Koncerti me vepra të kompozitorit, pianistit dhe dirigjentit Lodi Luka dhe orkestra e harqeve pranë Universitetit të Prishtinës- Universiteti i Arteve u prezantua në mbrëmjen e së mërkurës në edicionin XXII të Kosova Kamerfest, koncert që edhe bëri hapjen e këtij edicioni, shkruan KultPlus.
Në këtë koncert hapës u prezantuan edhe solistët Leufat Bucuku në violinë e Megi Rexhepi në klarinetë të cilët u paraqitën me programin: Living Spaces, Writing to Ludwig, La tenerezza del ruvido (Dhembshuria e vrazhdësisë), Aria per violine e orkestër, Spy Story, Rinascere (Rilindje) dhe Remembrance for clarinet and orchestra.
Ndërkohë, kompozitori, pianisti dhe dirigjenti Lodi Luka ka thënë për KultPlus se pjesëmarrja në këtë festival ishte një kënaqësi e madhe për të, pasi që është edhe paraqitja e parë me krijimtarinë e tij në këtë pjesë të atdheut.
“Kam mbetur shumë i kënaqur nga gjallëria e ambientit dhe entuziazmi i të rinjve që edhe pse ishin të impenjuar me provime dhe koncerte, dhanë maksimumin e tyre në realizimin e veprave të mija, që janë mjaftë impenjative”, ka thënë Luka.
Ai ka falënderuar nga zemra profesorët Sihana Badivuku dhe Blerim Grubi, të cilët kanë krijuar në Kosovë një shkollë të harqeve me kaq nivel të lartë, sipas tij, shkollë që mund të krahasohet me shkollat më të mira evropiane.
“Falënderoj gjithashtu edhe violonçelistin e mirënjohur Bledar Zajmi që na u bashkëngjitë me eksperiencën e tij në këtë rrugëtim. Publiku me nivel më dha gjithashtu shumë emocione dhe i mirëpriti me shumë duartrokitje veprat që i paraqitëm për herë të parë”, ka thënë Luka.
Ndërkohë, edicioni i XXII i Kosova Kamerfest që filloi mbrëmë do të zgjasë deri më 14 nëntor./ KultPlus.com
Violinistja finlandeze Pia Siirala, dirigjentja irlandeze Lygia O’Riordan dhe Ansambli XXI-Kosova, mbrëmë në kuadër të festivalit “Kosova KamerFest” kanë dhuruar një program plot lakmi. Me një numër të madh të të pranishmëve që kanë mbushur të gjitha karriget e vendosura në hapësirë, kjo treshe ka përmbyllur mahnitshëm koncertin e fundit që shënoi mbylljen e këtij festivali, i cili tash e disa net ka dëshmuar për një pasion të pakrahasueshëm ndaj muzikës klasike dhe jo vetëm, shkruan KultPlus.
Modelariumi i Fakultetit të Arkitekturës ka mirëpritur mbrëmë këtë treshe, që kanë performuar një program tejet të rrallë, e pothuajse edhe të padëgjuar më parë në kryeqytet. Interpretimi i tyre ka qenë diçka që jo çdokush mund ta bëjë. Karrige të shumta ishin të vendosura përballë “skenës”, dhe në dy anët e saj, kësisoj për të admiruar çdo pozicion të instrumentistëve që hapësira e ofronte. Akustika në këtë vend po ashtu ka qenë diçka mbresëlënëse, duke pasur parasysh qetësinë absolute që publiku e pati.
Duke qenë një numër më i lartë i të pranishmëve, hapësira u bë ende më e ngrohtë. Me një reflektorë, reflektimi i së cilit binte anash skenës dhe dritave normale të objektit, gjithçka filloi fiks në orën 20:19.
Kanë qenë gjithsej dy veprat e vetë violinistes Pia Siirala ato që kanë ardhur mahnitshëm nëpërmjet interpretimit të instrumentistëve të talentuar. Violinistja Siirala shqyrton në veprën e saj “Ulita’s walk”, ndikimin që ka muzika e popujve indigjenë të Rusisë në mënyrën se si muzika dëgjohet dhe perceptohet. Nëpërmjet luajtjes së violinës dhe kompozimit, ajo përpiqet të eksplorojë se çfarë mund të sjellë muzika arkaike, e bazuar në kujtesë në muzikantin e saj.
“Ulita’s walk”, qe një vepër tetëmbëdhjetë minutëshe e cila rrëqethu çdo të pranishëm. E vetme në mes të skenës, violinistja Siirala solli një teknikë tejet të rrallë. Prekte violinën me dorë, e me hark, teksa harkun e lëvizte me një ngadalësi adhuruese. Tingujt që pasonin, hynin thellë në shpirtin e pranishëm, asisoj që të depërtonin edhe më thellë me mesazhin e veprës.
Ndërsa, vepra tjetër nën emërtimin “Zërat polarë” (Pengeneku, Omryl’kot, Mulingaut, Rol’tytval-Jarar), që përkonte me emërtimin e këtij koncerti të fundit, nga violinistja Siirala, ka sjell në skenë Ansamblin XXI-Kosova, me ç’rast është krijuar një mbrëmje që vështirë se harrohet dot. Vepra për orkestër harqesh ka gjallëruar instrumentet diversive. Violina 1 qe e përbërë nga Sihana Badivuku, Leufat Buçuku, Fjollë Koxha, Arsim Gashi, violina 2 qe e përbërë nga Pleurat Doli, Dijetar Zeka, Eliona Raqi, Florentina Hyseni, Festim Haxhikadrija, në violë qenë Blerim Grubi, Entela Qarkaxhija, Alkesta Gllogjani, në violonçello qenë Miltiades Cassaras, Enis Alji, Donjeta Cërmjani si dhe në kontrabas Lulëzim Lushtaku.
Nën dirigjimin e jashtëzakonshëm të Lygia O’Riordan, vepra “Zëra polarë” ka përçuar një ndjesi magjike. Me një stil ndryshe të të dirigjuarit e performuarit, kjo mbrëmje ka qenë dëshmi e prurjeve unike nga bota, që sjellin diçka të veçantë nga vetja dhe e lënë haptazi në çdo vend që ata prekin. I tillë ke rasti me violinisten finlandeze Pia Siirala dhe dirigjenten irlandeze Lygia O’Riordan, të cilat në ndërlidhje me Ansamblin XXI-Kosova kanë përthekuar koncertin e fundit të këtij edicioni të festivalit “Kosova KamerFest”, në mënyrën më të mirë të mundshme.
Ishin duartrokitjet e zgjatura ato që falënderuan këtë treshe për performancën e tyre të pakrahasueshme, me shpresën që të rikthehen përsëri në Prishtinë, për të shpalosur dashurinë e tyre ndaj botës së artit.
Ndërsa, për të treguar më shumë rreth koncertit dhe përshtypjeve të saj përgjatë edicionit, për KultPlus foli drejtoresha dhe njëherit violinistja Sihana Badivuku.
“Publikut besnik prishtinas, Kosova KamerFest i dhuroi 11 mbrëmje koncertale kamertale gjatë këtyre dy muajve. Koncerti përmbyllës ishte diçka më ndryshe dhe risi jo vetëm për publikun por edhe për ne, anëtarët e këtij ansambli ku së bashku fituam përvoja të reja të performimit të veprës botërore premierale “Zërat Polarë” e cila mbrëmë u realizua edhe si pjesë e provimit të Doktoratit të violinistes Siirala. Si drejtore artistike jam mjaft e kënaqur nga koncepti dhe laramania e veprave që u performuan nga artistët botërorë dhe vendorë me rreth 40 instrumentistë dhe rreth 15 vepra premierale”, ka thënë Badivuku.
Sipas saj, edhe këtë vit janë realizuar 7 punëtori në bashkëpunim me prodekanin e degës së muzikës së Fakultetit të Arteve, profesori Drinor Zvmberi dhe punëtori të audio inxhinierit nga Finlanda në bashkëpunim me Universitetin UBT – degën e audio-produksionit dhe menaxhimit që e udhëheq profesoresha Aida Gjikolli.
