Sot, në Rezidencën 17, në kryeqytet është zhvilluar MasterClass-i i radhës me artistë të rinj,në të cilën ligjëroi drejtoresha e Kulturës në Komunën e Prishtinës, Sibel Halimi.
Kjo punëtori, e cila u zhvillua nën udhëheqjen e profesoreshës së artit, Majlinda Kelmendi, është konsideruar si një platformë thelbësore ku artistët e rinj mund t’i ndajnë idetë dhe përvojat e tyre, duke u përqendruar në zhvillimin e mëtejshëm të aftësive të tyre artistike.
Drejtoresha Sibel Halimi, zhvillimin e kësaj punëtorie e ka quajtur një hap të rëndësishëm drejt forcimit të lidhjeve ndërmjet artistëve dhe komuniteteve të ndryshme.
“Duke nxitur dialogun ndërkulturor dhe zhvillimin e artit bashkëkohor në Kosovë, ne po kontribuojmë në ndërtimin e një shoqërie të lirë dhe të hapur.
Jam veçanërisht e lumtur që Drejtoria për Kulturë mbështet iniciativa të tilla që shfrytëzojnë artin si një mjet për të arritur komunikimin ndërkulturor. Kjo mbështetje është jetike për të siguruar që artistët tanë të rinj të kenë mundësitë e duhura për të zhvilluar talentin e tyre dhe për të kontribuar në skenën kulturore të kryeqytetit tonë”, ka shkruar drejtoresha Halimi në Facebook./ KultPlus.com
As gur as pishë në majë të Hajlës Vetëm Zoti vjen të të vizitojë Ty Ai (s)’ flet Shqip me Gjuhën e Nanës Se ti Muzë herët i shkove në sh’pi
A vure syzë e dylbi në majë Kosovën a e pate në shuplakë dore Rrafshi e bjeshka a kishin kund skaj Tomori a kishte ende lara bore
Në Mokna a ushtonte bubullimë topi Në Smilovicë a ishte zënë prita Gurra e Synës a nxirrte ujë loti Në Gropa t’Buk’ra si zbardhte dita
Karvani i Bardhë a u ndal në pikë N’Kacuberr e n’Neqinat lart n’sogjore Tek bëre bashkë Korab e Koritnik A i njome me këngë gjithë ato bregore
A i hodhe shigjetat te Kom’i Kuçit A i lave sytë në Liqenin e Shkodrës Ç’bënin në Malësi trimat e Dedë Gjo Lulit Të fala a u bëre Prespë e Ahritë motrës
Ç’kënge ia thoshin Therandë e Pashtrik Si gurgullonte Drini nëpër Alpe A vezullonte ari mbi Kopaonik Tek vendoste sitat për fjalët kalke
Çyçavicë e Sharr a ta bënë me dorë A të lodhi me dylbi bukuria Ajme! Kësaj herë s’pimë tamëleborë Se llava priste grixhën te Rusolia
Hajla ngritet lart e lart mbi qiell Me këngën tënde herët të këputur Ajo me Shkëlzenin lahet në diell Bashkë me vargun tënd t’bukur
Zëri yt gjithmonë vjen ke Vërrini Natën e ditën në gjumë dhe në mur Unë si s’e mësova atë këngë hutini Që cicërin e këndon zog mbi gur
(Me rastin e 86-të vjetorit të lindjes së Poetit)/ KultPlus.com
Sot ka vdekur profesori dhe ish-rektori i Universitetit të Prishtinës,”Hasan Prishtina”, Zenel Kelmendi, shkruan KultPlus.
Profesor Kelmendi ishte një nga profesorët më të vjetër të Fakultetit të Mjekësisë, përderisa në post udhëheqës të UP-së, ka qenë përgjatë viteve 1999-2004./KultPlus.com
Artistja Majlinda Kelmendi ka hapur ekspozitën e saj personale ‘Algoritmi Simbolik’ në Mal të Zi, përcjell KultPlus.
Koncepti “Algoritmi Simbolik” lidhet me fushën e sigurisë së informacionit.
Artistja shpreh lidhjen e algoritmit simetrik me veprat e artit të cilat kanë lloje të ndryshme të kodimit dhe dekodimit.
