Artistja Albulena Jashari nesër do të hap ekspozitën personale të titulluar me emrin “Akordet e çikave”, shkruan KultPlus.
Kjo ekspozitë do të hapet në ora 17:00 në ambientin e ‘Hanit të 2 Robertëve’ në Prishtinë. Kjo është ekspozita e dytë personale e artistes Albulena Jashari pasi që ajo para rreth dy muajsh ka prezantuar rreth dhjetë piktura në ekspozitën e parë personale në Tiranë. / KultPlus.com
“Magjia e gramafonit”, me gramafonët dhe revistat e Fonotekës së Arkivit Qendror Shtetëror është dhe ekspozita e përbashkët e Muzeut Historik Kombëtar dhe Drejtorisë së Përgjithshme të Arkivave, e cila u çel për publikun.
Në vitin 1986 koleksionisti britanik Martin Moir i dhuroi AQSH-së mbi 18,000 pllaka gramofoni, 20 gramofonë mekanikë dhe elektrikë, 2 fonografë dhe një mori revistash periodike kushtuar muzikës në pllaka. Kjo çoi në krijimin e Fonotekës së AQSH si sektor i zgjeruar. Objektet ruhen në Fonotekën e AQSH dhe përveç një katalogu të lëndës muzikore, asgjë tjetër nuk i është bërë e njohur publikut.
Çelja e ekspozitës “Magjia e gramafonit” bëri të mundur që në ambientet e Muzeut Historik Kombëtar të lancohej muzikë popullore shqiptare, regjistruar në disqe të një teknologjie që prej vitesh nuk ekziston më dhe transmetuar po nga gramafonë një pjesë e të cilëve datojnë si prodhim që para viteve të Luftës së Dytë Botërore. Gramofonët që janë ekspozuar mosha e të cilëve shtrihet përgjatë një shekulli duke filluar nga 1903 do të qëndrojnë për një javë në MHK.
Në këtë ekspozitë për herë të parë paraqitet në origjinal koleksioni i fonografëve dhe gramafonave, si dhe disa disqe gramafoni, LP dhe vinyl-e. Pllaka gramafoni të hershme me zërin e tenorit të famshëm Enriko Karuzo, i cili ka qenë ndër të parët që ka regjistruar disqe, disqe me zërin e Aleksandër Moisiut, monologun e “Makbethit”, zëri i Ëinston Churchill është në këto pllaka gramafoni. Përmes kësaj ekspozite AQSH shpalos një anë të panjohur të tij, pasurinë muzikore që ruan heshtazi prej 30 viteve. Pjesë e dhuratës së vitit 1986 ishin edhe disa seri revistash, si “The Monthly Letter”, “The Strand”, “Gramophone” apo botime lidhur me historinë e gramafonit dhe muzikës, disa prej të cilave do të ekspozohen pranë koleksionit të gramafonëve.
Drejtori i Muzeut Historik Kombëtar Dorian Koçi e vlerësoi si shumë të rëndësishëm vijimin e bashkëpunimit duke theksuar gjithashtu se ekspozita të tilla të bëjnë të kuptosh se si ka qenë jeta sociale e shqiptarëve.
“E kemi filluar këtë bashkëpunim edhe më herët siç ishte ekspozita e vulave të shtetit shqiptar, po e vijojmë me ekspozitën e gramafonave dhe shpresojmë të ketë edhe ekspozita të tjera për të nxjerrë në pah vlerat e trashëgimisë tonë kulturore, historike, muzeale që ndajnë dy institucionet”, tha ndër të tjera Dorian Koçi gjatë fjalës së tij të rastit në çeljen e ekspozitës “Magjia e gramafonit”.
Bashkëpunimi AQSH dhe MHK
Po në të njëjtën mendim edhe drejtori i përgjithshëm i Arkivave Ardit Bido u shpreh se Shqipëria është një vend i pasur me trashëgimi kulturore, duke shtuar se bashkëpunimi mes dy institucioneve do të vazhdojë me qëllim që objektet muzeale, që janë pronë e arkivit, të mund të dalin në dritë dhe të njihen nga publiku pikërisht nëpërmjet ekspozimit në një vend atraktiv siç është Muzeu Kombëtar.
“Ka pasuri që janë ekspozuar shumë rrallë, por shumica asnjëherë” u shpreh Ardit Bido.
Aktiviteti i fundit mes dy institucioneve mund të jetë dhe referenca më e mirë për të rrëfyer se mes Muzeut Historik Kombëtar dhe Drejtorisë së Përgjithshme të Arkivave bashkëpunimi është intensifikuar. E duket se kjo merr më shumë vlerë kur aktiviteti anonçohet në kuadër të veprimtarive të “Vitit Mbarëkombëtar të Gjergj Kastriotit-Skënderbeut”, shkruan SotNeës. Një marrëveshje e nënshkruar, të paktën dy muaj më parë, parashikon që në muze të ekspozohen dokumente origjinale, por dhe objekte muzeale, pjesë e pasurisë së Arkivit Qendror Shtetëror./ KultPlus.com
Më 23 janar në Galerinë e Ministrisë së Kulturës hapet ekspozita “Frymëmarrje në Gardh” e artistit Mentor Berisha.
Kuratori i kësaj ekspozite është profesor Fadil Hysa.
“Mentor Berisha është piktor dhe skulptor i brezit të ri të artistëve figurativ të Kosovës i cili kultivon një stil të veçantë pikturimi dhe skulpturimi, që rrallë e ndeshim tek artistët e brezit të ri. Në pikturat e tij mund të shohim imazhe nga e kaluara jonë, e cila rrezikon të tretet në harresë por fatmirësisht, ndonjëherë rrallë, si në këtë rast, ato ri-gjejnë rrugën e kthimit në kohën tonë përmes laboratorit krijues të artistit”, thotë kuratori, thuhet në komunikatën dërguar për medie.
“Frymëmarrje në Gardh” vjen më 23 janar me fillim nga ora 19:00 në Galerinë e Ministrisë së Kulturës. Ekspozita mbështetet financiarisht nga Ministria e Kulturës, Rinisë dhe Sportit dhe drejtohet nga Dhurata Ramosaj Shala – koordinatore e Galerisë së Ministrisë së Kulturës./ KultPlus.com
Gili Hoxhaj
Ekspozita me titull “Lirinë e gjeta këtu” kushtuar 550 vjetorit të vdekjes së Gjergj Kastriotit – Skënderbeut, sot mblodhi shumë vizitorë të cilët më shumë vëmendje shikonin materialet e koleksionit të Bibliotekës Kombëtare të Kosovës “Pjetër Bogdani”, shkruan KultPlus.
Kjo ekspozitë prezantoi një kronologji të materialeve për Gjergj Kastriotin – Skënderbeun, duke shfaqur një korpus të përzgjedhur të librave, artikujve, citateve dhe fotografive, që po ekspozoheshin për herë të parë dhe që shumë prej tyre pasqyrojnë ndikimin e figurës emblematike të Gjergj Kastriotit – Skënderbeut, në kulturën dhe dijen në Kosovë.
