Qeveria gjermane sot ka marrë vendim për të kthyer rabinët në shërbim ushtarak pas më shumë se 100 viteve, siç ishte propozuar më herët nga Këshilli Qendror i hebrenjve.
“Sot kemi dhënë shembull të rëndësishëm për ushtarët tanë hebrenj”, shkroi ministrja e Mbrojtjes, Anegret Kramp Karnbauer në Tviter. Ajo shtoi se vendosja e rabinëve në shërbim ushtarak është një angazhim i qartë për jetën hebraike në Gjermani.
Armata gjermane nuk e dokumenton përkatësinë hebraike të pjesëtarëve të saj, megjithatë, rreth 300 hebrenjë, 1.400 myslimanë dhe 94.000 krishterë janë në forcat e armatosura të Bundestagut. /KultPlus.com
Gjermania është një vend i preferuar për studentët nga Shqipëria e Kosova. Por çfarë vështirësish kanë ata e ku mund të interesohen për t’u orientuar aty? Ekspertja e DAAD-së, Antje Schlamm shpjegon për Deutsche Wellen.
Deutsche Welle: Një raport i DAAD për vitin 2019 konfirmon se Gjermania është kthyer në një vend shumë të preferuar për studentët nga e gjithë bota, por për studentët nga Shqipëria dhe Kosova ka shifra?
Antje Schlamm: Edhe për studentët nga Shqipëria e Kosova, Gjermania është një destinacion i preferuar, por natyrisht po ta shikosh në tërësi ata përbëjnë një pjesë të vogël të studentëve nga e gjithë bota. Nga Shqipëria kemi afër 2000 studentë, kurse nga Kosova kemi 2313 studentë. Këto janë shifrat aktuale të studentëve për vitin akademik 2017-2018. Është interesante të vihet re, – në statistika ne dallojmë mes studentëve të huaj që kanë jetuar më parë në Gjermani e atyre nga jashtë. Po të shohim studentët nga Shqipëria e Kosova shohim se aty reflektohet historia politike e fundit dhe historia e migracionit.
DW: Çfarë është specifike në këto statistika?
Antje Schlamm: Shohim se studentët kosovarë në universitetet gjermane vijnë me shumicë nga Gjermania, pra mbi 80% e tyre kanë jetuar në Gjermani para studimeve. Vetëm rreth 20% e tyre kanë ardhur drejt nga Kosova. Kurse tek studentët nga Shqipëria është e kundërta. Shumica e studentëve shqiptarë në universitetet gjermane kanë ardhur drejt nga Shqipëria, afër 90%. Kjo do të thotë, se biografia e tyre arsimore është formësuar në Shqipëri, ata janë rritur në Shqipëri, kanë ndjekur shkollën në Tiranë, Shkodër apo Elbasan dhe e kanë marrë që aty të drejtën e studimit në universitetin gjerman.
DW: Çfarë i dallon këta studentë që vijnë drejt nga vendi origjinë, çfarë vështirësish kanë ata?
Antje Schlamm: Nëse mund të flasim për vështirësi, – sepse ata sjellin vërtet sfond të mirë startimi – atëherë kjo lidhet me organizimin e studimit, në Gjermani kërkohet shumë vetorganizim e vetiniciativë, që ndoshta nuk gjenden aq shumë të ankoruara në traditën arsimore në Shqipëri e Kosovë.
DW: E keni fjalën për vështirësi të orientimit si student fillimisht?
Antje Schlamm: Po, për shembull si të bësh gati vetë planin e orëve të studimit, që nuk të jepet gati, nuk është fiks nga fillimi, por që përpilohet sipas interesave të studentit, një plan sigurisht brenda një kuadri studimor, por me pikërëndesa do të thosha. Edhe çështje praktike të jetës së përditshme luajnë një rol, kur vjen nga jashtë dhe je shumë i ri. Për shembull si të gjesh banesën, kjo është diçka, për të cilën duhet të përgatitesh mirë. Në qytetet e preferuara për studime nuk është aq e lehtë të gjesh një apartament, prandaj duhet të përgatitesh me kohë.
DW: Çfarë mundësish ka për këta studentë?