“Për mua secili koncert ishte i veçantë, duke filluar nga mbrëmja e parë me violinistin e mirënjohur Klajdi Sahatçi, pianisten Merita Rexha-Tërshana, tek koncerti i talenteve të Garave ArsKosova , koncerti për autizmin me fëmijët e talentuar nga shkollat e muzikës së Kosovës, pastaj mbrëmja me pianisten Kristina Laço-Petrollari, çelisten Dorina Laro, violinistin e ri te talentuar Dejon Bendaj, spanjollët Jose.M.Alvarez Losada dhe Pedro Mateo, francezët Celine & Eric Lesage, bullgaret Galina Kovcheva dhe Daniela Dikova, pianistet Syzana Jakupi dhe Alba Muçolli-Dehari, kolegët e mi Blerim Grubi e Aristidh Prosi dhe ENSEMBLE XXI-Kosova me artistet e lartpërmendura”, thotë tutje.
Ndërkaq, ajo po ashtu ka bërë të ditur se edicioni i 22-të varet nga mbështetjet financiare të institucioneve kulturore dhe ambasadave, bankave e kompanive të ndryshme që do të ndikojnë shumë në cilësinë dhe numrin e koncerteve posaçërisht të ansambleve dhe artistëve botërorë që kanë kosto dhe honorare sipas standardeve Evropiane-Botërore.
Koncerti “Zërat polarë” sonte do të shënojë fundin e festivalit të njohur ‘Kosova KamerFest’ i cili filloi më 1 tetor.
Kanë qenë gjithsej 11 koncerte të cilat kanë dëshmuar për një dhunti të rrallë që është shpalosur lehtësisht nga ta. Emra të njohur, vendorë dhe ndërkombëtarë kanë qenë pjesë e këtyre koncerteve.
Ndërkaq, sonte në Fakultetin e Arkitekturës, duke filluar nga ora 20:00 mbahet koncerti përmbyllës me të ftuar nga Republika e Irlandës.
Programi:
Zërat Polarë – Polar Voices
ENSEMBLE XXI-KOSOVA (String Chamber orchestra)
LYGIA O’RIORDAN-conductor PIA SIIRALA -violin / composer REPUBLIKA E IRLANDËS/REPUBLIC OF IRELAND FINLANE/FINLAND
Një dyshe spanjolle ka dëshmuar për një dashuri të pa krahasuar ndaj muzikës klasike, mbrëmë në kuadër të festivalit “Kosova KamerFest”, me ç’rast ka mbledhur rreth vetes një numër të konsiderueshëm të artdashësve të cilët me vëmendje të lartë kanë pikasur dhuntinë e tyre të veçantë. Violinisti Jose Manuel Alvarez Losada dhe kitaristi Pedro Mateo kanë shkrirë magjinë e tyre në ato instrumente krejt natyrshëm, gjegjësisht, kanë interpretuar një program që ka lënë mbresa të mëdha, shkruan KultPlus.
Modelariumi i Fakultetit të Arkitekturës ka mirëpritur këta dy artistë nga Spanja, të cilët me një program krejt unik, kanë lënë shpirtin e tyre në hapësirë. Karrige të shumta ishin të vendosura mu përballë “skenës” ku dyshja ka performuar. Ndërlidhja e violinës dhe kitarës ka qenë e mahnitshme, ndërsa akustika qe e mirë pikërisht për këtë dyshe.
Arkitektura e hapësirës i shtonte një ngrohtësi ndryshe këtij koncerti. Hijeshia e çdo objekti, e bënte mbrëmjen më të afrueshme me të pranishmit. Ndonëse nuk kishte ndonjë ndriçim specifik ndaj instrumenteve, ajo që sillte dritë përbrenda shpirtit të pranishëm, qe vija melodike e secilës vepër të interpretuar.
Mbrëmë, harku i violinës ka thyer limitet e interpretimit perfekt. Ndërsa, kitara që i bashkëngjitej violinës në një vallëzim melodish, ka qenë ajo që ka rrëmbyer tingujt spanjoll e i ka dërguar edhe përtej mureve të objektit. Kompozitorët si: Joaquín Nin, Leo Brouwer, Manuel de Falla, Feliu Gasull, Joaquín Rodrigo, Astor Piazzolla, janë vlerësuar mbrëmë në mënyrë jashtëzakonshme nëpërmjet dyshes spanjolle. Magjia e këtyre kompozitorëve u shndërrua në një mrekulli interpretuese të dyshes që pasonte lehtazi nga melodia në melodi.
“Suite espanola (Vieja Castilla, Murciana, Catalana, Andaluza)”, “Elegia por Cinito Vitier”, “Suite popular espanola (El pano moruno, Asturiana, Jota, Nana, Cancion, Polo), “L’anima del vent”, “Canciones valencianas (Allegro, Andante moderato, Andantino, Tempo di bolero), “Historia del tango (Bordel 1900, Cafe 1930, Night-club 1960, Concert d’aujourd’hu)”, ishin veprat unike që erdhën nën mjeshtërinë e violinistit Jose Manuel Alvarez Losada dhe kitaristit Pedro Mateo.
Duke filluar nga shprehjet e fytyrës, lëvizja e kokës që vazhdimisht merrte kahje të ndryshme, gishtërinjtë e pandalshëm mbi instrument, mbi tela e mbi hark e deri tek frymëmarrjet që dëgjoheshin në hapësirë, të dy instrumentistët kanë dhënë gjithçka nga vetja e tyre. Kjo dukshëm vërehej kur duartrokitjet e zjarrta zinin vend pas secilës vepër të interpretuar, teksa buzëqeshjet e dyshes qenë vezulluese ndaj këtij publiku. E gjithë vëmendja e të pranishmëve i dedikohej dyshes, ndërsa e njëjta gjë vlente edhe për dy instrumentistët, që fokusin e kishin vetëm ndaj violinës dhe kitarës, që qëndronin përpara tyre.
Ishin duartrokitjet e zgjatura ato që e rikthyen dyshen edhe një herë në skenë. Me një vepër të famshme, ata përmbyllën një orë e gjysmë performancë të mrekullueshme. Qe një teknikë e rrallë që ata e shfaqën mbrëmë, dhe që me patjetër ka frymëzuar edhe fytyrat e të rinjve në publik. Fotografi, video e plot palë sy, kanë mbështjellë këtë natë brenda një foleje melodike krejt të pasur.
Ndërsa, për të treguar më shumë rreth koncertit dhe përshtypjeve të tyre, për KultPlus folën Violinisti Jose Manuel Alvarez Losada dhe kitaristi Pedro Mateo.
“Po ndihemi shumë mirë. Ishte një përvojë e mrekullueshme të luajmë këtu për këtë audiencë që dukej sikur ishin mësuar të shkonin në koncerte muzikore-klasike. Është hera jonë e parë në Kosovë dhe ne kemi ardhur tek dje. Jemi shumë të befasuar për ndërtesat, njerëzit dhe jetën e qytetit. Është si një qytet i mbushur me jetë”, thotë dyshja.
Sipas tyre, programi i përzgjedhur është kryesisht i bërë nga muzika spanjolle dhe latine, dhe disa nga to janë vepra shumë të njohura e disa tjera janë transkripta për repertor të pianos, por ky program nga ta, është luajtur tash e disa vite, andaj dhe atyre u pëlqen ta luajnë pikërisht atë.
“Gjithçka për ne ishte vërtet e re këtu. Ne nuk jemi mësuar me audiencën e këtij populli dhe mënyrën se si i bëni gjërat, por na pëlqen dhe ishte vërtet i organizuar mirë. Mendoj se krijuesja e festivalit, Sihana, po bën një punë shumë të mirë. Ajo është shumë entuziaste dhe na trajtoi shumë mirë. Ne jemi vërtet të lumtur për këtë”, përfundon dyshja. / KultPlus.com
Një dyshe franceze ka mbushur sallën në natën tjetër të radhës, në kuadër të festivalit “Kosova KamerFest”, duke mbledhur kështu rreth vetes artdashës e fytyra të reja që pasionin për muzikën klasike e kishin të shprehur në fytyrën e tyre. Ata patën rastin të shijojnë nga afër interpretimin e rrallë e të fuqishëm, të violinistes Celine Lesage dhe pianistit Eric Lesage, me ç’rast loja e tyre ka dhënë emocione të shumta mbrëmë, shkruan KultPlus.
