Etiketë: ekspozite

Historia muzikore e kombit shqiptar, përmes 170 instrumenteve popullore

Posted on by Kult Plus

Mbi 170 vegla muzikore popullore të përdorura në territorin shqiptar gjatë shekullit XIX dhe XX, janë ekspozuar në ambientet e Muzeut Historik Kombëtar, në Tiranë.

E titulluar “Midis Shekujsh”, ekspozita e ideuar nga koleksionisti Ermal Sela dhe kuratori Klajd Ymeri, ka zgjuar interesimin e shumë artdashësve, transmeton ATSH. Ermal Sela pohon se pas shumë kohësh që këto vegla muzikore popullore qëndruan në shtëpinë time, vendosa t’i ekspozoj për publikun.

“Kjo ekspozitë erdhi si pasojë e mbi shtatë vitesh mbledhje dhe koleksionim të veglave muzikore popullore. Pasi vazhdonin të flinin në ambientet e shtëpisë time vendosa t’i shfaq për publikun që mund të ketë interes të njohë një trashëgimi të paçmuar të kulturës tonë. Falë mbështetjes së Ministrisë së Kulturës dhe Muzeut Historik Kombëtar sot jam në këtë ekspozitë katër ditore”, tregon koleksionisti Sela gjatë fjalës së mbajtur në hapjen e ekspozitës.

Koleksionisti Sela shtoi se ”fillimisht ka qenë thjesht rastësi duke mbledhur disa vegla muzikore pastaj nisi të kthehet në pasion dhe u gjenda mes kaq shumë veglave. Pastaj nisa t’ju kushtoj vëmendje antikuarëve, lashtësisë, detajeve estetikë dhe të mbledh variante të ndryshme për çdo lloj apo gjini veglash”, vijoi më tej ai.

Koleksioni që prezanton koleksionisti Ermal Sela përmban mbi 170 veglave muzikore popullore, duke treguar përmes tyre historinë muzikore të një kombi. Aty ka vegla membranofone, idiofone, kordofone dhe aerofone. Shumë vegla të këtij koleksioni janë të rralla dhe kanë dalë nga përdorimi. Të gjitha veglat janë pjesë e koleksionit privat të Ermal Selës. Ai ka mbi shtatë vite që mbledh dhe ruan këto vegla. Gjatë kësaj kohe është njohur edhe me shumë artizanë, të cilët vazhdojnë të mbajnë gjallë punimin e veglave popullore muzikore.

Kjo ekspozitë që qëndron e hapur për publikun në mjediset e Muzeut Historik Kombëtar shoqërohet edhe me një katalog, ku në të paraqiten me foto dhe përshkrim të gjitha veglat, që janë prezantuar në ekspozitë.

Në katalog sipas kuratorit Ermal Sela gjenden gjithashtu edhe foto të artizanëve, që vazhdojnë të punojnë edhe sot me vegla muzikore, duke ruajtur traditën ndër vite. Në katalog përfshihen gjithashtu disa bartës me foto dhe artizanë, të cilët vazhdojnë të mbajnë gjallë traditën e punimit të veglave muzikore.

Ekspozita e çelur për artdashësit në 11 nëntor, do të qëndrojë e hapur deri në 15 nëntor./ KultPlus.com

Albana Ejupi solli akte dhe silueta aktesh duke portretizuar femrën, dashurinë dhe peripecitë e jetës

Posted on by KultPlus

‘Shpalosje Aktesh dhe Sinteza Siluetash’ është titulluar ekspozita e parë personale e autores Albana Ejupi e cila erdhi mbrëmë në Galerinë e Ministrisë së Kulturës, shkruan KultPlus.

Derisa minutat po afroheshin drejt hapjes zyrtare të ekspozitës, depërtimi tek pikturat e autores po bëhej gjithnjë e më i vështirë duke qenë se kjo ekspozitë mirëpriste plot mysafirë e artdashës.

Piktorja e re në moshë por me një pjekuri e guxim artistik mbuloi më shumë se gjysmën e mureve të kësaj galerie me pikturat që të rrëmbenin në një botë të sensualitetit femëror. E gjithë kjo erdhi përmes dhjetë punimeve në formate të mëdha e që trajtonte tema të ndjeshme si vuajtjet dhe peripecitë njerëzore, po ashtu sjellë edhe dashurinë, ndjenjat dhe emocionet që rrjedhin prej temave tabu si arti seksual, duke e paraqitur femrën si bartëse e plleshmërisë dhe si bartëse e përgjegjësisë për krijimin e jetës në përgjithësi.

Penesta Dika , kuratorja e kësaj ekspozite solli një zbërthim të veprave të autores duke thënë se me paraqitjen shtesë të pikturës së saj në një hapësirë pa figuracion, ajo vë një gurthemel për zhvillimin e një zhanri të artit në përgjithësi.

“Kjo ekspozitë sjellë në njërën anë aktet e vetmuara të femrave dhe në anën tjetër shohim silueta çiftesh. Akte femrash të vetmuara me pozitën që e marrin na bëjnë me dije se kanë kaluar në ndodhi të ndryshme në jetë, duan ta shfrytëzojnë pikërisht këtë moment të shtrirjes paksa për tu çlodhur nga mundimet apo peripecitë që ua ka sjellë jeta. Ato sikur kërkojnë të jenë të qeta, duan të jenë vetëm dhe ta ndjejnë trupin në hapësirë, duan ta përpunojnë të kaluarën që të mund të përpunojnë të ardhmen”, ishin fjalët e kuratores Dika.

Profesori dhe poeti francez Max Fullenbaum që kishte ardhur në kryeqytet posaçërisht për këtë ekspozitë e cilësoi punën e Albana Ejupit të mbushur me plot spirtualitet.

“E dashuroj punën e Albanes”, ishin shprehjet që përmblodhën përshtypjet e tij në hapjen e kësaj ekspozite.

Kuratorja e kësaj ekspozite Panesta Dika tha për KultPlus se kishte dashur që publikut t’i sjellë një anë të cilën nuk e ka parë më herët tek Albana.

“Duke qenë se publiku e njeh Albana Ejupin si një piktore portretesh pata dëshirë që kësaj herë ta tregojmë Albanën prej një ane krejt tjetër të saj dhe kur i pash aktet dhe siluetat mendova që kjo është mënyra e duhur që kësaj radhe të shprehim diçka tjetër në këtë hapësirë”, është shprehur Dika.
Ndërsa sipas piktorit Kamuran Goranci, veçantia e kësaj ekspozite ishte vet Albana me stilin e saj, e cila në këto vepra e ka shkrirë shpirtin dhe personalitetin e saj.

“Albana është studente e mirë dhe një talente, ajo është një piktore që i njeh shumë mirë ngjyrat dhe kompozicionin. Është një artiste shumë e guximshme dhe ta kesh një guxim kaq të madh qysh në fillim kjo do të thotë shumë për të si artiste dhe nëse vazhdon kështu kjo artiste që jo vetëm pretendon por edhe premton shumë për të ardhmen”, tha Goranci për KultPlus.

Ndërsa autorja e kësaj ekspozite, Albana Ejupi, tregoi për KultPlus se kjo ekspozitë është rezultat i një punë rreth një viti e gjysme dhe është kurorëzim i studimeve të saj të masterit. Ajo tha se me vendosjen e femrës si figurë qendrore ka synuar provokimin e shoqërisë kosovare që gjërat normale të mos i tabuizojnë.

