Etiketë: ekrani i artit

Hapet festivali “Ekrani i Artit”, Gonxhja: Krenar për mbështetjen

Posted on by Kult Plus

Shkodra Art House organizoi mbrëmë ceremoninë hapëse të “Ekranit të Artit”, në Kinema Republika ku i pranishëm edhe ministri i Ekonomisë, Kulturës e Inovacionit, Blendi Gonxhja, i cili e vlerësoi si një përvojë të paharrueshme.

“Me Benetin, Pacin, Ivën, Luçjanin e kolegë të tjerë, tek “Ekrani i Artit” në Shkodrën ku arti ta merr zemrën”, shkroi ministri Gonxhja në rrjetet sociale dhe më tej shtoi se është krenar për mbështetjen e këtij rrethi artistik e krijues nga Ministria e Ekonomisë, Kulturës dhe Inovacionit.

Të pranishmit patën mundësinë të shijojnë dy filma të veçantë: “Those Sweet Murky Waters” dhe “Acqua, porta via tutto”.

Më pas, në ish-Konsullatën Italiane, një program special videosh dhe një performancë muzikore elektrizuese e bënë natën edhe më magjike.

Ky festival i organizuar nga “Art House”, që nga viti 2017, ka sjellë më shumë se 200 shfaqje filmash ndërkombëtarë dhe kombëtarë, duke u bërë një nga ngjarjet më të rëndësishme kulturore në Shqipëri.

Falë bashkëpunimeve me institucione të ndryshme kulturore ndërkombëtare, “Ekrani i Artit” ka krijuar një platformë unike për artistët dhe shikuesit, duke prezantuar filma të ndryshëm për publikun shqiptar dhe duke zgjeruar komunitetin e talenteve që ballafaqojnë qasje e qendrime kritike, eksperienca e vepra, në një varg aktivitetesh, ku sivjet e ftuar speciale ishte edhe Iva Lulashi, nga Shkodra, që përfaqëson Shqipërinë në La Biennale di Venezia./atsh/KultPlus.com

“Ekrani i Artit” në Shkodër, dhjetëra aktivitete artistike deri më 9 qershor

Posted on by Kult Plus

Shkodra hapi dyert në Kinema Republika për edicionin e 7-të të festivalit “Ekrani i Artit”.

Festivali sjell në këtë edicion 45 filma, 3 ekspozita, 4 instalacione-video, performanca, biseda me artistë të ftuar dhe orë të panumërta me muzikë e vallëzim.

Nën titullin “Solitude and Multitude”, filmat e këtij viti eksplorojnë skajet e ekzistencës njerëzore ku vetmia dhe shumësia, individi dhe komuniteti, thjeshtësia dhe kompleksiteti, intimiteti privat dhe dimensioni publik përvijohen mes nuancash të panumërta.

Kryetari i Bashkisë Shkodër, Benet Beci, shprehi kënaqësinë për rivendosjen në punë të kinemasë së qytetit si një hapësirë publike për të gjithë qytetarët, ndërkohë që puna për rikonstruksionin e plotë do të vijojë.

Deri më datën 9 qershor, Shkodra do të vazhdojë të mirëpresë vepra të video artit, filmit të shkurtër e të gjatë, dokumentar e fiksion nga artistë vendas dhe ndërkombëtarë në vende të ndryshme të qytetit si: Kinema Republika, Art House, Galeria e Arteve, Vendi i Dëshmisë e Kujtesës, Qendra Rinore Arka, Auditori Franceskan, Galeria Oda dhe Kalaja e Rozafës.

Ekrani i Artit vazhdon traditën e tij për të mos e përsëritur asnjëherë vetveten, duke sjellë filma dhe autorë të rinj dhe duke rinovuar vetë strukturën e festivalit./atsh/KultPlus.com

‘Ekrani i Artit’ në Shkodër vjen me edicionin e shtatë

Posted on by Kult Plus

Nga data 5 deri më 9 qershor, Shkodra do të mirëpresë edicionin e shtatë të festivalit të filmit “Ekrani i Artit” me vepra të videoartit, filmit të shkurtër e të gjatë, dokumentar e fiksion, punime nga artistë vendas dhe ndërkombëtarë që do të shfaqen në Kinema Republika, Art House, Galerinë e Arteve, Vendin e Dëshmisë e Kujtesës, Qendrën Rinore Arka, Auditorin Françeskan, Galerinë Oda dhe në Kalanë e Rozafës.

Nën titullin Solitude and Multitude filmat e edicionit të sivjetshëm eksplorojnë këto skaje të pandashme të ekzistencës njerëzore ku vetmia dhe shumësia, individi dhe komuniteti, thjeshtësia dhe kompleksiteti, intimiteti privat dhe dimensioni publik përvijohen mes nuancash, kalimesh e sfumaturash të panumërta.

Ndryshe nga vitet e tjera, një ekspozitë e kuruar nga Lek M.Gjeloshi e Zef Paci sjell në Galerinë e Arteve pesë artistë me instalacione video e audio, ndërsa Art House mirëpret të parën ekspozitë personale të artistes Nora Bzheta.