Si në të shumtën e rasteve, salla e Amfiteatrit të Bibliotekës Qendrore të Universitetit të Prishtinës nuk ka ndërruar pamje, por ishin lulet e vendosura mu në mes të skenës, ato që i dhanë një hijeshi kësaj mbrëmjeje. Në anën tjetër, pianoja bardh e zi qëndronte e vetme në skenë, teksa priste që pianisti francez t’ia nisë magjisë së tij nëpërmjet gishtërinjve. Në anën tjetër, violinistja franceze qe ajo që violinën e shndërroj në trup të dytë të saj, krah saj.
Perdet e zeza në prapavijë vinin në pah këndshëm, kur edhe veshja e dyshes franceze ishte po në të njëjtën ngjyrë. Ndriçimi po ashtu qe elementi kryesor që e afroi këtë mbrëmje në nivel tjetër, me të pranishmit.
Mbrëmë, çelësat e pianos u pushtuan nga melodi e tinguj që preknin skajshmërinë perfekte. Notat e sakta dilnin përtej kontrollit, me precizitetin e pianistit Lesage, ndërsa harku i violinës që manovrohej nga violinistja Lesage lëvizte pa mëshirë, për të krijuar një vijë melodike hyjnore. Vepra e kompozitorëve të njohur si: Jeno Hybay, Cesar Frank, Fritz Kreisler/Antonin Dvorak, u interpretuan në mënyrë të mahnitshme. Mrekullia e tyre dallohej në secilën notë.
Veprat si: “Fantasie Briliante Carmen”, “Sonata in a-major”, “Slavonic fantasy”, “Scenë nga çardash”, “Yarou Yarou”, “Chanson de Tania”, “Sarba Staccoato”, “Csardas Rhapsodie”, erdhën me një frymë krejtësisht ndryshe nga koncertet e herëve të kaluara. Talenti i dyshes franceze kaloi përtej prishtmërive. Përgjatë plot dy orëve, ata dëshmuan për një dashuri ndaj artit klasik, e në veçanti atij francez. Ritmi i tyre në çdo moment ka krijuar një harmoni të paparë.
Lëvizja trupore e pianistit, në ndërveprim me atë të violinistes, ka qenë e bukur për tu vëzhguar. E gjithë energjia e tyre kaplonte instrumentin para tyre, dhe bashkë me to, edhe zemrat në publik. I gjithë fokusi i të pranishmëve binte direkt në skenë, aty ku po shkrihej dhuntia e dyshes franceze, krejt lirshëm, por me një pasion të vërtetë. Qe një punë mjeshtërore e tyre e interpretimit dhe kjo u dallua nga duartrokitjet e zjarrta që merrnin, pas secilës vepër, shumica e së cilave zgjasnin një kohë të gjatë.
Kështu krejt në fund, brohoritjet për këtë dyshe fantastike qenë të jashtëzakonshme. Admirimi për ta dallohej në sytë e secilit, teksa dëshira për t’i falënderuar ata për këtë natë, qe e madhe. Ishte me të vërtetë mahnitëse teknika e tyre e interpretimit dhe kjo veçmas dallohej nga mënyra e tyre unike në ndërveprim me instrumentet.
Ndërsa, për të treguar më shumë rreth koncertit dhe përshtypjeve të tyre, për KultPlus folën pianisti Eric Lesage dhe violinistja Celine Lesage.
“Jemi shumë të lumtur që jemi këtu sepse ishte ëndrra jonë të interpretonim këto pjesë të Transilvanisë, muzikë tradicionale. Për ne në Francë është një ëndërr, sepse ne e duam shumë muzikën tradicionale të Transilvanisë, folklorin, vallet dhe meloditë popullore. Është hera e parë që jemi këtu në Kosovë, publiku ishte shumë i ngrohtë dhe mikpritës, po ashtu ata ishin shumë të fokusuar”, thotë dyshja.
Sipas tyre, pjesa e preferuar ishte e fundit sepse ishte një kompozitor francez, i cili shkroi dhe kompozoi muzikë të shkëlqyer.
“Sonatat kishin një teknikë shumë të vështirë, sidomos për shkak të muzikalitetit të tyre. Ne patjetër do të kthehemi për të performuar këtu. Ne me të vërtetë do të dëshironim të vinim përsëri herën tjetër”, përfundon dyshja. / KultPlus.com
Edicioni i 21-të i “Kosova KamerFest”, festivali i muzikës kamertale ka filluar rrugëtimin e tij të suksesshëm tash e një muaj. Pas dy viteve pauzë, festivali ka arritur që të sjell emra të njohur të skenës kombëtare dhe jo vetëm. Talente të reja, njashtu kanë zënë vend të posaçëm në këtë edicion, ndërsa gërshetimi i tyre me emra të njohur, nuk ka qenë aspak e huaj për këtë edicion. Mbrëmë, ka qenë violinisti Dejon Bendaj dhe pianistja Kristina Petrollari Laço, të cilët kanë shndërruar koncertin, në një të paharrueshëm, shkruan KultPlus.
Si në të shumtën e rasteve, salla e Amfiteatrit të Bibliotekës Qendrore të Universitetit të Prishtinës ka mirëpritur një numër të konsiderueshëm të publikut. Në skenë, pianoje e vetme bardh e zi qëndronte gati për t’u pushtuar nga pianistja, ndërsa më vonë do i bashkohej edhe violinës që nën duart e violinistit, do të krijoheshin tinguj të mrekullueshëm. Perdet e zeza në prapavijë dhe ndriçimi nga muri lart, ishin elementet që i dhanë këtij koncerti një pamje më serioze. Të veshur kokë e këmbë në ngjyrë të zezë, të dy instrumentistët kanë dëshmuar për një talent të paparë.
Fillimisht, ishte Sihana Badivuku, drejtoreshë artistike e festivalit, e cila hapi mbrëmjen me një fjalë rasti.
“Violinisti vjen këtu për herë të parë me koncert recital, përndryshe, ai dhjetë vite më parë ka qenë fitues i garave ‘ArsKosova GrandPrix’ dhe tani po rikthehet si një muzikant aktiv i Shqipërisë, i cili posa i ka mbaruar edhe studimet master në Moskë. Ndërsa, pianistja e mirënjohur shqiptare, Kristina, ka qenë më parë edhe soliste në këtë festival si dhe pjesëmarrëse në shumë festivale të tjera. Shpresoj që ky koncert do të iu lë mbresa shumë të mëdha, posaçërisht emocione të fora”, ka thënë Badivuku.
Ajo tutje ka bërë të ditur se është shënuar edhe përvjetori i kompozitorit shqiptar Çedk Zadeja si dhe kompozitorit francez Cezar Frank.
Në këtë mbrëmje gjithsej pesë vepra kanë gjetur vendin e tyre në atmosferë. Meloditë dhe tingujt që pasonin vazhdimisht nga violinisti Dejon Bendaj dhe pianistja Kristina Petrollari Laço, kanë ngjallur emocione të forta në publik. Kjo vërehej qysh në fillim, kur sytë e të pranishmëve binin direkt në skenë, veshët e tyre ishin të mbushur me muzikë, ndërsa këmbët e tyre trokitnin vazhdimisht në tokë, në hap me vijën melodike të prezantuar.
Koncerti që nisi fiks në orën 20:13, ka sjell një program tejet të bukur, por ajo që i shtoi hijeshinë këtij programi qenë edhe dy instrumentistët që dhuruan shpirtin e tyre në skenë. Lëvizjet e tyre të kokës, duarve, krahëve e edhe të këmbës, ishin të mrekullueshme për t’u parë. Dukej se i gjithë trupi i tyre shkonte pas tingujve, me ç’rast ato me të vërtetë plasoheshin nëpër muret e sallës.