“Arsyeja kryesore që në veprat e mia femra ka luajtur rolin kryesor ka filluar prej këndvështrimit të gjendjes në Kosovë dhe shoqërisë kosovare, duke i parë femrat në një mënyrë “jonormale”. Trajtimi karakteristik që e kam sjellë në këtë ekspozitë është fakti që i lë disa vepra në gjysmë, që për të tjerët mund të duken në gjysmë por për mua jo sepse gjithmonë vendosi se çfarë të shpalos për publikun e çka jo”, tregoi Albana Ejupi për KultPlus.

Kjo ekspozitë do të vazhdoi të qëndrojë e hapur për një muaj në Galerinë e Ministrisë së Kulturës./KultPlus.com

Fëmijët me Sindromën Down sjellin ekspozitën ‘Bukuritë përmes fotografisë’

Posted on by KultPlus

Në kuadër të muajit tetor, muaji i ndërgjegjësimit për Sindromën Down, Down Syndrome Kosova prezanton ekspozitën “Bukuritë përmes fotografisë”, përcjellë KultPlus.

Fotografitë janë realizuara në vende të ndryshme të Kosovës nga të rinjtë e Shoqatës Down Syndrome Kosova dhe janë vendosur në dru dhe në gurë nga fotografi Ridvan Slivova.

Kjo ekspozitë shitëse për ju do të thotë pak, mirëpo për shoqatën Down Syndrome Kosova do të thotë shumë.

Ekspozita do të hapet më datë 30 tetor, në ora 19:00, në Muzeun Kombëtar të Kosovës. / KultPlus.com

Ekspozitë në 30 vjetorin e marrëdhënieve Shqipëri – Gjermani

Posted on by KultPlus

Presidenti i Shqipërisë, Ilir Meta mori pjesë në ceremoninë e hapjes së ekspozitës së arteve figurative të autores gjermane, Rosemarie Trockel, që u zhvillua në Galerinë Kombëtare të Arteve në Tiranë.

Ky aktivitet u mbajt në kuadrin e javëve të kulturës gjermane në Shqipëri, të cilat këtë vit përkojnë dhe me 30-vjetorin e rivendosjes së marrëdhënieve diplomatike mes Shqipërisë dhe Gjermanisë.

Në fjalën e mbajtur gjatë këtij aktiviteti, presidenti Meta tha se Tetori Gjerman është kthyer në një traditë të mrekullueshme për shqiptarët dhe se kultura krijon lidhjet më të forta dhe më afatgjata midis vendeve e kombeve.

Gjithashtu, Meta theksoi se miqësia dhe bashkëpunimi mes dy vendeve është forcuar e zgjeruar në përmasa të paimagjinueshme në 30 vjetët e fundit dhe se në këto tre dekada një rol të rëndësishëm për afrimin e njerëzve, ka luajtur në mënyrë të veçantë kultura dhe arti. / KultPlus.com

Hapet në Milano ekspozita për 100 vjetorin e lindjes së Ibrahim Kodrës

Posted on by KultPlus

Ibrahim Kodra në një ekspozitë bashkë me shokët e tij, Chagall, Kuniyoshi, Cassinari Ajmone, Peverelli.

Gjatë fundjavës është çelur në “Museo della Permanente” në Milano ekspozita e parë në kuadër aktiviteteve të 100-vjetorit të lindjes së piktorit shqiptar. Në këtë ekspozitë marrin pjesë 19 vepra të Maestro Kodrës, të cilat datojnë nga 1944 –‘64. “Pjesa më e madhe e tyre janë vepra të panjohura e të paekspozuara më parë dhe i përkasin muzeut “Ibrahim Kodra” në Milano apo koleksioneve të ndryshme private në Breshia, Palermo a Torino” shprehet kuratori i veprës Fatos Faslliu. Ekspozita, e cila përmban përveç veprave të Kodrës edhe disa nga punët e artistëve të viteve 1950’-60’ është një homazh për artistin shqiptar.

“Kjo është ekspozita e parë, që çel siparin e aktiviteteve të planifikuara në kuadër të 100- vjetorit të piktorit Ibrahim Kodra. Për mua është një emocion i papërshkueshëm, të shohësh maestro Kodrën midis dy artistëve botërorë si Shagall e Kuniyoshi, gjë e cila nuk ndodh shpesh. Aq më shumë kur artist të mëdhenj të pikturës, si Cassinari, Ajmone, Peverelli etj., ekspozojnë në homazh të Maestro Kodrës. Çdo artist që merr pjesë në ekspozitë përfaqësohet me nga një vepër”, shpjegon Faslliu.

Sipas kuratores së ekspozitës Elena Pontiggia, ekspozita ka për qëllim të risjellë në vëmendje një periudhë artistike të harruar të Ibrahim Kodrës, atë të viteve ’50 e ’60. “Flasim për periudhën kur Kodra, i cili ishte zhvendosur në Milano më 1938, i afrohet informales ( lëvizje artistike që lindi menjëherë pas Luftës së Dytë Botërore), pasi kishte provuar gjininë asbstrakte-gjeometrike, e afërt me neokubizmin dhe konkretizmin e M.A.C. Piktura e tij e mbushur me ngjyra dhe lëvizje, pasurohet me motive erotike dhe kujtime, për të mbërritur në një figuralitet surreal dhe fantastik. Ekspozita që çel aktivitetet për 100-vjetorin e lindjes së artistit, përfshin të gjitha veprat më përfaqësuese të kësaj periudhe dhe një nga më të rëndësishmet e krijimtarisë së tij”, shprehet Pontiggia.

Pjesa më e madhe e aktivisteve është e përqendruar në Milano kryesisht me rastin e 100-vjetorit, por edhe Galeria Kombëtare e Tiranës ka konfirmuar një ekspozitë retrospektive për Ibrahim Kodrën gjatë vitit të ardhshëm. Gjithashtu edhe Galeria Kombëtare e Shkupit ka konfirmuar realizimin e një ekspozitë gjatë muajit qershor 2018. Ekspozita do të qëndrojë e hapur deri në datën 5 nëntor në Muze, nga ora 9:30 – 19:00.

Ibrahim Kodra lindi në Ishëm më 22 prill të vitit 1918. / KultPlus.com

Shënohet Java Botërore e Gjuhës Italiane në Prishtinë

Posted on by KultPlus

Në kuadër të Javës Botërore të Gjuhës Italiane, e cila shënohet nga të gjitha ambasadat italiane kudo në botë, është hapur ekspozita “Udhëtim në Itali”.

Ambasadori i Italisë në Kosovë, Pierro Sardi tha se qëllimi i kësaj ekspozite është të shfaq përmes fotografive historinë kinematike të Italisë dhe të japë një pasqyrë mbi Italinë dhe evoluimin që ka pas ky shtet përgjatë 70 viteve të fundit. Ai shtoi se këto fotografi janë marr prej filmave më të vjetër italian, e deri tek ata të realizuar më së fundmi, transmeton kp.

