Konkursi kombëtar “Gjuha jonë sa e mirë“, nismë e Radio Televizionit Shqiptar në bashkëpunim me MAS, çel sot premierën, ekskluzivisht në ekranin e RTSH Shkollë.
Me pjesëmarrjen e 52 shkollave nga e gjithë Shqipëria, ky rrugëtim i të rinjve të klasave të nënta, përballë njëri tjetrit, premton jo vetëm njohuri të reja por edhe argëtim e zbavitje.
Të parët në garë, plot emocione dhe të vendosur për të përfaqësuar denjësisht qytetet e tyre, vijnë shkollat 9 vjeçare: “Gjergj Kastrioti”, Lezhë; “Branko Kadia”, Shkodër ;”Migjeni” Pukë-Fushë Arrëz dhe “ALI Podrimja”, Tropojë
“Gjuha jonë sa e mirë”, nga sot, vjen çdo të martë dhe të enjte 17:00 në RTSH Shkollë/ KultPlus.com
Në Qendrën Multimediale në Shkup u zhvillua dje ceremonia e hapjes së ekspozitës “Gjuha jonë sa e mirë”, e cila është ideuar dhe kuruar nga Muzeu Historik Kombëtar.
Ekspozita u çel në kuadër të Ditës Ndërkombëtare të Gjuhës Amtare me pjesëmarrjen e drejtorit të Muzeut Historik Kombëtar, Dr. Dorian Koçi, drejtorit të Agjencisë së Gjuhëve, Republika e Maqedonisë së Veriut, Ylber Sela, drejtorit të Institutit të Trashëgimisë Shpirtërore e Kulturore të Shqiptarëve në Shkup, Skënder Asani, si dhe shumë dashamirësëve të kulturës vendase.
Ekspozita “Gjuha jonë sa e mirë” përmban rreth 20 stenda, të cilat përshkruajnë ecurinë e shkrimeve shqipe.
Ekspozita fillon me shkrimet e hershme shqipe, me formulën e pagëzimit, që është dokumenti i parë i shkruar në gjuhën shqipe me alfabet latin. Gjithashtu, një perikope nga Ungjilli i Pashkëve është dokumenti i parë i shkruar në toskërishte. Ekspozita vijon me letërsinë e vjetër shqipe (1555-1800), për të vazhduar me letërsinë e rilindjes kombëtare (1830-1912), e cila lindi dhe u kultivua si pjesë e pandarë e lëvizjes për çlirimin e vendit nga skllavëria osmane. Tema kryesore e saj është atdhedashuria, prandaj kjo letërsi ka karakter të theksuar patriotik.
Ekspozita vijon me letërsinë e periudhës së Pavarësisë (1912-1944) dhe përfundon me disa nga shkrimtarët bashkëkohorë. Në letërsinë shqipe u shfaq një plejadë shkrimtarësh, të cilët sollën vepra letrare duke shprehur një frymëmarrje të re me zhvillime të vrullshme e cilësore./ KultPlus.com
