Një nga 5 fitueset e Çmimit “Eccellenza Donna International” për vitin 2020 është shpallur shkrimtarja shqiptare, presidente e Qendrës Pen për Shqipërinë, Entela Kasi.
Ky çmim i është dhënë nga Komuna e Aulla-s, në Toskanë, 5 grave nga e gjithë bota për kontributin e tyre në fushën e letërsisë dhe arteve. Ceremonia e ndarjes së Çmimeve së “Ekselencës në Itali dhe botë” do të mbahet në muajin nëntor në Komunën e Aulla-s.
“Për këto gra – thotë Marina Pratici – të cilat sjellin përsosmërinë e tyre në Itali dhe në botë, shkojnë urimet tona më të ngrohta”. / KultPlus.com
Kryeministri Edi Rama përkujtoi sot eksodin historik të shqiptarëve pas rënies së regjimit komunist.
Në videon e publikuar nga Kryeministri Rama, shfaqen pamjet e shqiptarëve 30 vjet më parë duke hyrë në ambasadat e huaja dhe në anijet që u nisën drejt Barit, Itali.
“Mirëmëngjes, 30 vjet nga eksodi historik i shqiptarëve, një kohë për të kuptuar çmimin e lirisë dhe dëshirën e zjarrtë të shpirtit shqiptar që u përball me diktaturën dhe luftoi për lirinë”, thekson Rama.
30 vjet më parë, 2 korrik 1990 mijëra vetë hyjnë në ambasadat e huaja në Tiranë, duke shënuar fillimin e ndryshimit politik në Shqipërinë komuniste. Ai që u quajt si eksodi i madh i shqiptarëve i dha goditjen e fundit regjimit komunist duke u hapur mijëra vetëve portën e lirisë./atsh/ KultPlus.com
Kryeministri australian, Scott Morrison, është ndërprerë gjatë një konference për media, nga një banor që i kishte kërkuar të largohej nga hapësira e barit afër shtëpisë së tij.
Morrison ishte në qytetin Googong duke folur për gazetarët në kohën kur banori i kishte bërtitur dhe u kishte kërkuar edhe gazetarëve të largoheshin nga oborri i tij.
“A mundeni secili të largoheni nga bari ju lutem”, kishte thënë ai, me kryeministrin që mirëkuptoi kërkesën. “Sigurisht, le të largohemi”, ka thënë kryeministri.
Burri më pas i kërkoi sërish këtë gjë gazetarëve duke marrë përkrahjen edhe të kryeministrit.
Pas largimit, palët u pajtuan dhe kryeministri vazhdoi fjalimin e tij.
Përballja e qeverisë së Morrisonit me pandeminë e koronavirusit ka rritur popullaritetin e tij te qytetarët. Shteti ka regjistruar 7240 raste pozitive e 102 vdekje.
Kulla e Pizës, një nga objektet më të njohura turistike të Italisë, është rihapur pas një pushimi tre mujor për shkak të masave për të frenuar përhapjen e koronavirusit.
“Kjo është një ditë e rëndësishme, pasi ne po hapim të gjithë këtë zonë”, tha Pierfrancesco Pacini, kreu i administratës së kësaj zone turistike.
Italia rihap nesër edhe Koloseun dhe Muzetë e Vatikanit.
Në Firence, muzeu ”Uffizi” dhe Galleria dell’Accademia, shtëpia e Davidit të Michaelangelo-s, janë gjithashtu të gatshme të mirëpresin përsëri vizitorët. /KultPlus.com
Një dysheme mozaike është zbuluar nën një vresht në veri të Italisë pas kërkimeve me dekada.
Anketuesit në komunën e Negrar di Valpolicella në veri të Veronës publikuan imazhe të pllakave të ruajtura mirë të varrosura disa metra nën tokë, transmeton rtv21.tv.
Sipas zyrtarëve, studiuesit gjetën së pari prova të një vile romake atje më shumë se një shekull më parë. Teknikët janë akoma duke gërmuar butësisht vendin për të parë shtrirjen e plotë të ndërtesës antike. Fotografitë e postuara në internet tregojnë mozaikun e pacenuar, si dhe themelet e vilës. Një shënim në webfaqen e komunës tha që gërmuesit më në fund e bënë zbulimin “pas dekadash përpjekjesh”.
Teknikët do të kenë nevojë për “burime të rëndësishme” për të përfunduar punën. Por autoritetet lokale janë zotuar të japin “të gjithë ndihmën e nevojshme” për të vazhduar me gërmimet. Pompei, qyteti romak i varrosur zyrtarisht u rihap për publikun të martën pas disa muajsh për shkak të pandemisë koronavirus. Akropoli i famshëm i Greqisë u rihap për vizitorët në fillim të këtij muaji./ KultPlus.com
Oferta vjen nga zona e Val di Sole, në Trentino Alto Adige të Italisë, si shenjë mirënjohje ndaj mjekëve dhe infermierëve që punuan gjatë pandemisë.
Ideja vjen nga operatorët turistikë dhe drejtuesit e strukturave pritëse.
