Një rrugë në Tiranë merr emrin e gazetarit Fatos Baxhaku

Posted on 5 Nëntor, 20225 Nëntor, 2022 by Kult Plus

Fatos Baxhaku, një nga pionerët e medias shqiptare pas viteve ’90, i cili u nda nga jeta tre vite më parë, në moshën 55-vjeçare, do t’i japë emrin një rruge në Tiranë.

Në pritjen e organizuar në Bashkinë e Tiranës, kryebashkiaku Erion Veliaj iu tha familjarëve se kryeqyteti është sot i nderuar që përkujton një përfaqësues të denjë të gazetarisë shqiptare.

“Është një ndjesi shumë e bukur të kujtojmë një mik, një vëlla – disa e kanë mik e vëlla prej shpirtit e gjakut, disa prej nesh e ‘adoptuan’ si të tillë pasi e njohëm. Fatos Baxhaku i përkiste një gjenerate që nuk vjen më. Unë do doja që kjo gjeneratë të shtohej, por qartazi ka ndryshuar shumëçka nga ajo kohë kur gazetaria ishte idealizëm, kur profesioni ishte më shumë mision se kontabilitet në fund të muajit, kur të qenit mentor i të folurit mirë për dikë, të promovuarit një brez të ri, ishte një detyrë mbi detyrat në sensin e jo vetëm të përcjelljes së një zanati apo profesioni, por të dijes që shkon dorë më dorë”, u shpreh Veliaj.

Kreu i Bashkisë tha se emri që lë pas për brezat e rinj, është një sfidë për secilin prej nesh që bëjmë punë publike.

“Sfida për ne të tjerët është a po jetojmë një jetë të denjë, që nesër të jemi përfaqësues të më të mirës së kombit tonë, siç ishte Fatosi, përfaqësues i më të mirës së kombit tonë. Kjo nuk vlen vetëm për gazetarët, por edhe për ata që bëjnë punën time. Secili duhet t’i bëjë një pyetje vetes: A po jetoj një jetë, që nesër do nderohem nga i madh e i vogël në këtë qytet. I jemi shumë mirënjohës Fatosit për kontributin e tij, për gjithçka që përfaqëson. Ai i përkiste më shumë se një familje”, tha Veliaj.

Në emër të familjes, vëllai i gazetarit Fatos Baxhaku, Arturi, tha se ndihej shumë i nderuar për vlerësimin.

“Tosin e kanë dashur shumë sa ishte gjallë. E shoh edhe tani. Nuk është vetëm dashuri, por edhe vlerësim për punën e tij, për idealet që ai kishte, pasionin dhe mendimet për të përmirësuar sadopak dhe për t’i shërbyer këtij komuniteti, njerëzve. Gjesti juaj i vë vulën këtij vlerësimi. Ju falenderoj shumë në emër të familjes”, u shpreh ai.

Fatos Baxhaku ishte autor i reportazheve të shkruara dhe televizive, studiues i historisë dhe një penë e mprehtë kritike e tranzicionit shqiptar. Ai u nda nga jeta në moshën 55-vjeçare. /atsh /KultPlus

Fatos Baxhaku pas vdekjes vlerësohet me çmimin “Autori i vitit 2020”

Posted on 15 Nëntor, 202015 Nëntor, 2020 by Kult Plus

Fatos Baxhaku me librin “Në emër të Noes” është vlerësuar pas vdekjes, me çmimin e Panairit të Librit Tiranë 2020, “Autori i vitit”. Agim Doksani, ‘Përkthyesi i vitit’ dhe Adelina Mamaqi është vlerësuar për “Letërsinë për fëmijë”. Ndërsa Primo Shllaku, si “Përkthyesi më i mirë” nga gjuha frënge.