“Në këtë kontekst, eksploroj koncepte të tilla si sekreti, fshehtësia dhe interpretimet e ndryshme të komunikimit dhe simboleve. Imazhet që përfaqësohen nëpërmjet simboleve, objekteve në ciklin Algoritmi Simbolik kanë qëllim për të shkaktuar refleksion dhe të nxisë diskutimin rreth aspekteve të ndjeshme të privatësisë dhe sigurisë në shoqërinë moderne të dixhitalizuar”, shprehet artistja Kelmendi.
Në hapjen e kësaj ekspozite foli edhe drejtori i Qendrës Kulturore Informative ‘Malësia’ në Tuz, Vasel Berishaj.
“Sonte e keni rastin të njiheni me krijimtarinë e artistes së njohur dhe bashkëkohore, Majlinda Kelmendi. Është e spikatur për punën multimediale, në sfondin e së cilës dominojnë, kryesisht, ndodhitë në sverat sociale, ekonomike, politike dhe historike, si në nivel lokal, ashtu edhe global”, u shpreh Berishaj.
Ekspozita është përkrahur nga MKRS dhe QKI “Malësia” Tuz, Mali i Zi dhe do të qëndrojë e hapur deri me datë 27 qershor./KultPlus.com
Të gjithë nxënësit e qytetit të Mitrovicës do të kenë mundësi që të jenë pjesë e demonstrimit të xhudos me kampionen olimpike, Majlinda Kelmendi, e cila ngjarje është në kuadër të programit shtetëror “Kosova, shtet i xhudos”, shkruan KultPlus.
Ky program përmes komponentës “Xhudo në shkolla – xhudistët e rinj”, ka për qëllim të zhvillojë masovizimin dhe integrimin e disiplinës së xhudos në të gjitha shkollat dhe komunat e Kosovës.
“Bashkë me trajnerët dhe xhudistët e klubit të xhudos “Trepça”, Majlinda Kelmendi do të prezantojë disiplinën e xhudos dhe do të takohet me të gjithë të rinjtë për të festuar kulturën dhe arritjet e xhudos në Kosovë”, thuhet në njoftimin e MKRS.
Ngjarja do të zhvillohet më 7 qershor në ora 14 në sallën e sporteve “Minatori” në Mitrovicë./KultPlus.com
Albina dhe Familja Kelmendi do të ngjiten sonte në skenën e Eurovizionit për të perfomruar për së dyti herë këngën e tyre „Duje“, pasi që siguruan finalen.
Shqipëria në natën e dytë gjysmë finale ishte e para që u kualifikua në finale.
Performanca e Albines dhe Familjes Kelmendi në bazë të klikimeve në Youtube është një ndër më të shikuarat. Aktualisht ka arritur 1 milion klikime, derisa shifra milionshe kanë kapur edhe Izraeli, Kroacia, Norvegjia, Suedia, Italia, Çekia.
Albina dhe familje e saj sonte do të përformojnë të dhjetit në radhë./21Media/KultPlus.com
Këngëtarja nga Kosova, Albina Kelmendi, e cila denjësisht po përfaqëson Shqipërinë në Eurovision, të enjten mbrëma u ngjit në skenën e Liverpulit.
Ajo së bashku me Familjen Kelmendi elektrizuan sallën e “M&S Bank Arena” dhe kështu siguruan të parët votat e audiencës për ta çuar vendin që përfaqësojnë në finalen e madhe të kësaj gare evropiane.
Me të nisur kënga “Duje”, e gjithë skena e këndimit u shndërrua në kuq e zi – ngjyra këto që përkonin me flamurin kombëtar.
Për paraqitjen më të rëndësishme në karrierën e saj deri më tani, Albina ishte përkujdesur që të vishej me një kostum të zi e të dekoruar me copëza metali që në tërësi dukej si ato veshjet tradicionale të nuseve shqiptare, por njëkohësisht ngjasonte edhe me heroin kombëtar shqiptar, Gjergj Kastrioti Skënderbeu.
Madje në një çast kur kënga u bë edhe më ritmike, Albina & Familja Kelmendi i nxorën pecetat dhe filluan të vallëzojnë (pjesërisht) valle kombëtare – kështu duke e vulosur identitetin e tyre.