“Të gjithë bënë pjesën e tyre, është momenti për t’i shpërblyer. Pas një periudhe me ngarkesë të madhe stresi dhe larg familjeve, sapo emergjenca të ketë kaluar, mund të shijojnë pushimin në vende që frymëzojnë paqe dhe relaks, në male, për të kuruar dhe rigjeneruar trupin dhe shpirtin”, thuhet në deklaratën e operatorëve turistikë.
Më konkretisht oferta parashikon qëndrimin për tre netë në një nga hotelet e Val di Sole trentina, deri në momentin e ezaurimit të vendeve. Për të marrë pjesë në këtë nismë, mjafton që të dërgohet një letër nga spitalet Covid, për të mundësuar programimin. / KultPlus.com
Është bërë e ditur se shkrimtari dhe përkthyesi nga shqipja në italisht, Julian Zhara, është vlerësuar me çmimin “Lermontov”, për aktivitetin e tij poetik në edicionin XVIII të Festivalit Kombëtar të Poezisë “Citta di Sant’ Anastasia”.
Duhet theksuar se çmimi “Lermontov” u jepet personaliteteve që në fushën poetike dallohen për ndjeshmëri të veçantë në përzierjen dhe sintezën e gjuhëve e kulturave të ndryshme, duke pararendur kritere artistike të reja, ende të pazbuluara. Poeti është zhvendosur në Itali në vitin 1999.
Poezia e Julian Zharës është kënga e vendeve që lëmë pas, e boshllëkut që mbush çdo tjetër vend që banojmë. “Shqipëria bëhet vendi që çdonjëri humb, Venezia qyteti që çdonjëri zgjedh duke humbur rrënjët, e vetmja mënyrë për të dialoguar me çdo kohë zë fill nga plaga e brendshme”.
Vlen të cekët se Julian Zhara është poet, performer, organizues eventesh kulturore, u lind në Durrës më 1986. Transferohet në Itali më 1999. Ai ka publikuar dy vëllime me poezi In apnea (Granviale, 2009), Vera deve morire (Botuar nga Interlinea për Lyra giovani 2018.
Po ashtu, më 2014 bashkëpunon në Generation Y, projekt i spoken music në MAXXI dhe organizon festivalin e poezisë orale dhe muzikës digjitale Andata e Ritorno./ Albinfo.ch / KultPlus.com
Akullorja e së ardhmes është këtu dhe shërbehet me gypa të gjatë plastike përmes një vrimë në një mur pleksiglasi.
Nga ana tjetër e tubave, Paolo Costantini ka veshur një helmetë mbrojtëse, doreza plastike dhe një maskë.
“Ju mund të harroni se si ishte më parë Covid-19. Ne duhet të rikrijojmë plotësisht zanatin tonë”, thotë pastiçeri specialist për akulloret.
Blerësit kanë matur temperaturat e tyre përmes një skaneri termik në derë dhe shirita të zinj dhe të verdhë në dysheme tregojnë distancën e kërkuar që duhet të mbajnë nga të tjerët.
Italia është krenare për traditën e saj të akullores.
Në kohë normale, sapo ngrohet moti, njerëzit grumbullohen në këto dyqane. Por, në ditët e sotme, me të gjithë materialin mbrojtës, kjo traditë ka filluar të duket më shumë si një vizitë në spital.
“Ne përpiqemi të mbrojmë sa më shumë stafin dhe klientët tanë”, thotë Costantini.
Duke filluar nga sot italianët kanë rigjetur një masë lirie. Tani ata mund të shkojnë në shëtitje ose të stërviten jashtë, ndërsa baret, restorantet dhe dyqanet e akulloreve janë rihapur. /atsh/ KultPlus.com
Libraria Acqua Alta gjendet në Venedik, mirëpo ajo çfarë e bënë më të veçantë këtë librari është fakti se për të hyrë aty janë dy qasje, njëra nga toka dhe tjetra nga një ndër kanalet e shumta që gjendet në Venedik, shkruan KultPlus.
Librat që gjendet aty janë të ngritura të gjitha pesëmbëdhjetë centimetra nga dyshemeja në mënyrë që të mbrohen nga uji dhe shumë prej tyre janë vendosur në vaska, barka ose në gondola karakteristike. / KultPlus.com
Banorët e Montaldo Torinese, një fshat në rajonin verior të Piemontes në Itali, deri më tani janë kursyer nga koronavirusi, duke bërë që disa të besojnë se mbrohen nga “uji i mrekullueshëm” që, sipas legjendës, shëroi trupat e Napoleon Bonapartit nga pneumonia.
Montaldo Torinese shtrihet rreth 11 milje (19 km) nga Torino, kryeqyteti rajonal ku deri të shtunën 3,658 njerëz ishin të infektuar nga virusi. Përtej Piemontes, rajoni i katërt i prekur më keq në Itali, pati 8.206 raste që nga e diela.
Uji nga pusi në Montaldo Torinese, një fshat me 720 banorë, besohet se ka ndihmuar në kurimin e trupave të ushtrisë Napoleonit, të cilët kishin ngritur kampin në fshat në qershor të 1800 para një beteje në Marengo.
