Etiketë: Fshati

Fshati i Dragashit që po zbrazet

Posted on by Kult Plus

Një ortek bore, para 12 vjetësh, pati qenë fatal edhe për 10 anëtarë të një familjeje në Restelicë të Dragashit. Banorët e këtij fshati, akoma gjatë dimrit vazhdojnë të përballen me vështirësi të shumta.

Fshati Restelicë i komunës së Dragashit shtrihet në pjesën më jugore të Kosovës, ka më shumë se dy mijë shtëpi banimi me 11 mijë banorë, rreth 70 % e të cilëve kanë mërguar.

Fshati shtrihet pllajave të Parkut Nacional të Maleve të Sharrit dhe punohet vetëm me damper, një mjet i veçantë që i përshtatet terrenit tepër të thyer malor. Jeta është e vështirë, sidomos në stinën e dimrit që zgjatë gjashtë muaj. Ky fshat ka resurse të mëdha për zhvillimin e turizmit.

“Periudha e dimrit në Restelicë është katastrofale, jetohet vështirë, të rinjtë po largohen me të madhe, sidomos pas liberalizimit të vizave, kanë ngelë vetëm pleqt, shumica jo të aftë për punë. Në Restelicë kemi një ambullantë, ku punojnë një mjek dhe dy teknik, kemi shkollë, me 120 deri 150 nxënës, doktori punon pesë ditë të javës , por momentalisht është në pushim”, tha Hajrudin Hoxha teknik medicinal.

Shkolla e Restelicës ka kushte të mjaftueshme për vijimin e mësimit. “Kushtet për punë në këtë shkollë janë shumë të mira, shkolla është e pajisura si të tjerat në gjithë Kosovën, kemi më shumë se 100 nxënës, është e pajisur me nxemje qëndrore dhe funksionon mirë. deri tash furnizimin me libra e kemi pas nga komuna, tash i kemi nga ministria dhe furnizimi është i mirë”, tha për RTK, Salim Karalija, mësimdhënës.

Nuri Hoxha, banor, thotë se ka punuar si blegtor, por tani ka ngelur vetëm me gruan.

“Jetohet si në mal, gjithçka është bosh, nuk ka njerëz, shumica prej tyre janë jashtë, e familja ime djemtë e vajzat janë në Itali”, tha Nuri Hoxha, banor i Restelicës

Braktisja e fshatrave të komunës së Dragashit është rritur shumë pas liberalizimit të vizave thotë edhe kryetari i kësaj komune Behxhet Xheladini

Restelica në shkurt të vitit 2012 u godit nga një tragjedi natyrore, ku humbën jetën 10 persona të një familjeje.

Që nga ajo kohë dimrat në këtë fshat janë më të butë, por gjithsesi duhen përgatitje të mëdha për të hyrë në stinën e dimrit. Trashësia e borës për këtë vit nuk i ka kaluar 60 cm, për dallim prej shumë viteve më parë kur arrinte mbi një metër./rtk/KultPlus.com

Rama: Në Rehovën turistike po merr jetë projekti për rijetësimin e fshatit

Posted on by Kult Plus

 Rehova, një nga fshatrat më të bukur në vend, është kthyer vitet e fundit në një destinacion turistik për nga resurset e veçanta që ka, që nga tradita, historia dhe mikpritja.

Krahas rijetësimit të kishave, investimet e qeverisë në këtë perlë të Kolonjës janë shtrirë edhe në infrastrukturë.

Së fundmi, po investohet për ndërtimin e rrugës që e lidh me Ersekën.

Kryeministri Edi Rama ka publikuar në rrjetet sociale foto nga ky kantier punimesh për rijetësimin e fshatit.

“Rehova turistike ku dita-ditës po merr jetë projekti për rijetësimin e fshatit dhe ndërtimin e rrugës që do të bëjë lidhjen me Ersekën, duke nxjerrë në pah natyrën magjepsëse të kësaj zone”, shprehet Rama.

E shpallur qendër e mbrojtur si dhe e përfshirë në projektin “100 fshatra turistikë”, në Rehovë po kryhen një së investimesh në infrastrukturë për rehabilitimin e rrugicave, fasadave dhe portat prej guri./atsh/KultPlus.com

Fshati turistik i Voskopojës, një nga destinacionet më tërheqëse

Posted on by Kult Plus

Fshati turistik i Voskopojës në Korçë mbetet një nga destinacionet më tërheqëse për turistët vendas e të huaj.

