nga Rusia kaloi në 100,000 vetëm në Kazakistan dhe Gjeorgji dhe numri i tyre po rritet pas frikës së rekrutimit në front.
Gjermania ishte vendi i parë që hapi dyert për rusët që largoheshin nga vendi i tyre, duke u premtuar atyre kujdes dhe vëmendje. /KultPlus.com
Kryeministri i Shqipërisë, Edi Rama, i bëri thirrje edhe një herë Kosovës dhe shteteve të tjera të rajonit që t’i bashkohen nismës sëBallkanit të Hapur, shkruan KultPlus.
Kjo nismë, sipas Ramës, i cili pati një fjalim në Asamblenë e Përgjithshme të Kombeve të Bashkuara, do të lehtësonte shumë dialogun e kahershëm ndërmjet Kosovës dhe Serbisë.
Kryeministri shqiptar tha edhe një herë se Shqipëria do të vazhdojë të mbështesë Kosovën, derisa Serbia të njohë si Republikë të pavarur dhe sovrane.
“Duke forcuar marrëdhëniet me Serbinë, Shqipëria nuk do të lëviz asnjë centimetër për mbështetje që të njohë Serbinë. Është koha që Kosova dhe Serbia të lëvizin përtej ngërçit dhe të bëjnë rolin e tyre për një marrëveshje të mbështetur nga BE dhe SHBA. Dialogu është i nevojshëm dhe Ballkani i Hapur do ta ndihmojë këtë proces.”
“Nëse do të ecësh shpesh ec i vetëm. Nëse do të ecësh lart, ec krah për krah”, tha ai mes tjerash. /KultPlus.com
Mbrëmjen e djeshme, këngëtarja shqiptare me famë botërore, Rita Ora ka performuar në sheshin Skënderbej, duke elektrizuar atmosferën me disa nga këngët më të njohura nga repertori i saj.
Ajo është pëlqyer shumë nga publiku, të cilët kishin mbushur sheshin për ta parë nga afër këngëtaren. Në një moment, Rita kërceu dhe vallen e Tropojës. Pasi kërceu nën ritmet e valles popullore në sfond, këngëtarja këndoi më pas këngën hit “Black Window”. Në veshjen e saj ishin të ndërthurura detajet e shqiponjës dy krenare.
Për këtë sukses, ka shkruar edhe kryeministri Edi Rama, i cili e ka falënderuar artisten dhe duke e cilësuar atë si ‘kinge’.
“Faleminderit kinge”, ka shkruar ai krahas fotos së Ritës me flamurin shqiptar./ KultPlus.com
Kryeministri Edi Rama ndau sot shkrimin promovues të medies së njohur zvicerane “20 Minutes”, ndërsa u shpreh se “Shqipëria turistike vijon të bëjë jehonë në mediet e huaja”.
“’20 Minutes’, një medie shumë e njohur zvicerane, në një artikull të fundit të saj iu sugjeron lexuesve që të vijnë për pushimet e shtatorit në Shqipëri. Shqipëria renditet në artikull si destinacioni i parë i preferuar, krahas Stambollit, Hieres në Francë, Algraves në Portugali dhe Kalabrisë në Itali”, shkruan Rama.
“20 Minutes” e rendit Shqipërinë mes 5 vendeve më të bukura që nuk duhen humbur gjatë muajit shtator, kur temperaturat janë të favorshme, kuzhina është e shijshme, vala e madhe turistike ka kaluar dhe çmimet ulen.
Me dy foto ilustruese të peizazhit piktoresk dhe të ujërave të kristalta të Ksamilit, prestigjiozja zvicerane ka veçuar Sarandën dhe rrethinat e saj.
“Saranda është afër kufirit me Greqinë. Duke marrë rrugën që të çon në Ksamil, një fshat simpatik, mund të shihni Korfuzin nga larg. Vendi është pjesë e Parkut Kombëtar të Butrintit. Më në jug, mund të vizitoni me varkë dy ishuj të vegjël: Ishullin e Tongos dhe atë të Stillos”, shkruan mes të tjerash “20 Minutes”. / atsh / KultPlus.com
Kreu i qeverisë Edi Rama ka bërë reagimin e parë pasi rrjeti u mbush me flamurin me yllin komunist që u shfaq një natë më parë në festivalin ‘Sunny Hill’.
Në një postim në Twitter, Rama ka ndarë një postim të kryebashkiakut Erion Veliaj, i cili u është përgjigjur kritikave në lidhje me këtë simbol që doli në skenë në momentin që u luajt kënga “Asgjë sikur dielli”.