“Sipas historisë gjeneralët e Napoleonit ishin të sëmurë me pneumoni”, tha Sergio Gaiotti, kryetari i Montaldo Torinese, për “The Guardian”. “Dhe falë ajrit të pastër dhe fshatit të pacenuar, por edhe me ujin e pusit, ata u shëruan. Gjatë asaj periudhe, uji me siguri ka ndihmuar. Por sot, pusi është mbyllur dhe uji i tij përdoret vetëm për të ujitur fushat. Ju nuk mund të pini prej tij”. Napoleoni dhe trupat e tij më pas shkuan për të fituar betejën kundër forcave austriake në Marengo.
Montaldo Torinese ka një popullsi të madhe të moshuar, por është gjithashtu shtëpi e familjeve të reja, me njerëz që vijnë në Torino për punë. Gaiotti tha se arsyet më të besueshme për mungesën e koronavirusit mund të jetë ajri i pastër dhe mënyra e jetesës së shëndetshme, si dhe përpjekjet e tij për të paralajmëruar njerëzit për rreziqet e koronavirusit dhe shpërndarjen e maskave të fytyrës për të gjitha familjet.
“Pothuajse nuk ka asnjë industri këtu, ajo përbëhet kryesisht nga artizanë”, tha ai. “Që nga fillimi, kam vënë njoftime në kutitë e letrave të njerëzve që rendisnin gjërat që duhej të bënin për të qëndruar të sigurt, të tilla si larja e duarve rregullisht dhe shmangia e kontaktit të drejtpërdrejtë, dhe postova njoftime zyrtare në faqen tonë të internetit. Ne ishim qyteti i parë në zonë që shpërndanim maska për të gjitha familjet, dhe ne akoma po shpërndajmë maska”, deklaroi ai. /KultPlus.com
Në nëntor udhëhoqi një ndër ekipet e kërkim-shpëtimit për viktimat e tërmetit në Shqipëri.
Pino di Gioia, shef i zjarrfikësve në Bari, nuk e fsheh mallëngjimin teksa sheh mjekët shqiptarë që i vijnë në ndihmë popullit të tij.
“Faleminderit vëllezër shqiptarë për ndihmën tuaj, as ne nuk do ta harrojmë” shkruan di Gioia teksa poston videon e nisjes se stafit mjekësor drejt Bergamos, zonës më të nxehtë në Itali presa i përket të prekurve dhe viktimave nga COVID-19.
Postimi i zjarrfikësit u komentua nga italiane e shqiptare të cilët e quajtën “karma”. Express / KultPlus.com
Një ditë pasi qeveria shqiptare dërgoi në Bergamo një skuadër prej 30 mjekësh e infermierësh për t’ju bashkuar bluzave të bardha në vijën e parë të luftës kundër COVID-19, vjen një reagim nga Kryeministri i Italisë Giuseppe Conte, me anë të një shkrimi në Facebook ka falenderuar kryeministrin e Shqipërisë Edi Rama, si dhe 30 mjekët e infermierët që kanë mbërritur në Itali për të ndihmuar më përballimin e situatës me CoVid-19.
Conte ka shpërndarë edhe një video të kryeministri Rama teksa përcillte nga Rinasi ekipin me 30 mjekë e infermierë ku shprehej “pavarësisht se nuk jemi të pasur, shqiptarët nuk e harrojnë mikun në vështirësi”.
“E di se 30 mjekë nuk e përmbysin raportin. Por di që edhe andej është shtëpia jonë që ku Italia, motrat dhe vëllezërit italianë na pritën kur Shqipëria digjej nga dhimbjet e papërshkrueshme. Ne po luftojmë me të njëjtin armik të padukshëm dhe mjetet nuk janë pa kufij. Por nuk mund të mbajmë forcat rezerva kur në Itali po kurohen dhe shqiptarë të plagosur nga armiku dhe që kanë nevojë për ndihmë. Është e vërtetë që sot të gjithë janë mbyllur në kufijtë e tyre. Mbase pikërisht pse nuk jemi të pasur dhe nuk na ka lënë kujtesa akoma, ti tregojmë Italisë se nuk e harrojmë mikun në vështirësi. Kjo është një luftë ku askush nuk fiton dot I vetëm. Dhe ju të dashur anëtarë dhe anëtare të një misioni kurajoz po niseni për një luftë që është edhe e jona. Sot jemi të gjithë italianë. Italia duhet dhe do ta fitojë luftën edhe për ne edhe për gjithë Europën e botën. Zoti ju bekoftë të gjithëve.”- tha Rama dje.
Italia po kalon një periudhë tepër të zymtë nga pandemia koronavirus.
889 viktima u shënuan gjatë 24 orëve të fundit, shifër që mbetet tepër e lartë me një përmirësim të lehtë krahasuar me një ditë më parë.
Në total, mbi 10 mijë persona kanë humbur jetën nga koronavirusi, një rekord tepër tragjik për vendin fqinj. Qeveria italiane ka shtuar dhe kontrollet në kufijtë e saj, raporton Top-Channel.
Çdokush që mbërrin në vend duhet të specifikojë arsyet e vizitës dhe banesën ku do të qëndrojë, sigurisht në izolim.