Pas kualifikimit, ajo ka bërë një prononcim për media, ku ka thënë se Kosova dhe Shqipëria janë si vëlla dhe motër që kanë një nënë Shqipërinë e Madhe.
“Ne jemi të një gjaku, të të njëjtit nacionalitet. Kosova dhe Shqipëria janë si vëlla dhe motër dhe ne kemi një nënë që është Shqipëria e Madhe”, tha Albina.
Shtetet tjera që arritën të kualifikohen në natën e dytë gjysmëfinale janë edhe Qiproja, Estonia, Belgjika, Austria, Lituania, Polonia, Australia, Armenia dhe Sllovenia.
Ndërkaq, në natën e parë gjysmëfinale, për finalen e së shtunës u kualifikuan Kroacia, Moldavia, Zvicra, Finlanda, Çekia, Izraeli, Portugalia, Suedia, Serbia dhe Norvegjia.
Tani këto 20 shtete, plus gjashtë të tjera, në mesin e tyre fituesi i vitit të kaluar që është Ukraina, por edhe “pesëshja e madhe”, Britania e Madhe, Gjermania, Franca, Spanja dhe Italia, do të garojnë të shtunën mbrëma për finalen e madhe të Eurovision 2023, me ç’rast juria dhe publiku do të vendosin për fituesin.
Kujtojmë se nga viti 2004, kur Shqipëria u paraqit për herë të parë në këtë garë, asnjëherë nuk arriti ta fitojë atë. Pozita më e lartë e arritur është vendi i 5-të në vitin 2012 me këngëtaren Rona Nishliu.
Tani Albina & Familja Kelmendi shpresojnë se do ta shkruajnë historinë duke u renditur më së larti në Eurovision.
Kush është Albina Kelmendi?
E lindur në Pejë më 27 janar të vitit 1998, qysh në moshë të re ajo nisi të merrej me muzikë dhe shkrim të teksteve.
Kelmendi mori famë në moshën 16-vjeçare në finalen e “The Voice of Albania”, kur të katër gjyqtarët pëlqyen paraqitjen e saj.
Në qershor të vitit 2022, ajo publikoi albumin e saj debutues, “Nana”, i cili u vlerësua pozitivisht.
Ndërsa më 23 dhjetor 2022, Albina & Familja Kelmendi u shpallën fitues nga votat e publikut me këngën “Duje” në edicionin e 61-të të “Festivalit të Këngës” në RTSH. Me këtë fitore u vendos se ata do ta përfaqësojnë Shqipërinë në Eurovision 2023.
E quajtur Albina & Familja Kelmendi, asaj i bashkohen në grup nëna Albana, babai i saj Bujari, vëllai i saj Albini dhe motrat Vesa dhe Sidorela.
Ky është teksti i këngës përfaqësuese të Shqipërisë në Eurosong:
Diçka mrena Frymën ma nal’ S’di çka bohet, bohet Po du me e nal’ (Ç’ka o ka bohet?!) Krejt tu i pas’ E krejt tu i pas’ S’po muj me u k’naq
Jan’ tu u nda Vec për nji fjal’ Jan’ tu u nda Dashnin’ kan’ vra Jan’ tu u nda E kan’ harru Se kan’ nji shpi Sofër me f’mij’
Duje! Si dikur ti duje At’ dashni ti ruje! Si jeten ti duje! Mos e gjuj me gure! Si dikur ti duje At’ dashni ti ruje Sa jeten ti duje!
Jan’ tu u nda Vec për nji fjal’ Jan’ tu u nda Dashnin’ kan’ vra Jan’ tu u nda E kan’ harru Se kan’ nji shpi Sofër me f’mij’
Duje! Si dikur ti duje At’ dashni ti ruje! Si jeten ti duje! Mos e gjuj me gure! Si dikur ti duje At’ dashni ti ruje Sa jeten ti duje! (Duje , duje) Jan’ tu u nda (Duje, duje) Vec për nji fjal’ Jan’ tu u nda Dashnin’ kan’ vra ( Duje, duje) Jan’ tu u nda (Duje, duje) E kan’ harru Se kan’ nji shpi Sofër me f’mij’ (Duje, duje)/Klan Kosova/KultPlus.com