Investimet e kryera në Voskopojë kanë bërë që të ngrihen një sërë sipërmarrjesh familjare, falë edhe mbështetjes së qeverisë përmes Agjencisë për Zhvillim Bujqësor dhe Rural (AZHBR).

Kryeministri Edi Rama ndau sot në rrjetet sociale dëshminë e administratores së bujtinës “Vila Strugu”, Bruna Sheno, e cila vlerëson ndër të tjera mbështetjen e marrë përmes programit IPARD II.

“‘Vila Strugu’ në fshatin e mrekullueshëm të Voskopojës, e mbështetur nga programet e qeverisë nga Agjencia e Zhvillimit Bujqësor Rural, AZHBR përmes programit IPARD II, është një nga destinacionet që vlen ta vizitoni këtë verë”, shkruan Rama.

Nga ana e saj, Sheno u shpreh se bujtina është ndërtuar nga e para dhe është ruajtur tradita në çdo element të punimeve.

Agroturizmi po merr gjithnjë e më shumë zhvillim në zona të ndryshme turistike të vendit përmes bujtinave të ngritura. Transformimi i zonave rurale në peizazhe tërheqëse, ka nxitur krijimin e agroturizmit, si një model i ri i zhvillimit rural në Shqipëri.

Programi i qeverisë për bujqësinë ka në fokus të zhvillojë fshatin dhe turizmin rural nëpërmjet mekanizmave mbështetës, për rritjen e aktiviteteve agroturistike dhe bujtinave, që janë bërë atraksione me interes të veçantë për vizitorët dhe turistët e shumtë që i frekuentojnë ato në çdo stinë të vitit./atsh/KultPlus.com

Fshati më i heshtur në botë, shumica e banorëve janë shurdhë-memecë

Posted on by Kult Plus

Një fshat i populluar, por krejtësisht i qetë! I tillë është Dadkhai, një fshat i largët në Indi, në majë të një kodre që e rrethojnë Himalajet. Arsyeja pas kësaj qetësie, është vërtet e trishtë. Nuk ka fëmijë që bërtasin teksa luajnë, nuk ka të rritur që bëjnë thashetheme, qeshin apo çdo zhurmë tjetër.

Me rreth 300 familje, Dadkhai njihet si “fshati i heshtur”. Ky fshat ka një përqindje shumë të lartë të njerëzve shurdhë memecë. Këshilli Indian i Kërkimeve Mjekësore zbuloi në 2014-ën pas një hetimi se fëmijët e lindur në këtë fshat kanë të njëjtën sindromë, ata as nuk flasin e as nuk dëgjojnë.

Padyshim, ky fshat funksionon krejt ndryshe nga pjesa tjetër e botës. Është e zakonshme të shohësh njerëz që shikojnë njëri-tjetrin pa thënë asnjë fjalë. Fshatarët identifikohen jo me emra, por me shenja. Edhe ata që janë në gjendje të dëgjojnë dhe flasin janë përshtatur me natyrën e qetë të komunikimit.

Kryetari i fshatit Choudhary Mohammad Hanief i cili është ndër të paktët që flet dhe dëgjon, u shpreh për mediat e huaja se: Çdo familje goditet nga ky mallkim! I kërkova qeverisë një shkollë për këta fëmijë, por lutjet tona ranë në vesh të shurdhër. Këta njerëz janë mbajtur larg arsimit bazë.

Çatitë e këtij fshati janë të mbuluara nga bimët, nuk ka rrugë të asfaltuara dhe ekziston vetëm një qendër e vogël shëndetësore, por pa mjek. Fshatarët e sigurojnë jetesën duke kultivuar perime ndërsa ujin e pijshëm e marin nga burimet aty pranë. Njerëzit duken aq të paqtë sa nuk ndodhin kurrë ngjarje kriminale.

Megjithatë, prevalenca e lartë e këtij mutacioni gjenetik te banorët e ka bërë atë disi të njohur vitet e fundit . E teksa njerëzit që e vizitojnë shtohen, fshatarët janë dyshues ndaj tyre pasi tremben nga kamerat.

