Etiketë: halimi

Drejtoresha Halimi për ‘Etno Fest’: Ngjarje me rëndësi kulturore, përthekon lumturinë e shpërfaqur përmes artit në shumë dimensionalitetin e saj

Posted on by Kult Plus

Drejtoresha e Kulturës në Komunën e Prishtinës, Sibel Halimi, festivalin ‘Etno Fest’ e ka quajtur ngjarje me rëndësi kulturore ku sipas saj e vjetra bashkëjeton me të renë duke u ngritur çdo vit mbi vlera me të cilat individi reflekton për veten dhe shoqërinë.

Drejtoresha Halimi, përmes një shkrimi në rrjetin social “Facebook” ka thënë se edicioni i sivjetmë i “Etno Fest” përthekon lumturinë e shpërfaqur nëpërmjet artit në shumë dimensionalitetin e saj.

“Lumturia pa lirinë e individit është trajtë likuide që do t’i përshtatej dogmave të imponuara. Ndaj liria nderon trashëgiminë, të djeshmen duke i dhënë shtysë individit për të qenë i lumtur me veten dhe tjetrin në interaksion. Rrjedhimisht, lumturia përmban në thelbin e vet diversitetin dhe empatinë, si vlerat më të rëndësishme që bart kultura jonë në qenien e saj!”, është shprehur Drejtoresha Halimi./ KultPlus.com

Misteri i vrapimit

Posted on by Kult Plus

Poezi nga Sibel Halimi

Fëmijëri e fshehur
në skuta të rritës

Njeri i humbur, bosh
Në një moshë, shërim është kthimi në fëmijëri

Imazhi në katër dimensione
spërkatje pikash
të lojës me ujin, krijesën e vetes

Në kohë kuptimi merr trajtë,
rritemi
e vdesim nga harresa

Kujtesa gozhdë varur në
litarët
që mbajnë  trungun
me myjë jete

Me kohë kuptohen
Të gjitha, pos ikjes së shpejtë
E vrapimit tek ti
pandalshëm, pafundshëm/KultPlus.com

Drejtoresha Halimi në Ditën Ndërkombëtare të Letërsisë për Fëmijë: Hapëm dyert e imagjinatës duke lexuar letërsi së bashku me fëmijë

Posted on by Kult Plus

Për të shënuar Ditën Ndërkombëtare të Letërsisë për Fëmijë, drejtoresha e Kulturës në Komunën e Prishtinës, Sibel Halimi, sot ka zhvilluar një aktivitet të veçantë me fëmijët e Kopshtit “Zogjët” duke lexuar letërsi së bashku.

Në këtë aktivitet, drejtoresha Halimi ka thënë se me fëmijët diskutuan për përfitimet që sjell leximi në përgjithësi, duke konkluduar gjithashtu se përzgjedhja e asaj që lexohet është po aq e rëndësishme sa vetë të lexuarit.

“Në kuadër të Ditës Ndërkombëtare të Letërsisë për Fëmijë, hapem dyert e imagjinatës duke lexuar letërsi së bashku me fëmijtë.

Diskutuam për botën shumëngjyrshe që na ofron leximi duke konkluduar se aq sa leximi është me rëndësi se çfarë lexojmë!”, ka shkruar drejtoresha Halimi në facebook./ KultPlus.com

Drejtoresha Halimi takohet me skulptoren që e krijoi skulpturën ikonë ‘Këmbëkryq’ të Faik Rexhepit: Kënaqësi të takoj artistë që arritën të përkthejnë historinë në skulpturë

Posted on by Kult Plus

Drejtoresha e Kulturës në Komunën e Prishtinës, Sibel Halimi, sot ka takuar artisten Eliza Shala, krijuesen e skulpturës ikonë të protestuesit Faik Rexhepi “Këmbëkryq”, e cila është e vendosur në sheshin e Prishtinës.

Drejtoresha Halimi, përmes një shkrimi në rrjetin social facebook ka thënë se është kënaqësi takimi me një skulptore si Liza, e cila me vullnet të madh ka arritur të përkthej një ngjarje historike në një vepër arti.

“Kënaqësi të takoj vajzat si Liza, plot vullnet për të përkthyer historinë në skulpturë. Ikona e protestuesit Faik Rexhepi ‘Këmbëkryq’ i vendosur në sheshin e Prishtinës, është punuar nga mendja dhe duart e Lizës. Deri në punimin e saj të radhës, mirëutakofshim!”, ka shkruar Halimi./KultPlus.com

Halimi për peticionin e largimit të videos së Elia Zaharias: Dëshmon që artistët mund të bëjnë më shumë për të dënuar mendësi të tilla shoqërore

Posted on by Kult Plus

Drejtoresha e Kulturës në Komunën e Prishtinës, Sibel Halimi, ka reaguar lidhur me peticionin që kanë nënshkruar një numër i madh i aktorëve  për largimin e videos së aktores Zaharia dhe Leka Zogut, e cila është publikuar kohëve të fundit.

