Ministrja e Punëve të Jashtme dhe Diasporës, Meliza Haradinaj-Stublla, ka falënderuar Kongresmenin amerikan Eliot Engel për angazhimin e tij për Kosovën.

Shefja e diplomacisë kosovare, ka veçuar momentet kryesore të angazhimit të Engel për Kosovën, i cili vazhdon të jetë zëri i fuqishëm i Kosovës në Washington.

“Ju na ndihmuat në momentet tona më të errëta, ishit dhe vazhdoni të jeni zëri ynë në Shtetet e Bashkuara të Amerikës, një kampion për të drejtat tona dhe vendin tonë në botë, një përpjekje që vetëm miqtë e vërtetë mund ta bëjnë. Ju ishit një fener drite që na përfaqësonit në Kongresin e Shteteve të Bashkuara dhe e vërteta jonë ishte e sigurt me ju, dhe për këtë, ne jemi thellësisht mirënjohës”, ka thënë me këtë rast Haradinaj-Stublla.

Ajo tha se Engel ka një vend të veçantë në zemrat e njerëzve të Kosovës.

“Ju jeni një hero i vërtetë për ne. Republika e Kosovës do t’ju kujtojë gjithmonë si një mik që u ngrit për ne në kohë nevoje dhe në kohë paqeje, dhe ne shpresojmë të vazhdojmë punën tonë së bashku, drejt horizonteve të reja”, ka thënë me këtë rast Ministrja Haradinaj-Stublla. /express/ KultPlus.com

Edhe po t’i mundësohej të zgjidhte vetë dikë që ta përfaqësonte në politikëbërjen e SHBA-së, Kosova vështirë se do të gjente më të denjë sesa Eliot Engel. Më shumë se tri dekada më parë, Eliot Engel u ngjit në Dhomën e Përfaqësuesve nga vendi i tij në Asamblenë e Shtetit të New York-ut kur ai mundi Mario Biaggin, kongresmenin më jetëgjatë në Bronx, shkruan Gazeta Express, transmeton KultPlus.

Engel, 73 vjeç, së fundmi ishte një nga demokratët më të fuqishëm në Kongres si kryetar i Komitetit të Punëve të Jashtme të Dhomës. Pikat e tij të axhendës përfshinin drejtimin e një hetimi mbi vendimin e fundit të Presidentit Donald Trump për ta shkarkuar inspektorin e përgjithshëm të Departamentit të Shtetit, por ajo bie në vëmendje, është angazhimi i tij i vazhdueshëm për Kosovën.

Kosova tashmë e ka humbur mbështetësin më të madh në Kongresin e SHBA-së, pasi Eliot Engel u largua nga Capitol Hill pas 32 vjetësh në detyrë.

Engel, demokrat, e ka përfaqësuar një pjesë të Bronxit – një lagje e qytetit të New York-ut me një popullsi të madhe dhe politikisht aktive shqiptare etnike – që nga 1989 dhe ishte udhëheqës në Kongres duke u angazhuar të ‘mblidhte’ mbështetje për njohjen e pavarësisë së Kosovës të shpallur në vitin 2008.

Mbështetja e tij e palëkundur për Kosovën gjatë dekadave e ka bërë atë një njeri të famshëm në shtetin e vogël të Ballkanit. Në anën tjetër, dashuria reciproke Kosovë-Engel e ka bërë këtë të fundit një figurë të urryer në Serbinë që ende nuk e pranon Kosovën si shtet dhe lobon kundër njohjes së saj nga bashkësia ndërkombëtare.

Por largimi i Engel nga Dhoma e Përfaqësuesve – ku ai së fundmi kryesoi Komitetin e Punëve të Jashtme të dhomës së ulët, duke përdorur pozicionin e tij për ta ndëshkuar Beogradin dhe për ta mbrojtur Kosovën – mund të mos jetë një rast që Serbia të gëzohet tani dhe Kosova ta kuptojë se ka humbur një përfaqësues të jashtëzakonshëm.