Për dekada të tëra, shkaku i mutizmit në Dadkhai ishte një mister. Por shkencëtarët dyshuan fuqishëm se ekzistonte një lidhje gjenetike. Sipas Sunil Kumar Raina, një neurolog indian që udhëhoqi hetimin e ICMR-së në vitin 2014, fshati përbëhet kryesisht nga Gujjars, një komunitet nomad etnik i përhapur në të gjithë Indinë, Pakistanin dhe Afganistanin. Testet e tij gjenetike zbuluan se ky mutacion shkakton mungesën e një proteine të quajtur otoferlin, e cila çon në humbje të dëgjimit.

Dhe kështu ekspertët besojnë se martesat farefisnore brenda fshatit gjatë dekadave kanë bërë që mutacioni të trashëgohet brez pas brezi.

Për të ndryshuar të ardhmen e fshatit, autoritetet tani po inkurajojnë banorët e këtij fshati që të mos rrinë më të izoluar, por të kërkojnë partnerë nga komunitete të tjera.

Vendasit thonë se rasti i parë i shurdh-memecit u raportua në vitin 1901. /KultPlus.com

Gjashtë mijë njerëz jetojnë në një fshat në Poloni në një rrugë të vetme

Posted on by Kult Plus

Një foto e një fshati nga Polonia ka tërhequr vëmendjen në rrjetet sociale ditët e fundit dhe bëhet fjalë për Suloshovën, ku të gjithë banorët jetojnë në një rrugë.

Vendi piktoresk 45 minuta nga Krakovi – fshati Suloshova, falë paraqitjes së pazakontë të shtëpive të banorëve vendas, tërheq vëmendjen në rrjetet sociale, dhe fotot nga pamja e një zogu janë veçanërisht të njohura kohët e fundit.

Suloszowa është në fakt një nga rrugët më të gjata në Poloni dhe shtrihet për rreth 9 kilometra. Grupe shtëpish dhe ndërtesash shtrihen përgjatë rrugës, dhe ndërsa “në tokë” nuk duket veçanërisht mbresëlënëse – nga ajri ato përfaqësojnë një panoramë piktoreske.

“6000 njerëz jetojnë në Suloszów të Polonisë në një rrugë”, është përshkrimi i fotos së postuar në Twitter, e cila është parë afro 7 milionë herë.

Tweeter-i bëri një gabim të lehtë në emrin e fshatit, duke e quajtur Solushova, me shkronjat U dhe O të ndryshuara. Fshati quhet Sułoszowa, ose Sułoszowa në polonisht./Alsatm/KultPlus.com

Fshati në Rugovë mbulohet nga bora

Posted on by Kult Plus

Me uljen e temperaturave, në Kosovë kanë filluar edhe reshjet e borës.

Përderisa në ultësira po bie shi, në vendet malore kanë filluar edhe reshjet e borës. Një prej vendeve ku ka rënë borë është edhe fshati Drelaj i Rugovës Rugovës.

Reshje bore gjatë ditës së djeshme ka rënë edhe në pjesë të tjera të vendit. / KultPlus.com

Fshati Tatzat në Delvinë, një mrekulli për adhuruesit e natyrës

Posted on by Kult Plus

Fshati Tatzat në Delvinë të Shqipërisë, është një qoshk piktoresk, edhe pse pak i njohur, por që vizitohet rregullisht nga adhuruesit e natyrës dhe aventurës.

Natyrë e paqtë, plot ngjyra, aromë, tinguj, ujë i kristaltë burimi dhe ajër i pastër.

Bashkia e Delvinës përcolli pamje nga ky fshat në këto ditë të fundit të gushtit, duke u kujtuar adhuruesve të natyrës vizitën e radhës, transmeton KultPlus.

Pamjet tregojnë një mrekulli për t’u parë e prekur nga çdo adhurues i natyrës.

Tatzat ndodhet rreth 144 kilometra në jug të Tiranës. / KultPlus.com

Sipas një studimi, njerëzit që jetojnë në fshatra janë 8 herë më të lumtur se ata që jetojnë në qytet

Posted on by Kult Plus

Njerëzit që jetojnë në vendet rurale janë më të lumtur sesa ata që jetojnë në qytet, kanë gjetur studimet e reja.