Sardi: Datojnë prej mbarimit të Luftës së Parë Botërore

“Ky është një shembull i shkurtër i fotografive të nxjerra nga disa prej filmave më të famshëm italian dhe kjo ekspozitë ka për qëllim të japë një vështrim mbi historinë tonë kombëtare. Filmat më të vjetër prej të cilëve janë marrë fotografitë, datojnë prej mbarimit të Luftës së Parë Botërore dhe vazhdojnë me filmat më të fundit të bërë vitin e kaluar, pra vitin 2016. Këto fotografi fillojnë prej disa fotografive të vjetra bardh e zi aty, dhe qëllimi i tyre është të japin një pasqyrë mbi vendin tonë, mbi historinë tonë dhe se si ne keni evoluar për 70 vitet e fundit”, tha ai.

Kuratori i ekspozitës “Udhëtim në Itali”, Antonio Maraldi tha se e veçanta e kësaj ekspozite është që këto imazhe nuk janë të marra nga filmat, mirëpo janë të bëra nga fotografi i veçantë, i cili ka qenë gjatë xhirimeve. Maraldi tha se këto fotografi janë një shembull se çfarë peizazhi italian është përdorur gjatë xhirimeve të këtyre filmave.

“Ideja është që të shihet peizazhi italian se në çfarë mënyre është përdorur në kinemanë italiane, sepse prej vitit 1943 kur është krijuar neorealizmi në kinematografi, kinemaja italiane ka shëtitur gjithë gadishullin. Kjo kinema fillon prej vitit 1943 me filmin “Obsesione i Viskontit” dhe arrin deri në ditët e sotme. E veçanta e kësaj ekspozite është se fotografitë janë realizuar nga një fotograf që ka qenë gjatë xhirimeve, nuk janë imazhe të marra nga filmat, por janë pikërisht gjatë xhirimeve që ka qenë fotografi i veçantë aty”, u shpreh Maraldi.

Zëvendës ambasadorja zvicerane në Kosovë, Anita Schulter Roth tha se pasi që në ekspozitë janë shfaqur pamje vetëm nga kinemaja italiane, ambasada Italiane do të nderojë Zvicrën duke shfaqur një film më 2 nëntor, ku do të shihet influenca dhe kontributi kulturor zviceran në gjuhën dhe kulturën italiane.

Kjo ekspozitë do të jetë e hapur për një javë në Teatrin Kombëtar të Prishtinës. / KultPlus.com

Reshat Ameti me ekspozitë në Kroaci

Posted on by Kult Plus

Në muzeun “Mimara” në Zagreb sot do të hapet ekspozita e artistit Reshat Ameti e titulluar “Në kërkim të dritës”, e cila në kryeqytetin kroat do të jetë e hapur deri më 22 tetor.

Ekspozita do të prezantojë tre cikle përmbledhëse të veprave të krijuara në dhjetë vitet e fundit: “Nga tradita”, “Gjeomteria lirike” dhe “Dialogu”.

Për pikturat e tij, historiania e artit, Iva Kerbler me rastin e ekspozitës, në katalog shkruan se Ameti është një nga ata piktorë të cilëve piktura u është aventurë, pasion dhe eksperiment, i cili kërkimin e vet e orienton drejt mundësive të reja të pikturës dhe këtë e bën me një lehtësi tipike të tij.

“Atë nuk e intereson efekti sipërfaqësor, dekortiv i pikturës, ai hyn thellë, në artikulimin e ndërlikuar të pikturës, duke ndërtuar kompozicionin i cili buron nga maniri i tij spontan i pikturimit, me ç’rast instalon një armaturë të fortë në pikturë, edhe atë pa dallim nëse ka të bëjë kur ai butë i fut pigmentet në pëlhurë. Në pikturat e tija shikuesi identifikon një peizazh imagjinar dhe ai njëkohësisht është edhe tokësor edhe qiellor…”, shkruan Kerbler.

Reshat Ameti (1964) ka diplomuar në Fakultetin e Artit Figurativ në Shkup, në klasën e Ana Temkovës. Tani ai punon si profesor i pikturës në Universitetin Shtetëror të Tetovës. Ameti ka pasur shumë ekspozita personale, ka marrë pjesë në mbi 200 ekspozita grupore vendore dhe ndërkombëtare dhe është fitues i shumë çmimeve./ KultPlus.com

Për njerëzit që ndryshojnë, Adrian Paci me ekspozitë në Firence

Posted on by Kult Plus

Do të jetë hera e parë e artistit shqiptar në Toskana të Italisë.

Museo Novecento dhe Kompleksi Le Murate do të mirëpresin kësisoj artistin Adrian Paci për ekspozitën “Lights to serve the night”, e cila do të hapet me 11 nëntor.

Projekti artistik i Pacit fokusohet në emigrimin, identitetin dhe eksplorimin e ndryshimit të shtëpive dhe identiteteve të individëve e popullatës në përgjithësi. Pesëdhjetë punë do të ekspozohen në Museo Novecento, dy në Le Murate dhe nga një në dy lokacione: Pelago dhe Montelupo Fiorentino.

Duke kombinuar fotografitë, performancën, pikturat dhe videon, ekspozita përdorë historisë personale dhe ngjarjet që kanë ndodhur së fundmi në botë për të ilustruar ambientin rreth njerëzve, dhe natyrën rreth tyre e cila ndryshon përgjithmonë, shkruan KultPlus.

Elementi kryesor i ekspozitës është një barkë në formë meduze që lëvizë nëpër Lumin Arno.

Ekspozita do të qëndrojë e hapur deri me 11 shkurt të vitit tjetër, në këtë rajon të Firences.

Paci, në anën tjetër, ka një histori të ekspozimeve ndërkombëtare, mes tyre në Muzeun e Artit Modern në Nju Jork dhe në Museo MAXXI në Romë. / KultPlus.com

Njëzet vepra me temë historike në ekspozitën e piktorit Anastas Kostandini

Posted on by Kult Plus

Njëzet vepra në pikturë dhe grafikë të realizuara nga piktorit i njohur Anastas Kostandini janë ekspozuar për publikun për herë të parë.

Nga Pogradeci piktori i njohur vjen këtë herë në Tiranë me disa prej punëve të tij që spikasin në temën historike. Me inaugurimin e Fondacionit M&M Ivanaj, me fokus edukimin dhe kulturën në Shqipëri është ekspozuar dhe koleksioni i vyer i pikturës me temë historike, që mban emrin e piktorit të njohur Anastas Kostandini.

Kjo ekspozitë është kuruar nga Ylli Drishti. Ai shprehet se është zgjedhur piktori Kostandini me veprat e tij sepse tema kombëtare, historike, ka spikatur në veprat e tij dhe këtë herë janë njëzet punime, që prezantohen për herë të parë. “Një fondacion, që ka në vëmendje arsimin dhe kulturën, promovimin e artistëve, ka një bibliotekë të madhe, ambiente që i shërbejnë rinisë dhe artistëve. Në kuadrin e inaugurimit të tij u mendua të kishim ekspozitën me veprat e piktorit Anastas Kostandini. Tema e tij është ajo historike, vepra me Skënderbeun, dhe disa punime në grafikë me ngjyra kushtuar kështjellave shqiptare. Janë njëzet vepra, që janë realizua kryesisht vitet e fundit, por ka dhe punime më të hershme nga krijimtaria e piktorit. Janë kështjellat shqiptare, figura e Skënderbeut, piktori ka trajtuar legjendat shqiptare”, pohon kuratori Ylli Drishti për ekspozitën. Sipas tij, temën historike piktori Anastas Kostandini e ka të dashur në veprën e tij ndër vite.