Megjithatë, Engel ka thënë se nuk e ka në plan të pensionohet pas humbjes së tij të befasishme ndaj një drejtori shkolle në zgjedhjet demokratike në fund të vitit që sapo shkoi. Ai tha se është pyetur nëse dëshiron të jetë ambasador apo nënsekretar në administratën e Presidentit të zgjedhur Joe Biden dhe se po i shqyrton opsionet e tij, duke ngritur sërish frikën në Beograd se ai mund të vazhdojë të ndikojë në politikën e SHBA-së në Ballkan.

“[Ka] shumë gjëra të ndryshme që mund të bëj. Unë nuk do të marr ndonjë vendim tani, por, e dini, po mendoj për këtë”, i tha ai Washington Examiner në fillim të dhjetorit. “Ndoshta bëni diçka me administratën. Disa njerëz kanë sugjeruar se mbase mund të jem ambasador”.

Engel hyri në Kongres kur Jugosllavia po ndahej me dhunë përgjatë vijave etnike dhe u zhyt në shumë mosmarrëveshje rajonale të vendit të tij në Komitetin e Punëve të Jashtme, duke fituar përfundimisht një reputacion si ekspert i Ballkanit.

Ai ishte ndër ligjvënësit e parë të SHBA-së që i bëri thirrje administratës së Presidentit Bill Clinton për të ndërhyrë më 1999 për t’i ndaluar forcat serbe në Kosovë dhe ishte pa dyshim avokati më i hapur në Kongres për njohjen e pavarësisë së Kosovës nga SHBA-ja një dekadë më vonë.

Engel vazhdon të luftojë për drejtësi për vëllezërit Bytyqi, tre shqiptaro-amerikanë që luftuan për Kosovën dhe u ekzekutuan nga policia serbe më 1999. Vrasësit e tyre nuk janë ndjekur penalisht ende.

Së fundmi, ai ka postuar në “Facebook” fjalimin e mbajtur pak ditë më parë, ku nuk harroi ta përmendte Kosovën, që siç tha vetë, zë një vend të veçantë në zemrën e tij.

Duke u ndalur te ndërhyrja e administratës Clinton në vitin 1999, Engel tha se u bë e mundur ndalja e gjenocidit në Kosovë. Ai thotë se gjithmonë e ka përkrahur idenë e sovranitetit të Kosovës.

“Ka disa fusha ku më pëlqen të mendoj se e kam bërë diferencën. Gjithnjë kam pasur një vend të veçantë në zemër për Ballkanin, e në veçanti Kosovën. Në vitin 1999, unë mbështeta fuqimisht ndërhyrjen e Administratës së Clintonit në Ballkan. Ne e dimë që kjo gjë ndaloi një gjenocid. Që atëherë, unë kam qenë një përkrahës për sovranitetin dhe pavarësisë së Kosovës. Ai vend ka bërë hapa të jashtëzakonshëm dhe njihet nga Shtetet e Bashkuara, Mbretëria e Bashkuar, Franca, Gjermania, Japonia dhe shumë kombe të tjera të rëndësishme”, u shpreh Engel.

Pasi Engel e la Kongresin amerikan, ushtruesja e detyrës së presidentit, Vjosa Osmani, duke e falenderuar atë, e uroi atë për të ardhmen.

“Faleminderit për shërbimin dhe miqësinë tuaj të paçmuar, Kongresmen EliotEngel! Njohja juaj e nevojës për drejtësi dhe vendosmëria juaj në mbështetjen e ndërtimit të shtetit të Kosovës ishin të domosdoshme. Njerëzit tanë janë përjetësisht mirënjohës dhe ne ju dëshirojmë më të mirën në përpjekjet tuaja të ardhshme”, shkroi Osmani në Twitter.

Edhe kryetari në detyrë i PDK-së dhe kandidati i këtij subjekti politik për kryeministër, Enver Hoxhaj, shprehu falenderim për Engel, të cilin e cilësoi të pazëvendësueshëm.

“Përjetësisht falenderues ndaj mikut të madh të shqiptarëve Eliot Engel! Autoritet i pazavendësueshëm politik dhe moral për të vërtetën për Kosovën dhe shqiptarët në Amerikë dhe më gjerë!”, shkroi Hoxha.