Antje Schlamm: Ka oferta mbështetëse, pra po të informohesh ka mundësi që të ndihmosh veten. Me organizimin e studimeve hasin në vështirësi edhe studentë gjermanë. Për shembull si t’ia dal t’i shkruaj të gjitha referatet që kam si detyrë, si ta organizoj kohën që të shkoj edhe në kurse, por të ndjek edhe praktikat që duhen apo të kryej punime të tjera të studimeve, pra si t’i organizoj të gjitha këto. Ose për studentët nga Shqipëria apo Kosova që nuk e kanë gjermanishten gjuhën e nënës të mësojnë, si të shkruajnë një tekst akademik. Për këtë ka gati në të gjitha universitetetet gjermane struktura mbështetëse, si të mësosh stilin akademik të të shkruarit.
DW: Në cilat degë i gjen më shpesh studentët nga Shqipëria e Kosova?
Antje Schlamm: Si studentët nga Shqipëria ashtu edhe ata nga Kosova kanë një preferencë shumë të qartë në përzgjedhjen e degës studimore – rreth dy të tretat e tyre i gjen nga njëra anë tek shkencat inxhinierike dhe nga ana tjetër tek shkencat juridike e ato ekonomike e sociale, këto janë degët e zgjedhura për vitin akademik 2017-2018. Pastaj ka edhe disa dallime mes studentëve nga Shqipëria e Kosova, pra bëhet fjalë për ata që nuk studiojnë inxhinieri, shkenca juridike, ekonomik apo shkencat sociale. Tek ky çereku i fundit vihet re, se studentët shqiptarë gjenden më shumë në shkencat natyrore dhe mjekësi, kurse kolegët e tyre kosovarë studiojnë më shumë krahasimisht shkencat humane.
DW: Dikush nga Shqipëria e Kosova që dëshiron të studiojë në Gjermani – çfarë hapash duhet të ndërmarrë?
Antje Schlamm: Gjëja e parë fare që duhet të bëjë është të informohet shumë mirë si në portalin www.study-in-germany.de, por edhe në faqen online të DAAD-së. Këtu gjenden të detajuara të gjitha hapat, që nga përgatitja, nga përzgjedhja e degës, kushtet e pranimit në univeristetet gjermane, të dhëna praktike për jetën në Gjermani, si për gjetjen e apartamentit, të treguara në formë të përshtatshme për të rinjtë. Nëse je interesuar për studime master, ka mundësi të kesh një bursë studimi master të DAAD-së. Kusht janë rezultatet e shkëlqyera në studime. Informacione për këtë gjen në portalin www.funding-guide.de.
DW: Ata duhet po ashtu të vërtetojnë, se e kanë të siguruar jetesën…
Antje Schlamm: Sigurisht ata duhet të informohen për rregulloret e marrjes së lejes së qëndrimit, por tek shtrimi i kërkesës për vizë ne si DAAD nuk përfshihemi. Kërkesa për vizë bëhet në ambasadat gjermane në vend, aty ata informohen saktësisht, se cilat dokumente janë të nevojshme. Nëse je pranuar në një universitet kërkon një vizë studenti, nëse ende nuk je pranuar nga ndonjë universitet gjerman, atëherë kërkohet një tip tjetër vize. Por për këtë ata që janë të interesuar është mirë të informohen tek ambasadat apo përfaqësitë gjermane në vend, edhe tek faqja online e Ministrisë së Jashtme gjermane.
DW: Si qëndron puna me tarifat studentore? Duhet të paguajnë studentët jo nga BE tarifa universitare në Gjermani?
Antje Schlamm: Tarifa studentore ka për studentët në landin Baden-Vyrtemberg, që nga viti 2017, aty studentët e huaj jo nga BE që vijnë për studime në Gjermani duhet të paguajnë një kuotë 1.500 Euro në semestër. Në landet e tjera gjermane nuk e kemi këtë tarifë. Sigurisht ka një tarifë regjistrimi në universitete, afërsisht 100-300 Euro në semestër, që nuk është ndonjë tarifë e lartë, e brenda saj mund të jetë për shembull edhe qarkullimi urban për studentët.
DW: Çfarë këshille do t’i jepnit me vete një të riu nga rajoni që dëshiron të studiojë jashtë?
Antje Schlamm: Do doja t’i inkurajoja këta të rinj, që të jenë të hapur, e këtë hap të studimit të mos e shohin vetëm si një nevojë profesionale, sepse sigurisht nuk është e lehtë të braktisësh vendlindjen, por të shohësh edhe shanset e tjera të mëdha që krijohen, ky hap ka për ta ndryshuar jetën e tyre, do t’i pasurojë, do të zgjerojë horizontin e tyre, njohuritë e gjuhës. Ata do të përjetojnë një diversitet të tillë, të cilin ndoshta në këtë formë nuk e njohin në vendin e tyre.