Ishin veprat e kompozitorëve si: Çedk Zadeja, Cezar Frank dhe Béla Bartók, ato që shpalosën një program të veçantë që zgjati fiks një orë. Ndërsa, veprat si: “Sonatë për violinë dhe piano”, “Sonata në A-dur”, “Sarasate Caprice Basque”, “Vallet rumune”, dëshmuan për një seriozitet në të luajtur e dashuri në interpretim.
Kështu krejt në fund, ishte publiku që me duartrokitje ka falënderuar dy talentet që pa ndalë kanë dhënë një performancë të shkëlqyer. Sa herë që dilnin në skenë për veprën e radhës, buzëqeshja e tyre që pika më e fortë në të cilën dallohej pasioni për violinën e pianon, dhe jo vetëm.
Për KultPlus, violinisti Dejon Bendaj ka shprehur emocionet e tij pas koncertit si dhe idenë për bashkëpunimin me pianisten e mbrëmjes.
“Sa herë që vij këtu është një kënaqësi e madhe për të luajtur. Në Prishtinë kam kujtime shumë të bukura dhe njerëzit janë mikpritës ndërsa audienca është në rritje. Programi është i ndarë në dy pjesë. Pjesa e parë ka përfshirë dy sonata, njëra nga Çedk Zadeja dhe tjetra nga Cezar Frank, që i përket periudhës së romanticizmit. Pjesa e dytë përfshin një repertor virtuoz të violinës. Me pianisten, kemi nisur një bashkëpunim prej kohësh dhe ne merremi vesh shumë mirë. Kemi shumë lidhje të përbashkëta për muzikën të cilat ndoshta edhe ndihmojnë në ndërlidhjen tonë skenike”, ka thënë Bendaj.
Po ashtu, pianistja Kristina Petrollari Laço për KultPlus ka treguar përshtypjet e saj për këtë mbrëmje.
“Për mua në Prishtinë është një mrekulli gjithmonë që të luaj e sidomos kur prezent janë miqtë, artdashësit, publiku i dashur e shumë i ngrohtë. Mendoj që ke një koncert me sonata të rëndësishme të violinistikës dhe këtu ke një sallë shumë e dashur për ne por që kushtet nuk janë më të mirat të mundshme. Por, gjithçka shkoi mirë. Dy kompozitorët që i nderuam sonte, ishin dy shtyllat kryesore të repertorit violinistik, andaj menduam që pasi edhe përkohet me dy përvjetorët e tyre, t’i sjellim pikërisht veprat e tyre. Bashkëpunimi me Kosovën, ka qenë shumë i dashur për ne, gjithmonë”, thotë ajo.
Kujtojmë se sonte do mbahet koncerti tjetër i radhës në Sallën e Amfiteatrit të Bibliotekës Qendrore UP, me fillim nga ora 20:00.
Festivali i muzikës kamertale ‘Kosova KamerFest’ po mbahet nga 1 tetor dhe do zgjasë deri më 1 dhjetor ku përgjatë 11 mbrëmjeve koncertale do të shfaqet program dhe koncept i larmishëm me performim të veprave kolosale dhe kamertale të artistëve dhe ansambleve kamertale botërore dhe mbarëshqiptare.
Ky festival do të mirëpresë edhe artistë të tjerë të radhës si: Dorina Laro, Galina Koycheva, Duo Lesage, Celine Lesage, Eric Lesage, Jose Manuel Alvarez Losada, Pedro Mateo, Syzana Jakupi, Alba Muçolli, Ensemble XXI, Lygia O’Riordan dhe Pia Sirala. / KultPlus.com
“Kosova KamerFest”, festivali i muzikës kamertale ka filluar tashmë rrugëtimin e tij të suksesshëm drejt edicionit të 21-të, pas dy viteve pauzë. “New spirits, voices & hopes” ka qenë emërtimi i koncertit të djeshëm që ka shënuar mrekullueshëm koncertin e tretë me radhë. Talentet e reja si violinistja Vesa Dume, pianistja Elsa Gashi dhe pianistja Eda Vllaço kanë sjell një program tejet të bukur e të njohur për publikun artdashës, shkruan KultPlus.
Salla e Amfiteatrit të Bibliotekës Qendrore të Universitetit të Prishtinës mbrëmë ka mirëpritur një numër të konsiderueshëm të publikut. Ndërkaq, në skenë qe instrumenti i pianos bardh e zi, ai që ia ka shtuar hijeshinë kësaj nate. Perdet e zeza në prapavijë dhe ndriçimi i nevojshëm në sallë, kanë qenë elemente shtesë që këtë natë e kanë bërë më të ngrohtë për syrin e publikut.
Fillimisht, ishte Sihana Badivuku, drejtoreshë artistike e festivalit, e cila hapi mbrëmjen me një fjalë rasti.
“Ky është koncerti i tretë me radhë dhe sonte kemi rastin e nderin e veçantë që të kemi tri talente të rralla, që janë finaliste të garave ‘ArsKosova 2022’. Koncertin do ta hap fituesja e të gjitha çmimeve, Vesa Dume, pra është fituese e çmimit ‘Grand Prix ArsKosova’ që është çmimi më i madh i këtij kompeticioni. Ajo njëkohësisht është fituese e shumë çmimeve tjera në rajon dhe Evropë. Ndërsa, pjesa e dytë e koncertit na sjell fitueset e tjera si Elsa Gashi që ka fituar çmimin ‘Ensemble XXI-Lygia O’Riordan’ dhe pianistja Eda Vllaço që ka fituar çmimin ‘Akil Koci’”, ka thënë Badivuku.
Sipas saj, të gjithë të pranishmit do t’i shohin këto talente të reja dhe artiste të rralla në instrumentet e tyre. Dhe me të vërtetë që kjo ndodhi. Vesa Dume para violinës, Elsa Gashi dhe Eda Vllaço para pianos, kanë shprehur një talent që tregon shumë për të ardhmen e tyre, pra një e ardhme pa mëdyshje drejt suksesit.
Violinistja Vesa Dume, qe ajo që hapi mbrëmjen fiks në orën 20:12 me një program që zgjati pothuajse tridhjetë minuta. Ishin veprat e kompozitorëve si: Fritz Kreisler, Niccolo Paganini, Frederic Chopin dhe Felix Mendelssohn, që kanë lënë një gjurmë të madhe në këtë mbrëmje. Dhuntia e violinistes Dume, ka dalë përtej përsosmërisë dhe ka arrirë që veprat “Sicilienne & Rigaudon”, “Kapriqo”, “Nocturno No.20” dhe “Koncert në e-mol, koha 3”, t’i sjellë në mënyrë të mahnitshme.
E shoqëruar në piano por e vetme në luajtjen e violinës, ajo në skenë ka dëshmuar për një pasion të dukshëm për muzikën klasike. Koka e saj ishte në harmoni të saktë me lëvizjet e duarve e gishtërinjve, ndërsa buzëqeshjet që pasonin pas çdo vepre, ishin sinjalizues për një përfundim me sukses të secilës vepër.
Në anën tjetër, dy pianistet e radhës, Elsa Gashi dhe Eda Vllaço, thjesht të lënë pa fjalë. Instrumenti bardh e zi, para tyre u shndërrua në një dhuratë të cilën mezi prisnin ta hapnin. Meloditë e pastra, pushtuan hapësirën krejt lehtazi. Ishin veprat si: “Sonata e hënës, op.27, no.2”, “Adagio sostenuto”, “Allegretto”, “Presto agitato” të kompozitorit L.V.Beethoven, si dhe “Toccata” nga Feim Ibrahimi, ato që erdhën nën mjeshtërinë e pianistes Elsa Gashi. Ndërsa, “Scherzo no.2” nga F.Chopin dhe “Elegie, op.3, no.1” nga S.Rachmaninoff u performuan në mënyrë të jashtëzakonshme nga pianistja Eda Vllaço.