Ekspozita nxjerrë në pah rëndësinë e kësaj figure emblematike e cila kishte zgjuar interesin e krijuesve nga vende të ndryshme të botës. Gravurat angleze, franceze, gjermane, e italiane kishin zënë vend në hollin e Bibliotekës Kombëtare të Kosovës. Ndërsa artikuj gazetash që qëndronin në anën tjetër të hollit, nxirrnin në pah fakte tejet të rëndësishme lidhur me figurën heroike të Skënderbeut. Ndërsa në hollin sipër ndodheshin një serë botimesh të huaja dhe shqiptare, ku përfshiheshin botimet që nga koha Marin Barletit. Ilustrimet sipër po ashtu tregonin rrugëtimin heroik të jetës së Gjergj Kastriotit- Skënderbeut.
Hapjes së kësaj ekspozite i paraprinë fjalët e drejtorit të BKK-së, Fazli Gajrakut i cili tha se Skënderbeu ishte prirës me të cilin ka filluar dhe ka marrë formë ideja identitetit shqiptar, shtetit shqiptar dhe ideja e bashkimit shqiptar ndërsa shtoi se Gjergj Kastrioti është figura më e madhëruar e shqiptarëve.
“Figura e Gjergj Kastriotit është figura më monumentale që është thirrur në ndihmë gjatë periudhave të vështira. Ne po i zbulojmë këto materiale që të ngjallim kujtesën për lavdinë e një të kaluare të cilën sa më shumë e kujtojmë, aq më mirë i kemi punët. Edhe pas pesë shekujve dalin fakte interesante dhe të pazbuluara ndonjëherë duke u bazuar në monedha, letra zyrtare, pamflete, kronika, regjistra të gjetura në arkiva turke dhe ato evropiane” ka thënë Gajraku sot gjatë hapjes së kësaj ekspozite.
Gajraku tha se ky koleksion tregon se Figura e Gjergj Kastriotit nga koha e Barletit e deri më sot ka tërhequr vëmendjen e politikanëve, historianëve studiuesve të letërsisë së shkruar dhe popullore, të historisë së qytetërimeve, të piktorëve, skulptorëve, regjisorëve e të rapsodëve.
Pas tij fjalën e mori Ministri i Kulturës Rinisë dhe Sporteve, Kujtim Gashi i cili tha se ndihet i nderuar të jetë pjesë e hapjes së kësaj ekspozitë ndërsa tha se figura e Skënderbeut gjatë shekujve të tërë ka qenë frymëzim për gjenerata të tëra se si duhet dashur e ruajtur atdheu, ndërsa theksoi se ai po ashtu ka qenë frymëzim për shumë krijues.
“Skënderbeu me veprimtarinë e tij ka nderuar popullin shqiptar duke u bërë ambasadori më i mirë i mbrojtjes se vlerave civilizuese dhe evropiane. Sa më shumë kohë që do të kaloi figura e Skënderbeut do të bëhet gjithnjë e më e rëndësishme” tha ministri Gashi ndërsa shtoi se kjo ekspozitë është një kontribut i çmuar i Bibliotekës Kombëtare të Kosovës dhe duhet të mbete si një shembull i mirë që secili nga ne të jap kontribut në ndriçimin e historisë tonë të pasur. / KultPlus.com
Në Stamboll nga data 19 janar deri më 11 shkurt do të mbahet edicioni i parë i Festivalit Ndërkombëtar të Fotografisë, ZFotoFest.
Në këtë edicion do të prezantohen 54 projekte në formë ekspozite duke përfshirë edhe punime të emrave të njohur botëror si fotografët e National Geographic Ami Vitale e Matheë Paley si dhe emra të tjerë si Abelardo Morell, Corey Arnold e Kamil Firat…
Samir Karahoda do të prezantohet me projektin Centenarian i cili paraqet portretet e grave 100 vjeçare të Kosovës. Projekt i cili edhe u ekspozua në Prishtinë në Galerinë e Ministrisë së Kulturës.
Po ashtu në festival do të ketë një numër të madh aktivitetesh si ëorkshope, debate, biseda, prezantime të portfoliove të fotografëve të rinj ku po ashtu edhe autori Samir Karahoda të dielën me 21 janar do të mbaj një Artist talk për të folur për punën dhe eksperiencën e tij si fotograf.
Hapja zyrtare e festivalit dhe ekspozitës do të bëhet të premten me 19 janar prej orës 19:30 në qendrën kulturore në rajonin e Zeytinburnu të Stambollit.
Të ju kujtojmë, projekti “Centenarian”, paraqet Historinë e nënave Kosovare të cilat kanë arritur të jetojnë mbi një shekull ku përmes portreteve të tyre paraqitet karakteri i tyre i fortë dhe historia përmes rrudhave në fytyrë./ KultPlus.com
Në 550 vjetorin e vdekjes së Gjergj Kastrioti Skënderbeut, Muzeu i Kosovës, me nismën “Museum Illirycum”-Zvicërr, Organizojnë ekspozitën me libra, gravura, pulla dhe bankota nga mesjeta e deri në vitet e 30-ta, shkruan KultPlus.
Ekspozita, e cila vjen nga koleksionuesi shqiptar Ilir Xheladini, do të hapet nesër më 17 janar, në Muzeun e Kosovës, me fillim nga ora 18:00./ KultPlus.com
Dje, me rastin e Vitit Mbarëkombëtar të Skënderbeut, për herë të parë në Toronto, u hap ekspozita “Jeta dhe vepra e Heroit Kombëtar, Gjergj Kastrioti Skënderbeu”, shkruan KultPlus.
Kjo ekspozitë përmbante pjesë nga koleksioni i librave të vjetër dhe të rrallë të Patricia Nugee-t. Nugee njihet botërisht dhe është vlerësuar edhe me mirënjohje nga ish-presidenti i Shqipërisë, Alfred Moisiu për pasionin e rrallë dhe koleksionin më të pasur, me më shumë se 500 ekzemplarë, kushtuar heroit tonë kombëtar të shkruar në rrjedhën e shekujve.
Librat janë ekspozuar në katin e dytë të Robarts Library ndërsa ekspozita u ndoqën me interes nga dhjetëra bashkatdhetarë me banim në Toronto. Në ceremoninë e hapjes së ekspozitës morën pjesë Ambasadori i Shqipërisë në Ottawa, Ermal Muça, Robert Austin nga Universiteti i Torontos, Patricia Nugee si edhe anëtarë të bordit dhe këshillit të nderit të SHBSHK-së, Presidenti, Ramazan Këllezi, Presidente e Nderit Ruki Kondaj dhe miq nga shoqatat shqiptare të Londonit e Hamiltonit.
Ceremonia dhe Kjo ekspozitë u organizua nga Pasqyra Shqiptare, në bashkëpunim dhe me sposorizim të pjesshëm të SHBSHK-në dhe me sponsorizimin e “The Boutique Real Estate” me dy agjentët e shitblerjes së pronave: Toni dhe Ledi Alushi si edhe shkrimtarit shqiptaro-kanadez Përparim Kapllani.
Ekspozita do te jete hapur edhe më datën 16 Janar 2018./KultPlus.com
Të enjten më 11 janar artisti, Jakup Ferri hapë ekspozitën në Qendrën Kulturore Tulla, në Tiranë, shkruan KultPlus.