Ndërsa ambasadorja e Kosovës në SHBA, Vlora Çitaku, tregoi se në Washington të gjithë dinë diçka për Kosovën pasi “Engel ka folur gjatë gjithë kohës për të”.

“Ndërsa përfaqësoja Kosovën në WashingtonDC kam takuar shumë zyrtarë amerikanë, demokratë dhe republikanë. Të gjithë më përshëndetën me të njëjtin opinion “Oh, ti je Ambasadorja e Kosovës?! Ne dimë gjithçka për vendin tuaj. Engel flet për të gjithë kohën” Faleminderit EliotEngel”, shkroi Çitaku në Twitter.

Engel do të zëvendësohet si kryetar i Komitetit të Punëve të Jashtme të Dhomës nga Gregory Meeks (demokrat nga New York-u), i cili do ta marrë detyrën më 6 janar kur Kongresi që u zgjodh më 3 nëntor do të mblidhet për herë të parë. /Express/KultPlus.com

Një mbledhje virtuale ka mbajtur sot ministri në detyrë për Punë të Jashtme dhe Diasporë i Shqipërisë, Gent Cakaj, me kongresmenin, Eliot Engel, ku ky i fundit ka siguruar Cakajn se do të punojë ngushtë me Administratën e Biden për t’i dhënë vëmendjen e duhur Kosovës e Shqipërisë.

Kështu bëri të ditur Cakaj përmes një postimi në Facebook.

“Na siguroi se do të punojë ngushtë me Administratën e Biden për t’i dhënë vëmendjen e duhur Kosovës, Shqipërisë, shqiptarëve!  Falënderues e mirënjohës për çdo gjë që ka bërë për ne deri më sot, nga kundërshtimi i regjimit të Millosheviç deri tek mbështetja e Kryesisë Shqiptare të OSBE-së! Faleminderit nga zemra Kongresmen”, shkruan tutje Cakaj./ KultPlus.com

Kongresisti amerikan dhe miku i madh i Kosovës, Eliot Engel, të martën e udhëhoqi seancën e fundit dëgjimore për Ballkanin. Me këtë rast, ai ia kushtoi disa fjalë zemre Kosovës.

“Sot e udhëhoqa seancën e fundit dëgjimore për Ballkanin. Kam luftuar për liri, pavarësi dhe drejtësi për popullin e Kosovës që nga koha kur për herë të parë erdha në Kongres. Kosova gjithmonë do të ketë një vend të veçantë në zemrën time”, tha ai.

Fjalët e kongresistit Engel i citoi faqja zyrtare e Komisionit të Dhomës së Përfaqësuesve për Punët e Jashtme në Tëitter, shkruan Gazeta Express.

Në postimin është bashkëngjitur edhe një link që tregon pse Engel është shumë i lidhur me Kosovën dhe pse respektohet aq shumë në vendin tonë.

Aty thuhet se emrin e Eliot Engel e mbajnë rrugët në Kosovë, ndërsa figura e tij është e shtypur në pullat postare.

Engel ishte një ndër ligjvënësit e parë amerikanë që i kishte bërë thirrje administratës së ish-presidentit Clinton për të ndërhyrë me ushtri në Kosovë kundër forcave jugosllave të Sllobodan Millosheviqit.

Më vonë, ai gjithashtu i bëri thirrje qeverisë amerikane që ta njohë pavarësinë e Kosovës më 2008./ KultPlus.com

Chairman @RepEliotEngel: Today, I chaired my last hearing on the Balkans. I’ve been fighting for the freedom, independence and justice for the people of Kosovo since I first got to Congress.

Kosovo🇽🇰 will always hold a special place in my heart.https://t.co/8ghy03sWAf

— House Foreign Affairs Committee (@HouseForeign) December 8, 2020

Gjakova dhe Malësia e Gjakovës, kanë pritur sot, Eliot Engel, mikun e madh amerikan të shqiptarëve në Kosovë dhe kongresmen në SHBA, të cilit i kishin rezervuar një pritje madhështore.

