Etiketë: Erlisa Cerkini

Erlisa Çerkini sonte sjell ekspozitën e radhës

Posted on by Kult Plus

Erlisa Çerkini, një piktore e re e tejet premtuese në skenën e artit pamor sonte do të prezantohet me ekspozitën e radhës në Raiffeisen Gallery, shkruan KultPlus.

Erlisa Çerkini e cila është vetëm 15 vjeçare, vitin e kaluar është prezantuar me ekspozitën e parë personale në Bibliotekën Kombëtare të Kosovës, ku punimet e saj kishin dëshmuar që talenti i saj tejkalon moshën.

Erlisa B. Çerkini është e lindur me 24 nëntor 2003. Në vitin 2015 është prezantuar në ekspozitën kolektive të organizuar nga Fondacioni për të rinjtë e botës ‘Ibrahim Kodra’, kurse në gusht ka prezantuar ekspozitën personale në Etno Fest.

Në Dhjetor 2017, ajo është shpërblyer nga Ambasadori Anglez në Kosovë, me Mirënjohje për Qytetare Aktive.

Ekspozita do të hapet sonte prej orës 19:00 në Raiffeisen Gallery./ KultPlus.com

Piktorja 14 vjeçare Erlisa Çerkini shpërblehet me Mirënjohje për Qytetari Aktive

Posted on by KultPlus

Gili Hoxhaj

Instituti Demokracia për Zhvillim ka mbajtur sot Ceremoninë e ndarjes së Çmimeve për Vullnetarët dhe Aktivistët Qytetarë të Vitit, në kuadër të projektit “Vullnetarizmi për Zhvillim: Promovimi i Vullnetarizmit dhe Qytetarisë Aktive në Kosovë”, shkruan KultPlus.

Çmimin kryesor “Vullnetar i Vitit” e mori Silvar Hysenaj, i cili ushtron profesionin e tij përtej kohës së rregullt të punës si teknik medicinal, duke punuar si vullnetar edhe në ndërrime të dyta, vetëm që të jetë në shërbim të qytetarëve në raste emergjente.

Në mesin e shumë çmimeve që u dhuruan sot, piktorja 14 vjeçare Erlisa Çerkini u shpërblye me Mirënjohje për Qytetare Aktive nga Instituti Demokraci për Zhvillim. Ajo para pak javësh ka magjepsur publikun me ekspozitën e saj të parë personale, në kuadër të së cilës ka prezantuar rreth 30 punime, ky të ardhurat e dy prej tyre ka vendosur që t’i ndajë për bamirësi.

“Erlisa Çerkini pikturimin jo vetëm që e ka pasion dhe profesion, por edhe e dedikon për qëllim të mirë. Fitimet nga piktura e parë e shitur i dhuroi për Fshatin SOS, dhe këtë vazhdon ta bëjë edhe në ditët e sotme. Kontributi i saj sot vlerësohet me Mirënjohje për Qytetare Aktive”, u tha sot gjatë ndarjes së shpërblimeve.

“Fëmijët në SOS Fshat janë njëra nga kategoritë të cilat më prekin më së shumti andaj edhe ua kam dedikuar atyre paratë”, ishin fjalët e piktores së re me shpirt human e artistik.

Ajo më pas tregoi për KultPlus se ndihet tejet e emocionuar për këtë çmim, dhe se ky çmim e motivon edhe më shumë punën e saj të mëtutjeshme.

“Jam shumë e kënaqur qe me veprimin tim humanitar kam arritur të vlerësohem nga Instituti D4D. Ishte babi im, i cili më ka nominuar për këtë çmim ndërsa storja ime që paratë e fituara nga piktura ime e shitur t’ia dhuroj SOS fshatit, ju ka bërë shumë përshtypje komisionit. Ndihem shumë e nderuar që edhe pse në këtë moshë, kam arritur të kontribuoj në një kategori të njerëzve që më emocionojnë shumë, ky është një motiv qe unë të vazhdoj të jap edhe më shume nga veprat e mia”, tha piktorja Erlisa Çerkini.