Antje Schlamm është drejtuese e programit të bursave për Europën Qendrore e Lindore, Europën Juglindore e Turqinë në DAAD, Shkëmbimin Akademik Gjerman/Lindita Arapi, DW. / KultPlus.com
Gjermania konsiderohet fuqia ekonomike e Bashkimit Evropian dhe gjuha gjermane është gjuha më e folur në Evropë. Deri sa Gjermania vazhdon të mbizotërojë në politikën evropiane dhe gjithnjë e më shumë në qendër të çështjeve globale, sigurisht që tani është koha ideale për të mësuar rreth gjuhës dhe kulturës së saj. Të mësuarit e gjermanishtes mund të ju ndihmojë të lidheni me 220 milionë folës të kësaj gjuhe në mbarë globin. Është gjuha e dytë shkencore më e përdorur në botë.
Për tregun e punës gjuhët e huaja ofrojnë një avantazh konkurrues në zgjedhjen e karrierës, sidomos tani duke marrë parasysh rritjen e numrit të kompanive të huaja në vend. Pra në njërën anë ka mundësi punësimi në korporata të mëdha të cilat bashkëpunojnë me firma gjermane pastaj janë edhe përfaqësitë e jashtme të firmave gjermane që veprojnë në vendin tonë. Për këtë të rinjët sot po zgjedhin të studiojnë Gjuhë Gjermane duke u pajisur me diplomë gjë që iu krijon avantazh në tregun e punës. Regjistrohu këtu https://bit.ly/2HuMame
Përveq kësaj Kolegji Universum është institucion lider i ndërkombëtarizimit. I vetmi institucion nga Kosova që ka arritur numrin më të madh të marrëveshjeve të financuara nga Komisioni Evropian. Eksploro Evropën gjatë studimeve, studio një semester me BURSË të plotë në njërin nga 22 shtete të BE-së. Shiko fotot e 108 studentëve tanë përfitues të bursave ndërkombëtare https://bit.ly/2HWfylt
Piktori Anastas Kostandini është prezantuar me piktura për Shqipërinë në Gjermani. Me një aktivitet të vlerësuar me krijimtarinë e tij ndër vite, këtë herë veprat në pikturë janë prezantuar në rajonin e Nurembergut në Gjermani. Në ekspozitë paraqiten rreth 20 pastele dhe një cikël gravurash në dru, por këtu është dhe cikli “Historia e Skënderbeut”, që autori e realizoi për 550-vjetorin e vdekjes së Skënderbeut.
Frankonia konsiderohet si zonë me tradita të mëdha ku ka jetuar Albert Dureri, i cili ka qenë djepi i gravurave të para mbi historinë e Skënderbeut. Tabloja ku është prodhuar mozaiku “Shqipëria” zbukuron dhe karakterizon dhomën “Shqipëria”, e dekoruar nga Taso në Lindnhof, por ajo përmban edhe të tjera punime. Gjatë muajit tetor kjo ekspozitë do të shëtisë në Berlin dhe nëpër qytete të tjera në Gjermani. Deri më atëherë Anastas Kostandini do t’i shtojë koleksionit dhe një cikël tablosh me ngjyra vaji me kompozicione nga realiteti i sotëm shqiptar.
Ekspozita që u hap në hotelin “Lindnhof” në rajonin e Nuremberugt është mundësuar prej fondacionit “Nehemia”. Për ekspozitën e artistit të njohur Anastas Kostandini (Taso) kanë shkruar dhe gazetat gjermane. Në materialet e botuara tregohet për punën e autorit shqiptar, i cili prej vitesh me krijimtarinë e tij me pikturën ka marrë shumë vlerësime. Piktori Anatas Kostandini shprehet se punët për Shqipërinë janë mirëpritur mjaft mirë në Gjermani kur janë prezantuar. “Është një zonë mjaft interesante, ku kam ekspozuar rreth njëzet pastele, grafika me qytete shqiptare dhe një cikël nga historia e Skënderbeut. Pjesa tjetër interesante për mua ishte dhe realizimi i dhomës ‘Shqipëria’. Unë u thirra për t’i dizajnuar këto dhoma dhe punova gjatë për dhomën e personalizuar ‘Shqipëria’. Përmban një pikturë të madhe, që është riprodhim i mozaikut ‘Shqipëria’ dhe e kam bërë në dimensionin 3 me 1 metër, por aty ka edhe tablo të Lasgush Poradecit. Abazhur me kostume kombëtare, e gjitha një Shqipëri e vërtetë”, shprehet piktori Anastas Kostandini mes të tjerave për prezantimin me veprat e tij në Gjermani.