Në Art House do të zhvillohen gjatë ditëve të festivalit programe të ndryshme duke filluar nga “Personal narratives, family myths” të kuruar nga Sylvia Schedelbauer e duke vijuar me një përzgjedhje me videoart nga koleksioni i Fondacionit In Between Art Film të kuruar nga Edi Muka. Me 8 qershor do kemi një fokus në tre vepra video të William Kentridge nga koleksioni Moschini e Fischetti ndërsa të dielën me datë 9 një program me videoart shqiptar të kuruar nga Elsamina Musiq e Xhulian Millaj.

Ndërkohë Auditori Françeskan do të mirëpresë një program të sjellë nga Roland Sejko me nëntë filma të shkurtër të prodhuar nga nëntë regjisorë italianë ekskluzivisht me materiale të Arkivit të Instituto Luce në Romë. Programi mbledh filma nga Claudio Giovannesi, Alina Marazzi, Pietro Marcello e Sara Fgaier, Roland Sejko, Alice Rohrwacher, Giovanni Piperno, Marco Bonfanti, Paola Randi e Costanza Quatriglio. Te ky Auditor do të shfaqet ditën e diel me datë 9 edhe filmi i Eneos Çarka Another Day.

Në Vendin e Dëshmisë e Kujtesës, Santiago Sierra sjell videon e tij më të fundit The Maelström ndërsa Gentian Doda me grupin Was Bleibt Kollektiv prezantojnë filmin koreografik Gjurmë.

Qendra Rinore Arka do të mirëpresë për tre ditë shfaqjen e tre filmave të shkurtër që vijnë nga festivali i mirënjohur italian Concorto Film Festival. Të tre filmat, Night Shift, Sardine dhe Lovers ishin fitues të edicionit të vjetshëm të këtij festivali.

Dalja nga qyteti, që në dy vitet e fundit e kishte parë programin e festivalit të shpalosej buzë liqenit, këtë vit do t’i drejtohet Kalasë së Shkodrës me instalime video e projeksione fotografike nga Lek M.Gjeloshi e Sara Passerini dhe me projektimin në natën e datës 8 qershor të filmit të Wael Shawky, I am Hymns of the New Temples.

Kalaja e Shkodrës do të jetë për dy netë edhe arenë e një programi muzikor të përzgjedhur nga Rubin Beqo e Nita Deda, program i cili do përfshijë gjatë ditëve të festivalit edhe Bed Station si dhe hapësirat e ish Konsullatës italiane në Shkodër.

Qendra e festivalit mbetet Kinema Republika e cila mirëpret një seri me filma të gjatë e të shkurtër duke filluar me dy filmat e natës së hapjes nga Driant Zeneli e Roland Sejko e duke vazhduar me një program të kuruar nga Tea Paci ku përmendim filma nga regjisorë e artistë si Cecilia Vicuña, Noor Abed, Evi Gjoni, Hoda Taheri, Fabrizio Bellomo, Emilien Dubuc, Helena Wittmann, Vasilis Katsoupis, Bo Wang e Ilir Hasanaj.

Ky vit shënon edhe edicionin e tretë të punëtorisë së koordinuar nga Melisa Paci që sheh nxënësit e shkollave 9 vjeçare të dialogojnë me punën e një artisteje bashkëkohore. Këtë vit nxënësit e shkollave “Ismail Qemali” e “Miqësia”, kanë punuar për një periudhë gjashtë mujore në dialog me veprën e artistes Claudia Losi dhe punimet e tyre do të shfaqen në Galerinë Oda me datë 7 në ora 17.00.

Ish Konsullata Italiane në Shkodër do mirëpresë një program të kuruar nga Ajola Xoxa me tri vepra në video të Anri Salës, Anna Ehrenstein dhe Lek M. Gjeloshit.

Një seri bisedash e takimesh do të shoqërojne ditët e festivalit ku veçojmë prezantimin e Pavjonit shqiptar në Biennalen e Venecias me protagoniste artisten Iva Lulashi dhe kuratorin Antonio Grulli i cili do mbahet në Qendrën Rinore Arka me datë 6 Qershor, ora 16.00. /Konica.al/KultPlus.com

Së shpejti në Shkodër, nis festivali “Ekrani i Artit”

Posted on by Kult Plus

Mes aktiviteteve të shumta kulturore të planifikuara për këtë sezon veror në qytetin e Shkodrës, është edhe edicioni i 7-të i festivalit “Ekrani i Artit”.

“Ka shumë për të zbuluar nga ky edicion”, thuhet në faqen online të “Ekranit të Artit”, ku do të mund të shohim krijimet e fundit të emrave të njohur si Anri Sala, Roland Sejko, Driant Zeneli, Alice Rohrwacher, Lek Gjeloshi etj.

Në këtë edicion të “Ekranit të Artit” do të shfaqen 45 filma, 3 ekspozita, 4 instalacione, performanca të ndryshme e biseda me të ftuar specialë. Të gjitha këto do të shoqërohen me orë e orë muzikë e vallëzim.