Ndërkohë, vazhdojnë problemet në sistemin shëndetësor për shkak të mbipopullimit nga të infektuarit. / KultPlus.com
Qytetet kodrinore të Toskanës janë krijuar në kohë të turbullta ndërsa sot rrugët e tyre mesjetare, kishat e mbushura me afreske dhe pejsazhi i mrekullueshëm i fshatrave toskanez janë trashëgimia e këtyre rivaliteteve
Për të nisur një udhëtim në “parajsën” tokësore italiane merr shkas në Pienza, një trashëgimi kulturore e mbrojtur nga UNESCO, me dizajnin e mrekullueshëm mesjetar që i detyrohet Papa Piu II. Katedralja dhe rezidenca e vjetër papale në Pallatin Piccolomini qëndrojnë kryelarta në sheshin kryesor të qendrës. Një tjetër vend miqësor është edhe Montepulciano, i njohur për verën Vino Nobile, prodhimin e mjaltit, djathit dhe pastave. Arkitektura gotike është hijeshuar nga ajo e Rilindjes, dhe kjo vihet re në Biagio di San Tempio. E ndërtuar në shekullin e 16 nga një gur i artë i zbehtë, kjo kishë është pasqyrimi i përsosur i idealeve të gjeometrisë së Rilindjes.
Ngritur në një derdhje vullkanike, rrethuar nga gryka nga të tre anët, Pitigliano duket sikur është rritur e jo ndërtuar. Shkallët gjarpëruese zhduken në kthesa dhe rrugicat me kalldrëm qëndrojnë joshëse nën harqe. Fshati gjithashtu është quajtur “Jeruzalemi i vogël” për shkak se dikur ka qënë strehë e komunitetit më të madh hebre në Itali. Ndërtesat e vjetra të lagjies mbijetojnë ende, përfshirë këtu edhe një sinagog i mbuluar me luks. Rajoni toskanez meriton një udhëtim më vete, për të parë mrekullitë që e përfshijnë atë, duke mos lënë në harresë Firencen, qytetin e Rilindjes, dhe qendrat historike të saj, të cilat tërheqin mijëra vizitorë cdo vit.
Verë pa pesticide në Toskana
Në Toskanë të Italisë, prodhuesit e verës po heqin dorë nga përdorimi i pesticideve, duke e vendosur rajonin në qendër të skenës biodinamike të Italisë. Bujqësia biodinamike përjashton kimikatet dhe mbështetet tek përdorimi i plehrave natyrore dhe tek cikli i hënës. Në zonat e fshatrave të Toskanës në Itali shihen kodra të shumta të gjelbëruara buzë luginave mjaft të hijshme. Toskana është gjithashtu rajoni ku prodhohen disa prej verërave më të mira të Italisë. Por kjo industri shekullore po fillon të ndryshojë disa nga rregullat e saj. Prodhuesit e verës po heqin dorë nga pesticidet për të përqafuar një mënyrë biodinamike të zhvillimit të bujqësisë. Vreshti La Maliosa në Mançano është një sapo ka hyrë në skenën biodinamike. Rrushi në të rritet mes luleve si Calendula dhe Phacelia, ndërsa insektet kanë përreth një mjedis shumë të përshtatshëm. Varietetet e rrushit Alicante dhe Ciliegiolo lulëzojnë këtu pa ndihmën e asnjë pike pesticidesh. Pronarja e La Maliosa-s, Antonella Manuli është një sipërmarrëse nga Milano. Ajo hyri në botën e verës biodinamike në vitin 2005, me blerjen e këtij vreshti dikur të braktisur. “Toskana është veçanërisht e përshtatshme për vreshtari biodinamike, sidomos për shkak të relievit së terrenit. Me gjithë këto kodra që ndahen në ngastra të vogla, krenaria e këtij rajoni nuk mund të jetë bujqësia intensive. Në fakt, lloj i bujqësisë që ne zhvillojmë ruan më së miri bukurinë e peisazhit.\” Zonja Manuli punësoi specialistin e aftë të verave, Enrico Bachechi, për t’u kujdesur për vreshtin. Sipas zotit Bachechi, vreshtaria moderne bën gabimin e të konsideruarit natyrën si armikun e saj.”Është një betejë e pafund kundër barërave të këqija, insekteve, kërpudhave, bakterieve. Kjo është një betejë e humbur që në nisje. Prandaj, arrihet në abuzim me kimikatet, të cilat grumbullohen mbi tokë, duke ndotur burimet ujore, e duke e bërë punën jashtëzakonisht të vështirë për vreshtarët. Në bujqësinë biodinamike, ne kemi marrë një qëndrim të kundërt. Në fakt, baza e saj është bashkëjetesa e të gjitha qenieve të gjalla\”. Me anë të vreshtarisë biodinamike prodhuesit e verës përpiqen të krijojnë harmoni në vreshtat e tyre, dhe luftojnë barërat e këqija duke mbjellë më shumë lule dhe duke i përdorur ato si pleh natyror, duke trajtuar tokën me përgatitje biodinamike, dhe duke ndjekur ciklet e hënës. Pak ditë pas natës me hënën e plotë më të shndritur të vitit, zoti Bachechi spërkat vreshtin me diçka të quajtur \”Preparati 500\”, një përzierje