Rama sulmon Sali Berishën teksa shkruan me ironi se ata që po e kritikojnë këtë flamur duhet të luftojnë edhe atë që ai e quan “sekretarin e PPSH-së i cili është në krye të PD-së”.
“Nuk luftohet komunizmi me metoda komuniste! Kenga eshte nje satire ndaj regjimit! Alban Nimani – dhender ne Tirane ne nje nga familjet me te perndjekura – e ka prodhuar para 8 viteve! Uroj te luftoni me te njejtin zell sekretarin e PPSH ne krye te PD dhe sigurimsin aleat!”, shkruan Rama./ KultPlus.com
Kreu i qeverisë Edi Rama ka bërë reagimin e parë pasi rrjeti u mbush me flamurin me yllin komunist që u shfaq një natë më parë në festivalin ‘Sunny Hill’.
Kreu i qeverisë Edi Rama ka bërë reagimin e parë pasi rrjeti u mbush me flamurin me yllin komunist që u shfaq një natë më parë në festivalin ‘Sunny Hill’.
Kryeministri i Kosovës, Albin Kurti, priti në takim organizatorët dhe seminaristët e Seminarit të 40-të Ndërkombëtar për Gjuhën, Letërsinë dhe Kulturën Shqiptare, përcjell KultPlus.
Duke i përgëzuar për ligjërata e kumtesat interesante dhe cilësore, Kurti theksoi gatishmërinë për shtim të përkrahjes dhe kujdesit institucional për studimet albanologjike.
Organizatorët shprehën mirënjohje për përkrahjen e pa rezervë, siç thanë, dhënë nga Qeveria e Kosovës për seminarin.
U bisedua për domosdoshmërinë e rritjes së mbështetjes për publikime të albanologjisë në Kosovë e Shqipëri. U theksua rëndësia e krijimit të një platforme të përbashkët për publikime cilësore Kosovë–Shqipëri, nën udhëheqjen dhe redaktimin e këtyre botimeve nga emra eminentë nga fusha e albanologjisë.
Në këtë takim ishin të pranishëm Ministrja e Arsimit Shkencës, Teknologjisë dhe Inovacionit, Arbërie Nagavci, Dekania e Fakultetit të Filologjisë, Lendita Rugova, Drejtori i Seminarit, Shkumbin Munishi, Shefi i Departamentit të Gjuhës Shqipe, si dhe studiues pjesëmarrës në seminar: Anton Panchev nga Bullgaria, Linda Meniku, nga Shqipëria, Jan Jensen nga Holanda, Giuseppina Turano nga Italia, Emese Nemeth nga Hungaria, Ekaterina Tarpomanova nga Bullgaria, Ledio Hala Gjermani/ Shqipëri, Lumnije Jusufi nga Gjermania, Barbara Jarysz Markaj nga Polonia, Olivier Andreas Winistorfer nga Zvicra.
Gjatë takimit u veçua se ky seminari jubilar krahas numrit të lartë të pjesëmarrësve, solli edhe shumë prurje të reja që kanë arritur pritshmeritë e organizatorëve. /KultPlus.com
Kryeministri Edi Rama theksoi se “sot nuk ka më protagonistë të braktisur të sportit, po ka sistem shpërblimesh për protagonistët, miratuar me vendim qeverie kohë më parë”.
Në një postim të ndarë sot në rrjetet sociale, Rama tha se “në bazë të këtij vendimi për vitin 2021 kanë përfituar shpërblim në bazë të rezultateve në arenën ndërkombëtare 14 protagonistë, 7 sportistë dhe 7 trajnerët e tyre. Ndërsa për vitin 2022 kanë përfituar 44 vetë, 22 sportistë dhe 22 trajnerët e tyre, për rezultate të larta ndërkombëtare. Gjithashtu, për herë të parë, janë dhënë shpërblime edhe për kampionë Ballkani, ndër ta edhe për Luiza Gegën”.
Duke folur për lajmet e rreme, kreu i qeverisë shprehet se “halli i madh këtu është se e keqja, e cila ka marrë formën e vorbullës marramendëse të lajmeve të rreme, fabrikimit të fakteve alternative, gjobave mediatike e sulmeve politike, të përziera me garuzhden e vjetër të egërsisë provinciale, ka dalë jashtë të gjithë kufijve të njerzillëkut më bazik”.
Postimi i plotë i kryeministrit Edi Rama:
TRIUMFI HISTORIK I LUIZA GEGËS SI PASQYRË E MEXHELISIT TONË SOCIAL-POLITIK
Në një botë ku faktet janë gjithnjë e më të shpërfillura dhe mllefet e inatet gjithnjë e më shumë alternativë e fakteve, mexhelisi politik e mediatik shqiptar është kthyer në një “çmendinë”, që përditë çmend dynjanë!