“Ndër piktorët që trajtoi këtë temë është Taso, i cili e ka të dashur në punët e tij dhe ai vazhdimisht e punon. Aktualisht ai ka një cikël punimesh kushtuar Skënderbeut. Është një autor i denjë i kësaj teme”, shton më tej kuratori Ylli Drishti. Ekspozita me njëzet vepra të realizuara nga piktori i njohur do të qëndrojë për publikun deri ditën e martë.

Piktori në aktivitetin krijues

Anastas Kostandini (Taso), lindi në Pogradec në 29 korrik të vitit 1954. Fillimisht, ndoqi studimet e shkollës së mesme në degën pikturë, në Liceun Artistik “Jordan Misja” në Tiranë dhe më pas ndoqi studimet e larta në Akademinë e Arteve të Bukura po në kryeqytet ku dhe u diplomua në vitin 1978 për pikturë Monumentale dhe Kavalet. Në vitin 1981, mori pjesë si bashkautor në realizimin e mozaikut “Shqipëria” në Muzeun Historik Kombëtar dhe në vitin 1983, hapi ekspozitën e parë vetjake në qytetin e tij të lindjes. Ishte viti 1991 kur piktorit të njohur Anastas Kostandini, iu akordua titulli: “Piktor i Merituar” nga Presidenti i Republikës së Shqipërisë dhe në vitin 2005, u shpall “Qytetar Nderi” i qytetit të Pogradecit. Pasi përfundon studimet në Akademinë e Arteve të Bukura në Tiranë, një tjetër epokë nis në jetën e tij, ajo e ekspozimit të vazhdueshëm të veprave të realizuara. Kostandini ekspozon pikturat e tij, vit pas viti, në qytetin e lindjes, në Tiranë, në Ohër, Prishtinë dhe duke vazhduar më tej në Francë, Gjermani, SHBA etj. Merr pjesë vazhdimisht në ekspozita kolektive por të shumta në numër janë ekspozitat vetjake që ka realizuar. Tema të tjera të trajtuara në pikturat e Kostandinit janë piktura historike dhe heroike si edhe piktura të frymëzuara nga letërsia e Lasgush Poradecit dhe Mitrush Kutelit, dy mjeshtra të cilëve u ka dedikuar 4-5 ekspozita. Gjithashtu legjendat shqiptare, ritualet popullore, lokale dhe kombëtare si dhe festat dhe ceremonitë kishtare janë subjekte tërheqëse për Anastas Kostandin. (Marrë nga SotNews)./ KultPlus.com

Rexhep Ferri riktheu tradicionalen në moderne përmes tapicerive të tij artistike (FOTO)

Posted on by KultPlus

Në 80-të vjetorin e lindjes, piktori, profesori dhe shkrimtari, Rexhep Ferri u rrethua me akademik, artistë e artdashës nga Prishtina, Tirana dhe Shkupi që kishin ardhur për të përjetuar nga afër ekspozitën e tij, të organizuar nga Akademia e Shkencave dhe Arteve në Prishtinë, shkruan KultPlus.

Në një hapësirë të mjaftueshme, në muret e ambientit të Akademisë së Shkencave dhe Arteve në Prishtinë, kësaj radhe u shfaq një ekspozitë më e veçantë e cila rikthente tradicionalen në stilin e modern të Ferrit në punimet e vendosura në tapiceri. Derisa në këtë ekspozitë artisti u kishte qëndruar besnik ngjyrës së kaltër, të përhimtes, të verdhës dhe ngjyrës të gjelbër.

Në emër të ASHAK- së, fillimisht të pranishmëve u uroi mirëseardhje, Luan Mulliqi, i cili këtë ekspozitë jubilare e quajti të rrallë dhe si nder për të gjithë.

“Siç po e shihni sonte akademik Ferri po na prezantohet me diçka shumë të re, me një teknik jashtëzakonisht të vjetër por që kohët e fundit ka filluar të harrohet, prandaj është një nder për të gjithë neve që rrallë kemi për të parë ekspozita si kjo sonte”, ka thënë Mulliqi në fjalët hyrëse.
Ferri i me letër para duarve por duke mos humbur shikimin me ata që e rrethonin në këtë ekspozitë, në fjalët drejtuar të pranishmëve vëreheshin fjalët prej poeti.

“Ëndrrat që me heshtjen e tyre flasin, nuk janë vetëm hapat e mi, në këtë ekspozitë edhe ju mund ta gjeni veten, herë-herë gati të lumtur, për të harruar disa gjëra. Për ta bërë jetën të jetueshme, muzika pa fjalë përjetohet më mirë. Duke jetuar në tri kohë, jeta ec edhe pa pyetur, hapet dhe mbyllet, si kjo ekspozitë. Mos u shqetësoni se ju kam afruar pak mitologji, në ADN, kam një gjysh pas gjyshi”, ka përfunduar Ferri.

Rrugëtimin e tij për këtë ditë, Rexhep Ferri derisa tregoi për krijimtarinë e tij për KultPlus e cilësoi si jo të lehtë. Ndërsa në fokus të këtyre punimeve autori kishte paraqitur mitin e njeriut, të cilin ai e përshkroi si të afërt me mitin e Prometeut.

“Të flasësh për krijimtarinë në art, është sikur të flasësh për intimitetin tënd. Unë dua që ta krijoj atë që përjetoj, të ia bëj dikujt tjetër që brenda artit dhe brenda ëndrrës time të gjej ëndërren e vet dhe ta zhvillon në imagjinatën e vet kuptimin e asaj vepre. Një kohë shumë të gjatë kam qenë i lidhur me mitin e burrit dhe gruas sepse vetëm ai mit është vazhdimësia e jetës, është shumë i afërt me mitin
e Prometeut, i cili e ka vjedhur nga Zotit zjarrin për të ia falë njeriut”, u shpreh Ferri.

Në mesin e akademikëve ishte i pranishëm dhe Nexhat Daci, i cili për KultPlus praninë e tij në këtë ekspozitë e përshkroi si një kënaqësi të rrallë për të dhe Akademinë.

“Akademia e Shkencave dhe Arteve është një mjedis sikur i krijuar për evenimente të tilla. Akademik Ferri është një person i cili e meriton një prani të dëshirueshme. Kështu që neve na bën nder vepra e artisteve ndërsa për qytetarët këto janë momente kur njeriu relaksohet dhe kënaqet me suksese të këtilla”, ka thënë Daci.

Po ashtu edhe piktorja Zake Prelvukaj u shpreh shumë e fasionuar me veprat e Ferrit duke e quajtur si një pasurues të artit shqiptar.

“Rexhep Ferri na fasionoi sonte, vepra dhe tapiceria, mënyra dhe paraqitja e Rexhep Ferrit në këtë shprehje artistike është kulminante. Është një ndër autorët që ka pasuruar shumë autorë, kritik, që ka pasuruar artin kombëtar, artin shqiptar dhe kosovar. Po ashtu gëzohem që vijmë prej një vendi dhe që kemi një gjenezë të përbashkët”, ka thënë Prelvukaj.

Piktori Hajrush Fazliu, duke qenë edhe student i Ferrit e përshkroi si një pedagog të rrallë ndërsa veprën e tij e cilësoi si një ombrellë të artit modern që kultivohet në Kosovë.