e veçantë plehu organik lope, i mbajtur brenda një briri dhe i groposur gjatë dimrit. “Preparati 500” është pleh, jo pesticid. Ithtarët e biodinamikës ngulmojnë se kjo e bën tokën të pasur me minerale, duke lejuar që rrushi të rritet i shëndetshëm, ndërkohë që nuk vret insektet dhe parazitët. Kundër tyre vreshtarët biodinamikë kërkojnë mënyra për të gjetur grabitqarët e duhur, ose – për të forcuar rezistencën e vreshtave – përdorin përzierje bimore që mund të krahasohen me antibiotikë natyrorë. Një diçka e ndërmjetme midis shkencës dhe filozofisë, bujqësia biodinamike mbështetet në parimet e vendosura nga Rudolph Steiner, një filozof austriak i fundit të shekullit 19-të. Vera biodinamike në përputhje me udhëzimet e Steinerit, vlerësohet nga një kompani certifikuese ndërkombëtare, e quajtur Demeter. Toskana nuk jetonë vetëm me të kaluarën, por është më shumë se kurrë në kërkim të së ardhmes, falë historisë dhe veçorisë së saj, për të përmballuar sfidat e shoqërisë së globalizuar. Këtu do të gjeni qendra të rëndësishme industriale dhe teknologjike ndër të cilat mund të veçojmë sektorët:
Modë, design, tekstile dhe lëkurë
Këtu kanë lindur dhe janë selitë më të mëdha të shtëpive të modës, duke filluar nga Gucci, Ferragamo, Patrizia Pepe. Përveç emrave më të famshëm në fushën e modes ky territor është i pasur me shumë kompani që prodhojnë produkte luksoze dhe zejtare për “l’alta moda”. Një rëndësie të veçantë ka përpunimi dhe punimi i lëkurës (Toskana prodhon 80% të asaj evropiane) dhe industria tekstile.
Gastronomia dhe Eno-gastronomia
Bujqësia dhe blegtoria janë ende me rëndësi të madhe sot, duke patur parasysh cilësinë e produkteve që ofron territori. Toskana është rajoni i parë në Evropë që ka miratuar një ligj të veçantë që ndalon kultivimin dhe prodhimin e organizmave të modifikuar gjenetikisht dhe konsumin e tyre. Lidhur me vajin e ullirit ekstra të virgjër është për të raportuar prania e 5 DOP (Markë me Origjinë të Mbrojtur) (Chianti Classico, Colli Fiorentini, Lucca , Siena dhe Tuscia). Mbi verën mund të theksojmë rëndësinë globale të verërave toskane që numërojnë më shumë se 6 lloje DOCG – Carmignano ( Prato Province ) , Brunello di Montalcino , Chianti ( me 8 nën- zonat e saj ) , Morellino di Scansano, Vernaccia di San Gimignano , Vino Nobile di Montepulciano – dhe 34 tipe DOC ( Markë me Origjinë të Kontrolluar). E njohur në të gjithë botën është Puroja toskane, e prodhuar me llojin e duhanit Kentaki në Val di Chiana dhe në Valtiberina toscana.
Hi tech dhe Inovacion
Sektori i inovacionit në teknologji është gjithnjë duke u zgjeruar, përmendim këtu kompanitë që operojnë në sektorin e industris hapsinore si SELEX ES, kompanitë që marrin pjesë në projektet hapësinore evropiane, amerikane , ruse si Kaiser Italia, dhe shumë SME-të, universitetet e qendra kërkimore që punojnë me këto kompani.
Turizmi
Çdo vit, rajoni ka numëron rreth 48 milion vizitorë, të cilët akomodohen në më shumë se rreth 12,200 struktura hotelerike, kampingje dhe agriturizme. Sektori i turizmit punëson pothuajse 70.000 persona, duke zënë 8 % të PBB-së rajonal dhe gjeneron 9 miliard euro në vit. Artizanati ( argjend dhe ar, qeramikë e mobilje druri, qelq dhe këpucë). Artizanati toskan është i njohur në të gjithë botën. Është një sektor i rëndësishëm ekonomik, ku operojnë me shumë se 33.000 kompani dhe punojnë më shumë se 177.000 persona. Cilësia dhe vlera e produkteve toskane është vërtetuar dhe nga numri i lartë i eksporteve drejtë USA, Rusia, Kina dhe vendeve aziatike.
Mermeri dhe guri
Toskana ka qenë gjithmonë lider në industrinë ndërkombëtare të mermerit. Në toskanë gjenden sasi të mëdha mermeri dhe guri me vlera të madhe historike të përdorura në shumë prej veprave të artit dhe arkitekturës toskane. Mermeri i Apuanës është materiali më i vjetër aktualisht në treg, i përdorur tashmë për veprat e mëdha romake. Çdo vit nxjerren rreth 2 milionë tonë mermer në blloqe për më shumë se 100 kompani të cilat ofrojnë punësim për 1.216 persona; në procesin e përpunimit veprojnë më shumë se 1.100 kompani dhe punojnë rreth 6.000 persona. /Albert Vataj /KultPlus.com
Italia është prekur më shumë se çdo vend tjetër i Europës nga koronavirusi.