Kjo s’është diçka e re dhe s’do t’i shkruaja këto rreshta, sikur të mos isha mahnitur nga çmenduria që plasi sheshit bashkë me triumfin historik të Luiza Gegës. Shenjat e para të çmendurisë u panë qysh në fillim, kur nisën edhe zërat që uronin Luizën për të sharë qeverinë. Qeveria e poshtër e kishte braktisur e syrgjynosur deri në Afrikë, vajzën e shkretë të jetimores së sportit shqiptar, ndërkohë që në fakt Luiza është mbështetur nga kryebashkiaku i Tiranës, për t’u stërvitur në lartësinë mbi 3 mijë metra të Kenias, ku stimulohet rritja e rruazave të gjakut.
Por shpërthimi çmendurak mori dhenë, kur kampionia e re e Europës u prit në kryeministri, për t’u nderuar siç i takonte pas një triumfi të paparë në historinë e sportit shqiptar. Kampionët e urrejtjes profesionale, modele të mbrapshta publike, që ushqejnë mllefin dhe yshtin inatin anonim të rrjeteve sociale, u lëshuan me tërbim në ekrane e portale, duke e komentuar ngjarjen si pengmarrje të Luizës për propagandë apo deri si shitje të shpirtit të saj tek regjimi!…
Foli më shumë se njëherë kampionia me gojën e saj, për si dhe sa shumë kanë ndryshuar gjërat, si është mbështetur sporti dhe ajo vetë vitet e fundit, e qysh mbështetja financiare ia ka bërë më të lehtë rrugëtimin e saj drejt majës. Madje ajo, vajzë e rrallë, me një mirësjellje mbresëlënëse, nuk harroi të dërgonte mesazhi falënderimi nga Mynihu, kur në fakt falënderimet i takonin vetëm e vetëm asaj. Po ku kanë veshë të dëgjojnë ata që edhe Amerikën duan ta mbrojnë nga ambasadorja amerikane, jo më Luiza Gegën nga unë! Halli i madh këtu është se e keqja, e cila ka marrë formën e vorbullës marramendëse të lajmeve të rreme, fabrikimit të fakteve alternative, gjobave mediatike e sulmeve politike, të përziera me garuzhden e vjetër të egërsisë provinciale, ka dalë jashtë të gjithë kufijve të njerzillëkut më bazik. Helmimi i përditshëm i gjakut të shoqërisë është kthyer në rutinë dhe faktet trajtohen si opinione, ndërsa opinionet imponohen si fakte me inat, mllef e urrejtje të pangushëllueshme. Kur thua të vemë ndonjë rregull ligjor, se ky ortek llumi do të fundosë çdo vlerë njerzillëku e normë bashkëjetese shoqërore, duke e varrosur si qen të ngordhur, mundin e prindërve e përpjekjen e shkollës për edukimin e fëmijëve, të ngrihen e të thonë jo! Duhet veç vetërregullim, po se si e qysh do të ndodhë ky vetërregullimi nuk ta thotë dot kush! Nejse, s’është ky qëllimi i këtij shënimi të gjatë.
Sot unë dua të këmbëngul tek faktet! Pa asnjë shpresë se do të dalë kush e t’i kërkojë falje Luiza Gegës, se për falje lexuesve as bëhet fjalë. Por me bindjen që sidoqoftë, faktet u duhen atyre që kanë ende respekt për veten e për të vërtetën e mbështetur mbi fakte.
E PARA, sot nuk ka më protagonistë të braktisur të sportit, po ka sistem shpërblimesh për protagonistët, miratuar me vendim qeverie kohë më parë dhe në bazë të të cilit: Për vitin 2021 kanë përfituar shpërblim në bazë të rezultateve në arenën ndërkombëtare 14 protagonistë, 7 sportistë dhe 7 trajnerët e tyre. Ndërsa për vitin 2022 kane përfituar 44 vetë, 22 sportistë dhe 22 trajnerët e tyre, për rezultate të larta ndërkombëtare. Gjithashtu, për herë të parë, janë dhënë shpërblime edhe për kampionë Ballkani, ndër ta edhe për Luiza Gegën.