Në këtë ceremoni çmimet u ndanë nga Ambasadori britanik në Kosovë Ruairi O’Connell, i cili gjatë fjalës hyrëse në këtë ceremoni theksoi se vullnetarizmi është baza e një shoqërie demokratike.

“Vullnetarizmi është gjaku i një shoqërie demokratike. Çdo demokraci në botë ka nevojë për institucionet, zgjedhjet, parlamentet por më së shumti demokracia ka nevojë për qytetarët aktiv, për vullnetarë, për njerëzit të cilët nuk presin që dikush tjetër do t’i zgjedhë problemet të gjithëve por që mbajnë fatin në duart e tyre dhe bëjnë përpjekjet për ndryshim, bëjnë përmirësimet në shoqërinë e tyre”, ishin disa nga fjalët e fjalimit hyrës të Ambasadorit Ruairi O’Connell.

Qëllim i Çmimit për Vullnetarët dhe Aktivistët Qytetarë të Vitit është promovimi i punës dhe angazhimit të vullnetarëve në Kosovë, aktivizmi dhe shërbimi i të cilëve ka bërë ndryshim të dukshëm në komunitetet e tyre./ KultPlus.com

14 vjeçarja Erlisa Çerkini shpërfaqi shpirtin artistik dhe human në ekspozitën e parë personale (FOTO)

Posted on by KultPlus

Nga 27 pikturat e ekspozuara shumica prej tyre janë në shitje, ndërsa ajo me ekspozitën e saj përveç që shpërfaqi anën e saj artistike po ashtu tregoi se brenda saj fshihet edhe një shpirt human pasi që të ardhurat nga dy pikturat e saj do të shkojnë si donacion për SOS fshatin e fëmijëve dhe shtëpinë e pleqve.

Gili Hoxhaj

Erlisa Çerkini, vetëm tetë ditë para ditëlindjes së saj të 14-të prezantoi ekspozitën e saj të parë personale me rreth 27 punime, shkruan KultPlus.

Ekspozita e parë personale e piktores së re në moshë por jo dhe në punë, kishte mbushur hollin e Bibliotekës Kombëtarë të Kosovës. Ajo mblodhi dhjetëra dashamirës të artit e bashkëmoshatarë të cilët me lule e përqafime uronin këtë celebrim të rrugëtimit të saj të ri në artin pamor.

Në punimet e saj vërehet përkushtimi dhe arti i një krijueseje premtuese. Më shumë se gjithçka tjetër puna e saj dëshmon se talenti shpesh arrin ta tejkaloj edhe moshën. Punimet që ajo shpalosi në ekspozitën e saj i përkisnin dy viteve të fundit, ndërsa përfshinin nëntëmbëdhjetë piktura në pëlhurë ku tetë prej tyre janë natyra të qeta, katër peizazhe dhe gjashtë portrete, po ashtu dhe shtatë piktura në letër të punuara me temper.

Erlisa Çerkini tregoi për KultPlus së në ekspozitën e saj të parë po e përcjellin ndjenja që e ka të vështirë t’i përshkruaj mirëpo, kjo natë po i sjellë më së shumti krenari për bashkëpunëtoret dhe vetën, për shkak që në këtë moshë të adoleshencës ka arritur të finalizoj ekspozitën e saj të parë personale.

“Jam pak krenare me vetën sonte, sepse është ekspozita ime e parë personale edhe pse jam e re në moshë. Kjo ekspozitë paraqet shkathtësitë e mija në pikturë për dy vite punë, ndërsa pikturat e mija dominohen nga realizmi dhe pikërisht aty e gjej vetën më së miri edhe pse kam përdorur forma të ndryshme të pikturimit. Kurse janë natyrat e qeta ato ku e gjej vetën më së miri dhe e shprehi gjithë atë që e kam brenda vetes”, shpjegoi Erlisa për KultPlus.