Bilanci i vdekjeve dhe infektimeve atje shtohet dita-ditës, e pavarësisht përpjekjeve të tyre të lavdërueshme dhe vetëmohimit, mjekë e infermierë shpeshherë e gjejnë veten në situatën e dëshpëruar që nuk arrijnë dot t`i ndihmojnë ashtu siç do të donin pacientët e goditur prej koronavirusit.
Një ilustrim të qartë të gjendjes e bëri infermierja Maria Cristina Settembrese, e cila punon prej më shumë se një dekade në spitalin San Paolo të Milanos. Që prej shpërthimit të epidemisë së koronavirusit, ajo ka qenë në krye të detyrës. Maria tregon episodin e dhimbshëm që nuk i shkulet nga mendja.
“Dërguam në reanimacion një 42 vjecar. Ndërsa më shtrëngonte dorën, më lutej,”Më thoni që do të zgjohem përsëri, kam dy vajza të vogla në shtëpi”. Maska ime u mbush me lot”, rrëfeu infermierja.
Ajo tregoi më tej sesi 15 shtretërit me ventilim të spitalit janë zënë të gjithë nga pacientë me koronavirus. Moshat e tyre nisin nga 48 vjeç e lart.
“Në 30 vjet punë, nuk jam ndeshur kurrë me një situatë të tillë”, shprehet ajo.
“Pak herë kam qarë gjatë punës time, por tani më ndodh përditë sidomos kur shoh të shkruar: JKR – Jo Kandidat për Reanimacion! Kur të përfundojë e gjithë kjo, dua të shkoj në Marsa Alam, pranë detit të harroj gjithçka”, thotë infermierja.
Në Bergamo, vdiq nga koronavirusi një 46 vjecar, Diego Bianco, i cili ishte punonjës teknik i shërbimit të urgjencës. Edhe punonjës të tjerë kishin ndjerë shqetësime e kanë qëndruar në shtëpi. Tch / KultPlus.com
Numri i vdekjeve në Itali, nga sëmundja pandemike Coronavirus, ka arritur në 1000 dhe numri i rasteve të njohura me virus është rritur në gjithësej 15,113.
Kështu kanë bërë të ditur mediat e huaja nga zonat italiane, njofton Klan Kosova. /KultPlus.com
Mes shumë historive të solidaritetit në këto javë të vështira për Italinë e prekur nga koronavirusi, është edhe një që ka tërhequr vëmendjen edhe të kreut të Rajonit të Ligurias.
Është historia e një shqiptari i cili quhet Albi Albino, kamarier në hotelin Bel Sit, në Alassio, që është në karantinë pasi një nga klientët, një grua 72-vjeçare, rezultoi pozitive me koronavirus.
Albino ka qëndruar gjatë gjithë këtyre ditëve në shërbim të të moshuarve që po qëndrojnë në hotel. Angazhimi dhe bujaria e të riut shqiptar kanë bërë që kreu i Rajonit të Ligurias, Giovanni Toti t’i kushtojë një postim në Facebook, ku e falenderon për punën që po kryen.
“Ai është Albi Albino, një djalë shqiptar që po ndihmon aty ku ka më shumë nevojë, në hotelin e Alassios. Nga kamarier ka zgjedhur që të bëhet ndihmës dhe mbi të gjitha mik i shumë njerëzve që janë detyruar të qëndrojnë në karantinë, një pikë referimi në këtë moment delikat. Një falenderim i veçantë shkon për këtë djalë që ka treguar forcë, guxim dhe vendosmëri tipike të vendasve. Faleminderit Albi, do të mundohemi që të marrësh shtetësinë italiane që aq shumë e dëshiron. Sepse ti je njëri prej nesh”. Insajderi / KultPlus.com
Policia financiare e Italisë janë duke i hetuar 20 persona për shitje të maskave, dorezave dhe dezinfektuesve kirurgjikë me çmime astronomike, duke përfituar nga frika që ka kapluar qytetarët e Italisë pas përhapjes së koronavirusit të ri.
Pakoja komplete – një maskë, doreza, një ballik, dezinfektues dhe një mbulesë për guacë tualeti – mund të kushtojë deri në 5 mijë euro. Vetëm maskat, të cilat shiten në tregun me pakicë për 1.50 euro, po shiten online për 1,500 euro copa, ka raportuar “wantedinmilan”.
Shitësit e këtyre produkteve po i sigurojnë blerësit potencialë se pajisjet mjekësore do t’i mbrojnë ata nga infeksioni me koronavirus.
20 personat të cilët po hetohen nga policia përfshijnë sipërmarrës, qytetarë privatë e madje edhe një punonjës shëndetësor, në rajonet Liguria, Lombardy, Marche, Campania dhe Piemonte.
Ata po hetohen nën dyshimin e mashtrimit komercial dhe mund të dënohen me burgim deri në dy vjet.
Më herët gjatë javës, zëvendëskryeprokurorja e Milanos, Tiziana Siciliano, kishte konfirmuar nisjen e hetimeve për rastet e rritjes së çmimeve të këtyre pajisjeve.
“Kemi vendosur të hapim hetim pas raportimeve në media për çmime të çmendura të këtyre produkteve (maska dhe gjele) në uebfaqe online dy ditëve të fundit”, kishte thënë për Reutersin, Siciliano.