Anastas Kostandini (Taso) ka mbaruar Akademinë e Arteve të Bukura në Tiranë më 1978. Tema e preferuar e veprave të tij janë peizazhet sociale e poetike nga jeta e përditshme, natyra psikologjike e qytetit të lindjes Pogradecit, të cilin ai e njeh në thellësi, si dhe kompozimi nga traditat e vendlindjes.
Kryeministri i Kosovës, Ramush Haradinaj, mori sot pjesë në performancën e artistëve nga Gjermania “TAPE THAT”, komunitet ky që ka për qëllim të shfaqë talentet kryesorë të kësaj forme të artit me shirita që mund të përdoren si një medium artistik, e që u organizua nga Ambasada e Gjermanisë në Kosovë.
Me këtë rast, Kryeministri Haradinaj, tha se kjo ngjarje për të është diçka e re dhe se ndihet mirë që në këtë rast, Gjermania dhe ambasadori Christian Heldt, e kanë sjell në Kosovë një mënyrë të re të të bërit art, i njohur si “Tape That”, duke thënë se kjo është edhe një dëshmi për dëshirën që të Kosova të kyçet në këto trende.
“Besoj se kjo është nxitje edhe për artistët tanë, ne kemi shumë artistë të zot, të mirë. Jam i bindur që edhe në Kosovë do të ketë po ashtu që do të bëjnë këtë lloj arti, por edhe artet e tjera”, tha Kryeministri Haradinaj, duke shtuar se kjo është një ngjarje e mirë, sepse po bëhet përpjekje për kyçjen e Kosovës në të gjitha rrethanat e jetës.
Kryeministri Haradinaj, duke folur për performancën e artistëve gjermanë të rrymës së artit “TAPE THAT”, Cedric Goussanou dhe Nicolas Lawin, tha se shpreson që edhe artistët tanë të gjejnë mënyra të lidhen me artistë të tjerë, pasi sipas tij, shihet se është një dëshirë e Gjermanisë që ta fus Kosovën në hartën e aktiviteteve kulturore që ata e bëjnë, e që është shumë mirë.
Ndërkaq, ambasadori gjermanë në Kosovë, Christian Heldt, falënderoi Teatrin Kombëtar të Prishtinës, Filarmoninë e Kosovës dhe të gjithë të tjerët, duke thënë se ka admirim të madh për njerëzit të cilët, luftojnë për të dhënë sa më shumë qasje në jetën kulturore këtu në Prishtinë.Ambasadori Gjerman, Christian Heldt, bëri një falënderim të veçantë ndaj Kryeministrit Haradinaj për rëndësinë dhe hapësirën që siç tha ai po ia jep artit. /KultPlus.com
Ka nis më 22 shkurt ndërsa përfundon më 23 mars. Kjo është ngjarja kulturore “BallkanTage” apo “Ditët e Ballkanit” e cila po mbahet në Munchen të Gjermanisë, shkruan KultPlus.
Kësisoj në këtë ngjarje me aktivitete e tyre kulturore dhe filmike prezantohen të gjitha Shtetet Ballkanike si Shqipëria, Kroacia, Bosnja, Mali i Zi, Maqedonia, Serbia e poashtu edhe Kosova.
Pjesë e kësaj ngjarje nga Kosova, do të jetë regjisori kosovar dhe producenti Burim Haliti me katër filma. Ai këtë lajm e ndau me KultPlus, duke thënë se poashtu është edhe përfaqësues i Kosovës.
“Unë, Burim Haliti regjisor filmi më 3 mars, jam i ftuar nga organizatorët e “BallkanTage” dhe njëkohësisht jam i zgjedhur që ta përfaqësoj Kosovën në këtë ngjarje Kulturore në Munchen, ku do të prezantohem me katër nga filmat e mi të fundit”, ka thënë Burimi për KultPlus.
“Hekurishtja”, “Çlirimi” janë filmat me regji të Halitit ndërsa “The Junction” dhe “Piano” ai është producent. Këta filma Burim Haliti, do t’i prezantoj edhe në këtë ngjarje kulturore, pasi që, deri më tani me këta filma ai numëron rreth 30 çmime ndërkombëtare./ KultPlus.com