“Sonte vërtetë këndshëm ai befasoi me një opus të realizuar kohëve të fundit, me një teknikë shumë të veçantë, tradicionale të popullit shqiptar, tapiceria e dikurshme u kthye në një vepër arti shumë modern, siç di i madhi Ferri. Puna e tij e prezantuar sot, me rastin e 80 vjetorit të lindjes së tij na bëri të jemi krenar që e patëm pedagog, jetuam në kohën e tij, përcollëm punën e tij dhe gjithnjë si i palodhur në botën e pikturës modern mund të mbetet një sinonim i kohës dhe një njeri i madh që dha kontribut të veçantë në kulturën shqiptare, në veçanti në pikturën moderne”, është shprehur Fazliu.

Në ekspozitën personale të Rexhet Ferrit, përveç artistëve dhe artdashësve të pranishëm ishin edhe politikanë si Albin Kurti dhe ish- Ministri i Kulturës, Kujtim Shala. / KultPlus.com

U hapë ekspozita Pop-up Store nga Angry Youth

Posted on by KultPlus

Në hapësirën ekspozuese “Motrat” është hapur ekspozita e radhës, përcjellë KultPlus.

Janë Angry Youth, një rrjet artistësh të cilët nuk janë të limituar në vizion por as në disiplinë, të cilët karakterizohen me syrin e tyre të mbrehtë dhe një dashuri të sinqertë për rrugët, të cilët përfshihen nëpër mediume përgjatë fushave të muzikës, dizajnit, ilustrimit, animacionit dhe shkrimit, e që sonte u prezantuan para publikut në kryeqytet përmes ekspozitës Pop-up Store.

Angry youth tenton të përmbush estetikisht dhe kulturalisht zbrazëtinë e situatës në të cilën gjinden.

Përmes kësaj ekspozite, Angry Youth po e organizon një Pop-up shop ku do të shiten bluza të dizajnuara nga Zgjim Elshani dhe Lum Çeku, poashtu në këtë ekspozitë kishte edhe sticker-a të cilat janë dhuruar falas.

Kjo ekspozitë është e organizuar ne kuadër të Redo Design Conference.

Ekspozita do të jetë e hapur për publikun deri më 3 nëntor, nga e hëna deri të premten, nga ora 09:00 deri në orën 18:00. / KultPlus.com


Franco Fontana, fotografi i njohur italian vjen me ekspozitë në Tiranë

Posted on by KultPlus

Fotografi i madh italian Franco Fontana do të hapë ekspozitën “Grand Tour Italia” në Tiranë. Fontana është një fotograf ekologjik, dhe i suksesshëm në shumë zhanre fotografish.

Këndvështrimi i tij është fokusuar kryesisht në përdorimin e ngjyrës e gjeometrisë. Skena nga jeta sociale, pamje nga jeta rurale, industriale apo urbane, krijojnë një antagonizëm të ngjyrave të forta, pothuajse të ekzagjeruara dhe linja të mrekullueshme në artin fotografik të Fontanas. Ai njihet si një nga eksponentët më të mëdhenj të fotografisë italiane.

Hapja e ekspozitës do të bëhet më 6 tetor, në orën 18:00 në Muzeun Historik Kombëtar, ndërsa ekspozita do qëndrojë e hapur një muaj rresht, deri më 5 nëntor.

Peizazhi italian në blicin e Fontanas

Nëpërmjet blicit të tij, peizazhi italian shfaqet si një figurë gjeometrike pothuajse përfekte. Ky peizazh është i mbështjellë në një atmosferë të tejdukshme që ngjall tonet rilindëse. Hapësira e fotove mbushet nga ngjyrat e plota, të verdha, jeshile dhe bojëqielli. Janë gjuha e një fotografie që punon rreth poezisë së ngjyrës e që vjen për të transformuar natyrën në forma abstrakte, shkruan Shqiptarja.
Franco Fontana lindi në Modena të Italisë në vitin 1933. U shfaq si fotograf autor në vitin 1961. Që nga vitet ’70 ai ka punuar në kërkim të një stili esencial kompozicional, bazuar në fushat e ngjyrave. Nga vitet ’70 deri më sot Fontana ka realizuar më shumë se dyzet libra në Itali, Francë, Zvicër, Spanjë, SHBA dhe Japoni dhe i ka ekspozuar punën e tij në më shumë se 400 ekspozita personale dhe kolektive në muzetë dhe galeritë në mbarë botën. Veprat e tij mbahen në muze të rëndësishëm në nivel botëror, ku ka fituar shumë çmime dhe ka qenë një nga më të preferuarit e National Geographic. Fontana sfidon me ngjyrën dhe për të vetë ngjyra është më e vështirë se bardhë e zija.

Në një intervistë për National Geographic, Fontana ka thënë se “Ngjyrat e mia janë një plotësim i artit të bardhë e zisë, një mbivendosje për ta sjellë fotografinë te kërkesat që ka vetë fotografia me ngjyra. Ngjyra është një arritje e pashmangshme në evolucionin e fotografisë”. Ekspozita, kuruar nga vetë Franco Fontana, mbërrin në Tiranë, pas prezantimit në Split, Rijekë, Zagreb, Beograd dhe Cetinje dhe në Itali. Ekspozita e Franco Fontanas “Grand Tour Italia” është mundësuar nga Instituti Italian i Kulturës, Ambasada Italiane në Tiranë dhe Qendra e Hulumtimit e Arkivimit të fotografisë së Friuli Venezia Giulia (CRAF). / KultPlus.com

Biblioteka Kombëtare e Kosovës hapë ekspozitë në kujtim të Robert Elsie

Posted on by Kult Plus

Albanologu i njohur Robert Elsie i cili ndërroi jetë para pak ditësh në moshën 67 vjeçare, po vazhdon të përkujtohet me vente të ndryshme si në Shqipëri ashtu edhe në Kosovë.

Kësisoj me këtë rast Biblioteka Kombëtare e Kosovës ‘Pjetër Bogdani’, më 6 tetor organizon mbledhje përkujtimore dhe hapë ekspozitë në hollin e këtij institucioni për këtë figurë kaq të rëndësishme për shqiptarët, shkruan KultPlus.

Të premten më 6 tetor me fillim nga ora 11:00, Biblioteka Kombëtare e Kosovës, do të përkujtoj albanologun Robert Elsie, me një mbledhje komemorative dhe ekspozitë./ KultPlus.com

Biblioteka Kombëtare hapë ekspozitë me veprat e Robert Elsie (FOTO)

Posted on by Kult Plus

Biblioteka Kombëtare në Shqipëri, tashmë në homazh të albanologut Robert Elsie, ka hapur ekspozitën me kontributin e tij të jashtëzakonshëm, shkruan KultPlus.

Veprat dhe artikujt e tij të shumtë studiues e të përkthyer tashmë përbëjnë këtë ekspozitë të hapur nga Biblioteka Kombëtare, të cilët përmes një postimi në rrjetin social Facebook, kanë shkruar se veprat e Robert Elsie i cili ndërroi jetë dje në moshën 67 vjeçare përbëjnë një fond të vyer në fushën e albanologjisë dhe studimeve mbi letërsinë e kulturën mbarëshqiptare.