“Op, op”, titullohet ekspozita e Jakup Ferrit e cila do të qëndroj e hapur në ambientet e Tulla-s, deri më 3 shkurt./ KultPlus.com
Artisti Agron Blakçori mbrëmë solli ekspozitën e tij personale në Galerinë e Fakultetit te Arteve te Bukura, në Prishtinë, shkruan KultPlus.
Gili Hoxhaj
Kjo ekspozitë që përmes formave të ndryshme kishte zënë vend në këtë galeri përmbante gjithsej shtatë monumente të njëpasnjëshme, me anë të së cilave artisti kishte reflektuan kaosin e vendit ku ai është zhvilluar si artist. Në mesin e tyre ai paraqet edhe një statujë, fytyrën e të cilit qëllimisht e fsheh. Kjo për vetëm një arsye, për të treguar se si janë ngritur statujat në këtë vend, pa plotësuar kriteret e duhura, e që bën që ato shtatore shpesh të jenë shumë larg personalitetin të cilit i dedikohet.
Profesori dhe kuratori i kësaj ekspozite, Mehmet Behluli, thotë se autori përmes veprave të tij mundohet ta ngrit ndërgjegjen kolektive dhe si individ të mendojmë më shumë për “ndotjen estetike”, që po ndodh kudo në rrethin tonë.
“Ai e ka pasionin pa të cilin nuk mund të punohet në asnjë fushë të artit. Ai e kupton mirë rrethin ku funksionon. I kupton proceset të cilat ndodhin në botën e artit”, kështu shprehet profesori Behluli.
Ai për KultPlus tregoi se kjo ekspozitë vije me emrin “Monumentet”, pasi që pasluftës monumentet janë të orientuara më shumë në aspektin ideologjik se sa në krijimin e një monumenti të mirëfilltë. Lidhur me këtë ai thotë se më shumë i kemi krijuar monumente vetvetes se sa heronjve e dëshmorëve.
“Qytetarët e Kosovës, e kanë të vështirë ta kuptojnë se si një monument që i kushtohet diçkaje shumë madhore, është i nivelit ma të ulët artistik e ideor. Kosova është mbushur me monumente jo të këndshme, dhe përmes këtyre veprave autori hap një dialog me publikun se mos monumentet mund të jenë edhe ndryshe”, u shpreh profesori Behluli derisa kujton një rast në vitin 2004, se si dy parti gati erdhën në një konflikt fizik për shkak se kërkonin që secili ta vendos heroin e tij në një hapësirë publike.
Skulptori Agron Blakçori, thotë se kjo është një temë që e ka preokupuar atë që nga paslufta, kur monumentet edhe kanë filluar të ndërtohen në mënyrën jo të duhur, kjo shpesh edhe si pasojë e konkurseve, të pafokusuara në kritere profesionale.
“I kam përcjellë edhe konkurset e shtatoreve se si janë bërë, dhe kjo ka qenë si pikënisje për të punuar më shumë lidhur me monumentet. Unë jam lidhur tek kjo dhe tek ndërtimi i objekteve sepse në çdo vend ne e kemi një lloj kaosi”, shprehet skulptori Blakçori për KultPlus.
Artisti përmes punimeve të tij nxjerrë zërin artistik lidhur me gjithçka që e rrethon. Përpjekjet e tij nuk reshtin as për ta kthyer trishtimin e disa vendeve, në një ndjesi pozitive për qytetarët. Ai në këtë ekspozitë e paraqet edhe një silos të grurit i cili ndodhej shumë pranë shtëpisë së tij, dhe nga kulmi i atij vendi, gjatë kohës së luftës qytetarët kanë përjetuar trishtimin më të madh pasi që aty kanë qëndruar trupat paramilitare serbe me çerdhe të snajperëve. Ideja e skulptorit kishte qenë që ky vend të zëvendësohet me një galeri arti, apo një restorant ku njerëzit mund të argëtohen. Pra, synimi i autorit është që qytetarëve të atij vendi përmes këtij objekti t’ua shëroi traumat me momente kënaqësie. Kështu artisti, me ndryshimin e imazhit, përpiqet t’i ndryshoi edhe ndjesitë e qytetarëve lidhur me objektin.
“Unë mendoja si artist si me të ja ndryshoj imazhin këtij objekti, unë kam dhënë dy ide të bëhet galeri arti apo restorant por edhe nëse e bën kërkesën ky objekt është i privatizuar”, tregon skulptori për KultPlus.
Ai po ashtu në këtë ekspozitë sjellë edhe kabinën e postës, të cilët rëndom qëndrojnë të dëmtuara dhe të papërdorura nga qytetarët, që dikur u hynin në shërbim. Ato të lëna në harresë nga të gjithë, artisti i ka shndërruar në vepër të tijën.
“Sot për to nuk po interesohen as njerëzit kompetent që janë, as posta që e ka lënë në hapësirë publike, dhe unë kam shkuar e kam nënshkruar dhe e kam bërë si vepër timen, pra në mendjen time kam thënë ma mirë është të shihet si një skulpturë, pra monument se sa si një gërmadhë që ka mbetur midis qytetit”, tregoi Blakçori.
Të gjithë ata që duan të shijojnë këto shtatë monumente, kjo ekspozitë do të qëndroi e hapur për dy javë në Galerinë e Fakulteteve të Arteve të bukura./ KultPlus.com
Mbrëmë në Modelariumin e Arkitekturës në Fakultetin e Ndërtimtarisë dhe Arkitekturës, erdhi ekspozita “Bri plagomës prej nga derdhet dhimbja”, me fotografi të refugjatëve nga Kosova në Kukës gjatë luftës së vitit 1999, shkruan KultPlus.
Gili Hoxhaj
Fotografitë e Fatos Lubonjës, kishin zënë po thuajse gjithë hapësirën e gjerë të mureve të këtij ambienti. Trishtimi i personazheve fshihej në një format të ngjyrave: bardhë dhe zi, por jo dhe një format të madhësisë. Përmes tyre reflektohet një mot i ftohtë, ku shihen radhët e traktorëve, në dheun plot pellgje e baltë. Fotografitë e tij sjellin një realitet të gjerë të shtrirë brenda një fushe në Kukës, ku shihen traktorët me karroceri të mbuluara me plastmase, ku traktori shërben si strehë për refugjatët. Ky trishtim është vështirë i tejkalueshëm edhe sot në sytë e shikuesit, një gjendje dëshpërimi depërtonte në sytë e secili vizitor, i cili sikur kishte një rrëfim të ngjashëm me ato fotografi.
“Këtë përjetim të kësaj drame njerëzore dëshiroj me e lanë në qetësinë e rrugëtimit të vet. Autori duket sikur është secili prej njerëzve të pagojë, të shtangun, pa asnjë shprehje ngushëllimi , e që i kapet veç shpresës së dokumentimit pa fjalë”, kështu janë fjalët e kuratorit të ekspozitës Xhevahir Kolgjini, i cili thotë se me renditjen e fotografive ka vendosur që ta lë autorin me komunikim me audiencën si para 19 vitesh rranzë Gjallicës.
Vet Lubonja në prill të vitit 1999 në Kukës, ku edhe kishte marr këto fotografi shkruan se edhe pse ka parë dhjetëra reportazhe mbi Kukësin nëpër stacione televizive, asgjë nuk mund të ia zëvendësoj kontaktin e drejtpërdrejtë se sa shkelja mes përmes e këtij realiteti.