“Çmimet e maskave online janë rritur nga një cent në 10 euro për copë dhe një shishe 1-litërshe e dezinfektuesit që javën e kaluar shitej për 7 euro, tani shitet për 39 euro”, tha të martën Siciliano. Koha.net /KultPlus.com
Diaspora shqiptare në Itali sot feston Ditë e Pavarësisë së Kosovës.
MPJD ka bërë të ditur se në bashkëpunim me Shoqatën Kulturore “Bashkimi Kombëtar”, sot, më 15 shkurt 2020, në Bassano del Grappa të Italisë do të mbajë aktivitetin me program kulturor dhe artistik me këngë, valle dhe poezi nga nxënësit e shkollës shqipe në Bassano të Italisë, për të shënuar 17 Shkurtin, Ditën e Pavarësisë së Kosovës, shkruan albinfo.ch.
“Festa e pavarësisë” është një projekt i rëndësishëm dhe në frymën organizative të ministrisë, me anë të cilit vlerësohet roli dhe kontributi i diasporës shqiptare në Itali, në ruajtjen e vlerave të trashëguara nga atdheu i tyre, si dhe mbahet gjallë fryma e atdhedashurisë, duke kremtuar festat e rëndësishme, siç është 17 Shkurti. /KultPlus.com
Mediat italiane kanë bërë të ditur se 9 komuna arbëreshe në Itali kanë nënshkruar memorandum bashkëpunimi për ruajtjen e kulturës dhe identitetit arbëresh, transmeton albinfo.ch, shkruan KultPlus.com
Kryetari i Bashkisë së Casalvecchios, Noe Andreano, thotë se është e rëndësishme ruajtja e identitetit të origjinës si dhe vazhdimësia e gjuhës.
“Për të realizuar këtë duhet të fillojmë me më të vegjëlit, me fëmijët”, tha ai. “Por të gjithë duhet të përfshihen në këtë nismë për ruajtjen e kulturës dhe traditës”.
Po ashtu, në konferencën e mbajtur me këtë rast u fol edhe për Strategjinë Kombëtare për Diasporën dhe Ministrinë e dedikuar për Diasporën që i shikon emigrantët, edhe ata historikë, si një pasuri kombëtare.
Studentët shqiptarë të arkitekturës në Itali prezantuan sot përfundimet e studimit të tyre të realizuar pak muaj më parë në disa nga monumentet kulturore shqiptare, njofton Ministri i Shtetit dhe Diasporës në Shqipëri, Pandeli Majko, shkruan KultPlus.com
“Përfundimet e studimit u prezantuan sot gjatë një takimi të organizuar nga Organizata Ndërkombëtare për Migracionin “IOM”, ku mori pjesë edhe ministri i Shtetit për Diasporën. Në fjalën e tij ministri Majko vlerësoi kontributin e të rinjve për përfshirjen në projekte të tilla në dobi të vendit të origjinës së tyre, pasi si kurrë më parë Shqipëria ka nevojë për njerëzit e saj dijet dhe eksperiencën tyre”, ka shkruar ndër të tjera në Facebook.
“Kjo nismë është një shembull i përsosur për ndërtimin e lidhjeve, shkëmbimin e informacionit dhe përvojave të Diasporës së kualifikuar shqiptare” u shpreh më tej ministri.
Studiuesit e rinj, pjesë e projektit “Diaspora si një burim për ruajtjen dhe përmirësimin e monumenteve kulturore më pak të njohura në Shqipëri” kanë mbaruar studimet e tyre në Fakultetin e Arkitekturës të Universitetit të Firences, si pjesë e skemës së Fellowship-it të Programit të “IOM”, ata kryen një studim për monumentet kulturore shqiptare në pesë fshatra në Përmet në fshatin Bënjë, Leusë, Kosinë, në fshatin malor të Razmës, Shkodër dhe fshatin bregdetar të Zvërnecit në Vlorë.
Poeti i shquar kosovar Lulzim Tafa do të qëndrojë në Itali si i ftuar nderi në Festivalin Ndërkombëtar të Poezisë, që do mbahet për katër ditë me radhë, nga 25-28 tetor, në Taranto të Italisë, përcjellë KultPlus.
Në këtë festival Tafa do të nderohet me çmimin kryesor të festivalit,
Çmimin e madh “Neruda 2019”.
Festivali që organizohet nga Asociacioni Kulturor Italian për
ndërlidhje kulturore me botën, ka një traditë shumëvjeçare dhe është ndër
festivalet më të njohura të poezisë në Itali.
Në këtë ngjarje të madhe ndërkombëtare që bëhet në nderim të
njërit prej poetëve më të mëdhenj të botës të shekullit XX, Pablo Neruda, do të
marrin pjesë emra të mëdhenj të poezisë nga shumë vende të botës.
Poeti Lulzim Tafa është bërë i njohur për lexuesit e poezisë në
Itali me librin “La Cronica di una santa Guerra”.