Kështu krejt në fund, ishte publiku që me duartrokitje ka falënderuar këto tri talente të reja që posedonin një talent të rrallë që shumë lehtë vërehej edhe në sytë e tyre, sa herë që ato preknin skenën dhe shfaqnin dashurinë nëpërmjet instrumenteve.
Kujtojmë se sonte do mbahet koncert për fëmijët me autizëm, me titull “Fëmijët për fëmijë – për njëri-tjetrin”, në Sallën e Amfiteatrit të Bibliotekës Qendrore UP, me fillim nga ora 18:00.
Festivali i muzikës kamertale ‘Kosova KamerFest’ po mbahet nga 1 tetor dhe do zgjasë deri më 1 dhjetor ku përgjatë 11 mbrëmjeve koncertale do të shfaqet program dhe koncept i larmishëm me performim të veprave kolosale dhe kamertale të artistëve dhe ansambleve kamertale botërore dhe mbarëshqiptare.
Ky festival do të mirëpresë edhe artistë të tjerë të radhës si: Dejon Bendaj, Kristina Laqo, Dorina Laro, Galina Koycheva, Duo Lesage, Celine Lesage, Eric Lesage, Jose Manuel Alvarez Losada, Pedro Mateo, Syzana Jakupi, Alba Muçolli, Ensemble XXI, Lygia O’Riordan dhe Pia Sirala. / KultPlus.com
Nën tingujt e bukur të pianos, flautës e nën zërin unik të një sopranojë, mbrëmë publiku kosovarë përjetoi emocione të jashtëzakonshme, që veç muzika din t’i falë.
Në kuadër të KamerFest-it, mbrëmë u mbajtë edicioni i tretë i këtij koncerti që tashmë e 20-të vitë zë vend në hapsirat e kryeqytetit tonë, shkruan KultPlus.
Catherine Wethington, Derek Han dhe Zana Abazi, mbrëmë performuan para një publiku modest por të këndshëm dhe me një dashuri të pashoqe për muzikën klasike. Një performancë që zgjati pothuajse dy orë, e përcjellur me duartrokitje që nuk ngurronin të mbushnin sallën pas çdo perfromance të artistëve, duke krijuar kështu një atmosferë ku emocioni si pasojë e ndjesisë që faleshin nga tingujt e muzikës që performohej, nuk mungonte.
Catherine Wethington, sopranoja amerikane, e cila vinte për herë të parë në Kosovë për të performuar para publikut kosovarë. Wethington, ka treguar sukses të madh në Shtete e Bashkuara dhe në Evropë, me artin e saj. ”Kjo është hera ime e parë në Kosovë, ndjehem shumë kënaqur. Njerëzit janë shumë të mirë dhe të sjellshëm, e kjo më ka lënë përshtypje të madhë. Kam kaluar shumë mirë me studentët e muzikës këtu dhe sonte u kënaqa tek performova para publikut kosovarë”, u shpreh sopranoja për KultPlus.
Sopranoja, si asnjëherë më parë, mahniti publikun më zërin e saj të fuqishëm. Ajo për KultPlus poashtu potencoi se kur këndon, bëhet një mE muzikën.
Në piano, performoi Derek Han, i cili për dallim nga sopranoja që vinte për herë të parë në Kosovë, ai ishte pjesë e KamerFest-it që nga fillimet e tij, nga viti 1999. Derek Han është padyshim një ndër artistët kulminantë të gjeneratës së tij, Mbrëmë, me një intepretim elegant, magjepsi audiencën.
Han për KultPlus u shpreh se ”Po vi këtu për të 20-ën herë dhe Kosova po ndërron shumë nga viti në vit, për të mirë. Të performosh para publikut kosovarë është gjithmonë një ndjenjë e mirë, e papërshkrueshme”
Mysafirë e performuesëve ishte edhe Zana Abazi, në flautë, që njëherit ka qenë edhe fituese e garave ARSKOSOVA. Zana Abazi, me një lehtësi elegante përcillte sopranon e pianon, duke i dhënë kështu jetë performancës së dyshes tjetër. Ajo për KultPlus potencoi se të punosh me artistë të huaj është një ndjenjë shumë e mirë. ”Të krijojnë një atmosferë stabile aty në skenë”, shtoi ajo.
Koncerti ishte i ndarë në dy pjesë, në pjesën e parë performuan të tre artistët e lart cekur, kurse në pjesën e dytë vetëm Derek Han në piano dhe sopranoja Wethington.
Sihana Badivuku, tregoi se çdo kompozim që do të performohet është premierë, jo vetëm në këtë koncert por edhe në të tjerët vijojnë pas tij. ”Pjesë e KamerFest-it janë artistë të huaj e shqiptarë dhe ideja është që ata të punojnë bashkë e të njihen me artin e njëri tjetrit”, potencoi ajo.
Badivuku poashtu u shpreh mjaft e kënaqur me interesimin e publikut pjesëmarrës në dy koncertet paraprake. ”Ajo çka e bënë të veçantë këtë 20-të vjetor, është se do të ketë shumë artist të rinj, të cilët do të kënë mundësi të shfaqin afimitetin e tyre artistik dhe ku do të kenë rast të punojnë me artista të mëdhenj”, shtoi ajo.
Sivjet në këtë edicion jubilar do të performojnë rreth 40 artista botërore e mbarë shqiptar dhe ansamble harkore, pianistike e frymore.
Sponsor Gjeneral i Kosova KamerFest 2019 do të jetë Ministria e Kulturës Rinisë dhe Sportit si dhe Ambasada e ShBA-së, Austrisë dhe Francës
13 Koncerte do të realizohen në Amfiteatrin e Biblotekës Qëndrore të UP-së përpos koncertit të mbrëmjes përmbyllëse i cili do të realizohet në Pallatin e Rinisë-salla e kuqe./KultPlus.com
Festivali i muzikës kamertale “KamerFest Kosova” mbrëmë arriti të sjellë koncertin e dhjetë në bashkëpunim me Filharmoninë e Kosovës nën dirigjimin e japonezit, Toshio Yanagisawa dhe në bashkëinterpretim me pianisten Yesim Gokalp nga Turqia, shkruan KultPlus.
Këtë mbrëmje, Salla e Kuqe në Pallatin e Rinisë nuk numëronte asnjë vend të zbrazët në ulëset e publikut. Ndërsa në skenë, Orkestra e Filharmonisë së Kosovës filloi të zë vendet brenda kësaj hapësire, kurse përballë tyre dirigjenti Toshio Yanagisawa bën lëvizjen e parë që nis një rrugëtim muzikor me veprat e Alexander Bordinit, e që do të pasohet me ato të Mozartit dhe të Tchaikovskit.
Lëvizjet e tij të shpeshta brenda një zonë të ngushtë e shpërfaqnin edhe më shumë anën e tij artistike. Duart e tij shtriheshin në çdo drejtim të orkestrës ndërsa dukej që merrnin me vetë gjithë publikun në një botë të tingujve të larmishëm. Herë zgjaste të dy duart, e me nxitim shtrinte trupin drejt orkestrës, e cila me një përcjellje korrekte i kthente ato në një interpretim të përsosur muzikor.
Ritmi i dirigjimit të tij filloi të përjetoj një ngadalësim kur kthehej në drejtim e të pianistes turke Yesim Gokalp, e cila dukej së po mbizotëronte tërë sallën me tinguj të lehtë e që vinin më me nxitim kur gishtërinjtë e saj bënin një ecje të shpejtë në tastet e pianos ku ishte e vendosur.
Duke qenë se ajo kishte qenë dhe herëve të tjera në këtë festival, në bashkëpunim me instrumentistë të ndryshëm, ajo tregoi për KultPlus që bashkëpunimi i kësaj nate i dhuroi një afërsi dhe ngrohtësi të veçantë me publikun.