“Syri i kamerës i strukur pas qelqit të trashë të objektivit, nuk e ndjen dit ftohtësinë e shiut me suferinë që të hyn në palcë, e erën e tmerrshme të shkurres e të përçit. Ai nuk e jep dot atë që ndjen dora teksa i prek kokën një fëmije që dridhet nga të ftohtit, e mbi të gjitha nuk i rrok të gjitha këto përnjëherësh”, shkruan Lubonja.
Fatos Lubonja mbrëmë solli para syve të publikut prishtinas Kukësin e viteve 99’të, i cili një qytet prej 25 mijë banorësh, brenda një periudhe të shkurtër i shtohen edhe 32 mijë refugjatë, ndërsa kontakti i parë me këtë mjerim është në Pallatin e Kulturës së Kukësit, aty ku natën disa prej tyre futeshin për të fjetur.
“Shkallët e tij janë të mbushura cyt me njerëz të rrazbitur, të cilët nuk ke kurajë t’i shohësh në sy e le me t’u drejtosh kamerën”, kështu Fatos Lubonja nxjerrë në pah edhe shpirtin e tij human derisa mundohet të përmbush misionin e tij përmes fotografisë, kjo është arsyeja që ai pozicionohet nga larg për të shkrepur fotografitë.
Edhe pse në këtë situatë artisti Lubonja thotë se me lindjen e diellit jeta po gjallëronte edhe në këtë ferr, derisa përmes fotografive ai sjellë fytyrat e qeshura të fëmijëve, të cilët shfaqen para një rrote në një park të Kukësit, i cili është i mbushur po ashtu me refugjatë.
“Diku uji në kazanin e zi e ka filluar të ziejë, diku janë mbledhur rreth e po hanë. Diku kanë hapur radion me bateri dhe dëgjojnë lajmet e Tiranës. Ndonjë grua ka filluar të lajë. Fëmijët kanë zgjeruar shoqërinë dhe vende-vende i sheh të luajnë”, shkruan shkrimtari Lubonja në katalogun “Bri plagomës prej nga derdhet dhimbja”, përcjell KultPlus.
Lubonja, thotë se pjesa më e dhimbshme e kësaj tragjedie janë fëmijët sepse janë më të pambrojturit por kur i sheh të luajnë dhe të qeshin para kamerave , e kupton se nuk janë ata që e ndjejnë më së shumti këtë tragjedi por janë pleqtë që kanë parë shtëpitë dhe krejt punën e tyre t’u shkatërrohet.
Kësaj ekspozite i parapriu një bisedë mes Fatos Lubonjës dhe Veton Surroit, e cila u moderua nga Shkëlzen Gashi, dhe diskutimi shtrihej në temat si lufta në Kosovë, pavarësia e Kosovës, pajtimi mes Kosovës e Serbisë dhe marrëdhëniet Kosovë-Shqipëri.
Kjo ngjarje erdhi e organizuar nga ADMOVERE dhe KFOS. / KultPlus.com
Sonte më 13 dhjetor tek Hani i 2 Robertëve, hapet ekspozita personale e artistët Eliza Hoxha, shkruan KultPlus.
“Give peace a chance-Jepi mundësi paqes”, titullohet ekspozita e Elizës, e cila hapet me fillim nga ora 17:00.
Kjo ekspozitë që hapet sonte vjen tek Hani te Fakulteti i Arteve./ KultPlus.com
Artisti i njohur Agim Sulaj i vlerësuar në botë me veprat e tij këtë dhjetor ka çelur në Tiranë ekspozitën “Rrënjët 2”. Janë 27 vepra që janë prezantuar në këtë ekspozitë për publikun, punime në vaj dhe për herë të parë prezantohet dhe vizatimi origjinal i vlerësuar me çmim të parë në Londër “Valixhja e refugjatëve”.
Piktori dhe karikaturisti i njohur vjen me këtë ekspozitë në Tiranë te hotel Plaza pas asaj që çeli një vit më parë. Piktori tregon se në aktivitetin e tij artistik ka gjithmonë dëshirë, që të vijojë të jetë me prezantimin e veprave të tij në Shqipëri.
“Dëshira ime e këtij viti ishte për tu prezantuar me punimet e mia, me të rejat e krijimtarisë sime në Tiranë, me artdashësit shqiptarë dhe ambienti ku unë vij për herë të dytë me ekspozitën “Rrënjët 2” është i tillë që unë mund të prezantohem si një galeri, ku mund të jem çdo fundviti dhe mund të sjell sërish punime. Si një minigaleri ku unë mund të prezantohem me veprat fituese në arenën ndërkombëtare qoftë në karikaturë, si dhe me veprat e reja që përshkruajnë historinë e vendeve dhe timen personale të rritjes artistike. Unë kam dëshirë që herë pas here t’ia sjell veprat e mia publikut shqiptar”, tregon artisti i njohur.
“Valixhja e refugjatëve” e artistit Agim Sulaj rrëmbeu çmimin e parë në Londër në një prej konkurseve më të rëndësishme organizuar nga “The Derwent Art Prize”. Mes shumë veprash nga artistë të huaj, puna e artistit shqiptar mori çmimin e parë. Për këtë vepër artisti pohon se ka dëshirë që të jetë dhe realizuar në bronz dhe të vendoset në Vlorë.
“Është vizatimi i madh fitues i çmimit të parë në Londër 2016. I seleksionuar për konkurrimin ndërkombëtar të vizatimit midis 3200 veprave të ardhura nga gjithë bota. Në 70 punime të ekspozuara vepra Refugees fitoi çmimin e parë. Dhe kam shumë dëshirë ta realizoj në bronz në lungomaren e Vlorës. Si pika me sensibile e dramës së ikjes”, tregon artisti Agim Sulaj.
Kjo vepër që është ekspozuar këtë herë në Tiranë më parë ka bërë një xhiro në ekspozita të tjera në botë. Në Tiranë Agim Sulaj tregon se tema e emigrimit është e trajtuar gjithmonë në veprat e tij. “Është një temë e imja që unë e kam trajtuar gjithmonë në krijimtarinë time, ikjen dhe ardhjen e njerëzve. Në 30-40 përqind të punëve të mia janë ato që unë kam trajtuar valixhen, problemet me emigrimin. Një lloj autoportreti e gjithë shkallëve që unë kam nuhatur nga emigrimi. I kam vizatuar dhe pikturuar, duke u bërë shembull dhe për të tjerë”, vijon ai. Ekspozita “Rrënjët 2” do të qëndrojë deri nga fundi i muajit shkurt 2018 te “Plaza” për publikun.
Ndër vite me krijimtarinë
Agim Sulaj është një artist që lëvron gjininë e portretit dhe peisazhit hiper realist dhe karikaturës. Në fushën e karikaturës ky artist ka marrë mbi 60 çmime ndërkombëtare dhe çmimin “grand Prix de Cartoon” i cili vlerësohet si Oscar i karikaturës. Prej vitesh krijimtaria e piktorit Agim Sulaj është në vëmendje, gjithmonë duke prezantuar punime me të cilat përcjell mesazhe, artisti tregon se gjatë këtij viti më shumë i është dedikuar Europës me krijimtarinë e tij, ku drama sociale e krizës së refugjatëve i dha atij një tjetër vlerësim në Londër. Agim Sulaj piktor e karikaturist 19 vjeç fiton çmimin e tij të parë në një konkurs satire dhe humorizmi të organizuar nga “Hosteni”.