E DYTA, sot nuk ka më shpërblime spontane për ata që nderojnë flamurin kuqezi në arenën ndërkombëtare dhe nuk ka më as harresa, për të paguar detyrimet që burojnë nga vendimi përkatës i qeverisë. Bashkëngjitur vendimi, të cilin jam i bindur që urrejtësit profesionistë të ekraneve e të portaleve, të cilët e duan me zor çdo gjë në Shqipëri sa më zi, e që edhe triumfin e Luiza Gegës e përdorën si zift për ta derdhur mbi armikun politik, nuk do ta lexojnë https://qbz.gov.al/…/024170e9-1ddf-429b-b0f6-8705f4bd33ff
E TRETA, sot nuk ka më vetëm shpërblime për rezultatet më të larta, po edhe trajtim të përhershëm për kampionët ndërkombëtarë shqiptarë, përfshirë edhe shqiptarët e Kosovës! Bazuar në një tjetër vendim qeverie të disa viteve më parë, “Për kriteret, mënyrën e shpërblimit dhe përfitimin e trajtimit për përgatitjen sportive të sportistëve, që përfitojnë statusin e nivelit të lartë”, janë punësuar si më poshtë nga Ministria e Mbrojtjes:
E KATËRTA, sot nuk ka më ndalesë në rrugën e progresit, që nënkupton edhe përmirësime e korrigjime të vazhdueshme të punës sonë, në shërbim të vendit dhe njerëzve të këtij vendi. Ministria e Mbrojtjes ka propozuar disa kohë më parë ndryshime ligjore, të cilat do të mundësojnë përfshirjen e kampionëve ndërkombëtarë në rangun e gradave të Forcave të Armatosura të Republikës së Shqipërisë dhe krijimin e një strukture speciale, ku ata do të angazhohen si mentorë të ushtarëve tanë, me pagën sipas gradës, në shërbim të atdheut deri në daljen e tyre në pension. Këto ndryshime i shërbejnë njohjes së kontributit të sportistëve në promovimin dhe lartësimin e emrit të vendit tonë në arenën ndërkombëtare. Ligji është në fazën e bashkërendimit me institucionet e linjës, pasi është përmbyllur konsultimi publik dhe në mes të shtatorit do të hyjë në procedurën parlamentare. Sportistët e punësuar aktualisht pranë Ministrisë së Mbrojtjes, që do të përfitojnë nga ky ligj gradën e kolonelit janë:
DHE E FUNDIT, kur flitet për sportin të gjithë jemi në borxh, me këtë vend dhe rininë e këtij vendi, por ama kur flitet me fakte për mbështetjen për sportin, nuk ka asnjë krahasim të imagjinueshëm, se të mundshëm jo e jo, mes këtyre viteve të qeverisë sonë dhe të gjitha viteve të tjera bashkë. Pa ekzagjerim, as dita me natën nuk dallojnë kaq shumë sa këto dy periudha për sportin. Natyrisht do të kishim dashur të bënim më shumë më shpejt, por kur kujtoj se nga jemi nisur, them lavdi Zotit që ia kemi dalë të bëjmë sa kemi bërë. Ndërkohë që patjetër, padiskutim, edhe në sport dallimi mes ku jemi dhe ku duhet e duam të jemi është ende shumë i madh.
Si përfundim, jam i bindur që as tërë këto fakte nuk do të hedhin dot dritë mbi shpirtrat katran, ku merr jetë urrejtja profesionale e mendjembrapshtëve që e përndjekin këmba-këmbës këtë vend, qysh nga dita e krijimit të alfabetit shqip. Por s’kemi ç’bëjmë tjetër përveçse të marrim shembull nga Luiza Gega:
Kryeministri Edi Rama ka publikuar një video në të cilën shfaqet me të rinj nga Shqipëria, Kosova dhe Maqedonia e Veriut në Austri ku do të marrë pjesë në “European Forum Alpbach”.
“Me shqipet në malet e Europës”, shkruan kryeministri krahas videos së publikuar në facebook që prezanton të rinjtë. Më pas Rama iu kërkon të rinjve që të këndojnë së bashku këngën patriotike, “xhamadani vija vija”. / KultPlus.com
Nesër në orën 11:00 në bulevardin “Dëshmorët e Kombit” do të mbahet një pritje për kampionen e Europës në atletikë, Luiza Gega.
Lajmin e dha kryeministri Edi Rama, i cili ka ftuar të marrë pjesë në këtë ceremoni këdo që dëshiron të duartrokasë kampionen e parë europiane të atletikës me fanellën kuqezi të Shqipërisë.
“Shihemi nesër në 11.00 në ceremoninë e posaçme për nder të Luiza Gegës, me këdo e ka të mundur dhe dëshiron ta duartrokasë kampionen e parë europiane të atletikës me fanellën kuqezi të Shqipërisë”, ka shkruar Rama në një postim në rrjetet sociale.