Studimi është bazuar në 400 mijë njerëz në Kanada, duke përdorur si vlerësim shkallën e lumturisë.
Qytetet më të mëdha kanë paga më të larta, nivele më të larta të arsimit dhe norma më të ulëta të papunësisë.

Megjithatë, kjo nuk nënkupton asgjë në kuptimin e gëzimit: njerëzit që jetojnë në fshat ishin mesatarisht tetë herë më të lumtur sesa njerëzit në zonat urbane, zbuloi studimi. /KultPlus.com

Turistët ‘pushtojnë’ fshatin që frymëzoi ‘Frozen’

Posted on by KultPlus

Kur një restorant, hotel, rrugë, qytezë apo qytet bëhet i famshëm në Instagram, duket se nuk duhet shumë kohë që ai vend të ‘pushtohet’ nga turistët.

Fshati alpin Halltatt, i ngritur në malet Salzkammergut të Austrisë, e di këtë dhe e di shumë mirë: një digë ndërtesash si kuti çokollate, rrethuar nga male të mbuluara nga dëbora dhe me këmbët në ujë të kristaltë, vjen taman si një përrallë.

Popullsia e këtij vendi të mbrojtur nga UNESCO është vetëm 780 banorë, por numri i turistëve që mbërrijnë çdo ditë e kapërcen disafish: thuajse 10 mijë vizitorë në ditë.

Përtej mundësive të pafundme që ka, Hallstatt është i famshëm tani si frymëzimi i Arendelle, mjedisi i fantazuar ku zhvillohet seria e famshme e filmit “Frozen” të Disney.

Ai është mjaft i popullarizuar sidomos ndërmjet turistëve aziatikë, e nxitur kjo pjesërisht nga fakti se ekziston një kopje kineze e fshatit, e ndërtuar në provincën Guangdong në vitin 2011.

Tani, ky fshat i famshëm po përpiqet se si të menaxhojë fluksin e madhe të vizitorëve. Michelle Knoll, menaxhere për bordin e turizmit të Hallstatt, tha për CNN se këtu do të fokusohen tek një turizëm cilësor në të ardhmen. /syri.net / KultPlus.com

Fshati kosovar ku me vjet nuk martohet askush

Posted on by KultPlus

Fshati Nasalë që gjendet në komunën e Gjilanit po boshatiset çdo ditë e më shumë. Aktualisht aty kanë mbetur edhe 30 familje. Shumica e banorëve jetojnë në mërgim.

Ndërsa, këta që kanë mbetur ankohen se janë lënë pas dore nga pushteti komunal. Rrugët e fshatit nuk janë të asfaltuara ndërsa banorët problemin më të madh e kanë me mungesën e ujit të pijes.Para disa vitesh është hapur një pus për t’i furnizuar banorët me ujë, por uji ka dalë mineral dhe i nxehtë rreth 30 gradë celsius.

Si pasojë e boshatisjes së fshatit, në shkollë janë vetëm 9 nxënës.Banorët thonë se fshati do të mbetet pa banorë, sepse ka 8 vite që askush nuk është martuar. / KultPlus.com

Fshati Çerem, bukuria e strukur mes Alpeve Shqiptare (VIDEO)

Posted on by Kult Plus

Çeremi është fshati më verior i Shqipërisë. Si t’u ishte fshehur stuhive të luftërave që rrahën këtë pjesë të atdheut, ai është i strukur në mes të Alpeve Shqiptare, që shtrihen në të dy anët e kufirit, që ka ndarë aq padrejtësisht Shqipërinë e Malin e Zi, ky i fundit i shpërblyeri i Europës me luginën e Plavë Gucisë.

Në Çerem arrihet njësoj për nga koha, si prej Dragobisë (në rrugë për në Valbonë), ashtu edhe prej Vuthajve të Gucisë, në anën tjetër të alpeve.

Banorët e tij janë të një gjaku me ata të Vuthajve dhe të Valbonës. Kanë edhe pronat të përziera. Historia e kënga asnjëherë nuk i ka ndarë.

Në vijim kamera e TV do t’ju çojë në këtë fshat, tash thuajse të braktisur, por që turizmi duket se do t’ia kthejë jetën./ KultPlus.com