Në vitin 1985 diplomohet në Universiteti i Arteve në Tiranë, dhe gjatë shkollës e më pas, punon te “Hosteni (revistë)”, e vetmja revistë satirike kohës, për aq satirë që mund të bëhej asokohe. Trajton gjithnjë tema shoqërore, subjektet e para trajtojnë servilizmin, thashethemet etj. Në vitin 1990 shkon në Ankara të Turqisë me veprën tij “Valixhja e emigrantit” punim i vitit 1989, dhe fiton çmimin special në “Aydin Dogan International Cartoon Competition”.
Në vitin 1992 hap një ekspozitë Rimini e në vitin 1993 një tjetër në Provinca Brindisi. Në vitet ‘90 merr rrugën e mërgimit dhe vendos të shkojë në Provinca e Riminit. Fillimisht vetëm e më pas tërheq edhe gruan e djalin e vogël. E që atëherë ka jetuar aty, është vendi ku ka vendosur kavaletën e vet, dhe prej nga ku shkon në të katër anët e botës me pikturat dhe karikaturat e veta. E merr vlerësimet maksimale kudo. Edhe sot e kësaj dite trajton temat shoqërore në punimet e tij, shkruan SotNews. Padyshim shumë më lirshëm se më parë, por pa rënë kurrë në “karikaturizimin e personit”. Vazhdon të kritikojë dukuritë, jo mbartësit. Në vite ka ekspozuar dhe është vlerësuar jo vetëm në të katër anët e Italisë, por edhe në Greqi, Amerikë, Turqi, Belgjikë, Francë, Azerbajxhan, Kinë,Iran, Hungari, Poloni, Bullgari, Luksemburg, etj./ KultPlus.com
Artisti shqiptar çel ekspozitën “Me këto drita do të shërbehet nata” në Itali.
Ekspozita ka në qendër temën e emigrimit, të identitetit dhe të lëvizshmërisë. Ekzistenca interpretohet si një kërkim i vazhdueshëm, një lëvizje shumëvjeçare, dhe uji bëhet metaforë e idesë së fluksit dhe rrjedhjes. Do të qëndrojë hapur deri në shkurt 2018
Uji si metaforë e lëvizjes, fluksit, por edhe mundësisë së veprimit dhe reagimit. Është pikërisht kjo ideja në të cilën Adrian Paci është mbështetur për t’i dhënë jetë “Di queste luci si servirà la notte” (Me këto drita do të shërbehet nata), ekspozitës së tij personale, që është çelur në ambientet fiorentine, për të qëndruar hapur deri më deri në 11 shkurt 2018.
Çdo gjë rrjedh. Aforizma e famshme e Heraklitit, metaforë e ekzistencës si një monument i përjetshëm, është mendimi që i jep frymë ekspozitës së re personale të Adrian Pacit, e cila mbahet në katër ekspozita të ndryshme në Firence dhe përreth me titullin “Di queste luci si servirà la notte” nën kujdesin e Valentina Gensini-t. Në Firence është ekspozuar në disa nga sallat e Muzeut “Museo del Novecento” në sheshin “Santa Maria Novella” dhe hapësirat sugjestive të “Le Murate. Progetti Arte Contemporanea”, në rrugën Ghibellina. Ndërsa, dy hapësirat e tjera janë në vendet e Pelago-s dhe Montelupo Fiorentino, vetëm pak kilometra larg. Shkruan Shekulli.com. Ajo që bashkon tre vendet është lumi Arno pasi iniciativa nis në kontekstin e “Sensi Contemporanei”, një kantier hulumtimi që ka si qëllim krijimin e një parku lumor.
Ekspozita ka në qendër temat e emigrimit, të identitetit dhe të lëvizshmërisë, të gërshetuara me intensitet dhe poezi. Përshkruhen histori personale dhe risillen fakte dhe transformime të historisë së ditëve të vona, Paci tejkalon eksperiencën personale dhe trajton emigrimin dhe lëvizshmërinë si kusht ontologjik, ashtu edhe aktual në një moment historie, kur vetë konceptet e shtëpisë dhe identitetit (kulturor, politik dhe social) vihen vazhdimisht në diskutim. Ekzistenca interpretohet si një kërkim i vazhdueshëm, shkruajnë mediet italiane, një lëvizje shumëvjeçare, dhe uji bëhet metaforë e idesë së fluksit dhe rrjedhjes.
“Me këto drita do të shërbehet nata”, – shpjegon Paci, lind si një ndërhyrje në lumin “Arno” nëpërmjet një veprimi performues, por më tej puna spostohet drejt një reflektimi mbi dialogun dhe tensionin midis dritës dhe errësirës, mes sipërfaqes dhe thellësisë, mes të dukshmes dhe të padukshmes. Prezenca e njeriut është ajo që aktivizon këtë dialog pa pretenduar për të arritur në një konkluzion”. / KultPlus.com
Më 13 dhjetor tek Hani i 2 Robertëve, hapet ekspozita personale e artistët Eliza Hoxha, shkruan KultPlus.
“Give peace a chance-Jepi mundësi paqes”, titullohet ekspozita e Elizës, e cila hapet me fillim nga ora 17:00.
Kjo ekspozitë që hapet të mërkurën vjen tek Hani te Fakulteti i Arteve./ KultPlus.com
Në ambientet e Ambasadës së Kosovës në Bernë, Ilir Xheladini ka hapur ekspozitën me artefakte ilire e shqiptare, “Museum Illyricum”.
Një muze shqiptar në Zvicër: Ky është caku që Ilir Xheladini e ka para syve kur grumbullon artefakte të ndryshme që e shënojnë historinë ilire e shqiptare, nga antikiteti e këndej. Dhe po këtë qëllim e ka edhe ekspozita që ai hapi të premten mbrëma në ambientet e Ambasadës së Republikës së Kosovës, në Bernë.
“Museum Illyricum” mban emrin ekspozita që u hap para një numri të konsiderueshëm të pranishmish, shqiptarë e zviceranë.
Në stendat e ekspozitës, Xheladini ka vendosur, të ndara sipas periudhave historike dhe sipas fushave që u përkasin: harta të vjetra, bankënota, monedha metalike, veshje të vjetra origjinale kombëtare, gravura, ballina revistash, stoli të lashta, enë balte dhe deri edhe një helmetë të moçme. “E gjithë kjo pasuri e shpalosur për vizitorët, nuk është as një e treta e thesarit që e kam grumbulluar me vite”, thotë Iliri për albinfo.ch. Mbrapa kësaj pasurie qëndron një punë pasionante, një idealizëm i rrallë për kohën tonë dhe pse jo, edhe një sakrificë materiale e autorit.