“Robert Elsie, krahas kontributit të tij të çmuar si albanolog, studiues e përkthyes do të kujtohet me respekt dhe mirënjohje nga publiku shqiptar edhe për vetëdijen dhe kujdesin e veçantë që tregonte për pasurimin e arkivave të Bibliotekës Kombëtare të Shqipërisë me dhurimet e veprave e artikujve të tij të shumtë studimorë. Ato përbëjnë sot një fond të vyer në fushën e albanologjisë dhe studimeve mbi letërsinë e kulturën mbarëshqiptare. Në fondet e Bibliotekës Kombëtare ruhen mbi 150 libra dhe artikuj shkencorë, kryesisht në fushën e albanologjisë, antropologjisë, përkthimeve nga thesaret e folklorit shqiptar, por edhe përkthime të autorëve të letrave shqipe, ku spikat kontributi i rëndësishëm përmes përkthimit të veprës epike të Gjergj Fishtës “Lahuta e Malcis”. Tashmë Biblioteka Kombëtare, në homazh të këtij personaliteti të shquar, ka çelur një ekspozitë me kontributin e tij të jashtëzakonshëm”, thuhet në njoftimin e Bibliotekës Kombëtare./ KultPlus.com


“Kullat mesjetare të sahatit në trojet shqiptare” 63 dëshmi vijnë në një ekspozitë në Berat

Posted on by KultPlus

11 vite studim të hollësishëm mbi arkitekturën, historikun dhe teknikat e ndërtimit të kullave mesjetare të sahatit në trojet shqiptare, janë finalizuar me një ekspozitë, e cila ka sjellë mbrëmë në qytetin muze të Beratit 62 vepra në grafikë dhe një në pikturë.

Dritan Çoku, një emër i njohur në fushën e arkitekturës dhe trashëgimisë në këtë qytet ka sjellë mbrëmë për publikun nëpërmjet artit të grafikës artistike dhe pikturës dokumentimin e kullave të sahatit në 41 qytete shqiptare.

Modifikimi i mekanizmit nga orë matëse me tingull në mekanizëm me fushë ore është studiuar nga arkeologu Çoku, i cili ka sjell pamjet e kullave të sahatit nga qytete të Shqipërisë, Kosovës, Maqedonisë. Ishin tregtarët shqiptarë, të cilët kishin kontakte të shpeshta me qytetet evropiane, të cilët sollën mekanizmat e orës, ndërsa ndërtuesit vendas materializuan këtë sukses të mendimit njerëzor në vendin e tyre, duke krijuar kullat e sahatit si objekte për përdorim kolektiv për kohëmatje. E gjitha kjo ka tërhequr vëmendjen e studiuesit Çoku, i cili i ka kushtuar vite të gjata pune studimit të historikut të tyre.

Ekzistencën e këtyre sahateve autori e ka studiuar nga afër nga pikëpamja arkitekturore, nga ana historike dhe mënyrat e ndërtimit, për tja prezantuar më pas publikut në grafikë dhe pikturë. Hapja e ekspozitës ka tërhequr mbrëmë vëmendjen e studiuesve, historianëve dhe artistëve, të cilët ishin mbrëmë në galerinë e qytetit në çelje të saj.

Gjithë studimin fizik, por dhe dokumentimin për ato raste që kullat e sahatit nuk ekzistojnë, synojë që ta sjell së shpejtë në një monografi, pasi ndërtimi i kullave të sahatit në gjithë trojet shqiptare është një veçori, është diçka e rrallë, u shpreh Dritan Çoku.

“Ashtu si në viset e tjera të Ballkanit edhe në trojet shqiptare, ndërtimi i kësaj trashëgimie arkitektonike bëhej zakonisht në mjediset më të gjallëruara dhe më të dukshme të qyteteve, në sheshet e pazareve, pranë xhamive kryesore, apo vende të ngritura brenda kështjellave, tha Çoku. Për mungesë të dokumentacionit ilustrativ deri tani, këtyre qyteteve në vazhdim do ti shtohen edhe disa të tjerë me këtë kategori ndërtimore. Por, duket qartë dhe bindshëm se, ndërtimi i kullave të sahatit në trojet shqiptare është një veçori, diçka e radhe kjo për qendrat e tjera turke në periudhën osmane”, pohoi ai.

Për Faruk Borovën, një emër i njohur në fushën e trashëgimisë dhe kulturës në Shqipëri, kryetar i Bordit Drejtues të Institutit Shqiptar të Mendimit dhe qytetërimit Islam, që mbështeti hapjen e kësaj ekspozite studime të tilla e nderojnë qytetin e Beratit, pasi është një punë përveçse voluminoze dhe mjaft cilësore. / KultPlus.com

Erjola Azizolli

Ekspozohen letrat e rralla dhe sendet personale të At’ Fishtës e At’ Pllumit (FOTO)

Posted on by KultPlus

Dorëshkrimet, botimet, sendet personale të At Gjergj Fishta dhe At Zef Pllumi u ekspozuan për publikun e gjerë në katedralen e Shën Palit.

Nuk është i rastësishëm takimi i dy françeskanëve në këtë ekspozitë. At Zef Pllumbi ka ruajtur një sërë dorëshkrimesh dhe sende personale të at Fishtës të cilat sot janë pjesë e pasurisë kombëtare dhe bibliotekave françeskane.

I tillë është dorëshkrimi i Fishtës Juda Makabre i ruajtur nga At Zef Pllumbi, botimi origjinal i Lahutës së Malësisë që i parkete dy shtatorit 1939, dy bastunët personal të françeskanëve, dhe maska mortore e Gjegj Fishtës.

At Zef Pllumi ka dorëshkrimet dhe kujtimet gjatë kohës së internimit dhe vuajtjes së dënimit për më shumë se 20 vjet. Ai është një nga figurat e qëndresës nën diktaturë dhe mendimit të përparuar shqip. Kreu i Kishës Katolike, ipeshkv i dioqezës Tiranë-Durrës George Frendo u shpreh i lumtur që kjo pasuri letrare u ekspozuan për besimtarët katolik dhe për të gjithë qytetarët.

George Frendo: Këtu janë shkrimet e At Gjergj Fishtës që i kishte ruajtur vetë padër At Zef Pllumbi, at Hanton Arapi.

Klerikët thonë se At Zef Pllumi, është një ndër figurat e ndritura të njeriut që “Rrnojti për me tregue” dhe dëshmoi para Zotit dhe gjithë brezave vuajtjet gjatë diktaturës, djegien e Kishave, tentativat e shfarosjes së besimit dhe mënyrës se si trajtoheshin barbarisht besimtarët, pjesë më e madhe e tyre të shpallur martirë.

Në botimet voluminoze “Rrno me tregue: At Zef Pllumi shkruan “Unë tanë jetën e kam kalue në burg, por mendimtár i lír. Ta mendojmë vedin zogj të lirë e fluturojmë ku të duem…”./KultPlus.com


Ekspozita e Llapashticës hapë “Javën e Gjidhënies” në Kosovë (FOTO)

Posted on by KultPlus

Vetëm 40 për qind e fëmijëve të moshës nën gjashtë muaj, ushqehen me qumësht të gjirit të nënës.

Për ta rritur këtë përqindje edhe më shumë, në hapjen e Javës Botërore të Gjidhënies me temën “Ta mbështesim gjidhënien së bashku”, u tha se ushqyerja e fëmijëve me qumësht gjiri, mbron shëndetin e tyre.

Përfaqësuesja e Ministrisë së Shëndetësisë, Merita Vuthaj, ka thënë se po angazhohen që të jenë një hap më përpara se kompanitë farmaceutike që zëvendësojnë qumështin e gjirit të nënës, duke iu ofruar mbështetje nënave që t’i ushqejnë foshnjat me qumësht gjiri, raporton KTV.

