Etiketë: Kisha e “Shën Marisë”

Komuniteti dhe shteti bëhen bashkë për të shpëtuar kishën e fshatit Niçë

Posted on by Kult Plus

Rikthim sërish tek kisha e “Shën Marisë”, pasuri kulturore shumë e rëndësishme në zonë dhe në qarkun e Korçës. Me këto fjalë, kreu i DRTK Korçë, Gjergji Koki, ka njoftuar nisjen e restaurimit të kishës së fshatit Niçë.

Ndërhyrja e shpëtimit të kishës së “Shën Marisë”, është bërë e mundur falë ndihmës financiare të familjeve me origjinë nga kjo zonë dhe Shoqatës Kulturore Nica Vllahe.

Kjo ndërhyrje shpëtimi konsiston në restaurimin e këmbanares dhe çatisë të nartekstit, të cilat rrezikonin shembjen.

Ekipi i DRTK Korçë po qëndron prej ditësh në një terren të vështirë dhe jo lehtësisht të aksesueshëm, për të realizuar këtë ndërhyrje të rëndësishme.

Një falënderim për kontributin financiar të komunitetit, punën e palodhur të ekipit të DRTK Korçë si dhe mbështetjen e Bashkisë Pogradec për këtë nismë shpëtimi, ka bërë edhe ministrja e Kulturës, Elva Margariti.

Në një postim në rrjetet sociale, ministrja shkruan “kënaqësi kur komuniteti dhe shteti bëhen bashkë për të shpëtuar trashëgiminë kulturore dhe shpirtërore. Trashëgimia është e të gjithëve”.

Kisha e “Shën Marisë” në Niçë është një objekt kulti i rrallë, i ndërtuar në vitin 1749 mbi gurthemelin shekullor të një kishe të hershme. /atsh / KultPlus.com

“Kisha e “Shën Marisë” në Niçë, objekt kulti i rrallë

Posted on by Kult Plus

“Kisha e “Shën Marisë” në Niçë është një objekt kulti i rrallë i ndërtuar në vitin 1749 mbi gurthemelin shekullor të një kishe të hershme.

Duke sjellë pamje nga kjo kishë, deputetja socialiste Blerina Gjylameti u shpreh se “në këtë monument kulture, natyra e bukur e zonës dhe arkitektura tradicionale ku mbizotëron guri dhe druri, janë harmonizuar aq bukur me njëra-tjetrën. Bashkë me monumente të tjera kulturore dhe natyrore të Gorës i ofrojnë zonës një mundësi të madhe të zhvillimit te turizmit”.

Në malësitë e Gorës, ndodhet fshati Niçë, i cili në shekullin e 18-të ka qenë një prej zonave më të zhvilluara në periudhën e lavdishme të Voskopojës dhe Grabovës, e banuar nga popullsi vllehe.

E njohur nga historia si një qytet mesjetar e krijuar që në shekullin X nga fiset armene (vllahe) dhe vazhdon të mbetet një nga ikonat historike më pak e folur dhe e shkruar për vlerat që mbart në historinë e trashëgimisë kulturore shqiptare.

Niça në të shkuarën ka qenë nga vendbanimet armene më të hershme dhe më të populluara pas Voskopojës, e cila flet për kulturën dhe civilizimin romak e bizantin që mbarte në historinë e saj. Ajo ka qenë dhe një nyje lidhëse në rrugën e vjetër “Egnatia”, ku njëra nga degët kalonte në Grabovë dhe shtrihej pastaj drejtë Shqipërisë së Mesme dhe asaj verilindore.

Nga lavdia e dikurshme ka mbetur vetëm Kisha e Shën Marisë ndërtuar sipas mbishkrimit në vitin 1749, një nga 3 urat e vjetra dhe derstila në afërsi të saj.Kisha e rishpallur monument kulture në vitin 2015 është një dëshmi e qartë e qytetërimit, dhe zhvillimit, e restauruar në fillim të luftës të parë botërore nga vullnetarët e trupave franceze dhe banorët e zonës në mënyrë naive, sot ndodhet në një gjendje jo të mirë. Piktura murale në brendësi të saj shfaq disa skena të rralla dhe unike, të pikturuara nga Vëllezërit Jeromonahu dhe autorë të tjerë të panjohur. /atsh / KultPlus.com