Greta Bajrami, e nominuar për çmimin prestigjioz në Amerikë

Posted on 12 Maj, 202112 Maj, 2021 by Kult Plus

Shqiptarja Greta Bajrami është mes pesë kandidatëve për çmimin Female Roofing Professional nga kompania Beacon në Virginia të SHBA-ve.

Si administratore dhe themeluese e Golden Group Roofing në Westborough, Bajrami është mjaft e njohur në MetroWest.

Në 2017 ajo ka qenë në revistën “Worcester Business Journal” në listën e “40 nën 40 vjeç”. Greta ka emigruar nga Shqipëria kur ka qenë e re dhe ka hyrë një dekadë më parë në tregun e industrisë së mbulimit (çative).

“Ishte një veprim i guximshëm si një grua e re, një nënë e re dhe një emigrante e sapoardhur. Shkurt, rreth 10 vjet më vonë ne u bëmë një ndër kompanitë më të njohura të çative në zonën e MetroWest”, ka rrëfyer Bajrami për MetroWest Daily News, transmeton KultPlus.

31-vjeçarja shqiptare tha se nuk e kishte kuptuar që njerëzit po e nominonin.

“Nëse fitoj si gruaja e vitit në këtë industri, shpresoj të lejoj çdo vajzë e djalë të dëgjojë se është koha të heqim stereotipet, stigmat dhe çdo etiketim që vendosin njerëzit, sepse jemi në një kohë ku mund të jemi gjithçka duam. Industria e çative, them gjitmonë më shpëtoi fjalë për fjale jetën time, sepse ishte një industri që më priti krahëhapur”, vijon Greta.

Ideja për të hyrë në këtë industri lindi pasi pa një reklamë ku kërkohej një pozicion pune si përgjegjës i rregullimit të çative dhe shkoi të aplikojë. Punoi shumë në një industri që nuk kishte pasur lidhje më parë.

Greta rrëfen më tej se çdo natë shkonte në shtëpi dhe mësonte gjithnjë e më shumë rreth kësaj industrie derisa të fitonte vendin e saj, sepse ndërtimi është një industri e vështirë për të fituar. “Kam fituar respektin e kolegëve të mi, të ekipit. Nuk kishte rëndësi nëse isha vajza dhe ata burra. Në fund të ditës ne ishim të gjithë çatirregullues kur shihnim projektin”, vijon ajo.

Një kurs sipërmarrje në Vorceseter State University e ndihmoi shumë të arrinte suksesin e saj. Aktualisht Greta punon edhe në Bordin e Drejtorëve të Shkollës, Bordin e Këshillimit të Sipërmarrjes dhe është mentore e studentëve. / KultPlus.com

Komuna e Obiliqit subvencionon nënat vetushqyese dhe gratë në biznes

Posted on 21 Shtator, 202021 Shtator, 2020 by Kult Plus

Në kuadër të thirrjes publike të komunës së Obiliqit për subvencionim “Nënat vetushqyese dhe gratë në biznes“, Kryetari i Komunës së Obiliqit, Xhafer Gashi, me përfitueset e kësaj grant-skeme sot nënshkruan marrëveshjen për implementimin e projekteve dhe ndarjen e mjeteve financiare.

Nga kjo grant-skemë, përfituese janë 38 gra me biznese nga sfera të ndryshme; floktari, bletari, rrobaqepësi si dhe biznese të vogla dhe fillestare, duke përfshirë të gjitha komunitetet e komunës së Obiliqit, ndërsa shuma e financimit është e ndarë në dy lote: Loti 1 (startUp biznese të reja) nga 1,000.00€ deri në 1,500.00€ dhe Loti 2 (bizneset ekzituese mikro dhe të vogla me qarkullim deri në 2,000.00€) nga 1,000.00€ deri 2,500.00€.

Me këtë rast, Kryetari Gashi, ka uruar përfitueset e kësaj grant-skeme, njëkohësisht ka theksuar se: “Jam shumë i lumtur që Komuna e Obiliqit po implementon një grant-skeme të tillë në përkrahjen e nënave vetushqyese dhe grave në biznese, ku vlera e këtij granti është 50,000.00€, në kuadër të subvencioneve të komunës së Obiliqit dhe është realizuar në bashkëpunim me AZHR-Qendër, meqë rast falënderoj drejtoreshën e AZHR-së, znj.Mrika Gashi, për koordinimin dhe gatishmërinë e saj dhe ekipeve të AZHR-së, në implementimin e tërësishem sipas rregulloreve të përcaktuara në memorandumin e përbashkët.“

Po ashtu, Gashi, është shprehur se: “Përkrahja institucionale në fuqizimin e gruas në biznese dhe vendimarrje do të vazhdojë dhe se fokusi kyç i qeverisjes time mbetet mbështetja e secilës kategori të shoqërisë në ndryshimin e mirëqenies socio-ekonomike.“ / KultPlus.com

Krijohet kodi i veçantë për mbështetje të bizneseve të grave në Kosovë

Posted on 30 Korrik, 202030 Korrik, 2020 by Kult Plus

Është krijuar sot kodi i veçantë për mbështetje të bizneseve të grave në Kosovë me rishikim të buxhetit, shkruan KultPlus.

Vlera e ndarë për grante të dedikuara bizneseve të grave për pjesën e mbetur të vitit 2020 është 400,000 €.

Përmes këtij granti, synohet që të ju ndihmohet vajzave dhe grave në tejkalimin e situatës aktuale dhe në rritjen e promovimin e afarizmit të grave në të ardhmen.

Lajmin e ka bërë të ditur deputetja Mimoza Kusari-Lila e cila është shprehur e lumtur për kët ëfakt dhe ka falënderuar deputetet që mbështetën këtë propozim.

“E lumtur që sot arritëm ta krijojmë kodin e veçantë për mbështetje të bizneseve të grave në Kosovë me rishikimin e buxhetit.
Ky kod prej tash e tutje është në kuadër të Ministrisë së Tregtisë dhe Industrisë nën Agjencionin për promovim dhe mbështetje të bizneseve, kodi subvencione dhe grante.
Vlera e ndarë për grante të dedikuara bizneseve të grave për pjesën e mbetur të vitit 2020 është 400,000 €.
Falënderoj të gjithë deputetet që e mbështeten këtë propozim.

Për të gjitha gratë dhe vajzat në biznes, uroj e shpresoj që sadopak të arrijmë të ju ndihmojmë në tejkalim të situatës aktuale dhe në rritje e promovim të afarizmit tuaj në të ardhmen.

Nga pozita e deputetës dhe anëtares së Komisionit për Zhvillim Ekonomik, do ta mbikëqyrë nga afër zbatimin e këtij programi.”, ka shkruar Kusari-Lila. / KultPlus.com