Ndahen çmimet e Panairit online “Tirana 2020”. Juria e kryesuar nga përkthyesja Diana Kastrati, gazetari dhe shkrimtari Enkel Demi, kritikja letrare Arta Marku, përkthyesi Erion Kristo dhe poetja Ledia Dushi në këtë edicion të 23-të kanë përzgjedhur, që me çmimin “Autori i Vitit” të vlerësojnë Fatos Baxhakun pas vdekjes me motivacionin: “Për stilin e veçantë e për t’u lakmuar të rrëfimit të historisë së Shqipërisë, ‘Në emër të Noes’, vet shkrimtari ynë, që gjen paqen në degën e ullirit”.

“Jam shumë i prekur nga ky vlerësim”, thotë vëllai i Fatos Baxhakut, Artur Baxhaku.

Çmimi i “Përkthyesit më të mirë” për Agim Doksanin për librin “Jeta e gënjeshtërt e të rriturve” e Elena Ferrantes me motivacionin “Për prurjen shumë cilësore në shqip të romanit, për respektimin e stilit, të sintaksës dhe pasurisë gjuhësore në përshkrimin e karaktereve”.

“Këtë çmim u’a kushtoj të gjithë përkthyesve, veçmas nga gjuha italiane”, thotë Agim Doksani.

Çmimi i ‘Letërsisë për Fëmijë’ për Adelina Mamaqin me librin “Ne tani lexojmë vet”, me motivacionin: “Për përmbushjen e qëllimit kryesor të letërsisë, eksplorimin e botës dhe njeriut. Për lehtësinë me të cilën përçon te lexuesit e vegjël filozofinë që të orienton drejt kuptimit të thelbit të ekzistencës. Për simbiozën mes autores dhe lexuesit që i drejtohet”.

“Ky vlerësim nuk më përket mua, por letërsisë për fëmijë, që duhet quajtur pjesë integrale e letërsisë për të rritur, se këtu nisin bazat integrale e të vegjëlve, që nesër do të bëhen përfaqësues të letërsisë shqipe”, shprehet Mamaqi.

Çmimi për përkthimin me të mirë nga frëngjishtja, poeti Primo Shllaku për përkthimin e “Shën Mëria e Parisit” e Viktor Hygosë, me motivacionin “Përmes sfidës së ripërkthimit, na risjell në shqip një vepër madhështore edhe kanonike përmes një veri elegant edhe të kërkuar dhe një regjistri të riaktualizuar për lexuesin e shekullit të ri.

“Është çmimi i parë që marrë në jetën time, edhe pse ndodhem prej 50 vitesh në fushëbetejën e letrave shqipe. Mbase s’kam ditur aq mirë që të meritoj një çmim për letërsinë origjinale, por diçka e kam ditur dhe unë, se kam ditur që të pres mirë, edhe do të pres prapë. Këtu më kanë”, thotë Primo Shllaku.

Çmimi ‘Lexuesi i bibliotekës” i jepet 9-vjeçarit Jamarbër Hoxhës me motivacionin “ Për dashurinë dhe vëmendjen e veçantë që ai ka për librin edhe letërsinë”. /v.d./Shqiptarja.com/ KultPlus.com

Atdheu

Posted on 16 Gusht, 202016 Gusht, 2020 by Kult Plus

Nga Fatos Baxhaku

– Atdheu është vatra familjare, gardhi, era e mirë e shtëpisë, vendi ku e ndien veten të barabartë dhe të respektuar, bash atje ku të zë gjumi rehat. Do hash ndonjë të sharë, por të jesh i sigurt që e ke pasur hallall.

– Atdheu është gjuha, rrugicat, dialekti, ëndrrat, përrallat, hartimet, dashuritë e para dhe ato të munguara, librat e shkoqur erëmirë.

– Atdheu është dhimbja jote. Është pafuqia dhe fuqia jote. Është pikërisht ajo që ti do të doje të ishte më mirë.

– Atdheu është gjeni yt, mëkatet e tua, mëritë e tua, dashuritë e tua, tradhtitë e tua.