Ndërkaq, kryetari i Prishtinës, Shpend Ahmeti, ka thënë se gjidhënien, si shoqëri, nuk guxojmë ta kthejmë në tabu, pasi, sipas tij, qumështi i gjirit të nënës është i pazëvendësueshëm dhe mbron shëndetin e fëmijëve dhe të nënës nga sëmundje të ndryshme.

Java e Gjidhënies ka nisur me hapjen e një ekspozite, ku janë paraqitur në fotografi shumë nëna nëpër ambiente të ndryshme duke i ushqyer fëmijët e tyre me qumësht gjiri të bëra nga fotografi Arben Llapashtica. Ekspozita qëndron e hapur në Sallën e Kuqe të Pallatit të Rinisë, Prishtinë. / KultPlus.com

Gjidhënia promovohet nëpërmjet ekspozitës

Posted on by KultPlus

Ministria e Shëndetësisë me përkrahjen e UNICEF-it do të organizojnë sot foto ekspozitën për ta promovuar të ushqyerit me qumësht të gjirit me moton “Ta mbështesim gjidhënien së bashku”.

Kjo ekspozitë hapet në kuadër të javës për të ushqyerit me qumësht të gjirit, e cila do të mbahet nga 1 deri më 7 tetor , dhe organizohet në bashkëpunim dhe përkrahje të Postës së Kosovës, Shërbimet Klinike Universitare të Kosovës, institucionet lokale dhe Qendrat Kryesore të Mjekësisë Familjare, Shoqatën e Mamive, grupet përkrahësve të nënave për të ushqyerit me qumësht të gjirit, grupin për Institucionet Mike të Foshnjës, Kryqin e Kuq të Kosovës, Save the Children, Asociacioni për nëna dhe fëmijë.

Foto ekspozita është realizuar nga Arben Llapashtica me angazhimin dhe pjesëmarrjen e nënave dhe baballarëve nga vendet e ndryshme. Foto ekspozita do të mbahet në sallën e kuqe të Pallat të Rinisë, nga ora 11:00 – 13:00. / KultPlus.com

Akademia serbe ekspozon trashëgiminë kulturore të Kosovës

Posted on by KultPlus

“Trashëgimia artistike serbe në Kosovë: Identiteti, rëndësia, rrezikimi”, është titulli i ekspozitës së organizuar nga Akademia e Shkencave e Serbisë, e hapur të mërkurën mbrëma në selinë e këtij institucioni në Beograd.

Me këtë ekspozitë, ky institucion synon që “t’ia kujtojë publikut vendës e atij botëror që populli serb jeton në Kosovë tash më shumë se një mijë vjet, dhe prej kohës së Stefan Nemanjes e deri më sot, pandërprerë kultivon krijimtarinë e shumanshme artistike”.

Siç raportojnë mediat serbe, kryetari i AShS-së, Vladimir Kostiq, në hapje të ekspozitës ka thënë se, para së gjithash, kjo është një ekspozitë për serbët. Ka thënë se “Trashëgimia artistike serbe në Kosovë e Metohi” jo vetëm që është ekspozita më e rëndësishme e këtij viti e Akademisë së Shkencave të Serbisë, por që për nga rëndësia është e pakrahasueshme. Eksponatet datojnë prej shekullit XII deri në shekullin XX, dhe të gjitha e kanë origjinën në Kosovë e që sot mbahen në Serbi.

Patriarku Irinej eksponatet i ka cilësuar si “dëshmi të padiskutueshme që hedhin poshtë çdo përpjekje për shtrembërimin e fakteve me synimin që trashëgimia kulturore në hapësirat e Kosovës e Metohisë të prezantohet si trashëgimi kulturore e së ashtuquajturës Republikë e Kosovës, dhe kur lobohet që ky shtet inekzistent të pranohet në UNESCO, falsifikimit të historisë të mos i jepet legjitimitet”. / KultPlus.com

“Detyrë klase”, ekspozita me gjëegjëza nga Eljan Tanini

Posted on by KultPlus

Kujtime fëmijërie, letra të grisura me gjurmët e vizatuara në mur, vese, vëzhgime, shikime fshehtësie, portrete të rriturish, habi lumturie, dashuri, gogola me gjëegjëza, janë pjesë e këtij cikli me titullin “Detyrë Klase” nga Eljan Tanini.

Kjo ekspozitë po vizitohet nga shumë fëmijë dhe të rritur.

Autori përmes kësaj ekspozite ka si qëllim të kthehet në fëmijëri, duke provokuar me pastërtinë e dëshirave njerëzore. Teknika e përdorur për këto punime është akrilik mbi kanavacë.

Ekspozita është hapur më 25 shtator dhe do të qëndrojë e hapur deri më 5 Tetor tek Vila Irobrush, Rruga Qemal Stafa, Tiranë. / KultPlus.com


Ekspozitë me dorëshkrime dhe objekte personale të At Gjergj Fishtës dhe At Zef Pllumit

Posted on by KultPlus

Në vijim të aktiviteteve me rastin e 10 vjetorit të ndarjes nga jeta të një nga figurave më të shquara të kulturës shqiptare, At Zef Pllumit, do të hapet edhe një ekspozitë, shkruan KultPlus.

Provinca Franceskane e Shqipërisë në bashkëpunim me Arqipeshkëvinë Metropolitane të Tiranës – Durrësit dhe Bibliotekën Kombëtare me rastin e 10 vjetorit të vdekjes së At Zef Pllumit, në ambientet e Kurias Ipeshkvore (pranë Katedrales së Shën Palit) Tiranë, organizon ekspozitën me dorëshkrime dhe gjëra personale të At Gjergj Fishtës dhe At Zef Pllumit, të shtunën, më 30 shtator, ora 12:00.

Më këtë rast një fjalë përshëndetëse do ta mbaj Shkëlqesia e Tij Imzot George Frendo. / KultPlus.com

“Tu pi kafe”, Artan Balaj solli një frymë tjetër të punimeve

Posted on by KultPlus

Jeta Zymberi

“Tu pi kafe” edhe duke parë piktura të mrekullueshme, të pranishmit në mbrëmjen e sotme në “TRAFFIC gallery”, po prisnin hapjen e ekspozitës së dhjetë personale të artistit Artan Balaj, shkruan KultPlus.

Muret e kësaj galerie ishin mbushur plot me ngjyra, falë punës së Artanit, e të pranishmit me nga një pije në dorë po shëtisnin rreth e rrotull për t’i shijuar këto piktura të veçanta e që sillnin një frymë të re për publikun.

Balaj, për adhuruesit e artit sonte shpalosi një frymë tjetër të punimeve. Një stil i ri i punës dhe qasjes në art, por kjo ekspozitë lirisht mund të themi që solli një stil miks.

Momente nga jeta e artistit, ndjenja apo mendime, ishin shkrirë në letër nga dora e artistit për të mbetur përgjithmonë si dëshmi e një kohe të caktuar nga jeta e tij, por të shprehura në formë të eksperimenteve.

Hapja e ekspozitës u bë nga vetë artisti, i cili me pak fjalë tregoi se kjo ekspozitë vjen ndryshe.

“Mos më pyetni shumë për koncept, sepse këto piktura i kam realizuar duke pirë kafe, janë eksperimente”, tha artisti për ta shpallur të hapur ekspozitën.