Luiza Gega u shpall kampione e Evropës në garën e 3 000 metrave me pengesa.
Ajo arriti të thyejë edhe rekordin e Kampionatit Evropian, me kohën 9 minuta, 11 sekonda dhe 31 të qindtat.
Kampionia shqiptare shkoi në finale me kohën më të mirë në fazën kualifikuese dhe ishte pretendentja kryesore për të fituar këtë garë.
Gega diktoi ritmin gjatë gjithë garës./ KultPlus.com
Kryeministri Edi Rama ndau sot pamje nga projekti i portit më të madh turistik të Mesdheut që pritet të bëhet në Durrës.
Rama theksoi se dje u hodh një hap vendimtar me nënshkrimin e Memorandumit të Bashkëpunimit.
Ky Memorandum hap rrugën drejt procedurës parlamentare për kontratën historike për ndërtimin e portit më të madh turistik të Mesdheut në Durrës.
“Mirëmëngjes dhe me kënaqësinë e hedhjes së një hapi vendimtar dje, me nënshkrimin e Memorandumit të Bashkëpunimit, që hap rrugën drejt procedurës parlamentare për kontratën historike për ndërtimin e portit më të madh turistik të Mesdheut në Durrës, falë një investimi prej mbi 2MLD USD, me mbështetjen e drejtpërdrejtë të Presidentit të Emirateve të Bashkuara, Sheikh Muhammed Bin Zayed, ju uroj një ditë të mbarë.” / KultPlus.com
Piramida e Tiranës po transformohet në qendrën më të madhe të teknologjisë së informacionit, që do të mirëpresë mijëra të rinj për të mësuar gjuhën e kodimit, robotikë, design dhe programim.
Projekti i rivitalizimit të Piramidës së Tiranës synon transformimin e saj në një qendër multifunksionale në qytet, duke siguruar hapësirë për të rinjtë dhe njerëzit që të angazhohen në art, kulturë dhe teknologji krijuese.
Kryeministri Edi Rama ka publikuar në rrjetet sociale pamje nga punimet që po vijojnë te Piramida e cila po merr formë hap pas hapi, për t’u shndërruar në qendrën më të madhe të teknologjisë digjitale në Ballkan.
Projekti arkitektonik i studios së famshme holandeze MVRDV me mbështetjen e Fondit të Zhvillimit Shqiptaro-Amerikan – AADF, parashikon një godinë transparente dhe plot dritë.
Programet që do të ofrohen në këtë qendër do të jenë që nga animacion, zhvillimi i lojërave, kinematografia, ëeb design, muzikë, shkrim, vizatim, dizajn grafik, modelimi 3D, programim, robotikë, grafika e lëvizjes, fotografi dhe media e re.
Plani synon të krijojë simbolin e ri për Tiranën, ku ndërtesa është e arritshme nga të gjitha anët.
Kryeministri Edi Rama ndau sot pamje nga dy netët e para të këtij festivali ku kanë marrë pjesë mijëra qytetarë dhe artdashës.
“Sot nata e tretë plot tinguj në Kalanë magjepsëse të Rozafës, një festival i nisur nga hiçi pak vite më parë e i organizuar bukur, falë një djali energjik e plot ide, Vlashent Sata dhe mbështetjes së Ministrisë së Kulturës, po edhe falë këmbënguljes së deputetes Edona Bilali, shembull për t’u ndjekur nga të gjithë për angazhimin e pandërprerë në komunitet”, shkroi Rama në një postim në rrjetet sociale.
Kalaja e Rozafës mirëpriti mbrëmjen e djeshme natën e dytë të edicionit të 6-të të festivalit Zâ Fest.
Artistët Elina Duni, Vlashent Sata, Amor Del Rey, Lylnit performuan këngët më të njohura të repertorit të tyre për artdashësit shkodranë dhe jo vetëm.
Nata e parë e festivalit u zhvillua në Shirokë ku performuan artistët Jeton Neziraj, Erenik Beqiri, Arben Bajraktaraj dhe Linda Linda Rukaj.
Festivali Zâ Fest i cili ka nisur rrugëtimin 6 vite më parë, zbulon thesaret e folklorit shqiptar, duke ndërthurur muzikën, legjendat, poezinë dhe kinemanë.
Zâ Fest me misionin e tij kryesor, promovimin e traditës, vlerave dhe kulturës së Shkodrës, më herët është zhvilluar edhe në Theth, duke tërhequr një numër të madh vizitorësh. Kësaj here vëmendja mbetet brenda qytetit, e sidomos te kalaja e Rozafës. /KultPlus.com