Duke qenë se Erlisa përmes punimeve të saj tregoi se arti i saj premton shumë për rrugëtimin e saj në të ardhmen, ajo këtë gjë e pohoi derisa tregoi për KultPlus se synimet e saj janë që punimet e saj të shihen edhe në vende të tjera përtej Kosovës.
“Pretendoj që në të ardhmen ta bëj një ekspozitë tjetër në Amerikë apo diku tjetër. Pa dashur të mburrem, unë besoj që do të arrij në fushën e artit, edhe pse arti nuk është që vlerësohet shumë në Kosovë, por unë do të bëj çmos që të arrij qëllimet e mija që punën time ta paraqes edhe jashtë Kosovës” tha përplot entuziazëm Erlisa.

Faton Kryeziu, themeluesi dhe udhëheqësi i shkollës së artit “Da Vinçi”, ishte pikërisht ai i cili kishte zbuluar talentin dhe përkrahur punën e saj. Ai Erlisen e përshkruan si një punëtore dhe ambicioze të madhe ndërsa shtoi se ajo gjithmonë e ka mahnitur me pikturën dhe punimet e saj.
“Po qe se e shohim për herë të parë cilëndo nga punimet e Erlisës, askush e ndonjëherë as unë , nuk mund të besoj që janë punë krijuese të ndonjë adoleshente. Punimet e saj, po mos ta njohim autoren, mund të mendojmë se janë punime të ndonjë studenti, që është në përfundim të fakultetit, ose edhe të ndonjë studenti që ka përfunduar studimet. Kjo vjen nga forca e brendshme e saj artistike dhe ndjenja e veçantë që ka ajo për artin e vijës, formës e ngjyrës”, është shprehur piktori Kryeziu gjatë ceremonisë hapëse të kësaj ekspozite.

Afrore Blakçori- Uka, arsimtarja e Erlisës në shkollën “Elena Gjika” e përshkruan atë si një talent të rrallë, kurse punën e saj e vlerësoi si të jashtëzakonshme.
“Fjalët janë të tepërta për të folur për Erlisen, në këtë ekspozitë shihet puna dhe aktiviteti i saj i palodhshëm si dhe pozitiviteti i saj. Që nga klasa e gjashtë e kam vërejtur talentin e Erlises dhe gjithmonë në projektet që i kemi punuar ajo ka qenë gjithmonë numër një në shkollën tonë. Kjo po vërehet edhe në punimet e saj, sidomos tek portreti i cili është kulmi i vizatimit, kur arrihet të punohet një portret origjinal atëherëkjo do të thotë se ajo është e përkryer si artiste në të gjitha dimensionet e tjera në fushën e artit”, tregoi arsimtarja Blakçori- Uka.

Nga 27 pikturat e ekspozuara shumica prej tyre janë në shitje, ndërsa ajo me ekspozitën e saj përveç që shpërfaqi anën e saj artistike po ashtu tregoi se brenda saj fshihet edhe një shpirt human pasi që të ardhurat nga dy pikturat e saj do të shkojnë si donacion për SOS fshatin e fëmijëve dhe shtëpinë e pleqve. Artdashësit do të kenë mundësi të shijojnë punën e piktores 14 vjeçare deri më datë 23 nëntor, sa do të qëndroj e hapur kjo ekspozitë në Bibliotekën Kombëtare “Pjetër Bogdani”./KultPlus.com

14-vjeçarja Erlisa Çerkini, vjen me ekspozitën e parë personale (FOTO)

Posted on by Kult Plus

Në kuadër të kësaj ekspozite, në një rrëfim për KultPlus, Erlisa tregoi se do të prezantojë afërsisht 30 punime në të cilat dominon natyra e qetë dhe që kryesisht janë të punuara me ngjyra akrilik në pëlhurë.