“Ekspozitën e kam ndarë në tri periudha: Antikiteti, koha e Ilirisë, Mesjeta dhe historia e re, nga pavarësia e Shqipërisë e deri në vitet dyzeta të shekullit të kaluar. Nga antikiteti, kemi artefakte nga koha e sundimit romak që njëkohësisht është edhe koha e ilirëve. Këtu vlejnë të përmenden monedhat dhe stolitë e ndryshme të asaj periudhe. Ndërsa më për zemër i kam stolitë prej guri dhe prej argjendi të kulturës arbërore të Komanit. Kemi gjithashtu edhe artefakte nga Bizanti, kryesisht stoli dhe monedha”, shprehet Xhelaidini. Po ashtu bie në sy një numër i madh hartash të punuara në shekullin 19 për hapësirat shqiptare dhe ilire ashtu si dhe librash me po këtë tematikë, gjithmonë nga autorë të huaj.
Ndërsa kohën e re, nga shpallja e pavarësisë së Shqipërisë, në këtë ekspozitë e pasqyrojnë edhe pullat postare, të edituara që nga qeveria e parë shqiptare e Ismaiil Qemalit e deri te koha e Zogut, sqaron më tutje Ilir Xheladini.
Duke mos qenë historian as arkeolog me profesion Xheladinin e karakterizon një pasion i jashtëzakonshëm, pothuaj fanatizëm për t`u marrë me identifikimin dhe grumbullimin artefakteve historike. “Fillesa ka ndodhur në një mënyrë të thuash ankedotiale. Në vitet 1995-1996 derisa në Universitetin e Neuchatelit ndiqja leksionet për frëngjishten e vjetër, profesori na fliste gjithë kohën për Romën Antike dhe me asnjë fjalë nuk përmendte praninë ilire që ishte e po asaj periudhe. Unë e pyesja por kot. Pastaj në një antikuariat në qytet gjeta harta të ilirëve, të cilat ia tregova profesorit dhe nga ky moment filluam dialogun me të edhe për Ilirinë. Këtu ka qenë pika nga e cila kam filluar angazhimin për të gjetur e grumbulluar artefaktet, një pjesë të të cilave po i shihni këtu. Janë gjëra që të tjerët i kanë por ne nuk dimë për ekzistencën e tyre. Shumicën i kam gjetur në Francë, Kanada, SHBA etj. Këto i kam siguruar falë anëtarësisë sime në grupin e koleksionistëve. Sigurisht një pjesë të mirë i kam blerë”, pranon Xheladini, i cili për pasionin e tij ka mbështetje edhe bashkëshorten e tij, shkruan albinfo.ch.
Hapja e ekspozitës në Bernë për Ilirin, më shumë se thjesht ekspozim eksponatesh, është menduar si një cytje për të shtyrë të tjerët që të ndihmojnë në ngritjen e një muzeu shqiptar në Zvicër. “Krijimi i një fondacioni për këtë qëllim do të ishte hapi i parë në këtë drejtim. Në gjithë këtë përpjekje të tij, Iliri nuk harron të përmend se ka pasur mbështetjen e Ambasadës së Kosovës. Ndërsa rreth krijimit të fondacionit të përmendur, ai dhe Ministri Këshilltar i Ambasadës, Mustafë Xhemaili thonë për albinfo.ch se besojnë në gatishmërinë për ndihmë të Rrjetit të Bizneseve Shqiptare të Zvicrës.
Ambasadorja e Kosovës në Zvicër, Nazane Breca në cilësinë e mikpritëses, me një fjalë rasti ka prezantuar z. Xheladini, duke e përgëzuar atë për punën e frytshme si koleksionist por edhe si autor librash në gjuhën frënge. Ajo ka theksuar se mërgata krahas barrës që ka pasur për sigurimin e mbijetesës së Kosovës për vite të tëra, po jep kontribut të çmuar edhe në vendosjen e lidhjeve kulturore me vendet ku jeton. Një shembull i tillë është ai i Ilir Xheladinit, ekspozita e të cilit është hapur sonte. Ajo ka treguar me këtë rast gatishmërinë e ambasadës për të mbështetur aktivitetet artistike kulturore, pasi që, siç është shprehur ambasadorja: “arti prek zemrat dhe hap dyer drejt ndërgjegjeje. Arti e kultura heqin barriera duke ngritur ura takimi me të tjerët. Ato kanë rëndësi edhe për faktin se ndikojnë në rrëzimin e paragjykimeve dhe klisheve denigruese që herë herë ngrenë krye për vendin dhe popullin tonë”, ka përfunduar ambasadorja Breca.
Ekspozita do të qëndrojë e hapur deri më 15 dhjetor 2017 dhe ajo mund të vizitohet gjatë orarit të punës të Ambasadës./ KultPlus.com
Hapësira ekspozuese “Motrat” sonte më 30 nëntor, sjellë ekspozitën e radhës, shkruan KultPlus.
HAVEIT sonte do të prezantojnë ekspozitën e tyre të quajtur “Baby Blues”, me kurator Lulzim Zeqiri.
‘’Ma së pari laji flok’t, veç mos e le zdralin e kres me t’i ra trupit se sy e kam nuk t’ bahen nja’’
Beteja për drejtpeshimin e shpirtit dhe trupit në mes të një ‘’çmendunie’’ që pesha dhe gjatësia nuk i matet kurrë sakte, është një ‘’e ’bajsh me sh’net’’ e kahmotshme qe në krye i është dal veç me veten përgjysmë. I ndërtum si nji tansi inteligjente e mekanizmave mbrojtës të trupit n’gjendje të caktuar e mund mendjen dhe e refuzon atë që ta udhëheq plotësisht, në këtë ngatërrese frekuencash, ndërsa nga jashtë vie stigma.
HAVEIT (Alketa Sylaj, Hana Qena, Vesa Qena, Arbërore Sylaj) është një grup prej katër grave të cilat tentojnë të shkojnë përtej kënaqësive të përditshme, rregullave morale dhe refuzojnë të bien dakord me qështjet që po servohen.
Ato nuk bëjnë asgjë përpos se tregojnë historinë e tyre dhe të juajën! Grupi është themeluar në 2011, në Prishtinë.
Hapja e ekspozitës do të mbahet të Enjten, 30 Nëntor, nga 19:00 deri në 21:30 në (Rrugën Shaban Polluzha, pas Teatrit Kombëtar), dhe do të shoqërohet me një koktej të vogël.
Ekspozita do të jetë e hapur për publikun deri më 30 dhjetor, nga e hëna deri të premten, nga ora 09:00 deri në orën 18:00./ KultPlus.com
Sonte më 27 nëntor me fillim nga ora 19:00, në Galerinë Kombëtare të Kosovës do të hapet ekspozita kolektive e artistëve nga Maqedonia “Esenca e ekzistencës”, shkruan KultPlus.