– Atdheu është edhe me ngjyra: Flamuri, Kuqezia, Pavarësia, heronjtë, bëmat… Por mos harro, kanë ardhur kohë të tjera, që kanë nevojë për punë dhe jo për legjenda.

– Atdheu është edhe stinë. Nganjëherë na lodh me zymtësinë, apo me shiun, dhe herë të tjera na ngazëllon me beharin e parakohshëm që vjen befas. Atdheu është ai, vetmitar, i paparashikueshëm.

– Atdheu nuk do brohoritës. Më të famshmit brohoritës nuk kanë pasur fat të mirë.

– Atdheu nuk i do ata që shkojnë nga salla e bilardos drejt e në stadiumin ku mëtojmë të jemi edhe ne. Atdheu na kërkon në radhë të parë punë dhe mend. Si i bëhet?

– Atdheu është ai vend i mrekullueshëm ku na kanë mësuar se më e mbara udhë është të shtojmë miqtë dhe jo armiqtë.

– Nga Atdheu dhe historia e tij e gjatë kemi mësuar se ai nuk do që të fshihemi pas tij. Kjo duhet të jetë e pandershme.

– Atdheu është zemërgjerë, ai na i fal edhe mëkatet tona, dhe të të tjerëve, vetëm e vetëm që njerëzia të jenë mirë.

– Atdheu hera-herës na kujton: Kujdes të korrat!

– Atdheu është ajo gjë që të mungon sa herë që thua me krenari “I am Albanian”.

– Atdheu hap punë, shpresë dhe jo sherre.

Sigurisht që edhe Atdheu ka një cak, ka një limit deri në të cilin mund të na falë mëkatet. Mjaft na ka duruar! Më e para nga të gjitha është se ne duhet të jemi më kokunjur në krenarinë tonë të pabazuar në themel.

Është bazike, nisur nga historia e kulturave njerëzore, që popujt që arrijnë të njohin veten e tyre, njësoj si njerëzit, e kanë jetën më të mbarë, përkundrazi, popujt, që merren me lapidarë, himne, simbole lloj-lloj dhe aspak me thelbin e gjësë, ahere atyre do t’u duhet një rrugë e gjatë drejt përparimit.

Sido që të jetë: Rroftë Atdheu ynë! Kjo për ne. Por rrofshin të gjithë për atdhetarët e tjerë! / KultPlus.com

Ndahet nga jeta Fatos Baxhaku, një prej emrave më të shquar të gazetarise postkomuniste në Shqipëri

Posted on 16 Gusht, 201916 Gusht, 2019 by KultPlus

Zemra e tij pushoi së rrahuri pasditen e të premtes duke e humbur betejën me një sëmundje të rëndë nga e cila vuante prej disa kohësh.

Një penë brilante në reportazh bërjen e më pas në realizimin e shumë dokumentarëve Fatos Baxhaku la gjumë si një kritik i fortë i tranzicionit shqiptar.
Baxhaku ka lindur në Tiranë më 9 janar në 1964. Shkollimin e parë e kreu në shkollat asokohe 8-vjeçare, Emin Duraku dhe ” 20 Vjetori”, (sot Dora D’Istria). Shkollimin e mesëm e kreu në gjimnazin “Ismail Qemali”.
Në periudhën 1998-1999 ishte kryeredaktor i parë i lajmeve në televizionin “Klan”. Në 1999-2000 ishte kryeredaktor i revistës së përjavshme “XXL”.
Nga 2001 deri në 2005 ishte kryeredaktor dhe gazetar në televizionin “Vizion Plus”. Në 2006-20015 ishte kryeredaktor dhe gazetar në të përditshmen “Shqip”.

Fatos Baxhaku është autor ose bashkëautor i serialeve me reportazhe “Tunel” (Vizion Plus), “Rrugëtim” (Top Channel), “Shtëpa e Vjetër” (Digitalb).si edhe i shumë dokumentareve televizive./topchannel/ KultPlus.com