“Ekrani i Artit” nis më datën 5 qershor në Shkodër dhe do të vazhdojë deri më 9 qershor. Tema e këtij viti është “Vetmia dhe Shumësia”./atsh/KultPlus.com

“Ekrani i artit” në Shkodër promovon lidhjet mes artit bashkëkohor dhe kinemasë

Posted on by Kult Plus

Ministrja e Kulturës, Elva Margariti përcolli momente nga aktivitetet që janë duke u zhvilluar në Shkodër këto ditë, nën logon “Ekrani i artit”, një festival tashmë i kthyer në traditë.

Margariti ndau në rrjetet sociale një album fotografik nga një mbrëmje në Shkodër, ku ishte e pranishme mes artistësh e dashamirësish të artit. “Kënaqësi të bëhesh pjesë e kësaj atmosfere në Javën e Kulturës Italiane, me mbështetjen e Ministrisë së Kulturës”, shkruan Margariti.

I lindur si një projekt që kërkon të promovojë lidhjet midis artit bashkëkohor dhe kinemasë “Ekrani i Artit” , një vazhdimësi e eksperiencës së mirë për 6 vite me radhë  në Shkodër, paraqet për publikun autorë, dokumentarë mbi jetën e krijimtarinë e artistëve bashkëkohorë dhe atyre të Kosovës, që do të zgjojnë interesin e njëkohësisht edhe nostalgjinë e publikut për kinemanë si një institucion i rëndësishëm në edukimin e brezave përmes artit e kulturës.

Përveç filmave, shkodranët por edhe vizitorët do të mund të marrin pjesë njëkohësisht edhe në mbrëmje muzikore por edhe diskutime mbi artin. Pa harruar edhe aktivitetet paralele, dedikuar artistëve të rinj, si ai i videoartit, kuruar nga Elsamina Musiq e Xhulian Millaj në Qendra Rinore. Drejtor artistik i “Ekranit të artit” është Edi Muka ndërsa Zef Paci dhe Tea Paci, kuratorë të programit filmik.

Kjo nismë, tashmë e kthyer në traditë, e shenjon Shkodrën për disa ditë me radhë si skenë ndërkombëtare e artit bashkëkohor. Angazhimi i organizatorëve e interesimi i publikut, janë pa diskutim tregues të pasionit për artin, por edhe i domosdoshmërisë për zhvillimin cilësor të tij në Shkodër./ atsh /KultPlus.com

‘Ekrani i Artit’, festivali i filmit që do të zhvillohet në oborret shkodrane

Posted on by Kult Plus

Oborret e bukura shkodrane do të kthehen në kinema të hapura e skena muzikore përgjatë 5 ditëve. Lajmin e jep ministrja e Kulturës, Elva Margariti, përmes fotove nga posterat e “Ekranit të Artit” që ndau në rrjetet sociale.

Bëhet fjalë për nisjen e edicionit të 6-të të Festivalit të Filmit “Ekrani i Artit”, me drejtor Adrian Pacin.

Festivali do të zhillohet për 5 ditë, në 5 vendqëndrime të ndryshme, përfshirë edhe një hapësirë buzë liqenit.

“Me kënaqësi e mbështetëm edhe këtë vit këtë festival, që bën bashkë filmin, muzikën e performancat artistike, duke i dhënë edhe më shumë jetë Shkodrës, këtij poli kulturor historik”, u shpreh ministrja Margariti.

Ndërkohë drejtuesi artistik i festivalit, Edi Muka ka deklaruar se ky edicion do të përqendrohet tek kinematografia suedeze.

Programi parashikon shfaqjen e 60 filmave. Ndër mbështetësit e këtij festivali janë Ambasada Italiane dhe Instituti Italian i Kulturës./atsh/KultPlus.com

Së shpejti fillon edicioni i katërt i “Ekrani i Artit”

Posted on by Kult Plus

Edicioni i katërt i programit me përzgjedhje filmike “Ekrani i Artit” i organizuar nga Art House, bën bashkë filmin dokumentar mbi artin me atë eksperimental dhe videoartin.

I nisur si një bashkëpunim me festivalin fiorentin “Lo schermo dell’arte”, ky edicion sjell një përzgjedhje nga festivalet e filmit si: Oberhausen International Short Film Festival, In Between Art Film, Protocinema dhe punime në videoart të artistëve shqiptarë.

Nata e hapjes do të organizohet në Teatrin “Migjeni” ndërsa përgjatë netëve në vijim, programi filmik do të shfaqet në oborret e Familjes Hoxha dhe Familjes së Dr. Shirokës, ku një hapësirë e oborreve tipike shkodrane i çelet një publiku dashamirës të filmit.

Të ftuar të këtij edicioni do të jenë balerini Ernald Matoshi i cili do të performojë në natën e hapjes dhe atë përmbyllëse në Teatrin “Migjeni”; Alessandra Galletta, regjisorja e filmit mbi artistin Ettore Spalletti si dhe Cristina Cobianchi që do të bëjë prezantimin e projektit “All Boom Arte”, një botim mbi komunitetin e artistëve të rinj të skenës së artit bashkëkohor.

Ekrani i Artit mbështetet nga Bashkia e Shkodrës dhe Goethe Zentrum Tirana. / KultPlus.com