Ekspozita do të qëndroj e hapur në GKK, deri më 12 dhjetor ndërsa po ju sjellim një pjesë të shkurtër rreth asaj se çfarë përmban kjo ekspozitë”
“…është një koncept artistik i cili u drejtohet sferave të ndryshme të përditshmërisë, të jetës, ekzistencës, perceptimeve të cilat vijnë nga aspekte të ndryshme drejt esencës së qenies, të mbijetesës, të funksionimit. Këtu përfshihen gjeneza e dashurisë, shpirtërores, të ushqyerit… kurse nën këtë diskurs zbulohen edhe çështjet e dinjitetit, ideologjisë, politikës, jetës sociale. …Ky koncept me një kuptim të përgjithshëm do t’i përfshijë aspektet e tridhjetë artistëve bashkëkohorë të Maqedonisë të cilët reagojnë në mënyra të ndryshme ndaj parimeve ekzistencialiste, duke përdorur media të ndryshme të shprehje vizuale – nga ato klasiket: piktura, grafika, skulptura, duke kaluar te instalimet, objektet, fotografitë, e deri te video projektimet, printimet digjitale, performansat, audioinstalimet. Artistët e përzgjedhur, Ismet Ramiçeviq, Metodi Angellov, Atanas Botev, Vana Urosheviq, Irena Paskali, Aleksandar Stankoski, Velimir Zhernovski, Gjorge Jovanoviq, Marija Sotirovska, Igor Sekovski, Osman Demiri, Sllavica Janeshlieva, OPA, Mihaela Jovanovska, Zero, Nehat Beqiri, Zeni Ballazhi, Zhaneta Vangeli, Dita Starova Qerimi, në fjalorin e tyre krijues përdorin elemente të cilat i shkojnë për shtat diskursit kryesor të konceptit, ndërkohë që secili prej tyre i shqyrton gjërat esenciale të ekzistencës në mënyra të ndryshme dhe prej këndvështrimeve të ndryshme. Shpresojmë dhe besojmë se me këtë pamje tematike do të ofrojmë një mundësi këndvështrimi të artit bashkëkohor të Maqedonisë.” – Ana Frangovska, Goranço Gjorgjievski, Maja Çankullovska./ KultPlus.com
Më 8 dhjetor në Galerinë Kombëtare të Maqedonisë “Çifte Hamam”, artisti shqiptar Burhan Ahmeti, hapë ekspozitën e tij të njëmbëdhjetën me radhë personale.
Në një rrëfim të shkurtër për KultPlus, Ahmeti, dha detaje interesante në lidhje me ekspozitën që do të qëndroj e hapur përgjatë dy javëve në Shkup.
“Do të ekspozoj diku rreth 30 piktura dhe 40 grafika. Pikturat janë realizuar në teknikën akrilik në pëlhurë, në letër dhe vaj në pëlhurë. Ndërsa grafikat në teknika të ndryshme edhe atë: litografi, akuatintë, gjilpërë e thatë, drugdhendje dhe me teknikë të kombinuar”, pohoi për KultPlus, Ahmeti, duke vazhduar të thotë se kryesisht veprat janë të realizuara viteve të fundit.
Kjo ekspozitë është kuruar nga Tatjana Bundalevska, ndërsa hapet më 8 dhjetor në “Çifte Hamam”, dhe do të qëndroj e hapur deri më 17 dhjetor./ KultPlus.com
Sot në Bukhara Gallery, në qytetin Mashhad të Iranit, hapet ekspozita kolektive e shumë artistëve ku ndër ta është edhe dizejneri kosovar Rrezeart Galica, shkruan KultPlus.
Kjo është ekspozitë komemorative e Rene Wanner, që organizohet nga “Union of Designers”. Rrezeart Galica, do të marrë pjesë me posterin e tij kushtuar Rene Wanner dhe do ta prezantojë Kosovën në mesin e 29 shteteve pjesëmarrëse./ KultPlus.com
Pesëmbëdhjetë punimet e vendosura mbrëmë në muret e Galerisë së Ministrisë së Kulturës “Qafa”, shënonin ekspozitën e parë personale të piktores së re në moshë, Emiranda Beka.
Gili Hoxhaj
Hapësira mes pikturave të saj krijonte një moment pushimi për sytë e vizitorëve, të cilët ndodheshin para një dendurie ngjyrash që ishin shtrirë me delikatesë në subjektet e pikturave. Ishte piktorja Beka ajo që përmes figurave gati sureale të dërgonte në një dimension tjetër të kohës. Karakteret e saj të ftonin një komunikim të mistershëm artistik derisa sytë e ngrirë të figurave kishin stagnuar vetëm në një vend brenda kornizave të pikturës, duke iu shmangur takimit me atë që i vihet përballë.
Në mes të galerisë vëmendja të rrëshqiste në portretin symbyllur e lakuriq të titulluar “Future” (e ardhmja ) e që personifikon ëndrrën e autores që ecën shumë larg të tashmes, mes vetullave të kësaj figure lexohej numri 2911, e që është pikërisht ky vit caku ku arrin fantazia pjellore e piktores.
Kuratori i kësaj ekspozite- Ilir Muharremi vlerëson se veprat e Emirandës përcjellin emocion, sfidë dhe ndërmjet tyre e pamundura, e paarritura përplasen mbi abstrakten dhe bëhen objektive.
“Në këto punime herë dy dimensionale e herë tredimensionale paraqitet realja, i vogli duke u përkujdesur për të rriturin, molla po vërshohet nga krimbat por jo nga ata të zakonshmit. Prania e realiteteve ëndërrore është në pothuajse të gjitha punimet. Çdo portret është imagjinativ, nuk është real, edhe pse shumica e punimeve vijnë nga realiteti por nga një realitet të cilin e sheh vetëm artistja”, ka thënë profesori Ilir Muharremi.
Gjatë ceremonisë hapëse Muharremi po ashtu theksoi se autorja shpreh një stil të veçantë, tejet të fuqishëm dhe tejet modern.
“Portretet e saj prekin një të ardhme imagjinatave që lidhet me imazhin, anatominë e njeriut se si do të duket njeriu pas shumë viteve se sa do të ndërroi anatomia e tij pas shumë viteve. Pikërisht këtu qëndron edhe qëllimi i artit, e vazhdimit të së ardhmes”, është shprehur profesori Muharremi gjatë ceremonisë hapëse.
Portretet e saj që kanë burim imagjinatën e bujshme të piktores sjellin imazhin e njeriut se si do të duket shumë dekadave. Puna e saj duket sikur vallëzon lehtë mes ngjyrave të ndezura, të cilat ajo i kishte shkrirë me një delikatesë, duke i dhënë formë çdo elementi që ngërthehet brenda pikturës. Gruaja është subjekti kryesor që përmbajnë punimet e saj, që vijat e ngjyrës kishin lënë gjurmët e pothuajse të gjitha moshave. Megjithatë fytyrat e tyre vijnë të deformuara e duart e tyre nuk gjejnë asnjëherë prehje, ato herë shtrëngojnë fëmijën, në një pikturë shfaqet një plakë teksa shtrëngon pulën, në një tjetër ato mbajnë librin, e diku gishtërinjtë e tyre shfaqen të lidhura pas cigares.
“Koncepti kryesor i kësaj ekspozitës është i bazuar nga ide të ndryshme në jetën reale të cilat më pas jam munduar edhe t’i shfaq në pikturë. Disa bazohen në imagjinatë dhe disa të tjera janë më aktuale, por janë shtrembërim i reales dhe sureales. Përmes ngjyrave kam reflektuar realitetin e njerëzve, ndërsa këtë realitet jam munduar ta zbus përmes ngjyrave më të ndezura” tha për KultPlus, piktorja Emiranda Beka.
Arsyeja se pse këto piktura kanë për bazë numrin 2911 lidhet me klonizimin, të cilin e parashikon piktorja Beka.