“Duke qenë se isha në mes të sallës, e shijova shumë atmosferën e ngrohtë të publikut, duke më dhënë shumë ndjesi të afërsisë me publikun. Unë kam qenë edhe me herët pjesë e këtij festivali ku kam luajtur në veprat e Bah, por edhe në duete kamertale, sikurse edhe me koncert timin solistik. Në bisedë me drejtorin ramë dakord që të luajmë Mozartin, sepse kjo vepër ka më shumë dialog me orkestrën. Ky sonte ishte një koncert shumë i veçantë dhe i bukur për mua, duke e krahasuar me koncertet e tjera të Mozartit, ky për mua është një ndër koncertet më të mëdha”, tha Yesim Gokalp për KultPlus.
Profesoresha, Valbona Pula- Petrovci e cilësoi si shumë të suksesshëm këtë koncert dhe se nga ky koncert po largohet duke marrë përshtypjet më të mira të këtij bashkëpunimi.
“Ky është një ndër koncertet e suksesshme të Filharmonisë së Kosovës, ndërsa është shumë e rëndësishme të ceket që pjesa më e madhe e anëtarëve të saj janë studentë, ish- studentë të degës së muzikës, që kërkon kohë të krijohet, e që është një statisfaksion i madh. Ata sonte erdhën me një program shumë pretencioz dhe të realizuar shumë mirë që erdhi edhe përmes punës kualitative të dirigjentit Yanagisawa i cili është pjesë e shpeshtë e stafit të Filharmonisë, dhe e ka ndihmuar atë më shumë instrumente. Sa i përket interpretimt të pianistes ishte po ashtu i mrekullueshëm dhe me një muzikalitet të jashtëzakonshëm” u shpreh Pula-Petrovci për KultPlus.
Koncerti i dhjetë i KamerFest përfundoi mes duartrokitjeve që vështirë mbaronin duke bërë kështu që artistët të përulen për të disatën herë pranë publikut. Festivali “KamerFest Kosova” nesër do të përmbyllë edhe edicionin e 18-të të tij, i cili ka nisur që nga data 10 Tetor. Mbrëmja post-kamerfest do të mbahet në Amfiteatrin e Bibliotekës Universitare dhe do të sjellë artistët austriakë: Livia Selin në violinë, Philipp Comploi në violinçello dhe Chengcheng Zhaoi në piano, të cilët do të interpretojnë veprat e Haydenit, Mozartit dhe Smetanas. / KultPlus.com
Festivali i muzikës kamertale Kamerfest erdhi me koncertin e nëntë me radhë “Vetëm harkorët”, duke vënë në skenë Frank S.Dodge, violonçello nga SHBA/Gjermania, violinistin Blerim Grubi nga Maqedonia, Mariades Cassaras nga Greqia dhe në interpretim të çelisteve kosovarë Antonio Gashi, Vjosa Berisha- Abdullahu, Arian Zherka dhe Fjolla Asllanaj, shkruan KultPlus.
Tingujt e parë të këtij koncerti nisën kur në skenën e Amfiteatrit të Bibliotekës Universitare erdhën Blerim Grubi me violinë dhe Frank S.Dodge me violonçello të cilët më një koordinim muzikor dhe me një përkulje me buzëqeshje ndaj njëri-tjetrit sollën veprat e Bethovenit.
Pas interpretimit të parë mbrëmja vazhdoi me tingujt të violonçellos, ku Frank S.Dodge vazhdoi në interpretim të përbashkët me violonçelistin kosovar Antonio Gashi, ku lëvizjet e tyre artistike mbi çello sillnin një përsosmëri tingujsh.
Frank S.Dodge i vënë prapa çellos së tij, e i rrethuar me çelistë të tjerë, sikur niste vargun e tingujve që lëviznin në sallë. Veprat e Schumanit, Rossinit, Regerit, Wagnerit e Popperit erdhën përmes një numri më të madh violonçelistësh por që në mes të tyre ndodhej Frank S.Dodge që së bashku me Antonio Gashin ishin epiqendra e tingujve që shpërndaheshin, e përcilleshin më shumë përkushtim nga çelisti grek Miltiades Cassaras, duke vënë pastaj në skenë edhe një gjeneratë më të re çelistesh si Arian Zherka, Vjosa Berisha, e Fjolla Asllanaj.
Frank S.Dodge lëvizte kokën me shpejtësi herë në njërën anë e herë në tjetrën ku ndodhej i rrethuar me çelistë të tjerë derisa mirëpriste secilin që i bashkohej. Ai për KultPlus tha se veçantia e këtij festivali është pikërisht puna e përbashkët me artistët e tjerë.
“E mira e muzikës, që po vije edhe në këtë festival është se neve si artistë na mbledh së bashku kur kohën më të madhe e kalojmë duke menduar se si të dalim në skenë dhe si të arrijmë t’i bëjmë gjërat sa më mirë së bashku. Për mua ishte kënaqësi të luaj së bashku më të gjithë këta instrumentist dhe mendoj që ishte një shans e mirë edhe për çelistët e rinj që të luajnë më këtë program të këtyre veprave”, tha Dodge për KultPlus.
Po ashtu dhe çelisti kosovar, Antonio Gashi thotë se përkundër interpretimit në një sallë të ftohtë, kënaqësia më e madhe mbrëmë i erdhi nga atmosfera dhe emocionet që morën nga pubiku.
“Edhe pse në këto kushte të ftohta prapë arritëm ta bëjmë një atmosferë të këndshme për adhuruesit e muzikës klasike në Prishtinë. Megjithëse provat dhe festivali kanë një kohë shumë të shkurtër për përgatitje, përkundër kësaj u munduam që ta sjellim një program shumë të mirë. Sonte e arritëm një punë shumë të mirë së bashku me instrumentistin prej Greqisë dhe Gjermanisë dhe gjithashtu edhe studentët dhe kolegët e mi nga Prishtina, kjo duke qenë se publiku ishte shumë i kënaqur. Koncepti i programit ishte nga Sihana Badivuku në konsultim edhe me neve, kjo ishte një kohë relativisht të shkurtër duke qenë se duhej kombinuar edhe ansamblet e ndryshme. Megjithatë ngrohtësia e publikut që nuk e braktisi sallën ishte emocionuese për neve”, tregoi Gashi për KultPlus.
Vjosa Berisha – Abdullahu, e cila i prin gjeneratës së parë të studenteve të diplomuar në Universitetin e Prishtinës, në degën e violençelos, duke qenë studentja e parë e diplomuar në këtë degë. Bashkëpunimin e kësaj mbrëmje me instrumentistë të njohur ajo e quan si një privilegj dhe bashkëpunim të suksesshëm.
“KamerFesti gjithmonë sjellë risi dhe është një festival që na bënë të ndihemi mirë edhe kur luajmë edhe kur dëgjojmë në të por sidomos me qenë e rrethuar më këta violençelist të mëdhenj siç kemi pasur rastin sonte të interpretojmë së bashku me Frankun dhe Miltiades është një kënaqësi dhe privilegj i madh. Përkundër që ishte shumë ftohtë ne së bashku përmes këtij bashkëpunimi jemi munduar që ta sjellim më të mirën e mundshme për publikun”, tha Abdullahu.
Nesër ky festival do të vazhdoj me koncertin e dhjetë në Sallën e Kuqe të Pallatit të Rinisë ku do të sjellë pianistin Yesim Gokalp nga Turqia së bashku me Filharmoninë e Kosovës e që do të interpretojnë veprat e Mozartit, Bordinit dhe të Tchaikovskit. G.H/ KultPlus.com
“Në kujtim të baballarëve tanë” u titullua koncerti i tetë i KamerFest Kosova ndërsa me mjaft emocion e përkushtim erdhi përmes violinistes nga Kosova, Sihana Badivuku dhe pianistit nga SHBA, Derek Han, shkruan KultPlus.