Sipas një njoftimi në rrjetin social në Facebook të Kuvendit Komunal të Gjakovës, Engel fillimisht ka vizituar Qendrën Kreative “Bone Vet”, me ç ‘rast nga stafi i kësaj qendre dhe nga kryetari i komunës së Gjakovës është njoftuar për së afërmi me aktivitetin e përditshëm dhe misionin e “Bone Vet”.

Sipas njoftimit, kongresisti Engel i shoqëruar nga bashkëshortja e tij, bashkëpunëtorët dhe dy veprimtarët shqiptaro – amerikan Harry Bajraktari dhe Rrustem Geci, është ndalur në pikën kufitare të Qafë Morinës, aty ku është zhvilluar ceremonia e emërtimit të rrugës Ponoshec – Bajram Curri, me emrin “Eliot Engel”, vendim ky i marrë bashkërisht nga komuna e Gjakovës dhe bashkia e Tropojës.

“Krahas kryetarit të komunës së Gjakovës Ardian Gjini dhe kryetarit të bashkisë së Tropojës Besnik Dushaj, në pritje të kongresistit Engel ka dalë edhe presidenti i republikës së Shqipërisë Ilir Meta.

Në ceremoninë e zhvilluar me këtë rast, kryetari Gjini dhe kryetari i bashkisë së Tropojës Dushaj, janë shprehur falënderues për kontributin e madh të kongresistit Engel, ndërsa kanë shtuar se emërtimi i përbashkët i rrugës me emrin e tij, është edhe një dëshmi më tepër se ky kontribut nuk është dhënë kot, por ka ndikuar shumë që shqiptarët në të dyja anët e kufirit të jenë të lirë dhe më të bashkuar”, thuhet në njoftim.

Siç thuhet në njoftim, presidenti shqiptar Ilir Meta, në fjalën e tij ka thënë se emërtimi i rrugës me emrin e Eliot Engel është më e pakta që shqiptarët kanë mundur të bëjnë për të nderuar kontributin e tij dhe të popullit amerikan, por ka shtuar se në aspektin emocional emri i Eliot Engel është jo vetëm në këtë rrugë, por në zemrat e të gjithë shqiptarëve në tërë botën.

Ndërkohë, duke folur para të pranishmëve, vet kongresisti Eliot Engel se përgjatë këtyre viteve ka dëgjuar për Shqipërinë dhe Kosovën dhe për mikpritjen e shqiptarëve, por tashmë është i lumtur që ka ardhur edhe personalisht t’i shoh këto dy vende të ta përjetojë këtë mikpritje.

Ai ka rikujtuar ditët e vështira të shqiptarëve dhe faktin se ky popull nuk e humbi asnjëherë shpresën duke luftuar për liri e demokraci, prandaj edhe ka garantuar se me këtë frymë, aleanca dhe miqësia në mes të popujve shqiptar dhe atij amerikan nuk do të zhduket asnjëherë.

Kongresisti Engel dhe delegacioni që po e shoqëron kanë zhvilluar një vizitë edhe në qytetin e Bajram Currit dhe në Luginën e Valbonës, për tu kthyer përsëri në Gjakovë, për të vënë kurora me lule në Pllakatin e vendosur në sheshin “Tom Lantosh” dhe për të zhvilluar një takim me kryetarin e komunës së Gjakovës Ardian Gjini. /Telegrafi/KultPlus.com

Kongresisti amerikan Eliot Engel duket se përpos që është mik i madh i shqiptarëve, di edhe të kërcejë vallet tona.

Ai bashkë me gruan e tij e kanë hedhur vallen tropojane gjatë ceremonisë së emërtimit të rrugës Ponoshec-Qafë Morinë me emrin e tij, njofton Klan Kosova.

Engel dhe bashkëshortja e tij i janë bashkangjitur valltarëve që morën pjesë në këtë ceremoni në pikën kufitare në Qafë Morinë dhe që po e vallëzonin vallen e Tropojës nën tingujt e tupanit.

Në valle u bashkangjitën edhe Rifat Jashari dhe kryetari i komunës së Tropojës Besnik Tushaj.

Kjo e fundit e ka shpallur “Qytetar Nderi” kongresistin Eliot Engel.