Përmes një shkrimi në facebook, ajo është shprehur se nënshkrimi i këtij peticioni prej 144 aktorëve dëshmon edhe një herë që artistët mund të bëjnë më shumë për të dënuar një mendësi të tillë shoqërore.

“Fatkeqësia e askujt nuk duhet të bëhet objekt talljeje e humori. Videoja e qarkulluar e aktores Elia Zaharia duke iu bërë gjyqi publik, e papranueshme dhe për keqardhje.

Ndaj, peticioni i nënshkruar nga më shumë se 144 aktorë e aktore për ta larguar videon nga rrjetet sociale, edhe njëherë na dëshmon që artistët mund të bëjnë më shumë për të dënuar një mendësi të tillë shoqërore”, ka shkruar Halimi në facebook./KultPlus.com

Sibel Halimi vjen me ‘Nje rrëfim tjetër për gratë’ në Kolegjin Universum

Posted on by Kult Plus

“Një rrëfim tjetër për gratë” është një diskutim me tematikë më ndryshe se zakonisht, i cili do të zhvillohet me drejtoreshën e kulturës në Komunën e Prishtinës, Sibel Halimi, në prag të festës së 8 Marsit- Ditës Ndërkombëtare të Gruas, shkruan KultPlus.

Njoftimin e ka bërë të ditur drejtoresha Halimi në Facebook, nga ku ka ftuar audiencën për pjesëmarrje në këtë takim të veçantë.

“Në prag të Ditës Ndërkombëtare të Grave, 8 Marsi, nesër do të zhvilloj një bashkëbisedim më ndryshe, “Një rrëfim tjetër për gratë”.

Ju ftoj të na bashkoheni!”, ka shkruar drejtoresha Halimi.

Ngjarja zhvillohet më 7 Mars, në ora 12:00, në Kampusin UNI-Prishtinë./ KultPlus.com

Arnim kohe

Posted on by Kult Plus

Poezi nga Sibel Halimi

Arnim kohe
Tani si thoni
foshnjën e sapo lindur
Si ta pagëzojmë?

Si ta veshim?
Ninullat për rritën e tij
ku t`i gjejmë
në cilin komb janë strukur sagat

dashuria në cilën parcelë toke varrosur

Tani si thoni
Çfarë t`i themi njeriut
cila ishte e kaluara e tij
një ecje në bosh
një fluturim mbi muret
e bien duke ndjekur fatin

Tani si thoni
Si ta pagëzojmë fëmijën e sapolindur?

Me emrin e cilës kohë?

Furtunë mbi kalë të bardhë

Posted on by Kult Plus

Poezi nga Sibel Halimi

Liria është ngre zvarrë
E as vetmia më nuk e
shpëton

Në anën e padukshme
qytete që zbrazen
e shtëpitë nuk e strehojnë më
njeriun

Ikje për diku
Pëshpëritet shpesh
Vrasja e kohës është kuptimi
Mbijetesë

Fytyra që transformohen
Për shpirtin që braktiset
e paketohet si mall
as nuk shitet e as nuk blihet

Toka sunduar nga mërzia
përbiron vrerin
njeriu vjellë mbi njeriun
Paqja reminishencë

 …Vetëm liria e shpëton njeriun/KultPlus.com

‘Kthimi në shtëpi’

Posted on by Kult Plus

Poezi nga Sibel Halimi

Njeriu im
kishe harruar që moti
kthimit në shtëpi nuk mund t`i
ikësh
Një ditë do të çliroheshe prej
thellësive të saj
kthyer në qoshkun
ku befas braktise veten
në kohën kur lartësia si turmë
zogjsh
të mashtronte nga lartë
Kthimi në shtëpi
është frika nga hapësira
që kundërmon ikje
mbuluar me këmishën bilur të bardhë
për jetën tënde të
pandreqshme
për ty që je fillikat
Pse u dashka të ktheheshe
në ideogramin e
pazgjidhshëm
të nëndetëses të oqeanit tënd
t’pafund?
Kthimi në shtëpi
ka kuptimin e shoshitjes së
skutave tua
mbyllur nën dry si dikur
gjyshja nusërinë e saj
ku fshehurazi kujtonte veten
e lirë
në netët pa gjumë
Kthimi në shtëpi
është lindja e rrita
e mospranisë tënde
e botës që zë fill
mbetur fëmijë përjetësisht
Kthimi në shtëpi
Je ti, njeriu im, duaje/KultPlus.com