Një homazh për Hysen Badivukun dhe Lit Sien Han, u përmblodh me një koncert prej tri sonatave të kompozitorëve Schubertë, Bethovenit dhe Griegut. Një reflektim muzikor për një lidhje të veçantë shpirtërore, vije përmes një programi të pasur muzikor kur Sihana Badivuku e Derek Han zënë vendet e tyre në skenë. Sihana Badivuku vendosur në mes të saj, me lëvizjen e harkut të violinës dukej si me një shpejtësi sillte tinguj të pasur përmes saj. Ajo lëvizte herë një hap prapa, e herë para duke i përcjellë në përpikëshmëri notat e partiturës.
Sihana Badivuku e cila njëherësh është edhe drejtoreshë artistike e këtij festivali, tregoi për KultPlus, që gjatë interpretimit erdhi më një përgjegjësi e të madhe ndaj publikut dhe kompozitorëve.
“Ishte përgjegjësi e madhe të performoje pranë këtij publiku dhe ta kryesh obligimin ndaj kompozitorëve veçmas dalja në skenë si një artiste/soliste pas të gjitha atyre organizimeve si drejtoreshë artistike” u shpreh Badivuku.
Biografia e saj ka një pikënisje që e lidh tërë veprimtarinë e saj me babanë duke qenë se mësimet e para i kishin nisur së bashku. Ndërsa mbrëmë ajo dukej që përmes këtij dedikimi, i falte dhe një shpërblim atij, të cilin e quan meritor të punës së saj. Ndjeshmëria që ajo e përktheu në interpretimin e veprave, e solli po ashtu edhe me fuqishëm përmes syve të mbushur me lot, teksa flet për KultPlus.
“Krejt këto çfarë i dëgjuat sot janë meritë e tij, është puna dhe angazhimi i tij që ka hulumtuar në atë kohë profesorët më eminent në ish- Jugosllavi, profesorët rus dhe ka paguar nga gjepi i tij për këto orë private për ngritur një violiniste të re në një violiniste të zhvilluar’, tha Sihana për KultPlus.
Derek Han,i cili po ashtu këtë vit kishte përjetuar të njëjtën humbje, këtë dedikim muzikor e reflektonte me një dedikim shpirtëror derisa lëvizte duart herë në njërin skaj, e herë në tjetrin, e që e përcillte me lëvizje të këmbeve një harmoni me tingujt që shpërndante. Për Derek Han,interpretimi i mbrëmshëm ishte një rrjedhë e natyrshme e tingujve, ndërsa vepra ishte më shumë se një dedikim, ishte një lutje për baballarët që nuk jetonin më.
“Është e jashtëzakonshme të luash më Sihanën, në muzikën e saj u demonstrua jo vetëm si një person i cili punon shumë , ajo është edhe një shembull shumë i mirë jo vetëm për këtë vend por për tërë botën muzikore. Ishte sugjerimi i saj që të luajmë në nderim të baballarëve tanë. Në veprën e fundit vërehej veçmas dedikimi i Sihanës që po luante për babanë e saj, por njëjtë edhe për mua vepra e fundit ishte si një lutje për baballarët tanë”
Të mrekullueshëm dhe emocional e cilësoj këtë program edhe profesoresha Besa Luzha, e cila për KultPlus tha se këto kryevepra të dy instrumentistet i sollën më mjaft mjeshtëri.
“Sihana këndon me violinën e saj, sonte koncerti ishte me një përkushtim të mahnitshëm duke qenë se ishte dedikim ndaj baballarëve të tyre që ishte mjaft emocionuese. Edhe vepra e parë dhe e dytë janë kryevepra të cilat mjeshtërit si Sihana dhe Dereku e luajtën jashtëzakonisht bukur edhe sonata e Greigut ishte tamam një këngë për piano dhe violinë”, u shpreh Luzha për KultPlus.
Festivali KamerFest Kosova do të vazhdoi të hënën nga ora 20:00 në Amfiteatrin e Bibliotekës Universitare ku do të sjellë koncertin e nëntë me radhë “Vetëm Harkorë” me instrumentist nga Kosova, Greqia, Maqedonia dhe SHBA-ja. G.H./ KultPlus.
Fotografitë: Neb Zeka KamerFesti arriti në koncertin e shtatë “Derek Haan me miq” që mbrëmë solli kryeveprat kamertale përmes interpretimit në piano nga Derek Haan nga SHBA-ja, Sihana Badivukun në violinë, Rron Bakallin po ashtu në violinë, Blerim Grubi në violë dhe Frank S.Doodge në violençel, shkruan KultPlus.
Derek Han ishte ai që kishte zënë hapësirë me pianon prapa interpretuesve të tjerë. Në momentin kur ai vendos duart në piano dhuron shenjen e parë të fillimit të këtij koncerti. Herë- herë e vëreje luhatjen e kokës së tij, që e bënte edhe më të thellë praninë e tij artistike në skenë.
Veprat e përbashkëta që erdhën sonte për shkak të afërsisë me koleget Haan i përshkroi si një kthim në shtëpi.
“Është një kremtim i bukur muzikor me të gjithë koleget dhe me një audiencë të mrekullueshme në një festival kaq të mrekullueshëm. Nuk ishte e vështirë që t’i sillnim këto kryevepra bashkë për shkak se ne kemi luajtur edhe më parë së bashku, ishte sikur të kthehesh në shtëpi”, tregoi Haan për KultPlus.
Para Han, ndodhej Sihana Badivuku, e cila rrëshqiste në një melodi të pasur, në një kordinim me Blerim Grubin në violë e Frank S.Doodge në violençel. Dukej që tingulli i secilit nga të tre të shpinte drejt një botë të re muzikore duke sjellë kështu veprat e Brahms, e më pas edhe veprat e Shostakovich.
Frank S.Doodge, interpretimin e tij muzikor e mbështet në lojën e tij artistike në violinçelo ku lëvizte kokën që nga momenti kur nis të jap një melodi, drejt anës tjetër ku përpiqej që asaj melodie t’i jepte drejtim tek publiku. Derisa në interpretimet e fundit mbyllë sytë ndërsa kthen shikimin vetëm kur arrin të jap një tingull. Ai erdhi për të tretën herë në KamerFest dhe tregoj për KultPlus se Kosova është një vend që ka nevojë për shumë mbështetje të kësaj muzike.
“Kosova është një vend ku njerëzit janë shumë të etur për muzikë, për të performuar dhe për t’i përmirësuar kushtet. Është e mrekullueshme të kthehesh në Kosovë dhe të shohësh një entuziazëm kaq të madh nga publiku, andaj koncerte të tilla do duhej të mbështeteshin sa më shumë sepse është një ndër gjërat më të rëndësishme të sistemit të edukimit, e që duhet të merret shumë më seriozisht”, u shpreh Doodge.
Në pjesën e dytë të koncertit skenës së këtyre artistëve me përvojë iu bashkua edhe një violinist më i ri në moshë por që arrinte me meloditë e tij të ecte në një vijë me të tjerët në interpretimin e veprave të Shostakovich.
“U ndjeva shumë mirë të performoj krah profesoreshës time Sihana Badivuku dhe me profesorët e tjerë, duke e parë si një mundësi mjaft të mirë për zhvillimin tim. Ka qenë pak e vështirë për mua si student interpretimi i këtyre veprave, duke e pasur parasysh edhe kohën e shkurtër mirëpo bashkëpunimi me këta muzikantë e bëri këtë gjë shumë më të lehtë”, tha Rron Bakalli për KultPlus.
Koncerti me një tempo graduale arriti që në fund të tij të shpërthej në gjallëri derisa tingujt po lëviznin gjithnjë e më shpejtësi drejt hapësirës.
KamerFest sonte do të sjellë koncertin e tetë me radhë me interpretimin e violines nga Sihana Badivuku dhe Derek Han në piano. Koncerti do të mbahet në Amfiteatrin e Librarisë së Universitetit të Prishtinës duke filluar nga ora 20:00. / KultPlus.com
Nata e pestë e Festivalit Kamertal “Kamerfest” erdhi me koncertin “Piano për duo, quattro, otto” duke sjellë në skenë së bashku pianistë të mëdhenj nga SHBA-ja, Franca, Shqipëria e Maqedonia, shkruan KultPlus.