“Pikturat e mija janë të deformuara pasi që pikturat e mija i kam paraqitur në vitin 2911 pasi që edhe mendoj se në këtë vit që të gjithë njerëzit nuk do të duken kështu por do të klonohen” tha piktorja Beka për KultPlus.
Artisti Dardan Luta tregoi për KultPlus, se Emirandën e vlerëson si një artiste e cila ka një potencial premtues për të ardhmen.
“Është një lloj kolazhi brenda vet Emirandës, e cila mbledhë imazhe të ndryshme nga imazhet dhe fotot e saj, e përmes pikturave e punimeve të tjera që i ka parë ajo edhe riprodhon një imazh të vetin. Pikturat e saj janë shumë ilustrative dhe sjellin një lojë të mahnitshme të ngjyrave”, ka thënë Luta për KultPlus.
Kjo ekspozitë do të vazhdoj të jetë e hapur për të gjithë vizitorët deri më 20 Dhjetor./ KultPlus.com
Blinera R. Ibishi është artistja e parë që do t’i ekspozojë disa nga punimet e saj në hapësirat e Oda Ekonomike Gjermano-Kosovare, shkruan KultPlus.
OEGJK është shprehur e gatshme që të bashkëpunojë me artistë lokalë për t’i mbështetur në promovimin e punimeve të tyre, duke i ofruar hapësirat e Odës si hapësirë për ekspozim.
Në këtë institucion zhvillohen takime të shumta me biznese të rëndësishme kosovare dhe gjermane, me partnerë strategjik dhe me investitorë të huaj, ndërsa tani hapësirat e zyrave do t’i ofrojmë edhe për ekspozimin e artit lokal.
OEGJK çdo gjashtë muaj do t’i ndërrojë veprat e ekspozuara me punime të reja. Artistët e interesuar inkurajohen ta kontaktojnë Odën në [email protected]/ KultPlus.com
Emiranda Beka, më 23 nëntor hapë ekspozitën e saj personale në Galerinë e Ministrisë së Kulturës “Qafa”, shkruan KultPlus.
“Ndërmjet pamundurës dhe paarritshmes”, është ekspozita që vjen e kuruar nga Ilir Muharremi, ndërsa financohet nga MKRS.
“Pikturat e artistes së re janë një vallëzim ngjyrash të pastra të krijuara nga spontaniteti, dhe shtrihen mbi një spektër të gjerë dhe të kontrollueshëm nga talenti i saj. Të gjitha objektet përcjellin emocion, sfidë dhe ndërmjet tyre e pamundura, e parritura përplasen mbi abstrakten dhe bëhen objektive…”, shprehet kuratori i kësaj ekspozite Ilir Muharremi.
Ekspozita hapet më 23 nëntor me fillim nga ora 19:00 në Galerinë e Ministrisë së Kulturës. Ndërsa do të qëndroj e hapur një muaj./ KultPlus.com
Me rastin e 80-vjetorit të lindjes së shkrimtarit Anton Pashku, Biblioteka Kombëtare e Shqipërisë dhe Biblioteka Kombëtare e Kosovës “Pjetër Bogdani”, zhvilluan dje në mjediset e Bibliotekës Kombëtare në Tiranë edicionin e dytë të Konferencës Shkencore dhe Ekspozitës “Anton Pashku – shkrimtari”.
Në këtë konferencë ishin të pranishëm studiues dhe kritikë nga Shqipëria e Kosova. Edicioni i saj i parë u mbajt me sukses në Prishtinë më 17 maj të po këtij viti, duke rikthyer procesin e thelluar të leximit e rileximit që nevojitet për veprën unike të Pashkut.
Ekspozita kushtuar Pashkut është një kontribut i specialistëve dhe bibliografëve të Bibliotekës Kombëtare të Kosovës, duke sjellë për herë të parë për publikun në Shqipëri rrugëtimin e veprës së tij përmes botimit të shkrimeve të para, botimeve të sistemuara, raporteve që vepra e tij ndërtoi me kritikën letrare në bashkëkohësinë e vet etj.
Ajo sjell gjithashtu një dokumentim shembullor të faqeve të shtypit të kohës, lidhjeve të rëndësishme sa miqësore aq edhe letrare e intelektuale të autorit.
Këto konferenca dhe ekspozita janë pjesë e aktiviteteve të bashkërenduara në kuadër të bashkëpunimeve mes dy institucioneve tashmë prej vitesh.
Realizimi i ekspozitave, konferencave shkencore, bibliografive dhe botimeve të përbashkëta për veprën e De Radës, Kadaresë, Rugovës e Musine Kokalarit dhe së fundmi kushtuar veprës së çmuar të Anton Pashkut, na shtyjnë jo vetëm në një kremtim dhe përulje me nderim përpara veprës dhe kontributit të tyre, por na kthejnë te vetëdija për një moment të ri dhe cilësor reflektimi, njohjeje të ndërsjellë të autorëve dhe të personaliteteve të jetës shpirtërore të kombit.
Në kuadër të fushatës së Ministrisë së Kulturës “Takohemi për një libër”, gjatë ditëve që ekspozita do të qëndrojë e hapur, janë parashikuar edhe lexime të veprës së Anton Pashkut me nxënës të gjimnazeve të Tiranës.
Qysh prej botimeve të para më 1955 pena e Anton Pashkut vijoi deri në fund të mbetej nga më unikët dhe autentikët në letërsinë shqipe. Prozator e dramaturg, autor i i disa përmbledhjeve me tregime, i romanit të mirënjohur ”Oh” dhe dramave ”Gof e Sinkopa”, ai krijoi e botoi një letërsi me tipare të forta moderne, me vështrime të thella psikologjike, me pyetësim të përhershëm të njerëzores në kushtet e vetmisë dhe dashurimit, në hetim të identitares dhe mbijetesës kulturore në kushtet e totalitarizmit e dhunës, si dhe me kërkime formale që e shpinin gjithmonë drejt krijimit të përsosur.
Tregimet e tij antologjike si ”Nën qarr po rrinte vasha”,” Floçka”, ”Kulla”, ”Si e përshkroi ëndrrën e vet njeriu me kapelë”, etj imponuan një prag të ri të shkrimit të prozës si për shkrimtarët më të rinj ashtu edhe për mendimin kritik letar në Kosovë, shkruan atsh.
Nga botimet më të rëndësishme përmendim:
“Tregime”, 1961; “Nji pjesë e lindjes”, 1965; “Kulla”, 1968; Sinkopa, 1969; “Oh”, 1971; “Kjasina”, 1973; “Gof”, 1976; “Lutjet e mbrëmjes”, 1978; “Tragjedi moderne”, 1982 si dhe botimin e veprës së tij të plotë nga shtëpia botuese e mirënjohur Rilindja me vëllimet “Tregime fantastike”, “Oh”; “Tragjedi moderne” te “Vepra letrare” (1986)./ KultPlus.com
Galeria Kombëtare e Kosovës, më 20 nëntor hapë ekspozitën e artistit Halil Muhaxheri, shkruan KultPlus.
Kjo ekspozitë retrospektive e Halil Muhaxherit vjen me titullin “Në shqetësime dhe heshtje”.
Ceremonia e hapjes do të bëhet në Galerinë Kombëtare të Kosovës në orën 19:00./ KultPlus.com