CHwB Albania (Trashëgimia Kulturore pa kufij-Shqipëri) njoftoi se, projekti i tyre për Restaurimin dhe Përforcimin e Kalasë së Prezës është përzgjedhur si fitues i Çmimit të Arkitekturës BIG SEE, në kategorinë e Ndërtesave Publike.
“I jemi shumë mirënjohës ekipit tonë të arkitektëve dhe partnerëve tanë që e kanë bërë të mundur këtë projekt”, shkruan CHwB Albania, organizatë joqeveritare e përkushtuar ndaj shpëtimit e mbrojtjes së trashëgimisë kulturore materiale dhe jomateriale, të prekur nga konfliktet, fatkeqësitë apo edhe neglizhenca.
“Falënderojmë ekipin e BIG SEE për vlerësimin pozitiv të projektit tonë”, thuhet në njoftimin e ndarë nga CHwB Albania, në rrjetet sociale.
Platforma BIG SEE synon që vazhdimisht të nxjerrë në pah biznese ekselente dhe sipërmarrje krijuese të Evropës Juglindore.
Kalaja e Prezës, projekti për restaurimin e së cilës është nderuar me çmim, është një Monument Kulture, Kategoria I. E ndërtuar në shekullin e 15-të, kalaja ka një histori të gjatë ndërhyrjesh në strukturë. / atsh / KultPlus.com
Ambasada e Shteteve të Bashkuara të Amerikës në Tiranë, njoftoi se, sot nisin aktivitetet e Javës Amerikane, në kuadër të 100-vjetorit të bashkëpunimit Shqipëri-Amerikë.
Java Amerikane nisi sot me një ceremoni që shënonte bashkëpunimin e veçantë midis Shteteve të Bashkuara, Shqipërisë dhe Suedisë pas tërmetit shkatërrues në nëntor të 2019-ës.
Me mbështetjen prej 800,000 dollarë nga Fondi i Ambasadorëve për Ruajtjen e Kulturës (AFCP), Ambasada e Shteteve të Bashkuara financoi restaurimin e monumenteve të rëndësishme kulturore në Shqipëri, ndërsa çdo monument kishte nevojë për stabilizim kritik të menjëhershëm, metoda të ndërlikuara konservimi dhe rindërtime të shumta.
“Ju ftojmë të bashkoheni me ne për të admiruar Kalanë e saporestauruar të Prezës, e cila u inaugurua sot, në një ceremoni në nder të kontributeve të AFCP-së dhe të gjithë palëve të tjera që mbështetën këto përpjekje”, thuhet në njoftimin e ambasadës amerikane.
Ambasadorja e SHBA në Tiranë Yuri Kim iu bashkua ministres së Kulturës Elva Margariti, zëvendësministres së Kulturës Meri Kumbe, zëvendësambasadores suedeze Petra Burcher, Elena Mamanit dhe ekipit të Trashëgimisë Kulturore pa Kufij, për të festuar kullat e rinovuara të kështjellës dhe për të nderuar partneritetet e jashtëzakonshme që e bënë gjithçka të mundur.
“Urime arkitektëve, inxhinierëve dhe historianëve të përkushtuar, të cilët e bënë këtë projekt kaq të suksesshëm. Historia dhe trashëgimia e Kalasë së Prezës do të vazhdojë të edukojë dhe frymëzojë brezat e ardhshëm që do të vizitojnë këtë vend historik të bukur”, u shpreh Kim.
Ky program i Departamentit të Shtetit ka financuar jo vetëm restaurimin e objekteve të tjera kulturore të prekura nga tërmeti, por përgjatë viteve ka mbështetur restaurimin, ruajtjen dhe dokumentimin e shumë monumenteve dhe pjesëve të rëndësishme të trashëgimisë kulturore të Shqipërisë.
Mbi 11 projekte janë mbresëlënëse janë realizuar përmes këtij programi për të ruajtur kulturën e mrekullueshme të Shqipërisë.
Java Amerikane do të zhvillohet nga 15 maj deri në 21 maj. Në axhendën e aktiviteteve është parashikuar një javë plot me muzikë, kulturë dhe argëtim amerikan, në bashkëpunim me Bashkinë e Tiranës, Ministrinë e Kulturës dhe Fondacionin Shqiptaro-Amerikan për Zhvillim./atsh/ KultPlus.com
Kalaja e Prezës është restauruar tashmë plotësisht, pas dëmtimit nga tërmeti i 26 nëntorit 2019.
Kryeministri Edi Rama ndau pamje nga Kalaja e restauruar, teksa u shpreh se, ka përfunduar puna për rilindjen e një prej monumenteve më të dëmtuara nga tërmeti i vitit 2019.
Rama tha se, restaurimi u mundësua falë Fondit të Ambasadorit të SHBA për trashëgiminë dhe angazhimit të një skuadre të shkëlqyer ekspertësh e punëtorësh shqiptarë
“Ja edhe puna e përfunduar mirë e bukur për rilindjen e një prej monumenteve më të dëmtuara nga tërmeti i vitit 2019, Kalaja e Prezës, që u mundësua falë Fondit të Ambasadorit të SHBA për trashëgiminë dhe angazhimit të një skuadre të shkëlqyer ekspertësh e punëtorësh shqiptarë”, theksoi kryeminisri.
Kalaja e Prezës ndodhet 22 km nga Tirana. Restaurimi i kalasë së Prezës, zbatuar nga CHwB Albania, nuk ishte i lehtë për shkak të shkallës së dëmtimit, por edhe teknikave të ndërtimit të saj. Ekspertët kanë bërë një punë e madhe, jo thjesht për të ringritur kullën apo për të restauruar muret, por për të “shëruar” të gjitha patologjitë e hasura gjatë ekspertizës së monumentit, për ta përforcuar, për ta bërë atë më rezistente ndaj lëkundjeve sizmike, por pa cenuar vetë monumentin.
Kalaja e Prezës është një kala tipike mesjetare. Lulëzimin më të madh e ka pasur në shekullin XV, por të dhëna të ndryshme i kanë shtyrë të mendojnë specialistët, se duhet të jetë ndërtuar që andej nga shekulli XIII – XIV. Kalaja ka shërbyer si pikë e fortifikuar për të mbrojtur Krujën nga rreziqet që mund t’i vinin nga deti./atsh/ KultPlus.com