Në të tri anët e Sallës së Kuqe në Pallatin e Rinisë publiku kishte ngulur sytë në pianistin Derek Han nga SHBA-ja, afër të cilit rrinte pianisti shqiptar Klevis Gjergji. Në sallë erdhën meloditë e kompozuara nga Mozarti e që vinin nga katër duar të këtyre dy artistëve, derisa ndonjëherë mbeteshin vetëm tri duar në piano kur njëri nga ta lëvizte me shpejtësi fletët e partiturës duke i dorëzuar kështu herë-herë melodinë njëri-tjetrit. Nga Mozarti, pianistët përshkuan një udhëtim muzikor tek Schuberti, duke rikthyer kështu përsëri interpretimin e Derek Han pranë të njëjtës piano por i shoqëruar nga krijimi i tingujve të pianistit francez, Bertrand Giraud duke dhënë po ashtu një bashkëveprim me melodi që shpeshtoheshin.
Koncerti erdhi me një ritëm edhe më të fuqishëm kur pranë të dy pianove që ndodheshin përballë, në njërën piano ishte Bertrand Giraud i cili ndonëse kishte një shprehje të qetë fytyre gjatë interpretimit, ai solli mjaft tinguj të fuqishëm së bashku me pianistin nga Maqedonia, Shkëlzen Baftiari. Interpretimi i veprës së Ravel nga këta dy autorë ishte momenti i parë dhe i vetëm ku përdoren të dy pianot e vendosura në sallë pasiqë në vepra e Rachmaninoff, do të ulte së bashku në një piano të tre pianistet Derek Han, Bertrand Giraud dhe Shkëlzen Baftiarin. Mirëpo koncerti arriti kulmin me veprën e Lavignac kur të njëjtën piano e ndanë të katër pianistët që interpretuan gjatë koncertit. Duke mos lenë hapësirë afër njëri-tjetrit por duke e plotësuar në mënyrën më të mirë artistike veprën, lëvizjet e tetë duarve dukej sikur sillnin një valle të bukur melodish.
Derek Han, pianisti nga SHBA-ja, mbrëmë ishte kthyer në edicionin e 18-të pasiqë kishte qenë pjesë e rrugëtimit të parë të KamerFestit në edicionin e parë të tij.
“Është një gjë e mrekullueshme të shohësh KamerFestin pas tetëmbëdhjetë vitesh, dhe të shohësh Prishtinën, të cilën e mbaj mend nga KamerFesti i parë kurse tani është shndërruar në një qytet të madh evropian. Kosova do duhej të ndihej krenare për një festival si KamerFesti dhe për progresin e këtij festivali gjatë këtyre viteve”, tha Han për KultPlus.
Po ashtu Han shtoi se interpretimi i kësaj mbrëmje edhe pse i vështirë të luhej me gjashtë dhe tetë duar, në të njëjtën kohë i solli atij edhe shumë kënaqësi.
Ndërsa pianisti nga Maqedonia Shkëlzen Baftiari, i cili thotë se është familjarizuar me mirëpritjen e publikut në këtë objekt tregoi për realizimin e këtij koncerti.
“Përzgjedhjen e programit e kemi bërë brenda një kohe të shkurtër, ka qenë pak e vështirë sepse janë vepra shumë të mëdha dhe të vështira kurse prova kemi bërë shumë pak, ku jemi takuar vetëm dje dhe sot me një provë. Unë kam kaluar shumë mirë me publikun këtu, ku unë jam gati çdo vit në Kosovë bile njihem edhe me publikun dhe shumicën e njerëzve këtu”, tregoi Baftiari për KultPlus.
Nesër po ashtu në Sallën e Kuqe të Pallatit të Rinisë, duke filluar nga ora 20:00 KamerFesti do të sjellë koncertin e gjashtë me pianistin nga Franca, Bertrand Giraud dhe Klevic Gjergjin nga Shqipëria të cilët së bashku me Orkestrën e Harqeve të Festivalit do të interpretojnë veprat e Poulencit dhe Brittenit./ KultPlus.com
Koncerti i katërt i titulluar ‘Cello, Shpirti i Romantizmit’ në ‘Kosova Kamerfest’ solli mbrëmë një bashkëpunim mes instrumentistit grek Militiades Cassaras në violoncello dhe shqiptarit Klevis Gjergji në piano, shkruan KultPlus.
I vendosur në mes të skenës së Amfiteatrit të Bibliotekës Universitare, çelisti grek Militiades Cassaras dëshmoi bagazhin e tij prej triumfuesit të shumë çmimeve si fitues i vendit të parë në garat shtetërore të çelos “ART”, në garat “Solistët e rinj” të Velos dhe Garat e solistëve të Rinj të Orkestrës Shtetërore të Athinës. Cassaras kordinonte lëvizjet e tingujve me lëvizjet e trupit e të fytyrës derisa gjente pozicionin më të përshtatshëm për të dhënë tinguj të cilat me ngadalësi shtereshin brenda sallës.
Të dy, të kordinuar mes një shikimi anësor sollën një harmoni muzikore të veprave nga autorë që kryesisht i përkisnin periudhës së romantizmit mirëpo që vijnë nga zona të ndryshme si veprat e Mendelssohnit e Schumannit nga Gjermania, Tchaikovskit nga Rusia Schubert Austri, e , Piattite nga Italia. Ata sollën tinguj herë më të lehtë e herë më të thumbueshëm, me meloditë e instrumenteve që rrallë braktisnin njëra-tjetrën.
Militiades Cassaras, i cili për natën e dytë shkeli këtë skenë të edicionit të dytë të festivalit tregon kënaqësinë që i ka sjellë interpretimi i veprave të sotme dhe ngrohtësia që mori nga publiku.
“Kemi zgjedhur stile të ndryshme të interpretuarit nga kompozitorë nga vende të ndryshme me përfaqësues kryesor të romantizmit. Unë dëshiroj të bëjë recitale të tilla duke kombinuar vepra të ndryshme në mënyrë që të sjellë kënaqësi dhe të ju përshtatem edhe atij publikut që nuk është shumë i mësuar me muzikën klasike”, tha Cassaras pë KultPlus.
Jo larg tij qëndronte në piano, shkodrani Klevis Gjergji. Ai mbrëmë erdhi për herë të dytë në këtë edicion, pasiqë herën e kaluar kishte përcjellur bason shqiptar Frano Luffin, ai edhe këtë bashkëpunim e cilësoi të mirëpritur nga publiku duke u shprehur i kënaqur që sonte erdhi me një duo me çelistin Cassars, të cilin e vlerësoi si një artist me intelekt të lart muzikor.
“Sot këngëtarët duhet të mendojnë sikur zëri është tingull i çelos dhe çelistët tingullin e çelos duhet ta konsiderojnë sikur zë i njeriut, andaj shumica e gjërave janë të njëjta mirëpo çdo artist ka mënyrat e veta të trajtimit, andaj duhet të përshtatesh në një festival të tillë ku koha është e shkurtër”, tregoj Gjergji.
Edhe kur dukej se artistët po përshëndetnin publikun me interpretimin e fundit, publiku nuk ishte i gatshëm për të dhënë duartrokitjen e fundit veprave të këtij bashkëpunimi. Por as kur këta instrumentist u përkulen për të tretën herë në shenjë mirënjohje pas përfundimit të veprës, e as kur u larguan për të dytën herë në prapaskenë nuk u ndalën duartrokitjet në kërkim të një vepre të fundit.
Nesër KamerFest Kosova nga ora 20:00 do të hap dyert e Sallës së Kuqe në Pallatin e Rinisë me interpretim të pianos nga Derek Han nga SHBA, Bertrand Giraud nga Franca, Klevis Gjergji nga Shqipëria, dhe Shkëlzen Baftjari nga Maqedonia.
Nata e pestë e këtij koncerti do të sjellë vepra të Mozartit, Schubertit, Ravelit, Rachmaninoff dhe Lavignac. / KultPlus.com
