instituti kombetar i trashegimise kulturore

Promovohet numri i parë i “Revistës Arkeologjike”

Posted on 28 Dhjetor, 202228 Dhjetor, 2022 by Kult Plus

Ministrja e Kulturës, Elva Margariti, promovoi sot, dy botime të Institutit Kombëtar të Trashëgimisë Kulturore.

Bëhet fjalë për numrin e parë të “Revistës Arkeologjike”, një botim që hedh dritë mbi punën e një prej sektorëve më të rëndësishëm në ruajtjen e trashëgimisë kulturore, që është Shërbimi Arkeologjik. Si dhe revistën “Monumentet”, në numrin e saj të 61-të, që është një dritare jo vetëm për njerëzit e fushës, që shkëmbejnë arritjet më të fundit me njëri-tjetrin, por edhe për studentët dhe një publik më të gjerë me interesa të posaçme për monumentet.

“Revista Arkeologjike” është rezultat i punës së Shërbimit Arkeologjik, falë punës së të cilit arrihet zbulimi dhe shpëtimi i shumë gjetjeve arkeologjike në të gjithë territorin e Shqipërisë dhe është e rëndësishme që ky aktivitet, zbulimet, dokumentimet, përfundimet të shkojnë edhe te publiku, jo vetëm ai i specializuar.

“Sa i përket “Monumenteve”, kjo revistë ka qenë një guidë në fushën e vet, falë drejtimit të prof. dr. Pirro Thomo dhe bashkëpunimit me emra të nderuar të trashëgimisë kulturore”, u shpreh ministrja.

“Mirënjohja për të gjithë bashkëpunëtorët e kësaj reviste, le të jetë një ftesë për më shumë pjesëmarrje në prezantimin e një pune të përbashkët në ruajtje të pasurisë sonë”, deklaroi Margariti gjatë eventit të mbajtur në sallën “Tefta Tashko Koço” të Ministrisë së Kulturës./atsh/ KultPlus.com

Inspektim në Urën e Kordhocës në Gjirokastër

Posted on 10 Nëntor, 202211 Nëntor, 2022 by Kult Plus

Specialistët e Institutit Kombëtar të Trashëgimisë Kulturore në bashkëpunim me Drejtorinë Rajonale të Trashëgimisë Kulturore Gjirokastër, realizuan sot inspektimin në terren të “Urës së Kordhocës” në Gjirokastër, e cila ka statusin Monument Kulture i Kategorisë I.

Ky inspektim u zhvillua në kuadër të identifikimit të problematikave dhe parandalimit të dëmtimeve të mëtejshme.

IKTK theksoi se për këtë urë në vitin 2018 janë realizuar ndërhyrje restauruese, që konsistonin ndër të tjera edhe në përforcimin strukturor të bazamentit të 2 prej këmbëve të urës.

Në vijim të raportimeve të banorëve të zonës pas tharjes së ujërave të lumin Drino dhe daljen në pah të strukturave të këmbëve të Urës së Kordhocës, ku njëra nga këmbët e urës (në të cilën nuk është ndërhyrë në fazën e parë) është zbuluar deri në kuotën e bazamentit të pilotave prej druri, duke sjellë rrezik në qëndrueshmërinë e saj.

“Krahas me identifikimin e gjendjes aktuale të konservimit, patologjive dhe dokumentimit fotografik të realizuar, ka nisur procesi i hartimit të projektit të restaurimit mbi problematikën e shfaqur, me qëllim parashikimin e ndërhyrjeve në këtë fazë të dytë për këtë objekt pasuri kulturore”, tha IKTK.

Ura e Kordhocës, e ngritur mbi lumin Drino rreth 4 km në juglindje të Gjirokastrës, dallohet për madhësinë dhe finesën e realizimit teknik.

Kjo urë kryente funksionin lidhës midis qytetit dhe fshatrave rreth Suhës. Ura është e ndërtuar me gurë të zinj ndërsa mbushja e saj është me gurë gëlqerorë.

Harqet e mëdhenj janë ndërtuar me rreshta dyfish gurësh në të cilat ruhen ganxhat metalike për mbërthimin e gurëve ballorë të harkut. /atsh /KultPlus.com

Digjitalizohen materialet e Arkivës Teknike të IKTK-së

Posted on 26 Shkurt, 202126 Shkurt, 2021 by Kult Plus

Materialet e Arkivës Teknike të Instituti Kombëtar të Trashëgimisë Kulturore (IKTK) së shpejti do të digjitalizohen, falë mbështetjes të qeverisë zvicerane dhe asistencës së zyrës së UNESCO-s në Venecia.

Lajmin e ka bërë të ditur ministrja e Kulturës, Elva Margariti e cila e cilëson këtë arkivë “gardiane” e një pasurie të jashtëzakonshme të trashëgimisë tonë kulturore.

“Për përmirësimin e shërbimit ndaj qytetarëve, qeveria shqiptare i ka mëshuar fort revolucionit digjital, i cili ka përfshirë çdo institucion, edhe ato që lidhen me kulturën”, shprehet Margariti.

Ajo thekson se materialet e shumta e me vlerë të madhe që mban ky arkivë duhet të dixhitalizohen jo vetëm në funksion të institucionet por dhe për të apasionuarit pas trashëgimisë, të cilët mund të gjejnë aty informacione që nga arkitektura deri tek artefaktet.

“Arkiva Teknike e IKTK është më e rëndësishmja në llojin e vet, një “gardiane” e një pasurie të jashtëzakonshme, lidhur me trashëgiminë tonë kulturore. Ajo ruan:

– rreth 4100 dosje teknike;

– rreth 47,700 filma dhe mikrofilma negativë;

– rreth 256,200 fotografi me ngjyra dhe bardh e zi

Të cilat duhet të digjitalizohen, jo vetëm në funksion të institucionit – IKTK-së, por edhe studiuesve, studentëve, të apasionionuarve pas trashëgimisë, që mund të gjejnë aty një informacion të bollshëm mbi mënyrën se si kanë ndërtuar shqiptarët, informacione mbi arkitekturën, artefakte, histori monumentesh, me një rëndësi të jashtëzakonshme, jo vetëm për historinë në vetvete, por edhe për restaurimin dhe rijetëzmin e një objekti të trashëgimisë kulturore”, tha Margariti.

Ministrja bërë të ditur se procesi i dixhitalizimit të këtyre materialeve do të nis së shpejti në një sistem të integruar përmes skanimit me cilësi të lartë.

“Falë mbështetjes së çmuar të qeverisë zvicerane, përmes përfaqësuesve të saj në Tiranë dhe me asistencën e Zyrës së UNESCO-s në Venecia, po arrijmë që të ndërmarrim këtë proces. Pas sigurimit të fondit (80 mijë dollarë) për sigurimin e pajisjeve të posaçme, do të nisë digjitalizimi i dokumentacionit dhe materialeve arkivore, në një sistem të integruar përmes skanimit me cilësi të lartë, katalogimit në databazë të personalizuar dhe ruajtjes në servera të posaçëm. Është një erë e re për këtë institucion dhe shpresoj që të përhapet edhe në institucionet e tjera kulturore”, përfundoi Margariti. /ata/ KultPlus.com