Etiketë: java e kultures italiane

Shqipëria mikpret Italinë, nga data 2 deri me 8 qershor, në një javë të mbushur me një seri aktivitetesh kulturore e sportive.

Kryeministri Edi Rama ndau sot në rrjetet sociale një video informuese mbi aktivitetet që do të organizohen në kuadër të kësaj jave duke nisur nga koncerte, opera, shfaqje moderne, sport e shumë të tjera.

“Koncerte, opera, shfaqje bashkëkohore, dizajn, arkitekturë, sport, konferenca, një pafundësi aktivitetesh dhe emocionesh, të gjitha për t’u përjetuar në çdo grimcë”, shkruan Rama në rrjetet sociale.

Java Kulturore Italiane do të jetë e mbushur me aktivitete që përfaqësojnë thelbin dhe më të mirën e kësaj kulture që admirohet nga e gjithë bota dhe është një nga lokomotivat e kulturës së njerëzimit.

Nga Tirana në Gjirokastër, nga Saranda në Gramsh, Italia bëhet një me Shqipërinë në një festë të madhe të pasur me muzikë, art dhe solidaritet. Mrekullohuni me kërcimin në kornizën magjepsëse të teatrit të Butrintit, vraponi me të rinjtë në Run 4 Autism, shijoni artet bashkëkohore në Shkodër, kërceni në Vlorë e Gjirokastër me tarantën e më pas dj set, ekspozita, konferenca, ushqim.

Java e Italisë është kjo dhe shumë më shumë.

Më 7 qershor do të mbahet koncerti i artistit të mirënjohur, Diodato.

Javët Kulturore Ndërkombëtare nisën më datën 2 maj, me javën kushtuar Bashkimit Evropian, vijuan me Javën Kulturore Franceze e Javën Kulturore Greke.

Ato do të mbyllen në fund të nëntorit me Javën Kulturore të Kosovës, që ashtu si edhe në edicionet e tjera, përkon me javën e festës kombëtare./KultPlus.com

Shfaqje filmash, koncerte dhe evente në natyrë është aperitivi kulturor që nuk duhet humbur nga Java e Kulturës italiane.

Kryeministri Edi Rama ndau sot në rrjetet sociale programin e aktiviteteve në qytete të ndryshme të vendit nga data 1-7 qershor 2023, që do të mbahen në kuadër të kësaj jave.

Tirana, Shkodra, Vlora, Berati, Gjirokastra e Përmeti do të jenë disa nga qytetet që do të mirëpresin Javën e Kulturës italiane.

Një konsullate shëtitëse në Shkodër do të ofrojë për publikun shërbime të drejtpërdrejta, ndërkohë që një autobus i Policisë Postare dhe Telekomunikacionit do të sjellë në Shqipëri material informues mbi rreziqet që paraqet lundrimi në rrjet.

Produktet italiane do të prezantohen përmes aktiviteteve të ndryshme të degustimit, por edhe përmes një fushate promovimi ku do të ekspozohen produkte të ndryshme novatore “Made in Italy”.

“Ekrani i Artit” do të ndalet në çdo qytet duke prezantuar filma dhe dokumentarë, ndërkohë që në Berat do të çelet një ekspozitë e piktorëve italianë dhe atyre shqiptarë.

Në Vlorë do të prezantohet romani i këshilltarit për kulturën të kryeministrit, Fate Velaj, “Mi Manchi”, ndërkohë që në kuadër të aktiviteteve letrare do të prezantohet edhe libri “Memory of the air” që përmbledh tregimet e subjekteve të fotografuara nga fotografët e arkivit “Marubi”.

Java do të kulmojë me koncertin e Olen Çezarit në Gjirokastër, si dhe me shfaqje folkloristike italiane në sheshin e Lungomares në Vlorë.

Po ashtu në kuadër të Javës së Kulturës italiane do të përurohet kinemaja multifunksionale në Përmet.