Gili Hoxhaj

Erlisa Çerkini, pikërisht në muajin kur shënon ditëlindjen e 14-të ka vendosur të shfaq punën e saj rreth dy vjeçare përmes ekspozitës së saj personale e cila do të prezantohet javën e ardhshme në Bibliotekën Kombëtare të Kosovës.

Në kuadër të kësaj ekspozite, në një rrëfim për KultPlus, Erlisa tregoi se do të prezantojë afërsisht 30 punime në të cilat dominon natyra e qetë dhe që kryesisht janë të punuara me ngjyra akrilik në pëlhurë.

“Shumica e punimeve që do të prezantohen janë natyra të qeta, pasi në këtë lloj arti e kam gjetur vetën më së miri, por ka edhe peizazhe dhe portrete. Këto punime nga i pari deri te i fundit paraqesin progresin dhe zhvillimin e shkathtësive të mija në pikturë, duke u nisur nga hijet, vijat, drita dhe ngjyrat”, ka thënë Erlisa Çerkini për KultPlus.

Ajo është rritur me pasionin për artin pamor, duke qenë se kjo dëshirë për të pikturuar e ka përcjellë që nga fëmijëria e hershme.

“Dëshira ime për pikturën ka lindur që në fëmijërinë e hershme, por mosha kur kam filluar të merrem më seriozisht me pikturë ka qenë mosha 10 vjeçare”, tregoi tutje Erlisa.
Përkundër që ndjek edhe mësimet në shkollë, angazhimin i saj në pikturë e cilëson si një pasion që e përmbush, ndërsa synon që shkathtësitë e saj në këtë fushë t’i zhvilloi edhe përmes studimeve.
“Përpos mësimeve në shkollë, së bashku me Stinën, motrën time 8 vjeçare jemi të angazhuara edhe në kurse të gjuhës angleze, të shahut, si dhe të gjimnastikës. Në prill dhe qershor të këtij viti, kam arritur të marr vendin e dytë dhe të tretë në garat e gjimnastikës së Kosovës. Pra, ndonëse e angazhuar në shumë fusha, unë arrijë që ta menaxhoj kohën mjaft mirë. Arti nuk më duket asnjëherë ngarkesë, pasi që, e konsideroj si një pasion që më përmbush. Sa i përket studimeve padyshim që do t’i zhvilloj edhe më shumë shkathtësitë e mija në pikturë dhe vizatim duke studiuar pikturën. Unë, gjithashtu parapëlqej dizajnin e brendshëm (Interier), andaj tani për tani kam mendimin, se mund t’i studioj të dyja paralelisht”, është shprehur piktorja e re.

Ajo po ashtu ka qenë pjesëmarrëse në vitin 2015 me një punim në ekspozitën kolektive të organizuar nga Fondacioni për të rinjtë e botës “Ibrahim Kodra” me seli në Lugano të Zvicrës në bashkëpunim me “Da Vinci” ART School. Ndërsa synon që punimet e saj të dalin edhe jashtë Kosovës.

“Po ashtu synoj ekspozimin e pikturave të mija edhe jashtë Kosovës, por nuk e di se sa do të jetë e mundur kjo gjë tani, me siguri herëve të tjera. BKK-ja më ka ofruar objektin e tyre pa pagesë, që unë si nxënëse të mund t’i ekspozoj punimet e mija”, theksoi Erlisa për KultPlus.

Ajo gjithashtu tregoi për KultPlus, se të ardhurat nga dy pikturat që do të shiten, do t’i dhurohen shtëpisë së pleqve dhe SOS fshatit.

Ekspozita do të hapet më 16 nëntor 2017, në ora 19:00 në Bibliotekën Kombëtare “Pjetër Bogdani” ku do të vazhdoj të jetë e hapur deri më datë 23 nëntor./ KultPlus.com