Por tutje Balaj foli për KultPlus ku tregoi më shumë rreth punës dhe konceptit të kësaj ekspozite.

“Këto punime i kam realizuar për rreth dy muaj e gjysmë, janë punime të reja që i kam realizuar duke pirë kafe, andaj edhe kam vendosur që ekspozitën ta titulloj “Tu pi kafe”. Punime janë eksperimente me ngjyra, me vija me forma dhe me teknika të ndryshme. Unë kam dëshirë të eksperimentoj dhe të sjellë gjëra të reja në art sepse arti e ka atë që duhet të evoluojë, të eksperimentojë dhe gjithmonë të sjellë risi. Ky ka qenë edhe qëllimi ime, që të eksperimentojë sa më shumë kësaj radhe, si
me ngjyra, me forma dhe me gjithçka tjetër”, u shpreh artisti për KultPlus.

Në këtë ekspozitë u prezantuan 14 punime, teknika të kombinuara.

“Ideja për me hapë në Traffic ka qenë spontane dhe mënyra si janë realizuar këto punime, d.m.th. tu pi kafe, andaj nga ana konceptuale kësaj ekspozite i është përshtatë më shumë një ambient i tillë”, u shpreh tutje Balaj.

Ekspozita do të qëndrojë e hapur për dy javë dhe të gjithë ata që janë të interesuar t’i shohin këto punime, do të kenë rast ta bëjnë një gjë të tillë për gjatë gjithë kohës sa qëndron hapur lokali. / KultPlus.com

Lola Sylaj e Dardan Zhegrova sonte me ekspozitë në Stacion

Posted on by Kult Plus

Qendra për Art Bashkëkohor-Stacion, sonte hap ekspozitën personale ‘Rosehip’ (Trëndafili i egër) nga artistët Lola Sylaj dhe Dardan Zhegrova, shkruan KultPlus. Kjo ekspozitë hapet sonte më 27 shtator me fillim nga ora 20:00 në Klubin e Boksit në kryeqytet ndërsa do të qëndroj e hapur deri më 21 tetor.

Rosehip kontsruktohet mbi hulumtimin artistik me vendndodhje në New York, bazuar në film, performancë dhe muzikë. Ky projekt rikrijon skena filmash të njohur që kanë pasur identitet vizual të madh të cilin e kanë transmetuar përmes kinemasë.
Duke qenë fizikisht prezent në një vend të përjetuar së pari virtualisht dhe duke ndjerë që “magjia” e kinematografisë tashmë është larguar, artistët sjellin pyetjen se çfarë na servohet për perceptim por dhe në të njëjtën kohë sjell nevojën tonë për të arrirë dhe mishëruar këtë magji nëpërmjet Rosehip.

Ne jemi ajo çka shohim në televizion dhe në mediet e popullarizuara. Pa marrë parasysh ku jetojmë, identiteti ynë ndikohet shumë më shumë nga filmat, muzika dhe media sesa ambienti që na rrethon.

Stereotipet e konstruktuara nga reportazhet mediale mund të shihen si modele për të tu ndjekur dhe në të njëjtën kohë të funksionojnë si memorial që është neglizhuar nga vetëdija kolektive. Ajo që ne përjetojmë virtuailsht mund të mos jetë e vërtetë por formëson idetë dhe gjykimet tona mbi normat dhe shoqërinë.

Trëndafili i egër je ti, Trëndafili i egër jam unë, Trëndafili i egër jemi ne, Trëndafili i egër janë ata, Trëndafili i egër është ai dhe ajo, Trëndafili i egër është një qen, Trëndafili i egër është një shishe, Trëndafili i egër është një tavolinë.

Pas zbarkimit në lokacionin e hulumtimit magjia humbi, artistët ishin duke e kërkuar magjinë dhe vazhdonin ta shihnim larg. Trëndafili i egër është një lule e egër e rritur pa diell, pa kujdes, rritet në hije, gjithkund.

E gjitha është vetëm një tortë!

Lola Sylaj dhe Dardan Zhegrova punojnë si duo por edhe në mënyrë të pavarur me artistë të tjerë.

Lola Sylaj është pjesë e HAVEIT, një kolektiv i 4 grave artiste arti i të cilave rebelohet me furi kundër fuqisë, nacionalizmit, diskriminit ndaj LGBT-ve dhe shtypjes së grave që dominon në shoqërinë e Kosovës. Ato poashtu punojnë për të ilustruar përpjekjen e tyre me vështirësitë e përditshme me të cilat konfrontohen shumica e qytetarëve sot. Performancat e tyre artistike shpesh vihen në skenë nëpër hapësirat publike.

Puna e Dardan Zhegrovës luan me rrjedhjen në mes gjuhës dhe përkthimit të saj në një reprezentim vizual. Në veprat e tij emocioni përdoret si medium artistik që potencialisht mund të veprojë si qëllim për të vënë në pyetje supozimet tona mbi intimitetin dhe të shprehurit. I njohur më së shumëti për videot e realizuara, artisti mund të shikohet si poet në një kohë ku përafrimi fizik po zëvendësohet nga disponueshmëria e kudogjendur përmes mjeteve moderne të komunikimit.
Dardan Zhegrova përfaqësohet nga LambdaLambdaLambda.

‘Rosehip’ me Lola Sylajn dhe Dardan Zhegrovën është pjesë e programit vjetor të ekspozitave të Stacion – Qendra për Art Bashkëkohor Prishtinë dhe pjesë përbërëse e çmimit “Artistët e së nesërmes”.

Lola Sylaj dhe Dardan Zhegrova janë fituesit e çmimit “Artistët e së nesërmes” 2016./ KultPlus.com

Arbana Hajredinaj, pjesë e Ekspozitës Ndërkombëtare në Turqi

Posted on by Kult Plus

Artistja kosovare Arbana Hajredinaj do të marr pjesë në Ekspozitën Ndërkombëtare që do të mbahet në Eskishehir në Turqi. Kjo ekspozitë është e organizuar nga Ministria e Kulturës dhe Komuna e Eskishehirit, shkruan KultPlus.

Në këtë ekspozitë përveç Hajredinajt do të ketë edhe artistë tjerë nga Romania, Franca, Gjermania, Britania e Madhe, Hungaria, Sllovenia, Maqedonia, Qipro, Bullgaria dhe nga Turqia. Ekspozita do të hapet me 7 tetor në Galerinë e Arteve në Eskishehir.

Artistja Arbana Hajredinaj është e njohur për krijimtarinë e saj dhe kontributin e saj në fushën e Artit Pamor. Ka mbi 10 ekspozita personale si ajo në Galerinë Kombëtare të Arteve në ditën e shpalljes së Pavarësisë së Kosovës, pastaj performancën e saj në Tiranë, e shumë ekspozita tjera. Bienali i Artit në Ekuador, Bienali i Artit në Venedik, në Japoni, Qipro, Turqi e vende tjera janë vetëm disa nga ekspozitat ku ajo është përfaqësuar me veprat e saj. Ajo është një ndër 100 të nominuarit për Çmimin Botëror për Artin Vizual apo Oskarin për Artin Vizual në Dubai e cila do të mbahet me 17 nëntor të këtij viti. Veprat e Arbana Hajredinajt gjenden në Muze ndërkombëtare e koleksione të ndryshme. Ka bashkëpunuar me artistë të ndryshëm ndërkombëtarë për realizimin e disa video projeksioneve të ndryshme…/ KultPlus.com