Çmimi “Neruda 2019” i shtohet listës së gjatë të çmimeve prestigjioze ndërkombëtare të poezisë që Tafa i ka fituar ndër vite. / KultPlus.com
Në Itali po zhvillon punimet “Java Arbëreshe” në edicionin e saj të tretë të organizuar nga “Instituti i Librit dhe i Promocionit”, shkruan KultPlus.com
“Më 16-26 tetor 2019, në San Giorgio Albanese (Mbuzat) në Itali po zhvillon punimet “Java Arbëreshe”. Edicioni i tretë i saj po mbahet në nder të Jul Varibobës me 15 piktorë të karrierës e studentë të “Universitetit të Arteve”, organizuar nga “Instituti i Librit dhe i Promocionit” dhe mbështetur nga Komuna e San Giorgio Albanese në Itali”, thuhet në njoftimin e Fondit Shqiptar për Zhvillimin e Diasporës.
Më 5 tetor, Ambasada e Shqipërisë në Romë qëndron hapur për t’u mundësuar të gjitha shoqatave që kanë paraqitur kërkesë të tërheqin librat e mbërritur për shkollat shqipe, shkruan KultPlus.com
Romë, 30 shtator 2019 – Abetare, Fletore pune, Gjuha shqipe 2 dhe Gjuha shqipe 3. Rreth 4 mijë libra kanë mbërritur në Ambasadën e Shqipërisë nga Qendra e Botimeve për Diasporën për të përmbushur kërkesat e shkollave të gjuhës shqipe që shoqatat kanë hapur në të katër anët e Italisë.
Sasia e librave përkon me kërkesat që shoqatat kanë paraqitur në qershor pas thirrjes së Ambasadës që u kërkoi të jepnin numrin e nxënësve që mendonin se do të ndiqnin këtë vit shkollor të ndarë sipas niveleve.
“Thirrjes sonë iu përgjigjën mëse 50 shoqata që kanë hapur po aq shkolla nga veriu në jug të Italisë, dhe nga Tirana kanë ardhur në Ambasadë sasi librash që përmbushin plotësisht kërkesat e tyre” thotë Ledia Mirakaj, Sekretare e Parë në Ambasadën e Shqipërisë në Romë për Shqiptariiitalisë.com.
E për shoqatat që kanë paraqitur kërkesë për libra së fundi, sepse janë të reja apo sepse vetëm tani kanë marrë vendimin e hapjes së shkollës? “Po mbledhim edhe kërkesat e tyre – vazhdon Mirakaj – Do të shohim nëse shoqatat që kanë bërë kërkesë në qershor korrigjojnë në të metë sasitë e kërkuar dhe nëse na mbeten libra, do t’ua shpërndajmë shoqatave nga të cilat po marrim kërkesa këto ditë”.
Librat janë falas për shkollat, por në pamundësi për t’ua nisur secilës prej tyre, Ambasada fton të gjithë të interesuarit të marrin takim e të vijnë t’i tërheqin.
“Duke ditur që shumë shoqata mund të kenë vështirësi të vijnë në Romë edhe për faktin e thjeshtë që përbëhen nga persona që gjatë javës punojnë, Ambasada do të mbahet hapur edhe ditën e shtunë, 5 tetor, në mënyrë që kush të dëshirojë të vijë atë ditë për të tërhequr librat” thotë ambasadorja jonë në Romë Anila Bitri Lani.
Librat e mbërritur në Ambasadë janë të njëjtët që përdoren në shkollat e Shqipërisë dhe vlejnë për mësimin e gjuhës shqipe në tri klasat e para: abetare dhe fletore pune për klasën e parë, Gjuha shqipe 2 për klasën e dytë e Gjuha shqipe 3 për nivelin e tretë. Natyrisht një shkollë shqipe jashtë vendit duhet t’u ofrojë fëmijëve shqiptarë jo vetëm gjuhën por edhe njohuri të tjera rreth Shqipërisë që kanë të bëjnë me kulturën, historinë, traditat, ndaj në këtë drejtim kërkohet diçka më shumë se vetëm librat që përdoren në shkollat e Shqipërisë për mësimin e gjuhës.
“Qendra e Botimeve për Diasporën në bashkëpunim me Ministrinë e Arsimit po përqëndrohen pikërisht në përpilimin e një a më shumë teksteve me të cilat të jepen njohuri bazë të historisë, kulturës, letërsisë së vendit tonë. – shpjegon Mirakaj – Mendojmë se shumë shpejt, ndoshta që në dhjetor të këtij viti, do të mund të kemi edhe këta libra që do t’u ofrohen më pas shoqatave”. / KultPlus.com
Ministri i Shtetit dhe Diasporës në Shqipëri, Pandeli Majko, ka shkruar sot për Bashkinë e Sëndahstinës, e cila banohet nga komuniteti më i ri dhe më i vogël arbëresh në Siçili, shkruan KultPlus.com
“Bashkia e Sëndahstinës është qyteza arbëreshe në Itali, e njohur ndryshe edhe si Santa Cristina Gela. Ky është komuniteti më i vogël dhe më i ri arbëresh në Siçili. E themeluar në vitin 1691 nga 82 bujq që u zhvendosën nga Piana degli Albanesi, sot qyteza banohet nga rreth një mijë arbëresh, të cilët vazhdojnë të ruajnë traditat”, ka shkruar Majko në Facebook.
